Waka nanga a yeye èn du san yu pramisi Gado
„Tan waka nanga a yeye, dan unu no sa du nowan sani di a sondu skin wani.” —GAL. 5:16.
1. Sortu dopu sma teki na a dei fu a Pinksterfesa?
DI DEN bakaman fu Yesus ben e taki na ini tongo na a dei fu a Pinksterfesa fu a yari 33, dan dati ben de baka di den ben dopu nanga santa yeye. Den du difrenti wondru fu di den ben kisi santa yeye (1 Kor. 12:4-10). San ben de a bakapisi fu den wondru dati èn fu a taki di na apostel Petrus ben hori? Furu fu den sma disi „den konsensi bigin fon den trutru”. Fu di Petrus gi den deki-ati, meki den sori berow èn den teki dopu. Bijbel e taki: „Den dopu den sma di ben teki a wortu fu en nanga prisiri, èn a dei dati ete sowan dri dusun sma tron bribiman” (Tori. 2:22, 36-41). Den ben teki dopu na ini watra na ini a nen fu a Tata, fu a Manpikin, èn fu a santa yeye, soleki fa Yesus ben taigi den fu du.—Mat. 28:19.
2, 3. (a) Fruklari san na a difrenti te wan sma dopu nanga santa yeye èn te a dopu na ini a nen fu a santa yeye. (b) Fu san ede ala sma di wani tron tru Kresten na ini a ten disi, musu teki dopu na ini watra?
2 Ma te wan sma dopu nanga santa yeye, dan a de so taki dati e difrenti fu a dopu di wan sma dopu na ini a nen fu a santa yeye? Iya, den tu dopu dati e difrenti fu makandra. Den sma di dopu nanga santa yeye, na sma di gebore baka leki salfu manpikin fu Gado (Yoh. 3:3). Gado salfu den sma disi so taki te fu kaba den kan tiri leki kownu nanga priester na ini a hemel Kownukondre fu en. Boiti dati, den sma disi de wán nanga Krestes (1 Kor. 12:13; Gal. 3:27; Openb. 20:6). Sobun, di Yehovah dopu sma na a dei fu a Pinksterfesa èn baka a dei dati, dan dati ben de wan dopu nanga santa yeye. Fu taki en leti, a ben teki sma fu tiri makandra nanga Krestes (Rom. 8:15-17). Ma fa a de te sma e teki dopu na ini watra na ini a nen fu a santa yeye, soleki fa dati e pasa doronomo na den bigi konmakandra èn na den kongres fu Yehovah en pipel na ini a ten disi?
3 Tru Kresten e teki dopu na ini watra fu sori sma taki den gi densrefi abra na Yehovah Gado dorodoro. Na dati den sma du di kisi a kari fu go na hemel. Ma na ini a ten disi, milyunmilyun man nanga uma di abi a howpu fu libi fu têgo na grontapu, musu teki dopu tu na ini watra. Awansi sortu howpu wan sma abi, toku a sma dati musu teki dopu na ini watra, èn a musu du dati na ini a nen fu a Tata, fu a Manpikin, èn fu a santa yeye. A sma musu du dati efu a wani taki Gado feni en bun. Fu dati ede, ala Kresten di dopu na a fasi dati, musu „tan waka nanga a yeye”. (Leisi Galasiasma 5:16.) Yu e waka nanga a yeye, èn yu e tan du san yu pramisi Gado?
San a wani taki fu „waka nanga a yeye”?
4. San a wani taki fu „waka nanga a yeye”?
4 Wan sma di e „waka nanga a yeye” e meki a santa yeye tiri en, noso a e meki a yeye dati abi krakti na en tapu. Fu taki en leti, a santa yeye e tiri a sma disi na ini en aladei libi. Galasiasma kapitel 5 e sori san na a difrenti na mindri wan sma di e meki a santa yeye tiri en, èn wan sma di e meki a sondu skin tiri en.—Leisi Galasiasma 5:17, 18.
5. Te a santa yeye e tiri yu, dan sortu sani yu no o du?
5 Efu a santa yeye e tiri yu, dan dati wani taki dati yu e meki muiti fu no du den sani di sondu sma e du. Dati na sani soleki ’hurudu, morsu libi, yayolibi, na anbegi fu falsi gado, afkodrei, feantifasi, kesekese, dyarusu, faya-ati, trobi, pratifasi, a kon di sma e kon nanga falsi leri, bigi-ai, fesa pe sma e dringi sopi pasa marki fu kon drungu, nanga bradyari fesa’ (Gal. 5:19-21). Te yu e luku en bun, dan ’nanga yepi fu a yeye yu no e du moro san a sondu skin wani’ (Rom. 8:5, 13). Dati sa yepi yu fu tan poti prakseri na den sani di abi fu du nanga a yeye, èn a sa yepi yu tu fu teki a tiri fu a yeye dati. Iya, yu no sa meki den lostu fu a skin basi yu.
