’Na a nen foe a santa jeje’
„Go foe dati ede èn meki disipel foe sma foe ala nâsi èn dopoe den na a nen foe . . . a santa jeje.” — MATEUS 28:19.
1. Sortoe njoen wortoe Johanes a Dopoeman ben gebroiki ini a tori foe santa jeje?
INI a jari 29 foe wi gewoon teri, Johanes a Dopoeman ben e wroko ini Israèl, foe sreka a pasi gi a Mesias, èn ini a ten foe en diniwroko, a ben meki wan njoen sani bekènti di ben abi foe doe nanga a santa jeje. A no de foe taki, dati den djoe ben sabi kaba san den Hebrew Boekoe ben taki foe a jeje. Ma a ben kan de wan froewondroe sani gi den, di Johanes ben taki: „Mi, foe mi sei, e dopoe oenoe nanga watra foe di oen abi berow, ma a sma di e kon baka mi . . . sa dopoe oen nanga santa jeje” (Mateus 3:11). ’Dopoe nanga santa jeje’ ben de njoen wortoe.
2. Sortoe njoen wortoe di abi foe doe nanga santa jeje, Jesus ben meki sma kon sabi?
2 A sma di ben e kon ben de Jesus. Na a ten foe en libi na grontapoe, dan, foe taki en leti, Jesus no ben dopoe no wan sma nanga santa jeje, ala di a ben taki foe a jeje foeroe tron. Boiti dati, baka en opobaka a ben sori go na a santa jeje na ete wan tra njoen fasi. A ben taigi den disipel foe en: „Go foe dati ede èn meki disipel foe sma foe ala nâsi, dopoe den na a nen foe a Tata èn foe a Manpikin èn foe a santa jeje” (Mateus 28:19). Den wortoe „na a nen foe” wani taki „foe di den e erken”. Dopoe nanga watra foe di wan sma e erken a Tata, a Manpikin, èn a santa jeje ben o de tra fasi leki dopoe ini santa jeje. Disi ben de njoen wortoe toe di ben abi foe doe nanga santa jeje.
Dopoe ini santa jeje
3, 4. (a) Oten den fosi dopoe ini santa jeje ben feni presi? (b) Fa a santa jeje, boiti a dopoe di a ben dopoe den disipel foe Jesus, ben wroko ini a tori foe den, na a Pinksterfesa foe 33 G.T.?
3 Ini a tori foe dopoe ini santa jeje, Jesus ben pramisi en disipel leti bifo a ben o go na hemel: „No foeroe dei baka disi oen sa kisi dopoe ini santa jeje” (Tori foe den Apostel 1:5, 8). Sjatoe baka dati a pramisi dati ben kon troe. Santa jeje ben saka kon a tapoe so wan 120 disipel di ben kon makandra na wan tapoe sodro na Jerusalem, di Jesus ben doe en fosi dopoe ini santa jeje komoto foe hemel (Tori foe den Apostel 2:1-4, 33). Nanga sortoe bakapisi? Den disipel ben tron wan pisi foe a jeje skin foe Krestes. So leki fa na apostel Paulus ben froeklari, dan „nanga wán jeje [den] alamala ben dopoe kon de wán skin” (1 Korentesma 12:13). Na a srefi ten, den ben salfoe den foe de kownoe èn priester ini Gado hemel Kownoekondre ini a ten di ben o kon (Efeisesma 1:13, 14; 2 Timoteus 2:12; Openbaring 20:6). A santa jeje ben dini toe leki wan fosi marki èn boeweisi foe a glori famiri goedoe ini a ten di ben o kon, ma dati no ben de ala. — 2 Korentesma 1:21, 22.
4 Wan toe jari a fesi, Jesus ben taigi Nikodeimus: „Efoe wan sma no gebore baka, a no man si a kownoekondre foe Gado. . . . Efoe wan sma no gebore foe watra èn jeje a no man go na ini a kownoekondre foe Gado” (Johanes 3:3, 5). Now 120 sma ben gebore baka. Nanga jepi foe santa jeje Gado ben teki den leki en jeje manpikin, brada foe Krestes (Johanes 1:11-13; Romesma 8:14, 15). Ala den wroko disi foe santa jeje de na den fasi moro moi leki wondroe. Boiti dati, dan santa jeje no ben tapoe foe wroko baka a dede foe den apostel, leki fa dati ben pasa nanga wondroe foe fosi, ma a ben wroko go doro na a fasi disi te na a ten foe wi. A de a grani foe Jehovah Kotoigi foe abi a mindri den, den lasti memre foe Krestes skin di dopoe nanga jeje èn den disi e dini leki wan „getrow èn koni srafoe” foe gi jeje njanjan na a joisti ten. — Mateus 24:45-47.
