Na oso fu yu de wan presi fu rostu èn vrede?
„Meki Yehovah gi yu wan presenti, èn feni wan rostupresi, ibriwan na ini na oso fu en masra.” — RUTH 1:9.
1. Sortu dri uma ben bigin sowan dri dusun yari psa kaba wan waka go na Yuda?
SOWAN dri dusun yari pasa kaba dri uma ben bigin na wan kefarlek waka. Na waka fu den ben sa tyari den go ini kontren di morofurutron fufuruman nanga mi-no-kesma e meki den de kefarlek. Den umasma ben hari psa na sabana fu Moab. Na moro owruwan ben de na weduwe Naomi, di awansi fa a no fa ben wani go baka na Bethlehem na ini en lobi kondre, Yuda. Tu moro yongu weduwe ben de na en, Orpa nanga Ruth, Moabuma di ben de wefi fu den dede manpikin fu Maomi, Chilyon nanga Machlon. Arki!
2. San Naomi ben wani fu Orpa nanga Ruth?
2 „Waka gowe,” Naomi ben taki, „drai baka, ibriwan na a oso fu en mama. Meki a de so, taki Yehovah sori unu lobi bunatifasi, soleki unu ben sori dati gi den man di dede now nanga gi mi.” Èn sortu winsi Naomi ben taki morofara? „Meki Yehovah gi unu wan presenti èn feni wan rostupresi, ibriwan ini na oso fu en man” (Ruth 1:8, 9). Iya, Naomi ben tanapu a tapu fu en pikinwefi drai go baka na a pipel fu den ini na howpu taki Gado ben sa meki den tu yongu uma feni drape na rostu èn kibrifasi di e kon fu na abi fu wan bun man èn wan oso.
3. Sortu bosroiti Ruth ben teki èn nanga sortu bakapisi?
3 Orpa ben go, ma no na loyaal Ruth. Fudi a no ben wani fu gwe libi en masra mama, meki Ruth ben teki a bosroiti: „Yu pipel sa de mi pipel, èn yu Gado mi Gado.” Èn san ben de na bakapisi? Ruth ben feni wan oso fu rostu nanga vrede na Boaz èn a ben kisi „wan volmaakti paiman”! A ben tron wan fosten mama fu kownu David èn fu David Masra di yu no ben kan teki gersi nanga wan tra sma, Yesus Kristus. — Ruth 1:16; 2:12; 4:13-22; Psalm 110:1; Mattéus 1:1-6.
4. Sortu aksi di e tyari wi go denki e tyari kon dya na fesi?
4 Naomi ben winsi taki Yehovah ben sa gi ibriwan fu en pikinwefi na presenti fu wan stabiel trowlibi èn wan oso fu rostu èn vrede. Yehovah seiker wani taki na osolibi fu en dienstknegti de wan vredewan. Efu yu de wan Kotoigi fu Yehovah, dan na oso fu yu de wan presi fu rostu nanga vrede?
Teki na yoisti patna
5. Efu yu de wan kristen di no trow ete èn e prakseri fu go ini wan trow libi, san de dan na fosi stap fu kisi wan osolibi fu vrede?
5 Efu yu de wan kristen di no trow ete èn di e prakseri fu go ini wan trowlibi, dan yu e howpu sondro degedege fu abi wan osolibi fu vrede. Na fosi stap ini na richting dati e tyari kon na krin fu san na apostel Paulus ben skrifi: „Wan uma tai ini a ten fu ala a ten di en man e libi. Ma efu a man fu en e go sribi, dan a de fri fu trow nanga suma a wani, ma soso ini Masra.” — 1 Korinte 7:39.
6. (a) San a wani taki ’fu trow wawan na ini Masra’? (b) San wan sma di e suku wan trowpatna mu aksi ensrefi? (c) Fu san-ede na ondro begi wan sma mu suku wan dopu trowpatna?
