Fa ogri konkru kan tapu

„Poti grantangi wan waktiman, o Yehovah, gi mi mofo; meki grantangi wakti hori na a doro fu mi mofobuba.” — PSALM 141:3.

1. San na edetonton di wi kisi fu Gado man fu du?

YEHOVAH ben gi wi wan edetonton èn fa disi de wan wondru sani! Na buku The incredible Machine e taki: „Srefi den moro bun computer di wi kan denki fu den, de noti te yu teki den gersi nanga na dangra fasi nanga flexibiliteit fu na libisma edetonton di pikinmoro no abi wan kba . . . Den milyunmilyun signaal di tapu ibri momenti e psa yu edetonton, abi kofarlek furu tori. Den e gi nyunsu fu na situwâsi inisey èn dorosey fu yu skin . . . Aladi tra signaal e seti èn e luku finifini fa den tori de, dan den e tyari bepaalde firi, sani fu memre nanga prakseri ofu plan kon na doro di e tyari wi fu teki wan bosroyti. Pikinmoro na a srefi momenti signaal fu yu edetonton e fruteri tra pisi fu yu skin san fu du . . . Na a srefi ten yu edetonton e kontroleer so srefi tu a hari bro fu yu, den scheikundig proces ini yu brudu, na waran fu yu skin èn tra prenspari proces di yu srefi no e denki fu den.” — Blz. 326.

2. Sortu aksi e frudini fu wi poti prakseri now a tapu?

² So wan moy kado fu Gado seyker no mag kobroyki noyti leki wan dotikisi ofu dotibaki. Toku wi kan kobroyki na edetonton na wan fowtu fasi te wi e arki ofu e teki prati na a panya fu ogri konkru. Fa wi kan tan farawe fu den sortu taktaki disi èn yepi tra sma fu no teki prati na ini?

Warderi na presenti fu Gado, yu edetonton

3. Fu san-ede tru kresten no sa teki prati na ini fu taki ogri fu trawan?

³ Warderi gi wi edetonton di wi kisi fu Gado sa tapu wi fu arki ogri konkru èn fu panya en. Yehovah yeye no ben sa buweygi no wan sma fu furu en edetonton nanga den sortu prakseri disi èn fu kobroyki en tongo fu du wan sma ogri. Na presi fu dati, a wortu fu Gado e taki: „Meki na ogriwan libi en pasi èn na man fu ogridu en prakseri” (Yesaya 55:7). Na edetonton fu wan ogri sma furu nanga ogri prakseri, èn a de gaw fu gongosa na opregtiwan. Ma wi no ben sa fruwakti so wan sortu taktaki fu den sma di e warderi na edetonton di den kisi fu a Gado fu den.

4. Efu wi e warderi wi edetonton nanga a man di wi man fu taki, dan fa wi sa kobroyki wi edetonton nanga wi tongo?

⁴ Na yoysti warderi sa yepi wi fu no kobroyki wi edetonton nanga tongo fu gi den srefi abra na wi sondu skin. Na presi fu dati, wi sa hori wi denki nanga taki tapu wan hey presi. Wi kan tan farawe fu ogri konkru efu ini begi wi e suku yepi na a Sma di en prakseri de moro hey leki di fu wi. Na apostru Paulus ben gi na ray: „Ala sani san de tru [no de ley ofu gongosa], ala sani san de fu seryusu belang [san no de prenspari], ala sani san de regtfardiki [no gadolowsu ofu ogri], ala sani san de krin [no wan gongosa di no krin ofu denki wan sma ogri], ala sani san de fu lobi [no fu abi wan sma na ati èn broko en saka], ala sani san den e taki bun fu en [no fu wisiwasi en], sortu bun [no takrudu] de tu èn ala sani san e frudini prèyse [no di den krutu], tan prakseri den sani disi.” — Filippi sma 4:8.

5. San konpe bribiman ben si èn yere na Paulus?

⁵ Paulus e taki moro fara: „Den sani di yu ben leri èn ben teki èn di yu ben yere èn ben si na mi, poti dati ini yu libi, èn na Gado fu vrede sa de nanga yu” (Filippi sma 4:9). San trawan ben si èn yere na Paulus? Sani di ben de krin èn di ben bow sma na yeye fasi. A no ben furu den yesi nanga den lasti konkru di ben go fu Lydia ofu Timoteyus. Yu kan de seyker taki Paulus no ben yere èn ben panya tori di ben go fu owruman na ini Yerusalen.a Seyker a ben de so, taki fu di Paulus ben abi respeki gi na edetonton di Gado ben gi en, meki a ben tan farawe fu moksi en srefi na ini ogri konkru. Wi sa kan waka na baka na eksenpre fu en efu trutru wi abi warderi gi na edetonton èn na tongo di Yehovah gi wi.

