Weri den feti sani foe na feti tegen den ogri jeje
„Wi abi wan feti tegen den ogri jeje krakti ini den hemel kontren.” — EFESESMA 6:12.
1. Sortoe feti kristensma moe feti, èn o langa na feti disi moe go doro?
SOLANGA den ogri jeje nanga na grontapoe di den abi na den ondro de, dan wi moe feti foe sorgoe dati wi no kon na ondro den makti. Na apostel Paulus skrifi: „Weri na heri fetisani foe Gado, sodati joe kan tanapoe faste tegen den [triki] foe Didibri; bika wi no abi foe feti nanga broedoe èn meti, ma nanga den tiri, nanga den autoriteit, nanga den grontapoe tiriman foe na doengroe disi, nanga den ogri jeje krakti ini den hemel kontren.” — Ef. 6:11, 12.
2. (a) Wi moe feti nanga sortoe sani moro ete leki wan bakapisi foe na fosi moeiti foe Didibri? (b) Fa na bijbel e sori dati na situwasi de so ernstig, dati wi moe weri troetroe fetisani gi na feti?
2 Tokoe wi no moe feti wawan tegen a feti di foe dorosé den ogri jeje moe feti nanga wi; na feti foe wi e kon spesroetoe moro moeilek foe wi onvolmaaktfasi di wi kisi, èn di de na bakapisi foe di Adam nanga Eva ben misi foe kakafoetoe gi na fosi moeiti foe Didibri. Na bijbel e taki foe dat’ede: „Na prakseri foe libisma ati de foe en jongoe jari takroe kaba” (Gen. 8:21; Rom. 5:12). Srefi na apostel Paulus ben moe feti foe doe san boen. „Te mi wani doe san de joisti”, so Paulus e tjari kon na krin, „dan san de takroe de na mi” (Rom. 7:21-23). „Na ati de moro verraderlek leki wan tra sani èn a no de loekoe psa noti”, na bijbel e taki (Jer. 17:9). Fa a de wan sani di de krin, dati wi moe weri den fetisani gi na feti tegen den moeiti di den ogri jeje e meki foe tjari wi so fara foe doe san takroe!
Feti tegen den lostoe foe goedoe
3. (a) San wi kan leri foe na fasi fa Didibri ben kon na Eva? (b) Fa wan sma, di e soekoe foe kisi goedoe, ben sa kan taki boen foe en libifasi?
3 Wi kan de séker dati den ogri jeje sa proberi foe wiki firi foe lobi goedoe na wi. Den sa sorgoe dati den sani di „na ai lostoe” kori wi (1 Joh. 2.16). Joe e memre ete fa Satan na a bigin ben go na Eva èn fa a ben poti prakseri na a bon nanga en froktoe di den no ben mag njan èn di ben loekoe so onnowsel? Di na belangstelling foe Eva gi na bon èn den froktoe di ben anga na en ben wiki, a ben bigin taki „dati a ben de wan sani pe na lostoe foe den ai ben go na en, ija, na bon ben de wan sani di joe kan loekoe na en nanga lostoe”. San ben psa foe dat’ede? „A ben teki dan foe en froktoe èn njan” (Gen. 3:6). Ogri jeje sa gebroiki densrefi sortoe taktik èn meki misbruik foe wi natuurlek lostoe foe sani di loekoe moi. Sondro degedege den de frantwortoe gi na gerationaliseer di sontron de foe foe jere: ’We, efoe mi moe wroko tog foe sorgoe gi misrefi foe tan na libi, dan mi kan verdien net so boen foeroe moni èn bai foeroe sani. Na a fasi dati mi kan prati sani nanga trawan.’
4. (a) Sortoe fasi foe a lobi foe gi tra sma sani de foe prijse, ma sortoe fasi foe a lobi foe gi tra sma sani de fowtoe? (b) Ini sortoe trapoe di wi moe tan farawe foe en, dienstknekti foe Gado ini owroeten ben fadon go na ini?
