Kolokoe jongoe jari ini wan pori grontapoe
„Prakseri joe Mekiman ini den dé foe joe joe jongoe jari.” — Prékiman 12:1, Petrus Canisiusvertaling.
1. Foe san-ede foeroe jongoe sma e feni dati now no de so wan boen ten foe de jongoe?
FA A de wan switi ten foe de jongoe! Disi de wan vreemde sani ini joe jesi? Foeroe jongoe sma sa poti wi prakseri tapoe den takroe toestand di den e si — ogridoe na strati, hoeroedoe, drugmisbruik, tini di de nanga bere, poeroe foe bere èn siki na a sjen-presi. Den ben kan sori tapoe na gevaar foe wan atoom-feti ofoe tapoe na vervuiling, di e meki na grontapoe kon roewineer. Den ben sa kan aksi fa wan sma kan abi na prakseri dati disi de wan boen ten foe de jongoe èn foe abi wan heri ten di e kon na den fesi.
2. Foe san-ede a de now troetroe wan toemsi moi ten foe libi? (b) Sortoe krakti disi moe abi tapoe joe libi?
2 Tra jongoe sma sabi dati Gado no sa gi pasi dati libisma pori na grontapoe, akroederi den bijbel profétitori. Na bijbel e pramisi dati Gado sa tjari wan kenki kon — dati a sa opo doe wan sani èn sa meki regtvaardiki èn vréde toestand sa kon (Ps. 37:10, 11; 2 Petr. 3:13; Openb. 21:1-4; 11:18). Joe e bribi den pramisi disi? Efoe joe piki ja, dan den moe abi boen krakti tapoe joe libi, bikasi den wani taki dati joe kan abi wan toemsi moi ten di e kon.
3. Foe san-ede no wan sma de toemsi jongoe foe sori belangstelling ini na dini foe Gado?
3 Kande joe ben prakseri taki: „O, mi de toemsi jongoe foe dati!” Ma dati de troe? Na bijbel e gi jongoe sma tranga — boi nanga meisje — foe dini Gado (Ps. 148:12, 13). A de ferteri foe wan pikin Hebrew meisje, di ben meki wan sroedati-edeman foe Syriakondre, Naäman, tron wan dienstknekti foe Jehovah (2 Kon. 5:2, 3, 15-17). Na bijbel e taki ooktoe, dati pikinnengre ben gi Jezus grani, èn dati di disi no ben boen gi den kerki fesiman, Jezus ben aksi den: „Joe no ben lési noiti den Boekoe? Bikasi na ini disi tanapoe: ’Srefi pikin baby sa prijse en!’” (Matt. 21:15, 16, The living Bible). Jezus ben sori persoonlijke belangstelling gi jongoe sma. A ben taki dati den ben moe meki den kon na en. Èn den gemeente foe Jehovah Kotoigi na a heri grontapoe abi now toemsi foeroe belangstelling gi jongoe sma - èn foe den toemsi boen sani di den e doe foe dini Gado. — Matt. 19:14.
Gronprakseri foe wan kolokoe libi
4. Fa na bijbel kan jepi joe foe libi wan moro kolokoe libi?
4 Joe sabi dati joe papa èn mama wani sote dati joe de kolokoe. Joe hemel Tata, Jehovah, wani disi ook toe. En Wortoe, na bijbel, e gi rai, di kan kibri joe foe boen foeroe moeilijkheid. Na ini no tanapoe wortoe foe wortoe san joe moe doe, ma ini foeroe geval a de ferteri soso den gronprakseri. Disi de den waarheid di e gi joe na fundamenti, di tapoe na gron foe dati joe kan teki besroiti, sodati joe égi gosontoe froestan sa ferteri joe san de joisti. Foe eksempre, dja wan gronprakseri e kon, di ben kari kaba ini na artikel na fesi èn di kande joe ben jere foeroe tron den ben taki foe en: „Takroe demakandra e pori boen gwenti.” — 1 Kor. 15:33.
5. (a) San de wan toe fasi fa „takroe demakandra kan pori boen gwenti”? (b) San den tekst ini a paragraaf disi e sori foe (1) dot’-taki, (2) fisti tori èn (3) hoeroedoe?
