Na wortu fu Yehovah e wini!
Na wan makti fasi na wortu fu Yehovah [ben tan] e gro èn e wini.” — TORI FU DEN APOSTRU 19:20.
1. Fu san den sa taki na ini na studi disi fu na beybri buku Tori fu den Apostru?
YEHOVAH ben opo wan doro go na aktiviteit. Spesrutu Paulus, „wan apostru fu den nâsi,” ben sa teki fesi na ini na wroko dati (Rome sma 11:13). Iya, te wi e go doro nanga na studi fu wi fu Tori fu den Apostru, dan wi sa leysi fu den sani di a miti ini den span zendingrèys. — Tori fu den Apostru 16:6–19:41.
2. (a) Fa na apostru Paulus ben dini leki wan skrifiman di ben skrifi na ondro krakti fu Gado santa yeye fu 50 G.T. te 56 G.T.? (b) San ben psa di Gado ben blesi na diniwroko fu Paulus èn di fu trawan?
2 Paulus ben de so srefi wan skrifiman di ben skrifi na ondro krakti fu Gado santa yeye. Na wan sani fu 50 G.T. te 56 G.T., a ben skrifi 1 nanga 2 Tesalonika sma na ini Korente, Galasiya sma na ini na foti dati fou na ini Antiyogiya fu Siriya, 1 Korente sma na ini Efeysiya, 2 Korente sma na ini Masedoniya, nanga Rome sma na ini Korente. Èn fu di Gado ben blesi na diniwroko fu Paulus èn di fu trawan, meki „na wan makti fasi na wortu fu Yehovah ben tan e gro èn e wini.” — Tori fu den Apostru 19:20.
Fu Asiya go na Europa
3. Fa Paulus nanga den konpe fu en ben gi wan tumusi bun eksenpre ini na tori fu na tiri nanga yepi fu na santa yeye?
3 Paulus nanga den konpe fu en ben gi wan tumusi moy eksenpre na ini na teki fu tiri fu na santa yeye (16:6-10). Kande nanga epi fu sani di tyari kon a krin èn di yu ben kan yere, kande nanga dren, ofu fisyun na yeye ben tapu den fu go preyki na ini na distrikt Asiya nanga na kontren fu Bitiniya, pe den ben doro bakaten nanga na bun nyunsu (Tori fu den Apostru 18:18-21; 1 Petrus 1:1, 2). Fu san-ede na yeye ben tapu pasi wan leysi kba gi den, fu no go drape? Pikinso wrokoman ben de, èn na yeye ben tyari den go na den presi na ini Europa di ben abi moro furu bun bakapisi. Na so a de ini a ten disi: te pasi tapu fu go na wan spesrutu presi, dan Yehovah Kotoygi e preyki na wan tra presi, fu di den de seyker taki na yeye fu Gado sa tyari den go na den sma di gersi skapu.
4. San ben psa baka na fisyun di Paulus ben kisi fu si fu wan man fu Masedonia di ben begi tranga fu kisi yepi?
4 Paulus nanga den konpe fu en ’ben hari psa’ Misiya, wan kontren na ini Pikin Asiya, leki wan zendingpresi. Ma ini wan fisyun, Paulus ben si wan Masedoniaman di ben e begi tranga fu kisi yepi. Fu dati-ede den zendeling ben go wantewante na Masedoniya, wan kontren na ini na Balkan. Na a srefi fasi na santa yeye e tyari furu Kotoygi fu dini now pe na nowtu fu Kownukondre preykiman de bigi.
5. (a) Fu san-ede wi kan taki, taki na wortu fu Yehovah ben wini na ini Filipi? (b) Na sortu fasi furu Kotoygi ini na ten disi de leki Lydia?
