A boen njoensoe disi moesoe preiki fosi
„A boen njoensoe disi moesoe preiki fosi ini ala den nâsi.” — MARKUS 13:10.
1, 2. San na wan marki foe kon sabi den Kotoigi, èn foe san ede?
FOE san ede Jehovah Kotoigi e tan horidoro foe preiki? A de seiker taki na heri grontapoe sma sabi wi foe wi poebliki diniwroko ede, efoe a de oso foe oso, na tapoe den strati, noso te wi e miti sma na tra okasi. Na ibri okasi di fiti, wi e meki sma kon sabi wi leki Kotoigi èn e proeberi na wan konifasi foe meki a boen njoensoe bekènti di wi e si leki wan goedoe. Te joe e loekoe en boen, dan wi ben kan taki dati a diniwroko disi na wan marki di e meki sma sabi wi! — Kolosesma 4:6.
2 Prakseri foe dati pikinso — ibri leisi te sma e si ini a birti foe den wan groepoe mansma, oemasma, nanga pikin-nengre di weri krosi di e fiti ai èn di abi boekoetas na den, dan san na a fosi sani di den sma disi e prakseri nofo tron? Na: ’Oh, loekoe den lomsoesma (noso den orthodoxsma) e kon baka!’ noso: ’Loekoe den pinkstersma (noso den baptistsma) e kon baka!’ Nôno. Sma sabi foe den sortoe relisi disi, taki a no de so dati a heri osofamiri e doe wan oso-foe-oso-diniwroko. Kande wan toe relisi groepoe e seni wan toe so-kari „zendeling” go na bepaalde kontren foe go wroko gi no moro leki toe jari, ma den gewoon memre foe den no e teki prati na iniwan foe den sortoe diniwroko disi. Na heri grontapoe sma sabi soso Jehovah Kotoigi foe a faja di den abi foe prati a boskopoe foe den na ibri okasi di e fiti. Èn sma sabi den foe den tijdschrift foe den, A Waktitoren nanga Ontwaakt! — Jesaja 43:10-12; Tori foe den Apostel 1:8.
Tra fasi leki den fesiman foe krestenhèit
3, 4. Fa den e tjari den fesiman foe krestenhèit foeroe tron kon na krin ini njoensoe?
3 Heri tra fasi leki dati, ibri leisi baka, njoensoe meki bekènti taki foeroe foe den fesiman foe krestenhèit ini son kondre na sma di abi seks nanga jongoe pikin, bidrigiman di e handri kontrari boen gwenti nanga wet, nanga sma di e kori trawan na bidrigi fasi. Den wroko foe den na skin fasi nanga a kefalek bigifasi fa den e libi, de krin foe si gi ala sma. Wan pôpi skrifiman foe singi ben taki en boen ini a singi foe en, di abi leki nen „Jesus ben sa weri wan Rolex [wan toemoesi diri gowtoe oloisi] ini en telefisi programa?” A poti na aksi: „Jesus ben sa teki prati na politiek te A ben kon baka na Grontapoe? A ben sa abi a di foe toe oso foe en na ini Palm Springs [wan kontren ini California pe goedoe sma e libi] èn A ben sa proeberi foe no meki sma sabi omeni goedoe a abi?” Fa den wortoe foe Jakobus e fiti: „Oenoe libi wan bigi fasi foe libi na grontapoe èn oenoe gi oensrefi abra na takroe lostoe. Oenoe meki oen ati kon fatoe tapoe a dei foe a srakti.” — Jakobus 5:5; Galasiasma 5:19-21.
4 A krosibei matifasi di den fesiman foe krestenhèit abi nanga den politiekman èn srefi a teki di den e teki prati na verkiezing leki politiek kandidaat, e tjari den kon na krin leki disiten sabiman foe Boekoe nanga Fariseiman. Na a srefi ten, ini kondre so leki den Verenigde Staten nanga Kanada, den relisi groepoe e lasi moni, foe den hei kostoe ede foe kroetoe afersi èn foe strafoe di leisi gi den fesiman foe krestenhèit, di de wan bakapisi foe a jajo fasi fa den e tjari densrefi nanga pikin-nengre èn nanga bigisma. — Mateus 23:1-3.
