Kibri yu srefi gi ogri konkru!

„Na ini wortu di furu psa marki sondu no e mankeri, ma a sma di e dwengi en mofobuba e handri nanga koni.” — ODO 10:19.

1. Omeni ogri takru-ati konkru ofu gongosa e du?

NOTI kan kenki wan vergif di e tyari dede kon, kon tron wan gosontu dringi. Ogri-ati konkru, ofu gongosa, den teki gersi heri moy nanga vergif, di so srefi kan fufuru puru na bun nen fu wan opregti sma. Na Romen puwema skrifiman Juvenalis ben kari gongosa „na moro takruwan fu ala vergif”. Èn na Ingrisi komedi skrifiman William Shakespeare ben meki wan fu den sma di a ben skrifi fu en taki: „A sma di e teki mi bun nen puru fu mi, e fufuru fu mi wan sani di no e meki a kon moro gudu èn e meki mi kon pôti srefi srefi.”

2. Sortu aksi e frudini fu wi go prakseri den ?

² Ma san de now precies konkru? Ini san a kan difrenti fu gongosa? Fu san-ede wan sma musu kibri en srefi gi ogri konkru? Èn fa wan sma kan du disi?

Fa den e kenki fu makandra

3. San na a difrenti a mindri konkru nanga gongosa?

³ Konkru de „soso taktaki — di no de alaten tru — èn di abi fu du nanga tra sma nanga den afersi fu den”. A de „lekti taktaki ofu skrifi di abi te make nanga frutrowsani”. Fu di wi alamala abi belangstelling gi sma, meki wi e taki sontron bun sani fu trawan di e bow sma. Ma gongosa de tra fasi. A de „wan tori di no de yoysti fu pori na bun nen fu wan tra sma”. So wan taktaki ini algemeen de ogri èn a no de wan kresten fasi fu libi.

4. Leki fa wan skrifiman e taki dan fa gongosa e bigin, èn fu san a e kon?

⁴ Konkru di no de nanga na prakseri fu du ogri kan kenki tron ogri-ati gongosa. Na skrifiman Arthur Mee ben taki: „Nofotron a de so taki na gongosa di e du wan man ogri èn di kan broko en krinkrin, e bigin nanga konkru, na konkru di kande ini a fosi presi no e kon fu wan sani di ogri leki fu no abi noti fu du. A de wan fu den moro ogri sani na ini grontapu ma a e kon ini algemeen fu don. Wi e feni en moro furu a mindri den di no abi furu fu du èn no abi wan spesrutu marki ini a libi.”

5. San na a prenspari sani ini a ray fu Paulus na ini 1 Timoteyus 5:11-15?

⁵ Fu di soso taktaki kan go abra na ini gongosa, meki na apostru Paulus ben taki kontrari seiker konkruman. Bakadi a ben taki fu weduwe di ben bun fu kisi fu a gemeente yepi na skinfasi, a ben skrifi: „Poti. . .yongu weduwe na wan sey, bika te den seks angri fu den kon a mindri den nanga Krestes, . . . den e leri [na a srefi ten] fu de so srefi tu sondro fu du wan sani, fu di den e waka lontu na den oso sondro wan marki; iya, no wwan sondro fu du wan sani, ma den e tron so srefi tu konkruman [taktakmofo sma, Bigi Nyunsu beybri] èn e go bumuy nanga tra sma tori, e taki sani di den no mag fu taki. Fu dati-ede mi e winsi taki den yongu weduwe trow, meki pikin, sorgu wan oso èn no gi den gensman pasi fu skenpi. Te yu luku en bun, sonwan dray den srefi puru kba fu go waka baka Satan.”—1 Timoteyus 5:11-15.

6. San musu du fu wini swakifasi fu a sortu fu konkru di e meki gongosa kon?

⁶ Fu di Paulus ben skrifi na ondro krakti fu santa yeye, meki a no ben taki sani di no ben yoysti fu den umasma dati. San a ben taki e frudini fu wi go denki seryusu fu en. No wan uma di e gi en srefi na ini a dini fu Gado wani ’dray en srefi puru èn go waka baka Satan’. Ma efu wan kresten uma e si now taki a abi wan swaki gi na sortu taktaki di kan meki a fadon go ini na sondu fu gongosa? Dan nanga sakafasi a musu poti prakseri tapu na ray fu Paulus: „Uma sma musu de. . .seryusu, no sma di e gongosa.” A ben taki so srefi tu: „Meki den grani uma de nanga respeki na ini na waka nanga libi fu den, no de gongosaman” (1 Timoteyus 3:11; Titus 2:3). Brada tu musu teki na koni ray dati poti ini den libi nanga ala seryusufasi.

