A jeje foe Jehovah e tjari a pipel foe en

„A jeje foe joe boen; meki a tjari mi ini a kondre foe opregtifasi.” — PSALM 143:10.

1, 2. San kan meki banawtoe kon gi loyaal foetoeboi foe Jehovah?

’MI E firi so broko saka! Pe mi kan feni pikinso trowstoe? Gado ben gowe libi mi?’ Joe e firi a fasi dati wan ten? Efoe dati de so, dan joe no de joe wawan. Ala di den loyaal foetoeboi foe Jehovah e libi ini wan paradijs na jeje fasi pe ala sani e waka boen, dan tokoe son leisi den e tanapoe na fesi problema di e gi broko-ede, tesi nanga kori di a libisma famiri gwenti foe kisi. — 1 Korentesma 10:13.

² Kande wan toe tesi di e tan langa, e fadon kon foe ala sei na joe tapoe noso e meki hebi banawtoe kon. Joe e sari kande foe a dede foe wan lobiwan èn e firi kande leki joe de joe wawan. Noso na ati foe joe e troeboe kande foe a siki foe wan lobi mati. Den sortoe omstandigheid dati kande e foefoeroe prisiri èn vrede poeroe foe joe èn e tjari kande a bribi foe joe srefi ini kefar. San joe moesoe doe?

Aksi Gado foe gi joe a jeje foe en

3. San de wan koni sani foe doe te wan sani e foefoeroe den sortoe eigifasi disi, leki vrede, nanga prisiri poeroe foe joe?

³ Efoe wan sani e foefoeroe vrede, prisiri noso wan tra gado eigifasi poeroe foe joe, dan a ben sa de wan koni sani foe begi foe a santa jeje foe Gado, noso en wroko krakti. Foe san ede? Foe di a jeje foe Jehovah e tjari boen froktoe di e jepi wan kresten foe tanapoe na fesi problema, tesi, nanga kori. Baka di na apostel Paulus ben warskow gi „den wroko foe a skin”, a ben skrifi: „Na a tra sei, den froktoe foe a jeje na lobi, prisiri, vrede, langa pasensi, switifasi, boenfasi, bribi, safri-atifasi nanga dwengi joesrefi. No wan wet de kontrari den sortoe sani disi.” — Galasiasma 5:19-23.

4. Foe san ede a ben sa de joisti te wan sma e taki finifini foe sani na ini en begi, te a e tanapoe na fesi wan tesi noso wan kori?

⁴ Foe a sortoe tesi di joe e tanapoe na fesi, joe e froestan kande taki a kefar de taki joe e lasi a safri-atifasi foe joe noso a safri fasi fa joe gwenti foe de. Begi foe dati finifini te joe e begi Jehovah Gado foe kisi a froktoe foe a jeje, safri-atifasi. Efoe joe e kisi foe doe nanga wan toe kori, joe abi spesroetoe a froktoe fanowdoe foe dwengi joesrefi. A no de foe taki, dati a ben sa de joisti toe foe begi foe a jepi foe Gado ini a kaka di joe e kaka foetoe gi kori, foe kon fri foe Satan èn foe kisi a koni di de fanowdoe foe horidoro na ondro tesi. — Mateus 6:13; Jakobus 1:5, 6.

5. San joe kan doe te omstandigheid e gi so foeroe banawtoe taki joe no sabi gi sortoe froktoe foe a jeje joe moesoe begi?

⁵ Ma son leisi, joe kan kisi so foeroe banawtoe noso broeja foe den omstandigheid, taki joe no sabi sortoe froktoe foe a jeje joe abi fanowdoe. Foe taki en leti, dan prisiri, vrede, safri-ati, nanga tra eigifasi foe Gado kan de alamala ini kefar. San foe doe dan? Foe san ede joe no e aksi Gado foe a santa jeje srefi èn meki dati sorgoe taki den froktoe di joe abi fanowdoe gro ini a kefal foe joe? Den froktoe di de fanowdoe kan de lobi noso prisiri noso vrede noso wan toe froktoe foe a jeje moksi makandra. Begi toe foe Gado e jepi joe foe gi jesi na a tiri foe en jeje, foe di a e gebroiki disi foe tiri a pipel foe en.

