Loekoe boen nanga joe gensman, Didibri!

„Hori joe prakseri na wan, de nanga ai, joe gensman, Didibri, e waka lontoe leki wan krasi lew, e soekoe foe swari wan sma.” — 1 PETRUS 5:8.

1. Sortoe gensman Jehovah Kotoigi abi, ma a de mogelek foe kakafoetoe gi en?

JOE de wan kotoigi foe Jehovah di e gi ensrefi abra na Jehovah sondro wan kondisi? Efoe dati de so, dan joe abi wan gensman di de nanga triki, wan didibri féanti. Ma winsi san na féanti dati di de nanga triki mag man foe doe ooktoe, a kan dati joe kakafoetoe gi en. Joe kan tan getrow na a moro Hé Gado, Jehovah. A no wan sani foe degedege, dati na a fasi disi joe kan abi wan prati na a poti reti foe na nen foe joe hemel Tata di joe no kan teki gersi nanga noti. Joe kan prisiri Jehovah ati troetroe èn gi wan piki tapoe na tjalansi foe a bigi spotoeman. Ija, joe kan kisi a prijs foe tégo libi ini wan paradijs foe kolokoe. — Odo 27:11; Luk. 23:43; Openb. 2:7.

2. San na apostel Petrus ben taki foe na moro prenspari gensman foe wi?

² Foe tan getrow na Gado, joe moe loekoe boen nanga joe moro prenspari gensman. Na foe en na apostel Petrus ben skrifi: „Hori joe prakseri na wan, de na ai. Joe gensman, Didibri e waka lontoe leki wan krasi lew, e soekoe foe swari wan sma.” Tokoe a kan dati joe verdedig joesrefi tégen a féanti disi, bika na apostel e go moro fara foe taki: „Ma teki joe positsi tegen en, fasti ini bribi . . . èn baka wan sjatoe ten di joe ben njan pina, na Gado foe ala no-ferdini boenfasi sa meki joe kon de stanfaste. En sa tranga joe” (1 Petr. 5:8-10). Den wortoe disi de spesroetoe foe gi trowstoe a den salfoe bakaman foe Jezus Kristus. Ma den wani taki foeroe toe gi Jehovah dienstknegti di e loekoe na fesi foe libi foe tégo na ini wan grontapoe paradijs.

3. (a) Soema de klarklari foe jepi wi? (b) Satan e gebroiki sortoe féanti foe meki den takroe marki di a abi na en fesi kon troe?

³ Efoe wi wani loekoe boen nanga wi gensman, dan wi no abi wawan jepi fanowdoe, ma wi moe sabi ooktoe sortoe taktik a e gebroiki. Jehovah Gado, Jezus Kristus, den santa engel nanga a kristen gemeente de klarklari foe jepi wi alamala foe kibri wi soifri-reti-fasi. Na a tra sé wi abi foe doe nanga wi égi onvolmaakti skin, na ogri seti foe sani disi èn Satan Didibri srefi. Ogri-atifasi e poesoe en èn a de alaten klarklari foe kari na jepi foe den toe tra féanti foe oenoe foe meki den takroe prakseri foe en kon troe. — Joh. 15:19: 1 Kor. 9:27.

4. (a) San na den fo nen di sma sabi Satan? (b) Foe san-ede meki Satan ferdini den nen „Didibri”, „sneki” èn „draak”?

⁴ Soso kaba nanga den nen di den Boekoe e gi na wi gensman, wi e kisi jepi foe ferstan en methode, en prakseri moro boen. Den e kari en Satan, Didibri, sneki nanga draak (Openb. 12:4, 9, 10). En nen Satan wani taki „haswaman” ofoe „gensman” (Job 1:6; 2:1). „Didibri” wani taki „léman foe pori sma nen”, „kragiman” ofoe „lémofo man”. Den e kari Satan ooktoe „sneki” foe di a ben gebroiki na ini a djari foe Eden wan sneki foe kori Eva (Gen. 3:1-7). Den e kari en na „draak” foe na natuurlek firi foe en foe swari sani.

