Joe de wan sma di Gado ben sa teki?
„Gado ben teki den law sani foe grontapoe foe meki den koniwan kisi sjen.” — 1 KORINTHE 1:27.
1. Foe san-ede foeroe sma ben verkisi foe tron lawman na ini na ai foe na grontapoe?
JOE ben sa poti wan wroko na wan sé di joe ben sabi dati a de prenspari leki wan sani di no abi waarde soso foe di tra sma e si a wroko dati leki wan law sani èn leki wan marki foe swakifasi? A no de foe taki dati no wan sma e feni en switi foe den kari en wan don sma ofoe wan swaki sma — srefi wan pikin no e feni dati switi. Ma kon wi taki dati a komando foe doe a prenspari wroko disi komoto foe wan toemsi koni hé sma. Joe no ben sa de klari foe poti na hémemre foe joe na wan sé èn foe teki na wroko? Ini na lon foe na historia miljoenmiljoen sma ben doe disi troetroe. Sortoe wroko den sma disi ben teki tapoe den, èn foe soema a wroko disi ben komoto? Na piki wi e feni ini na fosi brifi foe Paulus gi kristensma ini na owroe Korinthe.
2. Sortoe activiteit na grontapoe, sma e si leki wan law sani?
2 Paulus ben warskow den kristen drape dati den no ben moesoe poti den anbegi sempel tapoe san ben de popu. A ben skrifi namkoe: „Bikasi na préki foe na pina-oedoe de wan lawsani gi den di e lasi gwe, ma gi wi di e kisi ferloesoe, a de Gado prakseri. Bikasi boekoe skrifi: ’Mi sa meki na koni foe den koniwan lasi gwe èn na froestan foe den wan nanga kabesa mi no sa loekoe na wan ai.’ Pe na koni sma de? Pe na meester foe wet de? Pe na sma di e debateer foe na seti foe sani? Gado no ben meki na koni ini grontapoe de wan law sani? Bikasi foe di grontapoe ini na koni foe Gado, nanga jepi foe en koni no ben leri sabi Gado, meki Gado ben feni en boen nanga jepi foe na law fasi foe san e préki, foe ferloesoe den sma di e bribi.” — 1 Kor. 1:18-21.
3. Sortoe boskopoe, di na grontapoe e si leki wan law sani, Gado e meki préki a tapoe na heri grontapoe akroederi en prakseri?
3 Foe na sokari koniwan èn den wan di tjari ede foe na grontapoe na préki foe wan kristen di ben trowe en broedoe na wan pina-oedoe de wan law sani. Den e spotoe nanga na prakseri dati te wan sma sori bribi ini Kristus srakti-ofrandi den sa kan prisiri ini libi ini wan regtvaardiki njoen seti. Dati Kristus ben opo baka foe dede èn de now na makti kownoe foe Gado hemel kownoekondre den e si leki soso fantasie. Tokoe ete na Almakti Gado ben poti na en prakseri foe meki na boskopoe disi di e waran na ati meki bekenti na a heri grontapoe. Foe dat’ede a de gi na ibriwan sma di wani tron en dienstknegti na wroko foe préki na boen njoensoe foe en kownoekondre. Soema Gado e gebroiki foe préki na boskopoe disi, foe di den koniwan èn den wan di tjari ede foe na grontapoe e feni en wan law boskopoe? Arki na a piki foe Gado égi Wortoe di komoto foe santa jeje.
4. (a) Soema Gado e gebroiki foe préki en boskopoe? (b) Sortoe krakti a abi tapoe den koniwan foe grontapoe, dati a e teki den sortoe sma disi?
