Koloku yonguwan na ini a dienst fu Yehovah

„Srefi wan pikin, sma e kon sabi nanga den du fu en, fu di sma kan si efu en fasi fu tyari en srefi de soifri èn reti.” — Odo 20:11, New International Version.

1. San na wantu fu den tumusi moi sani di a beibri e fruteri fu Samuwel?

NA YONGU Samuwel ben abi kande dri te feifi yari nomo di a ben bigin fu ’dini’ na ini a Tabernakel fu Yehovah na ini Silo. Wan fu den wroko fu en ben de fu opo „den doro fu na oso fu Yehovah”. A beibri e taki taki „Samuwel ben e gro kon moro bigi èn fu a sei fu Yehovah èn fu libisma den ben lobi en moro nanga moro”. Di a ben kon bigi, a ben tyari Israèl kon baka na a tru anbegi. A ben dini Gado „ala den dei fu en libi”. Srefi di a ben „owru èn en wiwiri ben kon weti” a ben tan gi a pipri tranga ete fu ’frede Yehovah èn dini en ini waarheid’. A no ben sa de wan tumusi moi sani efu sma kan taki den bun sani disi fu yu neleki fa a beibri e taki den fu Samuwel? — 1 Samuwel 1:24; 2:18, 26; 3:15; 7:2-4, 15; 12:2, 24.

2. San den pikinwan e leri na den konmakandra fu Yehovah Kotoigi na ini a ten disi?

² Efu yu de wan Kotoigi fu Yehovah ofu e fisiti den kresten konmakandra fu den, luku lontu pikinso na ini a Kownukondrezaal pe den e studeri na artikel disi. Yu e si sma fu ala libimarki. Yu abi sma seiker kande „di owru èn di wiwiri weti” kba. Yu abi so srefi papa nanga mama, yongu sma, pikin-nengre èn srefi beibi. Den moro pikinwan e leri sani kba? Iya. Aksi pikinso den wan di den ben tyari go na den sortu konmakandra disi di den ben pikin ete. Den sa fruteri yu na wan eerlijk fasi, taki fu sensi den yongu yari fu den, den ben e leri fu respeki Gado, fu lobi en pipri èn fu warderi den presi pe sma e anbegi en. Omoro a ten e psa, omoro den pikinwan e leri tumusi moi waarheidtori. Furu yonguwan, baka te den gro na ini sabi nanga warderi, den e tron wan pisi fu ’den yonkuman nanga nyunwenke, owruman nanga boi’ di a psalmsingiman e gi a tranga fu ’prèise a nen fu Yehovah, bika en nen wawan hei so taki sma no man doro en’. — Psalm 148:12, 13.

3. Fa a du kon taki yongu sma di sabi a beibri e si a libi tra fasi leki den wan di no sabi a beibri?

³ Efu yu de wan yongu sma di geregeld yu papa nanga mama e tyari yu go na den sortu konmakandra disi, dan yu kisi blesi na wan spesrutu fasi. Furu tra yonguwan e broko den ede nanga den problema fu grontapu. Sonwan e frede kande taki libisma sa pori grontapu. Yu sabi taki Gado no o meki dati psa, taki a no o gi libisma pasi fu go doro fu pori a tumusi moi planeet disi. Na presi fu a meki dati psa, dan akruderi a beibri, Gado o ’pori den wan di e pori a grontapu’. Yu sabi taki a beibri e pramisi taki wan moi tamara na ini Gado regtfardiki nyun grontapu, de krosibei. — Openbaring 11:18; Psalm 37:29; 2 Petrus 3:13.

Yu eigi bribi

4. Sortu frantiwortu a sabi fu den pasi fu Yehovah e poti tapu yonguwan, èn fa a yongu Samuwel ben de wan moi eksenpre fu disi?

