A gebroiki di Jehovah e gebroiki „lawfasi” foe froeloesoe denwan di e bribi
„Foe di, ini a koni foe Gado, grontapoe no ben kon sabi Gado, nanga jepi foe a koni foe den, dati ede Gado ben feni en boen foe froeloesoe denwan di e bribi, nanga jepi foe a lawfasi foe san sma e preiki.” — 1 KORENTESMA 1:21.
1. Na sortoe fasi Jehovah ben sa gebroiki „lawfasi”, èn fa wi doe sabi taki grontapoe no kon sabi Gado nanga jepi foe a koni foe den?
SAN? Jehovah ben sa gebroiki lawfasi? Nôno, foe taki en leti no! Ma a kan èn a e gebroiki san sori leki lawfasi gi grontapoe. A e doe disi, so taki a man froeloesoe sma di sabi èn lobi en. Nanga jepi foe a koni foe grontapoe, grontapoe no man kon sabi Gado. Jesus Krestes ben tjari disi kon na krin di a ben taki ini begi: „Regtfardiki Tata, grontapoe, foe taki en leti, no ben kon sabi joe.” — Johanes 17:25.
2. Fa a e sori kande leki den pasi foe Jehovah èn den pasi foe grontapoe e waka sei na sei foe makandra, ma san na den troe tori?
2 Den wortoe foe Jesus e sori taki den pasi foe Jehovah no de a srefi leki di foe grontapoe. Te joe e loekoe en frafra, a e sori kande taki a prakseri foe Gado èn di foe a grontapoe disi e waka sei na sei foe makandra. A e sori kande leki san a grontapoe disi poti leki marki foe doro, abi a blesi foe Gado. Bijbel e taki, foe eksempel taki Gado ben o opo wan regtfardiki tiri di sa tjari libi na ini vrede, kolokoe èn boenten gi a libisma famiri na grontapoe (Jesaja 9:6, 7; Mateus 6:10). Na a srefi fasi, grontapoe e baritaki a prakseri foe en foe gi sma vrede, boenten nanga wan boen tiri nanga jepi foe wan sokari njoen grontapoe seti. Ma den prakseri foe Gado èn di foe grontapoe no de a srefi. A prakseri foe Jehovah de foe regtfardiki ensrefi leki a Moro Hei Soeverein foe hemel nanga grontapoe. Disi a sa doe nanga jepi foe wan hemel tiri, di sa poeroe ala grontapoe tiri na pasi (Danièl 2:44; Openbaring 4:11; 12:10). So boen Gado no e doe noti a srefi leki a grontapoe disi (Johanes 18:36; 1 Johanes 2:15-17). Dati meki bijbel e taki foe toe sortoe koni — „a koni foe Gado” nanga „a koni foe grontapoe”. — 1 Korentesma 1:20, 21.
A moro prenspari fowtoe foe grontapoe koni
3. Foe san ede a njoen grontapoe seti di libisma pramisi noiti ben sa gi sma satisfaksi, ala di a koni foe grontapoe e sori kande leki a e meki taki sma e lespeki den srefisrefi?
3 Gi den sma di no e kisi tiri foe a koni foe Gado, a koni foe grontapoe e sori leki a de wan sani di e naki den ati srefisrefi. Joe abi grontapoe filosofie nanga den hei-prodo wortoe, di e kori a prakseri. Doesoendoesoen instituut di e gi moro hei leri e gi bodoi di kon foe, san foeroe sma e si leki a prakseri foe den moro koniwan foe a libisma famiri. Bigi bibliotheek (presi pe sma tjari wan lo boekoe kon na makandra) foeroe srefisrefi nanga sabi di den tjari kon makandra foe hondrohondro jari foe libisma ondrofeni. Ma awansi den sani disi de so, tokoe a njoen grontapoe seti di grontapoe tiriman e pristeri, ben kan de soso wan tiri foe man di no de volmaakti, di doti nanga sondoe èn e dede. Foe dati ede, a seti dati no ben sa de volmaakti èn ben o meki den foeroe fowtoe baka di ben meki na fesi kaba èn no ben sa gi satisfaksi noiti na ala den fanowdoe foe a libisma famiri. — Romesma 3:10-12; 5:12.