5 San disi wani taki? A wani taki dati sma di de lontoe wi, abi krakti tapoe wi. Efoe joe de foeroe nanga sma di e gebroiki dot’-taki ofoe di abi fisti tori, dan kande seker joe sa waka baka na eksempre foe den. Efoe joe abi demakandra nanga sna di e prakseri tra fasi foe seks nanga na trow-libi leki joe ben leri foe na bijbel, dan joe sa doro na marki dati den sani dati no e seki joe moro. A kan de dati joe no e froestan moro dati joe abi demakandra nanga den sortoe sma disi. Efoe joe e lési boekoe ofoe joe e loekoe film ofoe televisie-programma, joe e teki ini joe égi froestan den denki foe na skrifiman ofoe préman. Efoe den denki disi de takroe, dan den kan doti joe froestan. Akroederi na bijbel, dan wi no moe njan boen foe den sortoe sani disi, ma wi moe komoto foe a pasi foe den (Ef. 5:3, 4; teki gersi 1 Korinte 6:18). Na bijbel e taki ook toe. „San! Joe no sabi dati onregtvaardiki sma no sa kisi Gado kownoekondre? No kori oen srefi. No den hoeroedoeman, no den afkodréman, no den soetaman, no den man di den e hori foe tegennatuurlijke marki, no den man di e didon na man, no den foefoeroeman, no den gridiwan, no den droengoeman, no den skempiman, no den bidrigiman sa kisi Gado kownoekondre.” — 1 Kor. 6:9, 10.
6. (a) Ini sortoe problema sma ben kon foe di den ben poti na rai foe takroe demakandra na wan sé? (b) San wi moe hori ini prakseri tapoe na tori foe wi froestan èn pe wi kan feni boen demakandra?
6 Troetroe den sma di de lontoe wi, abi krakti tapoe wi. Ini The living Bible 1 Korinte 15:33 foe datede e vertaal ook toe na a fasi disi: „Efoe joe arki na den, dan joe sa go handri ne leki den.” Den ben kori jongoe sma foe go smoko, drugmisbruik, foefoeroe nanga ala sortoe immoreel sani, foe di den sma di den ben abi demakandra nanga den ben e doe den sani disi ofoe ben e spotoe den, foe di den no ben doe den. Joe e feni dati sma di ben spotoe joe, foe di joe e handri joisti, de warti mati? A de prenspari foe hori ini prakseri, dati joe froestan gersi foeroe leki wan computer. Efoe joe e poti fowtoe bodoi na ini, joe sa poeroe fowtoe besroiti na ini. Foe dat-ede, meki a de wan froestan sani foe abi demakandra nanga sma di e frede Gado — nanga den sma di e kon na a Koninkrijkszaal èn e gebroiki ini den libi den sani di den e leri drape. — Odo 18:24.
7. (a) Ala sma di e go na kristen konmakandra, de sma di e gebroiki gronprakseri foe Gado ini den libi? (b) Sortoe eksempre ini a ten foe Samuël e sori dati disi no de wan njoen sani? (c) San Samuël ben doe, èn nanga sortoe bakapisi?
7 Ma san joe moe doe efoe wan sma di moe gi wan boen eksempre, no e doe disi? Disi ben pasa moro leki wan tron ini den ten foe a bijbel. Na jongoe Samuël ben abi na bigi grani foe dienst na a presi pe sma ben e anbegi Jehovah, ma den manpikin foe na hépriester di ben gi wan toemsi takroe eksempre. Den ben de ogriman sondro konsensi di ben pasa Jehovah wet èn srefi ben hoeroe nanga den oema di ben doe dienst drape. Na jongoe Samuël ben sabi san na boen. A no ben waka baka na takroe eksempre foe den. Na bijbel e taki: „Ala na ten dati Samuël ben kon bigi moro nanga moro èn sma ben lobi en moro nanga moro, foe na sé foe Jehovah èn foe na sé foe libisma” (1 Sam. 2:12-17, 22-26). Gado ben blesi Samuël sote. Di a ben gro kon bigi, a ben tron wan proféti, èn Gado ben gebroiki en foe skrifi den bijbelboekoe Kroetoeman nanga Ruth èn wan pisi foe na fosi boekoe Samuël, di e tjari na nen foe en. A de wan eksempre foe na verklari di skrifi ini Odo 20:11: „Srefi nanga en doe wan boi e meki den sabi en, ofoe en wroko de soifri èn opregti.” A de krin, dati te joe e si wan soema e doe ogri, joe moe de leki na jongoe Samuël èn no leki den manpikin foe Eli, di ben sabi na pasi foe Jehovah, ma di no ben waka na en baka.
