Kibri kristen wanfasi na ini bisnis afersi
„Loekoe! O boen èn o switi a de efoe brada e libi makandra na ini wanfasi!” — PSALM 133:1.
1. Foe san-ede kristen wanfasi de wan sani di wi wani?
A DE TROETROE ’boen èn switi efoe kristen brada e libi makandra na ini wanfasi’, spesroetoe na ini a ten disi, now di someni trobitrobi de na ini na grontapoe. A de wan moi sani te troetroe wanfasi de psa marki, èn na bakapisi foe disi de wan stéfi banti foe brada lobi a mindri sma, sodati a de wan prisiri foe de na ini na kompani foe makandra. Trobitrobi na a tra sé na wan takroe sani èn e tjari bita-ati kon, ogri-ati èn prati a mindri mati.
2. Fa na gemeenschappelijke loekoe foe wi tapoe bijbel gronprakseri moe tranga wi brada wanfasi srefi na ini bisnis afersi?
2 Te kristen sma abi bisnis afersi nanga tra dienstknegti foe Jehovah, dan na gemeenschappelijke loekoe foe den tapoe bijbel gronprakseri moe tranga den brada wanfasi foe den. Wan owroeman na ini na gemeente foe Jehovah Kotoigi e taki: „Now di moro nanga moro na grontapoe no de foe fertrow, a de wan sani di e gi joe kowroe-ati foe wroko makandra nanga kompe kristen di e hori densrefi na gronprakseri. Wi no a foe ’tan loekoe boen’ alaten. Krin èn eerlijk bisnis afersi e tron wan sani ini a seti disi di joe no e si foeroe. Fa a de wan switi sani foe wroko nanga eerlijk sma di no e smoko, di no e gebroiki dotitaki, sma di e dwengi densrefi, di na sokoe foe égi wini na skinfasi no de na moro prenspari boewégi foe den ati!”
3. (a) San na wantoe bisnis afersi di kan de a mindri bribiwan? (b) Sortoe gron-(. . . ?)
3 San na wantoe bisnis afersi di kan de a mindri bribiwan? Wi kan taki foe dati foe eksempre te toe ofoe moro kristen e teki a bosroiti foe bigin leki patna wan bisnis. Ini a tra geval na wán kan de basi èn a trawan a wrokoman. Ete wan situatie e sori ensrefi efoe kristen e pristeri wan tra bribiwan wan produkt ofoe dienst. Ini ala den sortoe bisnis afersi disi den gronprakseri foe eerlijkfasi nanga soifri-retifasi di tanapoe na ini a Wortoe foe Jehovah di skrifi nanga jepi foe santa jeje de na markitiki foe na doe foe den. Tapoe a fasi disi na wanfasi a mindri brada e kon tranga èn na prisiri foe na wroko makandra e kon moro hé. — 1 Korinte 10:31.
4. Sortoe kefar de gi kristen na ini bisnis?
4 Ma na kefar de dati son sma e libi den hé kristen fasi foe loekoe sani. Kande den e go denki toemsi na den égi belang (Filippi 2:4). Moni kan kon de moro prenspari leki kristen wanfasi. Ma a soekoe foe wini nomo na ini afersi kan pori na brada matifasi èn wan sma matifasi nanga Jehovah. Noiti wi wani dati sowan sani pasa! — Johannes 13:34, 35; Hebrewsma 13:5; 1 Timóteus 3:2,3; 1 Johannes 3:16; 4:20, 21.
