Fa yu e si den Tin Komando?

SMA e si den Tin Komando fu na beybri na difrenti fasi. Den di fu Seybi Dey Adventistsma e taki taki ala sma de na ondro den Tin Komando. Den sma fu Luther Kerki e si den leki den „moro bun lin fu libi di oyti ben gi èn di sma kan bow den libi a tapu.” „Efu yu frustan den bun”, na so wan katolik takiman tyari kon na krin, „dan den Tin Komando e gi te now ete wan fondamenti fu libi wan kresten libi.”

So bun, aladi son kerki grupu e bribi taki wi musu hori den Tin Komando letter fu letter, dan trawan e si den soso leki wan tyariman fu wan gosontu moreel waka nanga libi. Fu tru, leki fa na Encyclopaedia of Religion and Ethics e taki, „dan kande seyker no wan papira de di libisma skrifi di abi moro bigi krakti tapu na kerki nanga moreel libi fu, sma leki den dekaloog [den Tin Komando]”. Fu san-ede disi de so? Luku fosi san den e taki. Den de syatu, krin fu frustan èn krakti. Ma fa yu musu si den Tin Komando? San den wani taki gi yu?

[Faki na tapu bladzijde 3]

DEN TIN KOMANDO

1. Yu no musu abi no wan tra Gado na mi fesi.

2. Yu no musu meki gi yu srefi wan popki, di koti nanga anu ofu wan vorm di gersi iniwan sani na ini heymel na tapu ofu di de na grontapu na ondro ofu di de na ini den watra na ondro grontapu. Yu no musu boygi gi den, noso meki sma buweygi yu fu dini den. . .

3. Yu no musu teki a nen fu Yehovah, yu Gado, tapu wan fasi di no warti . . .

4. Fu memre na sabatdey fu hori en santa, yu musu du dienst èn yu musu du ala yu wroko siksi dey langa . . . Yu no musu fu du no wan wroko, no yu, no yu manpikin, no yu umapikin, no yu mansrafu, no yu umasrafu, no yu osometi, no den freymde sma di e libi na ini yu portu . . .

5. Respeki yu ppa nanga yu mma . . .

6. Yu no musu kiri.

7. Yu no musu du sutadu

8. Yu no musu fufuru

9. Yu no musu gi wan falsi fruklari leki wan kotoygi kontrari tra sma na yu sey.

10. Yu no musu abi bigi-ay tapu na oso fu tra sma na yu sey. Yu no musu abi bigi-ay tapu na uma fu tra sma na yu sey, no tapu en mansrafu, no tapu en umasrafu, no tapu en mankaw, no tapu en buriki, no tapu wan sani di de fu tra sma na yu sey. — Exodus 20:3-17.