Tjari den fini prakseri di no de foe si foe Didibri kon na krin
„Joe gensman, Didibri, e waka lontoe leki wan krasi lew, di e soekoe foe njan wan sma.” — 1 PETRUS 5:8
1, 2. (a) San ben sa kan de wan skreki situwasi, wan situwasi pe Jezus toe ben de na ini? (b) Foe san-ede sma ben proeberi foe kiri Jezus?
KON wi taki dati joe ben kon sabi dati den joeroe wan sma foe kiri joe. Kon wi taki dati a e loeroe joe na a momenti disi èn e wakti soso na joisti momenti foe fadon kon tapoe joe. Dati ben sa de wan skreki sani! Joe ben froestan oiti dati Jezus Kristus ben tanapoe na fesi wan srefi situwasi?
2 A bijbel e taki: „Jezus tan waka lontoe ini Galiléa, bika a no ben wani waka lontoe ini Judea foe di den djoe ben soekoe foe kiri en.” Ma ini 32 G.T. Jezus ben go tog na Jeruzalem, ala di en libi ben de ini gevaar, foe njan na Wiwirikampoefesa. Na a okasi dati „sonwan foe den sma di ben libi ini Jeruzalem ben taki: ’Disi no de a man di den e soekoe foe kiri?’” (Joh. 7:1, 25) Foe san-ede sma ben wani foe kiri Jezus? Foe di Didibri ben poesoe den foe doe disi! Soleki tanapoe ini Johannes 8:44, dan Jezus srefi ben taki: „Didibri ben de wan kiriman di a ben bigin.”
3. Foe san-ede na warskow di na apostel Petrus ben gi ini na tori foe Didibri, fiti spesroetoe now?
3 Soboen, a no moe froewondroe wi, dati Didibri poti na ede ini a ten disi, spesroetoe sensi a ben iti komoto foe hemel, foe kisi sma di e frede Gado kon ini en makti. A bijbel e taki: „Eroe foe grontapoe nanga na se, bika Didibri saka kon na ondro na oenoe, èn a abi bigi atibron, foe di a sabi dati a abi aoso wan sjatoe pisi ten” (Openb. 12:7-12). Disi wani taki dati Satan nanga en ogri jeje e feti wan feti nange wi nanga ala sani di den abi. A warskow fiti spesroetoe now: „Joe gensman, Didibri, e waka lontoe leki wan krasi lew, di e soekoe foe njan wan sma.” Èn efoe joe de wan Kotoigi foe Jehovah, dan joe de na ini toe. Foe dat’ede meki Petrus taki: „Hori joe prakseri na wán, de na ai.” — 1 Petr. 5:8.
4. (a) Nanga sortoe marki na prakseri Didibri e proeberi foe kon na wi na wan fasi di no de foe si? (b) Fa wawan Didibri kan abi winimarki ini disi?
4 Ma foe san-ede Didibri e kon na wi na wan fasi di pikinmoro no de foe si? A no e proberi foe kiri wi wantronwantron. Di Satan ben go na Jezus na wan koni fasi, a ben poti na ede foe tjari en so fara foe no hori stéfi ini a tori foe en anbegi foe Jehovah (Matt. 4:3-10). Di a no ben man foe tjari Jezus so fara foe trangajesi Jehovah, dan Satan ben poti leki marki foe tjari en so fara foe soekoe verlekti foe na gevaar foe dede foe no hori stéfi na en getrowfasi na Gado. Na so ooktoe now na troetroe marki foe Satan de foe pori na boen matifasi di wi abi nanga Gado. A sa abi winimarki? Wán fasi nomo de di a kan doro na marki disi. Na bijbel e ferteri wi san na fasi dati de te a e taki: „Jehovah de nanga joe, solanga joe sori dati joe de nanga en; . . . ma efoe joe libi en, dan en sa libi joe.” — 2 Kron. 15:2.
5. (a) San wi kan taki foe den taktik foe Satan? (b) San wi moe froestan alaten foe kan tan tanapoe faste?