A prenspari fasi foe wan formeel kroederi
5. Fa na eksempre foe Abraham na ini a bai foe doti e sori na waarde foe wan formeel kroederi?
5 Loekoe pikinso, foe meki dati ini bisnis afersi sani no ferstan na wan fowtoe fasi na fasi fa Abraham ben bai wan pis doti. A „ben wegi gi Efron na moni na ini solfroe foe san a ben taki na ini a jesi foe den manpikin foe Heth, fohondro solfroe sikkel, soleki disi ben de bekenti na koopman. Na so na doti foe Efron, di ben de ini Machpéla . . . ben abra go tapoe Abraham leki a goedoe foe en di a ben bai afesi den ai foe den manpikin foe Heth a mindri ala sma di ben pasa go ini na doro foe en foto.” Disi no ben de wan informeel mofo a mindri makandra. A ben de wan formele kroederi, di ben kisi krakti afesi foe kotoigi. Wan ferstan foe sani na tapoe wan fowtoe fasi foe san ben bai èn a soifri prijs no ben de. — Genesis 23:2-4, 14-18.
6. Fa kristensma kan poti formeel na tapoe papira prenspari bisnis kroederi?
6 A so a de ooktoe wan ferstan sani gi kristen sma foe skrifi prenspari kroederi formeel tapoe papira. Efoe a kroederi de wan seri foe wan sani, dan den toe partij kan poti en tapoe papira san ben seri, foe sortoe prijs, fa na pai o psa, tapoe sortoe ten èn tapoe sortoe fasi sani sa lever èn sortoe tra kondisi den feni densrefi na ini. Efoe a de wan dienst di moesoe doe, dan den partij kan skrifi sortoe wroko sa doe, oten a sa klari, san de a prijs èn sortoe tra sani de wan pisi foe na kroederi. Na pisi papira disi moe abi wan datum èn ala toe partij moe poti den nen na ondro èn kibri wan eksemplaar foe en. Sowan kroederi nanga papira de spesroetoe foe belang ini wan bisnis kompanionschap. Ala toe partij e kisi jepi foe kisi wan krin ferstan foe na fasi fa den de nanga makandra èn foe libi ini akroederi nanga na rai di Jezus ben gi. „Meki joe wortoe Ja de gewoon Ja, èn joe No gewoon No.” (Mattéus 5:37). Na ini afersi di de moro frekti, kande a sa de wan boen sani foe kari sabiman kon foe meki sowan akroederi tapoe papira.
7. (a) San wan sma moe hori moro na prakseri na ini a meki foe kroederi tapoe papira? (b) Na ini sortoe jejefasi kristen moe handri na ini bisnis afersi?
7 Ini na skrifi na tapoe papira foe wan kroederi dan den partij no moe denki wawan san den abi na prakseri, ma ooktoe bakapisi di ben sa kan kon, soleki a fasi fa na kroederi moe kon a wan kaba efoe disi de fanowdoe (Odo 21:5). Ala bisnis abi wan elementi foe risiko na ini den, èn no wan enkri papira kan abi na tapoe en ala omstandigheid di ben sa kan kon. Efoe den omstandigheid kenki troetroe, dan na kroederi kande sa moe kisi wantoe sani a tapoe moro ofoe moe loekoe en ete wantron moro. Baka wan pisten a kan kon krin srefi gi wan sma dati a no ben doe boen foe go ini wan bisnis afersi èn a kan de fanowdoe dati a tapoe wan maniri fasi a poeroe ensrefi na ini. Ma disi no moe de soso wan wrokosani foe lon komoto foe na frantwortoe foe paiman di ben kon foedi sani fermorsoe ofoe ai no hori boen na tapoe san den abi. Den moe taki foe na afersi foe si efoe na kroederi kan broko sortoe moni regeling moesoe meki kande. Ma wan sma di en konsensi e tjari en sa doe seker ala sani san redelijkerwijs a kan doe foe doro den ferplekti ini na kontrakt, srefi efoe foe wan heri pisten a moe waka baka wan tra fasi foe libi (2 Thessalonika 3:12). Efoe wan kristen wani waka sondro fowtoe èn wani doe regtvaardikifasi, dan awinsi dati no de ini en belang a sa proeberi foe doro den ferplekti ini wan kroederi, foedi a wani foe tan hori na boen ati foe Jehovah. „A ben sweri na san de takroe gi ensrefi, èn tokoe a no e kenki” (Psalm 15:1-4). Ini ala den sortoe sani disi dan Jehovah Kotoigi moe meki den „afersi foe den pasa nanga lobi”. — 1 Korinte 16:14.
