„Meki ibriwan sma di e yere en taki: ’Kon’”

Na ini na yari di e kon, Yehovah Kotoigi na ini moro leki 200 kondre na a heri grontapu sa du ala san den kan ini akruderi nanga na yaritekst fu den fu 1991: „MEKI IBRIWAN SMA DI E YERE EN, TAKI: ’KON!’”

„Na yeye èn na bruid e tan taki: ’Kon!’ Èn meki ibriwan sma di e yere en taki: ’Kon!’ Èn meki ibriwan sma di e drei watra, kon; meki ibriwan sma di wani, teki a watra fu libi fu soso.” — OPENBARING 22:17.

1. Wi e kisi wan kari fu „kon!” na sortu „watra”?

YU KISI wan kari fu ’kon!’ Kon fu san? We, kon fu kowru yu dreiwatra nanga watra. Disi a no gewoon watra ma na srefi watra di Yeises ben taki fu en di a ben taigi na Samaria uma na a peti: „Ala sma di e dringi fu na watra di mi sa gi en, no sa dreiwatra noiti moro, ma na watra di mi sa gi en, sa tron na ini en wan fonten fu watra di e bori kon na tapu fu gi têgo libi” (Yohanes 4:14). Fu pe Yeises ben kisi na „watra” disi?

2. San na a fonten fu na „watra”, èn soso baka sortu sani di ben o psa a ben kan lon?

² Na apostru Yohanes ben abi na grani fu si na ini wan fisyun na fonten pe na „watra” disi ben komoto, so leki a ben skrifi na ini Openbaring 22:1: „A ben sori mi wan liba fu watra fu libi, krin leki kristal, di ben lon komoto fu na kownusturu fu Gado èn fu na Pikinskapu.” Iya, na fonten fu na watra disi di krin leki kristal nanga elementi di e gi libi de nowan trawan moro leki na Giman fu libi, Yehovah srefi, di meki a de fu kisi nanga yepi fu na Pikinskapu, Yeises Krestes. (Teki gersi Openbaring 21:6.) Fu di den e taki fu „na kownusturu fu Gado èn fu na Pikinskapu”, dan a musu de a baka na opo fu na Mesias Kownukondre ini 1914, dati wani taki, na baka di a dei fu Masra bigin, taki a watra fu libi bigin fu lon. — Openbaring 1:10.

3, 4. San na „watra” wani taki, èn gi suma a musu de fu kisi?

³ San na watra fu libi disi e agersi? A e prenki na seti fu Gado fu meki volmaakti libisma libi kon baka, têgo libi ini volmaaktifasi na wan grontapu di kenki kon tron wan paradèis. Na watra fu libi e agersi ala den seti fu libi nanga yepi fu Yeises Krestes. Ala disi de fu kisi now? Nono, no alamala, fu di Gado musu puru na disiten gadolowsu seti fu sani nanga en tiriman di sma ai no kan si, Satan Didibri, fosi. Ma wi kan teki san de fu kisi fu na „watra” disi now fu di wi e arki èn e gi yesi na a bun nyunsu fu na Kownukondre èn poti wi libi ini akruderi nanga dati tu. — Yohanes 3:16; Rome sma 12:2.

⁴ Sobun, baka di Yeises sori Yohanes na ’liba fu libi’, a ben taki nanga Yohanes fu na prakseri fu En fu seni En engel go nanga na fisyun. Ne Yohanes ben yere sani ben bari taki: „Na yeye èn na bruid e tan taki: ’Kon!’ Èn meki ibriwan sma di yere, taki: ’Kon!’ Èn meki ibriwan sma di e drei watra kon; meki ibriwan sma di wani, teki a watra fu libi fu soso” (Openbaring 22:17). Fu dati-ede meki, dienstknekti fu Gado e tyari na kari gi den wan di e dreiwatra fu meki wan bigin nanga na dringi fu den seti fu Gado fu kisi têgo libi na grontapu nanga yepi fu na Pikinskapu fu Gado. — Yohanes 1:29.

