Yongu dienstknekti na ini beibri ten

A BEIBRI e fruteri fu someni tumusi bun yongu sma di ben teki a dienst fu den gi Gado seryusu èn di ben kisi furu blesi fu di den ben du disi. Efu now wi yongu ofu owru èn abi weti wiwiri, den tumusi moi beibri eksenpre disi kan gi furu deki-ati.

Yosef ben de tina-seibi yari nomo di den ben seri en fu dini leki srafu na ini Egipti. Drape, bun fara fu en famiri èn fu den ai fu den sma di ben sabi en, Yosef ben buweisi en soifri-retifasi. Di a uma fu Potifar ben pruberi fu kori Yosef, Yosef ben taki: „Fa mi ben sa kan du a bigi takrudu disi èn trutru sondu na Gado?” Srefi di Yosef ben tanapu na fesi na makti Farao, a moro makti kownu fu en ten, Yosef ben kobroiki a okasi fu gi Gado glori fu a fruklari di a ben fruklari den dren fu Farao. A ben kisi furu blesi. Gado ben kobroiki Yosef fu fri den Egipti sma èn na famiri fu en fu a dede di e kon fu angri, èn fu tyari en papa Yakob, nanga en osofamiri kon na ini Egipti. — Genesis 37:2; 39:7-9; 41:15, 16, 32.

Moses nanga tra kotrow yonguwan

A umapikin fu Farao ben teki Moses leki en eigi pikin, ma a mama nanga papa fu Moses ben man fu leri en fu a tru Gado. A beibri e taki taki di Moses ben e gro kon, „a ben weigri fu den kari en na manpikin fu Farao umapikin . . . èn ben frukisi fu den behandel en takru nanga a pipri fu Gado na presi fu nyanbun fu wan pisiten fu sondu”. Gado ben kobroiki Moses fu tyari en pipri komoto fu Egipti, fu kisi a wèti na Sinaï èn fu skrifi wan prenspari pisi fu a beibri. Awasi o owru yu de, yu e kweki wan fasti bosroiti fu dini Gado neleki fa Moses ben du? — Hebrew sma 11:23-29; Exodus 2:1-10.

Den Buku e fruteri wi fu „pikinwan” di ben arki makandra nanga den trawan fu na nâsi, di a wèti fu Gado ben leisi gi Israèl (Deuteronomium 31:10-13). „Alamala di ben abi nofo frustan fu arki”, ben tanapu „fu son-opo te mindri dei” fu yere a Wèti ini den dei fu Nehemia (Nehemia 8:1-8). Srefi efu den pikinwan no ben frustan ala sani, den ben musu frustan taki den ben musu lobi, anbegi èn gi yesi na Yehovah Gado. Awasi o owru yu de, yu e arki na den kongres èn den konmakandra, pe den e taki fu a Wortu fu Gado? Yu leri a prensparifasi fu gi yesi na en, neleki fa den yongu Israèl sma ben du?

David, Yosia nanga Yeremia

Gado ben frukisi David, a moro yonguwan fu aiti brada, fu du spesrutu wroko èn Gado ben taki fu en: „Mi feni David, a manpikin fu Isaï, wan man di de wan prisiri gi mi ati, di sa du ala den sani san mi wani.” Gado ben frukisi en fu de „wan herder” fu en pipri, èn David ben du a wroko dati, ala di furu yari baka makandra a ben sori en lobi gi Yehovah. A ben skrifi moro leki sebitenti fu den Psalm èn ben tron wan afo fu Yeises Krestes. Efu yu owru ofu yongu, yu e warderi den pasi fu Gado èn yu e du den sani di a wani, neleki fa David ben du? — Tori fu den Apostru 13:22; Psalm 78:70, 71; 1 Samuwel 16:10, 11; Lukas 3:23, 31.

Yosia ben tron kownu di a ben abi aiti yari nomo. Di a ben de 15 yari, „ala di a ben de wan boi ete, a ben bigin fu suku a Gado fu en afo David”. Bifo Yosia ben de twenti yari a ben bigin fu du sani kontrari falsi anbegi. Baka ten a ben sorgu fu den meki a tenpri kon leki fa a ben de na fesi èn ben meki a soifri anbegi kon bun baka na ini a kondre. Wi e leisi: „Ala den dei fu en den no ben drai komoto fu waka baka Yehovah, a Gado fu den afo fu den.” Wi alamala no man de kownu leki Yosia, ma awasi omeni yari wi abi, wi kan dini Gado èn teki wan krakti bosroiti kontrari falsi anbegi. — 2 Kronieken 34:3, 8, 33.

