Na presi di na evangeliumprékiwroko e teki ini na troe anbegi
„Joe bribi no moe anga foe libisma filosofie ma foe na krakti foe Gado”. — 1 KORINTESMA 2:5, THE JERUSALEM BIBLE.
1. (a) Foe sortoe activiteit ede sma na a heri grontapoe sabi Jehovah Kotoigi? (b) O prenspari na activiteit disi de?
SMA sabi Jehovah Kotoigi internationaal leki evangeliumprékiman, dati wani taki, leki boskopoeman foe boen njoensoe. Na Ingrisi socioloog J.A. Beckford ben taki ini Social Compass foe januari 1977: „Den Kotoigi de den moro faja èn moro energie evangeliumprékiman, èn sma di e meki proseliet ini na disiten grontapoe.” A taki moro fara: „Disi de wan krin oorzaak, di foeroetron wi e loekoe psa en, foe na gro foe na Wachttoren bewégi.” Ma na kownoekondre prékiwroko èn na meki foe discipel de wroko di Jehovah abi prisiri nanga den? Na historia nanga den disiten troe tori e piki ija! Na evangeliumprékiwroko, na prékiwroko foe na boen njoensoe foe na kownoekondre foe Gado, de na bakabonjo foe na kristendom. Ini a ten di psa èn na ini a ten disi a de na marki foe na pipel foe Gado.
2. San na Kownoekondreprékiwroko e doe?
2 San na Kownoekondreprékiwroko e meki doe kon? Wan foe den sani de dati wan sma e teki a okasi foe sori lobi nanga warderi gi na Almakti Gado èn gi En libisma mekisani na wan fasi di joe kan si (Matt. 22:37-39). Èn moro foeroe a de so dati nanga jepi foe na evangeliumprékiwroko Jehovah koni di no abi en speri nanga en toemsi bigi krakti e meki bekenti na tra sma. — Tori. 1:8; 4:33; Ef. 3:10.
A boen njoensoe komoto foe Jehovah èn a e hori baka gi en
3. (a) Foe san-ede wi kan kari Jehovah wan evangeliumprékiman? (b) Soema de centraal na ini na boen njoensoe, èn san na komando foe en de?
3 Jehovah ben de na fosi evangeliumprékiman ofoe Tjariman foe boen njoensoe. Ini en fosi profétitori na boen njoensoe ben meki bekenti dati na onvolmaakti libisma-lo ben sa kisi ferloesoe nanga jepi foe wan pramisi „siri” (Gen. 3:15). Bakaten Gado ben taki na fesi nanga jepi foe Jesaja leki en profétitakiman dati na Messiás, Jezus Kristus, di ben de na moro prenspari memre foe na „siri”, ben sa „ferteri boen njoensoe gi den safri-ati sma” (Jes. 61:1). Soboen Jehovah ben abi na prakseri dati Kristus ben sa de na prékiman foe boen njoensoe — wan evangeliumprékiman.
4, 5. Fa engel doe wroko leki evangeliumprékiman?
4 Jehovah ben gi na tra sma ook toe na komando foe meki na boen njoensoe bekenti. Makti jeje mekisani, engel, ben teki prati na a wroko disi di Gado feni boen. A de wan moi sani foe si dati na wortoe „engel” na ini Hebrewtongo èn Grikitongo wani taki letterlek „boskopoeman”, èn na wortoe „evangeliumprékiman” komoto foe toe Griki wortoe di wani taki „boen” èn „engel” (ofoe „boskopoeman”). Gado engel foe eksempre ben meki „na boen njoensoe bekenti na fesi gi Abraham” (Gal. 3:8; Gen. 22:15-18). Na boen njoensoe dati ben wani taki dati na pramisi „siri” ben sa de wan bakapikin foe Abraham èn dati ala naatsi séker ben sa blesi densrefi nanga jei foe „na siri” dati (Gen. 12:2, 3 . Twenti jarhondro na baka na engel Gabriël, di ben doe wroko leki evangeliumprékiman ben meki bekenti na Zacharias na gebortoe foe Johannes na Dopoeman nanga den wortoe di e kon: „Den ben seni mi foe taki nanga joe èn meki boen njoensoe bekenti foe den sani disi.” Johannes na Dopoeman ben meki na pasi klari gi na moro prenspari memre foe Abraham „siri”, Jezus Kristus. — Luk. 1:19.