5 Na wan sari sani foe taki, ma ibri jari agen Satan e kisi wantoe sma kon ondro en makti nanga den taktik foe en. Den sma disi e gwe libi Jehovah. Foeroe foe den moe sluit uit srefi foe na kristen gemeente foe na ogri libifasi foe den (1 Kor. 5:13). Trawan joe kan taki e tron ’strafoeman foe feti’ foedi a seti foe sani foe Didibri kisi den hori. Joe sa tan tanapoe faste èn kakafoetoe gi ala den moeiti foe Satan di abi leki marki foe meki joe libi Jehovah? Foe joe kan man foe doe disi, dan joe moe froestan alaten den fini prakseri foe Didibri di pikinmoro no de foe si?
A fasi fa Satan e wroko
6. Foe san-ede wi no abi foe de ini doengroe foe den prakseri foe Satan?
6 Wi no de na ini doengroe foe na fasi fa Satan e wroko: „Wi no de sondro sabi foe en prakseri”, na apostel Paulus e tjari kon na krin (2 Kor. 2:11). Disi wani taki dati Satan e poti prakseri tapoe wi — a e prakseri wi èn a e gebroiki ala en triki foe hari wi poeroe foe a dini foe Gado. Disi no de wan prakseri di e meki wi kon tiri? Ma na bijbel e gi wi wan finfini verslag foe Satan ogri prakseri, dati wani taki, en plan, en bidrigi fasi èn en koni foe feti, sodati nowan sma ini na tori disi abi foe de sondro sabi. Wan boen sroedati e stoeka feti di wini ini na historia foe a ten di psa èn a e gebroiki boen den sani di a e leri. Sotoe wi kan stoeka „leki boen sroedati foe Kristus Jezus”, den difrenti taktik foe Satan èn tan farawe dati wan foe den taktik di a e gebroiki no kisi wi. — 2 Tim. 2:3.
7. (a) Satan e meki gebroiki foe sortoe sani kon tesi na fesi na wi? (b) Sortoe tra taktik a e gebroiki èn foe san-ede?
7 Te foe kaba, dan den wrokosani foe Satan go abra foe behandel Jezus na wan ogr’-ati fasi èn kiri en (Joh. 19:1; Matt. 27:49, 50). Èn Jezus ben taki foe en bakaman: „Den sa gi oen abra na benawtoe èn kiri oenoe” (Matt. 24:9). Ma a kon foe den sani disi na wi, fesi na fesi, foeroetron e wroko leki wan boemerang èn den e meki dati Gado dienstknekti di e kisi ferfolgoe e sori moro faja gi en dienst (Tori. 5:41, 42). Foe dat’ede meki Satan e proeberi foeroe tron foe gebroiki tra taktik, fini taktik di no de foe si foe broko na getrowfasi foe Gado dienstknekti?
8. Fa na bijbel e tjari kon na krin dati Satan e wroko nanga fini prakseri di no de foe si?
8 A bijbel e sori tapoe den sortoe prakseri disi di no de foe si, te dek’ati e gi na ini „foe tanapoe faste tegen den bidrigi fasi foe Didibri” (Ef. 6:11). Na Griki wortoe di vertaal dja nanga „bidrigi fasi”, wani taki „triki” (Kingdom Interlinear Translation of the Greek Scriptures). Dati Satan de wan basi bedrigiman, di foeroe nanga triki, e kon toe na fesi te a bijbel e taki: „Satan srefi e tan kenki ensrefi ini wan engel foe leti.” — 2 Kor. 11:14.
9, 10. (a) San wi kan leri te wi ondrosoekoe na fosi bedrigi fasi foe Satan di waka boen? (b) San e sori dati nanga na srefi banti èn triki a e tan doe wroko?
