Fa wi kan du wan sani tapu na lobi fu Gado sondro fu suku wi eigi bun nomo?
„Efu Gado ben lobi wi na so wan fasi,dan wi srefi tu de fruplekti fu lobi makandra”. — 1 YOHANES 4:11.
1, 2. San a e aksi fu wi fu du wan sani tapu den sori fu na lobi fu Gado?
YEHOVAH de ini persoon lobi. Na ini na artikel na fesi, wi ben si o furu psa marki den sori di a e sori lobi de trutru. Wi ben si so srefi fa Moses, David nanga Yeises Krestes ben du wan sani tapu den sori disi fu lobi sondro fu suku den eigi bun nomo. Ibri Kotoigi fu Yehovah no musu wani fu du na srefi sani? Seiker!
2 San a e aksi fu wi fu du wan sani tapu den sori di Gado e sori lobi sondro fu suku wi eigi bun nomo? Fu kari wán penti, wi musu gi en na fosi presi na ini wi libi, lobi en nanga wi heri ati, sili, frustan nanga krakti (Markus 12:29, 30). Dati wani taki fu poti prakseri alaten na tapu Gado èn fu yu srefi abi wan waran matifasi nanga Yehovah. Wi e angri fu taki nanga wi hemel Tata na ini begi? Wi e begi sondro fu stòp èn wi e horidoro ini begi? Ofu wi e hasti wi srefi psa na ini den begi fu wi, èn e abi en ten na ten srefi tumusi druk fu begi? (Rome sma 12:12; 1 Tesalonika sma 5:17) Wi e poti prakseri tapu Yehovah, èn wi e gi en nanga na organisâsi fu en na grani fu san wi ben kan du? (1 Korente sma 3:7; 4:7) Iya, wi e firi na srefi leki fa na psalm singiman ben firi? Fu Gado a ben taki: „Seibi tron wan dei mi prèise yu.” — Psalm 119:164.
3. Te wi e kon makandra fu abi wan prisiriten, fa wi kan sori taki wi e du wan sani tapu na lobi fu Gado sondro fu suku wi eigi bun nomo?
3 Efu wi e du ofu no e du wan sani tapu na lobi fu Gado sondro fu suku wi eigi bun nomo, kan kon heri bun a krin te wi e kon makandra fu abi wan prisiri ten nanga makandra. Na takimakandra fu wi abi fu du dan nanga grontapu afersi noso yeye sani? A no de fanowdu taki wi musu abi wan seryusu beibri-studi ibri yuru te wi e kon makandra nanga konpe kresten. Ma seiker wi kan feni wantu moi penti di de yeye sani fu kobroiki na ini wi takimakandra. Fa wi e feni en fu fruteri ondrofenitori fu na preikiwroko ofu fu taki makandra fu na beibritekst di wi lobi? Èn wi kan fruteri fa wi leri sabi na waarheid ofu kan kari eksenpre fu na lobi sorgu nanga blesi fu Yehovah?
4. Fa wi musu si na afersi efu wi fruwakti no kon tru ini a tori fu wan ofu tra dienstgrani?
4 Wan tra situwâsi di kan meki kon a krin o bigi wi warderi de gi na lobi fu Gado, na te den e psa wi ini a tori fu wan ofu tra grani fu dienst na ini Yehovah organisâsi. Fa wi e du? Efu na a fosi presi wi e broko wi ede nanga a gi fu grani na Yehovah, dan wi sa agri, taki a no abi trobi suma e du na aparti dienstgrani dati èn taki kande na a srefi fasi Gado sa kisi grani. (Teki gersi Lukas 9:48.) Ma efu wi e broko wi ede psa marki fu wi eigi wini ofu wi eigi nen, dan wi sa bruya fu di den no luku wi na ai, so leki fa wi e denki kande. Wi musu memre taki Yehovah lobi wi èn a sabi srefi kande taki na a momenti disi wi no kan tyari na lai fu wan seiker teyokrasia frantiwortu. A kan blesi wi srefisrefi na tra fasi, èn den sori disi fu na lobi fu en musu yepi wi fu kibri wi yeye balansi. — Odo 10:22.
