Meki a koni foe man si sani krin kibri joe
„A krakti foe man denki srefi sa hori wakti gi joe, èn a koni foe man si sani krin sa kibri joe.” — ODO 2:11
1. Gi sortoe sani a koni foe man si sani krin, kan kibri wi?
JEHOVAH wani, taki joe e sori a koni foe man si sani krin. Foe san ede? Foe di a sabi taki disi sa kibri joe gi difrenti kefar. Odo 2:10-19 e bigin nanga disi te a e taki: „Te koni e kon na ini joe ati èn sabi srefi tron wan prisiri gi joe eigi sili, dan a krakti foe man denki srefi sa hori wakti gi joe, èn a koni foe man si sani krin srefi sa kibri joe.” Kibri joe gi san? Foe den sani leki „a takroe pasi”, den sma di gowe libi den reti pasi, èn sma di moro foeroe e tjari densrefi na wan bedrigi fasi.
2. San na a koni foe man si sani krin, èn sortoe koni foe man si sani krin, kresten wani abi spesroetoe?
2 Kande joe sa memre ete taki a koni foe man si sani krin, na a krakti foe a froestan di e meki sma si a difrenti na mindri sani. Wan sma di abi a koni foe man si sani krin e si a difrenti na mindri prakseri noso sani èn a kan kroetoe sani na wan boen fasi. Wi leki kresten, spesroetoe wani abi a koni foe man si krin san foe doe na jejefasi tapoe a fondamenti foe a soifri sabi foe Gado Wortoe. Te wi e studeri den Boekoe foe bijbel, dan a de neleki wi e diki den bowston poeroe foe a koni foe man si krin san foe doe na jejefasi. San wi e leri, kan jepi wi foe teki bosroiti di e plisi Jehovah.
3. Fa wi kan kisi a koni foe man si krin san foe doe na jejefasi?
3 Di Gado ben aksi na Israèl kownoe Salomo sortoe blesi a ben wani, dan a jongoe tiriman ben taki: „Joe moesoe gi joe foetoeboi wan ati di e gi jesi, foe kroetoe a pipel foe joe, foe abi a koni foe man si a difrenti na mindri boen nanga ogri.” Salomo ben aksi foe kisi a koni foe man si a sani krin, èn Jehovah ben gi en disi na wan toemoesi aparti fasi (1 Kownoe 3:9; 4:30). Te wi wani kisi a koni foe man si sani krin, dan wi moesoe begi, èn wi moesoe studeri a Wortoe foe Gado nanga a jepi foe den poeblikâsi di e leri wi foeroe èn di wi e kisi nanga jepi foe „a getrow èn koni srafoe” (Mateus 24:45-47). Disi sa jepi wi foe kisi wan koni foe man si krin san foe doe na jejefasi na so wan fasi taki wi e tron „bigisma na ini a krakti foe a froestan”, èn wi man „si a difrenti na mindri [noso, si krin san na] boen nanga ogri”. — 1 Korentesma 14:20; Hebrewsma 5:14.
A de spesroetoe fanowdoe foe abi a koni foe man si sani krin
4. San a wani taki foe abi wan „soifri” ai, èn fa disi kan tjari wini kon gi wi?
4 Te wi abi a joisti koni foe man si sani krin, dan wi kan wroko akroederi den wortoe foe Jesus Krestes: „Foe dati ede, tan soekoe fosi a kownoekondre nanga en regtfardikifasi, èn ala den tra [materia] sani disi oenoe sa kisi toe” (Mateus 6:33). Jesus ben taki toe: „A lampoe foe a skin na joe ai. Efoe joe ai soifri, dan joe heri skin e brenki toe” (Lukas 11:34). Na ai na wan agersi lampoe. Wan ai di „soifri” de opregti, a e poti en prakseri na tapoe den moro prenspari sani. Nanga so wan ai, wi kan sori taki wi abi a koni foe man si sani krin èn kan waka sondro foe naki foetoe fadon na jejefasi.