4 „Bika oenoe e si oen kari, brada, dati a no foeroe koniwan na skinfasi den ben kari, no foeroe maktiwan, no foeroe foe hé gebortoe; ma Gado ben teki den lawsani foe grontapoe foe meki den koniwan firi sjen; èn Gado ben teki den swaki sani foe grontapoe foe meki den tranga sani kisi sjen; èn Gado ben teki den sani foe grontapoe di no abi grani èn den sani di sma e wisiwasi, den sani di no de, meki den sani di de tron noti, sodati nowan skin sa gafa na fesi foe Gado.” — 1 Kor. 1:26-29
5. San e bepaal ofoe joe de wan sma di Jehovah sa verkise foe gebroiki?
5 Wi de na sortoe foe sma di Gado ben sa teki foe doe a wroko di a wani foe doe now na grontapoe? Efoe dati de so dan disi wani taki dati wi moe de srekasreka foe grontapoe si wi leki wan law sani. „Na koni foe a grontapoe disi de wan law sani na Gado”, a bijbel e taki (1 Kor. 3:19). Foe kan de wan dienstknegti foe Jehovah Gado di sani e waka boen gi en, dan soboen joe moe de klari foe waka baka wan libifasi di sa meki dati foe na sé foe grontapoe joe gersi wan law sani. Eksempre de na ini historia di no wawan e sori dati Gado dienstknegti sma foe na grontapoe e si leki Wap law sani, ma di e meki wi si toe dati na koni foe a grontapoe de wan law sani na Gado?
Eksempre foe na ten di psa
6. Fa a ben kon dati Noach activiteit den gersi wan law sani na ini na ai foe na grontapoe, ma tokoe ben sori na koni foe Gado?
6 Te joe loekoe en foe na sé foe libisma dan Noach ben teki wan law wroko na en tapoe, ma no efoe joe loekoe en foe na sé foe Gado. Joe moe poti na prakseri dati na tapoe dré gron wan kefarlek bigi oso neleki wan bigi kisi foe 36.800 kubieke meter ben moe bow di ben moesoe tan na tapoe watra. Disi ben gersi wan sani di ben de wan risiko di ben sa meki sma go spotoe joe séker! A ben de gi den sma wan law sani dati Jehovah Gado ben sa meki wan kaba kon na a grontapoe. Noach ben de ini den ai leki wan law man foe préki sowan boskopoe (2 Petr. 2:5). Tokoe a de wan troe tori dati a libifasi foe den, a fasi fa den e doe sani, de wan law sani ini na ai foe Gado. Den ben pori na grontapoe, èn disi ben meki Gado kisi atibron (Gen. 6:5). Foe dat’ede meki Noach ben de klari foe sma feni en wan lawman ini a tori foe na fasi fa Gado ben sori en koni èn makti.
7. Foe san-ede na libifasi foe Mozes ben de leki wan law sani, ma san ben kon na krin na ini na bakapisi?
7 Joe ben sa de klari, dati soso foe prisiri Gado, foe libi goedoe nanga wan hé positie èn foe teki mishandel ini a presi foe dati? Mozes ben doe disi. Aladi en „ben kisi leri ini ala koni foe den Egyptesma” a ben libi nanga en friwani na libifasi dati èn a ben teki a marki di de na tapoe wan salfoe dienstknegti foe Gado (Tori. 7:22; Hebr. 11:24-26). Na grontapoe foe Egypte ben si na libi foe Mozes séker leki wan law sani, ma na koni foe grontapoe ben de wan law sani di den koniwan foe Egypte ben poti kon lagi nanga den tin tanteri èn Gado ben pori na sroedati makti foe na naatsi ini na Redi Se. Den sortoe eksempre disi e sori dati na koni foe libisma de foe troe wan law sani na Gado. A no e kon na a bakafoetoe foe a koni èn makti foe Gado.
8. (a) Foe sortoe maatschappelek stand na moro bigi pisi foe den kristen ben komoto? (b) Ma sortoe krakti na préki foe den ben abi na tapoe den koniwan foe na grontapoe?
8 San wi kan taki foe den fosten kristen? Wan historia-leriman skrifi: „A moro bigi pisi foe den fosten kristen ben de mofinasma èn den ben komoto foe na moro mendri klasse foe den sma di e wroko nanga anoe èn di ben seri sani foe den bigi foto” (The Ancient World, foe na anoe Joseph W. Swain). Den fosi jarhondro bakaman foe Kristus foe troe ben de gewoon sma, wan sani di den féanti foe den ben poti prakseri na tapoe (Tori. 4:13; Joh. 7:48). Tokoe na koni di den bakaman foe Kristus ben taki ben meki den koniwan foe na grontapoe kisi sjen. Den no ben man kisi krin na santa kibritori foe Gado di abi foe doe nanga Kristus nanga na kownoekondre; na taki dati ben de gi den leki wan law sani. A bijbel e taki foe disi: „Na koni disi no wan foe den tiriman foe na seti foe sani disi ben kon sabi, bikasi efoe den ben sabi, dan den no ben sa hanga na glori Masra na wan paal.” — 1 Kor. 2:7, 8.