Jehovah de klariklari foe jepi

6. Fa Jesus ben poti krakti, na den bakaman foe en, tapoe a fanowdoe foe begi sondro foe tapoe?

⁶ Di disipel foe Jesus Krestes ben soekoe bodoi ini a tori foe begi, dan foe wan pisi a ben aksi den tranga foe begi foe a jeje foe Gado. Jesus ben gebroiki fosi wan agersitori di ben de foe boeweigi den disipel foe begi sondro foe tapoe. A ben taki: „Soema foe oenoe sa abi wan mati èn sa go na en na mindrineti èn taigi en: ’Mati, leni mi dri brede, bika didjonsro wan mati foe mi doro foe wan rèis èn mi no abi noti foe gi en’? Èn foe inisei foe na oso a sma dati e piki: ’No froeferi mi. A doro sroto kaba èn mi nanga den jongoe pikin foe mi de na ini bedi; mi no kan opo foe gi joe wan sani.’ Mi e taigi oenoe: Awansi a no sa opo èn gi en wan sani foe di a de en mati, dan seiker foe na asrantifasi ede fa a e tan aksi a sa opo èn gi en ala san a abi fanowdoe.” — Lukas 11:5-8.

7. San de a moro prenspari sani na ini den wortoe foe Jesus na Lukas 11:11-13, èn sortoe djaranti den e gi wi ini a tori foe Gado nanga a jeje foe en?

⁷ Jehovah de klariklari foe jepi ibriwan foe den getrow foetoeboi foe en, di gi densrefi abra èn a e arki san den e aksi. Ma te so wan sma e ’tan aksi’, so leki fa Jesus, ben gi tranga, dan disi e sori wan opregti fanowdoe èn a de wan sori foe bribi (Lukas 11:9, 10). Krestes ben taki moro fara: „Ija, sortoe papa de na oenoe mindri di, efoe en manpikin e aksi en wan fisi, sa gi en sonten wan sneki na presi foe wan fisi? Noso efoe a e aksi foe wan eksi, sa langa wan kroektoetere gi en? Efoe oenoe so boen, ala di oenoe takroe, sabi foe gi boen presenti na oen pikin, o moro foeroe a Tata na hemel sa gi santa jeje na den di e aksi en foe dati!” (Lukas 11:11-13) Efoe wan grontapoe papa noso mama, ala di a ogri awansi fa no fa, foe di a kisi sondoefasi di en mama meki en, e gi boen sani na a pikin foe en, dan seiker a hemel Tata foe wi sa go doro foe gi en santa jeje na iniwan foe den loyaal foetoeboi foe en, di e aksi foe disi na wan sakafasi.

8. Fa Psalm 143:10 e fiti David, Jesus nanga den disi ten foetoeboi foe Gado?

⁸ Foe abi wini foe a jeje foe Gado, wi moesoe de netso klariklari foe waka baka a tiri foe en, leki fa David ben de dati. A ben begi: „Leri mi foe doe joe wani, bika joe na mi Gado. A jeje foe joe boen; meki a tjari mi ini a kondre foe opregtifasi” (Psalm 143:10). David, di a kownoe foe Israèl, Saul, ben jagi en komoto na a kondre, ben wani taki a jeje foe Gado moesoe tjari en, so taki a ben sa de seiker taki a waka nanga libi foe en ben de opregti. Baka wan pisi ten Abjatar ben kon nanga wan efod di den priester ben gebroiki foe kon sabi san na a wani foe Gado. Leki priester, di ben teki presi gi Gado, Abiatar ben froeteri David san a ben moesoe doe, so taki a ben man plisi Jehovah (1 Samuèl 22:17–23:12; 30:6-8). Neleki David, Jesus ben kisi tiri foe a jeje foe Jehovah èn disi ben de so toe nanga den salfoe bakaman foe Krestes leki wan groepoe. Ini 1918-1919, a libisma libimakandra ben si den leki sma di den ben wai poti na wan sei èn den relisi feanti foe den ben prakseri taki den ben kan meki den tron noti. Den salfoewan ben begi foe kisi wan fasi foe komoto na a situwâsi foe den pe den no ben man doe noti èn ini 1919, Gado ben piki den begi foe den, ben fri den, èn ben meki den kon wroko tranga baka ini a dienst foe en (Psalm 143:7-9). Foe troe, a jeje foe Jehovah ben jepi a pipel na a ten dati èn ben tjari den, so leki a e doe disi te na ini a ten disi.

