’No syen gi na bun nyunsu’

„Mi no e syen gi na bun nyunsu; a de, te yu luku en bun, na krakti fu Gado fu kisi frulusu gi ibri sma di abi bribi” — Rome sma 1:16.

1. Fa sma e teki bun nyunsu leki fa a gwenti de, ma fa sma fu na grontapu di no abi bribi ben sa luku na bun nyunsu fu Gado kownukondre?

SAN e gersi gi na wan sma leki bun nyunsu, kande wan tra sma no e si leki bun nyunsu. Leki fa a gwenti de, dan wan sma di e tyari bun nyunsu kon, den e gi wan switikon, èn nanga prisiri den sa arki san a abi fu taki. Ma, na Beybri e taki a fesi taki sma fu a grontapu di no abi bribi no ben sa si na bun nyunsu fu Gado kownukondre nanga na boskopu fu frulusu leki wan prisiri sani. — Teki gersi 2 Korente sma 2:15, 16.

2. San na apostru Paulus ben taki fu na bun nyunsu di a ben meki bekenti, èn fu san-ede na boskopu di a ben preyki de te now ete bun nyunsu?

² Na apostru Paulus ben de wan sma di den ben seni fu tyari bun nyunsu gi sma. Fa a ben denki fu na ordru di a ben kisi? A ben taki: „Mi e angri fu meki na bun nyunsu bekenti so srefi na unu di de drape na ini Rome. Bika mi no e syen gi na bun nyunsu” (Rome sma 1:15, 16). Efu nyunsu musu de te now ete bun, pikinmoro 2000 yari baka di na apostru Paulus ben skrifi den kresten drape na ini Rome, dan trutru a ben sa musu de bun nyunsu di e tan ala ten. A de te yu luku en bun „têgo bun nyunsu”. — Openbaring 14:6.

3, 4. Fu san-ede na apostru Paulus ben taki, taki a no ben syen gi na bun nyunsu?

³ Fu san-ede na apostru Paulus ben taki, taki a no ben syen gi na bun nyunsu? Fu san-ede a ben sa kan syen gi dati? Fu di a no ben de wan popi boskopu, bika a ben abi fu du nanga wan man di den ben kiri leki wan wiswasi ogri sma na wan pinapostu, wan sani di fu tru ben poti en na ini wan tumusi takru leti te yu luku ala dorosey sani. Dri nanga afu yari na man disi ben waka Palestina lontu nanga na bun nyunsu èn a ben miti nanga hebi gens fu na sey fu den dyu, spesrutu den kerkifesiman. Èn now Paulus ben miti nanga wan srefi sortu feyantifasi, fu di a ben tyari na nen fu na wiswasi man dati. — Mateyus 9:35; Yohanes 11:46-48, 53; Tori fu den Apostru 9:15, 20, 23.

⁴ Fu so wan gens ede, meki sma ben kan si Paulus nanga en konpe disipri fu Yeyses Krestes leki den de sma di ben abi wan sani di den ben musu syen gi. A de tru, Paulus ben tanapu now na fesi wan sani di fositen en srefi ben si leki wan sani fu syen gi. En srefi ben abi prati na ini fu poti syen na tapu den bakaman fu Yeyses Krestes (Tori fu den Apostru 26:9-11). Ma a ben tapu nanga na libifasi dati. A bakapisi ben de taki en, makandra nanga trawan di ben tron kresten, ben nyan pina fu hebi frufolgu. — Tori fu den Apostru 11:26.

5. Fa Paulus ben tyari kon na krin fu san-ede a no ben syen gi na bun nyunsu?

⁵ Efu wan sma ben syen fu de wan bakaman fu Yeyses Krestes, dan a ben sa abi wan libisma luku tapu na afersi. Na apostru Paulus no ben du dati. Na a tra sey, leki wan fruklari fu san-ede a no ben syen gi na bun nyunsu di a ben preyki, a ben taki: „A de, te yu e luku en bun, na krakti fu Gado fu kisi frulusu gi ibri sma di abi bribi” (Rome sma 1:16). Na krakti fu Gado no de wan sani fu syen gi, efu a e wroko na tapu wan disipri fu Yeyses fu meki na prakseri, di warti prèyse, fu na glori Gado di Yeyses Krestes srefi ben de wan anbegiman èn prèyseman fu en, kon tru. — Teki gersi nanga 1 Korente sma 1:18; 9:22, 23.

