Gado ben kari yu fu abi vrede
„Ma efu na wan di no de na ini bribi go abra fu gwe, meki a gwe; wan brada ofu wan sisa ondro den sortu omstandigheid disi no de ini katibo, ma Gado ben kari unu fu abi vrede”. — 1 KORINTESMA 7:15.
1. San na a yoisti bijbel luku tapu na trowlibi?
A NO BEN DE noiti na bedoeling fu Yehovah taki na trowlibi ben prati ofu brokotrow kon di e priti na ati. A trowlibi ben musu de ’wán skin’-kruderi di ben sa de alaten, di ben sa abi leki bakapisiprisiri, rostu nanga vrede (Genesis 2:24; Ruth 1:9). Ini algemeen na bijbel e gi trowsma na rai fu tan na makandra, srefi efu wán trowpatna de wan kristen èn na trawan wan sma di no de ini bribi (1 Korintesma 7:12-16). Boiti fu dati wan sma sa mu gi frantwortu na Gado, di ’no wani si brokotrow na ai’ fu den ontrow du di e tyari wan broko fu den trowbanti. — Malaeachi 2:13-16.
2. Fa kristensma e si a gwe libi fu makandra èn a brokotrow?
2 Libisma onvolmaaktifasi èn tra sani sontron ben tyari srefi a mindri dopu dienstknegti fu Gado wan prati ofu brokotrow kon. Fu na bigi respeki di kristensma abi gi na trowlibi, dan den stap disi gewoonlek pas wan sma e teki baka ala muiti di du fu hori na trow tanapu. Ini disi Gado srefi ben gi wan tumsi moi eksempre. Leki „trowmasra eiginari” fu na owru Israël a ben ferdrage someni yarhondro na trang-ede-fasi, oprurufasi èn yeye sutadu fu na sei fu en pipel (Yesaya 54:1-5; Yeremia 3:14-17; Hosea 1:10, 11; 3:1-5). Pas bakadi den ben go tumsi fara fu ben kan wini den kon baka, Yehovah ben trowe den leki nâsi. — Mattéus 23:37, 38.
3. (a) Fu sortu bijbel reide di e gi pasi wan kristen ben sa kan gwe libi wan trowpatna? (b) Ondro sortu omstandigheid wan bijbel brokotrow de mogelek?
3 Sontron kompe bribiman e go na gemeente-owruman di e aksi den yepi ini seryusu trowmuilekheid. Den owruman no kisi na makti fu ferteri wan sma taki en leki wan man ofu leki wan uma mu gwe libi en trowpatna ofu fu broko a trow nanga na trowpatna, ma en kan sori tapu san na Wortu fu Gado e taki fu den afersi disi. Soleki ben sori na ini na tra artikel dan a gwe libi fu makandra na wan sani di kan leki fa a bijbel sori ini wan geval fu espresi no du na plekti fu sorgu na osofamiri, grofu skin misandeling ofu wan trutru kefar fu na yeye matifasi nanga Gado. Ooktu wi ben si taki wan brokotrow na lanti nanga na fri fu trow ini a ten di e kon nanga wan tra sma kan fu a sei fu na bijbel te wan patna ben du „hurudu”, san wani taki difrenti vorm fu seks libi di no de yoisti (Mattéus 19:9). A no de fu taki taki a no a fu de wan afersi di kaba krinkrin taki a bosroiti e teki fu prati fu makandra fudi a kan de mogelek fu meki na trow libi vrede kon bun baka, èn srefi sutadu ofu tra vorm fu hurudu kan kisi pardon fu na sei fu wan trow patna di no du fowtu. — Mattéus 5:31, 32; teki gersi nanga Hosea 3:1-3.
4. (a) Taki syatu san Paulus ben taigi trow kristen na ini 1 Korintesma 7:10-16. (b) Oten wi kan taki: „Gado ben kari unu fu abi vrede”?