Fa a jeje e jepi

9. (a) Fa a santa jeje e dini leki wan „jepiman”? (b) Fa wi doe sabi taki a santa jeje no de wan sma? (Loekoe foetoewortoe.)

⁹ Jesus Krestes ben kari a santa jeje wan „jepiman”. Foe eksempel, a ben froeteri den bakaman foe en: „Mi sa aksi a Tata èn a sa gi oenoe wan tra jepiman foe de nanga oenoe ala ten, a jeje foe a waarheid, di grontapoe no man kisi, foe di a no e si en èn a no sabi en. Oenoe sabi en, foe di a e tan nanga oenoe èn a de ini oenoe.” Wan foe den sani foe a „jepiman” dati ben de, taki a ben sa de wan leriman, bika Krestes ben pramisi: „A jepiman, a santa jeje, di a Tata sa seni kon ini mi nen, a dati sa leri oenoe ala sani èn sa tjari kon na oen prakseri ala sani di mi ben taigi oenoe.” A jeje ben sa gi kotoigi toe foe Krestes èn a ben djaranti den disipel foe en: „A de gi a boen foe oenoe taki mi e gowe. Bika efoe mi no e gowe, a jepiman no e kon na oenoe kwetikweti; ma efoe mi e gowe, mi sa seni en kon na oenoe.” — Johanes 14:16, 17, 26; 15:26; 16:7.a

10. Na sortoe fasi a santa jeje ben sori taki a de wan jepiman?

¹⁰ Ala di Jesus ben de na hemel, a ben kanti a santa jeje, di Gado ben pramisi, na tapoe den bakaman foe en na a dei foe a Pinksterfesa na ini 33 G.T. (Tori foe den Apostel 1:4, 5; 2:1-11). Leki wan jepiman, a jeje ben gi den moro froestan foe a wani èn a prakseri foe Gado èn ben opo en profeitis Wortoe gi den (1 Korentesma 2:10-16; Kolosesma 1:9, 10; Hebrewsma 9:8-10). A jepiman dati ben gi den disipel foe Jesus krakti toe foe de kotoigi na heri grontapoe (Lukas 24:49; Tori foe den Apostel 1:8; Efeisesma 3:5, 6). Ini a ten disi, a santa jeje kan jepi wan kresten di gi ensrefi abra, foe gro ini sabi efoe a e meki gebroiki foe den sani na jeje fasi di Gado ben gi nanga jepi foe „a getrow èn koni srafoe” (Mateus 24:45-47). A jeje foe Gado kan gi jepi, foe di a e gi a deki-ati èn a krakti di de fanowdoe foe gi kotoigi leki wan foetoeboi foe Jehovah (Mateus 10:19, 20; Tori foe den Apostel 4:29-31). Ma a santa jeje e jepi a pipel foe Gado toe na tra fasi.