5. San wi moesoe hori na prakseri foe a marki foe a kresten gemeente, ini a tori foe bisnis?
5 Na presi taki son sma hori na ai soifri, den meki a libi foe den èn a libi foe trawan kon frekti nanga bisnis tori di e kori sma. Ma wi moesoe memre taki a kresten gemeente na „wan stonfoetoe èn wan horibaka gi a waarheid” (1 Timoteus 3:15). Neleki den stonfoetoe foe wan oso, na so a gemeente e horibaka gi a waarheid foe Gado, èn a no de foe horibaka gi a bisnis foe wan sma. Den gemeente foe Jehovah Kotoigi no seti leki presi foe jepi meki bisnis afersi, sani di sma e seri, noso wroko di sma e doe gi trawan, waka boen. Wi no moesoe doe persoonlijk bisnis na ini a Kownoekondre zaal. A koni foe man si sani krin e jepi wi foe si taki Kownoekondre zaal, gemeente boekoestudie, bigi konmakandra, nanga den kongres foe Jehovah Kotoigi na presi foe abi kresten demakandra èn foe taki foe jeje sani. Efoe wi ben sa gebroiki den matifasi di wi abi na jejefasi foe jepi meki iniwan sortoe bisnis waka boen, dan disi no ben o sori taki wi no abi warderi gi warti sani na jejefasi? Noiti joe moesoe gebroiki sma di joe sabi na ini a gemeente foe kan kisi wini na moni sei.
6. Foe san ede sma no moesoe seri sani di bisnis e meki èn taki foe sani di abi foe doe nanga wroko di sma e doe gi trawan, na tapoe gemeente konmakandra èn foe san ede den no moesoe gebroiki den konmakandra toe foe meki reklame gi dati?
6 Son sma gebroiki sma di den sabi na ini a theokrasia foe seri dresi noso sani foe moi a skin, vitamin, telecommunicatie sani, sani foe bow, programa foe jepi toerist, computer programa nanga wrokosani, èn go so doro. Ma den gemeente konmakandra no de a presi foe seri sani noso foe taki foe sani di bisnis e seri èn foe taki foe wroko di sma e doe gi trawan. Wi kan si krin san na a fondamenti gronprakseri, efoe wi e memre taki Jesus ben „jagi ala den sma, nanga den skapoe èn meti, komoto na a tempel, èn a ben trowe den pikin moni foe den sma di e broko moni, na gron èn a ben drai den tafra foe den tapoe. Èn a ben taigi den sma di ben seri doifi: ’Poeroe den sani disi gowe foe dja! Oen tapoe foe meki na oso foe mi Tata wan oso foe seri sani!’” — Johanes 2:15, 16.
Fa a de nanga bisnis pe moni poti go na ini
7. Foe san ede a de fanowdoe foe abi a koni foe man si sani krin èn foe loekoe boen nanga bisnis pe wi e poti wi moni go na ini?
7 A de fanowdoe foe abi a koni foe man si sani krin èn foe loekoe boen te joe e prakseri foe poti joe moni go na ini wan bisnis. Kon meki wi taki dati wan sma wani leni moni èn a e pramisi sani leki: „Mi e gi joe a djaranti taki joe sa meki moni.” „Joe no sa lasi joe moni. Joe kan de seiker taki joe o meki moni.” Loekoe boen te wan sma e gi joe a djaranti disi. A no e si sani leki fa den de troetroe noso a no de eerlijk, bika pikinmoro noiti bisnis pe joe e poti moni go na ini, de seiker. Foe taki en leti, son sma di abi wan grati tongo, èn di no e hori densrefi na gronprakseri, bedrigi memre foe a gemeente. Disi e memre wi na den „godelowsoe man” di ben boro kon na ini a fosi jarihondro gemeente èn ’ben kenki a no-froedini boen-atifasi foe Gado kon tron wan reide foe tjari densrefi na wan loesoe fasi foe libi’. Den ben de neleki srapoe klipston na ondro watra di ben kan priti swenman opo èn kiri den (Judas 4, 12). A troe taki den reide foe san ede den bedrigiman e doe disi e difrenti, ma den disi so srefi e soekoe memre foe a gemeente foe kan kisi den.