4. San abi krakti tapoe a njoen grontapoe seti di den ben pristeri nanga sortoe bakapisi?
4 A njoen grontapoe seti di libisma e pristeri, a no wawan a swakifasi foe libisma abi krakti na en tapoe, ma a krakti foe ogri jeje mekisani toe — ija, Satan Didibri nanga den ogri jeje foe en. Satan ben breni a froestan foe den sma, so taki den no e bribi „a glori boen njoensoe foe a Krestes” (2 Korentesma 4:3, 4; Efeisesma 6:12). Foe dati ede grontapoe e pina na ondro a wan siki baka a trawan. Leki wan rampoe bakapisi grontapoe e pina foe sari nanga ogri foe a feti di a e feti foe tiri ensrefi sondro a jepi foe Gado èn sondro foe hori a wani foe Gado na prakseri (Jeremia 10:23; Jakobus 3:15, 16). So boen so leki fa na apostel Paulus ben taki, dan „grontapoe no ben kon sabi Gado nanga jepi foe a koni foe den”. — 1 Korentesma 1:21.
5. San na a moro prenspari fowtoe foe a koni foe a grontapoe disi?
5 Ma san dan, na a moro prenspari fowtoe foe a koni disi foe grontapoe, pe joe abi na ini toe den plan foe en foe meki wan njoen grontapoe seti? Na disi, taki grontapoe no wani sabi wan sani di noiti sani kan waka boen gi den efoe den no wani sabi dati — a moro hei soevereiniteit foe Jehovah Gado. Na wan bigimemre fasi grontapoe e weigri foe erken a soevereiniteit foe Gado. Foe espresi grontapoe e libi Jehovah na dorosei foe ala den plan foe den èn den e froetrow na tapoe den eigi bekwaamfasi nanga sani di den e seti. (Teki gersi Danièl 4:31-34; Johanes 18:37.) Bijbel e tjari kon na krin taki „a frede gi Jehovah na a bigin foe koni” (Odo 9:10; Psalm 111:10). Tokoe grontapoe no ben leri srefi a moro prenspari sani disi di de fanowdoe foe kisi koni. Sondro a horibaka foe Gado, foe dati ede, fa grontapoe kan abi boen bakapisi? — Psalm 127:1.
Kownoekondre preiki — Wan lawsani noso wan sani di e wroko boen?
6, 7. (a) San denwan di e kisi tiri foe a koni foe Gado e preiki, ma fa grontapoe e si den? (b) Akroederi a koni foe soema den kerki fesiman foe a krestenhèit e preiki, èn nanga sortoe bakapisi?
6 Na a tra sei, den sma di sabi Gado e sori a koni foe Gado èn e froekisi foe a koni dati tiri den. So leki fa Jesus ben taki na fesi, dan den e preiki „a boen njoensoe disi foe a kownoekondre . . . na heri grontapoe pe sma e libi” (Mateus 24:14; 28:19, 20). So wan preiki na wan sani di e wroko boen now, di a grontapoe foe wi foeroe nanga a feti di sma e feti baka sani, a doti di den e doti grontapoe, pôtifasi èn a pina di libisma e pina? Gi denwan di abi a koni foe grontapoe, a sortoe preiki disi foe a Kownoekondre foe Gado e sori leki a de soso lawfasi, di a no wan sani di man wroko boen. Den e si den preikiman foe Gado en Kownoekondre leki sma di de leki wan hebi gi lanti èn di e meki a moeiti di lanti meki foe doro wan fasi foe tiri di boen dorodoro, no e go so esi moro. Ini a tori disi den e kisi a horibaka foe den kerki fesiman foe a krestenhèit, di e preiki akroederi a koni foe a grontapoe disi èn no e froeteri sma san den moesoe sabi foe a njoen grontapoe foe Gado nanga en Kownoekondre tiri, srefi ala di disi ben de a moro prenspari leri foe Krestes. — Mateus 4:17; Markus 1:14, 15.