Lobi regtfardikifasi, no wani si kruktudu na ai
5. Sortu krakti den sori fu na lobi fu Gado musu abi tapu na fasi fa wi e tyari wi srefi?
5 Den sori di Gado e sori lobi gi wi musu buweigi wi fu waka baka Krestes ini a lobi fu regtfardikifasi èn a no wani fu si fu kruktudu na ai (Hebrew sma 1:9). A tru taki wi no kan du disi volmaakti soleki Yeises ben du. Ma wi kan meki dati de wi marki fu de santa, eerlijk èn gi yesi na a wet so leki wi kan ini wi onvolmaakti fasi. Fu du disi, wi no musu meki soso wan lobi gro gi regtfardiki èn bun sani ma kweki so srefi wan bita-ati, wan tegu, wan fuga gi san takru. Na apostru Paulus ben taki en so: „Abi wan tegu gi sani di gadolowsu, anga na san bun” (Rome sma 12:9). ’Abi wan tegu’ na tumusi krakti wortu, di wani taki „si en leki wan tumusi fisti sani”—Webster’s New Collegiate Dictionary.
6. San sa yepi wi fu kibri wi srefi gi tesi di na grontapu, wi sondu skin ofu Didibri e tyari kon na wi pasi?
6 San sa yepi wi fu luku bun nanga den tesi di na grontapu, wi eigi sondu skin èn Didibri e tyari kon na tapu wi pasi. Loyaal fasi na Yehovah Gado. A e aksi wi nanga tranga: „De koni, mi manpikin, èn prisiri mi ati, so taki mi kan gi wan piki na en di e spotu mi” (Odo 27:11). Iya, loyaalfasi na Yehovah sa buweigi wi fu teki na koni pasi fu no wani si na ai san en no wani si na ai. Moro fara, wi musu tan hori na wi fesi taki o prisiri ofu span na psa fu wan fu den wet fu Gado gersi taki a de, toku a no warti dati srefisrefi (Galasia sma 6:7, 8). Na ati fu libisma de verradelijk, nanga triki, bidrigi, so leki fa wi kan leisi tu na ini Yeremia 17:9. Na kresten ati lobi bun, moi èn soifri sani. Ma ten na ten sondu firi e abi krakti na en tapu so taki a e angri tu fu san ogri. Neleki den ati fu den Israèl sma di ben e anbegi Yehovah èn toku ben tan hori den afkodrei „hei presi” fu den, na so wi eigi ati kan suku en eigi bun nomo èn kan de nanga triki (1 Kownu 22:43; Deuteronomium 12:2). Na onvolmaakti ati fu wi kan suku fu feni boropasi fu tyari wi na tapu na pasi fu tesi. A kan pruberi fu meki na seryusufasi fu na ogri di e tesi wi, sori wan pikin sani. Wi ati kan pruberi fu overtoigi wi taki ibri strafu de toku wan afersi fu wan pisiten nomo.
7. Fu san-ede wi musu luku bun gi na angri fu du san ogri?
7 Fu warderi ede gi na lobi fu Gado, wi musu luku bun fu angri fu san ogri, so leki na lostu fu du seks hurudu, awasi wi no trow ofu trow. Ibri yuru agen na sani di ben bigin leki wan meki modo gi makandra di gersi taki a no ogri, e abi leki bakapisi taki tu kresten ben kweki so tranga firi gi makandra taki den ben du sondu èn ben musu sluit uit. Srefi owruman, di musu de sondro fowtu èn eksenpre gi na ipi, broko den neki na ini den afersi disi! — Teki gersi 1 Kownu 15:4, 5.
8. Sortu warskow eksenpre na apostru Paulus e gi wi, èn fa wi ben sa kan agersi so wan problema?
8 Luku na apostru Paulus, di Gado ben blesi nanga bovennatuurlijk fisyun èn krakti èn nanga na prisenti fu taki ondro krakti fu na santa yeye fu Gado. Fu abi bun bakapisi na ini a feti fu en nanga sondu firi a ben musu kufta en skin — iya, naki en hebi. Wi e prefuru fu de tevrede nanga moro mendri? (Rome sma 7:15-25; 1 Korente sma 9:27). A de neleki wi sidon na ini wan pikin lo-boto na tapu wan liba di e lon esi-esi èn di e hari wi go na a sei fu wan bigi sula. Fu tan farawe fu wan ranpu, dan nanga ala wi krakti, wi musu lo a boto kontrari na tranga lon fu na watra. Kande a no e sori taki wi e kon furu na fesi, ma so langa wi e tan span wi srefi krakti, wi no sa fadon go na ini a sula go kisi pori. Seiker den sori fu na lobi fu Gado gi wi musu buweigi wi fu span wi srefi krakti fu tan loyaal na en fu di wi no e wani si kruktudu na ai èn fu di wi lobi regtfardikifasi.