8. Foe san-ede a boen foe bereken den kostoe bifo wan sma bigin wan bisnis?
8 Nanga disi na ini prakseri a boen foe bereken den kostoe bifo wan sma bigin nanga wan bisnis afersi (Lukas 14:28-30). Son sma e go nanga foeroe boen ferwakti kande na ini a boto foe doe bisnis na tapoe se ma den e naki broko na tapoe den ston ondro watra di no de foe si. Sonwan foe eksempre ben prakseri dati a winst di a basi foe den e meki ben kan de gi densrefi efoe den ben abi sowan bedrijf. Ma den no e prakseri dati doe wan zaak na ini na grontapoe disi no de wan eenvoudig sani foe na concurrentie di no e loekoe psa noti. Ibri jari tintin doesoen zaak ini na heri grontapoe e bankroet. Foeroe kristen ben e prisiri te den ben feni wan wroko baka nanga wan fasti salaris, bakadi den ben si dati den ferwakti foe den na ini bisnis no ben kon troe.
Sori respeki na ini bisnis afersi
9. San de wantoe fasi fa kristen kan sori makandra na wrokope respeki?
9 „Teki fesi na ini a sori foe respeki gi makandra”, Romeini 12:10 e taki. Kristen wrokoman di e doe dati, no sa proberi foe gebroiki a basi foe den foe kisi wini gi densrefi, foedi a de wan kompe-kotoigi foe den, bika den no abi na grontapoe loekoe dati na basi, foedi a kan gi ensrefi pasi foe dati, moe man foe ferdrage den swakifasi foe en wrokoman. Na presi foe dati den sa sori a basi foe den respeki nanga jepi foe a fasi foe den faja wroko foe den (1 Timóteus 6:2). Na a tra sé den kristen basi sa sori respeki gi kompe Kotoigi di de wrokoman nanga na fasi tapoe san den e taki nanga den èn e behandel den. Wan basi noiti e abi a prakseri dati a de moro hé leki wan kompe bribiman di e wroko gi en, ma a moe prakseri dati den ala toe de srafoe foe Jehovah, de speri foe makandra na en fesi (Efese 6:9). Ooktoe den basi nanga den wrokoman moe hori ala ten a rai disi foe Galacia 6:10 ini prakseri: „Meki wi doe foe dat’ede san de boen gi ala sma, ma spesroetoe gi den di de ini nasrefi bribi leki wi.”
10. Fa sakafasi de wan jepi ini a sori foe respeki gi makandra?
10 A no de moeilek foe sori respeki pe sakafasi de moro foe si. Wan sakafasi owroeman ini wan kristen gemeente foe eksempre no sa feni en moeilek foe saka ensrefi na ini bisnis afersi na a tiri foe wan kompe Kotoigi di no abi den srefi grani ini na gemeente. Foe en sé na sakafasi basi no sa abi moeiti foe saka ensrefi na ini gemeente activiteit na en wrokoman, na owroeman. Sakafasi sa jepi den ala toe foe soekoe toemsi foeroe fowtoe ofoe foe ferwakti volmaaktifasi foe na trawan, bika „alamala ben sondoe èn no e doro na glori foe Gado”. — Romeini 3:23; 12:3.
11. Fa kristen kan sori redelekheid na ini bisnis afersi?
11 Na bijbel e komanderi ooktoe: „Meki joe redelijkfasi kon de bekenti na ala sma” (Filippi 4:5). A no ben sa de redelijk efoe wan kristen ben sa wani spesroetoe sani ofoe wroko foe kefarlek boen kwaliteit ofoe alaten ben sa wani a moro lagi prijs foedi a e doe zaak nanga wan kompe Kotoigi. Ooktoe wan kristen no moe loekoe a sani so dati a abi reti tapoe vrij ofoe tra grani, soleki a gebroiki foe masjien ofoe oto, foedi en basi na wan kompe bribiman. Presenti, wroko foe toemsi boen kwaliteit, lagi prijs ofoe kisi dé fri kande de a mindri den mogelijkheid, ma joe no kan tanapoe a tapoe dati joe kisi den. Onredelijk ferwakti kan tjari ferferifasi kon a mindri kristensma sodati na matifasi foe den e kon pori. — Odo 18:19.
