’Na kotrow srafu’ nanga en tiri skin
„Suma de trutru na kotrow èn koni srafu, di en masra poti tapu en oso-knekti fu gi den a nnyan fu den na a reti ten?” — MATEYUS 24:45.
1. Fu san-ede Yehovah de klari fu gi makti abra, èn na suma spesrutu a ben gi makti abra?
YEHOVAH na wan Gado fu orde. A de so srefi na Fonten fu ala reti makti. Fu di Yehovah abi frutrow na ini na loyalitèyt fu en kotrow mekisani, meki a de klariklari fu gi makti abra na trawan. Na sma di a ben gi moro furu makti, na en Manpikin, Yeyses Krestes. Iya, Gado „poti ala sani na ondro en futu, èn meki a tron edeman fu ala sani ini na tori fu na gemeente”. — Efesiya sma 1:22.
2. Fa Paulus e kari na kresten gemeente, èn na suma Krestes ben gi makti abra?
2 Na apostru Paulus e kari na kresten gemeente „Gado osofamiri” èn e taki taki Gado ben poti Yeyses Krestes leki en kotrow Manpikin tapu na osofamiri disi (1 Timoteyus 3:15; Hebrew sma 3:6). Krestes, fu en sey, e gi makti abra na den memre fu Gado osofamiri. Wi kan frustan disi fu Yeyses wortu na ini Mateyus 24:45-47. A ben taki: „Suma de trutru na kotrow èn koni srafu, di en masra poti tapu en oso-knekti fu gi den na nnyan fu den na a reti ten? Koloku na srafu dati de te en masra kon èn e feni en e du so! Fu tru, mi e taygi unu: A sa poti en tapu ala den gudu fu en.”
Na fosi yarihondro oso-tiriman
3. Suma na a „kotrow èn koni srafu”, èn sortu wortu e kobroyki gi den leki aparti memre?
3 Fu na stuka di wi stuka den Buku finifini, meki wi kon sabi taki den memre fu Gado osofamiri di kisi salfu nanga santa yeye, na tapu sortu ten tu de makandra, den alamala, „na kotrow èn koni srafu”, „basya” ofu „oso-tiriman”. Den e kari den aparti memre fu Yehovah osofamiri ”oso-knekti” ofu „wan skin fu futuboy”. — Mateyus 24:45; Lukas 12:42, Studibeybri, futuwortu.
4. Sortu aksi Yeyses ben tyari kon a fesi syatu bifo a dede, èn nanga suma a ben teki en srefi gersi?
4 Wantu mun bifo en dede, Yeyses ben poti na aksi di skrifi na ini Lukas 12:42: „Suma de trutru na kotrow, èn koni basya, di en masra sa poti tapu en skin fu futuboy fu gi den na a reti ten den marki fu fanowdu nnyan?” Dan, wantu dey bifo en dede, Yeyses ben teki en srefi gersi nanga wan man, di ben de so fara fu go na wan dorosey kondre, èn di ben kari en srafu kon èn ben frutrow en gudu na den. — Mateyus 25:14.
5. (a) Oten Yeyses ben poti tra sma fu sorgu gi den gudu fu en? (b) Sortu moro bigi wroko Krestes ben gi na den sma di ben sa de wan pisi fu na oso-tiriman di de fu furu memre?
5 Oten Yeyses ben poti trawan fu sorgu fu den gudu fu en? A ben de baka en opobaka. Na ini den wortu fu en ini Mateyus 28:19, 20, di furu sma sabi, Krestes ini na fosi presi ben gi den sma di ben sa de memre fu en oso-tiriman, di de wan grupu sma, wan moro bigi wroko fu gi sma leri èn fu meki disipri. Den futuboy ben sa meki na zending gron di Yeyses ben bigin wroko na tapu ini na ten fu en grontapu diniwroko kon moro bigi, fu di leki aparti sma den e gi kotoygi „te na den moro fara kontren fu grontapu” (Tori fu den Apostru 1:8). Disi ben wani taki, taki den ben o du wroko leki „boskopuman na ini na presi fu Krestes”. Leki „basya fu santa kibritori fu Gado” den ben sa meki disipri èn prati yeye nnyan gi den. — 2 Korente sma 5:20; 1 Korente sma 4:1, 2.