7 Historia skrifiman H. G. Wells ben poti prakseri tapoe a misi disi di den kerki fesiman foe krestenhèit ben misi. A ben skrifi: „Wan moi sani foe si, na a bigi waarde di Jesus ben gi na a gi leri foe san a ben kari a Kownoekondre foe Hemel èn a troetroe no prenspari presi di dati abi ini a wroko nanga a leri foe moro foeroe foe den kresten kerki.” Ma tokoe, te sma foe a geslakti disi moesoe kisi libi, den moesoe jere fosi foe a Kownoekondre di Gado opo èn foe doe dati, wan sma moesoe preiki a boen njoensoe di abi foe doe nanga dati. — Romesma 10:14, 15.
8. Foe san ede a preiki foe a boen njoensoe foe Gado de a sani foe doe di e wroko moro boen ini a ten disi, ma sortoe waka nanga libi ben sa de sondro wini?
8 Foe preiki a boen njoensoe foe Gado, foe dati ede, na a sani di e wroko moro boen ini a ten disi. Disi de so, foe di a Kownoekondre boskopoe e gi wan troetroe howpoe di e foeroe na ati foe libisma nanga prisiri ini den lasti dei disi pe ’moeilek ten de di de tranga foe pasa’ (2 Timoteus 3:1-5; Romesma 12:12; Titus 2:13). Ala di libi ini a grontapoe disi no de seiker èn a sjatoe, libi na ini Gado njoen grontapoe sa de foe têgo, na mindri foe prisiri, a de di sani sa de pasa marki èn vrede leti dja na grontapoe (Psalm 37:3, 4, 11). So leki fa Jesus Krestes ben taki en, dan „sortoe wini a sa abi gi wan libisma efoe a wini a heri grontapoe, ma e lasi en sili? noso san wan man sa gi leki wan loesoe gi a sili foe en?” Efoe wan sma e lasi a reti foe libi ini a njoen grontapoe foe Gado, sortoe wini a grontapoe disi di e pasa gowe, abi dan? A njan di so wan sma e njanboen now foe sani na skin fasi ben de doe no doe, ben de foe soso èn foe wan sjatoe pisi ten. — Mateus 16:26; Preikiman 1:14; Markus 10:29, 30.
9. (a) Di wan man di Jesus ben aksi foe tron wan bakaman foe en, ben aksi en foe wakti pikinso, san Jesus ben gi en leki rai foe doe? (b) Fa a piki foe Jesus moesoe abi krakti na wi tapoe?
9 Wan man di Jesus ben kari foe de en bakaman ben taki: „Gi mi pasi foe mi go fosi èn beri mi papa.” San Jesus ben gi en leki rai foe doe? Foe di a ben sabi taki a man ben sa wakti nanga wan toemoesi prenspari wroko soso foe wakti te leki a papa nanga mama foe en ben dede, Jesus ben piki: „Meki den dedewan beri den dedewan foe den, ma go èn meki na ala presi a kownoekondre foe Gado bekènti” (Lukas 9:59, 60). Den sma di sori koni, foe di den e gi jesi na Krestes no kan drai den baka gi a doe foe a wroko di den kisi foe preiki a Kownoekondre boskopoe. A koni foe Gado e meki den sabi taki a grontapoe disi nanga den tiriman foe en lasi kaba (1 Korentesma 2:6; 1 Johanes 2:17). Sma di e hori baka gi a soevereiniteit foe Gado sabi taki a wan enkri troe howpoe gi libisma e didon ini a boemoei di Gado sa boemoei èn a tiriwroko foe en (Sakaria 9:10). So boen, ala di den sma di abi a koni foe a grontapoe disi, no e bribi ini a Kownoekondre foe Gado èn no wani a hemel tiri dati, dan tokoe pipel di e kisi tiri foe a koni foe Gado e doe san e tjari troetroe wini gi den kompe libisma foe den èn e sreka den gi têgo libi ini a njoen grontapoe di Jehovah pramisi. — Johanes 3:16; 2 Petrus 3:13.
„Lawfasi gi denwan di e go kisi pori”
10. (a) Di Saulus foe Tarsus ben drai en libi, sortoe wroko a ben doe, èn fa a ben si disi? (b) Foe san sma ben sabi den Grikisma foe owroeten, ma fa Gado ben si a koni foe den?
