A presenti foe Jehovah foe santa jeje

„Omeni moro a Tata na hemel sa gi santa jeje na den di e aksi en foe dati!” — LUKAS 11:13.

1, 2. (a) Sortoe pramisi Jesus ben gi foe santa jeje, èn san ede disi e gi trowstoe troetroe? (b) San na a santa jeje?

NA A dreiten foe a jari 32 G.T., ala di Jesus ben e preiki a boen njoensoe na Judea, a ben taki nanga den disipel foe en foe a gi di Jehovah lobi foe gi nanga en heri ati. A ben gebroiki wan toe krakti agersitori èn dan a ben gi a toemoesi moi pramisi: „Efoe oenoe, ala di oen takroe, sabi foe gi boen presenti na oen pikin, omeni moro a Tata na hemel sa gi santa jeje na den di e aksi en foe dati!” — Lukas 11:13.

² Fa den wortoe disi de wan trowstoe! Ala di wi e horidoro na ondro a broeja foe den lasti dei foe a grontapoe disi, e tanapoe a fesi a feantifasi foe Satan nanga en ogri jeje èn e feti nanga wi eigi sondoe eigifasi, a de troetroe wan sani di e waran na ati foe sabi taki Gado sa gi wi krakti nanga jepi foe en jeje. Ija, horidoro na wan getrowfasi no man sondro a jepi dati. Joe ben ondrofeni a krakti foe a jeje disi, di na Gado en eigi wroko krakti? Joe e froestan omeni a man jepi joe? Joe e gebroiki en dorodoro?

A krakti foe santa jeje

3, 4. Agersi a krakti foe santa jeje.

³ Loekoe fosi a krakti foe santa jeje. Prakseri baka foe a jari 1954. Dati ben de di den ben loesoe wan waterstof bom tapoe Bikini Atoll ini a Zuid Se. Wan sjatoe pisi ten baka di a bom ben soetoe, wan heri bigi bal foe faja ben swari na moi eilanti dati èn wan soetoe di ben abi a srefi krakti leki a soetoe foe 15 miljoen ton TNT (wan toemoesi tranga sortoe kroiti di e panja sani), ben pori en. Pe ala a krakti dati di e pori sani komoto? A ben de a bakapisi foe a kenki foe wan pikin pisi foe na uranium nanga waterstof, di ben de na inibere foe a bom, kon tron energie. Ma efoe den sabiman ben kan doe a kontrari foe san den ben doe na Bikini? Kon meki wi taki, dati den ben man kisi ala na faja energie dati èn ben kan kenki en kon tron wan toe pontoe uranium nanga waterstof. Fa dati ben sa de wan koni wroko! Tokoe Jehovah ben doe so wan sortoe sani, ma na wan fasi di moro bigi ’ini a bigin [a] ben meki hemel nanga grontapoe’. — Genesis 1:1.

⁴ Jehovah ben abi bigi maksin foe dynamis energie (Jesaja 40:26). Di a ben meki sani a ben moesoe foe de so taki a gebroiki pikinso foe na energie disi foe meki ala sani na skin fasi di makandra de na universum. San a ben gebroiki na a wroko disi foe meki sani? Santa jeje. Wi e leisi: „Nanga a wortoe foe Jehovah den hemel srefi ben meki èn nanga jepi foe a jeje foe en mofo na heri legre foe den” (Psalm 33:6). Èn a tori foe Genesis di e taki foe a ten di Gado meki sani e froeteri: „A wrokokrakti [santa jeje] foe Gado ben boeweigi ensrefi go kon na a tapoesei foe den watra” (Genesis 1:2). Fa a santa jeje na wan makti krakti!

Wondroe wroko

5. Na sortoe toemoesi grani fasi a santa jeje e wroko?

⁵ Santa jeje e wroko te now ete na toemoesi bigi fasi. A e tjari èn e tiri Jehovah en hemel organisâsi (Esekièl 1:20, 21). Neleki na energie di ben kon fri nanga jepi foe a waterstof bom, na so a jeje kan gebroiki na wan fasi di e pori sani foe tjari kroetoestrafoe kon a tapoe den feanti foe Jehovah, ma a ben wroko toe na tra fasi di e meki wi froewondroe. — Jesaja 11:15; 30:27, 28; 40:7, 8; 2 Tesalonikasma 2:8.