Na fanowdu fu den watra fu libi bigin fu kon

5. Fa a ben du kon taki libisma ben abi na seti disi fu Gado fanowdu?

⁵ A de wan sari sani taki den fosi papa nanga mama fu na libismafamiri no ben hori den srefi na a libipasi di ben sa gi den bakapikin fu den na okasi fu nyanbun fu têgo fu volmaakti libisma libi na ini wan paradèis oso. Efu na libismafamiri ben wani abi têgo libi dan Adam ben musu teki wan koni bosroiti fu gi yesi fu dini en Mekiman. Ondro na krakti fu wan opruru yeye mekisani, Eva ben bigin nanga wan buweigi di ben abi leki bakapisi dede gi na libismafamiri, èn Adam en volmaakti trowmasra, ben frukisi fu moksi en srefi nanga en ini na fasi disi di e tyari dede kon. Sobun, leki a giman fu na natuurlijk libi na den bakapikin fu na libismafamiri, dan Adam ben de trutru na wan di ben meki dede bigin wroko ini na heri libismafamiri. Fu dati-ede na beibri e fruklari: ’Nanga yepi fu wan man sondu ben kon na ini grontapu èn nanga yepi fu sondu dede èn na so wan fasi dede ben panya go na ala sma fu di den alamala ben sondu’ (Rome sma 5:12). A ben de baka di Adam nanga Eva ben fadon na ini sondu taki den ben bigin fu meki nyun memre fu kon na ini a libismafamiri. — Psalm 51:5.

6. Fu san-ede Yehovah ben seti sani fu na „watra” ben de fu kisi?

⁶ Sani ben poti na pasi fu alaten so taki Gado no ben kan meki na prakseri fu en fu wan paradèis grontapu nanga volmaakti libismafamiri kon tru? Na beibri piki de, a no de fu taki, nono! Toku, fu na prakseri fu en kontru, Yehovah sreka wan lobi seti di ben sa puru na ranpu di kon fu a fowtu fu Adam èn toku ben sa de krinkrin ini akruderi nanga retidu nanga regtfardikifasi, di En de na dorodoro èn kriboi kon na krin fu dati. A e du disi nanga yepi fu na „liba fu watra fu libi”. Nanga yepi fu en, a sa meki volmaakti libisma libi kon baka gi na libismafamiri di e gi yesi, di a pasi fu den go na a Fonten fu libi ben lasi. Na liba disi nanga ala san a wani taki e lon na ini a dusunyari tiri fu Krestes. Sobun na ini a heri dusunyari tiri fu Krestes, dan libisma, nanga so tu den wan di den wiki baka fu dede, musu dringi fu na „liba fu watra fu libi.” — Teki gersi Esekièl 47: 1-10; Tori fu den Apostru 24:15.

7. Tapu sortu gron a seti disi fu „watra” ben meki?

⁷ Yehovah e prisiri fu en eigi libi, èn a e prisiri tu fu gi na grani fu libi leki sma nanga frustan na wan pisi fu den mekisani fu en. Na fondamenti fu den seti di e gi libi èn di e komoto fu Yehovah na a lusupaiman ofrandi fu Yeises (Markus 10:45; 1 Yohanes 4:9, 10). Na Wortu fu Gado de so srefi ini a tori di na beibri sontron e kari ’watra’ (Efesia sma 5:26). Yehovah Gado de fri fu taki, „Kon!” gi den libisma mekisani, di e pina fu na lasi fu den fosi seti di Gado ben meki gi na volmaakti libismapaar Adam nanga Eva.

Na bruid grupu e gi na kari „Kon!”

8. Gi suma èn oten na „watra” disi ben de fu kisi fosi?

⁸ Den fosiwan di e meki sma yere na kari fu „Kon!” na den wan di de na agersi bruid fu na Pikinskapu, na fosi gebore yeye Manpikin fu Yehovah (Openbaring 14:1, 3, 4; 21:9). Na yeye bruid fu Krestes no e taki, „Kon!” gi en srefi, dati wani taki, gi den wan di Yehovah Gado ben sa kari kon makandra ete leki wan pisi fu na bruid grupu fu meki a kon teri 144.000 memre. Den wortu dati fu kari sma kon e go na libisma di abi na howpu fu kisi volmaakti libisma libi na grontapu baka Armagedon (Openbaring 16:14, 16). Na ini a bosroiti disi fu na seti fu sani sensi 1914, wi yere na „bruid” gi na kari, makandra nanga na santa yeye fu Gado.