Sori brada lobi
9. Sortu rai na apostru Yohanes e gi wi ini a sori fu lobi gi den brada fu wi?
9 Den sori fu lobi fu Gado musu buweigi wi tu fu lobi wi brada nanga sisa so leki Yeises Krestes e lobi en disipri (Yohanes 13:1). A fiti srefisrefi taki na apostru Yohanes e fruklari: „Na lobi de ini disi, no taki wi ben lobi Gado ma taki en ben lobi wi èn ben seni en Manpikin leki wan zoen-ofrandi gi wi sondu. Unu lobiwan, efu disi na a fasi fa Gado ben lobi wi, dan wi de fruplekti fu lobi makandra tu” (1 Yohanes 4:10, 11). Fu taki leti, Yeises ben taki taki na sani di o meki sma kan sabi den tru bakaman fu en, na a lobi di den abi na mindri makandra. — Yohanes 13:34, 35.
10, 11. San na wantu fu den fasi fa wi kan sori brada lobi?
10 Wi sabi taki kresten musu sori brada lobi. Ma a no de fowtu fu memre wi srefi na den difrenti fasi fa wi kan sori na kresten lobi disi gi makandra. So wan lobi sa yepi wi fu no poti na difrenti na ini ras, nationaliteit, skoro, kulturu nanga moni situwâsi na wan sei. Boiti fu dati, dan brada lobi sa buweigi wi fu kon makandra na den konmakandra. Efu wi abi trutru lobi gi wi brada, dan wi no sa meki wan pikinso takru weer ofu wan omstandigheid taki wi no firi wi so switi, hari wi puru fu na prisiri fu demakandra èn fu teki prati ini na gi fu deki-ati na makandra (Rome sma 1:11, 12). Moro leki dati, brada lobi sa tyari wi so fara fu sreka wi srefi bun gi den konmakandra fu wi èn fu teki prati fayafaya na den, so taki wi kan gi makandra deki-ati ini lobi èn tumusi bun wroko. — Hebrew sma 10:23-25.
11 Fa a de nanga a yepi gi wi brada na ini a velddienst? Sma sori a tapu taki owruman nanga dinari na ini na diniwroko furutron e wroko makandra ofu e wroko den wawan na ini na oso-fu-oso diniwroko aladi te den ben prakseri pikinso den ben sa kan gi kownukondre preikiman di abi yepi fanowdu na ini disi wan kari, fu kon makandra nanga den na ini na dienst. Te den owruman nanga dinari na ini a diniwroko sori lobi na a fasi disi, dan disi sa meki na velddienst fu den e warti dobru. Èn wan nyun preikiman ben sa kan teki go na wan osobeibri-studi? — Rome sma 15:1, 2.
12. Fa wi musu frustan 1 Yohanes 3:16-18?
12 Lobi sa sorgu so srefi tu taki wi kon yepi brada di kande de ini trutru omstandigheid pe den abi yepi fanowdu. Na apostru Yohanes ben skrifi: „Nanga disi wi kon leri sabi na lobi, taki a gi en sili fu wi ede; èn wi de fruplekti fu gi wi sili fu wi brada ede. Ma efu wan sma abi den sani fu a grontapu disi fu hori en srefi a libi, èn e si taki, en brada mankeri sani, ma toku e tapu na doro fu en firi fu sari-ati gi en, dan na sortu fasi na lobi fu Gado de na ini en? Unu nyofi pikin, meki wi lobi, no nanga wortu èn no nanga tongo, ma nanga du èn ini waarheid” (1 Yohanes 3:16-18). A no abi fu de so, taki den e aksi wi now fu òfer wi libi fu den ede, ma ten na ten wi abi na okasi fu sori lobi gi den na tra fasi, no wawan nanga wortu ofu nanga tongo ma so srefi nanga du. Nowan enkri fowtu de efu wi sori lobi gi wi brada nanga sisa nanga wortu, ma wi no wani meki wi lobi tan na dati te den abi sani na skin fasi fanowdu. Na fruklari fu Yeises taki ’a moro koloku fu gi leki fu kisi’, kan kobroiki tu fu gi yepi na skinfasi. — Tori fu den Apostru 20:35.