5 Na wortu fu Yehovah ben wini na ini Masedonia (16:11-15). Filipi, wan kolonie pe moro furu borgru fu Rome ben libi, ben abi leki fa a ben sori, wantu dyu èn nowan snoga. Fu dati-ede den brada ben go na „wan presi pe sma e begi” na sey wan liba, dorosey fu na foto. A mindri den sma di den ben miti drape, yu ben abi Lidya, di kande ben de wan dyu proseliti fu Tiyatira, wan foto na ini Pikin Asiya, di sma ben sabi fu na meki di den ben meki ferfi. A ben seri purper ferfi ofu sani èn krosi di ben ferfi nanga dati. Bakadi Lidya nanga en osofamiri ben teki dopu, a ben aksi so tranga fu teki sma na en oso taki Lukas ben skrifi: „A ben dwengi wi gewoon fu kon.” Wi de grantangi fu abi den sortu sisa dati na ini na ten disi.
Wan strafu-oso waktiman e tron wan bribiman
6. Fa na aktiviteit fu ogri-yeye ben meki taki Paulus nanga Silas ben poti go na ini strafu-oso na ini Filipi?
6 Satan ati ben musu fu bron hebi fu a fasi fa sani ben go na fesi na yeyefasi na ini Filipi, fu di na activiteit fu ogri-yeye ben meki taki den ben poti Paulus nanga Silas na ini strafu-oso (16:16-24). Furu dey baka makandra wan umapikin, di ben „abi wan lukuman yeye” (letterlijk, „wan yeye fu python)” ben waka na den baka. Kande na ogri-yeye ben sori en srefi leki en na Apollo Pitiyos, wan gado di leki fa den e taki, ben kiri wan sneki di ben nen pu’thon. Na umapikin ben tyari furu wini gi den basi fu en, fu di a ben du na wroko fu taki sani na fesi. We, kande a ben fruteri den gronman oten den ben kan prani, yonguwenke oten den ben musu trow, èn gowtu wrokoman pe den ben musu suku gowtu! A ben tan waka baka den brada èn ben bari taki: „Den man disi na srafu fu Na Moro Hey Gado, di e meki na pasi fu frulusu bekenti na unu.” Na ogri yeye ben kan meki a [umapikin] taki disi kande fu meki a gersi neleki a ben taki den sani fu en na fesi nanga yepi fu Gado santa yeye, ma ogri-yeye no abi na reti fu meki sani fu Yehovah nanga den seti fu en fu kisi frulusu, bekenti. Di Paulus ben kon weri fu na tanteri dati, a ben yagi na ogri-yeye puru na ini na nen fu Yeyses. Fu di den basi fu na umapikin ben si taki na bisnis fu den ben lasi gwe den ben srepi Paulus nanga Silas go na a wowoyo presi, pe den ben naki den nanga tiki (2 Korente sma 11:25). Baka dati den ben poti den na ini strafu-oso èn ben poti den futu na ini na blòk. So wan wrokosani fu strafu sma ben kan kobroyki na so wan fasi taki nanga tranga den ben kan bradi den futu fu wan sma opo bun fara fu makandra, san ben gi furu skin-ati.
7. Gi suma èn fa na de na ini strafu-oso fu Paulus nanga Silas na ini Filipi ben tyari blesi kon?
7 Na poti go na ini strafu-oso disi ben tyari blesi kon gi na strafu-oso waktiman nanga en osofamiri (16:25-40). Wan sani fu mindrineti Paulus nanga Silas ben e begi èn e prèyse Gado nanga wan singi, fu di den ben de seyker taki a ben de nanga den (Psalm 42:8). Wantronso, wan gronseki ben way den doro opo èn ben lusu ala buy, fu di den keti ben kon lusu fu den postu ofu den skotu. Na strafu-oso waktiman ben frede srefisrefi fu kisi dedestrafu fu di den strafuman fu en ben lowe. Leti di a ben wani kiri en srefi, Paulus ben bari taki: „No du yu srefi ogri, bika wi alamala de dya!” Di a ben e tyari Paulus nanga Silas go na doro, a ben aksi fa a ben kan kisi frulusu. „Bribi na ini Masra Yeyses”, na piki ben de. Di a ben yere na wortu fu Yehovah, dan „en nanga den sma fu en ben kisi dopu sondro draydray.” Fa dati ben tyari prisiri kon!
