De duman fu na wortu, no soso yereman
„No ibri sma di e taigi mi: ’Masra, Masra’, sa go na ini a kownukondre fu hemel, ma en di e du a wani fu mi Tata, di de na ini hemel sa go.” — MATEYUS 7:21.
1. San den bakaman fu Yeises musu tan du?
TAN aksi. Tan suku. Tan naki. Hori doro na ini begi nanga stuka èn go doro fu de wan duman fu den wortu fu Yeises di skrifi na ini a Bergipreiki. Yeises e taigi den bakaman fu en taki den de na sowtu fu grontapu, di abi wan boskopu di e kibri sma libi èn di moksi nanga sowtu, di den no mag meki kon lasi en switi, fu di a e lasi en tesi ofu en krakti fu kibri sma libi fu no pori. Den na a leti fu grontapu, di e skèin na leti fu Krestes Yeises nanga Yehovah Gado gwe baka, no soso nanga san den e taki ma so srefi nanga san den e du. Den bun wroko fu den e panya netso wan krin leti leki den wortu fu den di e gi sma leri — èn e taki kande moro tranga na ini wan grontapu di gwenti na Farisei hoigrifasi fu den kerki tiriman sobun leki politiek tiriman, di e taki furu ma e du pikinso nomo. — Mateyus 5:13-16.
2. Sortu frumane Yakobus ben gi, ma sortu makriki posisi, sonwan fu den no e teki nanga reti?
2 Yakobus e frumane: „Tron . . . duman fu na wortu, no soso yereman, e bidrigi yu srefi nanga falsi fasi fu denki” (Yakobus 1:22). Furu sma e bidrigi den srefi nanga a leri taki ’kisi frulusu wan leisi na frulusu fu alaten’, neleki now den no abi noti fu du moro èn kan wakti wan paiman na ini hemel di den denki taki den o kisi. A de wan falsi leri èn wan soso howpu. „A sma di horidoro te na a kba”, Yeises ben taki, „na a sma di sa kisi frulusu” (Mateyus 24:13). Fu kisi libi fu têgo, yu musu ’buweisi taki yu de kotrow srefi te na dede’. — Openbaring 2:10; Hebrew sma 6:4-6; 10:26, 27.
3. Sortu leri ini a tori fu krutu [trawan] Yeises e gi moro fara ini na Bergipreiki?
3 Aladi Yeises ben go doro nanga en Bergipreiki, a ben taki fu moro sani di kresten musu pruberi fu du. Dyaso wan de di gersi wan eenvoudig sani, ma di e krutu wan fu den moro muilek firi di wi musu wini: „Stòp fu e krutu [trawan], so taki den no krutu yu; bika nanga a krutu di yu e krutu [trawan], den sa krutu yu; èn nanga na markitiki di yu e marki [trawan] nanga en den sa marki yu. Fu san-ede dan yu e luku na pikin stro na ini yu brada ai, ma no e luku na barki na ini yu eigi ai? Ofu fa yu kan taigi yu brada ’Meki mi puru na pikin stro na ini yu ai’, te, luku! wan barki de na ini yu eigi ai? Unu Hoigriman! Puru fosi na barki fu yu eigi ai, èn dan yu sa si krin fa yu musu puru na pikin stro fu na ai fu yu brada. — Mateyus 7:1-5.
4. Sortu ekstra leri den e gi na ini na tori fu Lukas, èn san e de na bakapisi te wi e meki kobroiki fu en?
4 Na ini a tori fu Lukas fu na Bergipreiki, Yeises ben taigi en arkiman fu no suku fowtu na trawan. Na presi fu dati ’meki den tan gi fri’, dati wani taki, gi den konpe libisma fu den pardon fu den fowtu. Disi so leki fa Yeises ben taki, ben sa meki trawan du a srefi tu: „Oefen a gi fu sani, èn sma sa gi yu. Den sa kanti na tapu yu tapu-futu wan tumusi bun marki, di stanpu, seki kon na wan èn di psa marki. Bika nanga na marki di yu e marki [trawan] nanga en, den sa marki yu tu.” — Lukas 6:37, 38.