Dopoe „na a nen foe . . . a santa jeje”
5, 6. Fa den fosi dopoe ini santa jeje ben abi a dopoe na watra leki bakapisi?
5 Ma san de foe taki foe a pramisi dopoe nanga watra na a nen foe a Tata, a Manpikin èn a santa jeje? Den fosi disipel dati di ben dopoe ini jeje no ben kisi so wan dopoe na watra. Den ben kisi Johanes en dopoe na watra kaba, èn foe di Jehovah ben teki dati na a spesroetoe ten dati, a no ben de fanowdoe foe sma dopoe den baka. Ma na a Pinksterfesa foe 33 G.T., wan bigi ipi sili ben kisi a njoen dopoe na watra. Fa disi ben doe kon?
6 A dopoe foe den 120 sma ini santa jeje ben go makandra nanga wan tranga babari di ben hari ipi sma kon. Den ben froewondroe foe jere den disipel e taki ini tongo, dati wani taki, ini dorosei tongo di den sma di ben de drape ben man froestan. Na apostel Petrus ben froeklari taki a wondroe disi ben de wan boeweisi taki a jeje foe Gado ben kanti kon nanga jepi foe Jesus, di ben opobaka foe dede èn di ben sidon now na a reti anoe foe Gado na hemel. Petrus ben gi den arkiman foe en na deki-ati: „Meki na heri oso foe Israèl sabi nanga ala seikerfasi, taki Gado meki a Jesus disi di oen ben anga na wan postoe, kon tron Masra so boen leki Krestes.” Ne a ben tapoe nanga den wortoe: „Abi berow, èn meki ibriwan foe oenoe teki dopoe na a nen foe Jesus Krestes foe kisi pardon foe oen sondoe, èn oen sa kisi wan fri presenti foe a santa jeje.” So wan 3000 sili ben doe boen a tapoe dati. — Tori foe den Apostel 2:36, 38, 41.
7. Na sortoe fasi den 3000 sma di ben dopoe na a Pinksterfesa foe 33 G.T. ben dopoe, na a nen foe a Tata, a Manpikin èn a santa jeje?
7 Wi kan taki, dati den ben dopoe na a nen foe (foe di den e erken) a Tata, a Manpikin èn a santa jeje? Ija. Ala di Petrus no ben taigi den foe go dopoe na a nen foe a Tata, den ben erken Jehovah kaba leki Soeverein Masra, foe di den ben de djoe na skin fasi, memre foe a nâsi di ben gi densrefi abra na En. Petrus ben taki: ’Teki dopoe na a nen foe a Manpikin.’ So boen a dopoe foe den ben marki na erken di den ben erken Jesus leki Masra èn Krestes. Den ben de now den disipel foe en èn den ben erken taki foe bigin foe now den ben kisi pardon foe sondoe nanga jepi foe en. Te foe kaba, a dopoe ben de foe di den e erken a santa jeje, èn den ben kisi disi leki wan piki tapoe a pramisi taki den ben sa kisi a jeje leki wan fri presenti.
8. (a) Sortoe tra dopoe boiti a dopoe na watra den salfoe kresten ben kisi? (b) Soema boiti den 144.000 ben kisi dopoe na watra na a nen foe a santa jeje?
8 Den sma di ben dopoe ini watra na a dei foe a Pinksterfesa foe 33 G.T., ben dopoe toe ini jeje, pe den ben kisi salfoe leki kownoe èn priester, foe a ten di e kon ini a hemel Kownoekondre. So leki fa a boekoe Openbaring e sori, dan soso 144.000 foe den de. So boen den sma di ben dopoe ini santa jeje èn te foe kaba ben ’kisi wan lakstampoe’ leki Kownoekondre erfgenaam, de soso 144.000 sma ini nomroe (Openbaring 7:4; 14:1). Ma ala njoen disipel — awansi san na a howpoe foe den — e dopoe ini watra na a nen foe a Tata, a Manpikin èn a santa jeje (Mateus 28:19, 20). San a dopoe na a nen foe a santa jeje wani taki dan gi ala kresten, efoe den de foe a „pikin ipi” noso foe den „tra skapoe”? (Lukas 12:32; Johanes 10:16) Bifo wi piki na aksi dati, meki wi go loekoe wan toe foe den wroko foe a jeje ini a kresten ten.