9 Loekoe pikinso Satan fosi bidrigi fasi di ben waka boen. Di a ben go na Eva, a no proeberi foe sori taki Gado ben sa feni en boen te a ben sa njan foe na froktoe di a no ben mag njan. Eva ben sabi dati boen. Foe dat’meki Satan pré a sani so dati na froktoe ben go loekoe gi Eva leki wan sani di joe ben sa wani sote. A ferteri en dati te a ben sa wani njan na froktoe, en situwasi ben sa kon troetroe moro boen, sodati wan toemsi moi froewakti ben poti na en fesi. ’Joe sa kon de séker leki Gado’, a taki (Gen. 3:5). Eva fadon gi a tesi foe Satan. A meki wan fowtoe lostoe gro kon, di meki Eva sondoe. — Jak. 1:14, 15.
10 Satan e tan gebroiki banti nanga triki, soleki na apostel Paulus skrifi: „Mi frede dati tapoe wan ofoe tra fasi, soleki na sneki nanga en triki ben kori Eva, joe denki ben sa kan kon pori èn ben sa drifi komoto foe na opregti fasi èn krin fasi di de foe na Kristus” (2 Kor. 11:3). Efoe na kon di Satan e kon na wi no ben sa de so fini, den someni sma séker no ben sa fadon ini na feti. A e kon alaten nanga moi sani di e poeroe wi prakseri èn na wan fini fasi di no de foe si a e meki wi kisi belangstelling gi sani di te foe kaba sa stek wi jeje fasi. A de en prakseri foe swaki wi, sodati safrisafri wi sa libi Jehovah, ofoe sodati wan kon feti fesi na fesi sa abi kans foe waka boen èn sa broko wi getrowfasi gi Gado.
11. Na sortoe fasi wi kan teki den taktik foe Satan gersi nanga wan fisiman? San wi no moe frigiti noiti?
11 Satan taktik wi kan teki gersi nanga di foe wan fisiman di e gebroiki beti foe kisi fisi. Na fisiman e proeberi foe kon sabi sortoe beti sa hari den fisi kon. Te den fisi e beti, a no de foe taki dati den no e froestan dati na beti de lontoe wan aka. Fa a de nanga wi? Wi e froestan den difrenti sortoe beti di Satan e gebroiki? Wi e froestan dorodoro sortoe bakapisi a abi te „wi de na a aka”? No meki sma kori joe Satan nanga en ogri jeje de troetroe féanti di de a dan foe kisi wi! No frigiti foe dat’ede noiti dati ’na heri gronatpoe de ini na makti foe na ogriwan’. A breni na denki foe moro foeroe sma gi na sani disi. No gi pasi dati a breni joe denki. — 1 Joh. 5:19; 2 Kor. 4:4.
Fini fasi di pikinmoro no de foe si foe a lobi foe goedoe
12. (a) Sortoe prenspari beti Satan e gebroiki? (b) Sortoe sani na ai kan lostoe?
12 Wan prenspari beti di Satan e gebroiki de a lobi foe goedoe nanga prisiri (1 Tim. 6:10). A bijbel e taki na „lostoe foe den ai”, èn e warskow taki so wan sortoe lostoe ’no e komoto foe na Tata, ma foe na grontapoe’ (1 Joh. 2:16). Ini wi disiten grontapoe moro sani de leki oiti na fesi, pe na ai kan loekoe nanga gridi fasi. A moro njoen sani de ini a kontren foe njoen oso, oto, caravan, boto, krosi, tv-toestel, hi-fi installatie, oloisi, computer, video-pré èn ala tra sortoe electronisch apparatuur. Sotoe joe abi den foeroe prisiri, pe wan sma kan gi en srefi na den abra ini na vorm foe pokoe, dansi, kino, komedi, loekoe tv, difrenti sortoe sport di gersi taki den no abi wan kaba, èn so moro fara.
13. (a) Fa Satan kan kori kristen poeroe foe a dini foe Gado foe di a e gebroiki sani di kan de boen? (b) Foe san’ede wi no moe tjari dor’ai na Satan leki féanti?