„Nanga soktoe di no de foe jere”

11. San wan kresten moesoe doe te wan tesi e sori leki a e moro en?

¹¹ Efoe wan tesi e fadon kon foe ala sei na wan kresten tapoe, dan san a moesoe doe? We, begi foe kisi santa jeje èn meki dati doe en wroko! „So srefi a jeje toe e kon jepi a swakifasi foe wi”, Paulus ben taki, „bika wi no sabi san foe begi ala di wi abi dati fanowdoe, ma a jeje srefi e begi gi wi nanga soktoe di no de foe jere. Tokoe, a sma di e ondrosoekoe den ati sabi san a jeje wani taki, bika a e begi ini akroederi nanga Gado gi den santawan”. — Romesma 8:26, 27.

12, 13. (a) Fa Romesma 8:26, 27 kan gebroiki gi begi foe sma di de ini spesroetoe situwâsi di abi tesi na ini? (b) San Paulus nanga den kompe foe en ben doe, di den ben de na ondro hebi kwinsi ini a distrikt Asia?

¹² Den santawan dati di a jeje foe Gado ben begi gi, na den salfoe bakaman foe Jesus, di abi wan hemel howpoe. Ma awansi joe abi wan hemel kari noso wan grontapoe howpoe, leki wan kresten joe kan kisi a jepi foe Gado en santa jeje. Jehovah e gi sontron wantewante wan piki tapoe wan spesroetoe begi. Ma son leisi, joe de kande so na ini banawtoe taki joe no man taki foe den firi foe joe nanga wortoe èn joe man begi Jehovah tangitangi kande soso nanga soktoe di no de foe jere. Foe taki en leti, dan joe no sabi kande san boen gi joe èn joe kan aksi srefi gi a fowtoe sani boiti te joe e aksi foe santa jeje. Gado sabi, taki joe wani taki a wani foe en moesoe doe èn a sabi san joe abi troetroe fanowdoe. Boiti dati, nanga jepi foe en santa jeje, a ben meki sma skrifi foeroe begi na ini a Wortoe foe en èn den begi disi e handri foe situwâsi di hebi foe pasa (2 Timoteus 3:16, 17; 2 Petrus 1:21). Foe dati ede, Jehovah kan si son firi, di taki ini den sortoe begi disi di skrifi nanga jepi foe santa jeje, leki den na firi di joe ben sa wani foe sori leki wan foetoeboi foe en èn a kan gi wan piki tapoe den begi disi foe a boen foe joe.

¹³ Paulus nanga den kompe foe en no ben sabi kande san foe begi, di den ben ondrofeni banawtoe ini a distrikt Asia. Foe di den ben de ’na ondro hebi kwinsi di ben pasa a krakti foe den, den ben firi na ini densrefi taki den ben kisi a dedestrafoe’. Ma den ben aksi foe trawan begi tangitangi èn den ben froetrow ini Gado, di kan opo dedewan èn Gado ben froeloesoe den (2 Korentesma 1:8-11). Fa a e gi trowstoe taki Jehovah Gado e jere èn e handri tapoe den begi foe den getrow foetoeboi foe en!

14. Sortoe boen kan de a bakapisi efoe Jehovah e gi primisi taki tesi e go-doro foe wan pisi ten?

¹⁴ A pipel foe Gado foeroetron e kisi tesi leki wan organisâsi. So leki fa wi ben skrifi moro na fesi, dan den ben kisi froefolgoe na a ten foe a Fosi Grontapoefeti. Ala di den no ben abi wan krin froestan foe a posisi foe den èn foe dati ede den no ben sabi finifini foe san den ben moesoe begi, a Wortoe foe Jehovah ben abi begi di ben taki na profeitis fasi èn di a ben gi wan piki na tapoe foe den ede (Psalm 69, 102, 126; Jesaja, kapitel 12). Ma fa a de te Jehovah e gi pasi taki wan tesi e horidoro wan pisi ten? Disi kan abi leki bakapisi a gi foe wan kotoigi, kan poesoe son sma foe teki a waarheid èn gi kresten na okasi foe sori brada lobi, foe di den e begi gi noso na wan trafasi e jepi kompe bribiman di e pina (Johanes 13:34, 35; 2 Korentesma 1:11). Memre taki Jehovah e tjari a pipel foe en nanga jepi foe en santa jeje, e doe san na a moro boen sani gi den, èn ala ten e meki afersi waka na wan fasi di sa gi a santa nen foe en grani èn meki dati kon regtfardiki. — Exodus 9:16; Mateus 6:9.

