Te na vrede fu na trowlibi e kon ini kefar
’Wan uma no mu gwe libi en man; . . . èn wan man no mu gwe libi en uma.’ — 1 KORINTESMA 7:10, 11.
1. San ben de a prakseri fu Yehovah ini a tori fu na trowlibi?
YEHOVAH GADO ben trow na fosi libismapaar èn a ben de en prakseri taki wan kaba no ben sa kon na a ’wán-skin’-kruderi disi. A ben mu de wan blesi kruderi di ben sa abi leki bakapisi a koloku fu den èn a meki fu regtvaardiki pikin èn ala disi leki wan grani gi Gado. — Genesis 1:27, 28; 2:24.
2. San na wan sani di e meki a broko fu trowbanti kon?
2 Wan srefidensi denki èn sondu ben trobi na bun seti disi fu a trowlibi (Genesis 3:1-19; Romeini 5:12). Wan yeye fu srefidensi ofu onafhankelijkheid de sobun wan fu den sani di na ini a ten disi e meki a trowbanti broko. Na so na ini 1985 tapu wan dusun sma 5 broko trow ben de — èn disi ben tanapu na abrasei fu 10.2 trow di ben waka. Na ini 1986 wi ben kan si fu wan rapport ini Moskow taki soso 37% fu den trow na ini na Sovjet Unie e tan hori morolanga leki dri yari èn taki 70% e kon a wan kaba fosi tin yari.
3. (a) San kan tyari strei kon na ini wan trowlibi? (b) Suma de na ini na trowlibi na moro prenspari sma di e trobi na vrede?
3 Wan yeye fu srefidensi kan meki strei kon na ini na trowlibi. Ooktu na yeye gro e go na baka, bika ’na tiri fu na froktu fu regtvaardikifasi e sai a mindri vredig omstandigheid’ (Yakobus 3:18). Ma suma na a moro prenspari sma di e trobi na vrede? Satan. Èn fa a de wan sari sani efu dienstknegti fu Gado ’e gi pasi na Satan’ èn na sofasi no kan nyan bun fu wan oso pe rostu nanga vrede de! — Efesesma 4:26, 27.
4. Te kristen patna abi seryusu problema, san den mu frustan èn san den mu du?
4 Te kristen trowpatna e si a gwe libi fu makandra leki na wan enkri lusu fu den trowproblema fu den, dan den de ini na kefar fu den triki fu Didibri, èn na yeyefasi wan seryusu fowtu de (2 Korintesma 2:11). Wan fu den ofu ala tu no e poti den gronprakseri fu Gado krinkrin ini den libi (Odo 3:16). Sobun wantewante ini begi den mu span den srefi fu lusu den difrenti di den abi ini prakseri. Efu den disi gersi taki pardon no kan gi, dan owruman fu na gemeente kan kari kon (Mattéus 18:15-17). Aladi den man disi no abi na makti fu ferteri den kompe bribiman fu den soifri san den mu du na den trowproblema fu den, toku den kan poti na prakseri tapu san na bijbel e taki. — Galaciasma 6:5.
5. Tapu sortu gron wan brokotrow nanga na mogelijkheid fu trow baka nanga wan tra sma de wan sani di e kruderi nanga na bijbel?
5 Efu na situwasi na ini na trowlibi de so takru taki na kristen trowpaar e prakseri srefi fu kisi wan brokotrow na lanti, dan den owruman kan tyari kon a den prakseri dati wan sma soso tapu a gron fu a bijbel kan broko wan trow èn trow baka efu a trowpatna fu en du „hurudu”. A wortu disi abi na ini en ooktu sutadu nanga tra vorm fu sekslibi di no bun nanga doti sortu fu libi (Mattéus 19:1; Romeini 7:2, 3; Luku Na Wachttoren fu 15 yuni 1983, blz. 31, 32). Ma efu now „hurudu” no du ma na vrede fu na trowlibi seryusu de ini kefar? San na bijbel e taki fu a gwe libi fu makandra efu a de now wan prati fu tafra nanga bedi ofu gewoon fu no libi moro na makandra?