8. San pasa ini a tori foe son bisnis di ben gersi taki den ben o tjari wini kon?
8 Srefi kresten di no ben prakseri takroe, froeteri tori foe bisnis di ben gersi wan sani pe sma ben kan meki moni foe dati, soso foe kon jere taki den èn den sma di ben de nanga den ini den bisnis disi, ben lasi a moni di den ben poti go na ini wan bisnis. A bakapisi ben de taki wan lo kresten lasi grani na ini a gemeente. Te a e kon na krin taki bisnis di opo foe meki sma kon goedoe esi na bedrigi sani, dan a wan-enkri sma di sa meki bigi moni na a bedrigiman, èn nofo tron a no de foe feni moro. Fa a koni foe man si sani krin kan jepi wan sma foe tan farawe foe den sortoe situwâsi dati?
9. Foe san ede a de fanowdoe foe abi a koni foe man si sani krin foe ondrosoekoe sani di sma e taki foe bisnis pe sma kan poti den moni go na ini?
9 A koni foe man si sani krin wani taki, dati wi moesoe man froestan sani di no de krin foe si. A koni disi de fanowdoe foe ondrosoekoe sani di sma e taki foe bisnis pe moni poti go na ini. Kresten e froetrow makandra, èn son sma kan prakseri taki den brada nanga sisa na jejefasi foe den no ben o kisi foe doe nanga bisnis di ben sa tjari a moni foe kompe bribiman kon ini kefar. Ma te wan bisnisman na wan kresten, dan dati no de wan djaranti taki a kan doe bisnis kefalek boen noso taki a bisnis foe en sa drai boen.
10. Foe san ede son kresten e soekoe foe leni moni na kompe bribiman foe doe bisnis, èn san ben kan pasa nanga den sortoe bisnis dati pe wi poti moni go na ini?
10 Son kresten e soekoe foe leni moni na kompe kresten foe doe bisnis, foe di organisâsi nanga wan boen nen di e leni sma moni, noiti ben o gi moni na a bisnis foe den sma disi di e teki tjans. Trawan bedrigi foeroe sma foe di den ben meki den bribi taki efoe den ben o poti a moni foe den go na ini wan bisnis nomo, dan den ben kan kon goedoe esi-esi sondro foe doe foeroe wroko noso kande den no ben o abi foe doe noti srefi. Son sma e kisi belangstelling gi wan bisnis pe moni e poti go na ini, foe a bigi prisiri di e kon foe dati, soso foe kon lasi ala a moni di den ben poti na wan sei! Wán kresten ben poti wan bigi moni go na ini wan bisnis foe di a ben froewakti foe kisi 25 procent rente na ini soso toe wiki. A ben lasi ala a moni dati di a presi pe a ben poti en moni go na ini ben kon bankroet. Na ini wan tra bisnis, wan sma di e bai noso e seri oso, ben leni bigi moni foe tra sma ini a gemeente. A ben pramisi toemoesi hei rente, ma a ben kon bankroet èn a ben lasi a moni di a ben leni.
Te bisnis e kon bankroet
11. Sortoe rai Paulus ben gi ini a tori foe bigi-ai èn a lobi gi moni?
11 Bisnis di kon bankroet meki taki son kresten di ben go na ini wan bisnis di no ben boen, ben lasi-ati èn den ben lasi a jejefasi foe den srefi. Sari na ati nanga bita atibron kon foe dati, foe di sma no ben meki a koni foe man si krin de wan kibri gi den. Bigi-ai kisi foeroe sma. ’Oenoe no moesoe taki srefi foe bigi-ai na oen mindri, soleki fa a e fiti santa sma’, Paulus ben skrifi (Efeisesma 5:3). Èn a ben warskow: „Den sma di ben abi a fasti bosroiti foe kon goedoe e kon ini wan tesi èn wan trapoe èn foeroe don èn takroe lostoe, di e meki sma fadon go na ini pori. Bika a lobi gi moni na a roetoe foe ala sortoe takroe sani, èn foe di son wan ben soekoe a lobi disi meki den gowe libi a bribi èn den soetoe densrefi na den heri skin nanga foeroe pen.” — 1 Timoteus 6:9, 10.