Respeki Gado nanga en Wortu

6, 7.(a) Fa Yakobus sori den bakapisi fu wan tongo di wan sma no e dwengi? (b) San no sa psa efu wi respeki Gado nanga en Wortu?

⁶ Respeki gi Gado nanga en Santa Wortu sa yepi wi so srefi tu fu tapu ogri konkru. Fu tru, so wan respeki sa buweygi wi fu poti prakseri na a ray fu na disipri Yakobus, di ben sori tapu den ogri wroko fu na tongo (Yakobus 3:2-12). Efu wan sma ben sa kan dwengi a tongo, dan a ben sa kan fu dwengi en heri skin, neleki wan sma nanga wan ton na ini wan asimofo kan tiri na meti dati. Neleki fa wan pikin faya kan meki wan heri busi teki faya, na so na pikin tongo kan tron wan faya di e poti na wiel fu libi na ini faya. Sma kan tèm busimeti, fowru, meti di e kroipi nanga semeti, „ma na tongo no wan sma kan tèm en”, Yakobus ben taki. Toku disi a no wan pardon fu no du wan enkri muyti fu tapu ogri konkru.

⁷ Yakobus ben taki so srefi tu taki a tongo e meki blesi nanga fruku komoto fu na srefi mofo. Disi no de yoysti, bika wan fonten no e meki switi nanga bita watra bori kon na tapu. Wan figabon no kan meki olèyfi, èn sowtu watra no e meki switi watra kon. A no de fu taki, taki so langa kresten sma de onvolmaakti, den no sa man tèm na tongo volmaakti. Disi musu meki wi de nanga sari-ati nanga sma di du ogri ma abi berow, ma a no de wan pardon gi ogri konkru. So fara leki a e anga fu wi, so wan sortu vergif kobroyki fu na tongo no sa go doro efu wi abi trutru respeki gi Gado nanga en Wortu.

Fa begi kan yepi

8. Fa begi kan yepi wi fu tapu ogri konkru?

⁸ Na tesi fu go arki ogri konkru èn dan fu panya en go doro kan de wan trangawan. So bun, efu na ini a ten di psa yu ben gi yu srefi abra na so wan tesi, dan yu no musu aksi Gado pardon nanga yepi? Yeyses ben leri wi fu begi: „No tyari wi go ini tesi, ma fri wi fu na ogriwan” (Mateyus 6:13). Kresten sma di e begi opregti taki Gado no libi den gi den sortu tesi disi fu pori taktaki, no sa broko kindi gi na taktik disi fu Satan; den sa kon fri fu na bigi gongosaman.

9. Efu wi kon ini a tesi fu gongosa wan sma dan fa wi ben kan begi?

⁹ Efu wi kon na ini a tesi fu gongosa wan sma, dan wi sa kan begi: „Poti grantangi wan waktiman, o Yehovah, gi mi mofo; meki grantangi wakti hori na a doro fu mi mofobuba” (Psalm 141:3). Wi ben sa kan pori den fruwakti fu wi tapu têgo libi efu wi e gi wi srefi abra na a kori èn waka na baka Ddibri leki wan gongosaman di furu nanga ogri-ati, ley nanga kiri fu sma (Yohannes 8:44). Na apostru Yohannes ben skrifi: „Ibriwan sma di abi ogri-ati gi wan brada, na wan kiriman, èn yu sabi taki wan kiriman no abi têgo libi na ini en.” — 1 Yohannes 3:15.

Lobi e puru konkru poti a doro

10. San wi abi fu pay trawan na presi fu konkru den?

¹⁰ Ibriwan fu wi de ini payman fu wan sani na wan tra sma, ma dati no de ogri-ati di e pusu wi fu konkru di e du ogri. „No de ini payman na no wan sma leki fu lobi makandra”, Paulus ben skrifi (Romen 13:8). Wi musu pay ala dey wan sani fu na payman disi na presi fu taki sani di no bun fu trawan èn pori na bun nen fu den. Efu wi e taki taki wi lobi Yehovah, dan wi no kan gongosa wan konpe-anbegiman, „bika a sma di no lobi en brada, di a si, no kan lobi Gado di a no si”. — 1 Yohannes 4:20.

