Preyki Yehovah kownukondre! — Fri èn sondro frede
’A ben teki nanga switifasi ala den sma di ben kon na en, èn a ben preyki na kownukondre fu Gado gi den.’ — TORI FU DEN APOSTRU 28:30, 31.
1, 2. Sortu buweysi na apostru Paulus ben abi taki Gado ben horibaka gi en, èn sortu eksenpre a ben gi?
YEHOVAH e yepi Kownukondre preykiman alaten. Fa dati ben de tru nanga na apostru Paulus! Nanga na hori di Gado ben horibaka gi en, a ben kon a fesi tiriman, ben frudrage na feti di trobiman ben kon feti nanga en, èn ben preyki Yehovah Kownukondre fri èn sondro frede.
2 Srefi leki wan strafuman na ini Rome, Paulus ’ben teki nanga switifasi ala den sma di ben kon na en, èn a ben preyki na kownukondre fu Gado gi den’ (Tori fu den Apostru 28:30, 31). Fa a de wan bun eksenpre gi Yehovah Kotoygi ini a ten disi! Wi kan leri furu fu na diniwroko fu Paulus so leki Lukas skrifi na ini den lasti kapitri fu na beybri buku Tori fu den Apostru. — 20:1–28:31.
Den ben bow den konpe bribiman
3. San ben psa na ini Trowas, èn nanga san a e kruderi na ini a ten disi?
3 Baka di na opruru na ini Efeysiya ben kon kowru, dan Paulus ben go doro nanga en di fu dri zendingrèys (20:1-12). Ma leti bifo a ben o go nanga boto na Syriya, a ben kon sabi taki den dyu ben seti wan konplot teyge en. Fu di den ben abi kande plan fu go na ini a srefi boto èn kiri Paulus, meki a ben hari psa ini Macedoniya. Na ini Trowas, a ben tan wan wiki fu bow konpe bribiman neleki fa den opziener fu Yehovah Kotoygi, di e rèys, e du dati na ini a ten disi. A neti, bifo Paulus ben gwe, a ben go doro nanga a preyki fu en te mindrineti. Leki fa a sori dan Eutykus, di ben sdon na wan fensre, ben weri fu den muyti fu na dey. A ben fadon go ini wan sribi èn ben fadon komoto fu na di fu dri sodro go na gron èn ben dede, ma Paulus ben opo en kon baka a libi. Fa disi ben musu tyari prisiri kon! Èn prakseri dan, na prisiri di sa kon te furu milyunmilyun sma sa opobaka na ini na nyun grontapu di e kon. — Yohanes 5:28, 29.
4. San Paulus ben leri den owruman fu Efeysiya ini a tori fu na diniwroko?
4 Di Paulus ben de a pasi e go na Yerusalen, a ben miti nanga den owruman fu Efeysiya, na ini Mileytes (20:13-21). A ben memre den taki a ben leri den „oso fu oso” èn taki a ben „gi kotoygi finifini na dyu èn na Griki fu berow na Gado èn bribi ini wi Masra Yeyses.” Den wan di te fu kba ben tron owruman, ben abi berow kba èn ben abi bribi. Na apostru ben leri den so srefi fu preyki na Kownukondre fri èn sondro frede na no-bribiman ini wan oso fu oso diniwroko leki a wan di Yehovah Kotoygi e du na ini a ten disi.
5. (a) Fa Paulus ben de wan eksenpre ini a tori fu tiri fu na sey fu na santa yeye? (b) Fu san-ede den owruman ben abi ray fanowdu fu ’poti prakseri tapu na a heri ipi’?
5 Paulus ben de wan bun eksenpre ini na teki fu tiri fu Gado santa yeye (20:22-30). „Tay ini na yeye”, ofu fu di a ben firi na plekti fu waka baka a tiri fu a yeye, meki na apostru ben sa go na Yerusalen, ala di buy nanga banawtu ben e wakti en drape. A ben warderi na libi, ma fu kibri en soyfri retifasi na Gado ben de na moro prenspari sani gi en, so leki fa a musu de gi wi. Paulus ben gi den owruman deki-ati fu ’poti prakseri na a heri ipi di na santa yeye ben poti den leki opziener na den mindri’. Baka a „gwe di a o gwe” (leki fa a e sori ini dede), dan „krasi tigri” no ben sa „handri na ipi na wan safri fasi”. Den sortu man disi ben sa opo kon na mindri den owruman srefi, èn disipri di abi pikinso koni fu man fu si fa fu du, ben sa teki den kron leri fu den. — 2 Tesalonika sma 2:6.