6. Fa santa jeje ben horibaka gi Moses èn den pikin foe Israèl ini a fasi foe den fa den ben handri nanga Egipti?

⁶ Foe eksempel, na wan ten foe 1513 bifo G. T., Jehovah ben seni Moses foe sori ensrefi a fesi Farao foe Egipti foe aksi foe fri den pikin foe Israèl. Den 40 jari a fesi, Moses ben de wan skapoeman na Midian, so boen foe san ede Farao ben sa arki wan skapoeman? Foe di Moses ben kon ini a nen foe a wan enkri troe Gado, Jehovah. Foe boeweisi disi, dan Jehovah ben gi en krakti foe doe wondroe. Den wondroe disi ben de so krakti, taki srefi den priester foe Egipti ben moesoe erken: „Na a finga foe Gado!”a (Exodus 8:19) Jehovah ben tjari tin plaag kon na tapoe Egipti, èn a lastiwan foe den ben dwengi Farao foe meki a pipel foe Gado gowe libi Egipti. Di Farao na wan tranga-ede fasi ben feti foe go a den baka nanga en legre, den Israèlsma ben kan lowe di wan pasi ben opo na wan wondroefasi ini a Redi Se. A legre foe Egipti ben waka a den baka èn den ben dede ini a se. — Jesaja 63:11-14; Hagai 2:4, 5.

7. (a) San ben de wan toe reide san ede a santa jeje ben doe wondroe? (b) Ala di den wondroe wroko di santa jeje ben doe no de foe si moro, dan san ede a tori foe den di skrifi na ini bijbel e gi wi trowstoe?

⁷ Ija, Jehovah ben doe krakti wondroe nanga jepi foe en jeje foe a boen foe den Israèlsma na Moses ten, èn na tra ten toe. San den wondroe disi ben wani taki? Den ben meki den prakseri foe Jehovah go a fesi, ben sorgoe taki sma ben kon sabi en nen èn ben sori a krakti foe en. Èn sontron, neleki nanga Moses, den ben boeweisi sondro degedege taki Jehovah ben horibaka gi wan aparti sma (Exodus 4:1-9; 9:14-16). Ma, wondroe di santa jeje ben doe no ben de so foeroe ini a heri historia.b A de krin, taki moro foeroe foe den sma di ben libi ini bijbel ten, noiti ben de kotoigi foe wan wondroe èn ini a ten disi den no e pasa moro. Ma tokoe, ala di wi ini a ten disi e feti nanga problema di kan sori kande so bigi, a no de wan trowstoe foe sabi taki efoe wi e aksi Jehovah na ini bribi, taki a sa gi wi a srefi jeje di ben hori baka gi Moses a fesi Farao èn ben opo wan pasi gi den Israèlsma ini a Redi Se? — Mateus 17:20.

Boekoe di skrifi nanga krakti foe santa jeje

8. San ben de a ròl foe a santa jeje ini a gi foe den Tin Komando?

⁸ Baka di den Israèlsma kon fri foe Egipti, Moses ben tjari den go na a bergi Sinai, pe Jehovah ben sroto wan froebontoe nanga den èn ben gi den en Wet. Wan prenspari pisi foe a Wet di Jehovah ben gi nanga jepi foe Moses ben de den Tin Komando, èn den fosi eksemplaar foe den ben skrifi na tapoe ston tafra. Fa? Nanga jepi foe santa jeje. Bijbel e taki: „So esi leki [Jehovah] ben kaba taki now nanga Moses na a bergi Sinai, baka dati a ben gi Moses toe tafra foe Kotoigi, ston tafra di ben skrifi nanga a finga foe Gado.” — Exodus 31:18; 34:1.

9, 10. Fa a santa jeje ben e wroko foe di den ben e skrifi den Hebrew Boekoe, èn fa disi de krin foe si ini wortoe di Jesus disipel ben gebroiki?

⁹ Boiti den Tin Komando, dan Jehovah ben gi Israèl nanga jepi foe en jeje ete hondrohondro wet èn bodoi foe tiri a libi foe getrow man nanga oema. Èn moro wet ben o kon ete. Wan toe jarihondro baka a ten foe Moses, den Leifisma ben kotoigi na poebliki ini wan begi gi Jehovah: „Foeroe jari joe ben abi pasensi nanga den [Israèlsma] èn ben tan gi kotoigi kontrari den nanga a jeje foe joe nanga jepi foe den profeiti foe joe” (Nehemia 9:5, 30). Den ben skrifi foeroe profeititori di skrifi nanga krakti foe santa jeje èn di den profeiti dati ben taki foe den. Moro fara, dan santa jeje ben boeweigi getrow man foe skrifi santa historia èn prèise singi di e waran na ati.

