Jezus libi nanga diniwroko

Na pasi foe libi

FOE WAKA a pasi foe kisi libi, wani taki foe poti prakseri èn gi jesi tapoe den leri foe Jezus. Ma disi no de makriki. Den Fariséman foe eksempre ben sori na fasi foe kroetoe tra sma na wan ogri-atifasi, èn foeroe sma seker e waka na den baka. Efoe Jezus e go moro fara nanga en Bergipréki, dan a e gi na fermane foe dat’ede: „Tapoe foe kroetoe tra sma, sodati den no kroetoe joe; bikasi nanga a kroetoe nanga san joe e kroetoe, nanga dati den sa kroetoe joe.”

A de wan kefarlek sani foe waka a baka na eksempre foe den Fariséman di ben e feni fowtoe nomonomo tapoe sani. Leki fa a tori foe Lukas e sori dan Jezus e gi wan eksempre foe na kefar disi te a e taki: „Wan breni man kan tjari man breni man sonte? Ala toe no sa fadon na ini wan olo?”

Foe soekoe fowtoe toemsi na tra sma, foe taki moro bigi psa a fowtoe foe den èn foe kosi den, de wan serjoesoe sondoe. Jezus foe dat’ede aksi: „Fa joe kan taigi joe brada ’meki mi poeroe na dré grasi ini joe ai’, te, loekoe! wan barki de na ini joe égi ai? Hoigriman! Poeroe fosi na barki foe joe égi ai n dan joe sa si krin fa joe moe poeroe na drégrasi ini na ai foe joe brada.”

Disi no wani taki dati den discipel foe Jezus ini na demakandra nanga tra sma no ben moe gebroiki a koni foe si sani, bika a ben taki: „No gi san de santa na den dagoe èn no trowe joe peri gi den agoe.” Den waarheid foe a Wortoe foe Gado de santa. Den de leki agersi peri. Ma efoe son sma, netleki dagoe ofoe agoe, no e sori warderi gi den diri waarheid disi dan den discipel foe Jezus moe libi den sma dati a densrefi èn moe soekoe sma di den jesi e teki moro esi san den e taki.

Aladi Jezus ben taki foe na begi na fesi na ini en lezing, tokoe a e poti krakti now na tapoe na fanowdoe foe tan horidoro. „Tan aksi”, a e taki nanga krakti, „èn joe sa kisi.” Leki wan eksempre foe a klari di Gado de klari foe jere begi, Jezus e aksi: „Wan sma de sonte a mindri oenoe di te en manpikin aksi en foe brede, sa gi en wan ston . . . efoe oenoe soboen aladi oenoe de takroe sabi foe gi boen presenti na oen pikin, omeni moro oen Tata di de ini den hemel, sa gi boen sani na den sma di e aksi en foe dati!”

Morofara Jezus e ferteri foe wan gronprakseri di kisi barinen èn di gewoonlek den sma e kari na gowtoe regel. A e taki: „Ala sani dan di oenoe wani taki den sma doe gi oenoe, oen moe doe gi den toe.” Foe libi akroederi na regel disi, wani taki wan positieffasi foe libi, di de foe doe boen na tra sma èn foe handri nanga den soleki joe wani den moe handri nanga joe.

Dati na pasi foelibi no de makriki e kon a krin ini na instructie foe Jezus: „Pasa go ini na naw doro; bika bradi èn bigi na pasi de di e go na pori, èn foeroe sma de di e psa go na ini; ma naw na doro de èn smara na pasi di e go na libi, èn pikinso sma de di e feni en.”

Na kefar dati sma pori oenoe de bigi, èn foe dat’ede Jezus e warskow: „Loekoe boen nanga den falsi proféti, di e kon na oenoe na ini skapoe boeba, ma na inisé den de krasi tigri.” Net soleki boen nanga takroe bon joe kan herken den na den froktoe, na so Jezus e taki, dati ooktoe falsi proféti sma kan herken den ooktoe na den waka nanga libi èn den leri.

Morofara Jezus e tjari kon a krin dati meki a no soso san wan sma e taki e meki a tron en discipel, ma san a e doe. Son sma e taki dati Jezus de a Masra foe den, ma leki fa Jezus taki dan na fesi foe ala sma a sa ferklari, efoe den no e doe a wani foe en Tata: „Mi no ben sabi oenoe noiti! Oenoe komoto gwe foe mi, oen wrokoman foe kroektoedoe.”

Te foe kaba na bosroiti foe Jezus lezing di de foe memre e kon. Jezus e taki: „Ibriwan sma di e jere den wortoe disi foe mi èn e doe den, den sa teki gersi nanga wan koni man, di ben bow en oso tapoe na stonbergi èn na alen fadon èn den froedoe ben kon èn den winti ben wai èn ben naki na oso dati, ma a no ben fadon, bika a ben de tapoe na stonbergi leki fundamenti.”

Na a tra sé Jezus e ferklari: „Ibriwan sma di e jere den wortoe disi foe mi èn no e doe den den sa teki gersi nanga wan don man, di ben bow en oso na tapoe na santi, èn a alen fadon èn den froedoe ben kon èn den winti ben wai èn ben naki na oso dati èn a ben fadon, èn a fadon foe en ben bigi.”

Te Jezus kaba nanga en lezing, dan den ipi sma ben ferwondroe foe en fasi fa a ben leri sma, bika a e leri den leki wan sma di abi makti èn no soleki den kerki fesiman foe den. Mattéus 7:1-29; Lukas 6:27-49.

◆ San Jezus e taki foe na kroetoe foe trawan èn fa a e sori ete dati en discipel ini na de makandra foe den nanga tra sma moe gebroiki na koni foe si sani?

◆ San Jezus e taki morofara foe begi, èn sortoe gronprakseri a e meki bekenti?

◆ Fa Jezus e sori dati na pasi di e go na libi no ben sa de makriki èn dati a kefar de foe sma kori joe poeroe?

◆ Fa Jezus e tapoe en lezing, èn san ben de a bakapisi foe en?