6 „Trow soso na ini Masra” wani taki fu trow soso nanga wan kompe bribiman. Ma wan kristen no mu trowe ensrefi go es’esi na ini wan trowlibi, ooktu no nanga wan sma di gi ensrefi abra na Yehovah. A sma de trutru wan sma di e suku ’regtvaardikifasi nanga safri-atifasi’? (Zefanya 2:3). A e dini leki man ofu uma Gado nanga en heri ati? A e taki fu wan ati di furu nanga lobi wortu fu prijse Yehovah? Na velddienst de wan geregeld èn prenspari pisi fu na libi fu a sma? A abi leki man ofu uma den fanowdu kwaliteit gi na diniwroko èn na kristen trowlibi? Iya, srefi wan dopu trowpatna mu teki wan sma na wan ferstanfasi èn ondro begi. Go ondrosuku so bun leki yu kan taki na bribiwan abi tumsi bun yeye eigifasi. Sowan kruderi e sorgu taki spanning di kan trobi na vrede èn na atipen di so furutron e kon osofamiri di prati na kerkisei no sa de.
7. San de fanowdu fu feni na moro bigi koloku na ini na trowlibi?
7 Na ini sowan trowlibi fu tu kristen di gi densrefi abra na Gado den kan kisi den emotioneel fanowdu èn hori den srefi bezig makandra nanga yeye afersi. Disi e tyari kon leki bakapisi fu abi wan so krosbei libi sma banti leki a kan. Kristen man nanga uma seiker e winsi fu abi wan krosbei banti nanga a trowpatna fu den. Gado meki libisma nanga na lostu fu anbegi èn wi e kon de moro koloku te wi e du den yoisti stap fu kowru wi yeye fanowdu (Mattéus 5:3). Na ini na ferstan disi fu sani seiker wi no sa wani trangayesi Yerovah fudi wi e go trow nanga wan sma di no de ini bribi èn na sofasi fufuru puru fu wisrefi na yeye wanfasi di e tranga na trowlibi (Deuteronomium 7:3, 4). Iya, fu feni na moro bigi koloku ini na trowlibi, dan yu mu sorgu taki Gado de ini yu trowlibi. Sowan agersi „dri dobru titei no kan koti es’esi na ini tu pisi” (Preikiman 4:12). Fu tru, fu abi Yehovah Gado ini yu trowlibi sa meki a trow dati kon tranga èn meki taki yu oso tron wan presi fu rostu nanga vrede.
Rai di e meki vreae kon ini na ososlibi
8. Sortu rai de gi trow kristen spesrutu wan aparti wan?
8 San de fanowdu a mindri kristen sma di trow kaba fu abi wan oso fu rostu nanga vrede? Furu sani, ma spesrutu na rai fu Paulus na ini Efesema 5:21-33 de morofuru wan apartiwan. Wi musu piki, taki wan man ofu uma ben sa kan gebroiki den wortu disi fu poti wan strepi na ondro den swakifasi fu en trowpatna. Ma omoro bun a de fu poti srefi a tapu san yu e feni dya leki rai fu tyari kon ini yu eigi libi.
9. Sortu rai Paulus ben gi na kristen trow masra?
9 Efu yu de wan kristen trowman, dan na poti na ini yu eigi libi fu na rai fu Paulus sa meki yu oso tron wan presi fu rostu nanga vrede. Na apostel e gi mansma na rai: „Tan lobi yu uma, net soleki Kristus ben lobi na gemeente tu èn ben gi ensrefi abra fu en ede.” Paulus ben taki ooktu: „Un man [musu] lobi den uma fu den leki den eigi skin. A sma di lobi en uma, lobi ensrefi, bika nowan sma oiti ben abi ogri-ati gi en eigi meti; ma a e gi en nyanyan èn e boboi en, soleki ooktu Kristus e du dati gi na gemeente . . . Meki . . . ibriwan fu unu aparti lobi en uma, so leki ensrefi.” Wan man mu lobi en ’uma leki ensrefi’ . . . netleki a uma ben de a man srefi. Fa disi de wan sani di fiti, fudi ’den tu ben tron wan skin’! — Genesis 2:24.
10. Sortu frantwortu wan kristen man abi te yu luku 1 Timóteus 5:8?
10 Wan sma di e lobi en uma leki ensrefi sa teki fesi ini yeye afersi. A de frantwortu gi a situwasi di de ini en osofamiri èn a no kan libi den sani nomo soleki fa den wani meki den go. Nono, a musu sorgu bun gi den afersi na skin èn na yeyesei fu na heri osofamiri. Iya, Paulus ben taki, „efu wan sma no e sorgu gi den sma fu en, èn spesrutu gi den di de memre fu en osofamiri, dan a drai baka gi na bribi èn a de moro ogri leki wan sma di no de ini bribi.” — 1 Timóteus 5:8.
