„Jehovah, wan Gado di abi sari-ati nanga boenfasi”
„Jehovah, Jehovah, wan Gado di abi sari-ati nanga boenfasi, di no e kisi atibron esi-esi èn di abi lobi boen-ati nanga waarheid pasa marki.” — EXODUS 34:6.
1. (a) Sortoe trowstoe bijbel e gi den wan di si fa lobiwan gowe libi a troe anbegi? (b) Fa Jehovah e si den wan di e meki fowtoe?
„MI OEMAPIKIN ben taigi mi taki a no wani de moro langa na ini a kresten organisâsi”, na so wan kresten papa e taki. „Foeroe dei, wiki, srefi moen baka dati, mi ben firi fa wan pen na ini mi skin, ben e moro mi. A ben moro ogri leki dede srefi.” A de troetroe wan hati sani foe si fa wan lobiwan e gowe libi a pasi foe soifri anbegi. Joe ben kisi foe doe nanga so wan sani toe? Efoe a de so, dan joe sa feni trowstoe foe sabi taki Jehovah e firi san joe e firi (Exodus 3:7; Jesaja 63:9). Ma fa En e si den sma di e meki den sortoe fowtoe dati? Bijbel e sori taki, nanga sari-ati Jehovah e gi den wan kari foe meki sani kon boen baka nanga En. A ben begi den oproeroe djoe na ini a ten foe Maleaki: „Drai kon baka na mi, èn mi sa drai go baka na oenoe.” — Maleaki 3:7.
2. Fa bijbel e sori taki sari-ati na wan prenspari eigifasi foe a sma di Jehovah de?
2 Gado ben tjari a sari-ati foe en kon na krin gi Moses na tapoe a bergi Sinai. Drape, Jehovah ben tjari ensrefi kon na krin leki „wan Gado di abi sari-ati nanga boenfasi, di no e kisi atibron esi-esi èn di abi lobi boen-ati nanga waarheid pasa marki” (Exodus 34:6). A froeklari disi e poti krakti na tapoe taki wan prenspari eigifasi foe a sma di Jehovah de, na sari-ati. A „wani taki ala sma moesoe abi berow”, na so a kresten apostel Petrus ben skrifi (2 Petrus 3:9). A no de foe taki, dati a sari-ati foe Gado no de sondro wan kaba. „[A] no sa gi fri foe strafoe kwetikweti”, Moses ben kisi foe jere (Exodus 34:7; 2 Petrus 2:9). Ma tokoe „Gado na lobi” èn sari-ati na wan bigi sani foe na eigifasi dati (1 Johanes 4:8; Jakobus 3:17). Jehovah „no sa tan de nanga atibron foe têgo”, èn „a abi prisiri na ini lobi boen-ati”. — Mika 7:18, 19.
3. Fa a fasi fa Jesus ben si sari-ati ben difrenti foe a fasi fa den leriman foe Wet nanga den Fariseiman ben si dati?
3 Jesus ben sori volmaakti fa en hemel Tata de (Johanes 5:19). A sari-ati fasi fa Jesus ben handri nanga ogri sma, no ben de foe sori taki den sondoe foe den no ogri, ma a sari-ati fasi di Jesus ben sori, ben de densrefi safoe firi di a ben sori gi den sma di ben siki na skin sei. (Teki gersi Markus 1:40, 41.) Ija, Jesus ben poti sari-ati na mindri den „moro prenspari afersi” foe Gado Wet (Mateus 23:23). Na a tra sei, loekoe den leriman foe Wet nanga den Fariseiman, di a denki foe den foe retidoe soleki a wet e taki no ben libi presi gi sari-ati. Di den ben si fa Jesus ben e handri nanga sondari, den ben kragi: „A man disi e ontfanga sondari èn e njan nanga den” (Lukas 15:1, 2). Jesus ben piki den sma di ben kragi en nanga dri eksempre di ibriwan foe den e poti krakti tapoe a sari-ati foe Gado.