⁴ A pasi fu a kresten waarheid ben de kande wan sani di yu papa nanga mama fosi ben feti fu kisi. Kande yu ben fisiti kresten konmakandra fu di den ben tyari yu go, èn kande yu ben abi wan prati na a dienst fu Gado fu di den ben du dati. Ma te fu kba yu srefi kan feni prisiri ini a dini èn gi yesi na Yehovah. A mama fu a yongu Samuwel ben poti en tapu a yoisti pasi, ma en srefi ben musu go waka a pasi dati. Wi e leisi: „Srefi wan pikin, sma e kon sabi nanga den du fu en, fu di sma kan si efu en fasi fu tyari en srefi de soifri èn reti.” — Odo 20:11, NIV.

5. (a) Sortu bigi waarde a beibri abi? (b) San Paulus ben fruteri Timoteyus fu a prensparifasi fu a skrifi Wortu fu Gado?

⁵ A beibri e fruteri wi san Gado wani fu unu. A e sori wi krin fa fu plisi en èn a e gi furu bodoi di kan tyari furu bun gi wi. Na apostru Paulus ben fruteri en yongu konpe-wrokoman Timoteyus: „Ala den buku Gado ben meki den skrifi nanga yepi fu en yeye èn den de bun fu leri sma, fu piri-ai gi sma, fu poti sani reti, fu gi tranga leri ini regtfardikifasi, so taki a sma fu Gado kon bekwaam dorodoro, de srekasreka dorodoro gi ibri bun wroko.” — 2 Timoteyus 3:16, 17.

6. San a buku Odo e taki fu a prensparifasi fu sabi nanga koni fu Gado?

⁶ A beibri e fruteri wi so srefi fu ’arki na tranga leri èn kon koni’. A e taki fu ’kibri’ den gebod fu Gado ’leki wan gudu’ na yu, ’fu kari na frustan’, èn ’fu tan suku’ a koni fu man fu si fa fu du sani neleki fa yu ben sa suku warti gudu di kibri. Efu yu e teki a rai disi, ’yu o frustan a frede fu Yehovah èn yu o feni a sabi fu Gado’. Wi e feni a rai disi tu: „Now, unu manpikin, arki mi; iya, koloku den wan de di e hori den pasi fu mi. Arki na tranga leri èn kon koni, èn no sori nowan mi-no-kefasi. Koloku a sma de di e arki na mi . . . Bika a sma di e feni mi, seiker sa feni libi èn e kisi bun wani fu Yehovah.” Yu e si a beibri leki so wan warti sani èn yu e du so wan sortu muiti fu leri den sani di a e taki? — Odo 2:1-5; 8:32-35.

Kisi sabi

7. San na den moro prenspari sani di wi musu leri?

⁷ Son yongu sma sabi fa ala sportwega waka, ofu den kan fruteri yu ala sani fu a singi grupu di den lobi. Den e feni en makriki fu leri den sani disi èn fu hori den na ede fu di den abi belangstelling gi den. Ma a moro prenspari aksi na, san den sabi fu Gado? Prakseri pikinso san a du. Gado meki a universum. Langa bifo den sani ben feni presi, Gado ben taki na fesi san libisma ben sa du èn san ben sa psa. A beibri no e fruteri wi wawan fu Gado ma a e leri wi fa wi kan plisi en. A e sori wi fa wi kan abi wan koloku libi now èn fa wi kan kisi têgo libi na ini en regtfardiki nyun grontapu. Dati no moro prenspari leki fu sabi suma wini wan spesrutu futubal wega ofu fu leri den nen fu pokuman di sma sa frigiti heri-esi? — Yesaya 42:5, 9; 46:9, 10; Amos 3:7.

8. Sortu bun eksenpre Yosia nanga Yeises ben gi?

⁸ Di a yongu kownu Yosia ben de tina-feifi yari, „a ben bigin fu suku a Gado fu en afo David”. Di Yeises ben de twarfu yari, den ben feni en „e sidon a mindri den leriman” na ini Yehovah tenpri, ala di a ’ben e arki den èn ben e poti aksi gi den’.a Awasi omeni yari yu abi, yu e meki neleki Yosia nanga Yeises, wan trutru belangstelling gro, fu kon sabi den sani di Gado du èn san a o du ete? — 2 Kronieken 34:3; Lukas 2:46.

