Suma begi Gado e yere?

„BEGI e du moro sani leki san grontapu e dren fu den.” Na so na Ingrisi puwema skrifiman fu na di fu tina neygi yarihondro, Alfred Tennyson, ben taki. Ma furu sma ben begi Gado te den weri fu kisi gosontu, koloku, vrede nanga tanbun. Son sma e denki srefi taki Gado no e arki begi trutru. Toku na beybri e kari en na „Yereman fu begi”. — Psalm 65:2.

Disi nanga reti ben kan tyari yu so fara fu aksi: ’Suma na a „Yereman [disi] fu begi”? Wi musu doro spesrutu marki efu wi wani a yere wi begi? Fa wi musu begi? Èn suma begi Gado e yere?’

Gado ben yere den begi fu den

Begi de netso owru leki a libismafamiri. Prakseri Abel pikinso, wan manpikin fu wi fosi ppa nanga mma, Adam nanga Eva. Di a ben pristeri Gado wan ofrandi di Gado ben feni bun, a no de fu taki, taki disi ben go makandra nanga wortu fu tranga begi nanga prèyse. — Genesis 4:1-5.

Na ini na di fu neygi yarihondro bifo wi gewoon teri dan Gado profeyti Yona „ben begi Yehovah, en Gado, komoto fu den inisey pisi fu na fisi” di Gado ben gi a wroko fu swari en. Na begi dati ben abi bun bakapisi? Iya, bika „baka wan pisiten Gado ben komanderi na fisi, so taki a ben spiti Yona tapu drey gron”. Ne Yona ben go na Ninefey fu du a wroko fu en di a ben kisi fu Gado. — Yona 1:17; 2:1, 10; 3:1-5.

Di David feyanti ben kon lontu en na ini den dey fu na Israèl fu owruten, a ben bari taki: „Ow Yehovah, yere mi begi; poti yesi toku na mi tranga begi. Piki mi na ini yu kotrowfasi, na ini yu regtfardikifasi” (Psalm 143:1). Gado ben yere den begi fu David fu kisi frulusu, fu di en feyanti noyti ben man fu puru en na pasi. Fu dati-ede a ben kan taki: „Yehovah de krosibey fu ala sma di e kari en, ala sma di e kari en na ini trufasi.” — Psalm 145:18.

Doro den tumusi prenspari marki

A de krin sobun taki Gado ben yere den begi fu en futuboy na ini owruten. A no de fu taki, taki den no ben begi wan Gado sondro nen leki soso wan gwenti. Ini bribi den ben begi Yehovah, „na Moro Heywan . . . fu heri grontapu” (Psalm 83:18). Sobun, efu den begi fu wi wani abi bun bakapisi, dan sortu tumusi prenspari marki wi musu miti dan?

Begi soso Yehovah. A de wan soso sani — srefi wan sani di no de na ini beybri — fu begi falsi gado, di den kruktu-gadopopki fu den di no abi libi abi wan mofo di no e taki, yesi di no e yere, anu di no e firi, futu di no e buweygi èn wan gorogoro di no e meki bbari (Psalm 115:5-7; 1 Yohanes 5:21). Kontrari den sortu gado disi di no warti noti, dan Yehovah e opo du wan sani fu na bun fu den sma di e lobi èn e dini en. Na so fu eksenpre den profeyti fu na falsi gado Baäl someni yarihondro psa kba ben begi en tranga fu seni faya komoto fu heymel. Ala di den ben begi fu mmanten te kon miti neti, toku Baäl no ben kan yere na begi fu den. Ne Eliya ben seni wan faya begi go na Yehovah, di ben yere en begi fu di a ben seni faya kon di ben bron na ofrandi tapu na altari krin-krin. — 1 Kownu kapitri 18.