4 Soleki wi ben si na ini na artikel dya na fesi, dan apostel Paulus ben gi trow kristen na tranga fu no gwe libi den patna (1 Korintesma 7:10-16). Efu wan trowpatna di no de ini bribi teki na bosroiti fu tan na en kristen trowpatna, dan yu e si ini den wortu fu Paulus taki na bribiwan mu proberi fu yepi en na yeyesei (1 Petrus 3:1-4). A bekering fu en ben sa du furu fu meki na oso tron wan presi fu rostu nanga vrede. Ma efu na sma di no de ini bribi abi someni sani teige na bribi fu en patna di de ina bribi taki a e teki na bosroiti fu gwe dan na kristen kan du wan sani? Efu na bribiwan ben sa proberi fu dwengi na man ofu na uma fu tan toku, dan na wan di no de ini bribi ben sa kan meki na situwâsi de sowan sani di no switi taki na kristen kan lasi krinkrin en vrede. Ini a belang fu na vrede na bribiwan sobun kan meki na wan di no de ini bribi gwe (Mattéus 5:9). Soso te wan trowpatna di no de ini bribi e gwe, yu kan taki: „Gado ben kari yu fu abi vrede.” Den wortu disi no nanga leti kan gebroiki fu regtvaardiki na gwe libi makandra fu tu kristen trowpatna tapu gron di no e akruderi nanga na bijbel èn di no de prenspari.
5. Sortu aksi e ferdini now na prakseri fu wi?
5 Na ibri geval fu gwe libi makandra èn na ibri brokotrow dan tra sani de ini na tori, èn no wan „formule” e tapu ibri geval. Ma sortu problema wan kristen di prati ofu di de ini wan brokotrow, kan kon tanapu na en fesi? San kan du na a tori? Fa trawan kan yepi?
Emotioneel ofu seksueel fanowdu
6. Gwe libi makandra ofu brokotrow e lusu ala problema?
6 Wan prati fu makandra ofu wan brokotrow di a bijbel e gi pasi fu en sa lusu wantu problema. Ma te yu e luku en bun, dan den sortu stap disi e meki taki wan sma e kenki a wan lo problema gi wan tra grupu problema. Na so wan kristen uma di ben abi wan broko trow na lanti ben taki: „Mi mu taki dati mi de Yehovah grantangi srefsrefi taki mi abi now vrede.” Ma a ben piki taki: „Ma a no wan makriki sani fu tanapu yu wawan leki mama na fesi a kweki fu pikin. Èn sontron yu kan firi srefi leki yu de yu wawan èn e firi broko saka. Srefi na sekssei a no de makriki. Yu mu fiti yusrefi na wan krinkrin tra libi.”a
7. Fu san-ede wan kristen mu luku soifri sortu bakapisi gwe libi makandra ofu brokotrow tyari kon?
7 Efu wan kristen abi fu teki a mindri sani na ini na afersi, dan a mu go denki fu dat’ede bun fu den bakapisi di kan kon fu wan prati ofu fu wan brokotrow. Luku fu eksempre den emotioneel fanowdu, kande na lostu di wan uma abi fu de ini na kompani fu wan man (Teki gersi Genesis 3:16). Wan uma di prati e fruwakti kande taki a sa trow baka. Sonwan e lostu fu kon fri fu wan trow di de leki wan tesi, ma den de klarklari fu teki taki kande a no de mogelek fu trow baka?
8. (a) Na sortu sani na ini begi kristen trowpatna di e gwe libi makandra mu denki, te den luku 1 Korinte 7:11? (b) Sortu fanowdu den no mu luku leki wan soso sani te wan sma e denki gu gwe libi makandra ofu wan brokotrow?