Preyki bun nyunsu na a heri grontapu

6, 7. (a) Sortu frantiwortu fu na sey fu na bun nyunsu Yehovah Kotoygi e pruberi fu du so bun leki a kan èn nanga sortu bakapisi? (b) Ala di noyti wi wani fu meki frede tapu wi fu gi kotoygi, toku san kan de sontron fanowdu? (Luku futuwortu.)

⁶ Neleki Paulus na a ten dati, na so den kotoygi fu Yehovah na ini na ten disi de disipri fu en glori Manpikin, Yeyses Krestes. Na den Kotoygi disi fu en Yehovah ben gi na gudu disi fu „na glori bun nyunsu” (1 Timoteyus 1:11). Yehovah Kotoygi no misi fu du na hebi frantiwortu disi, èn den e kisi tranga fu no syen gi en (2 Timoteyus 1:8). A de tumusi prenspari taki noyti wi meki frede ofu syen tapu wi fu gi kotoygi èn fu meki sma sabi taki wi de Yehovah Kotoygi.a

⁷ Fu gi kotoygi na so wan deki-atifasi èn sondro frede abi leki bakapisi taki na nen fu na Moro Hey Gado e meki bekenti na a heri grontapu èn taki a bun nyunsu fu en kownukondre e preyki na ala sey fu grontapu. Na Manpikin fu Gado ben taki: „Na bun nyunsu disi fu na kownukondre sa preyki na a heri grontapu pe libisma e libi leki wan kotoygi gi ala nâsi, èn dan na kba sa kon”, èn noyti pasi ben sa kan gi taki san a taki a fesi no ben sa kon tru (Mateyus 24:14). Na bun nyunsu e preyki now na ini moro leki 210 kondre èn na kba fu na preykiwroko disi no doro ete. Sondro fu syen gi na bun nyunsu èn fu di wi e luku nanga deki-ati go na a ten di e kon, meki wi e begi neleki den fositen disipri fu Yeyses Krestes: „Now dan, Yehovah, . . . gi yu srafu taki den tan taki na wortu fu yu fri èn sondro frede.” — Tori fu den Apostru 4:29.

8. Fu san-ede Yehovah Kotoygi no e meki gens na ini ala nâsi fu grontapu meki den lasi ati?

⁸ Ala di a de tru, taki Yehovah Kotoygi na ini ala nâsi fu grontapu e ondrofeni ogri-ati nanga gens, toku disi e psa leki wan kontru fu san ben taki a fesi leki wan marki fu sma ben sa kan kon sabi tru anbegiman fu na wan libi èn tru Gado (Yohanes 15:20, 21; 2 Timoteyus 3:12). Na presi fu lasi ati èn kon na ini wan broko saka yeyefasi, dan preykiman fu na bun nyunsu fu dati-ede e kisi na dyaranti taki den abi na bun-ati fu Gado èn de wan pisi fu na organisâsi, di Gado e feni bun, fu na Universele Soeverein, Yehovah.

9. Fu san-ede a no abi trobi taki wi abi na heri grontapu teyge wi?

⁹ No frigiti noyti: Wi abi na yepi fu na Moro Hey Gado fu na heri universum. Sobun, a no abi trobi, awinsi na heri grontapu nanga ala en kerki grupu nanga politik partèy de teyge wi. Gado wan enkri koboru Manpikin ben abi na heri grontapu teyge en, èn wi no e syen fu de na ini na srefi situwâsi. So leki a ben taygi en apostru: „Efu grontapu abi ogri-ati fu unu, sabi taki a ben abi ogri-ati fu mi bifo unu. Efu unu ben sa de wan pisi fu grontapu, dan grontapu ben sa lobi san de fu en. Fu di now unu no de wan pisi fu grontapu, ma mi ben teki unu puru fu grontapu, fu dati-ede meki grontapu abi ogri-ati fu unu.” — Yohanes 15:18,19.