Go na Gado nanga yepi fu Yeyses Krestes wawan. Yehovah Gado seni en wan enkri koboru Manpikin Yeyses Krestes kon na grontapu fu dini leki wan lusuprèys di ben kan bay na libismafamiri puru fu sondu nanga dede (Yohanes 3:16, 36; Rome sma 5:12; 6:23). Den sma di ben meki kobroyki fu a seti disi, Gado ben opo fu dati-ede wan nyun pasi gi den fu kon na en ini begi. Fositen futuboy fu Gado, so leki na Psalmskrifiman David, ben seni en begi langalanga go na Yehovah (Psalm 4:1; 17:1; 55:1; 102:1). Ma na nyun pasi ben waka psa Yeyses, di ben taki: „No wan sma e kon na a Tta leki nanga yepi fu mi. Efu unu e aksi wan sani na ini mi nen mi sa du en” (Yohanes 14:6, 14). No wan presi na ini na beybri e sori taki begi musu seni go na Gado nanga yepi fu wan tra sma.

Te wi leri sobun kba taki wi musu begi Gado ini na nen fu Yeyses, dan Gado sa yere wi begi soso efu wi e begi Yehovah nanga yepi fu en Manpikin. Ma moro reyde de fu san-ede Yehovah no e yere moro furu fu den begi.

Fu san-ede Gado no e yere begi

Gado no sa yere wi begi soso fu di te wi e begi wi e teki wan spesrutu fasi. Beybri no e aksi taki wi skin musu de ini wan spesrutu fasi te wi e begi. A no de fu taki taki saka kindi kande kan sori sakafasi na fesi fu Gado. Ma a bun fu begi, ala di yu e tanapu ofu e sdon na tafra, e ddon ini bedi ofu e du yu aladey wroko (Danièl 6:10, 11; Markus 11:25). Yehovah e yere srefi begi di no de fu yere nanga yesi! Bifo Nehemiya ben taygi na kownu fu Persiya taki a ben angri fu bow kon bun baka den fadon skotu fu Yerusalen, „[dan Nehemiya na ini en srefi] ben begi na Gado fu heymel”, èn Yehovah ben yere a begi dati (Nehemiya 2:1-6). Sobun efu na fasi fa wi e de no de a prenspari tori, fu san-ede meki Gado no e yere someni begi dan?

Yehovah no e prisiri nanga den begi fu na ogriwan. Iya, „a wan di e puru en yesi fu a yere fu na wèti — srefi a begi fu en na wan tegu sani” (Odo 28:9). Nanga yepi fu na profeyti Yesaya Gado ben taygi en tranga-ede pipri: „Te unu e bradi unu inisey anu opo, mi e kibri mi ay gi unu. Srefi efu unu e begi furu, mi no e arki; unu eygi anu kon furu nanga a trowe fu brudu” (Yesaya 1:15). A no de fu taki, taki Gado no e yere den begi fu den ogriwan, awinsi den e seni go na Gado nanga yepi fu Krestes.

Gado no e yere hoygri begi. „Te unu e begi,” na so Yeyses ben taki, „unu no musu de leki den hoygriman: bika den lobi fu tanapu e begi na ini den snoga, èn na tapu den uku fu den bradi pasi fu sma si den. Fu tru, mi e taygi unu: den kisi den payman dorodoro kba.” Yeyses ben taki moro fara: „Ma unu, te unu e begi, go dan na ini unu inisey kamra, èn baka te unu tapu unu doro, begi unu Tta di e si sani na kibrifasi; dan unu Tta di e si sani na kibrifasi sa pay unu” (Mateyus 6:5, 6). Yeyses no ben fruklari nanga disi taki ala begi na publiki no bun, bika en srefi ben begi na publiki fu tra sma yere (Mateyus 14:19). Ma Krestes ben sori taki a fowtu fu begi na publiki soso fu tra sma si èn yere yu èn fu yu kisi a prèyse fu den.