Na tiri skin fu na osofamiri
6. San na fosi yarihondro basya-grupu ben kan gi ondro krakti fu santa yeye?
6 Den kresten di kisi salfu nanga santa yeye ben sa de makandra na basya ofu oso-tiriman fu na meystri, èn den ben kisi na wroko fu prati yeye nnyan na a reti ten gi den aparti memre fu na osofamiri fu Gado. Na mindri den yari 41 nanga 98 G.T., dan memre fu na fosi yarihondro basya grupu ondro krakti fu na santa yeye ben skrifi 5 historiya buku, 21 brifi, èn na buku Openbaring fu na bun fu den brada fu den. Den skrifi disi ondro krakti fu santa yeye abi tumusi bun yeye nnyan gi den oso-knekti, dati wani taki gi den aparti salfuwan fu Gado osofamiri.
7. Nanga sortu prakseri Krestes ben piki wan pikin nomru fu man fu na srafu-grupu?
7 Ala di ala salfu kresten makandra de na osofamiri fu Gado, toku furu buweysi de taki kresten ben teki wan pikin nomru fu man a mindri na srafu grupu fu dini leki wan tiri skin di sma kan si. Na fruku historiya fu na gemeente e sori taki den twarfu apostru pe yu ben abi Matiyas na ini, ben de na fondamenti fu na fosi yarihondro tiri skin. Tori fu den Apostru 1:20-26 e sori wi disi. Ini na tori fu na poti fu wan tra sma ini na presi fu Yudas Iskariyot, den ben sori drape tapu „en wroko fu hori ay tapu sani” èn fu „na diniwroko nanga apostruwroko disi”.
8. San ben de den frantiwortu fu na fosi yarihondro tiri skin?
8 So wan wroko fu hori ay na tapu sani ben abi na ini tu taki den apostru ben abi na frantiwortu fu poti man di ben bun nofo na ini posisi fu dienst èn fu orga na diniwroko. Ma a ben wani taki moro. A ben wani taki tu fu gi leri èn fu tyari penti fu leri kon a krin. Fu meki Yeyses pramisi na ini Yohanes 16:13 kontru, dan „na yeye fu na waarheid” ben sa musu tiri na kresten gemeente na wan progresief-fasi na ini ala waarheid. Leti na a bigin, dan den sma, di ben teki na wortu èn ben tron dopu kresten di ben kisi salfu nanga santa yeye, ben tan poti den srefi tapu „na leri fu den apostru”. Te yu luku en bun, dan na reyde fu san-ede den ben rikomanderi seybi man èn poti den na wroko fu sorgu gi na fanowdu afersi fu prati nnyan na skinfasi ben de, taki den „twarfu” ben sa kan tan fri fu ’gi den srefi abra na begi nanga na diniwroko fu na wortu’. — Tori fu den Apostru 2:42; 6:1-6.
9. Fa na fosi tiri skin ben kon de erfu memre, ma fu san-ede leki fa a e sori meki na nomru dati no ben tyari kon wantewante tron twarfu baka?
9 A gersi taki na tiri skin biginbigin ben de soso Yeyses apostru. Ma disi ben sa tan so? Na wan sani fu 44 G.T. Herodus Agripa I ben meki den kiri na apostru Yakobus, na brada fu Yohanes (Tori fu den Apostru 12:1, 2). A de krin taki noti du fu poti wan tra sma na ini en presi leki apostru, so leki ben psa ini na tori fu Yudas. Fu san-ede? Fu di Yakobus sondro degedege ben dede kotrow leki na fosiwan fu den twarfu apostru. Yudas na a tra sey ben de wan ogriman di fadon komoto na bribi èn wan tra sma ben musu teki en presi fu tyari na nomru fu fondamenti ston fu yeye Israèl sma kon tapu twarfu. — Efesiya sma 2:20; Openbaring 21:14.