5. Foe san ede den fesiman foe krestenhèit no boeweisi taki den na „a getrow èn koni srafoe”?
5 Nanga reti Jesus ben kan taigi den relisi fesiman ini a ten foe en: „Heloe foe oenoe, sabiman foe Boekoe nanga Fariseiman, hoigriman! bika oenoe gersi den grebi di den karki weti, di e loekoe moi na dorosei troetroe, ma foe inisei den lai nanga dede sma bonjo nanga ala sortoe doti sani. So toe na a srefi fasi, na dorosei oenoe e sori oensrefi regtfardiki gi sma troetroe, ma na inisei oenoe foeroe nanga hoigrifasi èn nanga kroektoedoe.” Foe dati ede meki Gado no gi den fesiman foe krestenhèit, awinsi den na lomsoe, anitri, orthodox, noso iniwan groepoe di no de na wan spesroetoe relisi, a wroko foe preiki a boen njoensoe. Den no boeweisi taki den na a „getrow èn koni srafoe” di den ben taki na fesi foe den. — Mateus 23:27, 28; 24:45-47.
Foe san ede a boen njoensoe moesoe preiki fosi?
6. Sortoe sani sa pasa didjonsro?
6 Te Markus e taki sjatoe foe a komando foe Jesus foe preiki a boen njoensoe na ala den nâsi, dan en wawan e gebroiki a wortoe „fosi”. (Markus 13:10; teki gersi Mateus 24:14.) A fasi fa J. B. Phillips skrifi en, na: „Bika bifosi a kaba e kon, na evangelie moesoe preiki na ala nâsi.” A fasi fa den e gebroiki a wortoe „fosi”, e sori taki tra sani o pasa baka te na evangelie wroko doe na heri grontapoe. A pramisi bigi banawtoe nanga a regtfardiki tiri foe Krestes tapoe a njoen grontapoe, o de den sani toe di sa pasa. — Mateus 24:21-31; Openbaring 16:14-16; 21:1-4.
7. Foe san ede Gado wani taki a boen njoensoe moesoe preiki fosi?
7 So boen, foe san ede Gado wani taki a boen njoensoe moesoe preiki fosi? Wán reide na foe di a de wan Gado foe lobi, geregtighèit, koni, nanga krakti. Ini a kontroe foe den sani di Jesus taki, di skrifi na Mateus 24:14 nanga Markus 13:10, wi kan feni wan toemoesi moi fasi fa den eigifasi disi foe Jehovah de foe si. Meki wi go loekoe sjatoe den eigifasi disi wan-froe-wan, èn si fa den abi foe doe nanga a preiki foe a boen njoensoe.
A boen njoensoe nanga a lobi foe Jehovah
8. Fa a preiki foe a boen njoensoe e sori a lobi foe Gado? (1 Johanes 4:7-16)
8 Fa a preiki foe a boen njoensoe e sori a lobi foe Gado? Na a fosi presi, bika a no de wan boskopoe soso gi wán ras noso groepoe. A de a boen njoensoe gi „ala den nâsi”. Gado lobi a libisma famiri someni taki a ben seni en wan-enkri gebore Manpikin kon na grontapoe foe de leki wan froeloesoe-ofrandi gi den sondoe foe ala libisma, no soso gi wán ras. Na apostel Johanes ben skrifi: „Gado ben lobi libisma someni taki a ben gi en wan-enkri gebore Manpikin, so taki ibriwan sma di e poti bribi na ini en no ben sa kisi pori, ma ben sa abi têgo libi. Bika Gado no ben seni en Manpikin kon na grontapoe so taki a ben sa kroetoe grontapoe, ma so taki grontapoe ben sa kisi froeloesoe nanga jepi foe en” (Johanes 3:16, 17). Foe troe, a boen njoensoe, wan boskopoe di e pramisi wan njoen grontapoe foe vrede, wánfasi, nanga geregtighèit, na wan boeweisi foe a lobi foe Gado. — 2 Petrus 3:13.
A boen njoensoe nanga a krakti foe Jehovah
9. Foe san ede Jehovah no gebroiki den makti relisi foe krestenhèit foe preiki a boen njoensoe?
9 Fa a krakti foe Jehovah de foe si nanga jepi foe a preiki foe a boen njoensoe? Prakseri foe disi: Soema a gebroiki foe doe a wroko disi? A ben de den moro makti relisi organisâsi foe krestenhèit, so leki a Lomsoe Kerki noso wan prenspari anitri groepoe? Nôno, foe di den abi foe doe nanga politiek, den no e fiti gi a toewijzing (Johanes 15:19; 17:14; Jakobus 4:4). A goedoe foe den nanga a matifasi di den abi nanga a groepoe heiman di e tiri èn a krakti di den abi na den tapoe, no naki na ati foe Jehovah Gado, èn so a de toe nanga a theologie di abi foeroe foe doe nanga kerki gwenti. A makti foe libisma no ben de fanowdoe foe meki a wani foe Gado pasa. — Sakaria 4:6.