12. Tapoe san wi moe loekoe boen efoe ai go foe na gi foe kownoekondre kotoigi tapoe na presi pe wi wi wroko?
12 Aladi kristensma e meki na boen njoensoe bekenti foe Gado Kownoekondre na sma di no e bribi, tokoe den moe sorgoe na tapoe a wroko foe den dati na kownoekdre prékiwroko dati e feni presi na tapoe na joisti ten. Efoe ai pasa na a ten foe wroko, dan na basi moe gi pasi foe dati. Noso a basi en ati kan kon bron foe dati, èn disi ben sa kan tjari sjen kon tapoe Jehovah nanga en pipel (1 Timóteus 6:1). Tra ten de, soleki na ten foe schaften, ini san den sortoe kotoigiwroko dati kan doe. Ooktoe, efoe difrenti Kotoigi e wroko ini wan wrokope, dan den no sa wani gi ten na ini a taki nanga makandra foe theokratis afersi efoe den moe de foe doe den wroko.
Hori den boewégi foe ati na ini bisnis na prakseri
13. Fa Paulus nanga den sma di ben hori en ini den oso ini Korinte ben loekoe na grontapoe wroko foe den?
13 Di na apostel Paulus ben de ini Korinte, a ben doe bisnis nanga Aquila nanga Priskila di ben teki en na den oso foedi den ben de wan kristen (Tori foe den Apostel 18:1-3). Den ben wroko foe sorgoe foe den sani foe tan a libi, ma dati no ben de a prenspari marki foe den — na meki go a fesi foe na troe anbegi foe Jehovah. Fowtoe no ben kan feni a den foe „denki dati a gi di wan sma e gi ensrefi na a dini foe Gado de wan wrokosani foe kisi wini na skinfasi” (1 Timóteus 6:5). Ala dri ben kisi bigi blesi foe Jehovah èn a bijbel e taki foe den na wan boen fasi. — Romeini 16:3-5.
14. (a) Foe san-ede a boen foe ondrosoekoe sortoe boewégi foe ati e pré bifo wi bigin wan bisnis? (b) Fa dri Kotoigi ben loesoe a problema foe den?
14 Wan kristen kan tan farawe foe foeroe moeilijkheid te ai ondrosoekoe finifini sortoe boewégi foe ati e pré ini a tori bifo a e bigin nanga wan bisnis afersi. Na wan kristen foe eksempre sa wani abi kande moro ten foe meki den kownoekondre afersi go a fesi aladi en patna wani abi kande wan moro makriki libi nanga moimoi sani. Na wán wani poti kande den winst go baka ini a bisnis foe meki a kon moro bigi, ma a trawan de klari foe pai moro belasting èn foe no poti a winst go baka ini na bisnis foe no tjari moro wroko kon a tapoe en. Na ini wan seker kondre dri Kotoigi foe Jehovah, di ben de ooktoe famiri foe makandra, ben de patna ini wan bisnis. Ma baka wan pisten den go denki difrenti foe na marki ini san ibriwan foe den ben wani foe de na ini na bisnis. Na loesoe foe den ben de foe teki a bosroiti makandra foe prati den bisnis belang foe den èn foe prati den klanti a mindri den. Tapoe a fasi disi den ben hori den jeje matifasi nanga den famiri-matifasi sondro dati problema kon. Den ben poti prakseri na tapoe na rai foe na bijbel „foe feti a baka den sani di e meki vrede go a fesi èn den sani di de foe bow makandra.” — Romeini 14:19.