8. Sortu sani den borgru krutuman na ini Filipi ben du, èn san ben sa psa efu den ben sori na publiki taki den ben fowtu?
8 Na dey na baka, den krutuman seni a boskopu fu lusu Paulus nanga Silas. Ma Paulus ben taki: „Den fon unu, sma di de Rome sma, sondro taki krutu ben leysi strafu gi wi, èn den ben trowe unu go na ini strafu-oso. Den e trowe unu go na doro na wan kibrifasi? Meki den kon èn tyari wi go na dorosey.’ Efu den krutuman ben sori na publiki taki den ben fowtu, dan kande den no ben sa meki den naki tra kresten so gaw nanga tiki èn trowe den go na ini strafu-oso. Ma di den krutuman no ben abi na makti fu yagi borgru fu Rome gwe, meki den ben kon èn ben aksi den brada fu gwe, ma den brada ben du disi soso, baka di den ben gi konpe bribiman deki-ati. Na ini a ten disi na srefi sortu belangstelling disi e buweygi memre fu na Tiri Skin nanga tra sma di e teki den presi èn di e waka lontu fu fisiti èn fu gi na pipri fu Gado deki-ati na a heri grontapu.
Na wortu fu Yehovah wini na ini Tesalonika èn na ini Bereya
9. Na tapu sortu fasi, di Yehovah Kotoygi e kobroyki te now ete, Paulus ’ben tyari kon a krin èn buweysi’ taki na Mesiyas ben abi fu nyan pina èn opo baka fu dede?
9 Baka dati na wortu fu Gado ben wini na ini Tesalonika, na mamafoto nanga na moro prenspari lanpresi fu Masedonia (17:1-9). Drape Paulus ben taki-go-taki-kon nanga dyu, „pe a ben tyari kon na krin èn ben buweysi” taki na Mesiyas ben musu nyan pina èn ben muus opobaka fu dede. (Paulus ben du disi fu di a ben teki den profeytitori gersi nanga sani di ben psa èn di ben de na kon tru fu en, neleki fa Yehovah Kotoygi e du). Na so son dyu, furu proseliti, nanga so srefi trawan ete ben kon tron bribiman. Di wantu dyarusu dyu, ben tyari wan grupu sma kon na wan, ma no ben man feni Paulus nanga Silas, dan den ben srepi Yason èn tra brada go na den tiriman fu na foto èn ben kragi den taki den e sutu faya fu meki opruru, wan falsi kragi di den e kobroyki te now ete teyge na pipri fu Yehovah. Ma toku, dan brada ben kon fri bakadi den ben gi „nofo moni fu kon fri.”
10. Na ini sortu fasi den dyu na ini Bereya ben ’ondrosuku den Buku finifini’?
10 Na baka fu dati Paulus nanga Silas ben go na a foto Bereya (17:10-15). Drape den dyu ’ben ondrosuku den Buku finifini’, neleki fa Yehovah Kotoygi e gi sma deki-ati fu du dati ini na ten disi. Den Bereya sma dati no ben tweyfri na Paulus ma ben du ondrosuku fu buweysi taki Yeyses ben de na Mesiyas. San ben de na bakapisi? Furu dyu nanga wantu Griki (kande proseliti) ben tron bribiman. Di den dyu fu Tesalonika ben sutu faya fu tyari sekiseki kon a mindri na pipri, dan den brada ben tyari Paulus go na watrasey, pe sonwan fu den konpe fu en kande ben go na ini wan sipi di ben e go na Piraeus, na lanpresi fu Ateyne.