10. Fu sortu presi furu fu na frufolgu fu den Kotoygi komoto, èn fu san-ede den no e syen gi dati?

¹⁰ Yehovah Kotoygi frudragi frufolgu fu dati-ede na a heri grontapu, ma moro furu na ini den kondre fu na so kari krestenhèyt. So wan frufolgu fu na sey fu na krestenhèyt no e buweysi taki den Kotoygi no de kresten. Na presi fu dati, a e horibaka gi san den e taki, taki den de tru kresten, Kotoygi fu na Gado nanga Tta fu Yeyses Krestes, namku Yehovah. Fu di den de kotoygi fu Gado, meki den no e syen te den e kisi frufolgu fu den sortu reyde disi fu kerki. Na deki-ati di na apostru Paulus ben gi na den fosi yarihondro kresten fu no syen abi fu du heri bun nanga na libi fu Yehovah Kotoygi na ini na ten disi. — Luku Filipi sma 1:27-29.

Na moro bun nyunsu di kan meki bekenti

11. Fu san-ede na teki fu na nen fu Yehovah Kotoygi no e wani taki, taki wi no de bakaman fu Yeyses Krestes moro?

¹¹ Yehovah Kotoygi nanga deki-ati ben teki na nen fu den leki wan kontru fu na pramisi fu Yehovah na en frubontu pipri na ini Yesaya 43:10. Ma disi no e wani taki, taki den no e waka baka Yeyses Krestes moro. Yeyses na den Tiriman, na sma di den e waka baka na moderi fu en. En srefi de wan Kotoygi fu Yehovah. Te yu luku en bun, a de na moro prenspari Kotoygi fu Yehovah. — 1 Timoteyus 6:13; Openbaring 1:5.

12. Sortu nyunsu Yehovah Kotoygi e preyki na a heri grontapu èn fu san-ede?

¹² Na boskopu di den kotoygi disi fu Yehovah e preyki na a heri grontapu de na moro bun nyunsu di oyti ben sa kan preyki. No wan tiri ben sa kan de moro bun gi na libismafamiri leki na Mesiyas kownukondre di Yehovah opo, fu tiri tapu na grontapu fu na libismafamiri, fu bay den fri, èn fu du disi a ben seni en wan enkri koboru Manpikin kon (Yesaya 9:6, 7). Den sma fu na grontapu di na bun nyunsu disi fu na kownukondre e preyki gi, e kisi na okasi fu teki en èn fu sori taki den de warti fu kisi na presenti fu têgo libi na ini libisma volmaaktifasi na tapu wan paradèys grontapu.

13. Fu san-ede wi kan de seyker taki na Mesiyas Kownukondre tiri sa de na moro bun wan di de, èn san den Kotoygi e rikomanderi sondro fu syen?

¹³ Efu Yeyses ben de klari fu dede wan takru-ati dede fu bay den sma fri di ben sa tron en onderdaan, dan seyker a sa wani gi den na moro bun tiri di de. Wi e rikomanderi ibri libisma leki kriaturu na grontapu: Tron wan kotrow onderdaan, di e gi yesi na a tiri dati. Wi no e syen gi na tiri di wi e rikomanderi opregti na a heri libismafamiri. Wi no e kikbak fu preyki na kownukondre, ala di na sani disi kan tyari frufolgu kon gi wi. Neleki na apostru Paulus, na so ibriwan fu wi e taki: „Mi no e syen gi na bun nyunsu.”

14. Leki fa Yeyses ben taki, dan o fara na Kownukondre preyki ben sa go na ini a ten fu wi?

¹⁴ Yeyses ben taki a fesi taki na preyki fu na bun nyunsu fu na Kownukondre ben sa feni presi na a heri grontapu èn na profeytitori disi di e panya esi-esi go na ala sey fiti gi so wan boskopu (Markus 13:10). A no ben draydray fu taki a fesi taki na preyki fu Yehovah kownukondre ben sa doro te na den moro farawe presi — iya, te na den uku fu grontapu (Tori fu den Apostru 1:8). Yeyses ben sabi taki awansi pe sma ben sa de fu feni tu, en kotrow bakaman ben sa du wan seryusu muyti fu miti den nanga na bun nyunsu fu na Kownukondre.

15, 16. (a) Suma de warti fu na bun nyunsu miti den? (b) Fu san-ede na preykiwroko sa doro wan kba ala di frufolgu de fu na sey fu na organisâsi fu Ddibri?

¹⁵ A nomru fu den sma fu na grontapu e go now ini den milyardmilyard sma èn den de na ala den bigi kondre nanga bigi eylanti na ini den se fu grontapu. Toku no wan pisi fu grontapu pe sma e libi ben de tumusi fara gi Yehovah Kotoygi fu du wan muyti fu doro drape nanga na bun nyunsu. Na heri grontapu pe sma e libi de na agersi futubangi fu Yehovah Gado (Yesaya 66:1). Libisma leki kriaturu di e libi na ala pisi fu en futubangi, de warti fu miti den nanga na boskopu disi fu frulusu.