7. Te yu luku a beybri, fu san-ede yu ben sa taki taki wi alamala musu luku san wi e taki?

⁷ A no de fu taki, taki wi alamala e taki ten na ten fu tra sma, fu den ondrofeni fu den na ini na velddienst nanga so moro fara. Ma meki noyti wi ’sdon èn e taki teyge wi brada’ (Psalm 50:19, 20). Iya, na wan koni sani fu no taki tumusi furu, bika „na ini wortu di furu psa marki sondu no e mankeri, ma a sma di e dwengi en mofobuba, e handri nanga koni” (Odo 10:19). So bun wi musu kibri wi srefi gi konkru, awinsi a gersi taki a no ogri. Wi no abi fu taki alaten nomo fu tra sma, fu di wi abi tumusi moy tori di de regtfardiki, krin, moy, bun èn di de fu prèyse.—Filipi sma 4:8.

Fa konkru kan kon tron gongosa

8. Fu san-ede a no de alaten fowtu fu taki fu konpe kresten?

⁸ A no wan ogri sani fu taki fu na velddienst èn tra activiteit di abi te make nanga a dini fu Gado fu konpebribiman efu wi e taki sani soyfri èn no wan ogri e kon fu san wi e taki. Te yu luku en bun, te yu taki den sortu positief sani disi, dan den kan gi tra sma deki-ati. (Teki gersi nanga Tori fu den Apostru 15:30-33.) Son kresten ben taki fu na kotrow owruman Gayus, di na apostru Yohanes ben skrifi gi: „Mi lobiwan, yu e du wan kotrow wroko ini ala san yu e du gi den brada, èn dati de so tu gi vreemde sma, di na fesi fu na gemeente ben kotoygi fu na lobi fu yu” (3 Yohannes 5, 6). So bun a no de alatron wan fowtu sani fu taki fu konpekresten.

9. (a) Fa lekti taktaki kan dray kon tron gongosa fu na opregtiwan? (b) Sortu aksi wi kan aksi wi srefi nanga reti?

⁹ Ma, lekti taktaki kan kon tron gongosa di e gongosa opregtiwan efu wi go diki na ini den privé afersi, go suku sani a baka den buweygi fu ati fu den, ofu wiki prakseri fu no frutrow a waka nanga libi fu den. Wi ben sa kan meki a de wan bun gwenti fu aksi wi srefi: San mi e taki ben sa pori na bun nen fu wan tra sma? San mi e taki de tru? (Openbaring 21:8) Mi ben sa taki a srefi sani efu a de drape? A ben sa tyari pratifasi kon na ini a gemeente? Den sani di mi taki fu en kan meki a lasi grani fu dienst? Dyarusu ben kan de na ini mi ati? (Galasiyasma 5:25, 26; Titus 3:3) Na froktu fu den wortu fu mi ben sa de bun ofu ogri? (Mateyus 7:17-20) Mi ben sa taki den srefi sani disi fu den apostru? (2 Korente sma 10:10-12; 3 Yohannes 9, 10) Den sortu taktaki disi e fiti den sma di e gi grani na Yehovah?

10, 11. Leki fa Psalm 15:1,3 e taki, san wi no sa du efu wi wani de wan fisitiman fu Gado?

¹⁰ Te Psalm 15:1 e sori tapu den sma di e gi grani na Gado a e aksi: „O Yehovah, suma sa de wan fisitiman na ini yu tenti? Suma sa tan libi na tapu yu santa bergi?” Èn dan na psalmsingiman David e piki fu so wan sma: „En no ben gongosa nanga en tongo. En konpe a no ben du noti ogri, èn no wan syen a ben teki teyge en krosibey sabiman” (Psalm 15:3). Dyaso na wortu „gongosa” kon fu na Hebrew werkwortu di wani taki „go nanga futu” èn so bun wani taki „waka lontu”. Den Israèl sma ben kisi na komando: „No waka lontu fu panya gongosataki a mindri a pipri fu yu” (Leviticus 19:16, New International Version). Ibriwan sma di ’e waka lontu fu panya gongosataki’, no de wan fisitiman nanga mati fu Gado.

