Yeises libi nanga diniwroko

Frumane di Yeises e gi bifo a gwe

A MEMREFESA kba, ma Yeises nanga den apostru fu en de ete na a tapusodro. Ala di heri-esi Yeises sa komoto na grontapu, toku a abi furu sani fu taki ete. „No meki unu ati kon ongorostu”, na so a e trowstu den. „Sori bribi na ini Gado.” Ma moro de fanowdu. „Sori bribi so srefi na ini mi” a e taki moro fara.

„Na ini na oso fu mi Tata furu tanpresi de”, Yeises e go moro fara. „Mi e go fu sreka wan presi gi unu . . . so taki pe mi de unu mag de tu. Èn unu sabi a pasi pe mi e go.” Den apostru no e frustan taki Yeises e taki fu a go di a o go na hemel, fu dati-ede Thomas e aksi: „Masra wi no sabi pe yu e go. Fa wi sabi a pasi dan?”

„Mi na a pasi nanga a waarheid nanga a libi” Yeises e piki. Iya, soso te wan sma e teki en èn e waka baka en fasi fu libi, a kan go na ini a hemel oso fu na Tata, bika, so leki fa Yeises e taki, ’nowan sma e kon na a Tata sondro a yepi fu mi’.

„Masra, sori wi a Tata”, Filipus e aksi, „èn a nofo gi unu”. Leki fa a sori dan Filipus ben wani fu Yeises sori a persoon fu Gado ini wan sani di yu ai kan si, neleki fa Moses, Elia nanga Yesaya ben kisi disi fu si na ini fisyun ini owruten. Ma te yu luku en bun, dan den apostru abi wan moro bun sani leki den sortu fisyun dati, so leki fa Yeises e taki: „Mi de so langa kba nanga unu, èn toku, unu no kon sabi mi ete, Filipus? A sma di si mi, si a Tata tu”.

Yeises e sori na so wan volmaakti fasi a sma di en Tata de, taki te yu luku en bun, dan fu de nanga en èn luku en dûn de leki yu e si a Tata trutru. Toku, a Tata bigi moro leki a Manpikin soleki Yeises e erken: „Den sani di mi e taigi unu, a no fu mi srefi mi e taki den.” Yeises e gi na a yoisti fasi en hemel Tata ala grani fu den leri fu en.

Fa a ben musu de wan deki-ati gi den apostru fu yere Yeises e taigi den now: „A sma di e sori bribi na ini mi, a sma dati sa du so srefi den wroko di mi e du; èn a sa du wroko di bigi moro leki disi”! Yeises no e meine taki den bakaman fu en ben sa du moro bigi wondruwroko leki san en ben du. Nôno, ma a ben meine taki den sa go doro nanga a diniwroko fu wan moro langa pisiten, na ini wan moro bigi kontren èn na moro furu sma.

Yeises no wani libi den disipri fu en den wawan na baka te a gwe. „Awasi san unu e aksi na ini mi nen”, a e pramisi, „mi sa du dati.” A e taki moro fara: „Mi sa aksi na Tata èn a sa gi unu wan tra yepiman, na yeye fu a waarheid, fu de fu têgo nanga unu.” Bakaten di a ben opo go na hemel, dan Yeises ben kanti na santa yeye, na tra yepiman disi, na tapu den disipri fu en.

A gwe di Yeises o gwe de krosibei, so leki fa a e taki: „Ete wan syatu pisiten dan grontapu no sa si mi moro.” Yeises o de wan yeye mekisani di no wan sma kan si. Ma agen Yeises e pramisi den kotrow apostru fu en: „Unu sa si mi, bika mi e libi èn unu sa libi.” Iya, no wawan taki Yeises sa meki den si en na ini libisma skin baka te a opobaka, ma na a fasti ten a o opo den fu kisi libi nanga en na ini hemel leki yeye mekisani.

Now Yeises e taki na eenvoudig lin: „A sma di abi den komando fu mi èn e hori den, a sma dati na a sma di lobi mi. Na a tra sei, a sma di lobi mi, mi Tata sa lobi en, èn mi sa lobi en èn sa sori mi srefi na en na wan fasi di de krin fu si.”

Tapu disi na apostru Yudas, a wan di den e kari so srefi Tadeyus, e koti Yeises mofo: „Masra, san psa taki yu wani sori yu srefi na unu na wan fasi di de krin fu si èn no na a grontapu?”

„Efu wan sma lobi mi”, Yeises e piki, dan „a sa hori den wortu fu mi, èn mi Tata o lobi en . . . A sma di no lobi mi no e hori den wortu fu mi.” Tra fasi leki den bakaman fu en di e gi yesi na en, dan a grontapu no wani sabi den leri fu Krestes. Fu dati-ede a no e sori en srefi na den.

Di Yeises ben du en diniwroko na grontapu, a ben leri den apostru fu en furu sani. Fa den sa memre ala den sani, spesrutu fu di srefi te nanga a momenti disi, den no ben man fu frustan so furu? Koloku, Yeises e pramisi: „A yepiman, a santa yeye, di a Tata sa seni kon na ini mi nen, a wan dati sa leri unu ala sani èn tyari kon baka na ini unu prakseri ala den sani di mi ben fruteri unu.”

Agen Yeises e trowstu den te a e taki: „Vrede mi e libi gi unu, mi e gi unu a vrede fu mi. No meki un ati kon ongorostu, no meki a krenpi kon na wán fu frede ede.” Fu tru, Yeises e gwe, ma a e fruklari: „Efu unu lobi mi, dan unu sa prisiri taki mi e go mi pasi na a Tata, bika a Tata bigi moro leki mi.”

A ten di Yeises de nanga den ete, kon syatu. „Mi no sa taki furu nanga unu moro”, a e taki, „fu di a tiriman fu grontapu e kon. Èn a no abi makti na mi tapu.” Satan Didibri, a wan di ben man fu go na ini Yudas èn kisi makti na en tapu, na a tiriman fu grontapu. Ma no wan swakifasi fu sondu de na ini Yeises, di Satan kan meki wan fowtu kobroiki fu en fu drai Yeises puru fu a pasi fu dini Gado. Yohanes 14:1-31; 13:27; Lukas 22:3, 4; Exodus 24:10; 1 Kownu 19:9-13; Yesaya 6:1-5.

▪ Pe Yeises e go èn sortu piki Thomas e kisi ini a tori fu a pasi di e go drape?

▪ Leki fa a sori, dan san Filipus ben wani Yeises du, di a ben aksi en sani?

▪ Fu san-ede a sma di si Yeises si a Tata tu?

▪ Fa den bakaman fu Yeises e du moro bigi wroko leki san en ben du?

▪ Na sortu fasi Satan no abi makti tapu Yeises?