No meki taki a jeje e sari noiti

15. Kresten kan bow tapoe a jeje foe Jehovah foe doe wan sani foe a boen foe den?

¹⁵ Foe dati ede, efoe joe na wan foetoeboi foe Jehovah, begi foe santa jeje na a ten foe tesi èn na tra ten. De seiker baka dati, taki joe e waka baka a tiri foe en, bika Paulus ben skrifi: „No meki a santa jeje foe Gado firi sari, di nanga jepi foe dati oenoe kisi wan lakstampoe gi wan dei foe kon fri nanga jepi foe a froeloesoe ofrandi” (Efeisesma 4:30). A jeje foe Gado ben de èn de wan lakstampoe, noso wan ’panti foe san ben o kon’, gi getrow salfoe kresten — dati wani taki, libi ini hemel sondro foe man dede (2 Korentesma 1:22; Romesma 8:15; 1 Korentesma 15:50-57; Openbaring 2:10). Salfoe kresten èn so srefi denwan di abi wan howpoe foe libi na grontapoe, kan froetrow na tapoe taki a jeje foe Jehovah e doe foeroe gi den. A kan tjari den ini wan libi foe getrowfasi èn jepi den foe tan farawe foe sondoe wroko, di abi leki bakapisi taki Gado no e feni den boen, a lasi foe en santa jeje èn a misi di wi e misi foe kisi têgo libi. — Galasiasma 5:19-21.

16, 17. Fa wan kresten kan meki taki a jeje e sari?

¹⁶ Fa wan kresten, efoe a sabi disi efoe no, kan meki taki a jeje e sari? We, Jehovah e gebroiki a jeje foe en foe meki wánfasi go na fesi èn foe poti frantiwortoe man ini a gemeente. Foe dati ede, te wan memre foe a gemeente e kroetoekroetoe tapoe wan owroeman di den poti, e panja takroe gongosa èn go so moro fara, dan a no ben sa waka baka a tiri foe a jeje foe Gado ini a tori foe vrede nanga wánfasi. Na wan algemeen fasi, a ben sa meki taki a jeje e sari. — 1 Korentesma 1:10; 3:1-4, 16, 17; 1 Tesalonikasma 5:12, 13; Judas 16.

¹⁷ Di Paulus ben skrifi den kresten na Efeise, a ben warskow gi firi foe falsifasi, doronomo bita-atifasi, foefoeroe, taki di no e fiti, fisti belangstelling gi hoeroedoe, sjenfasi foe waka nanga libi, nanga a meki di sma e meki fisti spotoe. Efoe wan kresten e gi ensrefi pasi foe go doe den sortoe sani disi, a ben sa go kontrari a rai foe bijbel, di skrifi nanga jepi foe santa jeje (Efeisesma 4:17-29; 5:1-5). Ija èn a ben sa go so fara taki a e meki taki a jeje foe Gado e sari na so wan fasi.

18. San kan pasa nanga iniwan kresten di e bigin meki leki den no sabi a rai foe Gado en Wortoe di skrifi nanga jepi foe santa jeje?

¹⁸ Troetroe, ibri kresten di e bigin meki leki a no sabi a rai foe Jehovah en Wortoe, di skrifi nanga jepi foe santa jeje, e bigin kande foe kweki fasi noso gwenti di kan abi leki bakapisi sondoe di doe foe espresi èn a lasi foe a feni di Gado e feni en boen. Ala di kande a no e doe sondoe now, a kan go na a sei dati. So wan kresten di e go kontrari a tiri foe a jeje, kan meki taki a jeje e sari. A ben sa kakafoetoe so boen gi Jehovah, a Fonten foe santa jeje èn meki taki a e sari. Noiti wan sma di lobi Gado ben sa wani foe doe dati!