4 Séker a de wan sani foe prijse te disi ten kotoigi foe Jehovah di na goedoe sé abi foeroe sani, e prati sani nanga den wan di abi mendri, neleki den fosten kristen ben doe disi tapoe den lobi njanjan (Jud. 12). Ma fa a de te wan sma abi wan bijbedoeling nanga disi foe di kande a de gi wan kado na wan sma foe di a sabi dati na sma dati de ini na positsi foe en wan ofoe tra grani ini na kristen gemeente leki wan tegenprestatie? Dati ben sa de séker fowtoe! Wel a ben sa de wan fowtoe sani toe te na sma di e teki sowan sortoe kado, ben sa gi sowan grani ini a presi foe dati. Efoe wan sma ben sa doe disi, dan disi ben sa kan teki gersi nanga na teki foe tjoekoe. Wan kristen sa sori dati a de so koni foe tan farawe foe fadon go ini wan trapoe, wan trapoe pe wan toe dienstknekti foe Jehovah ben go na ini baka di den ben kisi wan frantwortoe wroko. — 1 Sam. 8:1-3; 2 Kron. 19:6, 7.
5. Sortoe gevaar de, te goedoe e go teki wan toemsi prenspari presi ini wan sma libi?
5 Te goedoe e kon foeroe na fesi ofoe e go teki wan toemsi prenspari presi ini na libi foe wan sma awansi sortoe rede wan sma abi foe dati, dan na sma dati de ini wan toemsi kefarlek situwasi. San kan doe nanga disi? Na jeje fasi kan stek safrisafri èn disi e psa foeroe tron toe. Ini wan foe den agersitori Jezus ben taki foe bepaalde sma di ben leri sabi Gado waarheid na a fasi disi: „Ma foe di den sorgoe èn goedoe èn prisiri foe na libi disi e srepi den gwe, meki den e stek krinkrin èn den no e meki noti kon ini volmaaktifasi” (Luk. 8:14). Ma awinsi na jejefasi foe wan kristen di e poti wan toemsi bigi krakti tapoe goedoe, no e stek, dan disi no wani taki dan dati den fini avances di no de foe si foe den ogri jeje no abi winimarki?
6. Sortoe krakti na libifasi foe wan kristen foe a lobi foe goedoe kan abi tapoe troe bribiman?
6 Nono, bikasi loekoe pikinso fa na libifasi foe a lobi foe goedoe foe a sma dati kan abi krakti tapoe tra sma ini na gemeente. Den moro jongoe memre foe na gemeente dati di e firi èn teki sani gaw abra foe eksempre e kisi tranga foe soekoe Gado Kownoekondre fosi te den e si fa wan tra kristen e meki moeiti foe wroko foeroe moni èn foe bai moi sani? San joe ben si? A no de so dati te njoen sma e si ini na waarheid sortoe agersi winimarki a abi foe abi goedoe, den toe abi na firi foe feti baka goedoe leki wan marki, sodati kande den e iti densrefi go ini pori na jejefasi?
7. (a) Foe san-ede wi kan kari na eksempre di wan kristen owroeman ini Doisrikondre ben gi, wan boen wan? (b) San na grontapoe e teki foe marki èn loekoe efoe sani e go boen, èn fa kristen moe si so wan fasi? (c) Wi moe feni fowtoe na den sma di abi moi sani leki goedoe?