13 We, goedoe nanga prisiri tapoe densrefi no abi foe de fowtoe, dati no de foe taki. Jehovah ben meki den toemsi moi hemel nanga grontapoe nanga ala en moifasi, sodati wi nanga wi ai ben sa firi switi èn a ben sa de sotoe wan switi sani gi den tra zintuigen (soleki jere, tesi, firi). A de wan sani di de krin dati den difrenti sortoe foe ontspanning èn amusement kan de boen te wan sma tan gi na joisti presi na den (1 Tim. 4:8). Tokoe na a srefi ten wi moe froestan dati Satan e gebroiki joisti den sani disi foe kori sma foe a dini foe Gado. A no de foe taki dati Satan srefi sorgoe foeroe foe na gro nanga a gebroiki foe den modern goedoe nanga prisiri disi, di ben meki someni sma prakseri poeroe foe a dini foe Gado. No tjari dor’ai na wi féanti Didibri. A de basi ini a fadon kon feti nanga joe na wan onfroewakti fasi.
14. (a) San e sori efoe fini sortoe foe a lobi foe goedoe abi krakti tapoe wan sma? (b) Fa a e kon dati wan sma sondro a de foe si kan drifi komoto foe Gado?
14 Fa joe kan sabi ofoe na fini beti foe a lobi foe goedoe di pikinmoro no de foe si abi krakti tapoe joe? Joe kan kon sabi disi efoe wan fasi foe ontspanning ofoe na feti baka goedoe bigin de wan problema gi joe stoeka foe a bijbel, na geregeld go na kristen komakandra ofoe a teki prati na a velddienst ala wiki. A de séker fenowdoe foe de nanga ai. Wan beti foe a lobi foe goedoe kan abi leki bakapisi dati joe drifi gwe, foe di a e teki moro foe joe ten, belangstelling nanga krakti (Hebr. 2:1). Te wan boto e drifi gwe, kande joe no sa si srefi, dati a e bewégi ensrefi. Ma dati a boto e drifi gwe, te foe kaba e kon na krin, foe di safrisafri a e kenki foe presi. So a de toe nanga wan sma di e drifi gwe foe na sé foe Gado nanga en organisaatsi.
15, 16. (a) Sortoe persoonlek ondrosoekoe wi ben sa wani doe nanga ala prisiri? (b) Sortoe situwasi e sori dati a de wan koni sani foe doe so wan persoonlek ondrosoekoe?
15 Wi e doe boen foe dat’ede, te nofotron wi ondrosoekoe wi kristen activiteit èn aksi wi srefi: „Mi e studeer a bijbel net so geregeld leki na ini na bigin? mi e go ala ten na komakandra leki a ben de ini a ten di psa? Mi e gi net so meni ten na a velddienst leki fosten?” Kande joe sa taki: „Ma mi abi en now moro druk.” Ma nanga san joe abi en moro druk? A ben sa kan de taki joe e gi moro ten na a feti baka prisiri, kande foe di joe e sidon moro langa na fesi joe televisietoestel? A kan de dati na tjari komakandra foe goedoe èn na sorgoe di joe moe sorgoe gi den sani disi e tapoe joe moro leki den e jepi joe na a dienst foe joe gi Gedo? Joe e poti troetroe prakseri tapoe a rai foe Jezus foe no broko joe ede nanga goedoe ma foe soekoe fosi na Kownoekondre foe Gado? — Matt. 6:31-33.
16 Na tapoe a heri grontapoe wi kan firi sari foe sma di ben fadon ini na feti — kristensma di Satan ben kori nanga den fini fasi di joe no kan si foe na lobi foe goedoe èn di no e doe dienst moro gi Gado. Kande joe sabi ini joe égi gemeente sma di wan dé ben de getrow medewrokoman, ma di now no de actief moro ini a dienst foe Gado foe di den ben fadon gi den fini beti foe a lobi foe goedoe, di ben abi leki bakapisi dati safrisafri den ben drifi gwe (Fil. 3:18). Hori foe dat’ede „joe prakseri na wan, de nanga ai”. No meki Didibri swari joe! — 1 Petr. 5:8.