A evangelisatiewroko foe Gado
9. (a) Soema ben de na Fonten foe den komando di Jezus ben gi? (b) San Jezus discipel ben moe doe foe préki na komnoekondreboskopoe gi sma di ben de warti foe en?
9 Jezus Kristus ben sori a koni foe Gado ini en eksempre èn na ini den komando di a ben gi foe na fasi fa na evangelisatiewroko ben moe doe. A ben taki namkoe: „Mi no e doe no wan sani gi misrefi . . . ma den sani disi mi e taki soleki na Tata ben leri mi” (Joh. 8:28). Jezus ben go direkt nanga na Kownoekondreboskopoe na den sma. A ben leri den na publiki èn na den oso. Loekoe sjatoe den komando di a ben gi en discipel, na den twarfoe èn den sébitenti di a seni go foe teki prati na a evangelisatiewroko. Wi kan lési den komando disi ini Matteus 10:1-14 èn Lukas 10:1-12. Jezus ben gi en discipel drape na komando foe go soekoe na sma. „Sortoe foto ofoe sortoe dorpoe joe e go toe, ondrosoekoe soema de drape warti foe en”, a taki. Ija, den ben moesoe soekoe na sma di ben wani arki. Èn san den discipel ben moe ferteri den? A ben gi den komando: „Préki . . . èn taki: ’Na kownoekondre foe hemel kon krosibé kaba.’” — Matt. 10:7.
10. (a) San Jezus ben taki foe na fasi fa wi ben moe taki nanga wan ososma? (b) San en discipel ben moe doe te belangstelling no ben sori? (c) San wi kan taki foe na koni foe den komando foe Kristus?
10 Jezus ben leri en discipel srefi fa den ben moe taki nanga wan ososma. A taki: „Te joe e go ini wan oso, taki fosi: ’Vréde moe de nanga na oso disi.’ Èn efoe wan mati foe vréde de drape, dan joe vrede sa kon na en tapoe. Ma efoe disi no de so, dan a sa drai kon na joe baka” (Luk. 10:5, 6). Den ben moe tan ini na oso foe den sma te den teki na kownoekondre boskopoe foe den na wan boen fasi. Efoe na ososma no ben sori belangstelling, dan den ben moe go moro fara. Fa disi ben de te joe loekoe en boen sempel komando di no ben de moeilek ma di ben de tog specifiek nofo foe sori te nanga na dé foe tide evangeliumprékiman fa den ben moe taki èn fa den ben moe doe! Disi no de san joe ben sa froewakti foe na koni foe Gado?
11. (a) Volgens Jezus, dan san ben moe de na thema foe na boskopoe di en discipel ben moe meki bekenti? (b) San wi moe doe efoe wi wani dati wi kownoekondre prékiwroko abi boen winimarki? (c) Fa joe kan gebroiki tekst foe sori dati na kownoekondre sa loesoe den problema di kari dja na ini na paragraaf disi?
11 Soleki wi ben taki kaba, dan a kownoekondre de na kern foe na boskopoe foe den sma di e doe na evangelisatiewroko. Jezus ben gi en discipel foe dat’ede komando: „Tan taki gi den: ’Na kownoekondre foe Gado kon krosibé kaba’” (Luk. 10:9). Joe moe hori na thema disi na prakseri, bika leki evangeliumprékiman a de joe frantwortoe foe meki den arkiman foe joe foe froestan fa na kownoekondre kan de gi den boen njoensoe. Foe dat’ede meki joe moe proberi foe meki na kownoekondre boskopoe de klarklari gi den ofoe fiti na den persoonlek fanowdoe foe den. Foe san-ede joe no ben sa poti krakti tapoe wan sani san na kownoekondre sa doe èn san den spesroetoe ben sa ondrofeni na wan switifasi, èn disi sa anga foe den fanowdoe ofoe belangstelling foe joe arkiman? Foe eksempre joe ben kan sori den fa na kownoekondre sa meki na prakseri foe Gado kon troe foe kenki na grontapoe disi kon tron wan paradijs pe libisma sa libi foe tégo, èn pe joe kan gebroiki tekst soleki Jesaja 45:18 èn Psalm 37:29. Moro fara joe ben kan sori, foe di joe e gebroiki den tekst di wi gi dja fa na kownoekondre sa loesoe den problema di wi kari dja na ondro.