6. (a) Fu san-ede Paulus ben kan gi den owruman abra na Gado nanga bun frutrow? (b) Fa Paulus ben waka na baka na gronprakseri fu Tori fu den Apostru 20:35?
6 Den owruman ben musu tan na ay na yeyefasi fu luku taki wan fadon komoto a bribi no kon (20:31-38). Na apostru ben leri den den Hebrew Buku fu a beybri nanga den leri fu Yeyses, di abi krakti fu meki sani kon santa èn di ben kan yepi den fu kisi na heymel Kownukondre, ’na gudu di de fu kisi a mindri ala den santawan’. Fu di a ben wroko fu sorgu gi en srefi nanga den sma di ben de nanga en, meki Paulus ben gi den owruman deki-ati fu de tranga wrokoman (Tori fu den Apostru 18:1-3; 1 Tesalonika sma 2:9). Efu wi e waka baka so wan sortu fasi fu tyari wi srefi èn e yepi trawan fu kisi têgo libi, dan wi sa warderi den wortu fu Yeyses: „A moro koloku fu gi sani leki fu kisi sani.” San a fruklari disi wani taki, de fu feni na ini den Evangelie, ma Paulus wwan e teki en skrifi, kande fu di a ben kisi en nanga mofo ofu nanga yepi fu na yeye. Wi kan nyanbun fu furu koloku efu wi e òfer wi srefi neleki fa Paulus ben du. We, a ben gi so furu fu en srefi so taki na gwe di a ben gwe ben sari den owruman fu Efeyse sote!
Meki na wani fu Yehovah psa
7. Fa Paulus ben gi wan eksenpre ini a saka di a ben saka en srefi na a wani fu Gado?
7 Di na di fu dri zendingrèys fu Paulus ben doro na wan kba. (ca. 56 G.T.), dan a ben gi wan tumusi bun eksenpre fu saka en srefi na ondro a wani fu Gado (21:1-14). Na ini Seysareya en nanga den konpani fu en ben tan nanga Filipus, di den fo umapikin fu en, di ben de nyunwenke, „ben e taki profeytitori”, dati wani taki taki nanga yepi fu santa yeye den ben e taki a fesi fu sani di ben o psa . Drape na Kresten profeyti Agabus ben tay en eygi anu nanga futu nanga na bere banti fu Paulus èn na yeye ben buweygi en fu taki taki den dyu ben sa tay na eyginari fu a banti na ini Yerusalen èn ben sa gi en abra na ini den anu fu hèyden. „Mi de klariklari no wwan fu den tay mi, ma so srefi fu dede na ini Yerusalen fu na nen fu Masra Yeyses,” Paulus ben taki. Den disipri ben saka ede gi dati, èn ben taki: „Meki na wani fu Yehovah psa.”
8. Efu sontron wi e feni en muylek fu teki bun ray, dan san wi kan memre?
8 Paulus ben taygi den owruman na ini Yerusalen san Gado ben du nanga na diniwroko fu en a mindri den hèyden sma (21:15-26). Efu oyti wi e feni en muylek fu teki bun ray, dan wi kan memre fa Paulus ben teki ray. Fu sori taki a no ben e leri dyu na ini hèyden kondre „wan fadon komoto fu a bribi ini Moses”, meki a ben gi yesi na a ray fu den owruman fu krin en srefi na wan ceremonieel fasi èn fu pay den kostu gi en srefi nanga gi fo tra man. Ala di na dede fu Yeyses ben puru na Wèti a pasi, toku Paulus no ben du no wan fowtu sani fu di a ben hori den pisi di ben e taki fu pramisi. — Rome sma 7:12-14.
Trobiman kon feti nanga den ma den no ben frede
9. Ini a tori fu trobiman di e du tranga ogridu, dan sortu kruderi de a mindri den ondrofeni fu Paulus nanga di fu Yehovah Kotoygi ini a ten disi?