¹¹ Mati fu Gado no e du den konpe fu den noti ogri èn no sa teki no wan enkri syentori di abi fu du nanga opregti sabiman leki den de tru. Na presi fu panya falsi tori di abi fu du nanga konpebribiman èn fu meki na ogri syen di den e ondrofeni fu na sey fu gadolowsu sma kon moro ogri srefi, dan wi musu taki bun fu den. Noyti wi ben sa wani hebi na lay fu wi kotrow brada nanga sisa fu di wi e taki syen sani fu den.

Te problema opo ede kon

12. Fa Tori fu den Apostru 15:36-41 kan yepi wi efu wi kon ini a tesi fu konkru wan sma di wi ben abi trobi nanga en?

¹² Fu di wi de onvolmaakti meki wi kan kon ini tesi fu taki ogri fu wan sma di wi ben abi wan seryusu kesekese nanga en. Ma luku san ben psa di na apostru Paulus ben de so fara fu bigin en zendingwaka di meki tu. Aladi Barnabas ben teki a fasti bosroyti fu teki Markus go nanga den, dan Paulus no ben agri nanga dati, „fu di [Markus] ben gwe libi den na Pamfiliya èn no ben go nanga den na ini a wroko”. Tapu dati wan „bigi atibron ben kon” èn den ben naki prati. Barnabas ben teki Markus go nanga en na Cyprus, aladi Paulus ben teki Silas go nanga en psa Siriya nanga Silisiya (Tori fu den Apostru 15:36-41). A de krin, taki bakaten a trobi a mindri Paulus nanga Barnabas nanga Markus ben koti, bika Markus ben de nanga na apostru na ini Rome, èn Paulus ben taki bun fu en (Kolose sma 4:10). Awinsi fu dati-ede den no ben agri nanga makandra, toku noti ben sori taki den kresten dati ben waka lontu na konpekresten fu taki tori fu makandra.

13. Na ini sortu afersi ini a tori fu Petrus Paulus ben kakafutu gi a tesi di ben de drape fu konkru wan konpe kresten?

¹³ Paulus ben kaka futu so srefi tu gi wan tesi di kande ben kan kon èn pe a ben kan fadon go na ini takru konkru di a ben piri-ay gi Cefas (Petrus), di ben syen fu nyan èn abi demakandra nanga bribiwan fu den heiden sma fu di son dyu kresten di ben kon fu Yerusalen ben de drape. Na presi fu taki na Petrus baka „[Paulus] ben kaka futu gi en fesi na fesi” (Galasiyasma 2:11-14). Petrus so srefi tu no ben go konkru bakabaka fu na sma di ben piri-ay gi en. Bakaten, te yu luku en bun, a ben kari en „mi lobi brada Paulus” srefi (2 Petrus 3:15). Awinsi wan konpebribiman musu kisi piri-ay, dan disi no de fu dati-ede wan pardon ete fu go konkru en. Heri bun reyde de fu wi kibri wi srefi fu den sortu taktaki disi èn fu kaka futu gi na tesi fu panya ogri taktaki.

Fu san-ede wi musu tan na ay?

14. San na a moro prenspari reyde fu no arki ofu panya ogri konkru?

¹⁴ Na moro prenspari reyde fu san-ede wi no musu arki ogri konkru èn no teki prati fu panya en, de, taki wi wani plisi Yehovah di e krutu gongosa. Soleki wi ben taki kba, dan na fasi fa Gado e si den sortu taktaki disi, ben kon na krin di den Israèl sma ben kisi na komando: „Unu no musu waka lontu a mindri a pipri fu unu fu gongosa. Unu no musu opo tanapu teyge na brudu fu sma na yu sey. Mi na Yehovah” (Leviticus 19:16). Efu wi wani nyanbun fu na bun-ati fu Gado, dan ini den takimakandra fu wi wi no sa taki ogri fu no wan sma.

15. Suma na a moro bigi gongosaman, èn sortu krakti a kan abi tapu wi matifasi nanga Gado efu wi teki prati na ini ogri konkru?

¹⁵ Wan tra reyde fu no teki prati na ogri konkru de taki dati kan meki wi du leki Satan, na moro prenspari gongosaman fu Yehovah. Na moro prenspari feyanti disi fu Gado nanga reti ben kisi na nen „Ddibri” (Griki: di.a’bo.los), san wani taki „gongosaman”. Di Eyfa ben arki fa Satan ben gongosa Gado èn ben handri tapu a gron fu dati, dan a fosi libismapaar ben prati fu na moro bun Mati fu den (Genesis 3:1-24). Meki noyti wi broko kindi gi den ogri plan fu Satan èn kon na ini ogri taktaki di Gado no e feni bun èn di kan prati wi fu dati-ede fu wi moro bun Mati Yehovah Gado.