9. (a) Sortu problema furu yongu sma abi? (b) San kan meki leisi nanga studeri kon moro makriki, èn yu srefi ondrofeni taki disi de so?

⁹ Ma kande yu e taki: ’Studeri na wan tranga wroko.” Furu sma, yonguwan nanga owruwan, noiti leisi nofo fu meki leisi kon makriki. Omoro yu e leisi, omoro makriki leisi e kon. Omoro yu e studeri, omoro makriki a leri fu sani e kon. Yu e fiti nyun ideya na den sani di yu sabi kba, so taki a e kon moro makriki fu frustan den èn fu hori den na ede.

10. (a) Fa yu kan nyanbun moro fu den kresten konmakandra? (b) San na yu eigi ondrofeni na ini a tori disi?

¹⁰ San kan yepi yu fu leri moro fu Gado? Kande yu kan fisiti den kresten konmakandra moro geregeld. Yu ben sa kan sreka yu srefi na fesi èn abi trutru wan prati? Fu eksenpre, yu ben sa kan kisi wan moro dipi sabi fu a studi-artikel disi, fu di yu e suku den beibri tekst di den kari, ma di den no teki den wortu skrifi poti? Yu skrifi wantu wortu na sei na paragraaf fu yepi yu fu memre san ibriwan fu den tekst disi e poti moro na a paragraaf ofu studi? Yu abi a gwenti fu teki no moro mendri leki wan fu den tekst disi taki fu en na ini wan komentaar, di e sori taki yu abi warderi gi a beibri takimakandra? Wan gemeente owruman di furu yari kba e fisiti geregeld den konmakandra e taki: „Mi abi muiti fu hori mi prakseri na wan studi di mi no sreka trutru, ma a de wan trutru prisiri fu arki wan studi di mi stuka finifini.”

11. Fa yu kan nyanbun moro fu den lezing di abi den gron na ini a beibri, èn fu san-ede disi de so prenspari?

¹¹ Te yu e arki beibri lezing, yu e skrifi dan syatu san a takiman e taki fu yepi yu fu ondrosuku fa a lezing seti èn fu hori yu prakseri na tapu san e taki? Yu e teki a sani di yu e yere gersi nanga san yu sabi kba, so taki yu kan frustan en moro makriki èn hori en moro bun na ede? Yeises ben begi: „Disi wani taki têgo libi, taki doronomo den e teki sabi na ini den fu yu, na wan enkri tru Gado, èn fu en di yu ben seni kon, Yeises Krestes” (Yohanes 17:3). A no de so, taki sabi di e tyari yu go na libi, na a moro bun sabi di yu ben sa kan kisi? Poti prakseri na tapu san a beibri e taki fu disi: „Bika Yehovah srefi e gi koni; fu en mofo sabi nanga koni fu man si fa fu du sani e komoto. Te koni e kon na ini yu ati èn sabi e kon de srefi switi gi yu sili, dan a man di yu man fu denki sa hori wakti gi yu, srefi a koni fu man si fa fu du sani sa kibri yu.” — Odo 2:6, 10, 11.

Gro na ini warderi

12. San na wantu fu den tumusi moi sani di Gado du gi wi?

¹² Wi e warderi trutru san Gado du gi wi? A ben meki wan tumusi moi grontapu èn ben sreka en fu libi. A ben meki wi fosi papa nanga mama, sobun a opo a pasi fu wi kon gebore. A seti sani taki wi abi a yepi fu osofamiri èn fu wan gemeente di e sori lobi (Genesis 1:27, 28; Yohanes 13:35; Hebrew sma 10:25). A ben seni en eigi fosi gebore Manpikin kon na grontapu fu leri wi moro fu En srefi èn fu gi a frulusu-paiman di e meki taki têgo libi na wan sani di kan. Yu e warderi den sortu tumusi moi presenti disi trutru? Den e buweigi yu fu teki a kari di a e kari yu fu leri sabi en èn fu dini en? — Mateyus 20:28; Yohanes 1:18; Rome sma 5:21.