5 Gabriël moro fara ben doe wroko leki wan evangeliumprékiman di a ben sori ensrefi na Maria foe ferteri en na bréti boskopoe foe na gebortoe di ben o kon foe Jezus (Luk. 1:26-38). Someni moen na baka wan engel-evangeliumprékiman ben meki herder ferwondroe di a ben taki: „No frede, bika loekoe! Mi e meki boen njoensoe bekenti na joe foe wan bigi prisiri di sa kon gi na heri pipel.” Baka dati wan ipi foe jeje mekisani ben sori densrefi na a engel disi èn ben sori dati na boskopoe disi foe boen njoensoe de troe (Luk. 2:8-14). Dati a krakti foe Gado ben de na baka na boen njoensoe di den engel ben meki bekenti, no wawan ben kon na krin na wan toemsi bigi fasi nanga na gebortoe foe en Manpikin, ma ben kon na fesi ini na heri fosi jarhondro historia foe na kristen gemeente. Wan engel ben ferloesoe den apostel di ben de na ini doengroe-oso èn a ben ko-manderi den: „Tan taki gi na pipel” (Tori. 5:20). Engel ben tiri sani foe feni sma di ben abi belangstelling èn jepi Gado dienstknegti (Tori. 8:26; 10:3; 12:7-11). Èn na apostel Johannes di ben skrifi ondro na krakti foe santa jeje foe sani di ben o psa „ini na dé foe Masra”, ben si „wan engel e fré na ini na mindri foe na hemel di ben e meki tégo njoensoe bekenti” èn di te joe loekoe boen ben e hori ai tapoe a panja na grontapoe foe na kownoekondre boskopoe nanga jepi foe Jehovah grontapoe dienstknegti. — Openb. 1:10; 14:6.
Na wroko di Kristus gi: Préki na evangelium
6. (a) Sortoe fundamenti Jezus ben poti gi na meki bekenti foe na boen njoensoe? (b) Fa Jezus ben sorgoe dati na evangelisatie-wroko ben sa go doro baka en dede?
6 Fa a doe kon dati na fosten kristen gemeente ben de nanga someni dek’ati èn dynamiek ini na gi foe kotoigi? Foe di Kristus, na Sma di opo na kristen gemeente, ben gebroiki Gado koni èn krakti foe bow na en tapoe leki fundamenti wan krakti organisaatsi foe evangeliumprékiman. Kristus ben doe disi na toe fasi. Na ini na fosi presi a ben doe en égi wroko foe „ferteri boen njoensoe gi den safri-atiwan” (Jes. 61:1). Èn na ini na di foe toe presi a ben lei en twarfoe krosbé mati moro fara sébi tenti tra sma persoonlek foe préki. Na so fasi Kristus ben poti wan boen kern foe prékiman di ben kan go doro nanga na evangelisatie-wroko te a ben dede. — Matt. 10:5-42; Luk. 10:1-16.