8 Paulus ben skrifi: „Efu na uma trutru gwe, meki a tan dan sondro fu trow ofu noso meki vrede baka nanga en man” (1 Korintesma 7:11). Nanga wantu muiti kan de a de mogelek taki wan uma kan meki vrede baka nanga en man. Efu kristen trowpatna gwe libi makandra, dan na wan seryusufasi èn na ini begi den mu go denki fu meki en bun baka. Boiti fu dati den no mag poti a sani disi na wan sei taki seksfiri kan de wan kefar. Fa Gado kande seiker ben sa si en efu den libi en na wan sei fu kon bun baka èn dati disi ben sa abi leki bakapisi taki wan fu den fadon go ini hurudu? Na kefar disi e kon a krin ini na ondrofeni-tori fu wan seiker dopu uma. Baka wan brokotrow a ben bigin go a doro nanga wan grontapu man, heri’esi kaba a ben kisi bere èn a ben sluituit. Aladi bakaten a ben teki baka kon ini na gemeente, toku na odrofeni fu en e poti krakti a tapu o fanowdu a de fu de voorsigtig èn na ini begi bow tapu Yehovah fu tan farawe ’fu sondu teige Gado’ (Genesis 39:7-12). A de ooktu krin taki wan sma no mu luku emotioneel nanga seksfanowdu trutru leki wan sani dz no de noti te wan sraa e wegi go-kon wan prati fu makandra ofu wan brokotrow.
Na firi taki yu de yu wawan kan kon lekti
9. Fa wi ben sa kan jepi kristen di e libi aparti ofu di trow broko fu kan feti nanga a firi fu de den wawan?
9 Efu a gwe libi makandra ofu brokotrow de wan sani di yu no kan tapu, dan den problema di e kon fu dati wan sma mu teki. Na firi taki yu de yu wawan fu eskempre de wan seryusu problema gi son kristen di gwe libi den trowpatna fu di trow broko na lanti. San tra sma kan du na dati? We gemeente-owruman nanga tra sma kan sori yeye belangstelling gi den sortu sma disi èn feti a baka fu gi den dek’ati. (Teki gersi 1 Thessalonikasma 5:14.) Wan fu den sani kande fu eksempre fu kari den sma disi nanga den pikin fu den wawantron kon na wi oso fu nyan wan eenvoudig nyanyan èn fu abi takmakandra di e bow makandra nanga wi osofamiri. A no de fanowdu fu meki wan fesanyanyan bika „moro bun wan skotriki gruntu nanga lobi de leki wan fatu burkaw di kisi nyanyan na a pen èn ogri-ati de drape” (Odo 15:17). Tapu sowan neti fu eksempre ondrofenitori kan ferteri di wi ben abi na ini na diniwroko ofu leki wan grupu kan sreka wisrefi gi wan kristen komakandra.
10, 11. (a) Na sortu tra fasi wan kristen ben sa kan kisi yepi di no e libi na a patna moro of di trow broko? (b) Sortu reide de fu de vorsigtig?
10 Teki a papa ofu mama di trow broko ofu di prati go nanga en pikin makandra nanga yu osofamiri na ini na diniwroko kan yepi ooktu fu kakafutu gi firi fu de den wawan. A no de fu taki dati tra wan no kan teki a presi fu na papa ofu mama di no de moro, ma wan kristen uma di ben prati ben taki: „Den muilekheid fu kweki yu pikin sondro dati wan man de na ini oso, kenki srefsrefi nanga na yepi fu owruman nanga dinari ini na gemeente di ben proberi fu furu na mankeri tapu praktis fasi.”
11 Ma reide de fu de voorzigtig. Wan sisa ben piki: „Fudi mi manpikin de wan boi sondro papa, dan wan brada ben sori switifasi so dati a ben sori belangstelling gi en. . . . Mi ben go si a switifasi èn lobi fu gi sani di a ben abigi mi manpikin èn fowtu lostu ben bigin gro na mi. A ben de netleki David di ben kweki wan fowtu lostu gi wan sani di no ben de fu en” (2 Samuël 11:1-4). Aladi nowan seks hurudu ben feni presi, toku na uma disi ben syen gi den prakseri fu en èn den du fu en fu wani freiri, ben suku a pardon fu Yehovah èn ben broko na demakandra nanga na brada. O bun disi e sori na fanowdu fu trowe fowtu lostu èn fu ’tan farawe fu ibri skijn fu ogri’! — 1 Thessalonikasma 5:22, The New American Bible; Galaciasma 5:24.