Siki: Jes. 35:5, 6; Openb. 21:3, 4.
Dede: Jes. 25:8; 26:19; Joh. 5:28, 29; 1 Kor. 15:26.
Mankeri foe njanjan: Jes. 25:6; Ps. 67:6; 72:16.
Oso foe libi: Jes. 65:21-23.
Feti: Ps. 46:8, 9; 72:7, 8.
Kiri nanga tranga dwengi: Ps. 37:9, 10; Odo 2:22.
Na morsoe foe sani: Openb. 11:18.
12. (a) Fa wan evangeliumprékiman kan kon sabi san wan sma abi fanowdoe? (b) San de na sroto foe a waka boen foe sani leki wan boen evangeliumprékiman?
12 Fa joe kan kon sabi san na arkiman abi fanowdoe? Na ini na fosi presi joe moe de wan boen arkiman di de klari foe jere san den abi foe taki. Aksi den èn arki boen na den piki sondro foe go verdedig efoe den no e doe ofoe piki leki fa joe ben froewakti. Wan kotoigi di e teki prati na a evangelisatiewroko moro leki 25 jari, e taki: „Mi e proberi wantronwantron foe kisi na ososma ini na takimakandra. Na a fasi disi mi e kon foe sabi san a lobi na presi dati mi e go gewoon doro nanga san mi ben wani ferteri.” Wan tra evengeliumprékiman di abi ondrofeni ben taki foe dat’ede toe: „Wan lezing di joe ben leri na joe ede kande kan doro net na jesi foe den, ofoe ai fré psa den.” Foe troe na sroto foe de wan boen evangeliumprékiman de dati joe abi opregti belangstelling den sma neleki Jezus ben doe (Matt. 9:36-38). Meki den sma si dati joe abi persoonlek belangstelling gi den èn dati joe e bribi troetroe na ini na boen njoensoe di joe tjari gi den. Wan kotoigi ben taki foe disi: „Den sa teki na wán bosroiti te joe e taki leki wan masjin — sondro overtoigi.”
Wan toemsi prenspari evangelisatie methode
13. Fa a bijbel e sori dati den fosten kristen ben gi jesi na den sani di Jezus ben sori foe na prékiwroko?
13 Soleki wi ben si, dan Jezus ben gi tranga na en bakaman foe go direkt lijn nanga na kownoekondre boskopoe na den oso foe den sma. Den apostel di respeki san a ben taki, ben sori a koni foe Gado foe di den ben gebroiki na toemsi prenspari evangelisatie metbode disi. Na tori foe bijbel e taki: „Sondro foe stop ibri dé den tan foe leri na ini na tempel èn foe oso na oso èn meki na boen njoensoe foe na Kristus, Jezus bekenti” (Tori. 5:42). Di na apostel Paulus bakaten ben taki nanga medekristen foe na evangelisatiewroko, a taki: „Mi no ben hori misrefi na baka foe ferteri oenoe ala den sani san boen èn foe leri oenoe na publiki èn foe oso na oso. Ma na djoe èn na Griki mi gi kotoigi finifini foe beraw na Gado èn bribi na ini wi Masra Jezus Kristus.” — Tori. 20:20, 21.