7. Fa a koni foe Gado e kenki foe a koni foe libisma na ini na fasi fa na boen njoensoe moe tjari go na den sma?
7 Jezus ben de wan toemsi faja kownoekondre-prékiman. A ben bigin fajafaja foe preki na evangelium di a ben sabi dati den sma ben kon sabi a boen njoensoe foe Gado kownoekondre — na njoen hemel tiri di e tjari vréde kon na grontapoe èn di sa poeroe a oorzaak foe sari. Baka di a ben fisiti na wan evangelisatie-reis difrenti foto nanga dorpoe èn a ben si ini sortoe sari jeje toestand den sma ben de na ini, a ben taki foe dat’ede gi den discipel: „Ija, na kotiwroko bigi, ma pikinso wrokoman de. Begi foe dat’ede na meester foe na koti-wroko dati a seni wrokoman ini en kotiwroko (Matt. 9:37, 38). Jezus ben bigin foe doe es’esi san a begi. Wan foe den fosi sani di a ben komanderi en apostel, ben de: „Préki te joe e waka èn taki: ’Na kownoekondre foe den hemel kon krosibé kaba.’” ’Préki gi den sma’ ben de den wortoe foe en. Libisma koni ben sa taki kande dati den libisma di ben kisi kwinsi ben kan kisi moro boen lekti te den seti wan sociaal programma, wan ambtenarenapparaat ofoe wan ondrogron revolutionair raad foe tjari den kenki kon di den wani, ma Kristus ben tjari Gado koni kon na fesi di a ben taki eenvoudig: „Préki te joe e waka.” — Matt. 1:7.
8. Fa Kristus ben doe di en discipel ben drai kon baka foe den prékiwroko, èn foe san-ede?
8 Baka den komando disi di a ben gi, Jezus ben taki nanga trawan èn a ben gi den na komando foe doe ooktoe, na evangelisatiewroko. Di den prékiman disi ben drai kon baka nanga na bericht dati sani ben waka boen, dan Jezus ben prisiri psa marki èn a ben taki: „Mi e prijse joe na publiki, Tata, Masra foe hemel nanga grontapoe, foe di joe ben kibri den sani disi gi koni wan èn den wan di tjari ede èn joe ben tjari den kon na krin gi pikinnengre” (Luk. 10:21). Den „pikinnengre” dati ben de Kristus discipel di ben de bigisma, èn na evangeliumprékiwroko ben de na wrokosani foe meki na waarheid di ben komoto foe Gado bekenti na tra sma. Na troe kristendom foe dat’ede no ben kon tanapoe stéfi nanga jepi foe libisma filosofie ofoe makti, ma nanga jepi foe na koni èn krakti foe Gado soleki disi ben kon na fesi nanga jepi foe na kownoekondre prékiwroko. ,
Ala discipel ben préki na evangelium
9. Kari wan toe sani di historia skrifiman taki, pe a sori dati na kownoekondreprékiwroko ben de na fundamenti foe na fositen kristendom?
9 Efoe na prékiwroko foe na boen njoensoe foe na Kownoekondre de na fundamenti foe na kristendom dan ala fositen kristen ben de evangeliumprékiman. Den ben de disi ook toe? Ija! na historia e piki. Loekoe san den boekoe di e kon now e taki foe den fosi-jar-hondro kristen.
„Ini den dé dati ala kristen sondro foe poeroe wan na ini ben de ’zendeling’.” — History of Western Civilization.
„Na fosi zendingsactiviteit disi e sori dati na fosi groepoe zendeling séker no ben de den apostel wawan. Na presi foe dati na heri kristen gemeenschap leki wan man ben de na ini.” — New Catholic Encyclopedia.
„Den ben froewakti foe ibri kristen dati a ben abi na lostoe foe gi kotoigi foe en bribi èn dati a sa libi akroederi en bribi”. — Encyclopedia Americana.
10. (a) Oten na kristen gemeente tron wan organisaatsi foe evangeliumprékiman? (b) Sortoe wondroe presenti Gado ben gi fosten kristen, èn nanga sortoe marki?
10 Foe sensi na momenti dati na kristen gemeente ini 33 G.T. ben doe kon, a ben de wan organisaatsi foe evangeliumprékiman. Den sowan 120 discipel di ben tron en fosi memre, no ben lasi ten èn ben tron wantronwantron kownoekondreprékiman. Akroederi na gewijde historia „den alamala ben kon foeroe nanga santa jeje, èn ben bigin foe taki”. Loekoe grantangi dati alamala, èn no soso sonwan, „ben bigin taki foe den bigi wroko foe Gado” (Tori. 2:4, 11). Disi ben de wan bewijsi dati den fosi anbegiman dati ben kisi na jepi foe Gado krakti èn koni, na wondroe makti foe gi kotoigi ini tongo di den no ben leri noiti na skoro. Na kristen gemeente ben poti stéfi nanga jepi foe wan wondroe na tapoe na fundamenti foe na meki bekenti foe na boen njoensoe.