6. Gi wan eksempre fu tyari kon na krin san de prenspari fu man sori den froktu fu a yeye.
6 Fu di a santa yeye e tiri yu, meki yu e sori den fasi fu Gado, noso „den froktu fu a yeye” (Gal. 5:22, 23). Ma yu e frustan taki yu sa musu meki muiti fu tan sori den froktu dati. Luku na eksempre disi: Wan gronman e prani a gron fu en. A no de fu taki dati son nanga watra de fanowdu fu meki den sani gro. Sondro den sani dati, a no kan fruwakti taki a o koti nyanyan. Wi kan agersi a santa yeye nanga a leti fu a son. Wi abi a santa yeye fanowdu fu man sori den froktu fu a yeye. Efu a gronman no ben wroko tranga, dan yu denki taki nyanyan ben o de fu koti? (Odo 10:4) A sani disi e sori taki te yu e sreka yu ati bun, dan yu o man sori den froktu fu a yeye moro bun tu. Sobun, aksi yu srefi a sani disi: ’Mi e meki a santa yeye tiri mi so taki mi kan sori den froktu fu a yeye disi?’
7. Fu san ede a prenspari fu studeri Bijbel èn fu denki dipi fu sani, efu wi wani kweki den froktu fu a santa yeye?
7 Efu gronman wani taki den gron gi furu nyanyan, dan den musu nati den sani di den prani. Efu yu wani kweki den froktu fu a yeye, dan yu abi den tru tori fu Gado fanowdu di wi e kon sabi nanga yepi fu Bijbel, èn nanga yepi fu a Kresten gemeente na ini a ten disi (Yes. 55:1). Kande yu sori furu sma taki Bijbel skrifi nanga yepi fu santa yeye (2 Tim. 3:16). Boiti dati, a getrow èn koni srafu e yepi wi fu frustan den tru tori fu Bijbel di de leki soifri watra, èn wi abi a yepi dati tranga fanowdu (Mat. 24:45-47). A sani disi e sori krin taki, te wi wani taki a santa yeye abi krakti na wi tapu, dan wi musu leisi Gado Wortu èn wi musu denki dipi fu den sani di wi e leisi. Te yu e du dati, dan yu e teki a moi eksempre fu den profeiti di „ben e suku fayafaya fu kon sabi” sani moro krin, èn den ben e „ondrosuku sani finifini” tu. A moi fu sabi taki srefi den engel ben angri fu kon sabi den tru tori di ben abi fu du nanga a pramisi Manpikin, èn nanga a gemeente fu salfu Kresten.—Leisi 1 Petrus 1:10-12.
Fa wi kan meki a santa yeye abi krakti na wi tapu?
8. Fu san ede a de tumusi prenspari taki yu e aksi Yehovah fu gi yu en santa yeye?
8 Te yu e studeri Bijbel, èn te yu e denki dipi fu den sani di yu leri, dan dati no nofo ete. Yu musu tan aksi Yehovah fu yepi yu èn fu tiri yu. A kan „du moro leki ala san wi e aksi en, noso moro leki san wi kan prakseri” (Ef. 3:20; Luk. 11:13). Ma san yu ben o piki te wan sma ben aksi yu a sani disi: „Efu Gado sabi kaba ’san mi abi fanowdu, srefi bifo mi aksi en’, dan fu san ede mi musu tan aksi en den sani dati?” (Mat. 6:8) We, wan reide na taki te yu e begi Yehovah fu gi yu en santa yeye, dan yu e sori taki yu e frutrow na en tapu. Fu eksempre, efu wan sma kon suku yepi na yu, dan yu ben o du ala san yu man fu yepi en, fu di yu sabi taki a kon suku yepi na yu fu di a e frutrow yu (Luku Odo 3:27.) Na so a de tu taki, Yehovah lobi te yu e aksi en fu gi yu a yeye fu en, èn a sa gi yu dati tu.—Odo 15:8.
9. Fa den Kresten konmakandra kan meki taki a yeye fu Gado abi krakti na yu tapu?
9 A de krin taki den konmakandra fu wi, den kongres, nanga den tra bigi konmakandra kan meki tu taki a santa yeye fu Gado abi krakti na wi tapu. Wi musu meki tranga muiti fu de na den konmakandra, èn fu poti prakseri na den sani di wi e leri drape. Te yu e du dati, dan dati sa yepi yu fu kon frustan „den dipi sani fu Gado” (1 Kor. 2:10). Wi e kisi wini tu te wi abi a gwenti fu gi piki tapu den konmakandra. Prakseri baka fa a ben de di yu ben de na den konmakandra den fo wiki di pasa. Omeni leisi yu opo yu anu go na loktu fu gi piki, fu sori taki yu abi bribi? Yu feni taki yu musu du moro muiti fu gi piki? Efu dati de so, dan luku sortu kenki yu kan tyari kon na ini den wiki di e kon. Yehovah sa si taki yu wani gi piki, èn a sa gi yu en santa yeye di sa yepi yu fu kisi moro wini fu den konmakandra.