15. Foe san-ede spesroetoe wi moe hori boen ini prakseri den boewégi foe wi ati ini a tori foe moni?
15 Wan sma nanga spesroetoe sorgoe moe kibri den boewégi foe en ati ini a tori foe moni. „Wan man foe getrow doe”, na so na bijbel e gi wi na djdranti, „sa kisi foeroe blesi, ma a sma di e feti foe kisi goedoe no sa tan sondro fowtoe” (Odo 26:20). Te wan kristen ’e feti foe kisi goedoe’, dan a kan kon breni gi wan sani san de foeroetron moro diri — en kristen bradafasi. Disi kan meki pratifasi kon ini a gemeente, foedi trawan ben sa mandi nanga en dati ai feni moni moro prenspari leki den kownoekondre belang. Na bijbel e warskow foe dat’ede: „Den sma di ben teki na bosroiti foe kon goedoe, e fadon go na ini tesi èn wan trapoe èn foeroe takroe lostoe di de foe soso, di e trowe den sma go ini pori. Bika na lobi gi moni de wan roetoe gi ala sortoe takroe sani èn foedi den ben poti densrefi na tapoe na lobi dati, meki son sma ben drifi gwe foe na bribi èn den boro densrefi alape nanga foeroe pen.” — 1 Timóteus 6:9, 10.
16. Fa wi moe doe ini ala bisnis afersi?
16 Wán fasi tapoe san „na lobi foe moni” ben sa kan kori wan kristen go ini na trapoe, de foe kori en go foe leni ensrefi foe bisnis afersi di no de boen, ofoe foe taki en leti, di de oneerlijk. Efoe kompe kristen e go wroko nanga sowan sma makandra, dan pratifasi kan de na bakapisi. Èn den sortoe doe disi e tjari wan sma matifasi kon ini kefar. Efoe bisnis afersi wani waka soepel, dan a de prenspari foe hori na ini prakseri dati bedrigifasi na ini zaak „de wan tegoe sani gi Jehovah” (Odo 11:1; 20:23). Kristensma na a tra sé wani foe kan taki leki na apostel Paulus: „Wi abi na fertrow dati wi abi wan eerlijk konsensi, dati wi winsi foe tjari wisrefi ini ala sani na wan eerlijkfasi.” — Hebrewsma 13:18.
Loesoe bisnis problema
17. Fa son pikin bisnis problema kan loesoe?
17 Ini ala bisnis afersi a mindri brada problema kan sori densrefi. Son moro pikin problem kan loesoe te wan sma gebroiki eenvoudig na gronprakseri foe 1 Petrus 4:8, pe tanapoe: „Abi moro foeroe faja lobi gi makandra, bika lobi e tapoe wan ipi sondoe.” Efoe problema no kan loesoe na tapoe na fasi dati, dan wan sma no kan libi den foe gro doro kon moro ogri. Disi ben sa kan meki wan lasi kon foe respeki makandra èn foe kon tron leki vreemde sma foe makandra. Na loesoe de nofotron na ini switi takmakandra pe ala sani e taki krin bifo na situatie kon moro ogri. A Wortoe foe Gado e gi wi na rai foe loesoe problema esesi. — Mattéus 5:23-25; Efese 4:26, 27.
18. San wan kristen kan doe efoe a e bribi dati wan kompe kristen ben doe en kroektoe srefsrefi na ini bisnis?
18 Ma efoe wan kristen e prakseri dati wan kompe bribiman doe kroektoe nanga en srefsrefi na ini bisnis, dan tapoe wan soifrifasi den stap di skrifi na ini Mattéus 18:15-17 moesoe teki na prakseri. Na fosi stap ofoe den fosi toe stap ben moe de nofo foe loesoe na afersi. Efoe dati no de so, dan na di foe dri stap ben sa de dati den owroeman di den poti foe doe wroko e kon ini a tori. Efoe disi ben sa psa, dan den owroeman ben sa gi rai tapoe wan krakti fasi na den brada foe no go nanga makandra a fesi kroetoe. Foe go na fesi kroetoe nanga wan kompe bribiman, soleki Paulus ben taki „ben sa de wan lasi gi oenoe.” A e taki moro fara: „Foe san-ede joe no e meki den doe joe kroektoe moro foeroe? Foe san-ede joe no e meki den bedrigi joe?” (1 Korinte 6:1-8). A moro betre foe lasi moni leki foe poti sjen tapoe Jehovah nen èn na gemeente èn foe broeja na wanfasi foe wi foedi joe e tjari wan bribiwan go a fesi kroetoe. A no de foe taki dati, awinsi kroetoe no e kon ini a tori, dan wan ofoe trafasi foe doe sani foe a sé foe a gemeente kan de fanowdoe efoe oneerlijkfasi de ini a tori.