11. Fa Petrus poti krakti a tapoe dati ala kristen ben moe de prékiman?
11 Bakaten na a dé dati Petrus ben tjari na profétitori foe Joël kon tapoe na njoen kristen gemeente di ben opo: „’Èn na ini den laatste dé’, Gado e taki, ’mi sa kanti afoe foe mi jeje na tapoe ala sortoe foe skin, èn joe manpikin èn joe oemapikin sa taki profétitori èn joe jongoeman sa si fisioen èn joe owroeman sa dren dren; èn srefi na tapoe mi srafoe èn na tapoe mi oema srafoe mi sa kanti afoe foe mi jeje ini na dé dati èn den sa taki profétitori’” (Tori. 2:17, 18; Joël 2:28, 29). Ala kristen, sondro foe poeroe wan na mindri, ben moe de evangeliumprékiman. Man nanga oema èn srefi jongoewan ben sa de fajafaja nanga na taki foe profétitori; nanga tra wortoe den ben sa foeroe psa marki nanga Gado boskopoe foe boen njoensoe, dati den ben sa taki foe en èn meki dati bekenti.
Na evangeliumprékiwroko abi wan warskow na ini
12. Foe san-ede meki na boskopoe foe Gado kownoekondre no de boen njoensoe gi ibriwan sma?
12 Na boskopoe foe Gado Kownoekondre no de gi ibriwan sma boen njoensoe, bikasi a abi wan warskow foe pori na ini. Te na boen njoensoe wani tjari winimarki kon di e tan, dan na disiten bedrigi seti foe sani san ala sma e hori baka gi en moe wai poeroe na pasi (Odo 21:18). Opregti anbegiman foe Jehovah no kan foe kenki na grontapoe disi kon ini wan paradijs te pisi foe ogri-doe di tan abra e pori na moi fasi disi foe en. Na sma pe na boen njoensoe komoto èn di tanapoe na baka, e gi na komando foe no ’ferteri wawan foe na jari foe boen wani’, ma foe meki bekenti toe ’na dé foe refensi foe na sé foe wi Gado’ (Jes. 61:2). Na ini akroederi nanga disi na boskopoe foe wan foe den engel di Openbaring kari abi den wortoe di e kon now: „Frede Gado èn gi en glori, bika na joeroe foe na kroetoe foe na anoe foe en kon kaba.” — Openb. 14:7.
13. (a) Sortoe fasi den fosten kristen ben sori gi na evangeliumprékiwroko? (b) Sori nanga jepi foe wan tekst dati den fosten kristen ben abi wan firi dati a ten ben de tranga fanowdoe?
13 Nanga wan firi foe na tranga fanowdoe foe na ten den fosi-jarhondro kristen ben panja na boen njoensoe so esi leki den kan. Den fosten kristen joe ben kan kon sabi den ook toe nanga na marki disi foe na boen njoensoe. Ini na Encyclopedia Britannica ai taki: „Na kristen froewakti foe na kaba-ten noiti ben de eenvoudig ini wan passief lostoe foe na kownoekondre foe Gado di ben e kon” ma na presi foe dati ben kon na fesi ini wan ongelooflek gi foe faja èn doe moro moeiti foe sreka na grontapoe na fesi na tapoe na drai kon baka foe Kristus èn na Kownoekondre di e kon.” Wan gemeente geregeld ben kisi fermane foe na krosbé foe na kaba èn na fanowdoe dati den moe de klari. Den apostel ben froestan dati wan evangeliumprékiwroko pe den ben moe meki esi nanga en, ben de wan fanowdoe pisi foe na kristendom, efoe den ben kan wani foe miti ala sma bifo Gado dé foe refensi ben sa kon. Disi ben abi leki bakapisi dati na kristendom ben panja en srefi kon moro bigi ete. — Rom. 10:13, 14; 1 Thess. 5:2, 6; 2 Petr. 3:11-14.