13. Fu san-ede yu e prakseri taki Gado abi belangstelling gi ibri aparti sma?

¹³ A Mekiman fu a universum abi belangstelling gi libisma. A ben kari Abraham „mi mati” èn a ben taigi Moses: „Mi sabi yu na yu nen” (Yesaya 41:8; Exodus 33:12). A buku Openbaring e sori taki Gado abi wan sinbôlis buku, ofu „bukulolo fu libi”, di abi den nen fu den kotrow diniman fu en na ini, „fu sensi di na fondamenti fu grontapu ben poti”. Yu nen sa de na ini a buku dati? — Openbaring 3:5; 17:8; 2 Timoteyus 2:19.

14. Fa a waka baka den gronprakseri fu Gado kan meki yu libi kon moro bun?

¹⁴ Den gronprakseri fu Gado abi praktis waarde. A du fu den sani na en fasi, e puru wan heri-ipi problema na pasi — sekshurudu, a tron srafu fu drugs, drungufasi, bere di yu no ben wani, geslakti siki, tranga ogridu, kiri nanga bun furu tra ogri ete. Fu waka baka den pasi fu en sa yepi yu so srefi fu feni tru mati èn fu libi wan moro koloku libi. Dati no warti a muiti? (1 Korente sma 6:9-11) Srefi wan yonguwan di teki a fasti bosroiti kba fu du sani na a fasi fu Gado kan kisi moro krakti fu du san de yoisti. A beibri e taki: „Nanga wan sma di de loyaal, [Yehovah] o handri loyaal.” A e dyaranti wi so srefi taki a „no sa gwe libi den loyaalwan fu en, èn no sa ’pusu en pipri poti na wan sei’. — Psalm 18:25; 37:28; 94:14; Yesaya 40:29-31.

Go na fesi ini a dini fu Gado

15. Sortu rai di komoto fu Gado, Salomow ben gi yonguwan?

¹⁵ Den marki di yu wani doro, e poti ala prakseri na tapu wan owru grontapu di e dede gwe ofu na tapu wan regtfardiki nyun grontapu? Yu e arki na Gado, ofu yu e arki na den koniman fu grontapu di e taki kontrari en? Prisiriten, wan moro hei skoro ofu wan grontapu wroko di e teki furu ten, e kon fosi Gado nanga en dienst? A koni kownu Salomow ben skrifi a heri beibribuku Preikiman fu sori san musu kon na a fosi presi ini wi libi. En lasti wortu leki bosroiti ben de: „Prakseri now yu Bigi Mekiman na ini den dei fu yu yongu yari, bifo den dei fu ranpu o bigin kon, ofu den yari doro pe yu sa taki: ’Mi no abi prisiri na ini den.’ Now di wi yere ala sani, dan a kba fu a tori de: Frede a tru Gado èn hori den komando fu en. Bika disi na a heri fruplekti fu libisma.” — Preikiman 12:1, 13.

16. Fa yonguwan kan du muiti fu kisi moro grani?

¹⁶ Ala den owru kresten brada di yu sabi — den owruman, den pionier nanga yu kring èn distrikt opziener — ben de wan dei wan pikin. San tyari den blesi kon di den e ondrofeni now? Den ben lobi Gado èn ben wani fu dini en. Furu fu den ben nyanbun na ini den yongu yari fu a ekstra ten di den ben abi fu teki sabi èn fu kisi ondrofeni. Den ben studeri èn ben teki prati na den konmakandra. Den ben teki prati na a gi fu leri, èn den ben du muiti fu kisi moro grani — pionierwroko, Bethelwroko ofu tra aktiviteit di e pai. Den no ben de ’super-yonguwan’; den ben abi normaal belangstelling nanga belang so leki fa yu abi. Toku den ben du san den ben kan akruderi a rai: „Awasi san yu e du tu, du en nanga yu heri sili leki gi Yehovah, èn no gi libisma.” — Kolose sma 3:23; teki gersi Lukas 10:27; 2 Timoteyus 2:15.