Yehovah no e yere begi di no de opregti èn pe sma e taki ala ten baka na srefi sani. Yeyses ben taki: „Ma te unu e begi, no taki den srefi sani ala tron baka, so leki den sma fu den nâsi e du, bika den e prakseri taki Gado sa yere den te den e kobroyki furu wortu. No kon de leki den, bika Gado, unu Tta, sabi sortu sani unu abi fanowdu bifo unu e aksi en fu dati srefi” (Mateyus 6:7, 8). Furu sma na ini owstusey kondre e prakseri taki ibri tron te den e dray wan begimiri (wan tromu pe begi di skrifi na tapu papira de na ini), den tranga begi e taki ete wantron. Milyun milyun tra sma e kobroyki wan rowskransi ofu e taki begi fu wan begibuku. Ma den sma di wani Gado yere den sa tan farawe fu begi pe den e taki alatron a srefi sani baka èn sa poti prakseri morofara na den ray fu Yeyses.

’Begi na a fasi disi’

Yeyses ben gi morofara san furu sma e kari na Modelbegi (Mateyus 6:9-13). A ben taki: „Unu musu begi dan na a fasi disi: ’Wi Tta na ini den heymel, yu nen musu de santa.’” Fu di wi e kari Gado leki „wi Tta”, dan wi e sori taki trawan tu abi wan krosibey matifasi nanga en leki sma di de wan pisi fu en osofamiri fu anbegiman. Na kon santa fu Gado nen, Yehovah, de wan fu den moro prenspari sani, ma fa a sa santa en nen? Fu di a sa puru den ogriwan, meki a sa soyfri en nen fu ala syen di ben poti a tapu. — Eseykièl 38:23.

„Yu kownukondre musu kon. Yu wani musu psa, so leki na ini heymel, sotu na grontapu”, Yeyses ben taki morofara. A tiri fu Gado, so leki disi e kon a krin na ini na Mesiyas kownukondre fu en Manpikin, heri esi sa opo du sani nanga ala gensman fu na soevereiniteit fu Gado èn puru den fu grontapu (Danièl 2:44). Ma san wi e wani taki te wi e aksi efu a wani fu Gado mag psa na grontapu so leki na ini heymel? Nanga disi wi e aksi efu Gado mag du san a abi na prakseri nanga grontapu, so srefi na puru fu den gensman fu en. — Openbaring 16:14-16; 19:11-21.

Bakadi Yeyses poti na santa di Gado nen musu santa nanga den prakseri fu En na a fosi presi na ini na Modelbegi, dan a e go morofara: „Gi wi tide wi brede fu tide.” Te wi e aksi Yehovah fu sorgu gi den fanowdu sani ” fu tide”, dan disi e meki wi bribi go a fesi na ini en makti fu sorgu gi den ala dey sani fu en anbegiman. Disi a no wan aksi fu sani pe wi e prakseri wi srefi nomo fu abi furu psa marki.

Yeyses ben taki morofara: „Èn gi wi pardon fu den payman fu wi, so leki wi tu e gi pardon na den sma di de na payman na wi” (Lukas 11:4 e sori taki den „payman” disi na „sondu”.) Wi kan kisi pardon fu Gado soso efu wi gi pardon na den sma di e sondu na wi (Mateyus 6:14, 15). Na apostru Paulus ben taki fu dati-ede nanga leti: „So leki Yehovah gi yu pardon fri, na so unu musu du tu”. — Kolose sma 3:13.

Yeyses ben tapu na Modelbegi nanga den wortu: „Èn no tyari wi kon na ini tesi, ma fri wi fu na ogriwan.” Yehovah noyti e tesi sma „nanga ogri sani” (Yakobus 1:13). Tesi e kon fu na ogriwan, Satan Ddibri, ma ini na beybri den e taki sontron fu na pasi di Gado e gi fu bepaalde sani psa, taki na en e du den (Ruth 1:20, 21; Preykiman 7:13). Leki piki tapu na begi: „No tyari wi kon na ini tesi”, Yehovah no sa libi en kotrow futuboy ala di a e gi pasi taki tesi miti den. Iya, „Gado de kotrow èn a no sa gi pasi taki yu kon ini tesi psa san yu kan tyari, ma nanga na tesi a sa sorgu tu gi na pasi fu komoto, so taki yu sa man tyari en”. — 1 Korente sma 10:13.