10. Oten èn fa na fosi yarihondro tiri skin ben kon moro bigi, èn fa Krestes ben kobroyki en fu tiri Gado osofamiri?
10 Den fosi memre fu na fosi yarihondro tiri skin ben de apostru, man di ben waka nanga Yeyses en di ben de kotoygi fu en dede nanga opobaka (Tori fu den Apostru 1:21, 22). Ma na situwasi ben musu kenki. Di den yari ben psa, dan tra krestenman ben gro kon miti yeyemarki èn den ben poti den leki owruman na ini na gemeente fu Yerusalen. No moro lati leki na ini na yari 49 G.T., dan na tiri skin ben kon moro bigi èn a ben abi na ini en, boyti den apostru di ben tan abra, so srefi wan nomru fu tra owruman na ini Yerusalen (Tori fu den Apostru 15:2). Na so na tiri skin no ben seti nanga fasi di de strak èn no kan kenki, ma a ben de krin taki Gado ben tiri sani so, taki na fasi fa na tiri skin ben seti ben kenki efu a ben de fanowdu fu fiti den situwasi fu en pipri. Krestes, na aktief edeman fu na gemeente, ben kobroyki na tiri skin disi di ben kon moro bigi fu kon na wan bosroyti ini na tori fu prenspari beybri leri so leki na aksi efu no-dyu kresten musu besnij èn saka den srefi na ondro na wèti fu Moses. Na tiri skin ben skrifi wan brifi pe a ben fruklari sortu bosroyti ben teki èn ben poti wèti di sma ben musu hori. — Tori fu den Apostru 15:23-29.
Wan ten gi na oso-tiriman fu gi frantiwortu
11. Den brada ben warderi na krakti tiri di na tiri skin ben gi, èn san e sori taki Yehovah ben blèsi na seti disi?
11 Leki aparti sma èn leki gemeente, den fosi kresten ben warderi na krakti tiri disi di na tiri skin ben gi. Baka di na gemeente fu Syriya Antiochië ben leysi na brifi fu na tiri skin, den ben prisiri fu na deki-ati. Di tra gemeente ben kisi den bodoy èn ben hori den wèti, dan den „ben tan kon tranga na ini bribi èn ben gro na ini nomru dey fu dey” (Tori fu den Apostru 16:5). A ben de krin taki Gado ben blèsi na seti disi. — Tori fu den Apostru 15:30, 31.
12, 13. Fu sortu sani di ben psa Yeyses ben taki na fesi na ini en agersitori fu den mina nanga talenti?
12 Ma meki wi luku ete wan tra pisi fu na afersi disi di wani taki furu. Na ini en agersitori fu den mina, Yeyses ben teki en srefi gersi nanga wan man fu hey kobortu, di ben rèys go na wan farawe kondre fu kisi kownukondre-makti èn dan dray kon baka (Lukas 19:11, 12). Leki wan bakapisi fu en opobaka na ini 33 G.T., dan Gado ben opo Yeyses Krestes go na en reti anusey, pe a ben sa musu sdon te leki en feyanti ben sa poti leki wan futubangi gi en futu. — Tori fu den Apostru 2:33-35.
13 Na ini wan srefi sortu agersitori, na agersitori fu den talenti, Yeyses ben taki taki baka wan langa pisiten na meystri ben kon fu aksi en srafu frantiwortu. Gi den srafu di ben sori taki den ben de kotrow, na meystri ben taki: „Unu ben de kotrow fu luku pikinso sani. Mi sa poti unu fu luku furu sani. Go na ini na prisiri fu unu meystri.” Ma fu na srafu di no ben de kotrow, a ben fruklari: „Srefi san a abi den sa teki puru fu en. Èn trowe na bun-fu-noti srafu go na ini na dungru na dorosey.” — Mateyus 25:21-23, 29, 30.
14. San Yeyses ben fruwakti fu a srafu fu en di kisi salfu nanga santa yeye?
14 Baka wan langa ten — pikinso tinaneygi yarihondro — Gado ben poti Krestes ini kownukondre makti na ini 1914, na a kba fu „den fasti ten fu den nâsi” (Lukas 21:24). Wan syatu ten baka dati, ’a ben kon èn ben aksi frantiwortu’ fu en srafu, kresten sma di ben kisi salfu nanga santa yeye (Mateyus 25:19). San Yeyses ben fruwakti fu den leki aparti sma èn makandra leki grupu? Na wroko fu na basya no ben kenki fu sensi na fosi yarihondro. Krestes ben frutrow fu gi talenti na aparti sma — „na ibriwan fu den akruderi san a man”. Sobun a ben fruwakti bun bakapisi akruderi san den man (Mateyus 25:15). Na regel fu 1 Korente sma 4:2 ben kobroyki dya: „San den e fruwakti na ini na tori fu knekti de, taki den feni ibriwan fu den, kotrow.” Wroko nanga den talenti wani taki fu handri nanga kotrowfasi leki boskopuman fu Krestes, fu meki disipri èn fu prati yeye waarheid gi den. — 2 Korente sma 5:20.