9 Yehovah Kotoygi furutron ben kibri den soyfri retifasi na Gado na fesi fu ogridu fu trobiman. (Luku fu eksenpre na Yaribuku fu Yehovah Kotoygi 1976, bladzijde 181-191.) Dyu fu Pikin-Asiya na a srefi fasi ben sutu faya gi den trobiman fu go feti nanga Paulus (21:27-40). Fu di den ben si Trofimus, na Efeysiya sma nanga en, meki den ben kragi na apostru falsi taki a ben doti na tenpri fu di a ben tyari Griki sma go na ini. Leti di den ben o kiri Paulus, ne na Rome ofsiri Claudiyus Lysiyas nanga den man fu en ben stòp na opruru! So leki sani ben taki a fesi (ma di den dyu ben meki du kon), dan Lysiyas ben meki den keti Paulus (Tori fu den Apostru 21:11). Leti di den ben o tyari na apostru go na ini na tanpresi fu den srudati na sey na tenpri dyari, ne Lysiyas ben kon sabi taki Paulus no ben de wan opruruman ma wan dyu di ben mag fu go na ini na kontren fu na tenpri. Di Paulus ben kisi pasi fu taki, a ben taki nanga a pipri ini Hebrewtongo.
10. Fa den dyu na ini Yerusalen ben teki na taki fu Paulus, èn fu san-ede den no ben krawasi en?
10 Paulus ben gi kotoygi fri èn sondro frede (22:1-30). A ben meki en srefi bekenti leki wan dyu di ben kisi leri fu Gamaliyel di sma ben respeki srefisrefi. Na apostru ben fruklari taki di a ben de na pasi e go na Damaskus fu frufolgu den bakaman fu Na Pasi, a ben kon breni di a ben si na glori Yeyses Krestes, ma taki Ananiyas ben meki a si baka. Baka ten Masra ben taygi Paulus: „Go na pasi, bikasi mi sa seni yu go na den farawe nâsi.” Den wortu dati ben de leki wan faya di leti, di ben bigin fu bron wan busi. Ala di den ben e bari taki Paulus no ben warti fu libi, dan na ipi nanga ati bron ben iti den tapusey krosi fu den a lontu èn ben fringi stof na loktu. So Lysiyas ben meki den tyari Paulus go na ini na tanpresi fu den srudati fu aksi en sani, ala di den ben o krawasi en fu kon sabi fu san-ede den dyu ben de teyge en. Paulus ben man fu meki den no ben wipi en nanga wan krawasi (nanga banti fu leer di ben abi knopo ofu pe pikin pisi isri ofu bonyo ben tay na en) di a ben aksi: ’A de akruderi na wèti fu krawasi wan Rome sma di krutu no ben leysi strafu gi en? Fu di den kon sabi taki Paulus ben de wan Rome sma, meki Lysiyas ben kon frede èn ben tyari en go na fesi na Sanhedrin fu kon sabi fu san-ede den dyu ben kragi en.
11. Na sortu fasi Paulus ben de wan Fariseyman?
11 Di Paulus ben bigin taki fu a bun fu en srefi na fesi fu na Sanhedrin fu di a ben taki taki a ben „tyari en srefi nanga wan volmaakti èn krin konsensi na fesi fu Gado”, a hey Pristri Ananiyas ben komanderi fu den naki en (23:1-10). Paulus ben taki, „Gado sa naki yu, yu ston skotu yu, di karki kon weti”. „Yu e kosi na hey pristri?” sonwan ben aksi. Paulus kande no ben herken Ananiyas bika a no ben man si bun. Ma di a kon sabi taki na grupu fu krutuman ben de Fariseyman nanga Saduseyman, Paulus ben taki: ’Mi de wan Fariseyman di den e krutu fu na howpu fu na opobaka’. Disi ben tyari prati kon na Sanhedrin, fu di den Fariseyman ben e bribi ini na opobaka èn den Saduseyman no ben e bribi. So wan pratifasi ben kon, taki Lysiyas ben musu frulusu na apostru.