4. Sortoe toe eksempre Jesus ben gi, èn san ben de a penti di a ben wani sori nanga ibriwan foe den?
4 Jesus ben froeteri fosi foe wan man di ben libi 99 skapoe na baka foe soekoe wán skapoe di ben lasi. San Jesus ben wani sori? „Moro prisiri sa de na hemel foe wán sondari di abi berow, leki foe neigitenti na neigi regtfardikiwan di no abi berow fanowdoe.” Baka dati, Jesus ben froeteri foe wan oema di ben soekoe wán drakmo moni di a ben lasi èn fa a ben prisiri di a ben feni en baka. Fa Jesus ben gebroiki na eksempre disi? „Den engel foe Gado e prisiri te wán sondari abi berow.” Jesus ben froeteri a di foe dri eksempre nanga jepi foe wan agersitori.a Foeroe sma e feni taki a tori disi na wan foe den moro moi sjatoe tori di oiti ben froeteri. Te wi e poti prakseri na tapoe na agersitori disi, dan dati sa jepi wi foe warderi a sari-ati foe Gado èn foe waka baka dati. — Lukas 15:3-10.
Wan oproeroe manpikin e gowe libi oso
5, 6. Fa a moro jongoe manpikin na ini a di foe dri eksempre foe Jesus, ben skreki sma nanga a mankeri di a ben mankeri warderi foe en sei?
5 „Wan seiker man ben abi toe manpikin. Èn a moro jongoewan foe den ben taigi en papa: ’Papa, gi mi a pisi foe a goedoe di mi moesoe kisi.’ Ne a papa ben prati den sani di den ben abi fanowdoe foe tan na libi, na mindri den toe. Baka ten, a no foeroe dei baka dati, a moro jongoe manpikin ben tjari ala den sani kon makandra èn ben teki waka go na doroseikondre, na wan farawe kondre, èn drape a ben froemorsoe ala a goedoe foe en, foe di a ben libi wan jajo libi.” — Lukas 15:11-13.b
6 A moro jongoe manpikin ben sori djaso, na wan fasi di e skreki sma, taki a no ben abi nofo warderi. Na a fosi presi a ben aksi a goedoe foe en di a ben moesoe kisi, èn baka dati a ben froemorsoe dati „foe di a ben libi wan jajo libi”. Den wortoe „jajo libi” vertaal foe wan Griki wortoe di wan taki „wan broeja fasi foe libi”. Wan sabiman e taki dati a wortoe „e sori tapoe a gowe di wan sma gowe libi ala boen gwenti nanga wet krinkrin”. Nanga reti foeroetron den e kari a jonkoeman na ini Jesus en agersitori wan lasi manpikin, wortoe di e taki foe wan sma di e prati sani pasa marki sondro foe denki èn di e froemorsoe.
7. Soema na ini a ten disi e prenki a lasi manpikin, èn foe san ede foeroe foe den sma dati e soekoe fri na „wan kondre di de farawe”?
7 Sma de na ini a ten disi di gersi a lasi manpikin? Ija. Na wan sari sani foe taki dati wan pikin groepoe sma libi a boen „oso” foe wi hemel Tata, Jehovah (1 Timoteus 3:15). Sonwan foe den sma disi e feni taki a situwâsi foe na osofamiri foe Gado, strak toemoesi èn taki na ai foe Jehovah di e loekoe wi na moro foeroe wan problema leki a de wan kibri. (Teki gersi Psalm 32:8.) Poti prakseri na tapoe wan kresten oema di ben gro kon bigi akroederi bijbel gronprakseri, ma di baka ten ben go gebroiki sopi nanga drug na wan fowtoe fasi. Te a e loekoe baka na a doengroe pisi ten dati na ini en libi, dan a e taki: „Mi ben wani boeweisi taki mi ben kan meki wan moro boen libi gi misrefi. Mi ben wani doe san mi ben wani doe, èn mi no ben wani foe no wan sma taigi mi taki mi moesoe doe wan tra sani.” Neleki a lasi manpikin, a jongoe oema disi ben soekoe foe kon fri foe trawan. Na wan sari taki foe di a ben doe sani di no ben kroederi nanga bijbel, meki den brada ben abi foe sluit en uit foe a kresten gemeente. — 1 Korentesma 5:11-13.
8. (a) Sortoe jepi kan gi na den wan di wani libi wan libi di de kontrari den markitiki foe Gado? (b) Foe san ede wan sma moesoe prakseri boen san a e froekisi ini na afersi foe anbegi?