9. Fa wi du sabi taki a „watra” no de gi wan pikin grupu nomo?

⁹ Na wan span fasi, na lasti buku fu na beibri e sori taki, ’wan bigi ipi, di no wan sma ben kan teri,’ ben sa du wan sani tapu na meki bekenti fu na bun nyunsu fu Gado Kownukondre èn nanga wan fasti bosroiti ben sa poti den srefi na a sei fu na kownukondre tiri dati (Openbaring 7:9, 10, 16, 17). Yu na wan fu na bigi ipi dati? Dan, „meki ibriwan sma di e yere en taki: ’Kon!’”

Na yeye èn na bruid e taki, „Kon!”

10. Pe na agersi watra disi musu feni en bigin, èn fu san-ede?

¹⁰ Ma fu san-ede den no e kari Gado nanga na agersi trowmasra na ini Openbaring 22:17? Na a fosi presi, luku taki na vers no e taki ondro a tiri fu suma na yeye e handri. Ma fu di den e taki fu na yeye dan dati e poti wi prakseri na tapu Yehovah Gado srefi. Den no e pusu na Tata puru komoto fu na tori, fu di en de yoisti na Fonten fu santa yeye. Na a di fu tu presi, a de so taki na Manpikin e wroko makandra dorodoro nanga en Tata, so leki fa en srefi e taki: „Na Manpikin no kan du no wan enkri sani fu en srefi, ma soso san a e si na Tata e du” (Yohanes 5:19). Boiti fu dati, aladi a de so taki na kari disi na wan wortu di taki ondro krakti fu na santa yeye di te fu kba e feni en bigin na Yehovah Gado, toku na libisma famiri kan kisi tiri fu Gado ofu kan kisi „wortu di gi ondro krakti fu na santa yeye” nanga yepi fu Yeises Krestes, „na Wortu” (Openbaring 22:6; so srefi 22:17, Reference Bible, futuwortu; Yohanes 1:1). A fiti sobun dan, taki wi e meki Krestes, na Trowmasra abi fu du nanga na kari disi. Iya, wi kan de seiker taki Yehovah Gado, na Tata fu na Trowmasra, èn Yeises Krestes, na Trowmasra, e moksi den srefi nanga „na Bruid” nanga yepi fu na santa yeye ini a taki fu, „Kon!”

11, 12. (a) San ben sori na tapu taki na kari fu kon dringi ben sa panya en srefi? (b) Fa na afersi ben kon krin moro nanga moro ini den yari di psa?

¹¹ Tintin yari kba na kari disi fu „kon!”, ben go na doro na sma di e dreiwatra fu „watra fu libi”. Srefi na ini 1918 kba, na bruid-grupu ben bigin fu preiki wan boskopu di ben abi spesrutu fu du nanga den wan di ben sa kan libi na grontapu. A ben de na publiki taki „Milyunmilyun sma di e libi now no sa dede noiti”. Disi ben gi a howpu taki furu sma ben sa psa Armagedon libilibi èn baka dati ben sa kisi têgo libi na ini wan paradèis grontapu na ondro a Mesiyas kownukondre fu Gado. Ma na boskopu dati no ben sori finifini fa sma ben kan kisi a grani disi fu tan na libi dan nanga yepi fu regtfardikifasi ini algemeen.

¹² Fu miti moro sma nanga na kari „Kon!”, dan na ini 1922 na boskopu ben go na doro na ala den wan di ben abi belangstelling fu dini Gado: „Preiki na Kownu nanga en Kownukondre.” Na ini 1923 a bruid-grupu ben frustan taki „den skapu” nanga „den bokoboko” fu na agersitori fu Yeises na ini Mateyus 25:31-46 ben o de fu sabi bifo Armagedon. Dan ini mei 1929 Na Waktitoren (Bakratongo) ben poti krakti tapu na artikel „Wan Kari di e sori genade”. Na thema tekst ben de Openbaring 22:17, èn a tori ben tyari na frantiwortu fu na bruid-grupu kon na fesi fu meki sma yere na kari, „Kon!” — Bladzijde 77-79.a

Tra skapu e taki so srefi, „Kon!”

13, 14. Sortu tra fruklari ben gi na ini den ten fu 1930 taki tra sma tu ben sa dringi fu na agersi watra?