Na wortu fu Yehovah e wini na ini Ateyne
11. (a) Fa Paulus ben gi kotoygi fri èn sondro frede na ini Ateyne, ma suma ben strey nanga en? (b) San sonwan ben sori di den ben taki taki Paulus ben de wan „takitakimofo man?”
11 Na ini Ateyne den ben preyki fri èn sondro frede (17:16-21). Den filosoofman ben strey nanga Paulus, fu den wortu fu en di a ben taki fu Yeyses nanga na opobaka. Sonwan fu den ben de Epikuriya sma, di ben poti krakti tapu a meki fu prisiri. Trawan ben de Stoïcijn sma, di ben poti krakti tapu a strafu di yu musu strafu yu srefi. ’San na takitaki-mofo man disi ben sa wani fu fruteri?’ son wan fu den ben aksi. „Takitaki-mofo-man” (Letterlijk” „wan man di e piki siri”) ben sori taki Paulus ben de neleki wan fowru di ben e piki siri èn ben e prati pikinso-pikinso sabi ma ben e misi koni. Trawan ben taki: „A gersi taki a de wan preykiman fu freymde gado.” Disi ben de wan seryusu sani, fu di Socrates ben lasi en libi fu so wan kragi ede. Heri esi den ben tyari Paulus go na a Areopagus (na pikin-bergi fu Mars), pe kande na heykrutu ben e kon makandra na dorosey krosibey fu Acropolis.
12. (a) Sortu fasi fu wan bun publiki taki wi kan si krin ini na taki fu Paulus na tapu na Areopagus? (b) Sortu penti, di ben abi fu du nanga Gado, Paulus ben tyari kon a fesi èn nanga sortu bakapisi?
12 Na taki fu Paulus na tapu na Areopagus ben de wan tumusu ben eksenpre fu wna sma di e kobroyki biginwortu di abi bun bakapisi èn buweygi di seti na wan logis fasi èn di e overtoygi sma — soleki den e leri dati na a teyokrasiya diniwrokoskoro fu Yehovah Kotoygi (17:22-34). A ben taki taki den Ateyne sma ben lobi fu dini gado moro leki tra sma. Bika, den ben abi srefi wan altari „Gi wan Gado di sma no sabi”, kande fu no afrontu no wan gado! Paulus ben taki fu wan Mekiman di „ben meki fu ibri nâsi sma komoto fu wán sma” èn „a ben poti den faste ten èn den faste skotu fu den libipresi fu den libisma,” soleki fu eksenpre na ten di den ben musu rutu den Kananiti sma puru (Genesis 15:13-21; Danièl 2:21; 7:12). A Gado disi de fu feni, „bika wi tu de den bakapikin fu en,” Paulus ben taki, ala di a ben e sori tapu a meki di Gado meki libisma èn ben e kobroyki wortu fu den puwemaman fu den, Aratus nanga Cleanthes. Leki bakapikin fu Gado, wi no musu denki taki na volmaakti Mekiman, gersi wan stonpopki di wan onvolmaakti libisma ben meki. Wan ten ben de taki Gado ben luku psa so wan fasi fu no-sabi-sani, ma now a ben taygi a libismafamiri fu abi berow, bika a ben poti wan dey fu krutu libisma nanga yepi fu wan Sma di a ben poti. Fu di Paulus ben „meki na bun nyunsu fu Yeyses bekenti”, meki den arkiman fu en ben sabi taki a ben abi na prakseri taki Krestes ben sa de na Krutuman dati (Tori fu den Apostru 17:18; Yohanes 5:22, 30). A tori fu berow ben tergi den epikuriya sma, èn Griki filosoofman ben kan taki: ’Wi sa arki yu wan tra leysi.’ Ma na krutuman Diyonisiyus nanga trawan ben tron bribiman.