¹⁶ Na bun nyunsu fu wi ten de nyunsu, di e meki sma koloku, fu wan kownu tiri di opo kba èn di de na ini anu fu na Mesiyas. Yeyses ben sabi taki ala di na moro takru-ati frufolgu fu na sey fu na organisâsi fu Ddibri ben sa de, toku Gado yeye ben sa pusu tru bakaman fu na Mesiyas fu du ala muyti, so taki „na bun nyunsu disi fu na kownukondre ben sa preyki na a heri grontapu pe sma e libi” leki wan sani di de trutru so. — Mateyus 24:14.

No syen gi Yeyses Krestes nanga Yehovah

17. (a) Fu sortu sani tru anbegiman no e syen gi? (b) Sortu gronprakseri Yeyses ben tyari kon na krin na ini Markus 8:38 èn san disi wani taki?

¹⁷ Na Moro Hey Gado no ben draydray fu gi ensrefi wan nen, Yehovah; dan en kotrow anbegiman so srefi no musu syen gi na nen dati. Tru anbegiman e prisiri fu sma sabi èn erken den leki den sma di e gi no na tra sani ma na En wwan ala anbegi nanga a gi di den e gi En yesi. Yeyses ben tyari na regel ofu gronprakseri na ini Markus 8:38 kon a krin: „A sma di na ini na sutadu èn sondu geslakti disi e syen gi mi nanga mi wortu, na Manpikin fu libisma sa syen so srefi gi en te a sa kon na ini na glori fu en Tta nanga den santa engel.” Na a srefi fasi a de, taki efu wan sma ben sa syen gi na Gado nanga Tta fu Masra Yeyses Krestes, Yehovah nanga reti sa syen gi en. Èn iniwan kriaturu di Yehovah ben sa syen gi fu na ontrow libifasi fu en, no ben sa warti fu tan na libi na iniwan pisi fu a kondre fu Gado na ini heymel ofu na grontapu. — Lukas 9:26.

18. (a) Fu san-ede Yeyses wortu na ini Mateyus 10:32, 33 musu skrifi poti na ini wi ati nanga wi yeye? (b) San e psa nanga den sma di fu frede ede gi libisma e taki, taki den no sabi Yeyses nanga Yehovah? (Gi eksenpre di abi den fondamenti tapu na futuwortu.)

¹⁸ Meki den wortu fu Yeyses Krestes di e kon now skrifi poti na ini wi ati nanga wi frustan: „Ibriwan sma fu dati-ede di taki na fesi sma taki a de na ini wánfasi nanga mi, mi tu sa taki na fesi mi Tta, di de na ini heymel, taki mi de na ini wánfasi nanga en; ma ibriwan sma di e taki na fesi sma taki a no sabi mi, na sma dati mi sa taki tu na fesi mi Tta di de ini heymel taki mi no sabi en” (Mateyus 10:32, 33; Lukas 12:8, 9). Tapu den srefi gron disi a de so tu taki ibriwan sma di ben sa taki taki a no sabi na Gado nanga Tta fu Masra Yeyses Krestes, En ben sa taki taki a no sabi a sma. Den no ben sa feni en warti fu de wan memre fu na osofamiri di Yeyses Krestes de na moro prenspari Manpikin fu en. Fu dati-ede a ben sa way puru a pasi na a fasti ten fu Gado.b

19, 20. (a) Fu san-ede den sma di begi fu Yehovah nen kon santa no abi noti fu syen gi? (b) San den Kownukondre preykiman, di no ben e frede, du, èn nanga sortu yepi?

¹⁹ Na Moderi begi di Yeyses ben leri en disipri, sa kon tru: „Wi Tta na ini heymel, yu nen musu kon santa. Yu kownukondre musu kon. Yu wani musu psa, neleki na ini heymel, so srefi na grontapu” (Mateyus 6:9, 10). Te dati e psa, dan den lobi disipri fu Yeyses no sa abi noti fu syen gi. Yehovah nen sa kisi grani, kon santa, no wwan fu na sey fu milyunmilyun sma di e libi now èn noyti abi fu dede, ma so srefi fu na sey fu milyardmilyard sma fu na libismafamiri di a sa kari komoto fu na grebi fu den kon na doro ini na ten fu en dusun yari Kownukondre tiri. Den sa kisi na okasi fu libi fu têgo na wan paradèys grontapu.