Na rai fu Paulus ondro a krakti fu santa yeye
6. (a) San na a prenspari sani fu na rai fu Paulus na ini 1 Korintesma 7:10, 11? (b) Fa kristenpatna mu lusu trowproblema?
6 Efu owruman e proberi fu gi yepi na wan kristen trowpaar di den trowbanti fu den gersi taki a o broko, dan den kan poti prakseri tapu den wortu fu na apostel Paulus: „Na den sma di trow mi e gi instructie, ma a no de mi, ma na Masra, taki wan uma no mag gwe libi en masra; ma efu trutru a ben sa gwe, dan a mu tan sondro fu trow noso meki vrede baka nanga en masra; èn wan man no mu gwe libi en uma” (1 Korinte 7:10, 11). Kristen trowpatna musu fu kan lusu den problema fu den, aladi den e hori libisma onvolmaaktifasi na prakseri. No wan enkri problema ben kan de so bigi dati a no kan lusu nanga yepi fu opregti begi, a poti fu bijbel gronprakseri ini yu libi èn na sori fu lobi di de wan froktu fu Gado yeye. — Galacia sma 5:22; 1 Korintesma 13:4-8.
7. (a) Te kristen trowpatna e gwe libi makandra san de dan na positie fu den fu a sei fu na bijbel? (b) Sortu krakti na gwe libi fu makandra fu tru kristen di trow abi tapu tra dienstgrani?
7 Ma efu kristen trowpatna now toku e gwe libi makandra? Den musu „tan sondro fu trow ofu noso meki vrede baka”. Efu a no de wan afersi fu wan brokotrow di kon tapu a gron fu „hurudu”, dan nowan fu den tu a bibel e gi fri fu trow baka. Disi èn ooktu te den hori na ini prakseri ooktu na „algemeen du di hurudu e du”, dan den ben sa du bun sondro draidrai ’fu meki vrede baka’ (1 Korintesma 7:1, 2). A no de a wroko fu den owruman fu tanapu a tapu taki a man nanga na uma meki wan kaba kon na a situwâsi fudi den e libi aparti, ma fu den trowproblema fu den ede meki kande den no e feni den bun fu den kisi bepaalde dienst grani Efu wan man fu eksempre „no sabi fu tiri en eigi osofamiri”, dan krinkrin a e sori taki a mankeri na bekwaamheid ’fu sorgu gi na gemeente leki opziener’. — 1 Timóteus 3:1-5, 12.
8. San na a mama fu na rai fu Paulus na ini 1 Korintesma 7:12-16?
8 Srefi ofu wan fu den tu de wan bribiman, dan krakti e poti a tapu na tan hori fu wan trowlibi. Paulus ben skrifi: „Efu wan brada abi wan uma ini bribi èn ete a e feni en bun fu libi na en, dan a no mu gwe libi na uma; èn te wan uma abi wan man di no de ini bribi èn ete a man e feni en bun fu libi na a uma, dan na uma no mu gwe libi na man. Efu na wan di no de ini bribi go abra fu gwe, meki a gwe; wan brada efu wan sisa ondro den sortu omstandigheid disi no de ini katibo, ma Gado ben kari unu fu abi vrede. Bika fa yu sabi, yu uma, ofu yu no sa yepi yu man? Ofu fa yu sabi yu man, ofu yu no sa yepi yu uma?” (1 Korintesma 7:12-16). Efu na wan di no de ini bribi teki na bosroit fu gwe, dan na kristen kan meki a go, ma na bribiwan di abi na howpu taki na wan di no de na ini bribi sa wini kon ini na kristendom, no sa teki fesi fu gwe libi makandra. Timóteus mama, Eunice, a de krin ben tan na en man di no ben de ini bribi ma a ben gi en manpikin leri na yeyefasi. — 2 Timóteus 1:5; 3:14, 15.