Tan begi foe a santa jeje

19. Foe san ede a pipel foe Jehovah abi a jeje foe en spesroetoe fanowdoe ini a ten disi?

¹⁹ Efoe joe na wan foetoeboi foe Jehovah, tan begi foe a santa jeje foe en. Spesroetoe ini den „lasti dei” disi nanga den moeilek ten, di de so tranga foe pasa, kresten abi a jepi foe Gado en jeje fanowdoe (2 Timoteus 3:1-5). Didibri nanga den ogri jeje foe en, trowe komopo na hemel èn now di den de ini a kontren foe grontapoe, den e rigeri nanga na organisâsi foe Jehovah. Foe dati ede, now moro leki iniwan ten na fesi, a pipel foe Gado abi en santa jeje fanowdoe foe tjari noso tiri den èn meki den man horidoro na ondro moeilek ten nanga froefolgoe. — Openbaring 12:7-12.

20, 21. Foe san ede wi moesoe waka baka a tiri foe Jehovah en Wortoe, en jeje nanga en organisâsi?

²⁰ Sori warderi ala ten gi a jepi di Jehovah Gado e gi nanga jepi foe en santa jeje. Waka baka a tiri foe en Wortoe, bijbel, di skrifi nanga jepi foe santa jeje. Wroko makandra dorodoro nanga a grontapoe organisâsi foe Gado di a jeje e tiri. No gi joesrefi pasi noiti foe kenki go teki wan fasi foe waka nanga libi di no abi en fondamenti tapoe bijbel èn di ben sa de a srefi leki foe meki taki a jeje e sari, bika disi abi kande te foe kaba leki bakapisi taki Gado e hari a jeje foe en poeroe èn na so wan fasi dati e tjari rampoe na jeje fasi kon. — Psalm 51:11.

²¹ Foe kisi tiri foe Jehovah en jeje na a wan enkri fasi foe plisi en èn foe abi wan vrede libi di prisiri. Memre toe, taki Jesus ben kari a santa jeje wan „jepiman”, noso wan „trowstoeman” (Johanes 14:16, foetoewortoe). Nanga jepi foe dati, Gado e trowstoe kresten èn e gi den krakti foe tanapoe na fesi den tesi foe den (2 Korentesma 1:3, 4). A jeje e gi a pipel foe Jehovah krakti foe preiki a boen njoensoe èn e jepi den foe memre penti foe bijbel di de fanowdoe foe gi wan toemoesi boen kotoigi (Lukas 12:11, 12; Johanes 14:25, 26; Tori foe den Apostel 1:4-8; 5:32). Nanga jepi foe begi èn a tiri foe a jeje, kresten kan tanapoe na fesi tesi foe bribi nanga koni di komopo na hemel. Ini ala omstandigheid foe a libi, foe dati ede, den e tan begi foe a santa jeje foe Gado. Leki bakapisi, a jeje foe Jehovah e tjari a pipel foe en.

[Foetoewortoe]

San na den piki foe joe?

◻ Foe san ede wi moesoe begi foe a jepi foe a santa jeje foe Jehovah?

◻ Fa a santa jeje na wan jepiman?

◻ San a wani taki foe meki taki a jeje e sari, èn fa wi kan tan farawe foe doe so wan sani?

◻ Foe san ede wi moesoe tan begi foe santa jeje èn teki a tiri di a e gi wi?

[Prenki na tapoe bladzijde 25]

So leki fa wan lobi tata e gi boen sani na a manpikin foe en, na so Jehovah e gi santa jeje na den foetoeboi foe en di e begi foe dati

[Prenki na tapoe bladzijde 26]

Joe sabi fa a jeje foe Gado e meki moeiti foe taki gi kresten di e begi foeroe?