12. Nanga sortu positief sani wan sma ben kan lekti na firi leki a de en wawan?
12 A firi taki wan sma de en wawan kan kon lekti te yu e du sani gi trasma. „Efu yu e poti yusrefi a tapu fu suku fu de nanga trasma èn fu yepi tra sma, dan presi no de fu kragi yusrefi èn fu firi yusrefi taki yu de yu wawan”, wan sisa di en trowbanti ben broko ben taki. Na ’suku fu de nanga trawan’ efu wan sma trow broko na lanti ofu e libi aparti, sa wani taki dati wan sma e kari wan osofamiri kon na en oso a wan neti fu abi wan demakandra na yeyefasi di e bow en. Efu fu moni reide ede disi pikinso kande de mogelek dan yu ooktu ben sa kan go fisiti sikiman èn trawan èn gi den dek’ati. Kande yu man ooktu fu yepi owru sma nanga boskopu ofu difrenti tra wroko. Gi fu yusrefi tapu den sortu fasi disi èn dan yu sa man si te so moro buweisi taki ’a de moro koloku fu gi leki fu kisi sani.’ — Tori fu den Apostel 20:35.
13. San na ete wan yepi fu feti nanga na firi fu yu de yu wawan?
13 Wan tra yepisani teige a firi leki yu de yu wawan de fu teki geregeld fesi fu teki prati na a Kownukondrepreikiwroko nanga kompe bribiman. „Sontron mi e firi misrefi trutru leki mi de mi wawan èn mi e angri fu wan trowmasra,” wan sisa ben piki, „ma nanga moro velddienstactiviteit èn na nyun fri fu de makandra nanga den brada nanga sisa, dan den pisten disi bun furu kon de pikinso èn syatu.” Wan geregeld oso-fu-oso kotoigi kan meki gobaka èn osobijbelstudie kon nanga sma di abi belangstelling di wantu fu den kande ben sa kan tron dienstknegti fu Yehovah di gi densrefi abra. A no de fu taki dati na seti èn na firi fu de yu wawan no de a reide fu san-ede wi mu teki prati na a diniwroko, ma a kan de wan bakapisi fu na prisiri èn blesi activiteit disi. — Odo 10:22.
14. Sortu activiteit ben sa mu abi wan bun krakti tapu kristensma di e libi aparti ofu di trow broko?
14 Alasma di de wan pisi fu Yehovah pipel, kan nyan bun a yeyefasi fu en efu yu abi wan prati na a diniwroko, e teki prati na kristen komakandra èn ’e suku fosi na Kownukondre’ (Mattéus 6:33). Fudi den bun activiteit disi abi wan tumsi bun krakti tapu Yehovah dienstknegt ini algemeen, dan den sortu bezigheid disi kan bow kristen ooktu di gwe libi den trowpatna ofu di trow broko. A de tru, den activiteit disi no sa lusu ala den problema fu den, ma seiker den musu meki na heri luku fu den tapu na situwâsi kon positief.