¹³ Boiti fu dati, na ini 1932 kba, Na Waktitoren ben sori tapu na frantiwortu fu den „tra skapu” fu taki fu den sei baka „Kon!” (Yohanes 10:16). Na ini na uitgave fu oktober (Bakratongo), bladzijde 152, paragraaf 29 ben tanapu: „Yehovah Kotoigi abi now na faya neleki di fu Yehu èn den musu gi na Yonadab-grupu [tra skapu] deki-ati fu go makandra nanga den èn fu teki pikinso prati ini na meki bekenti na trawan taki na kownukondre fu Gado de krosibei.” Dan baka di den teki Openbaring 22:17 skrifi, na paragraaf ben taki: „Meki den salfuwan gi deki-ati na ala sma di wani teki prati na preiki fu na bun nyunsu fu na kownukondre. A no de fanowdu fu na sei fu Masra taki den musu kisi salfu fu kan meki na boskopu fu Masra bekenti. A de wan bigi trowstu gi Yehovah Kotoigi taki den sabi now taki den kisi primisi fu tyari den watra fu libi na wan grupu fu sma di sa teki psa Armagedon, èn di den sa gi têgo libi na grontapu tapu na gron fu na bun-ati fu Yehovah psa marki.”b

¹⁴ Fu bigin nanga 1934, na salfu fikapisi ben sori taki den tra skapu disi musu gi den srefi abra now na Gado èn sori na gi disi di den gi den srefi abra na agersitori nanga na dopu na ini watra èn dan musu moksi den srefi baka dati nanga na bruid-grupu fu taki, „Kon!” gi tra sma baka di dreiwatra ete. Sobun, wan krin kari ben komoto now fu na bruid-grupu go na doro fu tyari den tra skapu disi di e dreiwatra kon makandra na ini a „wán ipi” na ondro a „wán herder”, Yeises Krestes (Yohanes 10:16). Na ini 1935 na salfu fikapisi nanga bigi prisiri ben kon sabi tapu na algemeen konmakandra fu den na a yari dati taki na grupu fu sma di gersi skapu di den ben e taki gi, „Kon!”, ben de te yu luku en bun na „bigi ipi” fu Openbaring 7:9-17. Disi ben gi wan kofarlek pusu na a wroko fu kari sma.

15. Fa „na yeye” ben de ini a kari fu, „Kon”?

¹⁵ Fu di a e taki, „Kon!” dan na bruid-grupu ben de ini akruderi nanga na yeye fu Gado. Fu di nanga yepi fu en yeye Gado ben meki den profeititori fu en skrifi Wortu kon a krin, meki a ben sorgu taki na fikapisi fu na bruid-grupu ben panya na kari. Den profeititori disi di a kari fu den ben abi en fondamenti a tapu, ben skrifi ondro krakti fu na yeye fu Gado. Na so a ben de, te yu luku en reti, taki na yeye fu Gado ben lon via Krestes nanga en bruid di ben taki gi na bigi ipi fu sma di gersi skapu: „Kon!” — Openbaring 19:10.

16. Fa na yeye nanga na bruid abi fu du nanga na kari ini na ten disi?

¹⁶ Te na a dei fu tide a de so taki na yeye nanga na bruid di na fikapisi ben teki presi gi, „e tan taki: ’Kon!’” Na fikapisi e taigi den tra skapu disi fu gi tra sma ete a kari fu ’kon’. Den no musu hori „na watra fu libi”, so leki fa a de fu kisi ini a ten disi, gi den srefi. Den musu gi yesi na a komando fu „na yeye nanga na bruid,” dati wani taki: „Meki ibriwan di e yere en taki: ’Kon!’” Ala sma di e kowru den dreiwatra, musu meki na kari go lontu. Den musu panya en go na ibri sma sondro fu luku ras, nationaliteit, tongo ofu relisi di den sma abi nownow — ibri sma na alape! San de fu kisi fu „watra fu libi” na a ten disi na san Kotoigi fu Yehovah e kari sma fu teki èn e yepi ala pipri fu teki prati na en, fu soso!