14. San e sori dati na oso na oso prékiwroko methode de toemsi boen?
14 Aladi Gado dienstknegti sontron den ben spotoe den èn si den leki lawman foe di den ben gebroiki na methode disi foe den apostel foe préki na kownoekondre, tokoe na bigi winimarki foe en e sori dati Gado e feni en boen. Na Britse socioloog Brian Wilson, di go ondrosoekoe finfini na gro foe Jehovah Kotoigi ini Japan, ben taki foe eksempre: „A moro bigi pisi foe den [58,3 procent] sma di tron Jehovah Kotoigi, e taki dati a belangstelling foe den foe na fositron ben wiki foe di wan prékiman ben fisiti den na den oso.” Sotoe na katholiek priester John A. O’Brien foeroe jari psa kaba ben taki gi sowan toe hondro priester ini na St. Joseph’s Seminary ini New York: „Na kibritori foe na toemsi bigi winimarki foe St. Paulus ben de na gebroiki foe na oso na oso methode sondro foe weri foe meki sma bekeer. A de wan spotoe tori dati na methode foe den apostel, sekte di no de katholiek e gebroiki en, spesroetoe Jehovah Kotoigi.”
Foe san-ede wi moe poti wan faste ten ini na evangelium prékiwroko
15. Foe san-ede a de prenspari foe abi wan faste ten gi wi foe oso na oso prékiwroko-activiteit?
15 A no de so dati wan schema de fanowdoe te prenspari afersi moe doe? Kande séker joe abi wan faste ten foe njan èn foe sribi, èn sosrefi toe foe go na skoro ofoe foe go na joe wroko. Te wan sma wani kon klari nanga wan sani, dan wan schema de prenspari. A srefi wi kan taki foe wi oso na oso prékiwroko. Foe di Satan Didibri e stré foe meki a boen njoensoe foe Gado kownoekondre tan farawe foe den sma, meki wi moe abi wan schema foe kan teki prati geregeld na a kownoekondre prékiwroko. Noso a ben sa kan psa heri boen dati „wi no e feni ten srefsrefi” foe doe a wroko disi (1 Kor. 9:16). Satan ben poti na marki na en fesi foe sorgoe dati disi psa.
16. Sortoe eksempre e sori omeni waarde a abi foe abi wan schema gi wi prékiwroko activiteit?
16 Na so wan datra e taki di sowan 25 jari de wan kotoigi, dati a e feni en fanowdoe foe poti wan faste ten gi na evangeliumprékiwroko. Na éginari foe wan bigi presi pe den e kweki meti na ini na Verenigde Staten e taki: „Na ini a jari 1944 mi ben ferstan dati a ben luk mi foe go ini na dienst te mi ben poti wan bepaalde de gi en.” A e go moro fara: „Te nanga na dé foe tide mi e poti wan dé ini na wiki ete na wan sé gi na dienst.” Wan kristen owroeman di de kroetoebakra, ben taki dati gemiddeld 15 joeroe ini wan moen a e gi na a prékiwroko activiteit foe di a e hori ensrefi na wan faste schema gi na kotoigi wroko. Te a moe doe satra wettelek afersi, a e gebroiki na bakadina gi a tori disi, baka te mamanten a ben go ini na prékiwroko. — Teki gersi Kolossesma 4:5.
Teki presi na wan wartifasi
17. Sortoe sorgoe wi moe gi na wi krosi te wi e teki prati na a evangelisatiewroko?
17 Aladi grontapoe kande e si wi leki lawman foe na boskopoe di e gi libi ede di wi e meki bekenti, tokoe wi moe loekoe boen dati a fasi fa wi e weri krosi na no wan fasi e broko a prenspari boskopoe saka. Weri krosi na wan aparti fasi — kande de toemsi modo-modo ofoe toemsi morsoe — ben kan abi na bakapisi disi. Ini den goedoe birti wi moe poti kande extra prakseri na den krosi di wi e weri èn loekoe dati wi poti prakseri na a fasi fa ala sani seti ini a birti. Disi wani taki dati a de fanowdoe dati wi abi wan toe diri krosi? Nono. Wan sisa di de wan evangeliumprékiman nanga foeroe winimarki, di ben waka lontoe nanga en masra foeroe, e loekoe boen fa den sma ini en gebied e weri krosi. Dan a de teki wan sortoe di no de bradjari èn di e tjari na gwenti foe na presi kon na fesi. Awansi a de so dati den krosi di wi abi de so sempel, tokoe den sa doro a marki efoe wi krosi krin, triki netjes ofoe den pers èn den no abi olo. Efoe joe e weri wan jas, dan a no mankeri knopo? Efoe joe e weri wan das, flaka de na en tapoe? Èn joe soesoe poets boen netjes? Hori na prakseri dati wi wani loekoe na wan netjes, wartifasi di sa dwengi respeki gi na boskopoe foe wi. — Tit. 2:10.