Begi e prei wan prenspari rol
15. Sortu rol begi kan prei na ini na libi fu wan sma di mu fiti ensrefi nyun baka na a de wawan fu ensrefi?
15 Wan kristen sisa di ben mu fiti ensrefi baka fu de en wawan ben kisi yepi fu „tan de druk bezig na ini na velddienst . . . èn fu go luku den siki èn owru èn inactief brada nanga sisa”. Ma a e taki morofara: „Alatron te mi e firi leki mi de mi wawan, mi e go tyari fisiti èn mi e begi fu krakti nanga a frustan taki Satan de actief srefsrefi.” Iya, opregti begi de prenspari fu kibri wi soifri reti fasi na fesi fu Gado. Den begi fu kristensma di trow broko na lanti ofu di e libi aparti den wawan kan de fu eksempre begi fu kisi Yehovah yeye èn en froktu fu dwengi yusrefi fu kan dwengi seksfiri (Lukas 11:13; Galaciasma 5:22, 23; Kolossesma 3:5, 6). Èn fudi a teki fu bosroiti di fosten wan trowmasra ben mu teki, kan tyari problema gi son uma ini na situwâsi fu den di kenki now, meki kande en sa mu begi ooktu fu na yepi fu Gado fu teki koni brosroiti èn fu kakafutu gi difrenti tesi. — Yakobus 1:2-8.
16. San wi kan taki ini a tori fu gwe libi makandra ofu brokotow fu firi leki yu fowtu?
16 Firi leki yu fowtu kan de ooktu wan tesi. Wan kristen ben piki: „Den firi fu fowtu di yu e kisi ini a ten fu wan brokotrow awinsi yu no de a partij di abi fowtu kan de tumsi bigi.” A no de futaki taki firi leki yu fowtu de wan sani di yu kan frustan fu a prati fu makandra ofu na brokotrow kon fu wan weigri di no de nanga reti fu du na trowprekti (1 Korintesma 7:3-5). Ma efu na gwe libi fu makandra ofu na brokotrow ben feni presi fu wan bijbel reide ede èn baka a wegi fu sani go-kon na ini begi, dan a ben sa de yoisti fu begi fu a yepi fu Yehovah fu wini flri leki yu fowtu di no abi gron. Wi mu mu taki kande dyaso morofara taki gemeente-owruman mu luku bun taki den gi rai di abi den fondamenti tapu na bijbel èn no mu moi na rai fu den na sowan fasi taki wan kristen e go firi leki a abi fowtu efu a meki wan gwe libi fu makandra ofu broko trow di bijbel e gi pasi go doro ofu agri nanga dati.
Ini na kibri fu na „vrede fu Gado”
17. San kan yepi ala kristen fu de koloku nanga stabiel na ini na muilek grontapu disi?
17 Kristen di e libi aparti ofu di trow broko nofotron abi spesrutu problem. Ma te na wan seiker marki a de so ooktu taki „densrefi sani ini na vorm fu pina e feni presi na a heri gemeenskap fu wi brada na ini na grontapu” (1 Petrus 5:6-11). Ferfolgu fu eksempre e miti alasma di e dini Yehovah, èn morofuru kristen abi fu du nanga moni problema, gesontu-problema, fruwakti di no kontru, kori, nanga so morofara. Netleki tra Kotoigi fu Yehovah na so na kristen di e libi aparti ofu di trow broko fu dat’ede mu tan fu sorgu yeye fanowdu fudi a e tan abi bijbelstudie, e go geregeld na komakandra, e teki prati na activiteit ini a diniwroko, wan libi fu santa dienst èn begi alaten doro doro sodati a kan de krosbei fu Yehovah (Mattéus 5:3). Efu a sori mi-no-ke-fasi na ini disi, dan na yeyefasi fu ibri kristen ben sa kon ini kefar, aladi ’a sa suku fosi fu na Kownukondre’ kan gi wan aparti marki fu koloku nanga stabiliteit na ibri loyaal Kotoigi fu Yehovah na ini na muilek grontapu disi.