Gron fu gwe libi makandra
9, 10. (a) San te yu luku 1 Timóteus 5:8 de wan gron fu gwe libi makandra leki trowpatna? (b) San owruman di ben poti ini na gemeente musu du efu wan kristen man e kisi a fowtu taki a e weigri fu sorgu en uma nanga pikin?
9 Den wortu fu Paulus ini 1 Korintesma 7:10-16 e gi trow patna dek’ati fu tan na makandra. Toku son sma bakadi den du ala den muiti fu hori na trow matifasi, ben kon na na overtoigi taki na ini ala opregtifasi nowan tra fasi de leki fu gwe libi makandra. San kan de den gron fu sowan sortu stap?
10 Wan fu den gron fu prati de na fu espresi no e sorgu na osofamiri. Te wan trow waka, dan na trowmasra e teki na frantwortu tapu en fu sorgu ini den fanowdu fu na uma nanga den pikin di kande den sa abi. Na man di no e sorgu gi den memre fu en osofamiri, „ben drai baka gi na bribi èn de moro ogri leki wan sma di no de ini bribi” (1 Timóteus 5:8). A kan sobun fu prati efu a tori de taki fu espresi wan sma no e teki en plekti fu sorgu na osofamiri. A no de fu taki taki den owruman di ben poti na ini na gemeente sa luku bun na kragi taki wan kristen weigri fu sorgu en uma nanga en osofamiri. Te wan sma e weigri srefsrefi fu sorgu en osofamiri, dan dati kan abi leki bakapisi fu sluit en uit.
11. San na ete wan gron fu gwe libi makandra, man san ben sa kan meki na situwâsi de wan sani di de fu tyari?
11 Ete wan gron fu prati de grofu skinmishandel.Kon wi taki taki wan trowpatna di no de ini bribi nofo tron e drungu, dan e kisi atibron èn e gi na bribiman wan mankeri na en skin (Odo 23:29-35). Fudi na bribiwan e begi èn e sori na froktu fu na yeye fu Gado, kande a man fu meki dati den sortu uitbarsting disi no pasa èn meki na situwâsi de wan di a kan tyari. Ma efu a marki doro taki na gesontu èn na libi fu na trowpatna di kisi misandel trutru de ini kefar, dan akruderi a bijbel dan pasi kan gi fu prati. Ooktu na den kragi fu skin-misandel den gemeente-owruman sa ondrosuku efu a e go fu tu kristen ini wan trow di abi problema èn a kan de fanowdu fu bigin nanga wan uitsluitingprocedure. — Teki gersi nanga Galaciasma 5:19-21; 1 Timóteus 1:7.
12. (a) Fa na yeye matifasi nanga Gado di na bribiwan e prisiri na ini, kan abi fu du nanga na afersi fu gwe libi fu makandra? (b) San na a rai efu na ini wan kristen oso wan bun ongesontu yeye toestand de?
12 Te wan sma en matifasi nanga Gado absoluut e kon ini kefar, dan dati ooktu e gi wan gron fu prati. Na bribiwan na ini wan prati osofamiri na ini a fasi fu bribi mu du ala sani fu nyan bun fu den yeye sani di Gado seti. Na pasi e gi fu gwe libi makandra efu na gens fu wan trowpatna di no de ini bribi (kande srefi makandra nanga na puru fu na fri di a abi) e meki en onmogelijk gi na bribiwan fu tan du a tru anbegi èn trutru e tyari a yeye matifasi fu en (leki wan man ofu leki wan uma) kon ini kefar. Ma efu wan trutru ongesontu yeye toestand de ini wan osofamiri pe alatu patna de bribiwan? Den owruman mu gi yepi, ma spesrutu na dopu trowmasra mu du ala san a kan fu wroko fu yepi na situwâsi. Efu wan dopu trowpatna e tyari ensrefi leki wan sma di fadon komoto na bribi èn e proberi fu tapu na tra patna fu dini Yehovah, dan den owruman mu behandel na afersi ini akruderi nanga den richtlijn fu na bijbel. Efu wan uitsluting feni presi ini na geval fu trutru kefar gi wan sma yeye matifasi nanga Gado fu na espresi no gi sorgu ofu fu grofu misandel na skinfasi dan na getrow kristen di wani kisi wan brokotrow na lanti, no sa handri kontrari na rai fu Paulus di e go fu na tyari fu wan bribiwan go na fesi crutu. — 1 Korinte 6:1-8.