Te wi e aksi fu kon fri fu na ogriwan, dan wi e aksi ofu Ddibri no mag kisi pasi fu wini wi leki Yehovah kotrow anbegiman. Efu wi de loyaal futuboy fu Gado, dan wi kan abi na frutrow taki a sa yere na begi disi, fu di na apostru Petrus ben skrifi: „Yehovah [sabi] fa fu fri sma, di e gi den srefi na ini a dini fu Gado, puru fu tesi” (2 Petrus 2:9). Èn fa na pisi disi fu na Modelbegi de prenspari bika Satan Ddibri „e waka lontu leki wan krasi lew, e suku fu swari wan sma”! — 1 Petrus 5:8.

Fu san-ede Gado e yere den begi fu den

Gado e yere den begi fu en kotrow anbegiman. Fu san-ede? Fu wan pisi Yehovah e du disi fu di den e begi en wawan èn e kon na en nanga yepi fu Yeyses Krestes. Den e tan farawe fu hogridu èn hoygri begi nanga begi pe alatron baka den e taki a srefi sani. Na presi fu taki na Modelbegi alatron baka leki wan versje, dan Yehovah Kotoygi e kobroyki den tumusi moy gronprakseri fu a begi disi fu tyari den eygi dipi inisey firi kon a fesi na Gado. Ma moro reyde de fu san-ede Gado e yere den begi fu den.

Den sma di Gado e yere den begi fu den, doro den fondamenti marki. Paulus ben kari disi di a ben skrifi: „A suma di e kon na Gado, musu bribi taki a de èn taki a e tron a sma di o pay a sma di e suku en seryusu” (Hebrew sma 11:6). Luku pikinso den tu fondamenti penti di e kon now: Yehovah e yere den begi fu (1) den sma di e bribi taki Gado de nanga (2) den sma di „e suku en seryusu”.

Na ini na fosi yarihondro na hèyden man Cornelius, di ben gi en srefi na ini a dini fu Gado, ben de so wan sma. A ben bribi taki Gado de èn a ben suku en seryusu. San Cornelius ben du di a ben kisi soyfri sabi? We, a ben gi en srefi abra na Yehovah Gado nanga en heri ati èn ben sori dati, fu di a ben teki dopu. A de krin, taki, bakadati Cornelius ben abi wan krosibey matifasi nanga Gado, èn disi ben sa abi wan positief krakti na tapu den begi fu en. — Tori fu den Apostru 10:1-44.

Bifo Cornelius ben teki dopu, dan den begi fu en ben „opo go na fesi fu Gado soso leki wan sani fu memre” (Tori fu den Apostru 10:4). Ma di a ben gi en srefi abra na Gado tapu na fondamenti fu na bribi fu en na ini Yeyses frulusu ofrandi èn a ben meki den dopu en, dan Cornelius ben gi en srefi abra na Yehovah sondro fu poti wan kondisi. Nanga disi wan wondru frutrow banti ben du kon a mindri Gado nanga na man disi, di ben gi en srefi na ini na dini fu Gado — wan matifasi di ben meki Cornelius ben kisi na grani fu begi di no ben skotu (Yakobus 4:8). A ben kan go na en heymel Tta nanga yepi fu Yeyses Krestes ini na fruwakti, taki Gado sa yere en. Disi wi kan taki fu ala sma di nanga yepi fu Krestes Yeyses e gi den libi abra na Gado èn e teki dopu. Den abi so srefi na grani fu begi di no skotu.

Seyker yu ben sa wani taki Gado yere den begi fu yu. Efu fu dati-ede na a momenti disi yu no e dini Yehovah leki wan fu en anbegiman di gi en srefi abra, dan a ben sa de wan koni sani fu suku en seryusu! Feti na baka wan libifasi leki di fu Cornelius, èn Gado sa yere den begi fu yu.

[Prenki na tapoe bladzijde 6]

Fa na gi di Cornelius gi en srefi abra na Gado nanga en dopu ben abi krakti na tapu den begi fu en?