¹⁰ Paulus ben taki foe ala den skrifi disi di a ben taki: „Ala den Boekoe ben skrifi nanga krakti foe santa jeje” (2 Timoteus 3:16; 2 Samuèl 23:2; 2 Petrus 1:20, 21). Ija, di Jesus disipel foe a fosi jarihondro ben teki den tekst disi taki, dan foeroetron den ben gebroiki den wortoe so leki „santa jeje . . . ben taki nanga jepi foe David mofo”, „na wan joisti fasi santa jeje ben taki nanga jepi foe Jesaja”, noso soso „a santa jeje ben taki” (Tori foe den Apostel 1:16; 4:25; 28:25, 26; Hebrewsma 3:7). Fa a ben de wan blesi taki a srefi santa jeje di ben abi krakti tapoe a skrifi foe den Santa Boekoe ben kibri den, so taki den kan tjari wi èn gi wi trowstoe ini a ten disi! — 1 Petrus 1:25.

Froetrow tapoe a santa jeje

11. Sortoe wroko foe a jeje ben de foe si ini a tori foe a bow foe a tabernakel?

¹¹ Ala di den Israèlsma ben meki kampoe na a foetoe foe a bergi Sinai, Jehovah ben gi den a komando foe bow wan tabernakel leki wan centrum foe troe anbegi. Fa den ben sa kan doe disi? „Ne Moses taigi den manpikin foe Israèl: ’Loekoe, Jehovah ben kari na en nen Besale-el a manpikin foe Uri, a manpikin foe Hur, foe a lo foe Juda. Ne a ben foeroe en nanga a jeje foe Gado ini a tori foe koni, froestan èn sabi èn ibri sortoe koni fasi foe wroko nanga anoe’” (Exodus 35:30, 31). Santa jeje ben meki ibri koni di Besale-el ben abi kon moro tranga èn nanga wan boen bakapisi a ben kan hori ai tapoe a seti foe na aparti bow wroko dati.

12. Fa a jeje ben gi sma krakti na wan toemoesi aparti fasi baka a ten di Moses ben libi?

¹² Wan tra leisi, a jeje foe Jehovah ben kon wroko tapoe Simson, foe di a ben gi en krakti moro leki di foe wan libisma foe meki a ben man foe fri den Israèlsma foe den Filistijn (Kroetoebakra 14:5-7, 9; 15:14-16; 16:28-30). Wan tra leisi baka, Salomo ben kisi spesroetoe koni leki kownoe foe a pipel di Gado ben teki (2 Kroniki 1:12, 13). Na ondro en tiri, sani ben go boen nanga Israèl so leki na no wan ten a fesi, èn a kolokoe situwâsi foe Israèl ben tron a model gi den blesi di Gado pipel sa njanboen foe den ondro a doesoen jari tiri foe Krestes Jesus, a Moro Bigi Salomo. — 1 Kownoe 4:20, 25, 29-34; Jesaja 2:3, 4; 11:1, 2; Mateus 12:42.

13. Fa a tori foe a jeje di ben gi Besale-el, Simson èn Salomo krakti, e gi wi deki-ati ini a ten disi?

¹³ Fa a de wan blesi taki Jehovah e meki taki wi kan kisi a srefi jeje disi! Te wi firi taki wi no de bekwaam foe tjari wan wroko di wi kisi foe doe kon na wan kaba noso foe teki prati na a preikiwroko, dan wi kan aksi Jehovah foe gi wi a srefi jeje di a ben gi Besale-el. Te wi e siki noso e horidoro ondro froefolgoe, a srefi jeje di ben gi Simson toemoesi aparti krakti, sa tranga wi — ala di, a e taki foe en srefi, a no e go de na wan wondroe fasi. Èn te wi e tanapoe a fesi moeilek problema noso abi foe teki prenspari bosroiti, wi kan aksi Jehovah, di ben gi Salomo toemoesi aparti koni, foe jepi wi foe handri na wan koni fasi. Dan, neleki Paulus, wi sa taki: „Gi ala sani mi abi a krakti nanga jepi foe en di gi mi krakti” (Filipisma 4:13). Èn a pramisi foe Jakobus sa fiti wi: „Efoe wan sma foe oenoe e mankeri koni, meki a tan aksi Gado, bika a e gi sondro gridi fasi èn sondro foe feni fowtoe; èn a sa kisi disi”. — Jakobus 1:5.