13. (a) San na wantu fu den fondamenti waarheid di wi kon sabi nanga yepi fu Yehovah organisâsi di sma ai kan si? (b) San Charles Taze Russell ben skrifi nanga reti?
13 Wi abi na okasi fu sori lobi gi wi brada di e teki fesi na ini a gemeente ofu na ini a tori fu Yehovah organisâsi di wi kan si nanga ai na a heri grontapu. Disi abi na ini tu fu de loyaal na „a kotrow èn koni srafu” (Mateyus 24:45-47). Meki wi si na tru tori ondro ai taki awasi o furu wi e leisi na beibri, toku wi no leri sabi noiti na waarheid wi srefi. Wi no ben sa kon sabi na waarheid di e go fu Yehovah ofu fu den prakseri èn eigifasi fu en, san a nen fu en wani taki èn na prenspari fasi fu a nen, na Kownukondre, na lusu-paiman ofrandi fu Yeises, a difrenti a mindri Gado organisâsi nanga di fu Satan, ofu fu san-ede Gado gi pasi meki na ogri de. A de netso leki fa na fosi presidenti fu na Waktitorengenootschap, Charles Taze Russell, ben skrifi ini 1914: „A no de so, taki wi de wan koloku pipri di Gado blesi? A no de so taki wi Gado de kotrow? Efu wan sma sabi wan moro betre sani, meki a teki dati. Efu wan fu unu oiti feni wan moro betre sani, dan wi e howpu fu yere dati fu unu. Wi no sabi wan moro betre sani, no srefi wan sani di de afu so bun leki san wi feni na ini a Wortu fu Gado. . . . No wan enkri tongo ofu pen kan skrifi fu na vrede nanga na prisiri èn na blesi di wan krin sabi fu na tru Gado tyari kon na ini wi ati nanga libi. Na Tori fu na Koni, Retidu, Makti nanga Lobi fu Gado e meki ala lostu fu wi ede èn wi ati e kon kisi satisfaksi dorodoro. Wi no e suku moro fara. No wan enkri sani de di wi sa winsi moro leki fu kisi na tumusi moi Tori disi moro krin na wi fesi” (The Watch Tower, 15 december, 1914, blz. 377-378). O tru den wortu disi di skrifi bun de!
Dini den di de na dorosei
14. San den sori fu lobi fu na sei fu Gado musu buweigi wi fu du gi den sma di de na dorosei?
14 Den sori fu na lobi fu Gado di wi ondrofeni musu buweigi wi fu sori lobi gi sma na wi sei di de na dorosei fu na gemeente. Fa wi kan du disi? Situwâsi kan sori taki wi kan yepi den sma na wi sei na skin fasi. Ma, san de moro prenspari, wi kan sori lobi gi sma na wi sei fu di wi e tyari na bun nyunsu fu Gado kownukondre gi tra sma èn e yepi sma di lobi regtfardikifasi fu tron disipri fu Yeises Krestes. Wi e teki prati doronomo na a publiki diniwroko disi, ofu wi e misi fu du na aktiviteit disi? A tron soso wan routine ofu wan sinbôlis dienst? Ofu a de so, taki lobi gi den sma na wi sei e buweigi wi? Wi e sori taki wi e firi gi trawan? Wi abi pasensi, aladi wi e wakti teleki sma bigin du wan sani? Wi e gi den ososma deki-ati fu taki san den e prakseri? Iya, na presi fu wi wawan e taki, dan meki lobi gi sma na wi sei buweigi wi fu arki èn abi beibri takimakandra di e pai nanga sma di wi e miti na ini wi dienst.
15. (a) Fu san-ede „preiki tra fasi leki fa a gwenti de”, de wan moro betre wortu leki „preiki esi-esi psa gwe”?(b) Fu san-ede wi wani kobroiki den okasi fu preiki no leki fa a gwenti de?