Na wortu fu Gado e wini na ini Korente
13. Fa Paulus ben sorgu gi en srefi na ini na diniwroko, èn sortu disiten eksenpre wi e feni?
13 Paulus ben hari go moro fara na Korente, na mmafoto fu an distrikt Agaya (18:1-11). Drape a ben feni Akwela nanga Preskela, di ben kon drape di Claudius Caesar ben gi dyu, di no ben de borgru fu Rome, na komando fu den komoto gwe libi Rome. Paulus ben meki tenti nanga na kresten trowpaar disi, so taki a ben kon sorgu gi en srefi na ini na diniwroko (1 Korente sma 16:19; 2 Korente sma 11:9). Na koti èn na nay fu deki krosi di ben meki fu steyfi krabita wwiri, ben de wan tranga wroko. Na wan srefi sortu fasi, Yehovah Kotoygi e sorgu gi den eygi fanowdu na skinfasi, fu di den e wroko gi grontapu basi, ma na moro prenspari wroko fu den na a diniwroko.
14. (a) San Paulus ben du di a ben tan kisi gens na ini Korente fu na sey fu den dyu? (b) Fa Paulus ben kisi seykerfasi taki a ben musu tan na ini Korente, ma fa Yehovah pipri e kisi tiri na ini na ten disi?
14 Den dyu fu Korente ben tan e skenpi, ala di Paulus ben meki bekenti taki Yeyses de na Mesiyas. Fu dati-ede a ben seki en krosi puru ibri frantiwortu di a ben abi fu den na en tapu èn a ben bigin fu hori konmakandra na ini na oso fu Titiyus Yustus, di leki fa a sori ben de wan Rome sma. Furu sma (so srefi Krispus, di leki fa a sori ben de na fosi fesiman-dinari fu na snoga, nanga en osofamiri) ben kon tron bribiman di ben teki dopu. Efu na gens fu den dyu ben meki Paulus aksi en srefi efu a ben sa tan na ini Korente ofu no, dan na tweyfri fu en ben gwe di Masra ben fruteri en na ini wan fisyun: ’No frede. Taki taki, bika mi de nanga yu èn no wan sma sa du yu ogri, Mi abi furu sma na ini an foto diso’. Na so Paulus ben tan drape fu gi leri fu na wortu fu Gado, ala nanga ala wan yari nanga siksi mun. Aladi na pipri fu Yehovah no e kisi fisyun na ini na ten disi, toku begi nanga tiri fu a santa yeye e yepi den fu teki den srefi sortu koni bosroyti di abi krakti na tapu Kownukondre afersi.
15. San ben psa di den ben tyari Paulus go na fesi na foto-edeman Galiyo?
15 Den dyu ben tyari Paulus go na fesi na foto-edeman Yuniyus Galiyo (18:12-17). Den ben tyari kon na fesi taki Paulus ben meki disipri na wan fasi di ben de kontrari na wèti — wan falsi kragi di Griki kerki leriman na ini na ten disi e kobroyki teyge Yehovah Kotoygi. Galiyo ben kan frustan taki Paulus no ben gi en srefi abra na lagi èn falsi sani èn taki den dyu no ben broko den ede furu nanga na tanbun fu Rome nanga en wèti, èn fu dati-ede meki a yagi den gwe. Di den sma di ben tanapu drape ben fon Sosteynes, na nyun fesiman-dinari fu na snoga, Galiyo no ben bumuy, kande fu di a ben prakseri taki na tru fesiman fu na grupu opruru sma di ben de teyge Paulus, ben kisi sa a ben frudini.