8 A e broko sma ati troetroe te wan kompe bribiman e sori taki a wani libi wan libi di de kontrari den markitiki foe Gado (Filipisma 3:18). Te disi e pasa, dan owroeman nanga tra sma di abi jeje bekwaamfasi e doe moeiti foe meki a sma di meki wan fowtoe kon boen baka (Galasiasma 6:1). Ma tokoe, den no e dwengi no wan sma foe teki a tjatjari leki kresten disipel (Mateus 11:28-30; 16:24). Te jongoewan e kon moro bigi, dan densrefi toe moesoe teki den eigi bosroiti na ini a tori foe anbegi. Te foe kaba, ibriwan foe wi na wan sma di fri foe teki en eigi boen gwenti nanga wet èn di sa gi frantiwortoe na Gado foe ensrefi (Romesma 14:12). A no de foe taki dati wi sa ’koti toe, san wi e sai’ — wan lés di a lasi manpikin na ini na agersitori foe Jesus ben sa leri heri esi. — Galasiasma 6:7, 8.
Lasi ala howpoe na ini wan farawe kondre
9, 10. (a) Sortoe kenki ben feni presi na ini a situwâsi foe a lasi manpikin, èn fa a ben handri na tapoe disi? (b) Sori fa na ini a ten disi sonwan di e gowe libi a troe anbegi, e kisi foe doe nanga wan takroe situwâsi di de a srefi leki di foe a lasi manpikin.
9 „Di a ben klari ala sani, wan hebi angriten ben kon na a heri kondre dati, èn a ben bigin pina. A ben go tai ensrefi na wan borgoe foe a kondre dati srefi, èn a sma dati ben seni en go na en gron foe loekoe den agoe. Èn foeroetron a ben angri foe njan den redi bonki di den agoe ben e njan, èn no wan sma ben gi en wan sani.” — Lukas 15:14-16.
10 Ala di a lasi manpikin no ben abi noti moro, tokoe a no ben denki ete foe drai go na oso. Na presi foe dati, a ben miti wan sma foe a foto di ben gi en wan wroko foe loekoe den agoe foe en. Foe di a Wet foe Moses ben sori krin taki agoe ben de meti di no ben krin, dati meki, soleki fa a sori, wan djoe no ben sa kan doe so wan wroko (Lefitikus 11:7, 8). Ma efoe a lasi manpikin ben firi taki en konsensi ben fon en, dan a ben abi foe tapoe a konsensi fonfon. Bika te joe loekoe en boen, dan a no ben kan froewakti taki a basi foe en, wan sma foe a foto drape, ben sa hati en ede nanga fa wan pôtiman foe wan doroseikondre ben o firi. A takroe situwâsi foe a lasi manpikin gersi a sani di foeroe sma e ondrofeni te den e gowe libi a reti pasi foe soifri anbegi. Foeroetron, den sortoe sma disi e bigin doe sani di fosi den ben sa si leki lagi sani. Foe eksempre, di wan jonkoeman ben abi 17 jari, a ben opo ensrefi teige a gro di a ben gro leki kresten. „Hoeroedoe nanga wan fowtoe gebroiki foe drugs ben figi poeroe ala den jari foe leri di komoto na bijbel”, na so a e taki. Heri esi, a jonkoeman disi ben feni ensrefi na ini doengroe-oso foe di a ben gebroiki fetisani foe foefoeroe èn a ben kiri sma. Ala di baka ten a ben kisi ensrefi baka na jejefasi, tokoe troetroe dati ben de wan hebi paiman di a ben moesoe pai gi „a prisiri foe sondoe di ben de foe wan pisi ten nomo”! — Teki gersi Hebrewsma 11:24-26.
11. Fa a problema foe a lasi manpikin ben kon moro moeilek, èn fa na ini a ten disi sonwan kon si taki den moi sani foe a grontapoe disi na noti moro leki „bedrigifasi di de wan soso sani”?
11 A problema foe a lasi manpikin ben kon moro moeilek foe di „no wan sma ben gi en wan sani”. Pe ala den njoen mati foe en di a ben feni ben de now? Now di a no ben abi moni moro, a ben tron neleki ’wan sma di den no ben wani si na ai’ (Odo 14:20). Na a srefi fasi foeroe sma na ini a ten disi di e gowe libi a bribi, e kon si taki den moi sani foe a grontapoe disi nanga den denki foe en, na noti moro leki „bedrigifasi di de wan soso sani” (Kolosesma 2:8). „Mi ben pina foeroe pen nanga sari te mi no ben abi a tiri foe Jehovah”, na so wan jongoe oema e taki di ben gowe libi Gado en organisâsi foe wan pisi ten. „Mi ben proeberi foe de leki a grontapoe, ma foe di mi no ben de troetroe leki trawan, dati meki den no ben teki mi. Mi ben firi leki wan lasi pikin di ben abi wan papa fanowdoe foe tjari en. Na a momenti dati mi kon si taki mi ben abi Jehovah fanowdoe. Noiti mi ben wani libi fri sondro en agen.” A lasi manpikin na ini na eksempre foe Jesus, ben kon si a srefi sani toe.