15 Wi de so na ai leki a kan fu kobroiki okasi fu preiki tra fasi leki fa a gwenti de? Wi musu tyari kon a fesi taki disi a no soso wan preiki esi-esi psa gwe, di ben sa meki wan sma prakseri taki a abi fu du nanga wan aktiviteit di no ben seti a fesi ofu wani taki pikinso nomo. Preiki tra fasi leki fa a gwenti de, de tumusi prenspari èn lobi gi konpe libisma sa buweigi wi fu meki okasi kon fu abi wan prati na en. Fa a preiki na so wan fasi e gi froktu furutron! Fu eksenpre di wan kongres fu Yehovah Kotoigi ben hori na ini Noord-Italia dan wan brada ben go na wan garage fu meki den kenki wan koplampu. Aladi a ben e wakti dan a ben preiki gi den sma di ben de lontu en èn ben gi den wan kari fu kon na a publiki taki fu sonde. Na wan internationaal kongres na ini Rome wan yari a baka, dan wan brada di a no ben herken ben kon taigi en odi na wan switi fasi. Suma ben de na brada disi? We, a ben de wan fu den man di a ben gi wan kari na a garage na yari a fesi! A man ben go arki na publiki taki èn ben gi en nen fu kisi beibri-studi. Now en nanga en uma de Kotoigi fu Yehovah di gi den srefi abra. Degedege no de taki preiki tra fasi leki fa a gwenti de kan pai srefisrefi!
Tan du wan sani tapu na lobi fu Gado
16. Sortu aksi wi ben sa kan aksi wi srefi heri bun?
16 Yehovah ben de trutru psa marki ini a sori fu lobi gi en mekisani. So leki fa wi si, dan den Buku e gi wi tumusi bun eksenpre fu sma di ben du wan sani tapu den sori fu na lobi fu Gado sondro fu suku den eigi bun nomo. A ben fiti srefisrefi taki na psalm singiman di ben de ondro krakti fu santa yeye ben bari taki: „O meki sma gi Yehovah tangi fu en lobi bunfasi èn fu en wondruwroko na den manpikin fu libisma” (Psalm 107:8, 15, 21, 31). Wi e prefuru fu teki na no-frudini bunfasi fu Gado èn misi na marki fu en? Meki dati no psa noiti! (2 Korente sma 6:1) Sobun meki ibri wan fu wi aksi en srefi: „Mi abi trutru warderi gi den sori fu lobi fu Gado di mi ondrofeni kba èn di nanga furu frutrow mi howpu fu ondrofeni moro fara ete ini a ten di e kon? Den e buweigi mi fu lobi Yehovah nanga mi heri ati, sili, frustan, nanga krakti? Mi poti alaten mi prakseri trutru tapu Gado? A de so taki mi lobi regtfardikifasi èn taki mi no wani si kruktudu na ai? Mi e sori brada lobi? Èn o krosibei mi e pruberi fu waka na ini den futustapu fu Yeises ini a tori fu mi diniwroko?’
17. San sa de na bakapisi efu wi du wan sani tapu na sori fu na lobi fu Gado sondro fu suku wi eigi bun nomo?
17 Futru, furu fasi de fu sori wi opregti tangi gi ala den sori fu na lobi fu Gado di wi ben ondrofeni. Efu wi meki dorodoro kobroiki fu den okasi fu sori so wan warderi, dan wi sa prisiri na ati fu wi hemel Tata, wi sa de wan blesi gi trawan èn wi srefi sa kisi prisiri, vrede nanga tevredefasi. Meki fu dati-ede wi tan du wan sani tapu den sori fu na lobi fu Gado sondro fu suku wi eigi bun nomo.
San yu ben sa piki?
◻ San a e aksi, fu du wan sani tapu na lobi fu Gado sondro fu suku wi eigi bun?
◻ Fa wi kan kibri wi srefi gi tesi?
◻ San na wantu fasi fu sori brada lobi?
◻ Fa den sori fu na lobi fu Gado musu buweigi wi fu handri nanga den sma na wi sei?
[Prenki na tapoe bladzijde 17]
Wi musu feti nanga sondu firi fu kibri wi srefi gi wan ranpu
[Prenki na tapoe bladzijde 18]
Owruman e sori brada lobi fu di den e go makandra nanga trawan na ini a diniwroko
[Prenki na tapoe bladzijde 19]
Charles Taze Russell, na fosi presidenti fu na Wachttorengenootschap ben poti na prakseri tapu na vrede, prisiri nanga blesi di Gado wawan kan gi