5. Fu san-ede a de tumusi moro makriki fu si den fowtu fu trawan na presi fu si di fu wi?
5 Ini na fosi yarihondro G. T. den Fariseiman, fu den leri ede di ben gi abra nanga mofo, ini algemeen ben lobi fu krutu trawan na wan ogri-ati fasi. Ibriwan fu den arkiman fu Yeises di ben abi na gwenti fu du dati, ben musu stòp nanga dati. A de so makriki fu si na pikin stro na ini na ai fu trawan leki fu si na barki na ini wi eigi ai — èn a de moro gorostu gi na ’mi firi’ fu wi! So leki wan sma ben taki: „Mi lobi fu suku fowtu na trawan fu di a e meki mi firi so bun!” Fu sori ibri yuru baka tapu fowtu fu trawan, kan gi wi na firi taki wi bun srefisrefi, wan firi di gersi wan yepi gi wi eigi fowtu di wi wani kibri. Ma efu a poti reti fu a fowtu de fanowdu, dan disi musu gi ini wan yeye fu safri-atifasi. Na sma di e poti fowtu na trawan reti, musu sabi alaten en eigi fowtu. — Galasia sma 6:1.
Pruberi fu frustan sani bifosi fu krutu den
6. Efu a de so taki wi musu tyari wan krutu kon, na tapu gron fu san wi musu du dati dan, èn sortu yepi wi musu suku fu no e suku fowtu psa marki?
6 Yeises no ben kon fu krutu grontapu, ma fu frulusu en. Ibri strafu di a ben leisi, no ben komoto fu en ma ben abi den gron na ini den wortu di Gado ben gi en fu taki (Yohanes 12:47-50). Ibri krutubosroiti di wi e teki musu de so srefi ini akruderi nanga na Wortu fu Yehovah. Wi musu temper na libisma firi fu de tumusi esi fu krutu [trawan]. Te wi e du disi, dan wi musu aksi Yehovah yepi doronomo na ini begi: „Tan aksi, èn den sa gi yu; tan suku, èn yu sa feni; tan naki doro, èn den sa opo gi yu. Bika ala sma di e aksi, e kisi, èn ala sma di e suku, e feni, èn ala sma di e naki doro, den sa opo gi en” (Mateyus 7:7, 8). Srefi Yeises ben taki: „Mi no kan du noti fu mi srefi; so leki mi e yere, mi e krutu; èn a krutu di mi e tyari kon, de regtfardiki, bika mi no e suku mi eigi wani, ma a wani fu en di seni mi kon.” — Yohanes 5:30.
7. Sortu gwenti, wi musu kweki di sa yepi wi fu meki kobroiki fu na Gowtu Lin?
7 Wi musu kweki na gwenti fu no krutu sma, ma fu pruberi fu frustan den fu di wi e poti wi srefi na ini den presi — a no de wan makriki sani fu du, ma a de wan fanowdu sani efu wi wani hori wi srefi na a Gowtu Lin, di Yeises ben meki bekenti baka dati: „Ala sani dan di unu wani taki den sma du gi unu, unu musu du so srefi gi den; disi, te yu luku en bun, na san a Wet nanga den Profeiti wani taki” (Mateyus 7:12). So bun den bakaman fu Yeises musu abi wan fini firi èn musu si na frustan, emotioneel èn yeye toestand fu trawan. Den musu si èn frustan na fanowdu fu trawan èn abi persoonlijk belangstelling fu yepi den (Filipi sma 2:2-4). Furu yari na baka Paulus ben skrifi: „Bika na heri Wet e kon tru ini wán taki, dati na: ’Unu musu lobi na sma na unu sei leki unu srefi.’” — Galasia sma 5:14.
8. Fu sortu tu pasi Yeises ben taki, èn fu san-ede wán fu den a moro bigi pisi fu na libismafamiri e frukisi?
8 „Psa go na ini na portu di naw”, Yeises ben taki baka dati, „bika bradi èn bigi na pasi de di e tyari sma go na pori èn furu sma de di e psa go na ini; ma naw a portu de èn smara na pasi di e tyari sma go na a libi, èn pikinso sma de di e feni en” (Mateyus 7:13, 14). Furu sma na ini na ten dati ben teki na pasi fu go na pori, èn furu sma e du dati te now ete. Na bradi pasi e gi libisma pasi fu denki so leki den wani èn fu libi so leki den wani: no wan enkri regel, no wan enkri fruplekti, soso wan fasi fu libi nomo pe yu no abi fu span, pe ala sani makriki. No wan enkri „span yu srefi krakti fu psa go na ini na naw doro” de gi den! — Lukas 13:24.