11. Fa na agersitori fu Yeyses fu den skapu nanga bokoboko kan meki wi go denki fu ogri konkru?

¹¹ Luku pikinso na agersitori fu Yeyses fu den skapu nanga bokoboko. Den ben taygi den sma di yu kan teki gersi nanga bokoboko taki na fasi fa den ben du nanga den brada fu Krestes de leki wan sani di den ben du en (Krestes). Yu ben sa panya konkru di abi fu du nanga Krestes? Efu yu no ben sa taki negatief sani fu yu Masra nanga Meystri, dan no handri en salfu brada na so wan fasi. No meki den fowtu so leki den bokoboko, di „sa go na ini na têgo koti puru”. Efu yu lobi Yeyses brada, sori dati dan nanga san yu e taki fu den. — Mateyus 25:31-46.

12. San na a prenspari sani na ini Odo 16:2, èn fa a musu abi krakti tapu wi denki, du nanga taki?

¹² Fu di wi alamala de sondari èn abi Yeyses frulusu-ofrandi fanowdu, dan efu wan sma ben sa taki negatief sani fu wi, dan a ben sa abi furu sani fu taki (1 Yohannes 2:1, 2). A no de fu taki, taki wi ben kan denki taki wi e du en heri bun. „Ala den pasi fu wan man de soyfri na ini en eygi ay, ma Yehovah e ondrosuku den yeye.” Poti sma a fesi trawan ofu partèyfasi no e donpu a wegi fu Gado (Odo 16:2; Tori fu den Apostru 10:34, 35). A e wegi wi yeye, e poti prakseri tapu wi yeyefasi nanga den sani di e buweygi wi denki, handri nanga taki. Dan seyker wi no ben sa wani taki Gado si taki no nanga reti wi e feni wi srefi krin èn e feni fu tra sma taki den doti èn taki den warti fu sma taki ogri sani fu den. Neleki Yehovah wi musu de sondro partèyfasi, nanga sari-ati èn nanga lobi.

13. (a) Fa na de di ’lobi de nanga langa pasensi èn switifasi’ kan yepi wi fu tapu ogri konkru? (b) San sa tapu wi fu taki negatief sani fu wan sma di e kisi dienstgrani di wi no abi?

¹³ Te wi poti san Paulus taki na ini 1 Korente sma 13:4-8, ini wi libi, dan wi kan kisi yepi fu tapu ogri konkru. A ben skrifi: „Lobi de nanga langa pasensi èn switifasi.” Wan sisa di e nyan pina fu gens na ini wan prati-osofamiri, kande no e gi wi odi na wan switifasi. Ofu sonwan kande de loboso na skinfasi, kande fu wan gosontu ede di no bun. Lobi no ben musu pusu wi fu de nanga pasensi èn switifasi nanga den sortu sma disi na presi fu meki den de den sma di wi feni fowtu a den nanga yepi fu konkru? ’Lobi no e dyarusu, no e meki bigi, no e prodo.’ So bun, efu wan tra kresten kisi wan dienstgrani di wi no abi, dan lobi sa tapu wi fu taki sani fu en di no bun èn fu tyari kon a fesi taki a no bun nofu gi na wroko. Lobi sa tapu wi so srefi tu fu nyan mofo fu san wi ben man fu du, wan taktaki di kan wroko fruferi tapu den wan di no kisi someni grani.

14. Sortu tra sani fu lobi abi krakti tapu san wi e taki fu tra sma?

¹⁴ Paulus ben taki so srefi taki ’lobi no e tyari en srefi tapu wan fasi di no fiti, no e suku en eygi belang, no e kisi ati-bron ofu no e teri ogri’. Na presi fu taki sani di no fiti wan kresten dan wi musu meki lobi trusu wi fu taki bun fu trawan èn fu hori den belang na ini prakseri. Lobi e tapu wi fu kisi ati-bron èn fu taki negatief sani fu sma fu trutru ogri ofu san wi e denki taki den ben sa ben du wi. Fu di ’lobi no e prisiri fu onregtfardikifasi ma e prisiri nanga waarheid’, dan a e tapu wi srefi fu teki prati na ini ogri konkru fu gensman di e ondrofeni onregtfardikifasi.

15. (a) Sortu krakti a musu abi tapu wi taki ’lobi e bribi èn e howpu ala sani’? (b) Sortu sani fu lobi kan yepi wi fu tan kotrow na Yehovah organisâsi srefi efu trawan no e taki bun fu en?