12. San kresten moesoe hori na prakseri spesroetoe, efoe den e doe bisnis nanga makandra?
12 Efoe wan kresten ben kon lobi moni, dan a ben sa kan doe ensrefi foeroe ogri na jeje sei. Den Fariseiman ben de sma di ben lobi moni, èn disi na wan eigifasi di foeroe sma na ini den lasti dei disi abi (Lukas 16:14; 2 Timoteus 3:1, 2). A tra sei foe a tori de, taki a fasi fa wan kresten e tjari ensrefi moesoe de „fri foe a lobi gi moni” (Hebrewsma 13:5). A no de foe taki, kresten kan doe bisnis nanga makandra noso opo wan bisnis makandra. Ma efoe den e doe dati dan bisnis takimakandra nanga negosi moesoe hori aparti foe gemeente afersi. Èn memre: Poti bisnis kroederi na tapoe papira ala ten, srefi na mindri jeje brada. Na artikel „Stel het op schrift” di ben tjari kon na doro na ini na Ontwaakt! foe 8 juni 1983, bladzijde 13 te nanga 15, na wan boen jepi.
13. Fa joe ben sa gebroiki Odo 22:7 ini a tori foe bisnis?
13 Odo 22:7 e froeteri wi: „A leniman na a foetoeboi foe a man di e leni en.” Nofo tron a no de wan koni sani te wi e meki wisrefi noso a brada foe wi tron so wan foetoeboi. Te wan sma e aksi wi foe leni en moni gi wan bisnis, dan a ben o de wan boen sani foe loekoe efoe a man pai a moni baka. Sma sabi en leki wan sma di joe kan froetrow èn di de eerlijk? A no de foe taki, dati wi moesoe froestan taki te wi e leni wan sma a moni dati, dan wi ben kan lasi a moni, foe di foeroe bisnis no e drai boen. Te wi meki wan kontrakti dan dati srefi no de wan djaranti taki wan bisnis sa drai boen. Èn seiker a no de wan koni sani gi no wan sma foe teki a tjans foe poti moro moni go na ini wan bisnis leki san a sma ben sa kan lasi.
14. Foe san ede wi moesoe sori taki wi abi a koni foe man si sani krin te wi leni moni na wan kompe kresten di a bisnis foe en kon bankroet?
14 Wi moesoe sori a koni foe man si sani krin te wi leni moni na wan kresten foe a gebroiki dati foe doe bisnis èn a moni ben lasi, ala di foefoeroe no ben de ini a tori. Efoe a no ben de a fowtoe foe a kompe bribiman foe wi di ben leni a moni taki a bisnis kon bankroet, dan wi kan taki dati a ben doe wi wan ogri? Nôno, bika wi ben leni en a moni nanga wi friwani, kande wi kisi rente foe dati, èn no wan foefoeroe sani pasa. Foe di a sma no foefoeroe wi, dan wi no abi no wan reide foe tjari a sma di leni a moni, go na kroetoe. Sortoe wini wi ben sa abi efoe wi e tjari wan eerlijk kompe kresten go na kroetoe di ben abi foe kon bankroet foe di wan bisnis di a ben denki taki a ben o drai boen, no ben waka boen? — 1 Korentesma 6:1.
15. Sortoe tori wi moesoe loekoe efoe wan sma kon bankroet?
15 Son leisi den sma di a bisnis foe den no ben waka boen, e soekoe froelekti foe di den e froeklari taki den bankroet. Foe di kresten no moesoe abi wan mi-no-ke fasi te den abi paiman, srefi baka te den kon fri na wet foe son paiman, meki son sma tokoe si en leki den plekti foe proeberi foe pai den paiman, efoe den sma di ben leni den a moni ben sa wani dati. Ma efoe wan sma di ben leni moni ben meki a moni foe en brada lasi, èn baka di a kon bankroet, a ben libi bigi? Noso efoe a sma di leni moni ben kisi nofo moni foe pai baka san a ben leni, ma a no e poti prakseri na tapoe a moreel plekti di a abi kande na en brada na moni sei? Dan sma ben o tweifri efoe a sma di leni moni boen nofo foe kisi wan frantiwortoe na ini a gemeente. — 1 Timoteus 3:3, 8; loekoe De Wachttoren foe 15 september 1994, bladzijde 30, 31.