Joe kristen konsensi
8. Na konsensi foe wan joengoe kristen di oefen nanga na bijbel kan tapoe en foe doe san?
8 Leki wan getrow, jongoe kristen, joe sabi dati sani de di joe no sa doe tapoe na gron foe joe konsensi di oefen nanga na bijbel. Joe sabi foe eksempre dati foeroe féstidé abi wan heiden roetoe. Den stoeroe tapoe falsi kerki gwenti. Foe datede meki joe konsensi no sa gi joe pasi foe teki prati na den. Joe sabi ook toe dati skoro abi foeroe tron nationalistische programma ofoe ceremonie, pe a naatsi foe den e kisi grani moro leki tra naatsi, sodati den no de akroederi moro nanga na bijbel loekoe foe joe dati Gado „ben meki foe wán libisma ibri naatsi foe libisma” (Tori foe den Apostel 17:26). Ook toe joe sabi dati skoro e meki sport-wega kon na fesi foeroe tron pasa marki èn den e gi leerling tranga foe gi foeroe ten na den sortoe activiteit dati — no soso leki wan ontspanning, ma nanga so wan krakti wani foe wini dati disi son tron e tjari ogridoe kon.
9, 10. Fa son jongoe kristen ben doe nanga den sortoe problema dati?
9 Na waka baka hé markitiki e tjari problema gi joe? Wán jongoe Kotoigi ben taki: „Mi no abi foeroe problema tapoe na tori foe wi kristen konsensi solanga na leriman sabi na fesi san wi standpunt de — bifo na problema kon.” Jongoe sma di tapoe wan tiri fasi èn nanga respeki e tjari kon na krin na reden foe wan bepaalde fasi foe si sani, di abi leki fundamenti na kristen konsensi foe den — èn di e doe disi bifo na leriman go tanapoe na fesi na klas èn na afersi e kon tapoe na firi foe sma — e si dati ini na fasi disi e abi moro mindri problema.
10 Wan jongoe sma di lobi pokoe èn di ben wani pré sote ini na skoro-orkest, ben taki: „Na a bigin foe na skoro-ten mi ben tjari kon na krin gi na oema di e gi leri dati mi ben wani pré sote ini na orkest, ma dati son pokoe ben de, di mi no ben kan pré, aladi mi ben sori foe san-ede dati ben de so.” Te den sortoe pokoe disi ben kon foe pré, dan na oema di e gi leri sabi na fesi dati na leerling disi sa tan sidon tiri sondro foe pré. Wi sabi srefi toe dati leriman ben kenki wan heri programma foe fiti densrefi na so wan kristen konsensi. Soleki jongoe sma e sori, a de jepi efoe ini ala tra skoro-afersi joe abi wan boen nen — efoe den méstri sabi dati troetroe joe e libi akroederi joe bribi èn dati joe e doe moeiti na a ten foe den les foe den.
Warti marki
11. (a) Na sortoe fasi marki kan de wan warti sani gi jongoe sma? (b) San de wan toe warti marki?
11 San de den plan foe joe ini na ten di e kon? Joe e froestan dati foeroe sma no abi no wan plan ini na ten di e kon? Den no abi no wan marki a den fesi èn foe datede den no de abi foeroe winimarki. Den e teki ala sani soleki a de kon, ma den no e doe foeroe. Wán marki ben sa kan de den cijfer foe joe na skoro foe meki den kon more hé. Wan tra marki ben sa kan de foe leri wan spesroetoe vak, sodati joe sa man foe sorgoe gi joe srefi foe tan na libi.