10. Soema Gado froekisi foe doe a preikiwroko?
10 A de so leki fa na apostel Paulus ben taki ini en brifi gi a gemeente foe Korente: „Oenoe e si a kari di oenoe ben kisi, brada, taki a no ben kari foeroe koniman na skin fasi, no foeroe maktiwan, no foeroe foe hei gebore; ma Gado ben teki den law sani foe grontapoe foe meki den koniman kisi sjen; èn Gado ben teki den swaki sani foe grontapoe, so taki a kan meki den tranga sani kisi sjen; èn Gado ben teki den sani foe grontapoe di no abi grani èn den sani di sma e wisiwasi, den sani di no de, meki den sani di de, tron noti, so taki no wan skin ben sa skepi na fesi foe Gado.” — 1 Korentesma 1:26-29.
11. Sortoe troe tori foe den Kotoigi meki taki den de so aparti?
11 Jehovah Kotoigi no abi foeroe memre di goedoe ini na organisâsi foe den, èn kwetikweti no wan di abi makti na politiek sei. A krin neutraalfasi foe den na ini politiek afersi, wani taki dati den no kan abi krakti na politiek sei na tapoe sma. Na kontrari, nofo tron den ben fadon na ini anoe foe hebi froefolgoe di ben kon, foe di relisi nanga politiek fesiman ben gi faja foe dati ini a di foe twenti jarihondro disi. Ma, ala di den disipel foe Nasisme, Fasisme, Komunisme, nationalisme, nanga falsi relisi ben gi faja foe ogri gens kon na tapoe den Kotoigi, tokoe den Kotoigi no e preiki a boen njoensoe na heri grontapoe nomo, ma a nomroe foe Kotoigi kon moro bigi toe. — Jesaja 60:22.
12. Foe san ede den Kotoigi ben abi boen bakapisi?
12 Foe soema den Kotoigi e taki dati den kisi den boen bakapisi foe den? Jesus ben pramisi den disipel foe en: „Oenoe sa kisi krakti te a santa jeje e kon na oen tapoe, èn oenoe sa de kotoigi foe mi na Jerusalem nanga na heri Judea nanga Samaria èn te na den moro farawe kontren foe grontapoe.” So boen, san ben o de soifri a fonten foe den boen bakapisi foe den? Jesus ben taki: „Oenoe sa kisi krakti te a santa jeje e kon na oen tapoe.” So srefi ini a ten disi, krakti di e komoto na Gado, no na den sani di libisma man doe, ben de a moro prenspari reide gi den boen bakapisi foe den Kotoigi ini a diniwroko foe den na heri grontapoe. A e gersi leki, Gado e gebroiki den moro swaki sma, foe doe a moro bigi wroko ini a historia foe gi sma leri. — Tori foe den Apostel 1:8; Jesaja 54:13.
A boen njoensoe nanga a koni foe Jehovah
13. (a) Foe san ede den Kotoigi e wroko na wan friwani-fasi èn sondro foe den kisi pai? (b) Fa Jehovah piki a spotoe di Satan e spotoe en?
13 Friwani wrokoman e preiki a boen njoensoe. Jesus ben taki: „Oenoe kisi foe noti, gi foe noti” (Mateus 10:8). Foe dati ede, no wan Kotoigi foe Jehovah e kisi pai foe a dini di den e dini Gado, èn den no e soekoe wan pai toe. Te joe loekoe en boen, dan den no abi kolekte srefi tapoe den konmakandra foe den. Foe di den e gi densrefi na a diniwroko na wan fasi taki den no e prakseri den eigi boen nomo, meki den e prisiri foe gi Gado wan sani foe piki Satan Didibri, a sma di e kragi Gado. A jeje gensman disi foe Gado, taki, foe taki en leti, dati libisma no ben sa dini Gado, efoe a no ben sa de gi den eigi boen nomo. Ini en koni, Jehovah ben gi wan piki di boen srefisrefi, tapoe a kragi foe Satan — miljoenmiljoen loyaal kresten Kotoigi di e preiki a boen njoensoe oso foe oso, na tapoe strati, èn na tra okasi, e gi a piki. — Job 1:8-11; 2:3-5; Odo 27:11.