18. (a) Gi eksempre di e sori omeni waarde a abi foe weri krosi na wan fasi di e tjari den boen gwenti foe a presi kon na fesi? (b) Foe san-ede wi moe tan farawe foe poti toemsi prakseri na tapoe krosi?
18 Foe di wan séker kotoigi ben poti wan extra prakseri foe na fasi fa ai loekoe na dorosé meki wan dame di na fesi no ben wani taki nanga en kari en kon na inisé. Baka di den ben abi wan switi takimakandra foe na bijbel, na ososma aksi: „Tussen twee haakjes, sortoe kerki na foe joe?” Na piki „Jehovah Kotoigi” ben froewondroe en. Noiti ete a ben kari Jehovah Kotoigi kon na inisé. Di na kotoigi ben aksi en foe san-ede a ben meki a kon na inisé, na ososma ben piki dati disi ben doe kon foe di na kotoigi ben weri krosi so boen èn e sori taki a ben abi wan boen firi foe seti ensrefi moi. A dame ben firi dati a ben moesoe foe arki na san en ben abi foe taki. Na bakapisi ben de wan geregelde bijbelstudie. Na ini moro eenvoudig birti dan a poti toemsi prakseri na krosi na a tra sé kan wiki na prakseri dati joe e prakseri na joesrefi: ’Mi de moro boen leki oenoe.’ Soboen awansi ini sortoe gebied wi e wroko ofoe gi sortoe sma wi e préki, wi krosi èn na hori ini prakseri foe na birti moe de so dati na kownoekondre boskopoe e hari den sma kon na presi dati a e skreki den. — 1 Kor. 9:19-23.
19. (a) San e emki wan sma tron wan sma di Gado ben sa teki? (b) Sortoe eksempre Jezus ben gi ini disi? (c) Sortoe grani joe sa kan kon kisi te joe de klari foe grontapoe si joe leki wan law sani?
19 Foe troe a de na joe foe gi piki na tapoe a aksi: „Mi de wan sma di Gado ben sa teki?” Na teki di a e teki no didon tapoe na bekwaamheid nanga a tjari foe kabesa ofoe wan grontapoe positie. Na sroto de moro foeroe, dati joe moe de klari foe doe a wroko foe Gado tapoe en fasi, a winsi te joe o handri so, na grontapoe e si joe leki wan lawman ofoe wan swaki sma. Jezus Kristus ben gi na ekemspre. A ben de klari dati den sma foe en ten ben si en leki wan lawman foe tron gi den sma di a ben meki tron en discipel, „kon foe a sé foe Gado” (1 Kor. 1:30). Efoe joe de klari foe meki na kownoekondre boskopoe di na grontapoe e si leki wan law sani bekenti, dan Jehovah Gado sa feni joe boen foe a gebroiki joe leki wan foe en kotoigi èn joe sa kan prisiri joesrefi na ini na blesi presenti foe tégo libi na ini en regtvaardiki njoen seti foe sani.
Joe kan piki den aksi di e kon now?
□ Sortoe prékiwroko de wan law sani ini na ai foe grontapoe?
□ Fa Noach nanga Mozes ben sori dati san na grontapoe kande ben si leki wan law sani, te joe loekoe en boen ben e sori na koni foe Gado?
□ Sortoe komando Jezus ben gi en bakaman ini na tori foe na doe foe na evengelisatiewroko?
□ San na wan toemsi prenspari evangelisatie methode, èn san e sori dati na methode disi abi winimarki?
□ Foe san-ede a de prenspari foe poti wan faste ten gi wi evangelisatie activiteit?
□ Fa wi moe weri krosi te wi e teki prati na a evangelisatie activiteit?
[Prenki na tapoe bladzijde 7]
Bifo Jezus seni en discipel go foe doe na evangelisatiewroko, a leri den fa den moe doe na wroko
[Prenki na tapoe bladzijde 9]
Na prékiwroko foe oso na oso na wan foe den evangelisatiemethode di a bijbel feni boen