Jongoewan—San na den marki na jejefasi foe oenoe?
1 Jehovah sabi o prenspari a de foe abi prenspari wroko èn marki di wi kan doro foe man kisi kolokoe. (Loekoe Genesis 1:28; 2:15, 19.) Na ini a ten disi, Jehovah gi en pipel a wroko foe preiki èn foe leri sma. Wi abi so srefi a lasti marki foe kisi têgo libi na ini wan paradijs. Disiten, wi moesoe poti marki na jejefasi di wi kan doro safrisafri, efoe wi no wani gebroiki wi krakti èn den goedoe foe wi foe soso.—1 Kor. 9:26.
2 Marki di jongoe sma kan doro: Jongoewan moesoe abi theokrasia marki di den kan doro akroederi den sani di ibriwan foe den aparti man doe (1 Tim. 4:15). Wan toe di jongoe srefisrefi doro a marki foe leri den nen foe den boekoe foe bijbel na ede bifo den ben leri foe leisi srefi. Nanga jepi foe na osofamiri studie, pikin e leri foe sreka gi den konmakandra so taki den kan doro den marki foe gi boen komentaar di wani taki wan sani èn foe gi den nen na a theokrasia diniwroko-skoro. Te den pikin e go nanga den papa nanga mama na ini velddienst, den e leri foe abi wan prati foe gi kotoigi, ala di den e go na fesi foe doro a marki foe tron preikiman di no dopoe ete. Papa nanga mama moesoe poti krakti na tapoe den jongoe pikin foe den foe doro a marki foe gi densrefi abra èn foe teki dopoe.
3 Efoe joe na wan tini, san na den marki na jejefasi foe joe? „Memre now joe Bigi Kriaman”, foe di joe e poti prakseri na tapoe den troetroe prenspari marki na ini a libi (Preik. 12:1; Ps. 71:17). Foe san ede joe no e doe a jepi-pionierwroko na ini den moen di joe de fri foe skoro? Joe prakseri foe bigin nanga a foeroeten diniwroko leki wan gewoon pionier? Joe man leri wan njoen tongo so taki na ini a ten di e kon joe ben kan jepi wan groepoe noso wan gemeente di e taki wan tra tongo na ini joe gebied noso na wan tra presi? Foeroe foe den wan di e dini now na Bethel noso leki opziener di e rèis noso leki zendeling, ben poti a spesroetoe foeroeten diniwroko leki a marki foe den di den ben de na skoro ete. Foe san ede joesrefi no e doe a srefi?
4 Ala di joe jongoe ete, meki moeiti foe waka na baka na eksempre foe Jesus. Srefi di a ben abi twarfoe jari nomo, a ben taki na wan fri fasi foe jeje afersi (Luk. 2:42-49, 52). Te joe e poti boen marki gi joesrefi foe doe persoonlijk studie, foe leisi bijbel ibri dei, èn foe abi doronomo demakandra nanga lepi kresten na tapoe den konmakandra èn na ini a diniwroko, dan dati sa jepi joe foe kisi a koni foe leri tra sma foe Gado Kownoekondre neleki fa Jesus ben doe.