Na almakti Gado ben taigi Yeremia: „Bifo mi ben seti yu na ini a bere, mi ben sabi yu, èn bifo yu ben bigin fu komoto fu a muru, mi ben santa yu. Leki profeiti gi den nâsi mi ben meki yu.” Yeremia ben protesteer taki a ben yongu tumusi fu de wan profeiti: „Ke, ow Soeverein Masra Yehovah! Luku, trutru mi no sabi fa fu taki, bika mi na wan boi ete.” Yehovah ben piki: „No taki: ’Mi na wan boi ete.” Ma, na ala sma di mi sa seni yu go, yu musu go èn ala sani di mi sa komanderi yu, yu musu taki.” Moro leki fotenti yari Yeremia ben du dati kotrow, èn srefi di a ben wani gi abra, a no ben man stóp. Gado wortu ’ben gersi wan faya di ben e bron, taputapu na ini en bonyo’. A ben musu fu taki! Awasi omeni yari yu abi, yu e meki a srefi sortu bribi di Yeremia ben abi, gro na ini yu èn yu e go na fesi ini a dienst fu Gado neleki en? — Yeremia 1:4-8; 20:9.

Daniël, Yeises nanga Timoteyus

Yu no yere fu Daniël? Leki fa a sori, a no ben doro twenti yari srefisrefi di den ben tyari en go makandra nanga tra „pikin” leki strafuman na a dyari fu a makti Nebukadnesar, a kownu fu Babilon. Awasi fa Daniël ben yongu, toku a ben teki a fasti bosroiti fu gi yesi na Gado. Daniël nanga den konpani fu en ben weigri fu doti den srefi nanga nyanyan di kande ben broko a wèti fu Gado ofu nyanyan di ben kon doti nanga heiden gwenti. Moro leki aititenti yari, Daniël no ben degedege èn ben kibri en soifri-retifasi, srefi so fara taki a ben weigri fu stóp begi Gado, awasi disi ben sa abi leki bakapisi taki den ben sa trowe en go gi den lew. Yu e si yu wroko gi Gado èn den begi fu yu netso seryusu? So a musu de. — Daniël 1:3, 4, 8; 6:10, 16, 22.

Di Yeises ben abi 12 yari den ben kon feni en e sidon a mindri den kerkileriman na ini a tenpri na ini Yerusalen, „ala di a ben arki den èn ben poti aksi gi den. Ma den alamala di ben arki na a [yongu Yeises] doronomo ben fruwondru fu a frustan di a ben frustan sani èn fu den piki fu en.” Wan beibri takimakandra fu owru man na ini a tenpri ben sa abi yu belangstelling neleki fa a ben de nanga Yeises? Trawan ben sa fruwondru fu a frustan di yu e frustan sani èn fu den piki fu yu? Na ini a ten disi furu yongu Kotoigi di e studeri, e arki bun èn e teki prati na den kresten konmakandra, abi wan beibri sabi di e fruwondru den owruwan. — Lukas 2:42, 46, 47.

Yu de leki Timoteyus, di leki pikin ben kisi leri na ini „den santa buku”? Di Timoteyus ben de wan yonkuman, ’den brada ben taki bun fu en’ na ini no moro mendri leki tu gemeente. Na apostru Paulus ben frukisi Timoteyus fu rèis nanga en, no wawan fu meki a de sjowman, ma fu yepi Paulus fu leri trawan. Den ben sa frukisi yu gi den sortu grani disi? Den e ’taki bun’ fu den wroko fu yu, no soso na ini yu eigi gemeente, ma so srefi na ini tra gemeente? — 2 Timoteyus 3:15; Tori fu den Apostru 16:1-4.

Sortu tamara yu wani?

Yonguwan na ini a ten disi kan de kotrow neleki fa Yosef, Moses, David nanga trawan ben de kotrow? Iya, seiker. A de tru taki furu yonguwan abi belangstelling soso fu abi wan bun ten. Ma trawan e kobroiki den yongu yari a wan koni fasi èn e leri sabi Gado èn san en wani de gi den. Den e meki a beibri profeititori kontru: „A pipri fu yu sa pristeri den srefi nanga den heri ati na a dei fu yu srudati legre. . . . Yu abi yu konpani fu yonkuman neleki dowdropu.” — Psalm 110:3.

Nanga a yari fu den disi na prakseri, dan den sortu bun yongu sma disi e sori wan koni di no abi en speri, bika Gado kan yepi den fu meki a libi fu den na ini a ten disi abi bun bakapisi èn kan gi den so srefi wan tumusi moi tamara na ini a nyun grontapu di e kon (1 Timoteyus 4:8). Ma fa wan yonguwan na ini a ten disi kan meki so wan bribi gro leki di fu den yonguwan di a beibri e taki fu den? Efu yu e angri fu sabi dati, wi e gi yu a kari fu leisi a artikel „Koloku yonguwan na ini a dienst fu Yehovah”, di e bigin tapu bladzijde 12 fu a tijdschrift disi.

[Prenki na tapoe bladzijde 5]

A gudu fu Egepti no ben kori a yongu Moses

Na yonguman David ben de wan prisiri gi Yehovah ati

[Prenki na tapoe bladzijde 6]

Ala di Yeremia ben feni taki a ben de „soso wan boi ete”, toku a ben preiki nanga deki-ati wan boskopu di no ben pôpi

Di Yeises ben abi 12 yari a ben meki den owruman fu en fruwondru fu na frustan di a ben frustan sani fu a Wortu fu Gado

[Prenki na tapoe bladzijde 7]

Na ini Israèl, srefi den pikinwan ben arki te den ben leisi a wèti fu Gado. Yu e du dati tu?