12. Fa Paulus ben lon komoto gi wan konplot na ini Yerusalen fu kiri en?
12 Baka dati Paulus ben lon komoto gi wan konplot fu kiri en (23:11-35). Fotenti dyu ben sweri fu no nyan ofu dringi te leki den ben kiri en. Na neef fu Paulus ben fruteri disi na en nanga Lysiyas. Na ondro na ay fu srudati, den ben tyari na apostru go na granman Antoniyus Feliks na ini Ceysareya, na Rome foto fu Yudeya pe den ben e tiri. Baka di a ben pramisi Paulus taki den ben sa aksi en sani, dan Feliks ben hori en na ondro ay fu waktiman na ini a Preytoriyan palèysi fu Herodus na Bigiwan, na edekantoro fu na granman.
Fri èn sondro frede na fesi tiriman
13. Fu san Paulus ben gi kotoygi na Feliks, èn nanga sortu bakapisi?
13 Na apostru heri esi ben opo taki fu krin en srefi fu falsi kragi èn fri èn sondro frede a ben gi Feliks kotoygi (24:1-27). Na fesi dyu kragiman, Paulus ben sori taki a no ben sutu faya gi wan grupu sma. A ben taki taki a ben bribi den sani di tyari kon a krin na ini a Wèti nanga den Profeyti èn ben e howpu tapu „wan opobaka fu den regtfardikiwan èn den onregtfardikiwan.” Paulus ben go na Yerusalen nanga „presenti fu sari-ati” (bijdrage gi den bakaman fu Yeyses di a pina fu den kande ben kon leki wan bakapisi fu frufolgu) èn a ben krin en srefi na wan ceremonieel fasi. Ala di Feliks ben poti na krutu na tapu wan tra ten, toku baka ten Paulus ben preyki gi en nanga en wefi Drusila (umapikin fu Herodus Agripa I) fu Krestes, fu regtfardikifasi, fu dwengi yu srefi, èn fu na krutu di e kon. Fu di den tori disi ben meki Feliks kon frede, meki a ben seni Paulus gwe. Ma bakaten, a ben meki na apostru kon furutron, ala di na howpu di a ben howpu fu kisi wan tyuku ben de fu soso. Feliks ben sabi taki Paulus no ben du wan fowtu ma ben libi en taytay, fu di a ben howpu fu kisi na bun-ati fu den dyu. Baka tu yari, Porciyus Festus ben kon na Feliks presi.
14. Sortu seti ini Lantiwèti Paulus ben kobroyki di a ben kon a fesi Festus, èn sortu kruderi yu e feni ini disi?
14 Sondro frede Paulus ben opo taki gi en srefi tu na fesi Festus (25:1-12). Efu na apostru ben frudini fu dede, a no ben sa begi tangitangi fu no dede, ma no wan enkri man ben kan gi en abra na den dyu fu du den wan prisiri. „Mi e aksi fu go a fesi Ceysar!” Paulus ben taki, ala di a ben meki kobroyki fu wan reti di borgru fu Rome ben abi fu den krutu den na ini Rome (na a ten dati na fesi Nero). Fu di den ben teki san a ben aksi, meki Paulus ben sa „gi kotoygi na ini Rome”, so leki ben taki a fesi (Tori fu den Apostru 23:11). So srefi Yehovah Kotoygi e meki kobroyki fu sani di seti fu ’dyonpo gi na bun nyunsu èn a poti di a musu poti steyfi na ini lanti Wèti.’ — Filipi sma 1:7.
15. (a) Sortu profeytitori ben kontru di Paulus ben kon a fesi Kownu Agripa nanga Ceysar? (b) Fa Saul ben du don fu ’skopu go na baka teyge den maka’?
15 Kownu Herodus Agripa II fu na noordsey fu Yudeya nanga en sisa Bernice (di a ben libi nanga en leki en eygi brudu) ben yere Paulus e taki di den ben fisiti Festus na ini Ceysareya (25:13–26:23). Fu di Paulus ben gi kotoygi na Agripa nanga Ceysar, a ben meki na profeytitori kontru taki a ben sa tyari na nen fu Masra go na den kownu (Tori fu den Apostru 9:15). Di Paulus ben fruteri Agripa san ben psa di a ben de a pasi e go na Damaskus, a ben sori taki Yeyses ben taki: „Fu tan skopu go na baka teyge den maka e meki en muylek gi yu.” Neleki fa wan tranga-ede mankaw e gi en srefi skin-ati fu di a e kakafutu gi a sutu di wan tiki fu tyari meti e sutu en, na so Saul ben gi ensrefi skin-ati fu di a ben feti teyge den bakaman fu Yeyses, di Gado ben horibaka gi den.