18. Sortu aksi èn san e ferdini seryusu prakseri fu na sei fu kristen trowpatna di e libi aparti?
18 Na yeye stabiliteit fu wi e anga fu na marki pe wi persoonlek e poti na wortu fu Gado na ini wi libi. Efu yu leki wan kristen e libi aparti fu wan trowpatna di ooktu ben gi ensrefi abra na Gado, dan na aksi de fu dat’ede efu yu ben teki a rai fu Paulus na ini 1 Korintesma 7:10-16 na ati. Spesrutu efu na situwâsi fu libi aparti de wan pisten kaba, dan yu e du bun fu meki wan kon bun baka leki wan afersi fu opregti begi. Yu ben sa kan aksi yusrefi ooktu: „San Yehovan e fruwakti fu mi leki wan trowsma? Kristen trowpatna no mu tari den libi kon ini akruderi nanga den vereiste fu Gado di de fu den di go ini wan trowkruderi? A kan de dati wi no e ondrofeni Yehovah blesi fudi wi misi fu du wi trowpramisi? Prakseri toku omeni bun ben sa kan kon efu yu taki ini sakafasi na afersi, ben sa begi opregti èn ben sa wroko fayafaya fu poti na Wortu fu Gado ini yu libi. O bun a ben sa de efu unu tu ben sa kan lusu un trowproblema èn ben sa kan libi agen makandra ini wan oso fu rostu nanga vrede.
19. Sortu diri gudu kan kon de wan pisi fu ala dienstknegti fu Yehovah soleki Filipisma 4:6, 7 e taki?
19 Ala getrow dienstknegti fu Yehovah abi fanowdu fu wan sani di de diri èn fu nyan bun fu en — na vrede fu Gado, di e pasa ala prakseri”. Leki kristen wi kan abi na hei warderi vrede disi efu wi poti prakseri tapu den wortu fu Paulus: „No broko ede fu noti, ma meki na ini ala sani nanga yepi fu begi nanga tranga begi makandra nanga taki tangi den tranga begi fu yu kon de bekenti na Gado èn na vrede fu Gado di e pasa ala prakseri sa kibri yu ati èn yu yeye vermogen nanga yepi fu Kristus Yesus.” — Filipisma 4:6, 7.
20. (a) San na a „vrede fu Gado”? (b) San wi alamala mu du, leki sma di de den wawan sondro fu trow ofu di de ini sortu trowfasi ooktu?
20 Na vrede dati de wan rostu nanga bedarifasi di Gado e gi, srefi na ondro den moro muilek omstandigheid. A e kon fu wan moro krosbei matifasi nanga Gado èn fu a sabi taki wi e du san prisiri na ini en ai. Den sma di abi na „vrede fu Gado” e meki na yeye fu en pusu den èn broko ede nanga skreki no e basi den. Fu san-ede? Fudi den sabi dati noti no kan pasa nanga den sondro taki Gado gi pasi fu dati (Efesesma 4:30; teki gersi nanga Tori fu den Apostel 11:26). Ofu wi de now wi wawan sondro fu trow ofu taki wi trow, fu gwe fu wi patna ofu fu taki wi trow broko, meki wi lobi na „vrede fu Gado”. Èn meki wi abi nasrefi fertrow leki David di ben ferklari: „Na ini vrede mi wani kanti didon èn ook sribi, bika yu, Yah, yu wawan, o Yehovah e meki mi libi na ini seikerfasi.” — Psalm 4:8.
[Futuwortu]
a Fu wan takmakandra fu wàn-bigi-sma-osofamiri luku Na Wachttoren fu 15 december 1980, blz. 14-27.
San yu ben sa piki?
◻ Ondro sortu omstandigheid wi ben kan taki: „Gado ben kari unu fu abi vrede”?
◻ Fa a firi taki wan sma de en wawan kan kon lekti?
◻ Sortu rol begi mu prei ini na libi fu wan kristen di e libi aparti ofu di trow broko?
◻ San yu ben kan taki de „na vrede fu Gado” di e kibri na ati fu sma di no trow, sma di trow, sma di e libi aparti ofu di trow broko?
[Prenki na tapu bladzijde 13]
Begi kan gi ala getrow kristen na vrede fu Gado di sa kibri en ati nanga yeye vermogen