Ma efoe bedrigi de ini a tori?
16. Sortoe sani wi kan doe efoe a gersi leki wan sma bedrigi wi nanga wan bisnis?
16 A koni foe man si sani krin e jepi wi foe froestan taki a no ala bisnis pe moni poti go na ini, e meki moni. Ma efoe bedrigi de ini a tori? Bedrigi na „te wan sma foe espresi e gebroiki bedrigifasi, triki, noso a drai di a e drai a waarheid foe kan kori wan tra sma foe meki a sma gi en wan diri sani di de foe a sma noso foe gi en wan legaal reti di a sma abi”. Jesus Krestes ben taki foe sani di wan sma kan doe te a e denki taki wan kompe anbegiman bedrigi en. Soleki fa Mateus 18:15-17 e sori, dan Jesus ben taki: „Efoe joe brada e doe wan sondoe, dan go tjari a fowtoe foe en kon na krin na mindri joe nanga en wawan. Efoe a e arki joe, dan joe wini joe brada. Ma efoe a no e arki, dan teki wán noso toe [sma] go nanga joe, so taki na a mofo foe toe noso dri kotoigi ibri tori kan poti reti. Efoe a no e arki den, dan taki nanga a gemeente. Efoe a no e arki a gemeente srefi, dan meki a de leki wan man di de foe den nâsi èn leki wan belastingman.” Na agersitori di Jesus ben froeteri baka dati, e sori taki a ben abi na prakseri den sondoe leki den wan di abi foe doe nanga moni tori, pe bedrigifasi de na ini toe. — Mateus 18:23-35.
17, 18. Fa a koni foe man si sani krin kan kibri wi, efoe wan sma di e taki dati a de wan kresten, bedrigi wi?
17 A no de foe taki, dati bijbel no ben o gi no wan reide foe doe den sani di skrifi na ini Mateus 18:15-17, efoe no wan boeweisi no de noso srefi efoe a no gersi leki bedrigi de ini a tori. Ma efoe wan sma di e taki dati a de wan kresten troetroe bedrigi wi? A koni foe man si sani krin kan kibri wi foe doe wan sani di kan pori a nen foe a gemeente. Paulus ben gi kompe kresten a rai foe meki wan ogri pasa nanga den èn srefi foe sma bedrigi den na presi foe tjari wan brada go na kroetoe. — 1 Korentesma 6:7.
18 Den opregti brada nanga sisa foe wi no ’abi bedrigifasi nanga foefoeroe’, leki a towfroeman Bar-Jesus (Tori foe den Apostel 13:6-12). So boen, meki wi gebroiki a koni foe man si sani krin te wi ben lasi moni di wi ben poti go na ini wan bisnis foe kompe bribiman. Efoe wi abi na prakseri foe tjari a sma go na kroetoe, dan wi moesoe loekoe san na den bakapisi di disi kan abi na wi tapoe, na tapoe tra sma, na tapoe a gemeente, èn na tapoe sma di de na dorosei foe a gemeente. Efoe wi e meki moeiti foe sma pai wi baka, dan dati ben kan njan foeroe ten, krakti, nanga tra moni foe wi. A ben sa kan abi leki bakapisi nomo taki wi e goedoe den afkati nanga tra sma di e doe wroko leki dati. Na wan sari taki son kresten ben òfer theokrasia grani, foe di den ben meki den sani disi abi ala den prakseri. Satan moesoe breiti, te wi lasi pasi na so wan fasi, ma wi wani prisiri na ati foe Jehovah (Odo 27:11). Na a tra sei, te wi e frigiti a tori taki wi lasi moni, dan dati sa jepi wi foe no abi sari na ati, èn a sa kibri foeroe ten foe wi èn foe den owroeman. A sa jepi wi foe hori a vrede na ini a gemeente èn a sa meki taki wi e tan soekoe a Kownoekondre fosi.