Den réde foe ati nanga prakseri foe Satan

5. Sortoe standpunt Satan teki na ini a tori foe Jehovah?

⁵ Satan Didibri di biginbigin ben de wan hemel manpikin foe Gado, drai ensrefi tegen Gado èn bigin foe taki lé foe pori Gado nen. A ben de na prakseri foe Satan foe drai a libisma-famiri poeroe foe Gado foe dini den gridi marki foe en. Foe na libifasi foe Didibri e kon na krin dati a ben e poti aksi foe sma degedege na a getrowfasi foe Gado, èn ooktoe na fanowdoe foe libisma fertrow tapoe Jehovah èn foe loekoe na En foe kisi libi nanga kolokoe di e tan. Na ini a libifasi foe Didibri didon ooktoe dati a ben e stré nanga a reti foe Gado foe tiri èn na fasi fa a e tiri. Jehovah e hori ensrefi sondro degedege na a gronprakseri dati tirimakti moe de regtvaardiki èn dati meki-sani moe dini en nanga den heri ati, komoto foe lobi gi en èn foe lobi gi regtvaardikifasi. Satan na a tra sé ben teki a sé, dati wan sma moro betre kan meki gridifasi tjari en. Nanga tra wortoe, a e taki dati ala meki-sani di abi ferstan eigenlijk moe de net so gridi leki en èn disi de te joe loekoe en boen a ben de dati ooktoe. — Job, Kapitel 1 nanga 2.

6. San na waka nanga libi foe Satan e tjari kon na krin foe den réde di e bewégi en ati?

⁶ Dati Satan ben go waka na baka so wan libifasi, e sori dati a meki lostoe pasa marki foe kisi bigi nen tron wan tranga lostoe di njan en troetroe. Disi e kon ooktoe na fesi ini a sani, dati na apostel Paulus e warskow foe no poti wan sma di teki bribi njoenjoen na ini na positsi foe opziener, „sodati a no kisi bigi memre èn fadon go na ini na kroetoe di sa tjari kon tapoe Didibri” (1 Tim. 3:6). Ija, dati Didibri prefoeroe foe poti ensrefi tegen na Almaktiwan, na Moro hé wan, na Universele Soeverein, na Kownoe foe tégo, Jehovah Gado, e sori troetroe wan kefarlek bigi hé memre (Gen. 17:1; 2 Sam. 7:28 Ps. 83:18; 1 Tim. 1:17). Dati na tranga lostoe foe Didibri di e njan en de a poti hé foe ensrefi èn dati a ben djaroesoe tapoe na anbegi di mekisani di abi ferstan ben e gi na Jehovah Gado, ben kon na krin di a pristeri na Jezus Kristus „ala kownoekondre foe na grontapoe”, efoe Jezus ben sa doe wan fasi foe anbegi gi en. — Matt. 4:8, 9.

7. Foe san-ede meki Gado no ben kiri wantronwantron den oproeroeman Satan, Adam nanga Eva?

⁷ A no de foe taki dati Jehovah Gado ben kan kiri Satan nanga na fosi libisma paar sodra den ben sondoe. Ma foe den strépunt di tjari kon èn foe sar’ati nanga den bakapikin foe Adam di no ben gebore ete, meki Gado ben gi pasi dati Didibri ben tan na libi èn ben sa proeberi foe meki den tjalansi foe en nanga djaf foe en kontroe. Na a srefi ten Jehovah ben gi nanga dati na sma di ben sa wani disi na okasi foe proeberi foe tiri densrefi, loesoe foe Gado èn sondro foe den hori den regtvaardiki gronprakseri foe en na ede.

Kori ini a tori foe a de foe en

8. Fa Satan ben kori sma ini a tori foe a de foe en?

⁸ Satan e gebroiki foeroe èn foeroe sortoe triki foe meki en marki leki gensman foe Jehovah Gado go na fesl, èn efoe a ben kan, drai ala sma poeroe foe na anbegi di a Mekiman foe den moe kisi nanga reti. Wan foe den triki disi de, foe meki sma bribi dati a no de srefsrefi! Disi e meki den de wan makriki sani foe a kisi den. Na so a de ini a ten disi ini foeroe kerki groepoe foe bribi dati so wan sma leki Satan Didibri no de. Wan ondrosoekoe foe na méne foe sma di ben doe nanga jepi foe na Centrum foe Beleids-ondrosoekoe na ini na foto New York e tjari foe eksempre kon na krin dati ini 1974 moro leki afoe foe den Amerkansma no ben e bribi dorodoro na ini a de foe wan Didibri leki persoon. Srefi foeroe kerki leriman no e bribi na ini a de foe Didibri leki persoon.

9, 10. Fa e kon na krin foe na bijbel taki Satan de wan persoon?