10. Te wi e waka nanga a yeye, dan sortu kari wi sa gi trawan?
10 Te wi e waka nanga a yeye, dan dati wani taki dati wi e teki a kari di wi e kisi na Openbaring 22:17: „A yeye nanga a trowmisi e tan taki: ’Kon!’ Ibri sma di e yere disi, meki a taki: ’Kon!’ Ibri sma di watra e kiri en, meki a kon. Meki ibri sma di wani, kon dringi fu a watra di e gi libi èn di de fu kisi fu soso.” Nanga yepi fu a santa yeye, a salfu grupu fu a trowmisi e gi sma a kari disi fu kon dringi a watra di e gi libi. Efu yu teki a kari fu „kon!”, dan yu abi a fasti bosroiti fu gi trawan a kari tu fu „kon!”? A de wan bigi grani taki wi abi wan prati na a wroko disi di kan frulusu sma!
11, 12. Fa a santa yeye e tiri a preikiwroko?
11 Na ini a ten disi, a santa yeye e tiri a tumusi prenspari wroko dati. Bijbel e sori fa santa yeye ben yepi den zendeling na ini a fosi yarihondro fu go preiki na ini nyun kontren. ’A santa yeye ben tapu na apostel Paulus nanga den kompe fu en fu preiki a wortu na ini a distrikt Asia’ èn na ini Bitinia. Wi no sabi soifri fa a santa yeye tapu den fu go na den presi dati, ma a de krin taki a yeye tiri Paulus fu go preiki na furu kontren fu Europa. A ben kisi wan fisyun pe wan man fu Masedonia ben begi en fu kon yepi den.—Tori. 16:6-10.
12 Na ini a ten disi, a yeye fu Yehovah e tiri a preikiwroko tu di e du na heri grontapu. Yehovah no e tiri den salfuwan moro nanga yepi fu fisyun, ma a e tiri den nanga yepi fu a santa yeye. Èn a yeye e gi brada nanga sisa deki-ati tu fu du ala san den man fu preiki a bun nyunsu èn fu gi sma leri. A no de fu taki, dati yu e teki prati na a tumusi prenspari wroko disi. San yu kan du fu kisi moro prisiri na ini a tumusi moi wroko disi?
13. Fa yu kan meki a santa yeye tiri yu? Gi wan eksempre.
13 Wan fasi fa yu kan meki a santa yeye tiri yu, na te yu du den sani di Gado e leri a pipel fu en. Luku na eksempre fu Mihoko, wan sisa di e libi na ini Yapan. Di a bigin pionier, dan a ben feni taki a no ben abi a koni fu tyari gobaka. A ben feni taki a no ben sabi fa fu hari a prakseri fu na ososma. Na a srefi ten dati, Wi Kownukondre Diniwroko gi wan tu moi rai fa fu taki syatu nanga sma te wi e tyari gobaka. Baka dati, a brochure Een voldoening schenkend leven — Hoe u dit kunt bereiken (Fa yu kan kon abi wan koloku libi?) kon na doro. A brochure disi na wan bigi yepi gi den brada nanga sisa na ini Yapan. Mihoko fiti den rai di gi na ini a brochure, spesrutu den wan di e sori fa fu taki syatu nanga sma te wi e tyari gobaka. A no teki langa fosi a bigin studeri Bijbel nanga den sma di no ben wani studeri fosi. A e taki: „Mi ben abi so furu Bijbelstudie, taki mi ben musu taigi sonwan fu den taki den ben musu wakti teleki mi ben abi ten fu studeri nanga den. Son leisi mi ben abi moro leki 12 Bijbelstudie!” Fu tru, te yu e waka nanga a yeye, noso te yu e teki a rai di Yehovah e gi den futuboi fu en, dan yu sa kisi furu blesi.
Frutrow tapu a yeye fu Gado
14, 15. (a) San e meki taki sondu libisma man tan du san den pramisi Gado? (b) Fa yu kan feni bun mati?
14 Leki wan dopu futuboi fu Gado, yu abi wan diniwroko fu du (Rom. 10:14). Kande yu feni taki yu no bun nofo fu teki so wan frantwortu na yu tapu. Ma na Gado e meki taki yu bun nofo fu teki a frantwortu disi na yu tapu, neleki fa a du dati nanga den salfuwan (Leisi 2 Korentesma 3:5.) Te yu e meki tranga muiti èn te yu e frutrow tapu Gado en yeye, dan yu o man tan du san yu pramisi Gado.