14. Soema ini owroe ten èn ini a ten disi, ben kisi jepi foe a santa jeje?

¹⁴ A jeje foe Jehovah ben de toe tapoe Moses ini en wroko foe leisi kroetoe gi a nâsi. Di den ben poti trawan foe jepi Moses, Jehovah ben taki: „Mi sa abi foe poeroe pikinso foe a jeje di de a tapoe joe èn poti dati na tapoe den, èn den sa abi foe jepi joe ini a tjari foe a lai foe a pipel, so taki joe no abi foe tjari dati joe wawan” (Numeri 11:17). Den man dati so boen, no ben abi foe handri nanga den eigi krakti. Santa jeje ben jepi den. Wi e leisi taki na tra okasi, a jeje foe Jehovah ben de a tapoe tra sma (Kroetoebakra 3:10, 11; 11:29). Di Samuèl ben salfoe David leki a man di ben o tron kownoe foe Israèl, a tori e froeteri wi: „Samuèl ben teki na oli toetoe èn ben salfoe en na mindri foe en brada. Èn a jeje foe Jehovah ben bigin wroko tapoe David foe sensi a dei dati” (1 Samuèl 16:13). Den sma ini a ten disi di abi hebi frantiwortoe — ini osofamiri, a gemeente noso a organisâsi — kan kisi trowstoe foe sabi taki a jeje foe Gado e jepi den foetoeboi foe en ete te den e doe den hebi prekti foe den.

15. Na sortoe fasi santa jeje gi Jehovah organisâsi tranga (a) ini den dei foe Hagai èn Sakaria? èn (b) ini a ten disi?

¹⁵ Wan toe doesoen jari baka a ten foe Moses, getrow wan foe den pikin foe Israèl ben komoto foe Babilon drai go baka na Jerusalem nanga a wroko foe bow a tempel kon njoen baka (Esra 1:1-4; Jeremia 25:12; 29:14). Ma moeilek sani di ben hendri den ben opo ede kon, èn den Israèlsma ben lasi ati foeroe jari langa. Te foe kaba, Jehovah ben opo den profeiti Hagai nanga Sakaria foe gi den djoe deki-ati foe no froetrow tapoe den eigi krakti. Ma fa a wroko ben sa doe? „’No nanga wan sroedati legre, no nanga krakti, ma nanga mi jeje’, Jehovah foe den legre ben taki” (Sakaria 4:6). Èn nanga a jepi foe Gado jeje, den ben bow a tempel. Na a srefi fasi Gado pipel ini a ten disi doe foeroe wroko. A preiki foe a boen njoensoe e doe na heri grontapoe. Miljoenmiljoen sma e kisi leri ini waarheid èn regtfardikifasi. Den e orga kongres. Den e bow Kownoekondrezaal èn bijkantoro. Foeroe foe disi den ben doe ala di den ben kisi bita gens. Ma Jehovah Kotoigi no ben lasi ati, foe di den sabi taki ibri sani di den ben doe, den ben doe, no nanga wan sroedati legre, no nanga libisma krakti, ma nanga Gado jeje.

Gado jeje ini a fosi jarihondro

16. Sortoe ondrofeni den foetoeboi foe Jehovah di ben libi bifo kresten ten ben abi nanga a wroko foe Gado jeje?

¹⁶ So leki fa wi ben si, dan den foetoeboi foe Gado di ben libi bifo a kresten ten ben sabi a krakti di Gado jeje abi heri boen. Den ben froetrow na en tapoe a jeje disi foe jepi den foe tjari den hebi prekti kon na wan kaba èn foe doe Gado wani. Den ben sabi toe taki a Wet èn den tra santa skrifi ben skrifi ondro a krakti di a jeje foe Jehovah ben abi na den tapoe èn na so fasi den ben de ’Gado Wortoe’ (Psalm 119:105). Ma san wi kan taki foe a kresten pisi ten?

17, 18. San ben de wan toe foe den wondroe wroko foe a jeje ini a kresten ten, èn sortoe prakseri den wondroe disi ben abi?

¹⁷ Na ini a fosi jarihondro foe wi Gewoon Teri den toemoesi moi wroko foe Gado jeje ben de foe si toe. Den ben taki profeititori ondro a krakti di a santa jeje ben abi na den tapoe (1 Korentesma 14:1, 3). Leki wan kon troe foe a pramisi foe Jesus taki santa jeje ben sa memre den disipel foe en foe ala den sani di a ben taki èn taki a ben sa leri den moro sani foe a waarheid, dan foeroe boekoe ben skrifi na ondro a krakti di a santa jeje ben abi na sma tapoe (Johanes 14:26; 15:26, 27; 16:12, 13). Èn wondroe ben pasa, so leki wi sa taki foe disi moro fini ini a tra artikel foe wi. Ija, a fosi jarihondro ben bigin nanga wan aparti wondroe. Na wan ten foe a jari 2 bifo G.T. wan spesroetoe beibi ben moesoe gebore, èn leki wan marki, a jongoe mama foe en ben o de wan jongoe wenke. Fa dati ben man? Nanga jepi foe santa jeje. A tori e taki: „A geborte foe Jesus Krestes ben de so. Ala a ten di den ben pramisi Josef taki a o trow nanga Jesus mama Maria, a ben sori taki a ben abi bere nanga jepi foe santa jeje bifo den ben de na wán”. — Mateus 1:18; Lukas 1:35, 36.