A lasi manpikin e kisi ensrefi
12, 13. Sortoe sani ben jepi sonwan na ini a ten disi foe kisi densrefi? (Loekoe a boksoe.)
12 „Di a ben kisi ensrefi, a ben taki: ’Omeni wrokoman foe mi papa abi brede pasa marki, ala di mi e dede foe angri djaso! Mi sa opo èn teki waka go na mi papa èn taigi en: „Papa, mi sondoe na hemel èn na joe. Mi no warti moro foe joe kari mi joe manpikin. Meki mi leki wán foe den wrokoman foe joe di joe joeroe.” ’ Ne a ben opo èn ben go na en papa.” — Lukas 15:17-20.
13 A lasi manpikin „ben kisi ensrefi”. Wan pisi ten, a ben gi enrefi abra na a soekoe di a ben soekoe prisiri nomo, neleki a ben e libi ini wan grontapoe di de wan dren. Ma now a ben kon sabi krinkrin san na a troe jejefasi foe en. Ija, ala di a ben fadon, tokoe howpoe ben de ete gi a jonkoeman disi. A ben abi wan toe boen eigifasi. (Odo 24:16; teki gersi 2 Kroniki 19:2, 3.) Fa a de nanga den wan di e gowe libi na ipi foe Gado na ini a ten disi? A ben sa boen foe denki taki den alamala no abi howpoe moro, taki ini ala kefal na oproeroe waka nanga libi foe den e sori taki den sondoe na Gado en santa jeje? (Mateus 12:31, 32) Dati no abi foe de so. A e trobi sonwan foe den taki den teki so wan broeja waka nanga libi, èn te foe kaba foeroe foe den e kisi densrefi. „Noiti, no wán dei srefi, mi ben frigiti Jehovah”, wan sisa e taki, te a e prakseri foe a ten di a ben gowe libi na organisâsi foe Gado. „Ala ten mi ben begi taki na a wan noso tra fasi, wan dei, a ben sa teki mi baka na ini waarheid.” — Psalm 119:176.
14. Sortoe bosroiti a lasi manpikin ben teki, èn fa a ben sori sakafasi di a ben teki a bosroiti?
14 Ma san den wan di lasi pasi kan doe nanga a situwâsi foe den? Na ini na agersitori foe Jesus, a lasi manpikin ben teki a bosroiti foe teki waka go na oso baka èn begi en papa foe gi en pardon. „Meki mi leki wán foe den wrokoman foe joe di joe joeroe”, a lasi manpikin ben bosroiti foe taigi en papa. Wan foetoeboi di wan sma ben joeroe, ben de wan wrokoman di sma ben joeroe foe wroko ala dei èn di den ben kan poeroe na wroko ibri dei. A posisi disi ben moro lagi srefi leki wan srafoe di, foe taki en so, ben de neleki wan memre foe na osofamiri. So boen a lasi manpikin no ben abi na prakseri foe aksi taki a kon baka leki wan manpikin soleki fa a ben de fosi. A ben sa wani srefi foe teki a moro lagi posisi, so taki a ben kan sori en papa ibri dei taki a de loyaal baka. Ma, a lasi manpikin ben o miti wan sani di a no ben froewakti.
Wan switikon di e waran na ati
15-17. (a) Fa a papa ben handri di a ben e si en manpikin? (b) San a krosi, linga, nanga soesoe di a papa ben gi en manpikin, wani taki? (c) San a seti di a papa ben seti sani foe hori wan fesa, e sori?
15 „Ala di a ben de farawe ete, en papa ben si en èn a ben firi sari, èn a ben lon èn ben brasa en èn bosi en na wan safoe fasi. Ne a manpikin ben taigi en: ’Papa, mi sondoe na hemel èn na joe. Mi no warti moro foe joe kari mi joe manpikin. Meki mi leki wán foe den wrokoman foe joe di joe joeroe.’ Ma a papa ben taigi den srafoe foe en: ’Go esi! Tjari wan langa krosi kon, a moro boen-wan, èn weri en gi en, èn weri wan linga na en anoe èn soesoe na en foetoe. Èn tjari a fatoe jongoe mankaw kon, srakti en èn meki wi njan èn prisiri, bika a manpikin disi foe mi ben dede èn a ben kon na libi baka; a ben lasi èn mi ben feni en baka.’ Èn den ben bigin meki prisiri.” — Lukas 15:20-24.