19. Tapoe sortoe toemsi moi bijbel eksempre owroeman kan sori te den e gi rai na ini bisnis problema?
19 Efoe den owroeman e gi rai na den sma di abi bisnis problema, dan den kan sori den a tapoe na eksempre foe Abraham di no ben e prakseri na en égi wini, di en matifasi nanga Lot ben kon ini kefar. Abraham di tokoe ben de a moro owroewan, ben gi Lot na wan switifasi na fosi okasi foe teki wan pisi ini a kondre, moro betre leki wan prati ben kon ini na matifasi foe den (Genesis 13:5-11) Owroeman ben sa kan sori ooktoe tapoe a boen eksempre foe Zacheüs. A ben de klari foe gi afoe foe den goedoe foe en na den pôtiwan èn na tra afoe fotron so moro foeroe a den sma di a ben poeroe sani a den skin nanga jepi foe falsi kragi. — Lukas 19:1-10; loekoe ooktoe 1 Korinte 10:24.
20, 21. San wi moe hori ini prakseri alaten ini a tori foe grontapoe activiteit?
20 Fa a de wan toemsi moi sani te kristensma e loesoe bisnis moeilijkheid na wan boenfasi foe di den e waka na baka na bijbel rai! Tapoe a fasi disi na wanfasi foe den srefi efoe bisnis afersi no waka boen no sa kon broeja. Dati sa de na kolokoe bakapisi te alaten baka wi e tan hori krin a wi fesi dati gi kristensma grontapoe activiteit e kon tapoe a di foe toe presi, baka den kownoekondre afersi èn brada wanfasi. Ooktoe a de wan moi sani efoe bisnis afersi kan seti na so wan fasi dati moro ten e kon fri gi den moro prenspari sani di abi foe doe nanga kownoekondre activiteit. — Mattéus 6:33; teki gersi nanga Filippi 1:9, 10.
21 San de soboen troetroe a moro prenspari sani na ini wi libi, de na matifasi ini san wi de nanga Jehovah èn nanga wi kristen brada (Mattéus 22:36-39). Noiti wi ben sa wani dati grontapoe krakti ofoe bisnis afersi meki na matifasi disi lasi en moifasi, bika troetroe noti wi kan teki gersi nanga wi matifasi nanga Jehovah ofoe kan kon na a sé foe na moifasi foe na de di wi de nanga makandra leki brada ini wanfasi!
Aksi foe loekoe san wi ben leri
◻ Fa na gi jesi na a Wortoe foe Gado e meki moro boen matifasi kon ini wi bisnis afersi?l
◻ Foe san-ede a de wan boen sani foe poti prenspari kroederi na tapoe papira?
◻ Fa kristen kan sori makandra respeki tapoe wroko?
◻ Foe san-ede wi moe ondrosoekoe wi boewégi foe ati na ini bisnis?
◻ Sortoe fasi wi moe sori ini na loesoe foe bisnis problema?
[Prenki na tapoe bladzijde 7]
Abraham ben meki a bai foe a doti kon de wan troe sani, foedi a meki wan formeel krodeeri nanga Efron
[Prenki na tapoe bladzijde 9]
Na wroko foe sorgoe foe den sani foe tan a libi ben de moro mendri prenspari gi Paulus, Aquila èn Priskila