11. Sortu rai Paulus e gi na kristen uma?
11 Wan kristen uma kan du furu fu meki na oso de wan presi fu rostu èn vrede. Gi uma Paulus ben abi na rai disi di kon ondro krakti fu santa yeye: „Meki den uma saka densrefi a den man ondro leki na Masra, bika na man na a edeman fu en uma, net solkei ooktu Kristus na a edeman fu na gemeente, en leki ferlusuman fu a skin disi. Iya, net soleki na gemeente e saka ensrefi na ondro Kristus, na so ooktu den uma mu saka densrefi na ondro den man, na ini ala sani. . . . Na uma mu abi dipi respeki gi en man” (Efesesma 5:22-24, 33). Na „dipi respeki” disi e meki taki na oso tron wan presi fu rostu nanga vrede. Disi seiker na wan bigi difrenti nanga na fasi fu so furu grontapu uma di a yeye fu den fu onafhankelijkheid èn tyalansi e trobi èn e bruya na oso.
12. Fa kristen man nanga uma mu handri?
12 Kristen man nanga uma mu handri tapu fasi di e meki lobi nanga respeki go a fesi. Na man mu sori taki a e ferstan na uma èn taki a abi lobi èn yeye lepifasi. Èn na uma mu sori taki a e frede Gado èn lostu fu wroko makandra, wan sma di a man fu en kan lobi en. A no wan sani di muilek fu si fa den eigifasi disi sa meki na oso tron wan presi fu rostu nanga vrede,
’No gi Didibri noiti wan presi’
13. Sortu rai Paulus e gi na ini Efesesma 4:26, 27?
13 Fudi libisma de onvolmaakti, kande a no de makriki fu kibri na vrede fu na oso. Druk fu doro sei kan meki spanning du kon di kan fufuru na vrede fu wan oso. Ma na poti na ini wi libi fu a rai fu Paulus na ini Efesesma 4:26, 27 kan meki na rostu fu wi oso kon. Paulus ben skrifi: „Kisi atibron èn toku no sondu; meki son no dongo aladi yu de na ini wan atibronfasi èn no gi Didibri ooktu pasi.” Srefi efu wan man ofu wan uma sontron nanga reti kisi atibron, dan nowan fu den tu mu meki na atibron disi tron sondu fudi den e tan na ini wan atibronfasi èn e firi feiantifasi. Meki noiti wi gi pasi taki na suma di e trobi na vrede, Satan Didibri, fufuru fu wi kristen oso na vrede! — 1 Petrus 5:8.
14. Efu wan problema ben tyari bruya kon, san e rikomanderi fu tyari osofamiri vrede kon baka?
14 Fu abi vrede na oso, dan a no de fu taki taki ibriwan fu den tu trowpatna mu poti bijbelrai na ini den libi. Efu wan problema meki wan bruya kon, dan begi makandra fu Gado yeye kan meki un sori na froktu fu na yeye èn meki na vrede fu na oso kon baka (Lukas 11:13; Galaciasma 5:22, 23). Iya, srefi na ondro na moro muilek omstandigheid na libifasi disi sa meki na oso tron wan presi fu rostu nanga vrede.
Na rol fu pikin na ini osofamiri vrede
15. Fa yonguwan kan yepi fu meki na osofamiri vrede go na fesi?
15 Ooktu yongusma kan yepi fu meki osofamiri vrede go a fesi. Fa dan? Fudi den e sori wan yeye fu gi yesi èn wroko makandra. Sowan yeye e anga furu fu na bijbelleri di den e kisi, èn fu na fasi fa na kristen papa ofu mama e du en rol leki leriman. Wan pisi fu na tumsi prenspari kweki disi de taki den papa nanga mama e gi na bun eksempre. Odo 22:6 e tyari na afersi kon bun na fesi: „Kweki wan boi akruderi na pasi fu en; awinsi a kon owru, a no sa drifi komoto fu dati.” Nanga wan bun kweki èn wan tumsi bun eksempre fu a papa nanga mama dan pikin gewoonlek no sa drifi komoto fu na yoisti pasi. Ma furu anga te yu luku en bun fu na kwaliteit èn na marki fu kweki èn ooktu fu na ati fu na pikin.