16 Iniwan lobi-ati papa nanga mama ben sa wani srefisrefi taki en pikin kon boen baka na jejefasi. Foe dati ede, wi kan froestan fa a papa foe a lasi manpikin e loekoe ibri dei go na a pasi di e waka kon na en oso, e howpoe srefisrefi taki a manpikin foe en sa drai kon baka. Now a e si a manpikin foe en e waka kon na tapoe a pasi! Sondro tweifri a ben moeilek foe sabi a jonkoeboi baka. Tokoe a papa ben sabi en ete ala di a de „farawe ete”. A papa no e poti prakseri na tapoe den priti krosi nanga a broko jeje; a e si en manpikin, èn a e lon go miti en!
17 Di a papa ben doro na a manpikin foe en, a ben brasa en èn ben bosi en na wan safoe fasi. Baka dati a komanderi den srafoe foe en foe gi en manpikin wan krosi, wan linga, nanga soesoe. A krosi disi no ben de soso wan krosi foe weri, ma „a moro boen-wan” — kande wan krosi di ben moi srefisrefi, a wan di den e gi na fisitiman di abi wan spesroetoe grani. Foe di srafoe no ben abi a gwenti foe weri wan linga nanga soesoe, dati meki a papa ben meki a de krin taki a manpikin foe en ben kisi wan switikon baka leki wan troetroe memre foe na osofamiri. Ma a papa ben doe moro srefi. A ben hori wan fesa foe di a manpikin foe en ben drai kon baka. A de krin, taki a man disi no ben gi en manpikin pardon sondro en ati firi prisiri noso foe di a ben de froeplekti foe gi pardon bika en manpikin ben drai kon baka; nôno, a ben wani foe gi pardon. Dati ben meki a abi prisiri.
18, 19. (a) San na agersitori foe a lasi manpikin e leri joe foe Jehovah? (b) Fa Jehovah e „tan froewakti” taki wan sondari e drai kon baka, soleki fa A ben sori na ini a fasi fa a ben handri nanga Juda nanga Jerusalem?
18 So boen, san na agersitori foe a lasi manpikin e leri wi foe a Gado di wi abi a grani foe anbegi? Na a fosi presi, taki Jehovah ’abi sari-ati nanga boenfasi, no e kisi atibron esi-esi èn a abi lobi boen-ati nanga waarheid pasa marki’ (Exodus 34:6). Foe troe, sari-ati na wan prenspari eigifasi foe Gado. A de a fasi fa Jehovah e handri te a e si wan trawan de na ini nowtoe. Baka dati, na agersitori foe Jesus e leri wi taki Jehovah „de klariklari foe gi pardon” (Psalm 86:5). A e loekoe sani boen srefisrefi, foe taki en so, foe si efoe sondoe libisma e kenki den ati na iniwan fasi, so taki a ben sa abi wan gron foe sori sari-ati. — 2 Kroniki 12:12; 16:9.
19 Foe eksempre, prakseri fa Gado ben handri nanga Israèl. A profeiti Jesaja ben skrifi nanga jepi foe Jehovah taki Juda nanga Jerusalem ben ’siki foe ede te na foetoe’. Ma tokoe a ben taki toe: „Jehovah sa tan froewakti foe sori oenoe boen-ati, èn foe dati ede a sa opo foe sori oenoe sari-ati” (Jesaja 1:5, 6; 30:18; 55:7; Esekièl 33:11). Neleki a papa na ini na agersitori foe Jesus, na so Jehovah ’e loekoe a pasi’, foe taki en so. A e loekoe finifini efoe iniwan sma di gowe libi En oso, e drai kon baka. A no disi wi ben sa froewakti foe wan lobi-ati papa? — Psalm 103:13.
20, 21. (a) Na sortoe fasi a sari-ati foe Gado e hari foeroe sma nojaso? (b) Foe san wi sa taki na ini na artikel di e kon?
