Gi deki-ati foe feti foe kisi jeje marki
1 No wan ten na fesi someni jongoe sma ben abi prati na a preiki foe a boen njoensoe foe a Kownoekondre! Tin doesoendoesoen e teki a rai ini Preikiman 12:1: „Prakseri now a Gran Mekiman foe joe na ini joe jongoe jari.” San e boeweigi den jongoe sma disi foe abi doronomo prati na a diniwroko, èn foe san ede so foeroe foe den de ini a pionierdienst?
2 Sondro misi foeroe e waka baka a fasi foe a jonkoeman Timoteus, di ben de wan boen eksempel. A ben abi a wini taki di a ben njofi ete en mama nanga granmama ben skoro en na jeje fasi èn leri ben gi en deki-ati foe feti foe kisi jeje marki (2 Timoteus 3:14, 15). Ne dan, di na okasi ben opo foe kisi moro dienstgrani, dan a ben fiti foe kisi dati èn ben de klariklari. — Tori. 16:1-3.
3 Fa moro jongoewan kan kisi deki-ati foe feti foe kisi jeje marki? Sortoe fondamenti moesoe poti? Fa papa nanga mama kan bow warderi gi na waarheid na den pikin foe den èn fa den kan jepi den foe poti gi densrefi marki foe wan langa pisi ten?
4 Poti wan bijbel fondamenti: Papa nanga mama moesoe de seiker dati san den e leri den pikin foe den, taki a komopo foe Jehovah, so dati a kan meki den pikin foe den kon koni foe kisi jepi (2 Tim. 3:15). Feti foe kweki na ini den wan dipi lobi gi Gado Wortoe, a bijbel. Gi disi wan doronomo, bijbelstudie di wani taki wan sani, de fanowdoe di e fiti den fanowdoe foe den, so srefi a fisiti foe konmakandra doronomo. Efoe jongoewan wani abi wan tranga bribi di e poesoe den foe feti foe kisi jeje marki, dan den moesoe abi den eigi persoonlijk studie-programa èn meki den eigi matifasi nanga Jehovah gro. — 1 Tes. 5:21; Hebr. 11:1.
5 Kresten jongoewan sa firi moro esi foe feti foe kisi jeje afersi efoe den papa nanga mama nanga tra lepi sma ini a gemeente e gi wan boen eksempel èn e skèin „a prisiri foe Jehovah” (Neh. 8:10). Te wi e sori taki wi prisiri, dan wi alamala kan jepi jongoewan foe froestan taki san a troe krestendom e aksi a no wan hebi di e kwinsi sma. — 1 Johanes 5:3.
6 Den pionier, zendeling nanga opziener di e rèis, ben abi tranga krakti tapoe foeroe jongoewan nanga soema den ben e wroko makandra ini velddienst noso di den ben taki nanga den foe gi den deki-ati. Papa nanga mama kan gi jepi foe di den e kari foeroeten wrokoman, di de boen eksempel, kon na den oso foe njan nanga den noso tapoe tra ten foe abi kresten demakandra. Jesus Krestes ben gi a moro moi eksempel ini a sori foe wan boen balansi belangstelling gi jongoewan. — Mark. 10:13-16.
7 Poti marki gi joesrefi: Nanga joisti tiri foe papa nanga mama dan froekoe kaba ini den libi pikin kan poti jeje marki gi densrefi. Efoe jongoewan bosroiti kaba sortoe warti jeje marki den wani doro, efoe disi de now a pionierdienst, dini pe a fanowdoe moro bigi, Betheldienst — noso zendingsdienst, nanga so moro fara, dan papa nanga mama èn tra lepi sma kan gi den deki-ati na wan waran fasi foe tan wroko go doro na a sei foe a marki foe den foe di den e gi den praktis rai di e gi deki-ati.
8 Ibriwan gemeente de leki wan osofamiri. Dati meki iniwan foe wi moesoe abi a belangstelling foe jepi jongoewan foe tan waka ini waarheid èn foe tan meki go na fesi na jeje fasi. Wi kan doe disi foe di wi e gi den a djaranti taki wi lobi den èn foe di wi e gi den deki-ati foe feti foe kisi jeje marki.