16. Fa Festus nanga Agripa ben piki tapu na kotoygi di Paulus ben gi?
16 Fa Festus nanga Agripa ben piki? (26:24-32) Fu di Festus no ben man fu frustan na opobaka èn ben fruwondru fu na overtoygi fu Paulus, meki a ben taki: „Hey leri e meki yu e kon law!” Na a srefi fasi, sonwan e kragi now taki Yehovah Kotoygi law, ala di a de so taki net leki Paulus den „e taki wortu fu waarheid èn fu gesontu frustan.” „Ini wan syatu pisiten yu ben sa hari mi kon tron wan Kresten,” Agripa ben taki, di ben tapu fu aksi Paulus sani, ma ben erken taki den ben sa kan fri Paulus efu a no ben aksi fu go a fesi Ceysar.
Kofar na se
17. Fa yu ben sa fruteri fu den kofar di Paulus ben ondrofeni na tapu se, di a ben e rèys go na Rome?
17 Na rèys go na Rome ben meki Paulus miti nanga „kofar na se” (2 Korente sma 11:24-27). Wan srudati edeman di ben nen Yuliyus, ben abi na frantiwortu fu den strafuman di den ben tyari nanga boto fu Ceysareya go na Rome (27:1-26). Di na boto fu den ben doro na ini Sidon, Paulus ben kisi primisi fu fisiti bribiman, di ben gi en kowru-ati na yeyefasi. (Teki gersi 3 Yohanes 14.) Na ini Myra na ini Pikin Asiya, Yuliyus ben meki den strafuman go na tapu wan boto di ben tyari karu go na Italiya. Ala di den ben go teyge bigi winti, toku den ben doro na pisi watra di ben nen Moy Lanpresi, krosibey fu a foto Laseya fu Kreta. Baka di den ben gwe libi drape go na Feniks, dan wan bigi winti fu noord-owstusey ben naki a boto. Fu di den ben frede fu fasi na tapu den Syrtis (santi bangi) fu noord-Afrika, meki den matrosi ben „hari den sani fu a boto saka”, kande den seyri nanga mast. Titey ben tay lontu na bere fu na boto, so taki den planga-olo fu na boto no ben sa kon bigi. A tra dey di na bigi winti ben meki na boto lolo ete leki wan prey sani, den ben meki a boto kon moro lekti fu di den ben trowe lay go ini a watra. Na di fu dri dey, den ben trowe den sani fu a boto (seyri ofu ekstra wrokosani). Di a ben gersi leki ala howpu ben lasi gwe, dan wan engel ben kon a Paulus èn ben fruteri en taki a no ben musu frede, bika a ben sa tanapu na fesi Ceysar. Fa a ben de wan frulekti di na apostru ben taki taki a watra ben sa naki ala den sma di ben de na ini a boto go na wan seyker eylanti!
18. San ben psa te fu kba nanga Paulus èn den sma di ben de nanga en tapu a boto?
18 Den sma na ini a boto ben tan trutru na libi (27:27-44). Na mindrineti na a di fu 14 dey, den matrosi ben si taki syoro ben de krosibey. Ondrosuku di den ondrosuku na dipi fu na watra ben sori taki a de so, èn den ben saka den ankra fu no go naki panya na den krepi ston. Nanga na deki-ati di Paulus ben gi, meki ala den 276 man ben nnyan. Dan den ben meki na boto kon moro lekti fu di den ben trowe na karu na ini a watra. Di dey ben broko, den matrosi ben koti den ankra, èn ben lusu den banti fu den pari, èn ben opo na fesisey seyri gi na winti. Na boto ben fasi na tapu wan santi-bangi, èn na bakasey fu na boto ben bigin broko ini pisipisi. Ma ala sma ben doro bun na syoro.