9. San de fanowdu fu waka na smara pasi, èn sortu warskow Yeises e gi na den wan di e waka na pasi disi?
9 Ma a de na naw doro di e gi pasi fu go na a pasi fu têgo libi. A de wan libi pasi di e aksi fu dwengi yu srefi. A kan tyari tranga leri kon nanga en di sa ondrosuku den buweigi fu ati fu yu finifini èn tesi a dipi fu na gi di yu gi yu srefi abra. Te frufolgu e kon, dan a pasi e kon muilek èn a e aksi hori doro. Yeises e warskow den wan di e waka na pasi disi: „Luku bun nanga den falsi profeiti, di e kon na unu na ini skapu krosi, ma inisei den de krasi wolfu” (Mateyus 7:15). Den wortu disi ben fiti den Fariseiman heri bun (Mateyus 23:27, 28). Den ben „go sidon a tapu na sturu fu Moses” èn ben fruteri taki den e taki gi Gado, aladi den ben e waka na baka den leri fu libisma. — Mateyus 23:2.
Fa den Fariseiman „ben tapu na kownukondre”
10. Na sortu spesrutu fasi den sabiman fu Buku nanga Fariseiman ben pruberi ’fu tapu na kownukondre gi sma’?
10 Boiti fu dati, dan den dyu kerki leriman ben pruberi fu tapu na pasi gi den wan di ben suku fu psa na ini na naw portu go na inisei. „Helu fu unu, sabiman fu Buku nanga Fariseiman, hoigriman! bikasi unu e tapu na kownukondre fu hemel gi den sma; fu di unu srefi no e go na inisei, èn unu no e gi primisi na den wan di de na pasi fu go na ini” (Mateyus 22:13). Den Fariseiman ben kobroiki na fasi di Yeises ben warskow fu en. Den ben sa „trowe na nen [fu en disipri] leki gadolowsu, fu na Manpikin fu libisma ede” (Lukas 6:22). Fu di na man di ben gebore breni èn di Yeises ben meki kon gosontu, ben bribi taki Yeises ben de na Mesiyas, meki den ben trowe en komoto fu na snoga. Na papa nanga mama fu en no ben wani piki nowan aksi fu di den ben frede taki den ben sa trowe den komoto fu na snoga. Fu na srefi reide meki trawan di ben bribi taki Yeises ben de na Mesiyas ben draidrai fu meki dati bekenti na publiki. — Yohanes 9:22, 34; 12:42; 16:2.
11. Sortu froktu di e meki yu kon sabi den, den kerkileriman fu na krestenheid e meki?
11 „Na den froktu yu sa sabi den”, Yeises ben taki. „Ibri bun bon [e meki] tumusi bun froktu, ma ibri bon di pori e meki froktu di no warti noti” (Mateyus 7:16-20). Na srefi lin fiti na ini a ten disi. Furu fu den kerki leriman fu na krestenheid e taki a sani disi ma e du wan tra sani. Ala di den e taki taki den e gi leri fu na beibri, toku den e feni sani bun di e kosi Gado soleki na Driwanfasi èn na helfaya. Trawan no wani sabi notinoti fu na frulusu ofrandi, den e leri sma fu evolutie na presi fu leri sma taki na Gado meki den sani di de èn e preiki pôpi psychologie fu e tigri sma yesi. Neleki den Fariseiman, na so furu fu den kerki leriman ini na ten disi de sma di lobi moni, èn di e puru milyunmilyun dala na a skin fu den ipi fu den (Lukas 16:14). Den alamala e bari taki: „Masra, Masra”, ma a piki di Yeises e gi den, de: „Mi no ben sabi unu noiti! Komoto gwe fu mi, unu wrokoman fu takrudu.” — Mateyus 7:21-23.
12. Fu san-ede sonwan di ben waka na smara pasi wan dei, tapu fu du dati, èn nanga sortu bakapisi?
12 Ini na ten disi, dan sonwan di ben waka wan dei na smara pasi stòp fu du disi. Den e taki taki den lobi Yehovah, ma den no e gi yesi na en kobòt fu preiki. Den e taki taki den lobi Yeises, ma den no e gi den skapu fu en nyanyan (Mateyus 24:14; 28:19, 20; Yohanes 21:15-17; 1 Yohanes 5:3). Den no wani kon na ondro wan tyatyari nanga den wan di e waka ini Yeises futustap. Den ben feni na smara pasi tumusi smara. Den ben kon weri fu du bun èn fu dati-ede den „ben komoto fu wi mindri, ma den no ben de fu wi sortu; bika efu den ben de fu wi sortu, dan den ben sa tan na wi” (1 Yohanes 2:19). Den ben go baka na ini dungru, èn „o bigi na . . . dungru dati de!” (Mateyus 6:23). Den ben poti san Yohanes ben aksi tangitangi fu den na wan sei: „Pikin-nengre, meki wi lobi, no nanga wortu èn no nanga tongo, ma nanga du èn ini waarheid.” — 1 Yohanes 3:18.