16. Fa wan ’gongosaman e prati den wan di abi frutrow demakandra’?

¹⁶ Wi no musu arki takru-ati konkruman, fu di den e prati mati. Nofotron a de so taki gongosaman e taki sani psa marki, e taki sani leki fa a no de , e ley èn e kobroyki wan lo wortu fu sutu faya. Na presi fu taki langalanga nanga wan sma, den e taki sani na en baka. Nofotron falsi sortu prakseri di no abi wan bun gron e wiki kon. Na so ’wan gongosaman e prati den di e lolo na wan frutrow fasi nanga makandra’. — Odo 16:28.

17. Fu san-ede wi musu kibri wi srefi fu no go dipi na ini lekti konkru?

¹⁷ Wi musu kibri wi srefi fu no go dipi na ini san de srefi lekti konkru. Fu san-ede? Fu di wan wortu di no taki nanga na prakseri fu du wan sma ogri, kan du ogri te a e taki furutron baka. A kan kon meki so moy ofu drai poti so, taki a e pori na bun nen fu wan sma di e gi en srefi na ini a dini fu Gado èn e fufuru en bun nen puru fu en. Efu dati ben psa, fa yu ben sa firi yu srefi dan efu yu ben sa de na presi pe a tori komoto ofu di ben seni en go moro fara? Sma ben sa kan si yu leki wan sma di makriki kan du ogri èn fu dati-ede no wani suku moro langa demakandra nanga yu. — Teki gersi nanga Odo 20:19.

18. Fa konkru kan meki wan sma tron wan leyman?

¹⁸ Wan tra reyde fu kibri yu srefi de, taki ogri konkru kan meki yu kon tron wan leyman. „Den wortu fu wan gongosaman de leki sani di a e swari nanga gridi, di trutru e saka go na den inisey pisi fu na bere” (Odo 26:22). San na den bakapisi efu yu swari ley èn taki den baka? We, srefi efu yu denki taki den ley de tru, yu e ley te yu e panya den. Te na ley fu en kon a krin, dan sma kan go si yu leki wan leyman. Yu wani dati disi psa? Gado no e aksi frantiwortu na falsi leriman fu kerki ley? Iya, èn na so a e aksi frantiwortu tu fu leymofo gongosaman. Yesus ben warskow: „Fu ibri soso wortu di sma e taki, den musu gi frantiwortu na a dey fu krutu; bika yu eygi wortu sa krutu yu” (Mateyus 12:36,37, Byington). Fu di „ibriwan fu wi sa gi frantiwortu na Gado fu en srefi”, yu ben sa wani dan taki a e krutu yu leki wan leymofo gongosaman? — Romen 14:12.

19. Fu san-ede wi kan taki taki ogri konkru kan de na kiri fu sma?

¹⁹ Ete wan reyde fu no panya ogri konkru de, taki a kan kiri sma. Iya, a kan tyari dede kon, èn pori na bun nen fu wan sma di no du noti. Son tongo na ’srapu feti-owru’, èn bita wortu de leki peyri di e sutu go tapu wan sma di de sondro fowtu. David ben begi: „Meki a de so, taki yu [Yehovah] kibri mi gi na frutrow takimakandra fu den ogriwan, gi na dyugudyugu fu den sma di e du san ogri, di srapu den tongo de neleki wan feti-owru, di seti den peyri, bita tongo, fu sutu komoto fu kibripresi go tapu den wan di de sondro fowtu” (Psalm 64:2-4). Yu ben sa wani de frantiwortu fu taki den sortu ogri sani disi fu wan tra sma taki a e firi taki a musu begi Gado fu kisi lekti so leki na psalmsingiman ben du? Yu ben wani kisi na fowtu san de leki na kiri fu sma?

20. (a) San kan psa nanga wan gongosaman di no abi berow fu so fara disi abi fu du nanga a gemeente? (b) Fa owruman musu luku bun ini a tori fu konkru nanga gongosa?