10 Saulus foe Tarsus, di ben tron Paulus na apostel foe Jesus Krestes, ben teki a wroko disi di e kibri libi. A de wan reidelek sani foe denki taki di Jesus Krestes ben drai a libi foe Saulus, A ben e gi en wroko foe doe di de wan law wroko? Paulus no ben denki so (Filipisma 2:16). Na a ten dati sma ben si den Grikisma leki den moro koni sma foe grontapoe. Den ben meki bigi gi den moro bigi filosoofman nanga koni man foe den. Ala di Paulus ben taki a Grikitongo, tokoe a no ben waka baka a Griki filosofie nanga leri. Foe san ede? Foe di so wan koni foe a grontapoe disi de lawfasi na Gado.a Paulus ben soekoe a koni foe Gado, di ben meki en preiki a boen njoensoe oso foe oso. A moro bigi Preikiman foe ala ten, Jesus Krestes, ben gi na eksempel èn ben leri en foe doe a srefi wroko. — Lukas 4:43; Tori foe den Apostel 20:20, 21; 26:15-20; 1 Korentesma 9:16.
11. Te joe e loekoe en boen, dan san Paulus ben taki foe a preiki wroko di a ben kisi foe doe èn a koni foe grontapoe?
11 Paulus e taki disi foe a wroko di a ben kisi foe preiki: „Krestes ben seni mi . . . foe go meki a boen njoensoe bekènti, no nanga a koni foe wortoe, so taki a pina oedoe foe Krestes no ben sa meki kon tron wan soso sani. Bika den wortoe di abi foe doe nanga a pina oedoe [a srakti ofrandi foe Jesus] na lawfasi gi denwan di e go kisi pori, ma gi denwan di e kisi froeloesoe, a de a krakti foe Gado. Bikasi den ben skrifi: ’Mi sa meki a koni foe a koniman lasi gowe, èn a sabi foe den man di sabi foeroe mi sa skoifi den go na wan sei.’ Pe a koni man de [so leki den filosoofman]? Pe den sabiman foe boekoe de? Pe a sma de, di e taki-go-taki-kon, foe a seti foe sani disi? A no Gado ben meki a koni foe grontapoe kon tron lawfasi? Bikasi foe di, ini a koni foe Gado grontapoe no ben kon sabi Gado nanga jepi foe a koni foe den, Gado ben feni en boen foe froeloesoe denwan di e bribi nanga jepi foe a lawfasi foe san sma e preiki.” — 1 Korentesma 1:17-21.
12. San Jehovah e doe nanga jepi foe „a lawfasi foe san den e preiki” èn fa denwan di wani „a koni foe tapoesei” e doe?
12 So froewondroe leki a e sori kande, den srefi sma di grontapoe e kari law, na den sma di Jehovah e gebroiki leki den preikiman foe en. Ija, nanga jepi foe a lawfasi foe a diniwroko foe den preikiman disi, Gado e froeloesoe denwan di e bribi. Jehovah seti afersi so, taki preikiman foe a „lawfasi” disi no kan gi glori na densrefi, èn tra libisma no kan gi glori na denwan di nanga jepi foe den sma ben jere a boen njoensoe. Disi de so, taki „no wan skin sa meki bigi na Gado fesi” (1 Korentesma 1:28-31; 3:6, 7). A troe, taki a preikiman e prei wan prenspari ròl, ma a boskopoe di a ben kisi leki komando foe preiki, na san e meki wan sma kisi froeloesoe efoe a sma e bribi a boskopoe. Denwan di wani „a koni foe tapoesei” no sa wisiwasi a boskopoe foe a preikiman, foe di a e sori law èn lagi, den e froefolgoe en, èn a e go oso foe oso. Na presi foe dati, den safri-atiwan sa lespeki a sma di e meki a Kownoekondre bekènti, leki wan preikiman di Jehovah ben gi a wroko èn a e kon ini a nen foe Gado. Den sa gi bigi prensparifasi na a boskopoe di a preikiman e tjari nanga jepi foe a wortoe di a e taki nanga en mofo èn nanga jepi foe a bladzijde di druk. — Jakobus 3:17; 1 Tesalonikasma 2:13.