20 Ibri jari, a sari-ati foe Jehovah e hari foeroe sma foe kisi densrefi èn drai kon baka na a troe anbegi. Foe troe, dati e tjari prisiri gi den lobiwan foe den! Foe eksempre, teki a kresten papa di wi ben kari na a bigin. Kolokoe, en oemapikin ben kon boen baka na jejefasi èn e dini now leki wan foeroeten bedinari. „Mi de so kolokoe leki a kan ini na owroe seti foe sani disi”, a papa e taki. „Den watra-ai di mi ben krei foe sari ede, ben kenki tron watra-ai foe prisiri.” Foe troe, Jehovah srefi e prisiri toe! — Odo 27:11.
21 Ma na agersitori foe a lasi manpikin abi moro sani. Jesus ben go doro nanga a tori foe en so taki a ben kan sori a difrenti na mindri a sari-ati foe Jehovah nanga a strak fasi foe kroetoe sani di ben de na mindri den leriman foe Wet nanga den Fariseiman. Fa a ben doe dati — èn san dati wani taki gi wi — na wan sani di wi sa taki na ini na artikel di e kon.
[Foetoewortoe]
a A no abi foe de so taki den agersitori nanga tra eksempre di froeteri na ini bijbel, ben feni presi troetroe. Moro fara, foe di a marki foe den tori disi na foe leri wan sma boen gwenti nanga wet, dati meki a no de fanowdoe foe soekoe wan simbôlis fasi na ini ala pikinpikin pisi foe a tori.
b Na ini a Waktitoren foe 15 februari 1989, bladzijde 16 nanga 17, skrifi san na agersitori disi wani taki na profeiti fasi.
Foe loekoe sani sjatoe baka
◻ Fa a fasi fa Jesus ben tjari ensrefi ini a tori foe sari-ati ben de kontrari di foe den Fariseiman?
◻ Soema na ini a ten disi e prenki a lasi manpikin, èn fa?
◻ Sortoe sani ben meki a lasi manpikin kisi ensrefi?
◻ Fa a papa ben sori sari-ati na a manpikin foe en di ben abi berow?
[Faki na tapoe bladzijde 11]
DEN BEN KISI DENSREFI
San jepi wan toe sma di ben sluit uit foe a kresten gemeente foe kisi densrefi baka? Den komentaar di e kon now e trowe leti na tapoe na afersi.
„Na ini mi ati mi ben sabi ete pe waarheid ben de. A studeri di mi ben studeri bijbel jari langa èn a go di mi ben go na kresten konmakandra ben abi kefalek foeroe krakti na mi tapoe. Fa mi ben kan drai mi baka gi Jehovah moro langa? A no En ben gowe libi mi; na mi ben gowe libi En. Te foe kaba, mi ben erken o fowtoe mi ben de èn fa mi ben tranga-ede èn taki Jehovah Wortoe ben abi reti ala ten — ’joe e koti san joe sai’.” — C.W.
„A beibi oemapikin foe mi ben bigin taki, èn dati ben naki mi ati foe di mi ben wani foe leri en sani soleki soema na Jehovah èn fa foe begi En. Mi no ben man sribi, èn latilati wan neti mi ben rèi go na wan park èn ben krei nomo. Mi ben krei èn mi ben begi Jehovah foe a fosi leisi baka wan langa pisi ten. Ala sani di mi ben sabi ben de taki mi ben abi Jehovah fanowdoe baka na ini mi libi, èn mi ben howpoe taki a ben sa kan gi mi pardon.” — G.H.
„Te sma ben sa bigin taki foe relisi tori, dan mi ben sa taigi den taki efoe mi ben sa moesoe teki wan relisi di ben leri waarheid, dan mi ben sa moesoe de wan Jehovah Kotoigi. Baka dati mi ben sa taki dati mi ben de wán foe den, ma taki mi no ben man hori misrefi na den markitiki, so boen mi ben tapoe foe de wan kotoigi. Foe di mi ben froestan disi, dan foeroetron mi ben firi taki mi fowtoe èn mi no ben de kolokoe. Te foe kaba mi ben erken: ’Mi siki srefisrefi. Mi moesoe kenki troetroe.’” — C.N.
„Dritenti na feifi jari pasa kaba mi nanga mi masra ben sluit uit. Baka dati, na ini 1991 wi ben kisi wan moi sani di wi no ben froewakti di toe owroeman ben fisiti wi èn ben taigi wi taki wi abi na okasi foe drai kon baka na Jehovah. Siksi moen baka dati, wi ben prisiri srefisrefi di den ben teki wi baka na ini a gemeente. Mi masra abi 79 jari, mi abi 63 jari.” — C.A.