16. Sortu eksempre fu na kweki fu pikin wi abi ini na geval fu Timóteus?
16 Bigin fu kweki yu pikin na yeyefasi te den de bun yongu ete. Dati ben psa nanga Timóteus bika Paulus ben gi en tranga: „Tan na ini den sani di yu ben leri èn di yu ben go bribi na ini den nanga overtoigi, fudi yu sabi fu sortu sma yu ben leri den èn taki fu pikinnengre ten kaba yu ben sabi den Santa Buku di kan meki yu kon koni fu kisi ferlusu nanga yepi fu na bribi di e go fu Kristus Yesus” (2 Timóteus 3:14, 15). Iya, Timóteus ’ben bribi nanga overtoigi’ ini den bijbel waarheid. Dyaso den gebroiki wan Griki wortu di wani taki „nanga seikerfasi kisi overtoigi; ben kisi na dyaranti fu wan sani” (New Thayer’s Greek English Lexicon, blz. 514). Dati ’nanga seikerfasi fu overtoigi’ ben aksi furu muiti fu na sei fu Timóteus kristenmama, Eunice, èn granmama Lois. Den ben man fu tyari kon tapu Timóteus wan ’bribi sondro hoigrifasi’, aladi en papa leki fa e kon na krin ben de wan sma di no ben de ini bribi (2 Timóteus 1:5). Yu e wroko na en fu meki net sowan bribi gro na ini yu pikin?
17. Sortu buweisi de taki srefi bun yongu pikin kan kisi leri kaba?
17 Timóteus ben kisi leri fu na bijbel fu sensi pikinnengreten. No onderschat fu dat’ede noiti na leri di wan pikin man fu leri sani. Soleki The New York Times e ferteri, dan wán ondrosuku ben sori taki „tutron someni synaptische verbinding — presi pe vertakking fu zenuwcel e kon makandra leki wan ben — ini bepaalde kontren fu na edetonton fu pikin de leki ini di fu bigi sma”. Srefi bun yongu pikin kan leri wan sani fu san bun èn san ogri fu san switi ofu san e gi pen. Na ini en buku The Brain wan datra e taki, Richard M. Restak: „Na ala vorm fu libi sani kan poti go ini a memre na ini den edetonton akruderi a prenspari fasi fu den fu tan a libi. Wan meti e memre na ogrimeti di e luru en èn e lon gwe na a fosi marki fu a kon fu en feiyanti. Memre fu sani ooktu e skrifi poti nanga tai na dati na tranga fu emotioneel ondrofeni. Leki pikin soso wantron den a fu ferteri wi no fu poti wi pikin anu tapu wan faya kropatu.” A no de fu taki taki libisma mu kon sabi furu ete fu a wroko fu den edetonton, ma wan pikin kan leri nanga ondrofeni. Na so wan pikin fu eksempre kan leri bun yongu kaba fu sidon tiri tapu kristen komakandra.
18. Sortu rai Paulus ben gi na ini Efesesma 6:1 na pikinnengre nanga papa nanga mama?
18 Omoro pikin e kon owru, dan tapu wan progressieffasi den kan teki na ini den yeye leri. Wan fu den sani kan de taki den e leri taki Gado e fruwakti fu den taki den mu gi den papa nanga mama yesi. Fu disi wan lobi kweki nanga faste bosroiti fu na sei fu papa nanga mama de fanowdu, bikasi Paulus ben skrifi: „Unu pikin, unu mu giyesi na papa nanga mama na ini wanfasi nanga Masra, bika disi de regtvaardiki: ’Gi grani na yu papa nanga mama’, san de na fosi gebod nanga wan pramisi: ’Sodati a kan go yu bun èn yu mag tan libi langa na grontapu.’ Èn unu, un papa no tergi unu pikin, ma tan kweki den na ini na trangaleri èn na seryusu fermane fu Yehovah” (Efesesma 6:1-4). Pikin di e giyesi e meki taki wan oso de wan presi fu rostu nanga vrede