⁹ Ma den Boekoe no e meki degedege na ini a de di Didibri de leki persoon. Na ini e kon na krin dati wan sma ben taki nanga mofo foe na sneki foe kori na fosi oema Eva èn foe meki a fadon komoto foe bribi. A boekoe Job e gi wan bewijsi moro fara foe na de foe Satan leki persoon, bikasi na ini ben e ferteri dati Satan ben e taki nanga Jehovah Gado èn ben stré tapoe na soifrireti-fasi foe Gado dienstknegti Job. Boiti foe dati, den evangelium skrifiman Mattéus, Markus nanga Lukas e ferteri dati Jezus ben kisi tesi foe Didibri. Dati den tesi dati ben moe komoto foe dorosé kon tapoe Jezus no wawan e kon na krin foe san wi sabi foe na volmaakti fasi foe Jezus nanga a sma di a de, ma ooktoe na ini a fasi foe a di foe toe tesi foe Satan. Fa Jezus ben sa kan fadon na doti gi na ogri leki gronprkaseri ofoe denki èn foe kan doe wan fasi foe anbegi gi en? Den foeroe sani di Jezus ben taki gi Satan leki persoon èn leki „na tiriman foe a grontapoe disi” e taki foeroe toe. — Joh. 12:31; 14:30; 16:11; 8:44; Matt. 4:1-10; 12:26; Luk. 10:18.

¹⁰ Den apostel foe Jezus ben meki wi kon sabi Didibri ooktoe leki persoon. Paulus ben sori dati troe kristensma no de sondro sabi foe den „prakseri” foe Satan èn na apostel ben warskow gi den „triki foe Didibri” (2 Kor. 2:11; Ef. 6:11). Soleki wi ben taki kaba, dan Petrus ben gi tranga na kompebribiman foe loekoe boen nanga a gensman foe den, Didibri. Na apostel Johannes ben kotoigi dati ’na heri grontapoe didon na ini a makti foe na ogriwan’ èn dati „Didibri sa go doro foe trowe sonwan foe oenoe [kristensma] ini doengroe-oso”. — 1 Joh. 5:19; Openb. 2:10; 1 Petr. 5:8.

Falsi fasi foe anbegi — Wan foe den wrokosani foe Satan

11. San Satan ben doe nanga na lostoe di libisma gebore nanga en?

¹¹ Wan foe den wrokosani foe Satan foe breni na ai foe sma, de falsi fasi foe anbegi (2 Kor. 4:4). Gado ben meki libisma nanga na fanowdoe foe tan ini kontakti nanga en Mekiman nanga jepi foe anbegi. Satan ben beni na lostoe disi di sma kisi foe sensi mama meki den go ini wan tra sé foe di a e taki nanga den gridifasi foe sma èn foe di a e meki moromoro sma tan sondro foe sabi na soifrifasi foe anbegi. Foe kan doro a marki foe en, „a e tan kenki ensrefi na ini wan engel foe leti” (2 Kor. 11:14). Leki wan bakapisi foe na kori disi meki sma e hori densrefi bezig nanga difrenti fasi foe falsi fasi foe anbegi.

12. Fa wi moe si falsi fasi foe anbegi nanga interbribi?

¹² Ala falsi fasi foe anbegi feni en bigin te joe loekoe en boen na Satan, bika Paulus ben ferklari „dati den sani di den naatsi e tjari leki srakti-ofrandi, den e tjari go gi den ogrijeje èn no gi Gado”. Jezus ben taki: „A sma di no de na mi sé, de tegen mi, èn a sma di no e tjari kon makandra nanga mi, e panja sani.” Boiti foe dati, Jezus no ben libi loen gi inter-bribi, ma a ben taki: „Nowan sma e kon na a Tata leki nanga jepi foe mi.” — 1 Kor. 10:20; Matt. 12:30; Joh. 14:6.

13. Fa Satan ben gebroiki na wan fowtoe fasi na gridi foe sma foe kon sabi sani di abi foe doe nanga kibri jeje tori?

¹³ Satan e meki gebroiki foe na lostoe di sma abi foe kon sabi den kibri doengroe tori foe jeje wroko èn a fasi pe den dedewan de na ini. A kisi foeroefoeroe sma nanga den sortoe sani di de kontrari na bijbel leki a taki nanga dedesma, ofoe afkodré, loekoeman wroko, astrologie nanga tofroe wroko. Na ini a ten disi moromoro belangstelling sma e abi srefi gi den sortoe afersi disi. A sani disi kon de so bigi dati son sma te joe e loekoe en boen e anbegi srefi Didibri. — Ex. 22:18; Lev. 19:26; 20:6; Deut. 18:10-12.

Satan e taki nanga na hé memre foe sma

14, 15. (a) Sortoe sani Satan ben gebroiki foe kisi Eva nanga Kaïn sofara foe dini a prakseri foe en? (b) Sortoe tra eksempre ini a srefi fasi disi a bijbel e gi?