7 Na ondrofenitori foe wan kristen owroeman ini Doisrikondre — di ben de wan goedoe man toe — de wan toemsi moi wan. Wan kristen brada di ben sabi pikinso foe en moni situwasi ben aksi en foe san-ede a ben rij ini wan Volkswagen (wan oto di no ben de so diri) èn ben e libi ini wan oso di no ben de so diri. Na owroeman di ben kon de ernstig ben piki: ’Foe di te mi ben sa rij ini wan Mercedes èn ben sa weri ala sortoe pranpran, disi ben sa kan abi wan takroe krakti tapoe na jejefasi foe mi kristen brada nanga sisa.’ Fa na fasi foe en ben kenki nanga di foe na grontapoe! „Na meki foe wan pranpran foe sani foe libi di wan sma abi”, de na pasi foe grontapoe (1 Joh. 2:16). Akroederi na grontapoe dan na merki, dati sani e waka boen nanga sma, kan marki nanga omeni moni nanga goedoe di a abi. Meki na denki disi noiti de ini na kristen organisaatsi! Wi moe weri feti-sani sodati noti foe na denki disi foe Satan psa go ini wi égi denki èn di foe na kristen gemeente. Na srefi ten wi égi dini foe Gado ini frede, makandra nanga tevréde fasi sa meki dati wi no sa de nanga na fasi foe feni fowtoe na den sma di agersi dati den e abi wan toemsi royaal fasi foe libi. — 1 Tim. 6:6-8.
8. (a) Sortoe eksempre Jezus Kristus ben gi wi? (b) Sortoe aksi wi ben sa kan aksi wisrefi nanga reti?
8 Alaten wi moe hori na ini prakseri na fasi èn eksempre foe wi Masra, Jezus Kristus. Aladi Kristus ben kan abi wan bigi glori nanga goedoe èn ben kan libi ini goedoe, a no ben soekoe den sani disi. Wawantron srefi a no ben abi den sani di foeroe sma ben si leki fanowdoe sani foe tan na libi (Matt. 4:8, 9; 8:20). Foe san-ede a ben offer ensrefi so? Foe di a ben bepaal boen sortoe sani ben teki na fosi presi ini en libi. A ben froestan dati na doe foe Gado wani, ben moe teki na fosi presi ini en libi (Joh. 4:34). Wi e loekoe na a eksempre foe en èn wi e proeberi foe poti dati ini wi libifasi? Foe sortoe sani wi e libi troetroe — foe abi nownow wan makriki switi libi ofoe foe kisi ini Gado njoen seti foe sani tégo libi? — Hebr. 12:2, 3; 1 Petr. 2:21-24; 3:14.
9. Sortoe jeje fetisani wi abi fanowdoe foe feti nanga firi foe goedoe, èn fa na fetisani disi kan kibri wi?
9 Ini wi feti foe stop den ogri jeje foe wiki ini wi den firi foe lobi goedoe, wi moe weri den fetisani èn dati moe de den jeje fetisani. Wi moe abi „na borsoeharnas foe REGTVAARDIKIFASI”, san wani taki dati wi moe doe san boen ini Gado ai (Ef. 6:13, 14). Èn disi wani taki now gi wi dati wi ’no moe ke foe wisrefi èn waka baka na eksempre foe Kristus’, bika Jezus srefi ben taki go moro fera: „Sortoe boen a abi efoe wan sma wini na heri grontapoe ma lasi en sili?” (Matt. 16:24-27; teki gersi Matt. 6:33.) Ete wan toemsi prenspari sani foe wi jeje feti-sani de „na bigi skilt foe BRIBI” (Ef. 6:16). Wi moe bribi opregti ini Gado njoen seti di e kon èn no moe loekoe foe na kon troe foe wi lostoe na na owroe seti foe sani disi. Meki wi no frigiti noiti dati heri esi a sa kon na wan kaba nanga ala en goedoe. — 1 Joh. 2:17; Ezech. 7:19.