Den froktoe foe a jeje
9. Sortoe wroko foe a santa jeje de prenspari gi ala kresten?
9 Wan prenspari wroko foe a santa jeje de foe jepi wi foe kweki kresten eigifasi. A de troe, taki foe di wi de onvolmaakti dati wi no man tan farawe foe sondoe (Romesma 7:21-23). Ma te wi abi troetroe berow, Jehovah e gi wi pardon tapoe a fondamenti foe Krestes ofrandi (Mateus 12:31, 32; Romesma 7:24, 25; 1 Johanes 2:1, 2). Boiti dati, Jehovah e froewakti taki wi e feti nanga a lobi di wi lobi foe doe sondoe èn a santa jeje e jepi wi foe doe disi. „Tan waka nanga jepi foe jeje”, Paulus ben taki, „èn kwetikweti oen no sa doe no wan sani di a skin e lostoe” (Galasiasma 5:16). Paulus ben go doro foe sori taki a jeje kan meki den moro moi eigifasi gro na ini wi. A ben skrifi: „A froktoe foe a jeje na lobi, prisiri, vrede, langa pasensi, switifasi, boen-atifasi, bribi, safoefasi, dwengi joesrefi” (Galasiasma 5:22, 23).
10. Fa wan kresten e kweki a froktoe foe a jeje na ini en?
10 Fa a santa jeje e meki taki so wan froktoe kan de ini wan kresten? A no e go foe ensrefi, soso foe di wi na kresten di gi wisrefi abra èn di dopoe. Wi abi foe wroko na en. Ma efoe wi abi demakandra nanga tra kresten di e sori den eigifasi disi, efoe wi e begi Gado foe en jeje jepi wi foe kweki spesroetoe eigifasi, efoe wi e tan farawe foe takroe demakandra èn e studeri bijbel foe kisi rai èn boen eksempel, dan na froktoe foe a jeje sa gro ini wi. — Odo 13:20; 1 Korentesma 15:33; Galasiasma 5:24-26; Hebrewsma 10:24, 25.
Den poti den a wroko nanga jepi foe santa jeje
11. Na sortoe fasi den e poti owroeman nanga jepi foe santa jeje?
11 Di Paulus ben taki nanga den owroeman foe Efeise, dan a ben meki den kon sabi ete wan tra sortoe wroko foe santa jeje di a ben taki: „Poti prakseri na oensrefi èn na a heri ipi, di na mindri den a santa jeje ben poti oen leki opziener, foe wei a gemeente foe Gado, di a bai nanga a broedoe foe en eigi Manpikin” (Tori foe den Apostel 20:28). Ija, a santa jeje poti den gemeente opziener noso owroeman a wroko. Na sortoe fasi? Na a fasi taki owroeman di den poti moesoe doro den markitiki di de foe feni ini bijbel di skrifi nanga krakti foe santa jeje (1 Timoteus 3:1-13; Titus 1:5-9). Den kan kweki den eigifasi disi soso nanga a jepi foe santa jeje. Boiti dati, dan a skin foe owroeman di e rikomanderi wan njoen owroeman, e begi foe kisi tiri foe santa jeje foe si krin efoe a e doro den markitiki efoe no. Èn a poti di den e poti en troetroe a wroko, e doe ondro tiri foe a getrow èn koni srafoe di salfoe nanga jeje.
Meki a jeje tiri joe
12. Fa a jeje kan abi krakti na wi tapoe nanga jepi foe bijbel?
12 Kresten e erken taki den Santa Boekoe ben skrifi ondro a krakti di a santa jeje ben abi na sma tapoe. Dati ede, den e diki go na ini den foe feni koni di sma e kisi nanga krakti foe santa jeje, neleki fa den Kotoigi foe Jehovah di ben libi bifo a kresten ten ben doe (Odo 2:1-9). Den e leisi den Santa Boekoe, e prakseri dipi foe den, èn e meki den tiri a libi foe den (Psalm 1:1-3; 2 Timoteus 3:16). Na so fasi den e kisi jepi foe a jeje foe ’ondrosoekoe den dipi sani foe Gado’ (1 Korentesma 2:10, 13; 3:19). Foe tiri den foetoeboi foe Gado na a fasi disi, de wan prenspari wroko foe Gado jeje gi a ten foe wi.
13, 14. San Jesus ben gebroiki foe loesoe problema ini a gemeente, èn fa a e doe a srefi ini a ten disi?