¹⁴ Satan ben broko kindi gi na kori foe bigi memre. Foe dat’ede meki a ben wiki ini Eva wan bigi memre gridi lostoe foe de leki na Moro hé Gado, èn na sofasi a ben man foe drai oen fosi papa nanga mama poeroe foe na anbegi foe Jehovah Gado. Sondro degedege a ben de so, dati Satan na a srefi sortoe fasi disi a ben go na Kaïn. Di Didibri ben si na atibron fasi foe Kaïn, foe di en brada Abel ben kisi a boen-ati foe Gado, a ben man foe wiki na atibron dati go tron djaroesoe foe kiri wan sma. — Gen. 4:3-8; 1 Joh. 3:11, 12.

¹⁵ Te joe e waka psa na heri historia foe na libisma-famiri, dan Satan ben man foe gebrolki bigi memre sma leki en wrokosani — man soleki Nimrod, na Farao foe Egypte na ini a ten foe Mozes èn Sanherib, na kownoe foe Assyrië (Gen. 10:8-12; Ex. 5:2; Jes. 36:7-10, 16-20). Na ini a ten disi Satan e hori bigi ipi sma na ini en makti nanga jepi foe bigi memre: bigi memre foe a ras foe wan sma, nationaal bigi memre, bigi memre foe na leri di wan sma kisi, bigi memre foe na presi ini na maatschappij di wan sma abi, èn so moro fara. Ala disi de ini a marki foe Didibri, bika a e meki sma tapoe den jesi gi na boskopoe foe Gado.

Na kori foe a gridifasi foe kisi goedoe

16. Sortoe winimarki Satan ben kisi foe di a gebroiki na gridifasi foe feti baka goedoe?

¹⁶ Ete wan koni sani di Satan e gebroiki foe kisi sma de a lobi foe goedoe, gridifasi, lobi foe moni, bigi memre foe goedoe di wan sma abi. Nanga dati a ben kisi den kerki leriman ini a ten foe Jezus, di ben de sma di ben de gridi èn lobi moni (Luk. 16:14). Foe di Satan e gebroiki na kori foe na gridifasi tapoe goedoe, ’meki a ben meki Ananias abi na dek’ati foe bedrigi na santa jeje’ (Tori. 5:1-11. Èn sondro degedege a ben de so dati Didibri ben gebroiki na lobi foe sani di abi foe doe nanga goedoe èn grontapoe prisiri foe poeroe Demas nanga tra kristensma foe na dienst foe Jehovah. — 2 Tim. 4:10.

17. Sortoe boen takroe eksempre wi sabi foe wan sma di broko kindi gi na trapoe foe gridifasi di Satan ben poti?

¹⁷ Wan toemsi takroe eksempre foe wan sma pe Satan meki gebroiki foe gridifasi foe kisi en de di foe Judas Iskariot. A no ben de wawan wan gridi foefoeroeman, ma gridifasi ben pré wan rol toe na ini a tori di a ben tori en masra. Dati en prakseri ben teki a sé dati, ben kon na fesi na ini a meki bezwaar foe en di Maria ben wrifi den foetoe foe Jezus nanga diri oli (Joh. 12:4-6; Matt. 26:14-16). Fa wi moesoe loekoe foe dat’ede boen dati wi no fadon go ini a trapoe foe gridifasi tapoe goedoe, di Satan kan proeberi foe kori wi go na ini!

Satan e gebroiki pasa marki den swakifasi foe libisma

18. (a) Sortoe sani Gado ben seti sodati libisma ben sa kan njan boen foe a libi? (b) Fa Satan ben gebroiki disi foe na ogri foe libisma?

¹⁸ Wan foe den difrenti swakifasi di Satan e wroko na tapoe, de na angri foe kisi prisiri gi wan sma firi di no mag. A ben de na prakseri foe Jehovah Gado dati wi ben sa njan boen foe foeroe prisirl, èn efoe wi e prisiri wisrefi na inisé foe den skotoe di a ben poti gi oenoe, dan foeroe boen nanga kolokoe kan komoto foe dati. Ma Satan e kori sma go sofara foe poti den sani disi na a fosi presi ini den libi èn foe gi densrefi abra na den tapoe wan immoreelfasi di de tegen a wet foe Gado. Na a fasi dati Satan ben meki dati 24.000 Israëlsma ben broko kindi gi na pori foe na Baäl foe Peor (Num. 25:1-9). Na ini a ten disi a grontapoe kon law na a sé foe a feti na baka prisiri foe wan sma firi. Tijdschrift, koranti, film nanga tv-programna moro nanga moro e wroko tranga na tapoe na lostoe foe sma. Ma leki kristensma di e meki na jeje foe Gado tjari den, wi moe komoto na pasi foe den sortoe tesi disi. — 1 Kor. 14:20.