19. San kan tranga na banti a mindri papa, mama nanga pikin?
19 Ma san kan tranga na banti a mindri papa, mama nanga pikin? Fu leisi makandra na bijbel nanga kristen lektuur seiker kan du furu. Furu publikatie leki Mi buku nanga bijbeltori èn Arki na a bigi Leriman de bun fu yepi pikinnengre. Poti na a ten fu a leisi fu na bijbel èn na den tra okasi krakti tapu na lobi fu Gado. Taki na a ten fu nyanyan sani fu prijse Yehovah leki na Bigi Sorguman. Efu yu e o na reis nanga yu pikin, skrifi dan den wondru fu na mekisani fu Gado — bon, bromki, bergi, liba, meren nanga meti. Te yu de na ini na vleddienst, teki dan den okasi fu taki dan fu na lobi fu Gado. Yepi yu pikin aladei fu gro ini lobi gi Yehovah leki wan sma. A no de fu taki taki efu yu wani doro na ati fu yu pikin, yu mu furu yu eigi ati nanga sowan sortu lobi. — Deuteronomium 6:4-7.
20. O prenspari yoisti trangaleri de?
20 No frigiti noiti taki trangaleri de wan sani di wi abi fanowdu. Te disi e gi tapu yoisti fasi, ’dan a e tyari wan froktu fu vrede kon, dati wani taki regtvaardikifasi’ (Hebrewsma 12:11). Èn pikinnengre di e gebroiki den ferstan fu saka densrefi na ondro na tranga leri fu den papa nanga mama, sa gi na osofamiri prisiri annga grani èn hori na bun nen fu en hei (Odo 10:1; 13:1; 23:24, 25). Iya, te papa, mama nanga pikin e du den rol di den kisi fu na bijbel dan den e meki na oso fu den tron wan presi fu rostu èn vrede.
Tan hori wan oso fu rostu nanga vrede
21. Fa wan sma leki fa Odo 24:3, 4 e taki kan sorgu taki wan oso tan wan presi fu rostu nanga vrede?
21 Fa wan sma kan sorgu taki na oso tan wan presi fu rostu nanga vrede? Wan odo e taki: „Nanga yepi fu koni wan osofamiri sa bow, èn nanga a koni fu si sani a sa sori taki a poti sidon steifi. Èn nanga yepi fu sabi den inisei kamra sa kon furu nanga ala sortu diri èn switi sani fu waarde” (Odo 24:3, 4). Nanga yepi fu na sabi èn na wroko fu wan oso di abi faya, wan oso kan kon furu nanga moi sani na skinfasi. Wan osofamiri kan bow soso èn poti sidon tapu wan steifi fondamenti te den memre fu en e sori a koni fu si sani èn e gebroiki na koni fu Gado èn e poti tapu dati yoisti fasi sabi fu na bijbel ini den libi. Iya, koni e bow wan osofamiri, èn e meki taki a wroko tapu wan bunfasi.
22. San na gebroiki fu den voorschrift fu Gado sa tyari kon leki bakapisi?
22 Poti den voorschrift fu Gado na ini wan osofamiri, sa tyari vrede kon bika den Israëlsma kisi fu yere: „Mi, Yehovah, na yu Gado, di e leri yu fu kisi wini gi yusrefi, di e meki yu go tapu na pasi di yu mu waka. Ow! efu trutru yu ben sa poti prakseri nomo tapu mi gebod! Dan yu vrede ben kan tron net soleki wan liba, èn yu regtvaardikifasi leki den skwala fu na se” (Yes. 48:17, 18). Meki fu dat’ede ala man, uma nanga pikin di e lobi fu dini Gado poti hemel koni na ini den libi. Dan wi oso fu alaten sa de wan presi fu rsotu nanga vrede.
Yu kan memre disi?
◻ A mindri san wan kristen di no trow ete mu teki te a e prakseri fu go na ini wan trowlibi fu kisi wan osofamiri fu vrede?
◻ San man nanga uma leki fa Efesesma 5:21-33 e taki mu du fu tyari vrede kon na ini na osofamiri?
◻ Fa a poti na ini wi libi fu na rai na ini Efesesma 4:26, 27 kan meki na oso tron wan presi fu rostu annga vrede?
◻ Tapu sortu fasi yongusma kan meki osofamiri vrede du kon?
◻ Fa wi kan sorgu taki wi oso tan wan presi fu rostu nanga vrede?
[Prenki na tapu bladzijde 3]
Kristen man nanga uma mu handri tapu fasi di e meki lobi nanga respeki go na fesi
[Prenki na tapu bladzijde 4]
Den ben leri Timoteus fu sensi den yongu yari den waarheid fu Gado. Yu e yepi yu pikin fu gro ini sabi èn lobi fu Yehovah?