13 Boiti dati, dan ini a boekoe Openbaring, Jesus di opobaka foe dede ben seni boskopoe na den seibi gemeente na Pikin-Asia (Openbaring kapitel 2 nanga 3). Ini den boskopoe a ben sori taki a ben ondrosoekoe den gemeente èn ben si krin a kondisi foe den na jeje fasi. Son wan, so a ben kon si, ben gi wan moi eksempel ini bribi. Na ini tra gemeente, den owroeman ben gi pasi foe sekte bribi, hoeroedoe èn a firi foe kon de broko kowroe pori na ipi. A gemeente na Sardis, boiti wan toe getrow sili, ben dede na jeje fasi (Openbaring 3:1, 4). Fa Jesus ben handri nanga den problema disi? Nanga a santa jeje. Di a ben gi den seibi gemeente rai, dan Jesus boskopoe ben bosroiti ini ibri wan foe den kefal nanga den wortoe: „Meki a sma di abi wan jesi jere san a jeje e taigi a gemeente.” — Openbaring 2:7, 11, 17, 29; 3:6, 13, 22.
14 Na ini a ten disi, so srefi, Jesus e ondrosoekoe den gemeente. Èn te a e si problema, a e handri nanga den te now ete nanga jepi foe santa jeje. A jeje kan jepi wi foe erken èn wini problema wantewante nanga jepi foe a leisi di wi e leisi bijbel. Jepi kan kon toe nanga jepi foe bijbel boekoe di a getrow èn koni srafoe di salfoe nanga jeje, ben tjari kon a doro. Noso a kan kon foe owroeman di poti a wroko ini a gemeente nanga jepi foe jeje. Ma awansi fa a no fa èn efoe a rai e gi now na aparti sma noso na a heri gemeente, wi e gi jesi na den wortoe foe Jesus: „Meki a sma di abi wan jesi, meki a jere san a jeje e taigi a gemeente”?
A jeje èn a preikiwroko
15. Fa a jeje ben doe nanga Jesus ini a tori foe a preikiwroko?
15 Na wan okasi di Jesus ben preiki ini a djoekerki na Nasaret, a ben sori ete wan tra wroko foe a jeje. A tori e froeteri wi: „A ben opo a boekoelolo èn ben feni a presi pe ben skrifi: ’A jeje foe Jehovah de a mi tapoe, foe di a ben salfoe mi foe meki a boen njoensoe bekènti gi den pôtiwan, a ben seni mi foe go preiki gi den strafoeman taki den sa kon fri èn gi den breniwan taki den sa si baka, foe seni den masiwan gowe ini fri.’ Ne a ben bigin foe taigi den: ’Tide den wortoe di oen ben jere didjonsro, kon troe’” (Lukas 4:17, 18, 21; Jesaja 61:1, 2). Ija, den ben salfoe Jesus nanga santa jeje foe preiki boen njoensoe.
16. Fa santa jeje ben abi foeroe foe doe nanga a preiki foe a boen njoensoe ini a fosi jarihondro?
16 Sjatoe bifo en dede, Jesus ben froeteri a fesi foe wan bigi preikiwroko di den bakaman foe en ben sa doe. A ben taki: „Ini ala nâsi a boen njoensoe moesoe preiki” (Markus 13:10). Den wortoe disi ben abi wan fosi kontroe ini a fosi jarihondro, èn a ròl di santa jeje ben plèi ben de wan moi sani foe si. A ben de santa jeje di ben tjari Filipus foe go preiki gi a Etiopia eunuch. Santa jeje ben tjari Petrus go na Kornelis, èn santa jeje ben tiri sani taki den ben seni Paulus nanga Barnabas go leki apostel komoto na Antiokia. Baka ten, di Paulus ben wani foe preiki na Asia èn Betinia, dan na wan ofoe tra fasi santa jeje ben tapoe en. Gado ben wani taki a kotoigiwroko ben moesoe bigin na Europa. — Tori foe den Apostel 8:29; 10:19; 13:2; 16:6, 7.
17. Fa santa jeje abi foe doe nanga a preikiwroko ini a ten disi?
17 Ini a ten disi, santa jeje abi foeroe foe doe baka nanga a preikiwroko. Leki wan tra kontroe foe Jesaja 61:1, 2, a jeje foe Jehovah ben salfoe Jesus brada foe preiki. Ini a lasti kontroe foe Markus 13:10, den salfoewan disi, di ben kisi jepi foe a bigi ipi, preiki a boen njoensoe troetroe ini „ala nâsi” (Openbaring 7:9). Èn ini disi a jeje e horibaka gi alamala. Neleki ini a fosi jarihondro, a jeje e opo kontren èn e tiri a go a fesi foe a wroko ini algemeen. A e gi aparti sma tranga èn e jepi den foe wini froeleigifasi èn foe meki a bekwaamfasi foe den foe gi leri go a fesi. Boiti dati, Jesus ben taigi den disipel foe en: „Den sa srepi oen a fesi granman nanga kownoe foe mi ede, leki wan kotoigi gi den èn den nâsi. Ma te den e gi oenoe abra, no broko oen ede foe a fasi noso san oenoe sa taki . . . , foe di a no oenoe e taki nomo, ma a de a jeje foe oen Tata di e taki nanga jepi foe oenoe.” — Mateus 10:18-20.