14, 15. Fa na faja foe na evangelisatie ben abi krakti tapoe na historia?
14 Awinsi na krinsten foe na Kownoekondre boskopoe baka na fosi jarhondro ben tapoe èn ben verdrai, tokoe na froewakti foe na kaba ben sa abi wan tranga krakti. Akroederi son historia skrifiman dan foe wan séker pisi a bribi, dati India ben moe kisi es’esi na boen njoensoe bifo Kristus drai kon baka ben abi krakti na tapoe na tinaféfi-jarhondro expeditie foe Columbus go na a westelek halfrond. Na so toe a ben de dati na fasi disi foe si sani ben abi krakti na tapoe bakaten froisi foe groepoe foe sma soleki den tinasébi-jarhondro froisi foe den puriteinen, den tina-aiti-jarhondro froisi foe den baptist, den quakers go na Amerkankondre èn den tina-aiti- èn tinanegi-jarhondro Doisri froisi go na Rusland nanga Palestina.
15 Wi kan taki foe dat’ede dati na evangeliumwroko di Jezus ben meki wan bigin nanga en ben abi bakapisi di ben go boen fara na tapoe wan langa ten? Na historia e piki ija. Ala di na faja foe na evangelisatiewroko no ala ten tjari go ini pasi di Kristus ben taki fa a ben moe sori, tokoe na evangelium ben poti wan toemsi prenspari marki na tapoe na grontapoe. Na Encyclopedia Britannica e tapoe en samenvatting foe a kristendom nanga den wortoe: „Na kristendom de na jeje krakti di ben abi moro krakti tapoe na libisma historia èn kande moro fini ben kenki sani leki sortoe tra factor di de toe.”
Na disiten evangelium-prékiwroko
16. (a) San wi kan taki foe dat’ede foe den fosi-jarhondro kristen? (b) Sortoe aksi na ini a tori foe na disiten kotoigiwroko wi ben kan aksi?
16 Wan ondrosoekoe foe na gewijde èn grontapoe historia bericht e tjari wi kon na tapoe wan prenspari bosroiti: Ala fosi jar-hondro kristen ben de evangelium-prékiman. Foe de wan kristen èn foe tan wan kristen, wan sma ben moe préki geregeld. Ma disi tron ini a ten disi wan primitief, onsympathiek fasi foe anbegi di no e fiti na a modern libisma? Kande leki fa libisma e denki, ma no leki fa Gado e denki. — Odo 16:25; Jer. 8:9.
17. Fa Jehovah Kotoigi ben meki na wan evangeliumprékiwroko kon baka leki wan troe marki foe na kristendom?
17 Na disiten historia foe Jehovah Kotoigi e sori dati den meki na soifri, krin sten foe na boskopoe foe na boen njoensoe foe na Kownoekondre kon de baka dorodoro. Foe di den gi jesi na a komando foe Kristus meki den e span densrefi nanga na moro bigi evangelisatiewroko di panja na ala sé leki oiti wan ten. Bifo na kaba foe na seti foe sani di kon, dan wan kotoigi moe gi na a heri grontapoe (Matt. 24:14). Na ini den hondro jari di psa disi ben de a moro prenspari marki foe Jehovah Kotoigi. Na ini na fosi nomroe foe Na Watchtower, ini a ten dati den ben kari en Zion’s Watch Tower and Herald of Christ’s Presence, a marki foe na tijdschrift ben tjari kon na ondro wortoe na a fasi disi:
„Disi de na fosi nomroe foe na fosi jaargang foe ’Zion’s Watch Tower’, a sa de na en presi foe ferteri a doel foe na kon a doro foe en. Dati wi e libi ini den laatste dé . . . èn wi wani dati na osofamiri foe bribi de na ai krinkrin gi na sani disi.” — Juli 1879.