17. San na a „watra” di de fu kisi ini a ten disi?

¹⁷ Na a heri grontapu, na Pikinskapu, Yeises Krestes, e tyari na bigi ipi trutru „go na den fonten fu watra fu libi” (Openbaring 7:17). Disi a no watra di doti, ma krin, kowru, gosontu watra, di komoto langalanga fu na Fonten. Den agersi watra disi wani taki moro leki watra ini a tori fu a frustan fu beibri waarheid; den wani taki ala den seti fu Gado nanga yepi fu Yeises Krestes so taki now kba den e poti a bigi ipi na tapu na futu pasi di e tyari sma fu go kisi têgo volmaakti libi ini koloku.

Teki prati now na a bariwroko

18. O fara na kari panya na ini wi ten?

¹⁸ Now kba na nomru fu na bigi ipi disi e teri milyunmilyun sma. Fayafaya den e go doro fu meki na bun nyunsu fu na Kownukondre bekenti na ini a heri grontapu pe sma e libi. Doronomo den e gi rapport fu den velddienst wroko fu den, fu preiki na Kownukondre bun nyunsu, di go now na 212 kondre. Efu ten gi pasi na ini a kba fu na seti fu sani disi, dan na kari sa tan go doro ini akruderi nanga na pasensi èn na langa pasensi fu Yehovah Gado, di e hori en srefi na a ten. A sa sabi oten na ten kba èn oten a de na yoisti momenti fu meki en srefi bekenti na ala sma leki Yehovah, neleki fa a pramisi fu du akruderi den fruklari di du furutron na ini beibri profeititori. — Esekièl 36:23; 38:21-23; 39:7.

19. Fu san-ede wi kan taki taki na „watra” disi e gi fu soso?

¹⁹ Aladi ten de ete, gi dati, dan memre fu na bigi ipi nanga prisiri e teki prati nanga na fikapisi fu na bruid-grupu ini a taki fu: ’Kon èn kobroiki den watra fu libi fu soso!’ Den sma di e meki na bun nyunsu disi di e kibri sma libi bekenti, e meki en bekenti fu soso, sondro fu aksi wan sani gi den dienst di den e du te den e tyari na Kownukondreboskopu lontu na a heri grontapu.

20. San sa de na bakapisi fu di na „watra” disi de fu kisi?

²⁰ Watra fu libi de now fu kisi na a heri grontapu lontu, so taki sma di wani meki kobroiki fu en kan abi satisfaksi dorodoro nanga a kibri fu libi leki bakapisi. Na libismafamiri di bai kon fri sa nyanbun fu libi sondro fu kba leti dyaso na a grontapu disi, di sa kenki kon tron wan paradèis, ala disi e du fu regtfardiki na diri prakseri fu Yehovah. Wi Mekiman no meki na grontapu fu soso ma fu a de wan dyari fu Eden di e lontu na heri grontapu, wan paradèis fu prisiri, pe volmaakti libisma mekisani ini na prenki fu Gado èn neleki en, e libi.

21. Fa na prakseri fu Gado gi na grontapu sa kon tru?

²¹ Seiker, a sa de wan tumusi bigi grani nanga prisiri fu de na ini so wan nyun grontapu! Dan na ordru di Gado ben gi na a fosi libisma paar na ini Genesis 1:27, 28, sa kon tru psa marki. Tangi fu na meistri fasi fa Yehovah handri ini a tori fu na ranpu situwâsi di ben miti na libismafamiri, meki na grontapu sa kon so fara fu de wan paradèis èn sa kon furu nanga wan volmaakti libisma ras. Iya, Gado sa luku ala sani di a meki, èn luku, a sa de trutru tumusi bun. Yu sa de drape? Efu a de so, dan nanga warderi yu musu bigin fu kobroiki now fu na watra fu libi sondro fu pai. „Kon!” èn dringi so furu leki yu wani èn kowru yu dreiwatra nanga na watra fu libi di bigin fu lon now èn sa lon dorodoro na ini na Dusunyari di e kon. Èn meki ibriwan sma di yere na switi kari disi, taki: „Kon!”

[Foetoewortoe]

San yu ben sa piki?

◻ San na a „watra” di den e sori na tapu na ini Openbaring 22:17?

◻ San na a fonten fu na „watra”?

◻ Fu san-ede na „watra” de fanowdu, èn oten wawan a ben kan bigin fu lon?

◻ San na wortu „yeye” wani taki na ini na tekst fu wi, èn fa „na bruid” de ini a tori?

◻ Suma kan kobroiki fu na „watra”, èn nanga sortu bakapisi?