19. San ben psa nanga Paulus na Malta, èn san a ben du gi trawan drape?
19 Natinati èn weri, den sma di ben sungu nanga na boto ben feni den srefi na tapu Malta, pe den sma fu na eylanti ben sori den „aparti switifasi gi libisma” (28:1-16). Ma di Paulus ben poti drey tiki na tapu na faya, dan na faya ben wiki wan sneki di ben e sribi èn a ben beti en srefi hori na en anu. (Now takru sneki no de na tapu Malta, ma disi ben de wan „takru meti”.) Den Malta sma ben denki taki Paulus ben de wan kiriman di no ben mag tan a libi fu a „geregtigheyt di e teki refensi”, ma di a no ben fadon dede ofu ben sweri fu a soro ede, dan den ben taki taki a ben de wan gado. Baka ten Paulus ben dresi furu sma, so srefi na ppa fu Publiyus, na moro prenspari functionaris fu Malta. Dri mun a baka, Paulus, Lukas, nanga Aristarkus ben gwe nanga wan boto di ben abi na a boto-ede na popki „Manpikin fu Zeus” (Kastor nanga Poluks, wan twelengi gado di leki fa sma ben denki ben lobi du bun gi matrosi). Baka di den ben doro Puteyoli, dan Yuliyus ben go moro fara nanga den strafuman fu en. Paulus ben gi Gado tangi èn ben kisi deki-ati di Kresten fu na mama-foto Rome ben waka miti den na a Wowoyo presi fu Apiyus nanga Dri Dringi-oso na a Apiya Pasi. Na ini Rome, Paulus ben kisi te fu kba primisi fu libi en wwan ini wan oso, ala di wan srudati ben luku en.
Tan meki Yehovah Kownukondre bekenti!
20. Nanga sortu wroko Paulus ben tan de bezig na ini en tanpresi na ini Rome?
20 Na ini na tanpresi fu en na ini Rome, Paulus ben meki Yehovah Kownukondre bekenti fri èn sondro frede (28:17-31). A ben fruteri den prenspari dyu man: „Fu na howpu fu Israèl ede, meki mi abi na keti disi lontu mi.” Na howpu dati ben wani taki tu fu teki na Mesiyas, wan sani di wi tu musu de klari fu nyan pina gi en (Filipi sma 1:29). Ala di moro furu fu den dyu dati no ben bribi, toku furu hèyden nanga wan dyu fikapisi ben abi na yoysti kondisi fu ati (Yesaya 6:9, 10). Tu yari langa (ca. 59-61 G.T.) Paulus ben teki ala sma di ben kon na en, „èn nanga na moro bigi fri fu taki sondro frede a ben preyki na kownukondre fu Gado gi den èn ben gi leri ini den sani di ben abi fu du nanga Masra Yeyses Krestes.”
21. Sortu eksenpre Paulus ben gi te na a kba fu en libi na grontapu?
21 Leki fa a e sori dan Nero ben fruklari taki Paulus no ben abi fowtu èn ben lusu en. Ne na apostru ben bigin en wroko baka nanga Timoteyus èn Titus. Ma agen den ben poti en na ini strafu-oso na ini Rome (ca. 65 C.E.) èn leki fa a e sori a ben dede fu en bribi ede na anu fu Nero (2 Timoteyus 4:6-8). Ma te na a kba, Paulus ben gi wan tumusi bun eksenpre leki wan Kownukondre preykiman di ben abi deki-ati. Meki ala sma di gi den srefi abra fu dini Gado, preyki nanga a srefi yeye na kownukondre fu Yehovah fri èn sondro frede ini den lasti dey disi!
Fa yu ben sa piki?
◻ Sortu skoro ini na diniwroko Paulus ben gi den owruman fu Efeysiya?
◻ Fa Paulus ben gi wan eksenpre fu a saka di a ben saka en srefi na a wani fu Gado?
◻ Sortu kruderi de a mindri den ondrofeni fu Paulus nanga di fu Yehovah Kotoygi ini a tori fu trobiman di e du tranga ogridu ini a ten disi?
◻ Sortu seti fu Lantiwèti Paulus ben kobroyki di a ben kon a fesi Granman Festus, èn sortu kruderi disi abi ini a ten disi?
◻ Nanga sortu wroko Paulus ben tan de bezig na ini en tanpresi na ini Rome, èn sortu eksenpre a ben gi nanga disi?