13. Ondro sortu omstandigheid wan prati fu trowpatna de wan reti sani?
13 Efu den omstandigheid pikinmoro no de fu kan tyari, dan a lobi gi makandra sobun kan de wan reti sani. Ma a de krin taki no wan frafra pardon mag gebroiki fu go libi aparti fu makandra. Kristensma di e prati persoonlek mu tyari na frantwortu fu na du dati èn na ferstan dati wi alamala dini mu gi frantwortu na Yehovah. — Hebrew sma 4:13.
Wan koni stap?
14. (a) Sortu problema na gwe libi fu makandra kande seiker sa tyari kon? (b) Fa na gwe libi fu makandra sa abi krakti tapu pikin?
14 Na ondro begi wan sma mu go denki fu den problema di wan prati kande seiker sa tyari kon. Fu eksempre, wan osofamiri fu wán papa ofu wán mama pikinso nomo kan gi san wan osofamiri fu tu bigisma kan gi na ini balansifasi nanga trangaleri. Èn wan gwe libi fu makandra kan abi tapu pikin net sowan krakti leki wan brokotrow, fu san na koranti India Today ben ferteri: „Sheena nanga den bigi ai fu en di a gersi taki a e teki na heri grontapu kon na ini en de wan umapikin fu siksi yari. A papa nanga mama fu en tu yari pasa kaba, broko trow nanga wan bita strei na fesi krutu. Heri esi bakadati en papa ben trow wan tra uma. Wan yari langa a ben abi seryusu astma-aanval èn a e soigi alaten tapu en bigidoin. A e libi na en mama na ini Zuid-Delhi. Na mama: ’Na sari fu mi go na tapu Sheena. . . . A e misi en papa. . . . A de moro owru leki moro furu pikin fu en libimarki. Ma a abi ten te ai krei te a no kan dwengi ensrefi, netleki komoto na inisei a wani meki wan sani komoto gwe. Skoro e gi wan problema. Pikinnengre kan de so nanga bita-ati. Nofotron a e hari ensrefi go ini wan sortu fantasi grontapu . . . a e meki wan tori fa wi alamala makandra e go a doro fu fisiti den mati fu en.’”
15. Sortu krakti a gwe libi fu makandra kan abi tapu wan kristen trowmasra ofu trowuma?
15 Nofotron na prati no e de bun gi na kristen man nanga uma. Den e kon si gawgaw taki sondro na patna ofu den pikin wan leigi e kon di e kwinsi den. Ooktu wan sma no mu luku psa na sani disi taki spanning e kon fu a gwe libi fu makandra. A sa de wan sani di kan fu hori na monisei èn na tra sei alasani fu drai go doro? Èn san dan efu a gwe libi fu makandra e de so muilek dati wan fu den tu patna e fadon go na ini hurudu? Yesus ben taki: „Na koni e kon de reti nanga en wroko” (Matteus 11:19). Spesrutu te alatu patna de kristen, dan den bakapisi fu na gwe libi fu makandra e buweisi taki sontron a de wan aparti lusu di no de wan koniwan.
Wroko na en fu lusu problema
16. San mu du fu a sei fu kristen patna e di si taki a trow vrede fu den e kon ini kefar?
16 Kristen trowpatna di e firi taki na trowlibi vrede e kon ini seryusu kefar, musu taki fu na. difrenti di den abi ini prakseri tapu wan fasi di e fiti den sma di e dini Gado. Èn seiker den mu teki onvolmaaktifasi na ini prakseri (Filipisma 2:1-4). Ma san kan du morofara?