18, 19. Na sortoe fasi a jeje e moksi ensrefi nanga a trow-oema foe kari den safri-ati sma foe „teki a watra foe libi foe soso”?
18 Ini a boekoe Openbaring, bijbel e poti krakti baka tapoe na abi di a santa jeje abi foe doe nanga a preikiwroko. Drape na apostel Johanes e froeteri: „A jeje èn a trow-oema e tan taki: ’Kon!’ Èn meki ibriwan sma di e jere taki: ’Kon!’ Èn meki ibriwan sma di e drei watra, kon; èn meki ibriwan sma di wani, teki a watra foe libi foe soso” (Openbaring 22:17). A trow-oema, di a fikapisi foe den 144.000 sma di de ete na grontapoe e teki presi gi, e kari alasma foe teki a watra foe libi foe soso. Ma loekoe toe, taki a santa jeje e taki toe „Kon!” Na sortoe fasi?
19 A boskopoe di a trow-oema groepoe — di ini a ten disi e kisi jepi foe a bigi ipi tra skapoe — e preiki, komoto na bijbel, di skrifi langalanga ondro a krakti foe santa jeje. Èn a srefi jeje ben opo na ati èn prakseri foe a trow-oema groepoe foe froestan a Wortoe di skrifi nanga krakti foe santa jeje èn foe froeklari en gi trawan. Den sma di dopoe leki njoen disipel foe Jesus Krestes, breiti foe teki a watra foe libi foe soso. Èn nanga prisiri den e wroko makandra nanga a jeje èn a trow-oema foe taki „Kon”! gi ete tra sma moro. Ini a ten disi, dan moro leki fo miljoen sma de di e teki prati nanga a jeje ini a wroko disi.
Libi akroederi a dopoe foe wi
20, 21. Fa wi kan libi akroederi a dopoe foe wi na a nen foe a santa jeje, èn fa wi moesoe si a dopoe disi?
20 Dopoe ini a nen foe santa jeje na wan meki bekènti na poebliki taki wi e erken a santa jeje èn a ròl di a jeje e plèi ini den prakseri foe Jehovah. A wani taki, dati wi sa wroko makandra nanga a jeje, èn no sa doe noti di o hendri a wroko di a jeje e wroko a mindri Jehovah pipel. Na so wi e erken èn e wroko makandra nanga a getrow èn koni srafoe. Wi e wroko makandra nanga a seti taki wi abi foe den owroeman ini a gemeente (Hebrewsma 13:7, 17; 1 Petrus 5:1-4). Wi e libi na a fasi foe koni na jeje fasi, no na skin fasi, èn e gi a jeje pasi foe a meki a sma di wi de so taki a kon gersi di foe Krestes moro (Romesma 13:14). Èn nanga wi heri ati wi e agri nanga a jeje èn a trow-oema foe di wi e taki „Kon!” na den miljoenmiljoen sma di kande sa doe boen ete a tapoe.
21 Fa a de wan serjoesoe sani foe dopoe ’ini a nen foe santa jeje’! Ija fa wi sa abi blesi leki bakapisi! Meki a nomroe foe den sma di e dopoe na a fasi disi, tan kon moro foeroe. Èn meki wi alamala go doro foe libi akroederi san a dopoe dati wani taki, ala di wi e wroko leki srafoe gi Jehovah èn e tan „de fajafaja nanga a jeje.” — Romesma 12:11.
San joe e memre foe a santa jeje?
◻ Na sortoe fasi santa jeje ben wroko na a Pinksterfesa foe 33 G.T.?
◻ Fa wi kan meki den froktoe foe a jeje?
◻ Na sortoe fasi den e poti owroeman nanga jepi foe santa jeje?
◻ Fa Jesus e handri nanga problema ini a gemeente nanga jepi foe santa jeje?
◻ Fa a jeje abi foeroe foe doe nanga a preikiwroko?
[Prenki na tapoe bladzijde 18]
A dopoe di Petrus ben preiki ben de toe na a nen foe a Tata èn a santa jeje
[Prenki na tapoe bladzijde 20]
A jeje abi foeroe foe doe nanga a preiki foe a boen njoensoe