Yeises libi nanga diniwroko

Moro frumane di Yeises e gi bifo a gwe

YEISES nanga den apostru de so fara fu gwe libi na tapusodro. „Mi taki den sani disi nanga unu, so taki unu no sa naki futu fadon,” a e go doro. Dan a e gi den na seryusu warskow: „Sma sa grabu unu trowe komoto fu den snoga. Iya, na yuru e kon taki ibriwan sma di e kiri unu, sa bribi taki a du wan santa diniwroko gi Gado.”

Leki fa a e sori, dan na warskow disi ben bruya den apostru srefisrefi. Aladi Yeises ben taki wan leisi kba taki grontapu no ben sa wani si den na ai, toku a no ben taki taki sma ben o kiri den. „Ini na bigin mi no ben taigi unu den sani [disi],” Yeises e fruklari, „bika mi ben de nanga unu.” Iya, fa a de wan moi sani taki a ben sreka den a fesi nanga den tori disi bifo a gwe!

„Ma now,” Yeises e go moro fara, „mi e go na a sma di ben seni mi kon, èn toku no wan fu unu e aksi mi, ‘Pe yu e go?’” A neti dati, den ben aksi wan leisi kba pe a ben sa go, ma now san a ben fruteri den ben seki den so kofarlek, taki den ben frigiti fu aksi moro fara fu na tori disi. So leki fa Yeises e taki: „Fu di mi ben fruteri unu den sani disi meki unu ati kon furu nanga sari.” Den apostru e firi sari no wawan fu di den kon sabi taki den sa kisi hebi frufolgu èn taki den sa kiri den, ma fu di na Masra fu den o gwe libi den.

Fu dati-ede Yeises e fruklari: „Na fu na bun fu unu meki mi e gwe. Bika efu mi no gwe, dan na yepiman no sa kon kwetikweti na unu; ma efu mi go mi pasi, dan mi sa seni en gi unu.” Yeises kan de soso na wán presi na a srefi ten, ma efu a de na ini hemel, dan a kan seni na yepiman, Gado santa yeye, kon gi den bakaman fu en, pe fu grontapu den mag de tu. Fu dati-ede a gwe di Yeises o gwe sa tyari wini kon.

Na santa yeye, na so Yeises e taki, „sa gi na grontapu [den] overtoigi buweisi di abi fu du nanga sondu èn di abi fu du nanga regtfardikifasi èn di abi fu du nanga krutu.” Na sondu fu grontapu, na sori di den no e sori bribi na ini na Manpikin fu Gado, sa tyari kon na krin. Boiti fu dati, wan overtoigi buweisi fu na regtfardikifasi fu Yeises sa kon de fu si nanga na drai di a o drai go baka na en Tata. Èn na man di Satan nanga en ogri grontapu no ben man fu broko na soifri retifasi fu Yeises, na wan overtoigi buweisi taki na tiriman fu grontapu ben kisi wan takru krutu.

„Mi abi furu sani ete fu taigi unu,” Yeises e go moro fara, „ma unu no man fu tyari den now.” Fu dati-ede Yeises e pramisi taki te a e kanti na santa yeye kon, san de na wrokokrakti fu Gado, a yeye disi sa yepi den fu frustan den sani disi ini akruderi nanga na man di den man fu frustan den.

Den apostru no e frustan kwetikweti taki Yeises o dede èn dan sori en srefi na den, baka te a opobaka. Sobun den e aksi wan na trawan: „San a sani disi di a taigi wi, wani taki, ’Ete wan syatu pisiten èn unu no sa si mi moro, èn agen, ete wan syatu pisiten èn unu sa si mi,’ èn: ’bika mi e go na a Tata’?”

Yeises e kon frustan taki den wani fu aksi en sani, fu dati-ede a e fruklari: „Fu tru, fu tru, mi e taigi unu: Unu sa krei èn bari krei, ma grontapu sa prisiri; unu sa sari, ma na sari fu unu sa kon tron prisiri.” Na tra bakadina, te den kiri Yeises, dan den grontapu kerkifesiman e prisiri, ma den disipri e sari. Ma na sari fu den e tron prisiri, te Yeises opobaka! Èn na prisiri fu den tan go doro di a gi den krakti na Penkstri fu de en kotoigi fu di a kanti na santa yeye fu Gado na den tapu!

Te Yeises e teki na situwâsi fu den apostru gersi nanga di fu wan uma di abi skin-ati fu meki pikin, a e taki: „Wan uma, te a e kisi a pikin, a e sari, fu di na yuru fu en doro.” Ma neleki fa a no e prakseri na banawtu fu en moro te a meki a pikin kba, meki Yeises e taki: „Fu dati-ede so srefi unu e firi sari now; ma mi sa si unu baka [te mi opobaka] èn unu ati sa prisiri, èn nowan sma sa puru na prisiri fu unu na unu anu.”

Te now ete, den apostru noiti ben aksi wan sani na ini na nen fu Yeises. Ma now a e taki: „Efu unu aksi na Tata wan sani, a sa gi unu en na ini mi nen. . . . Fu di na Tata srefi lobi unu, bika unu ben lobi mi èn unu ben bribi taki mi ben komoto fu na Tata leki na sma di e teki en presi. Mi ben komoto fu na Tata èn kon na grontapu. Now, mi e gwe libi grontapu èn e go na a Tata.”

Den wortu fu Yeises de wan bigi deki-ati gi den apostru. „Fu den sani disi ede wi e bribi taki yu komoto fu Gado,” den e taki.

„Unu e bribi na a momenti disi?” Yeises e aksi. „Luku! Na yuru e kon, iya, a doro, taki den sa panya unu, ibriwan sma go na en eigi oso èn unu sa gwe libi mi.” Awinsi a gersi wan sani di yu no kan bribi, toku disi e psa bifo neti kba!

„Mi taigi unu den sani disi, so taki unu kan abi vrede nanga a yepi fu mi,” na so Yeises e tapu. „Ini grontapu unu o abi banawtu, ma hori deki-ati! mi wini grontapu.” Yeises ben wini grontapu fu di na wan kotrow fasi a ben du na wani fu Gado aladi Satan nanga en grontapu ben pruberi ala sani fu broko na soifri retifasi fu Yeises. Yohanes 16:1-33; 13:36.

▪ Sortu warskow fu Yeises e bruya den apostru fu en?

▪ Fu san-ede den apostru no ben man fu aksi Yeises pe a ben sa go?

▪ Spesrutu sortu sani den apostru no ben man fu frustan?

▪ Fa Yeises e sori taki na situwâsi fu den apostru sa kenki fu sari kon tron prisiri?

▪ San Yeises e taki den apostru ben o du heri-esi?

▪ Fa Yeises e wini grontapu?