14. San na „a koni di kibri” di Paulus e sori go na tapoe?
14 Wan tra boeweisi foe a koni foe Gado foe meki a boen njoensoe preiki, na taki a Kownoekondre pramisi srefi na wan sani di e sori a koni foe Gado. Na apostel Paulus ben skrifi: „Now wi e taki koni na mindri denwan di lepi, ma no a koni foe a seti foe sani disi, so srefi no a koni foe den tiriman foe a seti foe sani disi, di sa tron noti. Ma wi e taki a koni foe Gado ini wan santa kibritori, a koni di kibri, di Gado ben pramisi bifo den seti foe sani, gi a glori foe wi.” A „koni [dati] di kibri”, e sori go na den koni prakseri foe Gado foe tjari wan kaba kon na a opo di sma e opo densrefi kontrari Gado, wan sani di ben bigin ini Eden. A koni foe a santa kibritori dati, ben tjari kon na krin ini Jesus Krestes, di de a moro prenspari sma ini a boen njoensoe foe Gado Kownoekondre.a — 1 Korentesma 2:6, 7; Kolosesma 1:26-28.
A boen njoensoe nanga a geregtighèit foe Gado
15. Fa wi doe sabi taki Jehovah na wan Gado foe geregtighèit? (Deuteronomium 32:4; Psalm 33:5)
15 Wi e si a prensparifasi foe a wortoe „fosi” ini Markus 13:10, spesroetoe te a abi foe doe nanga geregtighèit. Jehovah na wan Gado foe geregtighèit di e kon safoe nanga lobi boen-atifasi. A e taki nanga jepi foe en profeiti Jeremia: „’A sma di e meki ensrefi bigi, moesoe meki ensrefi bigi na tapoe disi, dati a abi inzicht nanga sabi foe mi, dati mi na Jehovah, a Sma di e sori lobi boen-atifasi, geregtighèit nanga regtfardikifasi na grontapoe; bika mi abi prisiri ini den sani disi’, na san Jehovah taki.” — Jeremia 9:24.
16. Nanga sortoe agersitori wi kan sori taki geregtighèit wani taki foe warskow fosi?
16 Fa a geregtighèit foe Jehovah de foe si ini a tori foe a preiki foe a boen njoensoe? Meki wi agersi disi nanga wan mama di meki wan switi soekroeskrati koekoe di den sa njan te den fisiti kon moro lati na dei. Efoe a e libi a koekoe na tapoe a koekroe tafra sondro foe taigi den pikin foe en oten den mag njan a koekoe, san sa de a natuurlijk lostoe foe na ati foe den pikin? Wi alamala ben de pikin-nengre wan ten! A finga foe a pikin sa wani foe tesi a koekoe dati! We, efoe mama ben misi foe gi a joisti warskow, dan a no sa abi wan boen reide foe gi trangaleri. Na a tra sei, efoe a mama e taki krin taki den sa njan a koekoe baka ten te den fisiti kon, èn foe dati ede den no mag fasi a koekoe, dan a gi wan krin warskow. Efoe den pikin e trangajesi en, dan a abi a reti foe handri na wan tranga èn joisti fasi. — Odo 29:15.
17. Fa Jehovah sori geregtighèit na wan spesroetoe fasi sensi 1919?
17 Foe di Jehovah abi geregtighèit, a no sa tjari kroetoe kon na tapoe na ogri seti foe sani disi sondro foe gi a warskow fosi di de fanowdoe. Dati meki, spesroetoe sensi 1919, baka di a fosi grontapoe orlokoe ben tjari „pen foe banawtoe”, Jehovah ben meki den Kotoigi foe en preiki a boen njoensoe fajafaja na heri grontapoe (Mateus 24:7, 8, 14). Den nâsi no kan taki nanga reti taki den no sabi noti foe na aparti warskow disi.
Ofara a boen njoensoe preiki na grontapoe?
18. (a) Sortoe boeweisi de taki den Kotoigi e wroko na den farawe presi? (b) Sortoe tra eksempre joe sabi?