Na „srafu” nanga en Tiri Skin di na ten fu na kba ben kon krosibey
15. (a) San Krestes ben fruwakti fu en oso-tiriman di ben de leki wan grupu? (b) San e sori taki Krestes ben fruwakti taki na srafu-grupu ben sa de bezig nanga dati bifo a ben kon fu ondrosuku en osofamiri?
15 Fu ala salfu kresten sma, Krestes ben fruwakti taki makandra den ben sa handri leki wan kotrow basya, di ben sa gi en skin fu futuboy „den marki fu fanowdu nnyan na a reti ten” (Lukas 12:42). Krestes ben taki na ini Lukas 12:43: „Koloku a srafu dati de, efu te en meysti doro a e feni en e du so!” Disi e sori taki wan pisiten bifosi Krestes ben doro fu aksi frantiwortu, en srafu di kisi salfu nanga santa yeye ben sa de bezig fu prati nnyan gi memre fu na kresten gemeente, Gado osofamiri. Suma Krestes ben feni e du so di a ben dray kon baka na ini 1914 nanga kownukondre makti èn ben bigin fu ondrosuku na oso fu Gado na ini 1918? — Maleachi 3:1-4; Lukas 19:12; 1 Petrus 4:17.
16. Fu san-ede di Krestes ben kon ondrosuku na oso fu Gado na ini 1918 a no ben feni den kerki fu na krestenhèyt bezig fu prati yeye nnyan na a reti ten?
16 Di na langa pisiten fu wakti na Yehovah reti anusey ben doro wan kba, dan safrisafri a ben kon krin suma ben e gi den fanowdu yeye nnyan na Krestes futuboy na ini ala den ten bifo 1914. Yu denki taki a ben de den kerki fu na krestenhèyt? Kwetikweti, bika den ben de dipi na ini politik afersi. Den ben de leki wrokosani fu meki kolonialisme gro èn ben pruberi fu poti trawan na baka fu sori den lobi gi a kondre fu den, so taki den meki nationalisme kon a fesi. Disi heri-esi ben tyari hebi brudu payman kon na tapu den, di den ben horibaka fayafaya gi den politik tirimakti di ben abi prati na a fosi grontapufeti. Fu taki en na yeyefasi, na modernisme ben swaki den bribi. Wan muylek ten na yeyefasi ben kon bikasi furu fu den kerkifesiman fu den ben tron wan makriki sani fu hey kritik nanga na bribi na ini evolutie wini den. No wan enkri yeye nnyan sma ben kan fruwakti fu na sey fu kerkifesiman fu na krestenhèyt!
17. Fu san-ede Krestes ben trowe son salfu kresten, èn sortu bakapisi dati ben abi gi den?
17 Na a srefi fasi, no wan enkri bun yeye nnyan ben kon fu den salfu kresten di ben broko den ede moro nanga den eygi frulusu leki fu wroko nanga na talenti fu na Meystri. A ben kon a krin taki den ben ’lesi’, no warti fu sorgu gi den gudu fu na Meystri. Den ben trowe den sobun na ini na dungru na dorosey, pe den kerki fu na krestenhèyt de te now ete. — Mateyus 25:24-30.
18. Suma na Masra ben feni de bezig fu gi en skin fu knekti yeye nnyan na a reti ten, èn san na a buweysi fu na piki disi?
18 Fu dati-ede, di Yeyses Krestes, na Meystri, ben doro fu ondrosuku den srafu fu en na ini 1918, suma a ben feni di ben gi en skin fu futuboy den marki fu fanowdu nnyan na a reti ten? We, na a ten dati, suma ben gi den opregti waarheid-sukuman na yoysti frustan fu na frulusu-payman, na nen fu Gado, na denoya fu Krestes di sma ay no man si, èn san 1914 wani taki? Suma ben tyari na falsifasi fu na Dri-wánfasi, taki libisma sili no kan dede nanga helfaya kon na krin? Èn suma ben warskow fu na kofar fu na evolutie theorie nanga afkodrey? Den tru tori e sori taki a ben de na grupu fu salfu kresten di ben wroko makandra nanga na tijdschrift Zion’s Watch Tower and Herald of Christ’s Presence, di den e kari now Na Waktitoren — A e bari wroko gi Yehovah kownukondre.