Wan fini fasi di Joe no kan si foe ogri jejewroko
17. (a) Foe san-ede engel ben libi den positsi ini hemel, èn san ben psa nanga den di den watra foe na Froedoe ben fadon? (b) Den engel disi de frantwortoe foe sortoe sani?
17 Joe kan memre ete o ten tra engel ben sroiti densrefi na Satan ini en oproeroe tegen Jehoveh? Disi ben psa sjatoe bifo na froedoe. Na bijbel e tjari kon na krin dati den moi oemapikin foe den libisma ben de leki beti gi den engel. Sowan foe den ben libi den hemel dienstpositsi foe kon na grontapoe èn abi seks de-makandra nanga den moi oema dati. San den ben doe, ben de net so fowtoe leki den homoseksueel doe di den sma foe Sodom nanga Gomorra ben doe. (Gen. 6:1, 2; Jud. 6, 7). Di den watra foe a Froedoe ben fadon, den engel ben libi na skin foe meti èn den drai go baka na hemel. Aladi den engel disi no ben abi na powa moro foe teki wan libismaskin foe kowroe na tegen natuurlek sekslostoe foe den, tog den ben de toemsi aktief ini na pori foe na libismafamiri na moreel sé. Na kon moro foeroe foe ala sortoe foe seks-hoeroedoe ini disiten de wan direkt bakapisi foe di den ben iti den poeroe foe hemel èn den activiteit foe den kon de soso nomo ini na kontren foe grontapoe. — 1 Tim. 4:1; Openb. 12:9, 12.
18. Sortoe sani ini a ten di psa èn ini a ten disi e sori dati seks hoeroedoe de a moro prenspari wrokosani foe Satan foe pori Jehovah dienstknekti?
18 Hoeroedoe de alaten wan foe den moro prenspari beti foe Didibri foe kori Jehovah dienstknekti. Sjatoe bifo Gado pipel Israël ben sa go ini na Pramisi Kondre, Satan ben gebroiki den moi oema foe Moab leki beti foe kori den Israëlsma komoto foe Jehovah dienst. Doesoendoesoen Israëlsma ben kori go na ini hoeroedoe èn leki wan bakapisi foe disi, den ben kiri den foe den takroe libifasi ede (Num. 25:1-3). Na foe na okasi dati, meki kristensma e kisi na warskow: „Meki wi no doe hoeroedoe toe, soleki sonwan foe den doe hoeroedoe, nanga na wan enkri bakapisi dati den ben fadon, toe-tenti-na-dri doesoen na wan dé” (1 Kor. 10:7, 8, 11). Den fini wrokofasi disi foe Satan di no de foe si no ben abi wawan wan marki na na ten dati, ma ook toe ini disi ten. Moro foeroe sma e sluit uit foe na gemeenschap foe seks hoeroedoe ede leki foe ala tra sortoe sani makandra.
19. (a) Fa a doe kon dati someni dienstknekti foe Jehovah e abi foe doe nanga seks hoeroedoe ala di den sabi dati disi no e prisiri Gado? (b) San sa jepi joe foe tan farawe foe go ini seks hoeroedoe?
19 Ma fa a doe kon dati someni dienstknekti foe Jehovah, di sabi tog dati hoeroedoe nanga soetadoe de tegen Gado wet, e abi foe doe nanga den sortoe activiteit dati? We, fa a ben kon dati Eva ben tranga jesi Gaso wet? Foe di Satan ben meki a gersi leki trangajesi Gado wet ben de wan toemsi moi sani; a ben de wan okasi pe Eva ben mene dati a no ben moesoe libi en foe gwe. So toe ini disi ten nanga jepi foe Satan propaganda kanari — televisie, kino, koranti, radio èn so moro fara — na prakseri e kon na fesi dati hoeroedoe nanga soetadoe no wawan de wan span èn switi sani ma so toe wan sani di mag. San sa psa foe dat’ede te joe beti na beti di nanga jepi foe den propaganda kanari foe Satan e presteri na joe? Joe srefi toe kan tan „fasi na a aka”!
