Yesus libi nanga diniwroko

Na tori fu wan lasi manpikin

DEN Fariseiman ben suku fowtu na Yesus bika a ben lolo nanga takru barinen sondari, èn leki wan piki a ben fruteri dyonsrode tu agersitori fu na feni baka fu wan lasi skapu èn fu wan lasi moni fu wan drakmo. Moro fara a e fruteri agen wan agersi tori, na tron disi fu wan lobi tata èn na fasi fa a e de nanga en tu manpikin, di ala tu e misi na seryusu fasi.

Fosi Yesus e fruteri fu na moro yongu manpikin, na moro prenspari sma ini na agersi tori. A e aksi a pisi fu en gudu, di a e kisi wantewante fu en papa. Dan a e gwe libi na oso èn e bigin wan tumsi takru hurudu libi. Ma arki na tori fu Yesus èn luku efu yu kan si suma den sma e prenki.

„Wan seiker sma”, na so Yesus e bigin, „ben abi tu manpikin. Èn na moro jonguwan fu den ben taigi en papa: ’Papa, gi mi na pisi fu na gudu di mi mu kisi.’ Èn na [papa] ben prati en sani fu tan a libi mindri den.” San na moro yongu manpikin disi o du nanga san a e kisi?

„Bakaten,” so Yesus e tyari kon a krin, „no furu dei a baka na moro yongu manpikin e paki ala lai kon makandra èn e hari go na tra kondre, na wan farawe kondre, èn drape a e pori en gudu fu di a e libi wan lusu fasi fu libi.” Te yu luku en bun a e pori en moni fu di a e de nanga huru-uma. Dan muilek ten e doro, so leki Yesus e fruteri moro fara:

„Di a ben nyan ala sani, wan hebi angriten ben kon tapu na heri kondre dati, èn a ben bigin pina. A ben go yuru en srefi na wan fu den borgru fu na kondre dati èn a sma dati ben seni en go na en gron fu luku agu. Èn furutron a ben angri fu nyan den redi bonki di den agu ben nyan, èn no wan sma ben gi en wan sani.”

Fa disi ben de wan lagi sani fu go luku agu, fu di den meti disi leki fa a Wèt ben taki no ben de krin meti! Ma san ben tergi na manpikin moro ete, ben de en angribere, di ben tyari en go srefi so fara fu wani na nyanyan di ben gi na den agu. Fu na kefarlek rampu disi ede, na so Yesus ben taki, ’a ben kisi en srefi’.

Moro fara Yesus tyari kon a krin: „Ne . . . a ben taki na en srefi: ’omeni wrokoman fu mi papa abi brede pasamarki, ala di mi de dya e dede fu angri! Mi sa opo èn hari go na mi papa èn taigi en: „Papa, mi ben sondu na heymel èn na yu. Mi no de warti moro fu den kari mi yu pikin. Meki mi leki wan fu yu wrokoman.”’ A ben opo so bun èn ben go na en papa.”

Go prakseri pikinso fu san e kon now: Efu en papa na a ten di a ben gwe ben drai baka gi en èn nanga atibron ben taki nanga en, dan na manpikin kande seiker no ben sa sabi so bun san ben de fu a du. Dan kande a ben sa teki a bosroiti fu drai go baka fu pruberi fu feni na wan tra pe na ini en papakondre wroko, so taki a no ben abi fu si en papa. Ma a prakseri dati no kon na en kwetikweti. A ben wani go na oso!

Na papa na ini Yesus agersi tori e prenki krin wi lobi èn sari—ati heymel Tata, Yehovah Gado. Èn yu e frustan kande ooktu taki na lasi manpikin e prenki takru barinen sondari. Den Fariseiman di Yesus ben taki nanga den, ben suku kaba a fesi, fowtu na Yesus fu di a ben nyan yoisti nanga den sma disi.

Ma suma na moro owru manpikin e agersi? Èn fa wi kan tyari Yesus agersi tori kon na ini a di fu twenti yarihondro fu wi? Den aksi disi wi sa go luku na ini na tra uitgave fu na tijdschrift disi, pe wi o luku na kriboy pisi fu a tori fu Yesus di e go fu na lasi manpikin di den ben feni. Lukas 15:11-20, 30; Leviticus 11:7, 8.

◆ Na suma Yesus e fruteri na agersi tori disi ofu na tori disi, èn fu san-ede?

◆ Suma na a moro prenspari sma na ini na tori èn san e psa nanga en?

◆ Suma na papa èn na moro yongu manpikin e prenki?

◆ Sortu bodoi wi kan fruwakti na ini na tra uitgave fu na tijdschrift disi?