Fa yu kan doro den marki di yu poti gi yusrefi na ini na anbegi fu Gado
1. Sortu marki furu yongu Kresten wani doro na ini na anbegi fu den?
1 A no de fu taki, dati a lobi di yu leki yongu Kresten abi gi Yehovah, èn a komando di Yesus gi ala Kresten fu ’tan suku a kownukondre fosi’, sa abi krakti tapu den marki di yu wani doro na ini a libi (Mat. 6:33). Kande yu wani tron pionier fu kan du moro na ini a diniwroko fu yu, noso kande yu wani go dini pe moro Kownukondre preikiman de fanowdu. Kande son yonguwan wani go dini leki friwani-wrokoman na bow-wroko di e du na heri grontapu. Kande sonwan fu den wani go dini na wan bijkantoro, noso den wani du zendelingwroko. Wi e prèise unu fu di unu wani doro den marki disi, di te fu kaba sa gi unu prisiri trutru!
2. San kan yepi yu fu doro den marki di yu poti na ini na anbegi fu yu?
2 Wan sani di kan yepi yu fu doro den marki di yu poti na ini yu anbegi, na fu skrifi den na tapu papira. A Waktitoren fu 15 yuli 2004, ben taki: „Te yu e skrifi na tapu papira san yu abi na prakseri, dan yu o man si moro krin san yu musu du. Dati meki a kan de wan yepi te [yu] e skrifi na tapu papira san na den marki di [yu] wani doro èn a fasi fa [yu] wani doro den.” Boiti dati, te yu e poti marki gi yusrefi di no sa teki langa fu doro den, dan dati kan yepi yu fu si efu yu e go na fesi, èn a kan yepi yu fu tan poti prakseri na den moro bigi marki di yu wani doro te fu kaba.
3. Kari wan tu marki di wan sma kan doro na ini wan syatu pisi ten, so taki a kan teki dopu.
3 Marki di yu kan doro na ini wan syatu pisi ten: Efu yu no dopu ete, dan luku san yu musu du fu man doro a marki dati. Kande yu musu kon frustan den prenspari leri fu Bijbel moro bun. Efu dati de so, dan poti en leki marki fu studeri a Bijbel leri-buku finifini, èn leisi ala den bijbeltekst di kari (1 Tim. 4:15). Pruberi fu doro a marki fu leisi a heri Bijbel, fu Genesis te go miti Openbaring, neleki fa sma na Bethel èn den studenti fu Gilead musu du. Baka dati, tan leisi Bijbel ibri dei (Ps. 1:2, 3). Prakseri fa dati kan yepi yu fu kisi wan moro bun banti nanga Yehovah! Ibri tron te yu o leisi noso studeri Bijbel, yu musu bigin èn tapu nanga begi di komoto fu yu ati, èn du muiti fu du san yu leri ala ten.—Yak. 1:25.
4. Efu wan Kresten wani go dini na Bethel noso efu a wani du a zendelingwroko, dan sortu marki a kan poti gi ensrefi di a kan doro na ini wan syatu pisi ten?
4 Efu yu dopu kaba, dan sortu tra marki yu kan doro? Yu wani leri fu preiki moro bun? Kande yu wani doro a marki fu gebroiki Gado Wortu moro bun na ini a diniwroko (2 Tim. 2:15). Fa yu kan du moro na ini a diniwroko? Poti spesrutu marki gi yusrefi di yu man doro na ini wan syatu pisi ten, ma yu musu hori na prakseri o owru yu de èn na ini sortu situwâsi yu de. Disi sa yepi yu fu doro den bigi marki di yu wani doro te fu kaba.
5. Fa wan brada doro a marki fu go dini na Bethel, fu di a ben poti marki gi ensrefi di a ben kan doro na ini wan syatu pisi ten?
5 Wan moi ondrofenitori: Di Tony, di ben abi 19 yari, fisiti wan bijkantoro fu Yehovah Kotoigi, dan a ben kisi na angri fu go dini na Bethel. Ma a libi fu en ben bruya, èn a no ben gi ensrefi abra na Gado ete. Ma Tony teki a bosroiti fu bigin libi akruderi a fasi fa Yehovah wani, èn a ben poti a marki fu doro den markitiki fu teki dopu. Baka di a doro a marki dati, dan a poti leki marki fu go dini leki yepi-pionier, èn baka dati fu dini leki gewoon pionier. A ben skrifi na tapu wan kalender o ten a ben o wani fu bigin nanga den wroko dati. Prakseri fa a ben prisiri di a kisi wan kari fu go dini na Bethel, baka di a ben pionier wan pisi ten!
6. San kan yepi yu fu doro den marki di yu poti na ini na anbegi fu yu?
6 Te yu e poti Kownukondre afersi na a fosi presi na ini yu libi, dan dati kan yepi yu fu doro den marki di yu poti na ini yu anbegi. Tan begi Yehovah fu yepi yu nanga ’den wroko fu yu’, èn du ala muiti fu doro den.—Odo 16:3; 21:5.