Yeyses libi nanga diniwroko

Na agersitori fu den mina

YEYSES de kande ete ini na oso fu Sakeyus, pe a ben tapu di a ben de a pasi e go na Yerusalen. Den disipri fu en e bribi taki te den doro na Yerusalen, a sa fruklari taki en na a Mesiyas èn taki a sa opo en Kownukondre. Fu poti na denki disi reti èn fu sori taki na Kownukondre de bun fara ete meki Yeyses e gi wan agersitori.

„Wan seyker man fu hey kobortu”, so a e fruteri „ben rèys go na wan farawe kondre fu kisi kownumakti gi en srefi èn fu dray kon baka.” Yeyses na a man fu „hey kobortu”, èn heymel na a „farawe kondre”. Te a doro drape en ppa sa gi en kownumakti.

Ma bifo a gwe, na man fu hey kobortu kari tin srafu kon èn gi ibriwan fu den wan solfru mina, èn a taki: „Du bisnis te leki mi kon”. Ini na fosi kontru den tin srafu e prenki Yeyses fosi disipri. Ini wan moro bigi kontru den e prenki ala sma di abi na fruwakti fu de erfgenaam nanga en na ini na heymel Kownukondre.

Den solfru mina na moni fu bigi waarde, di iniwan de a srefi leki dri mun moni fu wan gronman. Ma san den mina e agersi? Èn sortu bisnis den srafu e du nanga en?

Den mina e agersi gudu di den disipri di wiki nanga yeye ben kan kobroyki fu meki moro erfgenaam kon gi na heymel Kownukondre te leki Yeyses kon leki kownu na ini en pramisi Kownukondre. Baka en opobaka èn a sori di a ben sori en srefi na den disipri fu en, a gi den den agersi mina fu meki moro disipri èn na so fasi meki na grupu fu na heymel Kownukondre kon moro furu.

„Ma”, Yeyses e go morofara, „den borgru fu en no ben wani si en na ay [na man fu hey kobortu] èn ben seni boskopuman go na en baka, fu taki: ’Wi no wani na man disi tron kownu na wi tapu.’” Den borgru na den Israèl sma ofu dyu, ma den dispri fu en no de a mindri. Bakadi Yeyses op go na heymel, den dyu disi fu di den ben frufolgu den disipri fu en ben sori taki den no ben wani fu a tron den kownu. Na a fasi disi den e handri leki den borgru di ben seni den boskopuman go.

Fa den tin srafu e kobroyki den mina fu den? Yeyses e fruklari: „Di te fu kba a ben dray kon baka, bakadi a ben kisi kownumakti, a ben gi a komando fu kari den srafu di a ben gi na solfru moni kon gi en fu kon sabi san den ben wini nanga a du fu bisnis. Dan na fosiwan kon na fesi, a taki, ’Masra, yu mina tyari tin mina kon.’ Dan a ben taygi en: ’Heri bun, bun srafu! Bika ini wan pikin sani yu ben sori yu srefi kotrow, abi makti tapu tin foto.’ Now a di fu tu ben kon, èn taki, ’Masra, yu mina tyari feyfi mina kon’. A taygi a disi so srefi tu, ’Yu tu e kisi na sorgu tapu feyfi foto.’”

Den srafu nanga den tin mina e prenki wan klasse ofu grupu fu disipri fu na ten fu Penkstri ini 33 G.T. te nanga now, makandra nanga den apostru. Den wan di ben wini feyfi mina so srefi tu e agersi wan grupu ini na srefi pisi ten di, nanga den okasi nanga talenti e meki den gudu fu na kownu fu den na grontapu, kon moro furu. Ala tu grupu e preyki fayafaya na bun nyunsu èn leki bakapisi, furu reti-ati sma e tron kresten. Neygi fu den srafu ben du bun bisnis èn ben meki den gudu fu den kon moro furu.

„Ma”, Yeyses e go morofara, „wan trawan ben kon, a taki, ’Masra, dyaso yu mina de, di mi ben kibri ini wan duku. Yu si, mi ben frede yu, bika yu na wan tranga-ati man; yu e teki (moni) san yu no poti (na bangi) èn yu e koti san yu no say.’ A ben taygi en taki: ’Komoto fu yu eygi mofo mi e krutu yu, ogri srafu. Yu ben sabi, a no so. taki mi na wan tranga-ati man, wan man di e teki san mi no poti èn e koti san mi no say? Fu san-ede yu no ben poti mi moni na wan bangi? Dan te mi ben doro mi ben sa kisi en nanga rente?’ Nanga disi a ben taygi den wan di ben tanapu drape: ’Teki na mina puru fu en èn gi en na a wan di abi tin mina.’”

Lasi fu na agersi mina wani taki lasi fu wan presi na ini na heymel Kownukondre gi na ogri srafu. Iya, fu taki en leki fa a de a e lasi na grani fu tiri tapu tin ofu feyfi foto. Luku so srefi tu, taki den no e kari na srafu ogri fu di a du wan ogri, ma moro furu fu di a ben misi fu wroko gi na kon moro furu fu na Kownukondre gudu fu en meystri.

Te na mina fu na ogri srafu e gi na a fosi srafu, na kragi e kon: „Masra, a abi tin mina!” Toku Yeyses e piki: „Na ala sma di abi, den sa gi moro; ma na sma di no abi, den sa teki puru srefi san a abi. Boyti fu dati, den feyanti disi fu mi di no ben wani mi tron kownu tapu den, tyari den kon dya èn srakti den na mi fesi.” Lukas 19:11-27; Mateyus 28:19, 20.

◆ San pusu Yeyses fu gi na agersitori fu den mina?

◆ Suma na a man fu hey kobortu, èn san na a kondre pe a e go?

◆ Suma na den borgru èn fa den e sori taki den no wani si na kownu na ay?

◆ Suma na den srafu èn san den mina e agersi?

◆ Fu san-ede den ben kari wan srafu gadolowsu èn san na lasi fu en mina wani taki?