10. Sortoe pisi foe na fetisani de spesroetoe prenspari foe feti nanga firi foe lobi foe goedoe èn foe san-ede?
10 Ma foe feti tegen fini fasi foe na lobi foe goedoe dan wi abi spesroetoe na plsi foe na fetisani fanowdoe di e kari a baka, namkoe „na helm foe ferloesoe”. Ini wan tra brifi foe den apostel wi e kisi foe jere, dati wi moe weri leki „helm na howpoe foe ferloesoe” (Ef. 6:17; 1 Tim. 5:8). Foe abi na howpoe foe ferloesoe, wani taki foe loekoe na a kon foe na pai di Gado o pai na paiman èn foe no poti wisrefi tapoe na paiman foe wan makriki libi ini na seti foe sani disi.
11. Fa Mozes ben sori taki a ben weri „leki helm na howpoe foe ferloesoe”?
11 Mozes ben weri na helm disi, „a howpoe foe ferloesoe”. Aladi a ben kweki leki na manpikin foe na oemapikin foe Farao a ben wégri foe teki „na njan switi foe sondoe foe wan pisiten ini na kownoe oso ofoe foe feti baka den goedoe foe Egypte”. Foe san-ede a ben wégri disi? „Bika a ben poti en ai tapoe na paiman.” Mozes ben go prakseri dipi foe den sani di Gado ben pramisi. Mozes no ben jere ofoe lési wawan foe Jehovah. A bijbel e taki dati a „tan faste leki a ben si na Sma di no de foe si nanga ai” (Hebr. 11:24-27). Jehovah ben de wan troetroe sma gi Mozes èn disi ben de so toe nanga en pramisi foe tégo libi. Te wi wani kaka foetoe gi den feti di Satan e go feti nanga wi na wan boen fasi dan wi howpoe tapoe na tégo libi moe de net so troetroe gi wi.
Feti tegen seks boeroedoe
12. San ogri jeje meki foe bigin wan aanval di sa waka boen tegen kristensma?
12 Soleki wi ben taki ini na artikel na fesi, dan den moeiti foe ogri jeje foe tjari kristensma foe go so fara foe doe seks hoeroedoe de wan foe den moro prenspari fasi fa den e meki ’sma fadon ini na feti’. Den poti densrefi a tapoe foe pori na sekslostoe di ben moe kon kowroe na inisé foe na trowlibi. Den ogri jeje pikinmoro na alapresi ben man foe meki okasi nanga situwasi kon pe kristen kan koiri go ini seks demakandra dorosé foe na trowseti. Sortoe fetisani sa jepi wi foe kakafoetoe gi den aanval disi foe na sé foe ogri jeje?
13. Fa Jezus ben sori taki a ben weri na „borsoeharnas foe regtvaardikifasi”?
13 A de toemsi prenspari foe weri na „borsoeharnas foe regtvaardikifasi.” Alaten wi moe teki na faste bosroiti foe doe den sani di de joisti ini Jehovah ai (1 Kor. 6:18). Jozef ben weri na pisi disi foe na fetisani di na oema foe Potifar di ben kon law foe sekslostoe ben tan aksi en ibri dé baka:: „Kon didon na mi”. Jozef ben taki: „Fa mi ben sa kan doe na bigi ogri-disi èn sondoe troetroe na Gado?” (Gen. 39:7-12) Neleki Jozef wi toe moe prakseri sortoe bakapisi a abi te wi gi wisrefi abra na hoeroe libi di kande wi ’verraderlek ati’ kande e lostoe. — Jer. 17:9.
14. San wi moe loekoe, èn di sa jepi wi foe tan farawe foe go ini seks hoeroedoe?
14 Ini na fosi presi wi moe loekoe sortoe krakti a abi tapoe Gado te wi psa en wet. Satan ben kosi Jehovah foe di a taki dati libisma no sa tan getrow na en ondro tesi. Foe dat’ede meki Jehovah e gi na tranga: „Sori taki joe koni mi manpikin, èn prisiri mi ati, sodati mi kan gi wan piki na en di e kosi mi” (Odo 27:11). Go prakseri foe disi pikinso. Joe ben sa wani psa Gado wet èn meki Satan bréti èn Jehovah Gado firi sari? (Ps. 78:38-41) Efoe joe lobi Jehovah troetroe, fa joe ben sa kan doe sowan sani? Loekoe toe sortoe libifasi de wan koni wan. Soso Jehovah kan gi joe tégo libi. A no de foe dat’ede wan froestan sani foe doe en wani? — 1 Joh. 5:3; Rom. 6:23.