15 A tru taki a no makriki gi wi leki sondu libisma fu tan du san wi pramisi wi volmaakti Gado, Yehovah. Wan sani di kan meki en muilek gi yu fu du dati, na taki son sma di ben de yu mati fosi kande no sa frustan a fasi fa yu e libi now. Kande den sma disi sa ’taki ogri fu yu’ (1 Petr. 4:4). Ma no frigiti taki yu meki nyun mati now èn den moro prenspari mati fu yu na Yehovah nanga Yesus Krestes. (Leisi Yakobus 2:21-23.) A prenspari tu fu leri sabi den brada nanga sisa na ini a gemeente fu yu, di e dini Gado makandra nanga ala brada nanga sisa na heri grontapu (1 Petr. 2:17; Odo 17:17). Yehovah o meki a santa yeye yepi yu fu feni mati di o tan abi bun krakti na yu tapu.
16. Fu san ede yu kan ’prisiri te yu swaki’ neleki fa Paulus ben du dati?
16 Awinsi yu abi bun mati na ini a gemeente, toku a kan taki yu no sabi san fu du te problema e miti yu na ini na aladei libi. Kande den problema e meki yu firi brokosaka son leisi, fu di a gersi leki wan kaba no e kon na den. Dati na a yoisti ten fu suku yepi na Yehovah èn fu aksi en fu gi yu en santa yeye. Na apostel Paulus ben skrifi: „Te mi swaki, dan mi tranga.” (Leisi 2 Korentesma 4:7-10; 12:10.) Paulus ben sabi taki a yeye fu Gado kan yepi sma, awinsi sortu swakifasi den abi. Sobun, a santa yeye fu Gado kan gi yu krakti te yu e firi swaki èn te yu abi yepi fanowdu. Paulus ben skrifi taki a ben e ’prisiri te a ben swaki’. Na te a ben swaki a ben e firi taki a santa yeye ben abi krakti na en tapu. Yu kan abi a srefi firi dati tu!—Rom. 15:13.
17. Fa santa yeye kan yepi yu fu feni a yoisti pasi?
17 Wi abi a yeye fu Gado fanowdu so taki wi kan libi na wan fasi di e sori taki wi gi wisrefi abra na en. Kon meki wi taki dati yu na wan botoman. Yu wani dini Yehovah fu têgo. A santa yeye fu Gado de leki a winti di a boto fu yu abi fanowdu fu man doro sondro problema na a presi pe a musu go. Dati meki yu leki botoman musu kon sabi san na a yoisti winti di o tyari a boto fu en go na a presi pe a musu go. Yu de na ini wan srefi sortu situwâsi. Yu no wani taki a yeye fu a grontapu fu Satan wai yu go-kon (1 Kor. 2:12). Fu taki en leti, yu wani taki a yoisti yeye e tiri yu. Dati na a santa yeye. Nanga yepi fu Gado en Wortu èn na organisâsi fu en, a santa yeye o yepi yu fu feni a yoisti pasi.
18. Sortu fasti bosroiti yu abi èn fu san ede?
18 Kande yu e studeri Bijbel nanga Yehovah Kotoigi, èn kande yu e teki prati na a anbegi makandra nanga den. Ma kande yu musu teki a prenspari bosroiti ete fu gi yusrefi abra na Gado èn fu teki dopu. Efu dati de so, dan aksi yusrefi a sani disi: ’Fu san ede mi e draidrai?’ Efu yu e frustan taki Yehovah e gebroiki en santa yeye fu du a wani fu en na ini a ten disi, èn efu yu sabi fa a yeye dati e wroko, dan du san yu musu du. Yehovah sa blesi yu bogobogo. A sa de klariklari fu gi yu en santa yeye. Efu yu dopu furu yari kaba, dan a no de fu taki, dati yu ondrofeni fa a santa yeye tiri yu. Yu si èn yu firi fa Gado tranga yu nanga yepi fu a yeye fu en. Dati kan tan go so doro, iya, fu têgo. Sobun, abi a fasti bosroiti fu tan waka nanga a santa yeye.
Yu e memre disi ete?
• San a wani taki fu „waka nanga a yeye”?
• San kan yepi yu fu „tan waka nanga a yeye”?
• Fa yu kan tan du san yu pramisi Gado?
[Prenki na tapu bladzijde 15]
Na wan agersi fasi yu musu meki muiti fu sreka yu ati
[Prenki na tapu bladzijde 16, 17]
A yeye fu Gado e tiri yu?