17. Fa a sori fu koni ini a tori fu sani na skinfasi kan meki trowlibi vrede du kon?
17 Sori koni ini a tori fu afersi na skinfasi kan meki a vrede fu a trowlibi kon. Fu tyari disi kon a krin. Bakadi a ben poti prakseri na a sani disi taki na uma no e agri, dan wan man toku ben kan teki a bosroiti dati a de bun efu en osofamiri froisi. Disi kan gersi taki a bun te yu e luku den reide fu monissei, ma a ben sa kan yepi na osofamiri ooktu fu meki den Kownukondre afersi go a fesi fudi den e dini pe na fanowdu de moro bigi (Mattéus 6:33). En kristen uma kande no e firi someni fu froisi fudi a e gwe libi en papa nanga mama ofu wan birti di a gwenti. Ma a sa du bun fu wroko makandra krinkrin nanga en trowmasra, di de na ede fu na osofamiri èn di abi na frantwortu fu bepaal pe en osofamiri sa libi. Boiti fu dati na saka di a e saka ensrefi èn na lobi wroko makandra fu en sa meki na vrede fu na oso kon. — Efesesma 5:21-24.
18. Sortu okasi kristen trowpatna abi fu du sani makandra?
18 Na osofamiri sabi vrede, èn problema e gersi taki den no de so seryusu, te trowpatna e du sani makandra. Kristen trowpatna abi fu eksempre tumsi moi okasi fu wroko makandra ini na velddienst. Efu den e du disi geregeld èn e teki den pikin fu den go nanga den, dan na heri osofamiri sa nyan bun fu disi. Ooktu difrenti okasi kan sori ensrefi fu tranga na trowbanti te den e teki prati nanga makandra na tra gesontu activiteit di na wan ofu na trawan fu den spesrutu e feni moi.
19. Sortu sortu fu makti leki edeman sa meki na osofamiri vrede go na fesi?
19 Wan makti di e sori tapu yoisti fasi leki edeman sa tranga na trowbanti. A no de fu taki taki wan lepi kristen trowmasra no sa de wan diktator. Ma presi fu dati ’a sa tan lobi en uma èn no abi bita atibron nanga en’. Yehovah e fruwakti fu en dati a sa sori en makti leki edeman na tapu wan lobifasi (Kolossesma 3:18, 19). Wan makti di sori na tapu na fasi disi fu en sei e meki na osofamiri vrede go na fesi baka.
Na ini prati osofamiri
20, 21. Fa redelekheid kan sori taki a de gesontu te a vrede ini wan prati osofamiri na kerki sei de ini kefar?
20 De redelek e meki a lusu fu osofamiri problema mindri kristen patna kon (Filipisma 4:5). Ma redelekheid de ooktu prenspari efu na vrede de ini kefar na ini wan prati osofamiri na ini fasi fu bribi. Efu wan trowmasra di no de ini bribi e wani tapu en uma fu dini Yehovah, dan na uma kan proberi fu tak-go-tak-kon nanga en, tapu wan tactvolfasi a kan sori taki a e libi en na ini na fasi fu dini Gado fri èn dati en leki uma na wan logisfasi mu kisi asrefi behandeling (Mattéus 7:12). Aladi a de na ondro wan relatieve onderworpenheid ondro en masra di no de ini bribi, toku a wani fu Gado mu du efu ai go fu sani di e tyari trobi kon (1 Korintesma 11:3; Tori fu den Apostel 5:28). Fu go dritron ini wan wiki na kristen komakandra trutru no de tumsi furu. Ma na bribi uma kande sa si taki a de wan konifasi fu tan tra neti na oso èn du furu fu en velddienst ini den yuru di en man de na wroko èn te den pikin de na skoro. Nanga redelekheid èn wan bun seti fu sani a no a fu ’tapu fu du san de tumsi bun’. — Galaciasma 6:9.