15. Sortoe fasi foe si sani den sma ben lasi di dben fadon go ini seks hoeroedoe?
15 Den kristen di e fadon gi na aanval foe Satan, e lasi foe troe den jeje fasi foe si san na boen èn san na ogri. Na mankeri foe jeje koni foe si sani, wi kan teki gersi nanga na situwasi foe a foetoeboi foe Elisa. Tjari kon ini joe prakseri fa Elisa ben begi gi en: „O Jehovah, opo grantangi en ai, sodati a kan si.” Èn na foetoeboi ben si, „èn loekoe! na bergikontren ben foeroe nanga faja asi èn stré wagi lontoe Elisa” (2 Kon. 6:15-17). Joe e si soema e loekoe na wi? Jehovah e loekoe na wi, èn so toe Kristus Jezus nanga den engel (Psalm 11:4; 34:7; Hebr. 1:14; Matt. 18:10). Te joe e loekoe en boen dan wi de, joe kan taki, leki wan komedipré. (Teki gersi 1 Kor. 4:9.) Fa wan sma di abi na loekoe disi foe na bijbel èn di e froestan dati foe komoto foe tapsé den e si ala en doe, ben kan gi ensrefi abra na seks hoeroedoe?
16. Te wi loekoe sortoe tra sani moro, wi sa kisi jepi foe tan farawe foe gi wisrefi abra na seks hoeroedoe?
16 Efoe joe ben sa go waka baka wan hoeroedoe libifasi, prakseri so srefi toe sortoe sjen na libifasi disi ben sa tjari kon tapoe na kristen gemeente. Sma na dorosé ben sa kan taki dati Jehovah Kotoigi no kenki foe na grontapoe kwetkweti, èn leki wan bakapisi foe disi dan den sma di e loekoe na wi no sa teki san de na boskopoe foe libi na wan boen fasi (2 Petr. 2:2). Prakseri sosrefl toe na pen foe ati di so wan hoeroedoe libifasi ben sa tjari kon tapoe joe famirman (Odo 10:1). Èn efoe joe ben trow, aksi joesrefi: „Fa mi ben kan behandel mi trow patna na so wan ogri ati fasi? Sortoe sma mi de?” Te wi teki ala sani loekoe, dan a no de wan vreselek gridifasi, wan sjatoe loekoe èn wan don sani foe gi wisrefi abra na seks hoeroedoe?
17, 18. (a) Sortoe feti na apostel Paulus ben feti en heri libi langa? (b) San de gi wi toemsi prenspari te wi wani weri dorodoro na heri fetisani èn fa wi moe handri akroederi nanga en?
17 Foe troe a no de ala ten wan makriki sani foe tan farawe foe wan takroe libifasi. Na apostel Paulus en heri libi langa de foe feti tegen den fowtoe lostoe di a ben de wan de srafoe foe den. A ben skrifi: „Mi de tranga gi mi skin èn mi e tjari en leki wan srafoe foe misrefi den no trowe tapoe wan ofoe tra fasi baka te mi ben préki gi trawan” (1 Kor. 9:27; Tit. 3:3). Paulus ’ben de tranga gi ensrefi. A ben dwengi ensrefi foe doe san boen, ala di en skin ben lostoe sani di ben de takroe. Net so joe moe handri toe foe kan feti na wan boen fasi.
18 Foe kan weri a heri fetisani dorodoro, dan sosrefi toe joe moe begi ala ten na Gado foe jepi (Ef. 6:18). Tokoe joe no kan begi foe jepi èn baka dati e lési hoeroedoe boekoe, go na hoeroedoe film, ofoe go prakseri dipi foe wan sma foe na tra sekse ofoe fréri nanga en. Joe moe wroko na den sani di joe e aksi foe den ini joe begi!