13, 14. Sortu agersitori Yeises ben gi fu a kobroiki fu den wortu fu en ini wi libi, èn fu san-ede a ben fiti so gi den sma di ben libi na ini Palestina?
13 Yeises ben tapu en Bergipreiki nanga wan agersitori di naki sma ati: „Ibri sma di e yere den wortu disi fu mi èn e du den, den sa teki gersi nanga wan koniman, di ben bow en oso na tapu a stonbergi. Èn alen ben fadon èn den frudu ben kon èn den winti ben wai èn ben naki na oso dati, ma a no ben fadon broko, bikasi a ben abi en fondamenti steifi na tapu na stonbergi.” — Mateyus 7:24, 25.
14 Na ini Palestina hebi alen ben kan meki watra lon saka psa den lagi libakontren di ben drei èn di wantronso ben tron wan frudu di e pori sani. Efu oso ben wani tan tanapu, dan a fondamenti fu den ben musu bow na tapu steifi stonbergi. A tori fu Lukas e sori taki na man „ben diki go dipi èn ben poti wan fondamenti tapu na stonbergi” (Lukas 6:48). A ben de tranga wroko, ma di na tranga winti ben kon, a ben sori taki a ben warti a muiti. So srefi a bow fu kresten eigifasi tapu den wortu fu Yeises sa kisi en pai te na frudu fu ongoloku kon wantronso.
15. San o de na bakapisi gi den wan di e waka baka leri fu libisma na presi fu gi yesi na den wortu fu Yeises?
15 Na tra oso ben bow na tapu santi: „Ibri sma di yere den wortu fu mi disi èn no e du den, den sa teki gersi nanga wan donman di ben bow en oso na tapu santi. Èn na alen ben saka tiki èn den frudu ben kon èn den winti ben wai èn ben naki na oso dati èn a ben fadon broko èn a fadon fu en ben bigi.” So a sa go nanga den wan di e taki „Masra, Masra” ma e misi fu gi yesi na den wortu fu Yeises. Mateyus 7:26, 27.
„No so leki den sabiman fu Buku fu den”
16. Fa na Bergipreiki ben wroko tapu den wan di ben arki en?
16 San ben de na bakapisi fu a Bergipreiki? „Now di Yeises ben kba nanga den wortu disi, dan a bakapisi ben de taki den ipi sma ben fruwondru fu en fasi fu gi leri; fu di a ben gi den leri leki wan sma di san a taki sma e erken èn no leki den sabiman fu Buku fu den” (Mateyus 7:28, 29). Wan sma di ben taki nanga wan makti, di den no ben miti noiti ete afesi, ben seki den te dipi na ini den ati.
17. San den sabiman fu Buku ben musu du fu meki na leri fu den ben teri, san den ben taki fu koniman di ben dede èn di den ben teki wortu fu den taki?
17 No wan sabiman fu Buku ben taki nanga a makti fu en srefi, so leki na historiya tori disi e sori: „Fu sma bribi san den ben e leri dan den sabiman fu Buku ben teki wortu fu den leri di gi abra nanga mofo èn den tata fu den: no wan enkri preiki fu sortu sabiman fu Buku tu ben abi pikinso krakti ofu ben abi pikinso waarde sondro [fu taki] . . . Den rabbi abi wan leri, ofu . . . Den koniman taki; ofu den sortu wortu dati di e sori tapu leri di gi abra nanga mofo. Hillel na Bigiwan ben gi leri akruderi waarheid, èn ini akruderi nanga na leri di ben de fu wan spesrutu afersi; ’Ma, aladi a ben gi leri fu na afersi na heri dei, . . . den no ben teki na leri fu en te leki a ben taki te fu kba, so mi ben yere en fu Sjemaja nanga Abtalion [bigiman fu fosi na ten fu Hillel]’” (A Commentary on the New Testament From the Talmud and Hebraica, fu na anu fu John Lightfoot). Den Fariseiman ben taki srefi fu koniman di ben dede langaten kba: „Den mofobuba fu den regtfardikiwan, te wan sma e gi wan leri di na wet taki ini den nen fu den — den mofobuba fu den e taki makandra nanga den wan na ini grebi.” — Torah — From Scroll to Symbol in Formative Judaism.