A koni foe man si sani krin èn a teki di wi e teki bosroiti
19. San a koni foe man si krin san foe doe na jejefasi èn begi kan doe gi wi te wi moesoe teki bosroiti di e poti druk na wi tapoe?
19 A teki di wi moesoe teki bosroiti di abi foe doe nanga moni noso bisnis kan druk hebi na wi tapoe. Ma te wi abi a koni foe man si krin san foe doe na jejefasi, dan dati kan jepi wi foe loekoe san de ini a tori èn teki koni bosroiti. Boiti dati, te wi e froetrow tapoe Jehovah na ondro begi, dan dati kan gi wi „a vrede foe Gado” (Filipisma 4:6, 7). A vrede foe Gado na wan tirifasi èn wan korostoefasi di e kon te wi abi wan krosibei matifasi nanga Jehovah. A de seiker taki so wan vrede kan jepi wi foe tan hori wi balansi te wi moesoe teki moeilek bosroiti.
20. San wi moesoe abi a fasti bosroiti foe doe, efoe bisnis èn a gemeente de ini a tori?
20 Meki wi abi a fasti bosroiti foe no meki trobi di abi foe doe nanga bisnis, pori a vrede foe wi noso di foe a gemeente. Wi moesoe hori na prakseri taki a kresten gemeente e wroko foe jepi wi na jejefasi, èn taki a no de wan presi gi bisnis. Bisnis ala ten moesoe tan aparti foe sani di e doe ini a gemeente. Wi moesoe gebroiki a koni foe man si sani krin èn loekoe boen te wi e bigin nanga wan bisnis. Èn meki wi hori wan balansi fasi ala ten na ini den sortoe tori disi, foe di wi e soekoe Kownoekondre afersi fosi. Efoe wan bisnis pe kompe bribiman de ini a tori e kon bankroet, dan wi kan soekoe foe doe san na a moro boen sani gi ala sma di abi foe doe nanga a tori.
21. Fa wi kan gebroiki a koni foe man si sani krin èn wroko akroederi Filipisma 1:9-11?
21 Na presi foe broko wi ede toemoesi foeroe nanga moni tori nanga tra sani di no de so prenspari, meki wi alamala beni wi ati go na a koni foe man si sani krin, begi Gado foe kan kisi tiri foe en, èn tan poti Kownoekondre afersi na a fosi presi. Soleki fa Paulus ben begi, dan ’meki a lobi foe wi kon moro nanga moro nanga a soifri sabi nanga ala a koni foe man si sani krin so taki wi kan kon sabi seiker san na den moro prenspari sani, so taki oenoe kan de sondro fowtoe èn no e meki tra sma noso wisrefi naki foetoe fadon’. Now di Krestes, a Kownoe, de na tapoe en hemel kownoestoeroe, meki wi sori taki wi abi a koni foe man si krin san foe doe na jejefasi na ini ala afersi foe a libi. Èn ’meki wi kon foeroe nanga a froktoe foe regtfardikifasi, di de nanga jepi foe Jesus Krestes, foe kan gi glori nanga prèise na wi Gado’, a Soeverein Masra Jehovah. — Filipisma 1:9-11.
San joe ben sa piki?
◻ San na a koni foe man si sani krin?
◻ Foe san ede a de spesroetoe fanowdoe foe sori taki wi abi a koni foe man si sani krin te wi e doe bisnis nanga kresten?
◻ Fa a koni foe man si sani krin kan jepi wi efoe wi feni taki wan kompe bribiman bedrigi wi?
◻ Sortoe ròl a koni foe man si sani krin moesoe plèi te wi e teki bosroiti?
[Prenki na tapoe bladzijde 18]
A koni foe man si sani krin sa jepi wi foe gebroiki a rai foe Jesus foe tan soekoe a Kownoekondre fosi
[Prenki na tapoe bladzijde 20]
Skrifi bisnis kroederi na tapoe papira ala ten