12. San de tra prenspari marki?
12 Ma na bijbel e sori dati wi abi ook toe jeje marki fanowdoe — marki di wi wani doro ini na dienst foe Gado. Akroederi na bijbel, dan na sma „di e feti baka regtvaardiki fasi”, Jehovah sa lobi en, aladi a „sa feni libi, regtvaardiki fasi nanga glori” (Odo 15:9; 21:21). Jezus ben taki: „Sensi den dé foe Johannes na Dopoeman . . . na kownoekondre foe hemel . . . de na marki, di sma e poesoe go na en.” Paulus ben taki: „Mi e feti na en baka foe si ofoe na sani foe san Jezus ben graboe mi, mi mag graboe . . . mi e feti baka na marki” (Matt. 11:12; Fil. 3:12-14). A de soboen heri boen foe abi warti marki.
13. O prenspari joisti sabi de?
13 Joe e doe leki wan jongoe sma moeiti foe kisi sabi? Foeroe jongoe sma no e doe disi. Tog a de prenspari foe kisi sabi foe Jehovah. Jezus ben taki ini begi gi Jehovah, en Tata: „Disi wani taki tego libi, dati den teki alaten ini den, sabi foe joe, na wan enkri troe Gado, èn foe en di joe ben seni kon, Jezus Kristus” (Joh. 17:3). Sortoe reden ben sa kan de moro prenspari?
14. Nanga sortoe safri-safri go na fesi joe sa kan kisi jepi foe sabi Jehovah èn foe froestan en Wortoe?
14 Joe e feni a Wortoe foe Gado nanga den boekoe foe na Wachttoren di e tjari en kon na krin, interessant, ofoe joe e feni den moeilijk foe froestan? Efoe joe prakseri dati den de moeilijk foe froestan, dan Mi boekoe nanga bijbeltori sa jepi joe foe leri sabi na heri historia foe na bijbel ini na joisti volgorde. Na boekoe disi sa jepi joe foe tjari den sani kon akroederi nanga makandra èn foe froestan den moro makriki. Moro fara, na boekoe „Meki joe jongoe jari de wan winimarki” sa jepi joe foe froestan bijbel gronprakseri, di sa meki dati joe abi moro prisiri ini joe libi. O moro joe e leri, o moro makriki na leri foe sani sa de, èn joe sa wani sreka na fesi moro dipi materiaal, nanga na les foe na Wachttoren toe, na materiaal foe na Theocratisch Diniwrokoskoro, èn na ala wiki bijbellési-programma. Joe no kan doe disi alamala tapoe wan dé, ma joe kan kon lepi na jeje fasi te joe poti gi joe srefi marki èn foetoe foe foetoe joe e go na fesi na a sé foe a kisi foe sabi nanga bekwaamheid. — Odo 1:5; 2:10-12.
15. Sortoe tra marki joe ben kan poti na joe fesi?
15 Joe e feti baka kristen grani foe dienst? Joe ben poti gi joesrefi wan marki foe gi ibri wiki ofoe moen wan bepaalde hoeveelheid ten na a leriwroko foe oso foe oso? Joe e gi tra jongoe sma tranga foe go nanga joe? Joe ben poti gi joesrefi leki marki foe leri tra sma moro boen tapoe gobaka nanga osobijbelstudi? Son jongoe sma ben poti leki marki foe de wán tron ini na jari na a ten foe na skoro-vakantie wan pionier (friwani foeroe-prékiman).
16. Sortoe marki ini na ten di e kon wi moe loekoe?
16 Fa a de nanga marki di joe wani doro ini na ten di e kon? Tra jari na a ten disi, san joe ben sa wani foe kan doe? Ofoe baka 5 jari, efoe na kaba foe a seti foe sani disi no kon ete? Je feti baka a marki foe de wan gewoon pionier-bedinari ini na ten di e kon ofoe foe abi tra grani, foe eksempre foe de wan memre foe na Bethelfamiri, di e gi bijbel boekoe ini na pisi foe grontapoe pe joe e libi? Na poti foe marki, èn doe moeiti foe doro den, de wan fasi foe poti joe libi na wan moro boen sé.