18 A boekoe Last Places—A Journey in the North (Den lasti presi — Wan rèis ini a Noordsei foe grontapoe), e gi wi wan idea oboen a wroko disi foe gi sma leri de na heri grontapoe. A skrifiman foe a boekoe disi e froeteri taki, di a ben loekoe den se karta gi na èilanti Foula, di de farawe, wán foe den Shetland Èilanti na a noordsei foe Scotland, dan den karta ben abi marki na tapoe, di ben sori taki na „ala presi lontoe na èilanti WKS (boto di soengoe), RKS (klipston), LDGS (langa smara lanki foe wan klipston), nanga OBS (sani di e hendri) de”. Den marki disi di de tapoe den karta „ben warskow a sipiman di wani go, foe tan farawe foe drape. A se lontoe Foula na wan toemoesi kefarlek presi di kan kiri sma èn a meki taki seiribotoman, nanga sma di e go drape gi wán dei nomo, èn srefi a spesroetoe groepoe wrokoman foe na oema-kownoe foe Ingrisikondre, di e doe wroko gi a boen foe a poebliki, no man go tapoe na èilanti; ma — so leki fa mi ben kon si ini wan toe dei — disi no ben de so gi Jehovah Kotoigi”. A ben taki moro fara: „Neleki fa den ben soekoe finifini na ini pôti birti foe den bigi foto èn na ini den pôti kondre, foe feni sma di wani drai den libi, na so den ben soekoe sma toe foe den drai den libi kon na a bribi foe den, drape na tapoe Foula di de so farawe.” A ben si taki Andreas, wan sma di e libi drape, ben abi wan eksemplaar foe A Waktitoren, di wan sma ben libi na en stoepoe wan toe moen pasa. A ben taki moro fara: „Wán wiki na baka, mi ben sa si wan eksemplaar foe [Ontwaakt! ini Deinsitongo] na den Faroes [Noord Se èilanti], èn toe moen na baka, wan eksemplaar foe [ A Waktitoren ini Deinsitongo] ini Nuuk, Groenlanti.” Fa disi na wan libilibi boeweisi foe a fajafaja wroko foe Jehovah Kotoigi ini den kontren dati na a noordsei foe grontapoe!
San e poesoe den Kotoigi meki den e tan go doro nanga a preikiwroko?
19, 20. (a) San e poesoe den Kotoigi foe Jehovah meki den e tan preiki? (b) Sortoe aksi sa kisi wan piki tra leisi?
19 A no de foe taki, dati a no de wan makriki sani foe preiki oso foe oso gi freimdesma, awinsi omeni jari wan sma de wan Kotoigi kaba. San e meki taki den kresten disi e tan go doro dan? Na a gi di den gi densrefi abra leki kresten na Jehovah, èn a firi taki den abi frantiwortoe. Paulus ben skrifi: „Efoe, now mi e meki a boen njoensoe bekènti, dan mi no abi no wan reide foe skepi, bika den ben froeplekti mi. Troetroe, heloe foe mi, efoe mi no ben meki a boen njoensoe bekènti!” Troe kresten abi wan boskopoe di wani taki libi, so boen, fa den kan hori dati gi densrefi? A gronprakseri foe broedoe-paiman, te wan sma misi foe warskow trawan biten gi kefar, na wan reide di e boeweigi den foe preiki a boen njoensoe. — 1 Korentesma 9:16; Esekièl 3:17-21.
20 Fa den e preiki a boen njoensoe dan? Foe sortoe prenspari sani ede meki den Kotoigi abi boen bakapisi? Sortoe sani foe a diniwroko nanga na organisâsi foe den, e jepi sma foe kon sabi den Kotoigi leki a troe relisi? Na artikel di e kon now, sa piki den aksi dati.
[Foetoewortoe]
a Foe kisi moro bodoi foe froeklari a koni foe Gado èn a „santa kibritori”, loekoe Hulp tot begrip van de bijbel, bladzijde 1658, di a Watchtower Bible and Tract Society of New York, Inc, tjari kon na doro.
Joe e memre disi ete?
◻ San e meki taki Jehovah Kotoigi de difrenti foe den fesiman foe krestenhèit?
◻ Fa a preikiwroko e sori a lobi, a krakti, nanga a koni foe Gado?
◻ Fa a preiki foe a boen njoensoe e sori a geregtighèit foe Gado?
◻ San e meki Jehovah Kotoigi e tan go doro ini a diniwroko?
[Prenki na tapoe bladzijde 23]
A no abi bisi ofara sma de, Jehovah Kotoigi wani miti den