13. (a) Fa den djoe nanga den Grikisma ben si a preiki foe na anga di den ben anga Krestes na wan postoe? (b) Foe sortoe groepoe foe sma, den no ben kari foeroe foe de bakaman foe Jesus èn foe san ede?
13 Te Paulus e go doro nanga en takimakandra foe den fasi foe Gado, a e taki: „Den djoe e aksi foe wan marki èn den Grikisma e soekoe koni; ma wi e preiki wan Krestes di den anga na a postoe, gi den djoe wan reide foe naki foetoe fadon, ma gi den nâsi lawfasi; ma gi den wan di den ben kari, djoe so boen leki Grikisma, Krestes, a krakti foe Gado èn a koni foe Gado. Bika wan law sani foe Gado moro koni leki libisma, èn wan swaki sani foe Gado moro tranga leki libisma. Oenoe e si a kari foe Gado, brada, taki Gado no ben kari foeroe koniwan na skin fasi, no foeroe maktiwan, no foeroe sma foe hei gebortoe; ma Gado ben teki den law sani foe grontapoe foe meki den koniwan kisi sjen; èn Gado ben teki den swaki sani foe grontapoe foe meki den tranga sani kisi sjen.” — 1 Korentesma 1:22-27; teki gersi Jesaja 55:8, 9.
14. (a) Na san Jehovah Kotoigi e sori, te sma e aksi den foe den papira foe den preiki? (b) Foe san ede Paulus ben weigri foe plisi den Grikisma nanga wan enkri sori foe a koni foe grontapoe?
14 Di Jesus ben de na grontapoe, den djoe ben aksi en wan marki foe hemel (Mateus 12:38, 39; 16:1). Ma Jesus ben weigri foe gi wan enkri marki. Na a srefi fasi, Jehovah Kotoigi ini a ten disi no e sori papira leki wan marki foe preiki. Na presi foe dati, den e sori go na a wroko foe den foe preiki a boen njoensoe, so leki fa dati skrifi na den bijbeltekst leki Jesaja 61:1, 2, Markus 13:10, nanga Openbaring 22:17. Den Grikisma foe owroeten ben soekoe koni, moro hei skoro ini den sani foe a grontapoe disi. Ala di Paulus ben kisi skoro ini a koni disi foe grontapoe, a ben weigri foe plisi den Grikisma foe di a no ben wani sori notinoti foe a koni disi (Tori foe den Apostel 22:3). A ben taki èn ben skrifi ini a Grikitongo di a gewoon pipel ben e taki, na presi foe na owroe Grikitongo foe a ten dati. Paulus ben froeteri den Korentesma: „Di mi kon na oenoe, brada, [mi] no kon nanga foeroe wortoe noso dipi koni foe meki a santa kibritori foe Gado bekènti na oenoe. . . . A fasi fa mi ben taki èn san mi ben preiki, no ben de foe overtoigi oenoe nanga bigi wortoe foe koni, ma nanga a sori foe jeje nanga krakti, so taki oen bribi no ben sa de na ini a koni foe libisma ma ini a krakti foe Gado.” — 1 Korentesma 2:1-5.
15. San Petrus ben memre den spotoeman foe a boen njoensoe, èn fa a disi ten situwâsi de a srefi leki di foe den dei foe Noa?
15 Petrus e memre spotoeman foe den lasti dei disi, di e meki spotoe nanga a boen njoensoe foe Gado en njoen grontapoe di e kon èn a kaba foe a grontapoe disi, di e kon krosibei, taki a grontapoe foe den dei foe Noa „kisi pori di a watra ben soengoe en” (2 Petrus 3:3-7). Ala di Noa ben tanapoe na fesi a kaba dati, di ben de wan rampoe, dan san a ben doe? Foeroe sma e prakseri foe Noa soso leki wan bowman foe na ark. Ma Petrus e taki, dati di Gado ben tjari a Froedoe tapoe a grontapoe foe owroeten, A „ben kibri Noa, wan preikiman foe regtfardikifasi nanga seibi trawan” (2 Petrus 2:5). Ini a grontapoe koni foe den, den gadolowsoe sma dati di ben libi bifo a Froedoe, sondro degedege ben meki spotoe nanga san Noa ben e preiki èn ben e kari en wan lawman, di ben dren èn ben doe sani di no ben o wroko boen. Ini a ten disi, troe kresten e tanapoe na fesi wan srefi sortoe situwâsi, foe di Jesus ben agersi a geslakti foe wi nanga di foe den dei foe Noa. Ma awansi den spotoeman de, a preiki foe a boen njoensoe foe a Kownoekondre de moro leki soso takitaki. Neleki a preiki di Noa ben doe, a wani taki froeloesoe gi a preikiman èn gi denwan di e arki en! — Mateus 24:37-39; 1 Timoteus 4:16.