16. Fu san-ede a ben de wan sani di ben fiti gi Paulus taki a ben koti en ede wwiri syatu ini a tori fu wan pramisi?
16 Paulus ben komoto fu na lanpresi fu Kenchreae go na Efeysiya, wan foto na ini Pikin Asiya (18:18-22). Bifo na rèys dati ’a ben meki den koti en wwiri syatu, fu di a ben de na ondro wan pramisi.’ Den no e taki efu Paulus ben du na pramisi dati, bifo a ben tron wan bakaman fu Yeyses ofu efu disi ben de na bigin ofu na kba fu a pisiten fu en pramisi. Kresten no de ondro na Wèti, ma Gado ben gi a wèti na sma èn a ben de santa, èn a no ben de wan sondu fu meki so wan pramisi (Rome sma 6:14; 7:6, 12; Galasiya sma 5:18). Na ini Efeysiya, Paulus ben taki-go-taki-kon nanga den dyu, èn a ben pramisi fu dray kon baka efu Gado ben wani. (Na pramisi dati ben kon tru bakaten.) Na dray kon baka na ini Atiyokiya fu Siriya ben wani taki en di fu tu zendingrèys ben kon na wan kba.
Na wortu fu Yehovah e wini na ini Efeysiya
17. Sortu bodoy Apolos nanga trawan ben abi fanowdu, ini a tori fu dopu?
17 Syatu baka dati Paulus ben bigin nanga en di fu dri zendingrèys (c. 52-56 G.T.) (18:23–19:7). Na ini na pisiten dati Apolos ben gi leri fu Yeyses na ini Efeysiya, ma a ben sabi soso fu na dopu fu Yohanes leki sinbôl fu berow fu sondu teyge na Wèti frubontu. Preskela nanga Akwela „ben puru na pasi fu Gado kon moro na krin gi en,” kande fu di den ben fruklari taki na kisi fu dopu leki fa Yeyses ben kisi, ben wani taki taki wan sma ben musu saka go na ondro watra èn ben musu kisi na santa yeye di ben kanti kon. Baka di na dopu nanga santa yeye ben feni presi na Penkstri 33 G.T., ala sma di ben kisi na dopu fu Yohanes ben musu teki dopu baka na ini na nen fu Yeyses (Mateyus 3:11, 16; Tori fu den Apostru 2:38). Bakaten na ini Efeysiya, so wan 12 dyu man di ben kisi na dopu fu Yohanes „ben teki dopu ini na nen fu Masra Yeyses”, na ini a wan enkri dopu di du abra, èn di skrifi na ini Buku. Di Paulus ben poti en anu na tapu den, den ben kisi santa yeye nanga tu wondru marki taki den ben warti fu libi na ini heymel — e taki ini tongo èn e taki profeytitori.
18. Pe Paulus ben gi kotoygi, di a ben de na ini Efeysiya èn nanga sortu bakapisi?
18 A de seyker taki Paulus ben tan abi furu fu du na ini Efeysiya, wan foto di ben abi so wan 300.000 sma (19:8-10). Na tenpri fu en di ben de gi na umagado Artemis, ben de wan fu den seybi wondru fu a owru grontapu, èn na komedi-oso fu en ben abi 25.000 sdonpresi. Na ini na snoga, Paulus ’ben kobroyki na koni fu overtoygi sma’ fu di a ben tyari buweysi kon a fesi di ben overtoygi sma, ma a ben hari en srefi puru di sonwan ben taki takru fu Na Pasi ofu na fasi fu libi di abi en fondamenti tapu bribi na ini Krestes. Tu yari langa, Paulus ben taki ala dey na ini na zaal fu na skoro fu Tyranus, èn „na wortu” ben panya go na ini na heri distrikt Asiya.
19. San ben psa na ini Efeysiya, di ben meki taki ’na wortu fu Yehovah ben tan e gro èn ben e wini’ drape?
19 Gado ben sori taki a ben feni na aktiviteit fu Paulus bun fu di a ben gi en na makti fu dresi sma èn yagi ogri-yeye puru (19:11-20). Ma den seybi manpikin fu na granpristri Skeyfa no ben man yagi wan ogri-yeye puru nanga a teki di den teki Yeyses nen kobroyki, fu di den no ben teki presi gi Gado nanga Krestes. Na man di ben abi a ogri-yeye na en tapu, ben gi den mankeri srefi. Disi ben frede na pipri, èn „na nen fu Masra Yeyses ben tan kisi glori.” Den di ben tron bribiman, ben stóp nanga den bonuwroko fu den èn na publiki den ben bron den buku fu den di kande ben abi towfruwortu nanga bonuwortu. „Na wan maktifasi,” Lukas ben skrifi, „na wortu fu Yehovah ben tan e gro èn e wini.” So srefi na ini a ten disi den diniman fu Gado e yepi sma fu kon fri fu ogri-yeye. — Deuteronomium 18:10-12.
