Jehovah Kotoigi — Troetroe evangelie preikiman
1 Jesus Krestes poti a frantiwortoe foe preiki na evangelie na tapoe ala den disipel foe en, èn a ben sori den spesroetoe taki den moesoe preiki a boen njoensoe foe a Kownoekondre (Mat. 24:14; Tori. 10:42). Den fosi disipel foe en ben gi na eksempre gi disi di den ben taki nomonomo foe a Kownoekondre — no wawan na den presi pe den ben go foe anbegi, ma awinsi pe den ben miti sma na poebliki èn te den ben go oso foe oso (Tori. 5:42; 20:20). Wi leki Kotoigi foe Jehovah na ini a ten disi, sori foe de troetroe kresten evangelie preikiman, foe di wi preiki a Kownoekondre boskopoe na ini 232 kondre èn wi dopoe moro leki wán miljoen njoen disipel soso na ini den dri jari di pasa! Foe san ede na evangelie preikiwroko foe wi ben abi so foeroe boen bakapisi?
2 Boen njoensoe e prisiri wi srefisrefi: Evangelie preikiman na preikiman, noso boskopoeman foe boen njoensoe. Foe di wi de den sortoe sma disi, meki wi abi a moi grani foe meki a Kownoekondre foe Jehovah bekènti — a wan-enkri troetroe boen njoensoe di wi kan gi libisma di brokosaka. Wi de nanga faja foe di wi kon sabi kaba taki wan njoen hemel de di na wan regtfardiki fasi sa tiri wan njoen grontapoe foe getrow libisma di sa libi na ini a paradijs di e kon (2 Petr. 3:13, 17). Wi na den wan-enkri sma di teki a howpoe disi, èn wi de fajafaja foe prati en nanga trawan.
3 Troe lobi e boeweigi wi: A preiki di wi e preiki na evangelie, na wan wroko di e kibri libi (Rom. 1:16). Foe dati ede wi e ondrofeni bigi prisiri ini a prati di wi e prati a Kownoekondre boskopoe. Leki troetroe evangelie preikiman, wi lobi sma, èn dati e boeweigi wi foe prati a boen njoensoe nanga den — wi osofamiri, wi birtisma, nanga sma di wi sabi, èn someni tra sma leki wi kan. Te wi e doe a wroko disi nanga wi heri sili, dan dati na wan foe den moro boen fasi fa wi kan sori taki wi lobi trawan troetroe. — 1 Tes. 2:8.
4 A jeje foe Gado e jepi wi: Te wi e doe a wroko foe wi, di abi na ini taki wi e prani Kownoekondre siri èn e gi den watra, dan a Wortoe foe Gado e gi wi a djaranti taki na Jehovah „e meki a gro”. Dati na soifri san wi e si e pasa na ini wi organisâsi tide (1 Kor. 3:5-7). A de a jeje foe Gado di e jepi wi na ini wi evangelie wroko èn a e meki taki wi abi heri boen bakapisi. — Joèl 2:28, 29.
5 Nanga a deki-ati na prakseri di wi e kisi na ini 2 Timoteus 4:5 foe „doe a wroko foe wan evangelie preikiman”, èn foe di wi abi lobi gi ala sma, dan meki a de so taki wi ati e boeweigi wi foe prati a moi Kownoekondre boen njoensoe na ibri okasi, ala di wi abi a froetrow taki Jehovah sa go doro foe blesi a wroko foe wi.