’Tron lawman foe kon tron koniman’
16. San sa pasa nanga a koni foe a grontapoe disi na Armagedon, èn soema sa pasa libilibi go na ini Gado en njoen grontapoe?
16 Heri esi, na Armagedon, Jehovah Gado sa meki ala „a koni foe den koni man” go pori. A sa skoifi „a koni [na wan sei] foe den man di sabi foeroe”, èn di ben froeteri na fesi fa a njoen grontapoe seti foe den, ben sa tjari moro boen kondisi gi a libisma famiri. „Na orlokoe foe a bigi dei foe Gado na Almaktiwan” sa bron ala falsi koni takitaki, filosofie, nanga koni foe a grontapoe disi, krinkrin (1 Korentesma 1:19; Openbaring 16:14-16). Den wan enkri sma, di sa pasa na orlokoe dati libilibi èn kisi libi ini Gado njoen grontapoe, na denwan di e gi jesi na san a grontapoe disi e kari lawfasi — ija, a glori boen njoensoe foe Jehovah en Kownoekondre.
17. Fa Jehovah Kotoigi ben tron ’lawman’ èn san na a fasti bosroiti foe den preikiman foe a boen njoensoe?
17 Jehovah Kotoigi, di e kisi tiri foe a jeje foe Gado, no e sjen foe preiki san grontapoe e kari lawfasi. Na presi foe proeberi foe de koni leki grontapoe, den ben tron ’lawman’. Fa? Foe di den e doe a Kownoekondre preikiwroko, so taki den kan de koni, so leki fa Paulus ben skrifi: „Efoe wan sma na oenoe mindri denki taki a koni ini a seti foe sani disi, meki a tron wan lawman, so taki a kan tron koni” (1 Korentesma 3:18-20). Jehovah en preikiman foe a boen njoensoe sabi a waarde foe a boskopoe foe den, di e kibri libi èn den sa tan preiki dati sondro foe tapoe, te na a kaba foe a grontapoe disi nanga a koni foe en na a orlokoe foe Armagedon. Heri esi, Jehovah Gado sa regtfardiki en universeel soevereiniteit èn tjari têgo libi gi ala denwan di e bribi now èn e doe wan sani na tapoe „a lawfasi foe san den e preiki”.
[Foetoewortoe]
a Awansi ala den filosofis takimakandra nanga ondrosoekoe di den koni man foe Grikikondre foe owroeten doe, tokoe den sani di den ben skrifi e sori taki den no ben feni no wan troetroe fondamenti foe howpoe. Profesor J. R. S. Sterrett nanga Samuel Angus e taki: „Boekoe no de di abi moro kragi di e gi sari-ati èn di abi foe doe nanga sari na ini libi, lobi di e pasa gawgaw, a bidrigifasi foe howpoe èn dede di no abi sari-ati.” — Funk and Wagnalls New “Standard” Bible Dictionary, 1936, bladzijde 313.
San na den piki foe joe?
◻ Sortoe toe sortoe koni de?
◻ San na a moro prenspari fowtoe foe a koni foe grontapoe?
◻ Foe san ede a preiki foe a boen njoensoe de a sani foe doe di e wroko moro boen?
◻ San sa pasa heri esi nanga ala a koni foe grontapoe?
◻ Foe san ede Jehovah Kotoigi no e sjen foe preiki san grontapoe e kari lawfasi?
[Prenki na tapoe bladzijde 31]
Den Grikisma ben soekoe a koni foe grontapoe èn nofotron ben si a preiki foe Paulus leki lawfasi