Bakaten, ini 1884, Jehovah Kotoigi leki genootschap foe evangelie-prékiman ben orga den srefi tron wan corporatie. Na marki foe disi ben tjari kon na krin ini na artikel toe foe na charter:
„Na marki foe san-ede na corporatie ben meki, de foe na panja go na alasé foe bijbel waarheid ini difrenti tongo, foe tjari go na doro traktaat, pamflet, tijdschrift nanga tra religieus papira èn nanga jepi foe ala tra wettelek middel.”
Den wrokosani disi ben dini na marki di ben ferteri na fesi? Na historia e piki Ija.
18. Fa na evangelisatie-wroko foe Jehovah Kotoigi ben hari na prakseri foe na grontapoe?
18 Na evangelisatiewroko foe Jehovah Kotoigi e hari na prakseri foe grontapoe. Na ini den njoensoe media, na moro hé kroetoebangi nanga na historiaboekoe prakseri ben poti na tapoe èn den ben taki foe en. Na oplage foe Na Wachttoren de foe sensi na fosi uitgave foe en, di ala moen siksi doesoen exemplaar ben druk ini wan tongo, ben kren go miti na disiten druk foe 10.050.000 exemplaar ini 102 tongo. Nanga disi Na Wachttoren ben tron na kerki tijdschrift nanga na moro bigi oplage na grontapoe. Sensi na di foe tinanégi jarhondro wan kefarlek gro ben de toe ini na nomroe foe joeroe di ben gi na a evangelisatiewroko, foe di na a ten dati soso wan toe doesoen joeroe ini wan jari ben e gi na a prékiwroko èn disi gro kon de moro leki 384 miljoen joeroe ini 1982; ini na srefi jari dati 286 miljoen pisi boekoe ben prati toe, aladi moro leki wan nanga afoe miljoen oso famiri ini 205 kondre nanga kontren ben kisi foe soso bijbelleri. Ala disi ben kon nanga jepi foe wan pikin nomroe foe sma: 2.477.608 ini 1982.
19. (a) Na soema Jehovah Kotoigi e gi na grani foe na waka boen foe den grontapoe evangelisatiewroko? (b) Efoe joe de wan evangelisatie-prékiman, san joe moe doe dan akroederi Matteus 10:7?
19 Jehovah Kotoigi e taki dati na ferwondroe bericht disi ben moe kon foe den égi koni nanga froestan nanga krakti? Nono. Ala grani de foe wi koni èn makti Gado, Jehovah, na fosi Evangelium-prékiman. Soboen san joe sa doe? Efoe joe si sortoe presi na evangeliumpréki e teki na ini na troe anbegi èn joe wani prisiri Jehovah opregti, hari dan geregeld ibri wiki go foe préki na evangelium. Nanga dati joe e gi jesi na a komando di Jezus ben gi: „PRÉKI TE JOE E GO WAKA”! — Matt. 10:7.
Joe kan piki den aksi di e kon now?
□ Fa na meki bekenti foe na boen njoensoe no de soso wan sani di komoto foe Jehovah, ma di a e hori baka gi en toe?
□ Sortoe prati engel ben abi na a meki bekenti foe na boen njoensoe?
□ Ini a doe foe sortoe wroko Jezus Kristus ben gi ensrefi krinkrin?
□ Foe san-ede wi kan taki dati wan sma foe a de wan troe kristen, moe de wan evangeliumprékiman?
□ Sortoe ferwakti ben tan tranga na libi na mindri den sma di ben taki dati den de bakaman foe Kristus?
□ Fa Jehovah Kotoigi ini disiten e sori dati den de troe evangeliumprékiman?
[Prenki na tapoe bladzijde 2]
Evangeliumprékiman na ini hemel èn na grontapoe e wroko makandra na ini na préki foe na boen njoensoe