19. (a) Ini sortoe trapoe foe Satan moro foeroe jongoesma e waka go na ini? (b) Foe sortoe sani jongoesma moe loekoe boen?

¹⁹ Ete wan foe den triki foe Satan de dati a e wroko tapoe a lostoe foe abi switi span ten. Spesroetoe jongoe kristen e waka makriki go na ini a trapoe disi. Nofotron nanga den heri ati nanga sili den e gi densrefi abra na difrenti sortoe foe sport, leki sma di e loekoe èn leki sma di e teki prati. Ma na bakapisi foe dati kan de dati den e kisi „moro lobi gi prisiri leki lobi gi Gado” (2 Tim. 3:4). Na tra jongoe sma na lostoe foe abi wan span ten e de moro na tapoe pokoe na nanga singi di e gi tranga foe doe hoeroedoe nanga ogri. A de séker tranga fanowdoe foe loekoe boen, bikasi den sortoe sani disi kan kori jongoe kristen poeroe foe na pasi foe soifri-reti-fasi nanga boen fasi. — Psalm 16:11; 2 Petr. 2:20-22.

20. Fa Satan e meki gebroiki foe frede?

²⁰ Satan e meki gebroiki foe ete wan trapoe: frede foe libisma. A de wan gewoon sani dati wan sma no wani foe trawan spotoe en èn e proeberi foe komoto na a pasi foe pina. So wan sortoe frede tjari foeroe sma go so fara na ini a ten foe druk foe skeki densrefi (Odo 29:25; Hebr. 2:14,15). Nanga na jepi foe Gado noiti wi sa gi pasi dati disi pasa nanga wi.

21. Foe san-ede wi no afoe meki las’ati teki wi abra?

²¹ Ete wan triki foe Satan de, dati a e proeberi foe meki den dienstknegti foe Gado lasi ati na so wan fasi dati den e libi ala sani. Didibri ben proeberi disi séker na Job èn ben kisi en so fara dati a ben wani dati a ben dede ofoe no ben gebore noiti. Satan ben proeberi disi ooktoe na Mozes (Job 3:1-13; 14:13; Num. 11:10-15). Den getrow man disi no wan foe den toe ben meki las’ati teki den abra. Moro foeroe den ben poti densrefi akroederi na wani foe Gado. Netleki den wi no afoe meki ooktoe dati omstandigheden teki wi abra, bika Jehovah kan hori baka gi wi èn noiti sa gi pasi dati wan regtvaardiki sma fadon. — Ps. 55:22.

Tan tanapoe stéfi!

22, 23. San wi moe doe foe kan tanapoe stéfi tége den „triki” foe Satan èn foe no dini en prakseri?

²² Te joe e loekoe na winimarki di Satan ben abi — a ben sabi foe meki na moro bigi pisi foe na libismafamiri kon de vreemd foe Jehovah Gado — dan na aksi e kon na fesi: San wi moe doe? Leki dek’ati kotoigi foe Jehovah „wi moe tanapoe stéfi tegen den triki foe Didibri” tegen den kori, èn strategie nanga en taktiek (Ef. 6:11). Nanga disi wi kan bewijsi dati a de wan takroe léman di e djaf.

²³ Ma wi no kan tanapoe stéfi tegen Satan na ini égi krakti, bikasi a abi moro makti nanga krakti, moro sabi èn moro ondrofeni leki wi. Foe kan tanapoe stéfi tegen en, wi moe gebroiki foe dat’ede ala jepi sani dorodoro di Jehovah ben gi en pipel. Dan wi sa man wini na koni féanti dati!

Joe kan memre disi ete?

◻ Foe sortoe féanti Didibri e meki gebroiki foe doro den ogri marki foe en?

◻ Sortoe standpunt ini a tori foe Jehovah Didibri ben teki?

◻ Fa na bijbel e bewijsi dati Satan de wan persoon?

◻ San de wan toe sani di Didibri e gebroiki foe kisi wi, èn fa wi kan tan farawe foe kon na ini wan foe den trapoe dati?

[Prenki na tapoe bladzijde 23]

Jehovah Kotoigi no e broko kindi gi a frede foe libisma