18. (a) San ben de a difrenti na mindri a leri fu den sabiman fu Buku èn na di fu Yeises? (b) Na sortu fasi a leri fu Yeises ben de so aparti?
18 Den sabiman fu Buku ben teki wortu fu sma di dede leki wortu di sma erken leki tru; Yeises ben taki wortu di sma erken leki tru fu di den komoto fu na libi Gado (Yohanes 12:49, 50; 14:10). Den rabbi ben teki watra fu alenbaki di ben abi mèf watra; Yeises ben meki fonten fu vers watra bori kon na tapu so taki den ben kowru wan dreiwatra fu inisei. Na neti a ben begi èn ben prakseri dipi, èn te a ben taki, dan a ben meri den dipi pisi na ini sma di den srefi noiti ben sabi fu den a fesi. A ben taki nanga wan krakti di den ben kan firi, nanga wan makti di srefi sabiman fu Buku, Fariseiman nanga Saduseiman te fu kba ben frede fu tyalensi en (Mateyus 22:46; Markus 12:34; Lukas 20:40). Noiti wan tra sma ben taki na so wan fasi! Na a kba fu na preiki den ipi sma ben fruwondru!
19. Fa wantu fasi fu gi leri di Yehovah Kotoigi e kobroiki na ini na ten disi, de a srefi leki den wan di Yeises ben kobroiki ini en Bergipreiki?
19 Èn san de fu taki fu na ten disi? Leki oso-fu-oso preikiman Yehovah Kotoigi e kobroiki den sortu fasi disi. Wan ososma e fruteri yu: „Mi kerki e taki taki na grontapu sa bron.” Yu e piki: „Na ini yu eigi beibri tanapu na ini Preikiman 1:4: ’grontapu e tan te ini ala ten.’” A sma e fruwondru. „We, noiti mi ben sabi taki dati ben tanapu na ini mi beibri.” Wan tra sma e taki: „Alaten mi yere taki sondari sa bron na ini hèlfaya.” „Ma yu eigi beibri e taki na ini Rome sma 6:23: ’Na paiman fu sondu na dede.’” Ofu fu na Driwanfasi: „Mi preikiman taki Yeises nanga en Tata de speri fu makandra.” „Ma na ini Yohanes 14:28 na ini yu beibri den e teki Yeises wortu skrifi: ’Mi Tata bigi moro leki Mi.’” Wan tra sma e taigi yu: „Mi ben yere sma e taki taki a kownukondre fu Gado de na inisei fu yu.” Na piki fu yu: „Na ini Danièl 2:44 yu beibri e taki: ’Ini den dei fu den kownu disi na Gado fu hemel sa opo wan kownukondre, di fu têgo no sa pori noiti . . . A sa broko ala den kownukondre disi na pisipisi, èn pori den, ma srefi a sa tan fu têgo.’ Fa na Kownukondre dati ben kan de na ini sei fu yu?”
20. (a) Sortu difrenti de na mindri na fasi fa den Kotoigi fu Yehovah èn den fesiman fu na krestenheid e gi leri? (b) Fu san a de now na ten?
20 Yeises ben taki nanga wortu san sma e erken leki tru èn di Gado ben gi en. Yehovah Kotoigi e taki nanga na waarheid fu Gado Wortu. Den kerkileriman fu na krestenheid e taki fu kerki leri di gi abra nanga mofo èn di kon doti nanga yepi fu kerkileri di komoto fu Babilon nanga Egipti. Te opregti sma e yere taki na beibri e sori taki den bribi overtoigi no bun, dan den e fruwondru èn e bari taki: ’Noiti mi ben sabi taki dati ben tanapu na ini mi beibri!’ Ma a tanapu na ini. Gi ala sma di sabi den yeye nowtu a ten doro now fu poti prakseri tapu den wortu fu Yeises ini na Bergipreiki èn bow na so wan fasi na tapu wan ston fondamenti di e tan.
Overzicht aksi
◻ San wi musu pruberi fu du na presi fu tanapu klariklari nanga wan krutu, èn fu san-ede?
◻ Fu san-ede so furu sma na ini na ten disi e teki na bradi pasi?
◻ Fu san-ede Yeises fasi fu gi leri ben de so tra fasi leki di fu den sabiman fu Buku?
◻ Fa na Bergipreiki ben wroko tapu den wan di ben arki en?