19. Fa bifo 1918 kba, wan kotrow srafu-grupu ben sori en srefi, èn nanga yepi fu san na grupu disi ben prati yeye nnyan èn sensi oten?
19 Na ini en uitgave fu 1 november 1944, Na Waktitoren ben taki: „Na ini 1878, fotenti yari bifo na kon fu Masra na en tenpri na ini 1918, wan grupu ben de fu opregti kresten di ben gi den srefi abra. Den ben lusu den srefi puru fu den orga fu lomsu èn anitri kerkifesiman èn ben suku fu poti na kresten leri ini den ala dey libi . . . Na yari na baka, dati ben de, na ini yuli 1879, na fosi uitgave fu na tijdschrift disi The Watchtower ben kon a doro, so taki den waarheid di Gado ben gi nanga yepi fu Krestes leki ’nnyan na a reti ten’, ben kan prati geregeld gi en heri osofamiri fu pikin di ben gi den srefi abra.”
20. (a) Fa wan disiten tiri skin ben sori en srefi? (b) San den memre fu na Tiri Skin ben du èn ondro na tiri fu suma?
20 Fu gi bodoy fu fa na disiten Tiri Skin gro kon tron san a de, dan na uitgave fu Na Waktitoren fu 1 april 1972 ben fuklari: „Feyfi yari a baka [na ini 1884] Zion’s Watch Tower Tract Society ben skrifi poti ini lantibuku èn ben dini leki wan ’wrokosani’ fu gi yeye nnyan na dusundusun opregti sma di e suku fu sabi Gado èn fu frustan en Wortu. Salfu kresten sma di gi den libi abra èn teki dopu ben kon tay den srefi nanga na Genootschap dati tapu na edekantoro na ini Pennsylvania. Ofu den ben de memre fu na Tiri ofu no, den ben gi den srefi fu du spesrutu wroko gi na ’kotrow èn koni srafu’-grupu. Den ben gi yepi na ini na gi fu nnyan èn fu tiri na srafu-grupu, èn na so wan fasi wan tiri skin ben bigin fu sori en srefi. Disi, leki fa a ben sori, ben psa ondro na tiri fu Yehovah wroko krakti ofu santa yeye di sma ay no kan si èn so srefi, na ondro na tiri fu na Edeman fu na kresten gemeente, Yeyses Krestes.”
21. (a) Suma Krestes ben feni de bezig nanga na prati fu yeye nnyan, èn fa a ben pay den? (b) San ben wakti na kotrow srafu nanga en Tiri Skin?
21 Sobun di na ini 1918 Yeyses Krestes ben ondrosuku den wan di ben taki taki den de en srafu, a ben feni wan internationaal grupu fu kresten di ben tyari den beybri waarheid kon a doro fu kobroyki no wawan na inisey fu na gemeente, ma so tu na dorosey na ini na preykiwroko. Na ini 1919 a ben de trutru so leki Krestes ben taki na fesi: „Koloku na srafu dati de te en meystri doro èn feni en e du so! Fu tru mi e taygi unu: A sa poti en tapu ala den gudu fu en” (Mateyus 24:46, 47). Den tru kresten disi ben go ini na prisiri fu den meystri. Fu di den ben de „kotrow na ini pikinso sani”, meki na Meystri ben poti den „fu luku furu sani” (Mateyus 25:21). Na kotrow srafu nanga en Tiri Skin ben de na tapu den presi, klariklari fu kisi wan moro bigi wroko. Fa wi musu de grantangi taki disi ben de so, bikasi loyaal kresten e kisi bigi blesi fu na gi di na kotrow srafu èn en Tiri Skin e gi den srefi na ini na diniwroko!
Edeprakseri fu hori na ede
◻ Suma na a Ede fu Gado osofamiri, èn na suma a ben gi makti abra?
◻ Sortu wroko di gi na ala memre makandra Krestes ben gi na a srafu-grupu?
◻ Sortu tra skin fu sma makandra ben de inisey na srafu-grupu, èn sortu spesrutu wroko na skin disi abi?
◻ Suma ben de bezig fu gi yeye nnyan na den memre fu en, di Krestes ben kon ondrosuku na osofamiri fu Gado?
◻ Fa wan disiten tiri skin sori en srefi?
[Prenki na tapoe bladzijde 22]
Na fosi yarihondro „srafu” ben abi wan tiri skin di ben de fu apostru nanga owruman fu na gemeente na ini Yerusalen