17. San kan yepi yonguwan fu go na fesi ini a dienst fu Gado?

¹⁷ Fa a de nanga yu? Yu e warderi trutru den sani di abi fu du nanga Gado? Yu e teki mati a mindri den wan di e poti yeye sani na a fosi presi? Yu e gi trawan deki-ati fu teki prati nanga yu na ini kresten aktiviteit? Yu e go na ini a kresten wroko nanga bigiwan di abi moro ondrofeni, fu leri sani fu den, fu tesi a prisiri fu den èn fu kisi deki-ati fu den tumusi bun wroko fu den? Wan Kotoigi e memre a dei, pikinso moro leki 20 yari psa kba, di fu a fosi leisi wan owru sma ben gi en wan opregti kari fu go nanga en na ini a preikiwroko. A e taki, taki disi ben de wan kenki na ini en libi: „A ben de na fosi tron di mi ben go fu di mi ben wani go èn no soso fu di mi papa nanga mama ben tyari mi go.”

18. Fu sortu sani yu musu prakseri bifo yu pristeri yu srefi fu teki dopu?

¹⁸ Efu yu e go na fesi fu du sani na a fasi fu Gado, dan kande heri-esi yu sa bigin denki fu a dopu. A de prenspari fu memre taki dopu a no wan sortu broki fu tron wan bigisma. A no e sori taki yu e gro kon èn a no de wan sani tu di yu musu du fu di den mati fu yu teki a stap disi. Bifo yu aksi fu kisi dopu, yu musu abi wan fondamenti sabi fu a waarheid èn libi ini akruderi nanga a Wortu fu Gado. Na ini a prati fu a sabi dati nanga trawan yu musu abi redelijk ondrofeni, èn yu musu frustan taki disi na wan tumusi prenspari pisi fu a tru anbegi (Mateyus 24:14; 28:19, 20). Yu musu sabi tu taki baka te yu teki a prenspari kresten stap disi, taki den e fruwakti fu yu taki yu e libi na ini akruderi nanga den regtfardiki moreel gronprakseri fu a beibri.b Na ini yu ati yu ben musu gi yu libi abra na yu lobi hemel Tata. — Teki gersi Psalm 40:8, 9.

19. Oten wan sma musu kisi dopu?

¹⁹ Dopu na wan stap di yu e teki te yu teki a fasti bosroiti, taki awasi san e psa moro fara na ini yu libi, yu o dini Gado. A de wan marki di ala sma kan si taki nanga yepi fu Krestes, yu gi yu srefi krinkrin abra na Yehovah fu du en wani na wan fasi di no abi skotu nanga kondisi. Wan kresten owruman e memre a dei, pikinso moro wan afu yarihondro psa kba, di a ben kon frustan: „Mi musu du wan sani na disi!” Michelle, wan yongu Kotoigi, di wantu yari psa ben teki dopu na ini a Ingrisi Newcastle, e taki: „Di mi ben de 13 yari, mi ben kon frustan taki mi ben musu gi mi libi abra èn ben musu teki dopu; noti no de di mi ben sa wani fu du sote leki fu dini Gado.”

20. (a) Sortu moi eksenpre tintin dusun yongu sma gi kba? (b) Fa wi musu si a stap disi?

²⁰ Tintin dusun yonguwan teki dopu no so langa psa kba. Den ben studeri a Wortu fu Gado èn ben leri sabi den pasi fu en èn baka dati nanga yepi fu a dopu ini watra den ben moksi den srefi nanga prisiri na den furu owruwan fu sori na publiki a gi di den gi den srefi abra na Gado. Den sabi taki dopu no de a kba, ma soso a bigin fu a trutru libifasi fu gi yu srefi abra di den wani libi fu têgo ini a dienst fu Yehovah ini akruderi nanga a fasti bosroiti fu den.

[Foetoewortoe]

San yu ben sa piki?

◻ Fu san-ede sabi fu a Wortu fu Gado de so prenspari?

◻ Fa yu kan nyanbun moro fu kresten konmakandra?

◻ Sortu blesi di komoto fu Gado musu buweigi wi fu gi en yesi?

◻ Fa yu kan go na fesi ini a dienst fu Gado?

◻ Oten wan sma musu kisi dopu?