Jesus libi nanga diniwroko

Foe Pilatus na Herodes èn kon baka agen

TE DEN djoe e kragi Jesus taki a e kari ensrefi wan kownoe, dan Pilatus e go baka na ini a paleisi foe a granman, so taki a kan aksi-aksi Jesus sani. Ala di Jesus no e proeberi foe kibri a tori taki a de wan kownoe, tokoe a e tjari kon a krin, taki a Kownoekondre foe en no de wan kefar gi Rome.

„Mi kownoekondre no de wan pisi foe a grontapoe disi”, Jesus e taigi Pilatus. „Efoe mi kownoekondre ben de wan pisi foe a grontapoe disi, dan mi dinari ben sa feti, so taki den no ben sa gi mi abra na ini anoe foe den djoe. Ma leki fa a de, mi kownoekondre no de foe a fonten disi.” So boen Jesus e erken dri tron taki a abi wan Kownoekondre, ala di a no de foe wan fonten foe grontapoe.

Tokoe Pilatus e dwengi Jesus moro fara: „We dan, joe de wan kownoe?” Dati wani taki, joe de wan kownoe ala di a Kownoekondre foe joe no de wan pisi foe a grontapoe disi.

Jesus e meki Pilatus kon sabi taki Pilatus kon na a joisti bosroiti foe di a e piki: „Joesrefi e taki, taki mi na wan kownoe. Na foe dati-ede mi gebore, èn na foe dati-ede mi kon na grontapoe foe gi kotoigi foe na waarheid. Ibriwan sma di de na a sei foe na waarheid, e arki mi sten.”

Ija, a heri de di Jesus de na grontapoe na foe gi kotoigi foe a „waarheid”, spesroetoe a waarheid foe na Kownoekondre foe en. Jesus de klariklari foe de getrow na a waarheid dati, srefi efoe dati moesoe meki a lasi en libi. Ala di Pilatus e aksi: „San na waarheid? ”, tokoe a no e wakti foe Jesus tjari sani kon a krin. A jere nofo foe kan leisi strafoe.

Pilatus e go baka na a ipi di e wakti a dorosei foe na paleisi foe na granman. So leki fa a e sori, dan Pilatus nanga Jesus na en sei, e taigi den ede-priester èn den sma di de nanga den: „Mi no e feni nowan ogri na ini a man disi.”

A bosroiti e meki na ipi ati kon bron, èn den e bigin foe poti druk tapoe Pilatus foe di den e taki: „A e soetoe faja gi na pipel foe di a e gi leri na ini heri Judea, ija, foe Galilea kon te dja.”

Pilatus moesoe foe froewondroe foe na onreidelek fanatiekfasi foe den djoe. Te den ede-priester nanga den owroeman e tan bari, dan Pilatus e go baka na Jesus èn e aksi: „Joe no e jere o foeroe sani den e kotoigi kontrari joe?” Tokoe Jesus no e doe moeiti foe gi piki. Na bedarifasi foe en na fesi foe na ogri-ati kragi e meki Pilatus de nanga opo mofo.

Te Pilatus kon sabi taki Jesus na wan Galilea sma, a e si wan fasi foe poeroe na frantiwortoe na en tapoe. Na tiriman foe Galilea, Herodes Antipas (manpikin foe Herodes na Bigiwan), de na ini Jerusalem gi na Paskafesa, foe dati-ede Pilatus e seni Jesus go na en. A fesi, Herodes Antipas ben meki den koti a ede poeroe foe Johanes a Dopoeman, ma dan Herodes ben kon frede di a jere foe den wondroe wroko foe Jesus, foe di a ben denki taki Jesus ben de troetroe Johanes di ben opo baka foe dede.

Now Herodes breiti srefisrefi nanga a froewakti foe si Jesus. Disi no de foe di a e broko-ede nanga na tanboen foe Jesus noso taki a wani doe moeiti troetroe foe kon sabi efoe den kragi kontrari en de troe noso no de troe. Na presi foe dati, a gridi nomo foe sabi sani èn a e howpoe foe si fa Jesus e doe wan toe wondroe.

Ma Jesus e weigri foe satisferi a gridi di Herodes gridi foe sabi sani. Foe taki en leti, te Herodes e aksi-aksi en sani, a no e taki no wan wortoe. Foe di na froewakti foe Herodes nanga den sroedati foe en no kon troe, meki den e spotoe Jesus. Den e weri wan brenki krosi gi en èn e bigin spotoe en. Dan den e seni en go baka na Pilatus. Leki wan bakapisi, dan Herodes nanga Pilatus, di fositen ben de feanti, e tron boen mati.

Te Jesus e drai kon baka, dan Pilatus e kari den ede-priester, den djoe tiriman, nanga a pipel kon makandra èn a e taki: „Oenoe tjari a man disi kon na mi leki wan sma di e soetoe faja gi a pipel foe meki oproeroe, èn loekoe! Mi ondrosoekoe a tori foe a man disi leti na joe fesi, ma mi no e feni no wan gron gi den kragi di oenoe e tjari kon kontrari en. Foe taki en leti, srefi Herodes no feni noti, bika a seni en kon baka na wi; èn, loekoe! A no doe no wan sani di meki a e froedini dede. Foe dati-ede mi sa wipi en èn loesoe en.”

So boen, Pilatus ben froeklari toe leisi taki Jesus no doe noti. A e angri foe loesoe en, foe di a e froestan taki a de soso foe djaroesoe ede meki den priester wani gi Jesus abra na ini en anoe. Ma te Pilatus e go doro foe proeberi foe loesoe Jesus, dan a e kisi wan tra tranga reide foe doe disi. Ala di a e sidon na tapoe en kroetoe-stoeroe, dan a wefi foe en e seni wan boskopoe kon gi en, pe a e gi en deki-ati: „No abi noti foe doe nanga a regtfardiki man disi, bika mi ben pina foeroe tide na ini wan dren [so leki fa a e sori wan dren di ben kon foe Gado] foe en ede.”

Ma fa Pilatus kan loesoe na man disi di no doe noti fowtoe so leki a sabi, taki a moesoe doe? Johanes 18:36-38; Lukas 23:4-16; Mateus 27:12-14, 18, 19; 14:1, 2; Markus 15:2-5.

◆ Fa Jesus piki na aksi di e go foe a kownoewroko foe en?

◆ San na „a waarheid” di Jesus ben kotoigi foe en, di a ben libi na grontapoe?

◆ Sortoe strafoe Pilatus e leisi, fa a pipel e doe, èn san Pilatus e doe nanga Jesus?

◆ Soema na Herodes Antipas, foe san-ede a breiti toemoesi foe si Jesus, èn san a e doe nanga en?

◆ Foe san-ede Pilatus e angri foe loesoe Jesus?