21 Redelekheid e sori ensrefi ooktu na tra afersi. Na so wan sma abi na reti fu de ini wan bepaalde fasi fu dini Gado. Ma a ben sa de redelek èn wan koni sani efu wan kristen uma no sa libi en bijbel nanga bijbelstudie yepisani drape pe wan trow masra di de wan tranga gensman, no wani si en srefsrefi. Wan situwâsi fu strei kan komoto a pasi efu a libi den sortu buku disi na den persoonlek sani fu en èn e studeri den te a de en wawan. A no de fu taki dati a no mu skeki en srefi na ini na tori fu regtvaardiki gronprakseri. — Mattéus 10:16.
22. San ben sa kan du efu na trobi fu na osofamiri vrede moro furu abi fu du nanga a kerkileri di e gi na pikin?
22 Efu na trobi fu na ososfamiri vrede abi morofuru fu du nanga na kerkileri di e gi na den pikin, dan na bribi uma na wan tactvolfasi sa seti sani taki den pikin kan go nanga en na kommakandra èn na ini na velddienst. Ma efu na trow masra di no de ini bribi èn di de papa e tapu dati, dan a kan leri den pikin bijbelgronprakseri sodati te den gro kon bigi èn gwe libi na oso, kande seiker den sa go du na tru anbegi. Efu na man de a bribiwan, dan a abi leki edeman fu na osofamiri na bijbel ferplekti fu kweki en pikin leki kristen. A mu studeri gewoon na bijbel nanga den, teki den go na komakandra èn leri den na ini na velddienst (Efesesma 6:4). A no de fu taki dati a mu abi switifasi èn lobi èn de redelek ini na fasi fa a e behandel en uma di no de ini bribi.
Kibri na vrede leki wan osofamiri di bondru kon na wan
23. San kan de bun efu na trow vrede de ini kefar?
23 Fudi trowpatna de „wan skin”, meki den mu libi na ini vrede makandra ini akruderi nanga na seti fu Gado gi trowsma, spesrutu efu ala tu de kristen (Mattéus 19:5; 1 Korintesma 7:3-5). Ma efu na vrede ini na trowlibi ini na geval fu yu de ini kefar, luku dan na ini begi den punt fu a bijbel di wi ben luku dya a fesi. A kan de ooktu bun fu denki go baka na a ten di yu ben e freiri. Fa na a ten dati unu alatu no ben du muiti fu du san bun èn fu poti na fondamenti gi wan koloku kruderi! Yu no ben sa du now den sortu muiti disi fu hori yu trowlibi tanapu?
24. Sortu fasi kristensma mu abi ini a tori fu na trowlibi?
24 Wan kristensma di trow, abi wan tumsi moi presenti fu Gado — a trowlibi fu den! Efu yu du den trowpramisi fu yu, èn e kibri yu soifri reti fasi na fesi fu Gado, dan na regtvaardiki nyun grontapu didon na yu fesi pe den situwâsi di e prati sma ati fu gwe libi makandra èn prati no sa tergi libisma moro. Sori sobun tangi gi na trowlibi leki wan agersi „dri-dobru-titei” nanga Yehovah leki na moro prenspari pisi (Preikiman 4:12). Èn leki ala memre fu na osofamiri fu yu di bondru kon na wan nyan bun fu na blesi fu osofamiri koloku ini wan oso pe rostu nanga vrede de.
San na yu piki?
◻ Fa yu ben sa taki syatu a rai fu Paulus na ini 1 Korintesma 7:10-16?
◻ San na wan tu bun reide gi wan gwe libi fu makandra fu trowpatna?
◻ Fa kristen kan de sa lusu den problema ini na trowlibi te na trow-vrede de ini kefar?
◻ Fa redelekheid na ini wan prati osofamiri libi kan meki vrede kon?
[Prenki na tapu bladzijde 8]
Kristen trowpatna di den trow-vrede de ini kefar, mu taki makandra fu den problema fu den tapu wan fasi di e fiti den sma di e dini Yehovah