¹⁵ Lobi ’e bribi èn e howpu ala sani’ di wi e feni na ini a Wortu fu Gado èn e buweygi wi fu de nanga warderi gi na yeye nnyan di na ’kotrow srafu’-grupu e gi, na presi fu arki na gongosa taki fu leymofo sma di fadon komoto na bribi (Mateyus 24:45-47; 1 Yohannes 2:18-21). Fu di ’lobi e frudrage ala sani èn no e fadon noyti’, meki a e yepi wi fu tan so srefi tu loyaal na Gado organisâsi, srefi efu „falsi brada” noso trawan e taki teyge na organisâsi ofu den memre fu en. — Galasiya sma 2:4.

Respeki e dwengi konkru

16. Fa falsi brada ben behandel Paulus na ini Korente?

¹⁶ Respeki gi konpebribiman e yepi fu tapu ogri konkru. Fu di Gado e teki den, meki seyker wi no musu meki den tron sma di wi e taki ogri fu den. Meki wi no de noyti leki den „falsi brada” di Paulus ben abi fu du nanga den. A no de fu taki, den ben taki ogri sani fu en (2 Korente sma 11:26). Sma di fadon komoto na bribi musu ben taki so srefi tu ogri fu en. (Teki gersi nanga Yudas 3,4.) Na ini Korente son sma ben taki: „En brifi de prenspari nanga abi krakti, ma en denoya leki persoon swaki èn en taki de wisiwasi” (2 Korente sma 10:10). Den sortu wortu disi wan sma no e taki fu den sma di den lobi.

17. Sortu wortu Diyotrefus ben taki fu na apostru Yohannes?

¹⁷ Teki na apostru Yohannes pikinso di Diyotrefus ben taki sani teyge en. „Mi ben skrifi na gemeente,” Yohannes ben taki, „ma Diyotrefus, di wani abi na fosi presi a mindri den, no e teki noti fu wi nanga respeki. Fu dati-ede, te mi kon, mi sa memre den wroko fu en, di a e tan du, aladi a e tan taki fu wi nanga ogri wortu” (3 Yohannes 9, 10). So wan sortu taktaki ben de wan seryusu afersi, èn efu na ini a ten disi wi e arki na so wan srefi sortu taktaki ofu e panya dati go moro fara, dan wi musu stop wantewante nanga dati.

18. Fa Dimeytriyus ben de tra fasi leki Diyotrefus, èn fa na difrenti disi kan abi krakti tapu wi waka nanga libi?

¹⁸ Te Yohannes e taki tranga nanga den opregtiwan a e taygi Gayus: „No waka na baka san takru, ma baka san bun. A sma di e du bun, e kon fu Gado. A sma di e du san ogri, no si Gado. Den alamala ben kotoygi fu na bun fu Demeytriyus èn so srefi tu na waarheid srefi. Iya, wi srefi e kotoygi, èn yu sabi taki na kotoygi di wi e gi, de tru” (3 Yohannes 1, 11, 12). Ibriwan fu wi ben sa kan aksi en srefi: Mi na wan ogri-ati taktakmofo Diyotrefus ofu mi de wan kotrow Dimeytriyus? Efu wi abi respeki gi konpebribiman, dan wi no sa taki negatief sani fu den, èn gi tra sma reyde fu si wi leki ’taktakmofosma’.

19. Fa falsi brada ben proberi fu pori na bun nen fu C. T. Russell?

¹⁹ Falsi brada no ben de wwan na ini na fosi yarihondro. Na ini den yari 1890 sma di ben de sondro konsensifonfon èn di ben moksi den srefi nanga Gado organisâsi ben proberi fu kisi na tiri fu na Watch Tower Society ini den makti. Den ben meki barki teyge Charles Taze Russell, ini wan muyti fu poti en na wan sey leki fosi presidenti fu na Genootschap. Bakadi na komplot ben bori na ondro fu tu yari langa a ben kon a doro na ini 1894. Den falsi kragi ben go moro furu fu disi, taki Russell no ben de eerlek ini a du fu bisnis. Wan tu fu den law pikin kragi ben sori nomo san ben de a prakseri fu den kragiman — fu pori na bun nen fu C. T. Russell. Kresten sma di no ben teki wan sma partèy ben ondrosuku na afersi èn ben feni taki Russell ben de ini en leti. Na so na plan disi „fu bro Masra Russell nanga en wroko puru na pasi” ben misi en marki. Neleki Paulus na so falsi brada ben dyonpo kon na tapu brada Russell, ma na tesi disi den ben si leki wan ogri plan fu Satan. Baka dati den ben si den komplotman leki sma di kresten sma no ben kan abi demakandra nanga den.