²⁰ Sondro fu syen, dan den preykiman disi fu na bun nyunsu fu na kownukondre, di no e frede, ben man fu gi kotoygi na a heri grontapu, ala di gens ben de ala sey, fu di den abi wan krakti moro hey leki libisma na baka den — na yepi fu den heymel engel. Fu dati-ede meki Yehovah Kotoygi ’e frede Gado èn e gi en glori’. — Openbaring 14:6, 7.

No syen fu frede Gado èn fu gi en glori

21. San Yehovah Kotoygi du sondro fu syen, èn nanga sortu bakapisi?

²¹ Yehovah Kotoygi buweysi taki den no e syen fu frede Gado èn fu gi en glori, èn srefi fu kobroyki en eygi nen, Yehovah. Disi tyari bigi blesi kon gi den. Den blesi disi kon leki wan kotrow kontru fu den pramisi fu na Moro Hey Gado. Fa disi ben de wan poti reti fu sani gi en leki na wan libi èn tru Gado, na Soeverein fu na universum!

22. Fu san-ede Yehovah Kotoygi sa kon tanapu na fesi hebi frufolgu, ma sortu prisiri den sa kisi?

²² Na ini a krosibey ten di e kon, dan grontapu tiriman sa dray kon teyge kerki tirimakti èn figi den alamala puru — so srefi na krestenhèyt (Openbaring 17:16, 17). Na bakapisi sa de taki Yehovah Kotoygi sa psa wan pisiten fu hebi frufolgu fu na sey fu den grontapu elementi. Den no ben sa kan horidoro èn tan na libi efu na têgo Gado no de nanga den. Ma a de trutru nanga den, èn den sa abi na prisiri fu si fa na Gado di den Kotoygi e anbegi kotrow sa figi puru ala den sortu antikresten feyanti di de teyge Yehovah. Den no sa kisi syen, fu di den bere sa puru kon a doro èn fu di den sa kisi pori leki feyanti fu na tru teyokrasiya, ma den sa abi bigi prisiri te den sa singi gi Yehovah: „Fu ten di no skotu te ten di no skotu yu de Gado.” — Psalm 90:2.

23. Fu san-ede Yehovah Kotoygi no abi noti fu syen gi, èn san sa de na bakapisi?

²³ Den sa prisiri na ini Gado, na Tta fu Yeyses Krestes, di nanga yepi fu en na libismafamiri ben bay kon fri fu nyanbun fu têgo libi na ini libisma volmaaktifasi èn koloku na tapu wan paradèys grontapu. Fa Yehovah sori taki a de wan makti Gado nanga yepi fu Krestes Yeyses! O bun Yehovah ben sori taki a koni èn a de nanga lobi ala di a no e kobroyki en almakti na wan fowtufasi! Fu dati-ede wi no abi noti fu syen gi ini na tori fu en ofu en wan enkri koboru Manpikin, Yeyses Krestes. Wi no e syen fu de preykiman fu na glori bun nyunsu, di e taki fu na makti fu Yehovah Gado di e wini ala sani nanga yepi fu Krestes Yeyses, di ben taki na ini den lasti yuru fu en grontapu libi: „Abi deki-ati! mi wini grontapu” (Yohanes 16:33). Efu wi e teki na libifasi disi, meki wi waka ala ten baka na eksenpre fu na apostru Paulus, di no ben syen noyti gi na bun nyunsu. Efu wi e du dati, dan na Almakti Gado no sa syen gi wi.

[Foetoewortoe]

Aksi fu luku san wi ben leri

◻ Sortu yeyefasi wi musu abi neleki na apostru Paulus ini na tori fu na preyki fu na bun nyunsu èn fu san-ede?

◻ Fu san-ede na boskopu di Yehovah Kotoygi e preyki de na moro bun nyunsu di de?

◻ Sortu warskow Yeyses ben gi fu ibriwan sma di ben sa syen gi en te a ben sa kon na ini en Kownukondre glori?

◻ San e psa nanga den sma di e taki, taki den no sabi Yeyses nanga Yehovah?

◻ San den preykiman fu bun nyunsu ben man fu du sondro fu syen gi dati, èn fu san-ede?