Tan farawe foe wan denki foe srefidensi
20. (a) San de ete wan fini prakseri di no de foe si foe Didibri? (b) Fa Satan ben gebroiki so wan 6000 jari na taktiki disi?
20 Foe sensi na fosi bigin foe en oproeroe dan Satan ben taki dati na fasi fa Gado e doe sani no de joisti. A ben gi tranga foe abi wan denki foe srefidensi. ’Joe kan bepaal gi joesrefi san na boen èn san na ogri’, Satan ben taigi Eva. ’Joe no abi foe arki Gado. A no de ferteri troetroe na waarheid’ (Gen. 3:1-5). Te na a dé foe tide a de na prakseri foe Satan di no de foe si foe flaka Gado pipel nanga sowan sortoe denki. — 2 Tim. 3:1, 13.
21. San de wantoe eksempre foe wan denki foe srefidensi ini disi ten, èn disi ben tjari san kon leki bakapisi?
21 Fa so wan denki foe srefidensi e kon na fesi? Wan fasi di e kon foeroe tron de dati wan sma e degedege ini na rai di na organisaatsi foe Gado, di joe kan si nanga ai e gi. Gado organisaatsi foe eksempre ten na ten ben warskow foe na arki foe bepaalde pokoe foe hoeroedoesani èn foe na go na disco èn tra sortoe foe grontapoe okasi foe dansi èn pe den sortoe pokoe dati e pré èn pe den sma di e kon drape ala sma sabi nanga den hoeroedoe libifasi foe den (1 Kor. 15:33). Ma tokoe bepaalde sma sabi a tori zogenaamd moro boen. Den kakafoetoe gi na rai disi èn den ben doe san ben boen na den ai. Nanga sortoe bakapisi? Foeroetron den ben kon ini sekshoeroedoe èn den ben tjari bigi jeje-ogri kon a tapoe den. Ma awinsi disi no ben abi sowan krakti na tapoe den, dan tokoe ete den de sma di fowtoe de a tapoe den te tra sma e waka baka den eksempre foe den èn ondrofeni den takroe bakapisi foe dati. — Matt. 18:6.
22. (a) San wi moe froesten alaten? (b) San nanga reti wi sa loekoe ini a tra studi foe wi?
22 Wi no kan poti nofo krakti na tapoe san wi sa taki now: Wi de ini wan feti nanga féanti di de moro hé leki libisma èn alaten wi moe froestan dati boen. Satan nanga en ogri jeje de troetroe; den no de soso leki wan anansitori ini na froestan foe wan sma. Den de „den grontapoe tiriman foe na doengroe disi” èn wi moe feti wan jeje feti nanga den (Ef. 6:12). A de foe dat’ede toemsi prenspari dati wi erken den fini prakseri di no de foe si foe den èn no meki den basi wi. A de foe dat’ede wan sani di fiti toemsi dati ini na tra artikel wi go loekoe fa wi kan weri fetisani foe feti nanga den ogri jeje.
Joe kan piki den aksi di e kon now?
□ Na sortoe fasi Didibri e proeberi foe kon na Jehovah pipel tapoe wan fini fasi di no de foe si?
□ Foe san-ede Didibri e gebroiki fini taktik di no de foe si?
□ San den difrent taktik di no de foe si di Satan e gebroiki?
□ San sa jepi wi foe no fadon ini den fini prakseri foe Satan di no de foe si?,
[Prenki na tapoe bladzijde 3]
Na boewégi foe a drifi gwe safrisafri foe wan boto pikinmoro no de foe si. Na so na drifi gwe foe wan kristen foe na sé foe Gado nanga en organisaatsi kan de