Bun wroko e tapu a mofo fu ogri konkru

20. San Paulus ben abi fu taki fu son yongu weduwe?

²⁰ Paulus ben sabi taki ogri konkru nofotron e go makandra nanga no abi noti fu du, no abi furu bun wroko. A no ben prisiri taki son yongu weduwe ben leri „fu waka lontu na den oso sondro fu du wan sani èn no wwan no abi noti fu du ma sosrefi ben de taktakmofo sma nanga e bumuy na ini sma tori, di e taki fu sani di den no mag fu taki”. San ben de na dresi? Gosontu aktiviteit. Fu dati-meki Paulus ben skrifi: „Fu dati-ede mi wani, taki den yongu uma trow, kisi pikin, sorgu wan oso, no e gi na gensman no wan kans fu skenpi.” — 1 Timoteyus 5:11-14, Byington.

21. San 1 Korente sma 15:58 abi fu du nanga a tan fara fu den trapu fu ogri konkru?

²¹ Efu uma sma e sorgu fu wan oso, e kweki pikin akruderi den markitiki fu Gado èn e teki prati na tra warti aktiviteit dan den sa abi pikinso ten gi soso taktaki di kan kon na ini ogri konkru. Man sma tu sa abi pikinso ten gi den sortu taktaki disi te den abi furu fu du ini bun wroko. ’Abi ala ten furu fu du na ini na wroko fu Masra’ sa yepi wi alamala fu tan farawe fu den trapu fu ogri konkru (1 Korente sma 15:58). Spesrutu na gi fu wi srefi krinkrin nanga wi heri ati na ini na kresten diniwroko, gemeente konmakandra nanga tra aktiviteit na ini na dini fu Gado sa poti wi prakseri tapu yeye afersi sotaki wi no tron konkruman di no abi noti fu du èn e go bumuy nanga tra sma tori.

22. San Odo 6:16-19 e taki fu a fasi fa Gado e si gongosaman?

²² Efu wi tan abi furu fu du ini wroko di abi fu du ini a dini fu Gado èn e suku fu blesi trawan na yeyefasi, dan wi sa de loyaal mati èn no deloyaal konkruman (Odo 17:17). Èn efu wi tan farawe fu ogri konkru, dan wi sa abi na moro bun Mati di de — Yehovah Gado. Meki wi memre taki seybi sani di sa kari now de wan tegu sani gi en: „bigi memre ay, wan ley tongo, anu di e trowe brudu fu sma di no du noti, wan ati di e meki ogri plan, futu di e lon go na san de ogri, wan falsi kotoygi di e fruteri ley èn ibriwan sma di e meki trobi kon a mindri brada” (Odo 6:16-19). Ogri konkruman e taki sani psa marki èn e dray sani, èn gongosaman abi wan ley tongo. Den wortu fu den e meki futu kon ini buweygi fu den sma di wani fu fruteri na tori moro fara nanga ala prisiri. Pikinmoro alaten a bakapisi de trobi. Ma efu wi no wani si sani na ay di Gado no wani si na ay, dan wi sa hori wi srefi fara fu ogri konkru di kan du na opregtiwan ogri èn meki na bigi gongosaman Satan Ddibri abi prisiri fu na ogri di psa.

23. Fa wi kan prisiri Yehovah ati nanga wi taki?

²³ Meki fu dati-ede wi prisiri Yehovah ati (Odo 27:11). Meki wi tan farawe fu taktaki di a no wani si na ay, èn weygri fu arki gongosa èn du ala muyti fu tapu ogri konkru. Nanga yepi fu wi santa Gado, Yehovah, dan dati seyker musu fu man.

[Futuwortu]

Fa yu ben sa piki?

◻ Fa begi kan yepi wi fu tan fara fu gongosa trawan?

◻ Fa na poti fu 1 Korente sma 13:4-8 na ini wi libi kan yepi wi fu tapu ogri konkru?

◻ Fa respeki gi wi srefi kan yepi fu dwengi na tesi fu konkru konpebribiman?

◻ San 1 Korente sma 15:58 kan abi fu du nanga a tan fara fu den trapu fu ogri konkru?

[Sma di abi a reti fu a prenki]

U.S. Forest Service photo