Fet tegen wan denki foe srefidensi
19. (. . . ?)
19 Te wi e stoeka na bijbel, dan wi e si dati Jehovah e tjari en dienstknekti tapoe wan orga fasi. Èn neleki fa ini na fosi jarhondro soso wán troe kristen organisaatsi ben de, na so Jehovah ben gebroiki soso wán organisaatsi (Ef. 4:4, 5; Matt. 24:45-47). Tokoe son sma e sori a tapoe dati na organisaatsi ben moe tjari kenki kon a fesi èn foe dat’ede den e taki: „Nanga disi e kon na krin dati wisrefi moe teki wen bosroiti tapoe den sani di wi sa bribi.” Disi na wan denki foe srefidensi. Foe san-ede sowan denki de kefarlek?
20. (a) Foe san wan denki foe srefidensi de wan bewijsi? (b) San sa jepi wi foe no feni wi égi denki moro prenspari leki di foe na organisaatsi? (c) Sortoe fosi-jarhondro eksempre wi moe waka na en baka nanga reti?
20 So wan sortoe denki de wan bewijsi foe hémemre. Èn a bijbel e taki: „Hémemre e kon bifo wan fadon, èn wan hémemre denki bifo na stotoe foetoe fadon” (Odo 16:18). Efoe wi e go denki dati wi sabi en moro boen dan wi sa moe aksi: „Pe wi ben leri foe bigin na bijbel waarheid? Wi ben sa sabi na pasi foe waarheid efoe wi no ben teki na tiri foe na organisaatsi?” Wi kan doe en sondro na tiri foe Gado organisaatsi? Nono dati wi no kan! — Teki gersi Tori foe den apostel 15:2, 28, 29; 16:4, 5.
21. (a) Fa wawan wi kan wini na feti foe wi? (b) San wi no moe frigiti noiti èn sortoe libi wi moe libi now foe dat’ede?
21 Te wi loekoe den makti jejekrakti di e feti tegen wi, dan wi moe erken dati wi no kan kisi na wini noiti ini égi krakti. Ma wi no kan lasi nanga jepi foe Gado èn nanga na jepi foe en organisaatsi, wi grontapoe gemeenschap foe brada (Psalm 118:6-12; 1 Petr. 5:9). Ma wi no moe frigiti noiti dati wi de ini wan jeje feti èn dati a ten foe feti no de wan ten foe ontspan wi èn foe njan switi nomo foe wan makriki libi èn den prisiri foe na libi. So wan pisi ten de moro foeroe na ten foe wan krakti training, de nanga ai èn offer wisrefi. Na feánti ben man foe tjari sowan foe wi go so fara foe meki a de foe den na ai kon slap, èn den ’sma disi ben fadon ini na feti’. Meki disi noiti kon wi abra! A no sa psa efoe wi „weri na heri fetisani foe Gado” èn „tan tanapoe faste tegen den triki foe Didibri”. — Ef. 6:11, 12.
Joe kan piki den aksi di e kon now?
□ Te goedoe kon de prenspari ini na libi foe wan kristen, dan sortoe problema disi kan tjari kon gi na sma dati èn gi trawan ini na gemeente?
□ San sa jepi wi foe feti nanga firi foe go lobi goedoe?
□ San sa jepi wi foe tan farawe foe na fadon go ini seks hoeroedoe?
□ San de wan bewijsi foe wan denki foe srefidensi, èn san kan jepi wi foe tan farawe foe sowan denki?
[Prenki na tapoe bladzijde 6]
Efoe wan kristen bigin e djaf, èn e meki wan pranpran foe den sani foe libi, fa disi kan wroko tapoe tra memre foe na gemeente?