A man di den no man frudrage tra relisi no abi bun bakapisi
20. Fu san-ede solfru smetiman fu Efeysiya ben sutu faya fu na pipri meki opruru, èn fa disi ben kon na wan kba?
20 Furuten Yehovah Kotoygi ben kisi fu du nanga grupu fu opruru sma di ati ben bron hebi, èn so a ben de tu nanga den kresten na ini Efeysiya (19:21-41). Omoro den bribiman ben kon moro furu, omoro Demetrius nanga tra solfru smetiman ben lasi moni fu di moro mendri sma ben bay den pikin solfru tempel fu Artemis, na umagado di ben meki sma meki pikin èn di abi furu bobi. Fu di Demetrius ben sutu faya gi den sma meki wan grupu opruru sma ben — srepi den konpe fu Paulus, Gayus nanga Aristargus, go na ini na komedi-oso, ma den disipri no ben meki Paulus go na inisey. Srefi wantu memre fu na grupu di ben ogra fesa nanga wega, ben begi en fu no teki na tyans dati. So wan 2 yuru langa, na grupu fu sma ben tan bari: „Artemis fu den Efeysiya sma bigi!” Te fu kba, na skrifiman fu na foto (na moro hey borgru tiriman) ben taki taki den anu-wrokoman ben kan tyari den kragi go na wan foto-edeman, di ben abi na makti fu teki krutu bosroyti, efu na afersi fu den ben kan taki na ini „wan formeel konmakandra” fu borgru. Noso, Rome ben kan kragi den fisitiman fu na konmakandra disi di no de officieel, fu di den e meki opruru kon. Baka dati, a seni den gwe.
21. Na sortu fasi Gado ben blesi na wroko fu Paulus èn fa a e blesi di fu Yehovah Kotoygi ini na ten disi?
21 Gado ben yepi Paulus fu kakafutu gi difrenti tesi èn ben blesi den muyti fu en fu yepi sma fu poti fowtu fu relisi na wan sey èn fu teki na waarheid. (Teki gersi Yeremiya 1:9, 10.) Fa wi de grantangi taki wi heymel Tta e blesi na wroko fu wi na a srefi fasi! Na so sani e waka now, neleki fa a ben de na ini na fosi yarihondro, taki na ’wortu fu Yehovah e gro èn e wini’!
San yu ben sa piki?
◻ Sortu eksenpre Paulus ben gi ini a teki fu tiri fu na sey fu santa yeye?
◻ Nanga sortu fasi, di Yehovah dienstknekti e kobroyki te now ete, Paulus ben ’buweysi èn tyari sani kon na krin’?
◻ Sortu kruderi de a mindri a fasi fa den ben du tapu na taki fu Paulus na tapu na Areopagus nanga na preykiwroko fu Yehovah Kotoygi?
◻ Fa Paulus ben sorgu gi en srefi na ini na diniwroko, èn fa disi e kruderi nanga sani ini na ten disi?
◻ Fa Gado blesi na wroko fu Yehovah Kotoygi ini na ten disi neleki fa a ben du nanga na wroko fu Paulus?
[Prenki na tapoe bladzijde 23]
Na wortu fu Yehovah ben wini na ini . . .
1. Filipi
2. èn 3. Ateyne
4. èn 6. Efeysiya
5. Rome
[Sma di abi a reti foe a prenki]
Photo No. 4: Manley Studio