17. (a) Pe joe kan feni eksempre foe sma di ini den jongoe jari foe den ben kisi so wan sabi nanga bekwaamheid? (b) Joe sabi eksempre di fiti san skrifi dja?
17 Prakseri pikinso foe den lobi fasi owroeman ini joe gemeente èn foe joe kring- nanga districtsopziener. Wan dé, ne leki joe den ben de jongoe sma. Ma jari pasa kaba den ben poti wan marki na den fesi foe kisi moro sabi nanga bekwaamheid foe kan dini Gado nanga den brada nangi sisa. Na eksempre foe den e gi joe tranga foe meki boen gebroiki foe na ten di joe abi ini joe jongoe jari? Efoe ja, dan joe ben sa kan tron leki na psalmsingiman di ben skrifi: „O Gado, joe ben leri mi foe sensi mi jongoe jari, èn te nanga now mi e tan ferteri foe den wondroewroko foe joe.” — Ps. 71:17.
Loekoe na eksempre foe Timotéus pikinso
18. Fa Timotéus ben de wan moi eksempre foe san wi e taki dja?
18 Timotéus ben de wan spesroetoe eksempre foe disi. Paulus ben taki foe en: „Foe sensi jongoe jari joe ben sabi den Santa Boekoe, di kan meki joe kon koni foe kisi ferloesoe nanga jepi foe na bribi di de akroederi Kristus Jezus” (2 Tim. 3:15). Timotéus ben leri na waarheid leki pikin-nengre èn a ben sabi dati den ben abi waarde. A ben gro ini sabi nanga bribi. Na sani disi no ben de wan sani di ben kibri, bikasi den Boekoe e taki dati „wan boen bericht den (brada) ben gi foe en”. A ben kisi na bigi grani foe tron na getrow kompe-wrokoman nanga reisgezel foe na apostel Paulus, di na apostel dati ben opo gemeente ini na no-djoe grontapoe. — Tori foe den Apostel 16:2-5.
19. Fa Timotéus ben moe sorgoe dati sma no ben loekoe tapoe den jongoe jari foe en?
19 Joe kan de leki Timotéus. Hori na waarheid stéfi. Gebroiki na ekstra ten di joe abi now, now di joe de fri foe frantwortoe foe wan osofamiri di e teki ten èn joe no e tjari frantwortoe ete ini na gemeente. Stoeka èn kisi moro nanga moro sabi nanga bekwaamheid. Moro foeroe jongoe sma e memre dati Paulus ben taigi Timotéus: „No meki nowan sma loekoe tapoe joe jongoe jari.” Ma a de prenspari foe hori ini prakseri fa Timotéus ben moe sorgoe foe dati. Paulus ben taki: „Tron wan eksempre gi den getrowwan ini taki, ini waka nanga libi, ini lobi, ini bribi, ini krinfasi” (1 Tim. 4:12). A ben taigi Timotéus ook toe: „Lon komoto foe den lostoe foe den jongoe jari, ma feti baka regtvaardiki fasi, bribi, lobi, vrede, makandra nanga den di e kari Masra foe wan krin ati” (2 Tim. 2:22). Efoe joe e feti troetroe baka den sani disi, dan joe sa si, dati troetroe a de wan wondroe grani foe de now na libi!
20. Fa joe égi denki de, now di joe e si dati na owroe grontapoe e doro en kaba?
20 Na owroe grontapoe tanapoe fesi wan ongolokoe kaba, ma te wi e waka baka den eksempre foe Samuël, Timotéus nanga tra getrow dienstknekti foe Gado, dan joe kan loekoe na moro betre sani di e kon. Proberi foe kisi na boen ati foe Gado. Proberi foe pasa libilibi na kaba foe na owroe seti foe sani èn foe ondrofeni den regtvaardiki toestand di de so krosibé. Ja, poti prakseri tapoe na rai foe Paulus foe „prakseri dipi foe den sani disi; go krin-krin na ini den, so dati na go na fesi foe joe kan de krin gi ala sma”. — 1 Tim. 4:15.