¹⁸ Di Jesus ben kon bigi, a ben poeroe ogri jeje foe sma, dresi siki sma, èn ben wiki dedesma srefi ini a krakti foe santa jeje. Son wan foe en bakaman toe ben doe wondroe èn krakti wroko. Den spesroetoe man disi di den ben man doe sani ben de presenti foe a jeje. San ben de a marki foe den? Neleki fa den fosi wondroe ben doe, dan den ben meki den prakseri foe Gado go a fesi èn den ben tjari a makti foe en kon a krin. Boiti dati, den ben sori taki nanga reti Jesus ben taki, dati Gado ben seni en kon; èn baka ten, den ben boeweisi taki a fosi jarihondro kresten gemeente ben de a nâsi foe Gado di a ben teki. — Mateus 11:2-6; Johanes 16:8; Tori foe den Apostel 2:22; 1 Korentesma 12:4-11; Hebrewsma 2:4; 1 Petrus 2:9.

19. Fa a bribi foe wi e tranga nanga jepi foe den bijbel tori foe den wondroe foe Jesus nanga den apostel foe en?

¹⁹ Ma na apostel Paulus ben taki, dati den sortoe wondroe wroko disi foe a jeje ben sa de foe a pikin-nengre ten foe a gemeente èn den ben sa lasi gowe, so taki ini a ten disi wi no e si den sortoe wondroe wroko disi di a santa jeje e doe (1 Korentesma 13:8-11). Tokoe, den wondroe di Jesus nanga en apostel ben doe, abi moro leki historia waarde nomo. Den e tranga a bribi foe wi ini a pramisi foe Gado taki siki nanga dede no sa abi wan presi ondro a tiri foe Jesus ini a njoen grontapoe. — Jesaja 25:6-8; 33:24; 65:20-24.

Kisi wini foe Gado santa jeje

20, 21. Fa wi kan feni boen foe den sani di a santa jeje gi wi?

²⁰ Fa a jeje disi na wan tranga krakti! Ma fa kresten ini a ten disi kan feni boen foe disi? Ini a fosi presi, Jesus ben taki, dati wi moesoe aksi foe en, so boen san ede wi no e doe dati dan? Begi Jehovah foe gi joe a toemoesi moi presenti disi no soso ini ten foe banawtoe ma na ibri okasi. Boiti dati, leisi bijbel so taki santa jeje kan taki nanga joe. (Teki gersi Hebrewsma 3:7.) Prakseri dipi foe san joe e leisi èn doe en, so taki santa jeje kan abi krakti na ini joe libi (Psalm 1:1-3). Moro fara, abi demakandra — nanga sma aparti, ini gemeente, èn na kongres — nanga trawan di e froetrow tapoe Gado jeje. Fa santa jeje e gi den sma foeroe krakti di e blesi den Gado „ini den ipi sma di kon na wán!” — Psalm 68:26.

²¹ A no de so taki Jehovah na wan Gado di lobi foe gi nanga en heri ati? A e taki, dati wi abi foe aksi nomo foe santa jeje èn a sa gi wi en. Fa a de wan don sani foe froetrow tapoe wi eigi koni èn krakti te wi man kisi so wan tranga jepi! Ma, tra tori de toe, di abi foe doe nanga Gado jeje di abi krakti tapoe wi leki kresten, èn foe disi wi sa taki ini a tra artikel.

[Foetoewortoe]

Joe kan piki den aksi di e kon now?

◻ Fa Jehovah ben meki ala den sani na skin fasi ini na universum?

◻ San ben de wan toe fasi fa santa jeje ben wroko bifo den kresten ten?

◻ Fa a e gi wi trowstoe na ini a ten disi foe sabi san na santa jeje ben doe na owroeten?

◻ Fa wi kan feni boen gi wisrefi foe den sani di santa jeje e gi wi?

[Prenki na tapoe bladzijde 13]

A jeje di ben gi Simson krakti moro leki di foe libisma, kan gi wi krakti gi ala sani