²⁰ Gongosa kan meki taki wan sma puru poti dorosey fu na organisâsi fu Gado; wan gongosaman kan sluit uit fu na gemeenschap, kande leki wan leyman di no abi berow. Ma so wan sortu opo du wan sani no e feni presi na den sma di e gi den srefi abra na lekti konkru. Owruman musu teki afersi luku ini begi èn si sani srapu a mindri soso konkru èn ogri-ati gongosa. Fu kan sluit uit, dan na sma di du ogri musu de wan ogri-ati gongosaman di no abi berow. Owruman no abi na makti fu sluit wan sma uit fu konkru di no wani taki furu èn di na belangstelling gi sma e meki a kon ma di no de wan sani di no de tru ofu di no de nanga a prakseri fu ogri-ati. Wan afersi no musu taki bigi psa marki, èn kotoygi musu de nanga bun buweysi fu sori taki gongosa de trutru na ini a tori (1 Timoteyus 5:19). Gongosaman di no abi berow ini a fosi presi e sluit uit so taki wan kba e kon na ogri-ati konkru èn a gemeente e kon kibri gi na srudeki fu sondu (1 Korente sma 5:6-8, 13). Ma noyti owruman musu feti so nanga sani taki den sluit wan sma uit tapu gron di no de ini beybri. Nanga yepi fu begi nanga ray nofotron den kan yepi a sma fu kisi berow, fu aksi pardon ofu na a tra sey meki en bun baka, èn go moro fara na fesi ini na dwengi fu na tongo.

A de gongosa?

21. San yu musu du na presi fu yu konkru wan sma di ben du ogri?

²¹ Wan koni odo e taki: „A sma di e waka lontu leki wan gongosaman, e tyari frutrow takimakandra kon a krin, ma a sma di de kotrow na ini yeye e tapu wan afersi” (Odo 11:13). Disi wani taki, taki efu yu sabi taki wan sma e du bigi sondu na kibrifasi, a de gongosa te yu taki fu en? Nôno, a no de fu taki, taki yu musu go taktaki fu na tori. Yu musu go taki nanga a sma di du na ogri, èn taki tranga nanga en fu kari na yepi fu den owruman (Yakobus 5:13-18). Efu a no du disi ini wan reydelek pisi ten, dan a broko di yu e broko-ede nanga na krinfasi fu na gemeente musu dwengi yu fu fruteri na tori na den owruman. — Leviticus 5:1.

22. Fu san-ede wi kan taki taki 1 Korente sma 1:11 no e gi wi makti fu konkru?

²² So wan fruteri fu na tori ben sa kan abi leki bakapisi taki na sma di du na ogri kisi tranga leri, èn dati no ben sa gersi taki a de wan prisiri sani. Toku a de so, taki wan sma di kon oefen nanga tranga leri, e koti na fruktu fu regtfardikifasi (Hebrew sma 12:11). Ogridu musu tyari kon na krin na den sma di ben poti fu handri den sortu afersi, no na konkruman di kan go taki fu en. Paulus ben fruteri kresten sma na ini Korente: „Den oso sma fu Chloey ben tyari kon na krin gi mi, mi brada, taki kesekese de na unu mindri” (1 Korente sma 1:11). Memre fu na osofamiri dati ben e konkru konpe bribiman? Nôno, ma na tori ben taki na wan frantiwortu owruman di ben kan opo du wan sani fu yepi den wan di abi yepi fanowdu sotaki den ben sa kan go doro tapu na pasi fu libi.

23. Sortu aksi tan fu wi go luku?

²³ Efu wi e yepi wan sma fu kibri en srefi fu no bumuy nanga ogri taktaki, dan wi e du wan sani fu na bun fu en. Wan koni odo e taki: „A sma di e luku bun nanga en mofo, e kibri en sili. A sma di e opo en mofobuba bradi — a sa kisi pori” (Odo 13:3). A de krin so bun taki bun reyde de fu kibri wi srefi gi ogri konkru nanga gadolowsu gongosa. Ma fa wi kan tapu ogri konkru? Na tra artikel sa taki fu dati.

San na den piki fu yu?

◻ San na a difrenti a mindri lekti konkru nanga gongosa?

◻ Fa konkru kan go abra na ini gongosa?

◻ San na wan tu reyde fu kibri wi srefi gi ogri konkru?

◻ Fu san-ede a no de wan afersi fu gongosa te wi e go fruteri (den owruman) fu na bigi ogridu fu wan tra sma?

[Prenki na tapu bladzijde 9]

Sorgu taki noyti yu meki a fowtu fu sutu wan sma na ini en baka fu di yu e konkru en