Gi makandra deki-ati omoro a dei e kon krosibei
„Meki wi gi makandra deki-ati, èn dati musu de moro so te unu e si a dei e kon krosibei.” — HEBREW SMA 10:25.
1, 2. Sortu dei e kon krosibei, èn san musu de na fasi fu na pipri fu Yehovah?
DEN wan di e teki prati ini a ten disi fu gi na kari, ’Kon èn kobroiki na watra fu libi’, no e poti den srefi aparti. Omoro a bigi dei fu na fiktori fu Gado e kon krosibei, omoro den e meki kobroiki fu na beibri rai: „Èn meki wi poti prakseri tapu makandra fu kan gi tranga fu sori lobi èn tumusi bun wroko, fu no libi den konmakandra fu wi, so leki fa son sma abi na gwenti, ma fu gi makandra deki-ati èn dati musu de moro so te unu e si a dei e kon krosibei.” — Hebrew sma 10:24, 25.
2 Den Buku e taki na profeitifasi fu na „dei” dati leki „Yehovah dei” (2 Petrus 3:10). Fu di Yehovah na a Moro Heiwan, na almakti Gado, meki no wan dei ben sa kan abi wan moro bigi glori leki na dei fu en (Tori fu den Apostru 2:20). A wani taki na poti reti fu en soevereiniteit leki Gado tapu na a heri universum. Na dei dati di no abi en speri na ini prensparifasi e kon krosibei.
3. Fa na dei fu Yehovah ben kon krosibei gi den kresten sma na ini a fosi yarihondro, èn fa a de nanga wi na ini a ten disi?
3 Na apostru Paulus ben fruteri kresten ini na fosi yarihondro fu wi gewoon teri taki na dei fu Yehovah ben e kon krosibei. Den ben luku go a fesi na a kon fu na dei dati, ma na ini a pisiten dati, na dei ben de moro leki 1900 yari ini na ten di e kon (2 Tesalonika sma 2:1-3). Boiti fu dati, den ben musu kisi deki-ati bikasi na dei dati seiker ben sa kon, èn efu den kresten ben tan go doro a fesi na ini a bribi dati, dan den ben sa go na ini a blesi dei dati (2 Timoteyus 4:8). Na ini na ten dati sma ben si taki na dei dati e kon krosibei. Na dei fu Yehovah kon trutru krosibei gi wi na ini a ten disi. Ala den tumusi moi kontru fu beibri profeititori e sori taki na prisiri sani disi de tru. Na nen fu wi Gado, Yehovah, heri esi sa kon santa fu têgo alaten. — Lukas 11:2.
Na nen fu Gado ben gi sma deki-ati
4. Suma musu tron kownu ini akruderi nanga Openbaring 19:6, èn fa a nen fu en de fu si?
4 Na nen fu Gado ben musu de wan afersi fu belangstelling gi na heri libismafamiri. Today’s English Version e fruklari: „Prèise Gado! Bikasi Masra, wi Almakti Gado, de Kownu!” (Openbaring 19:6). Ini akruderi nanga na twenti yarihondro beibri vertaling dati, dan a de Masra, na almakti Gado. Na vertaling dati, neleki furu tra disiten vertaling, no e kari na nowan presi a nen fu na Sma di de Gado èn di e bigin fu tiri leki Kownu. Ma, na nen fu Gado de ini a tori na ini a fruklari „Halleluyah” („Prèise Yah” ofu, „Prèise Yehovah”) di de fu feni na ini a Revised Standard Version, na New International Version, nanga na vertaling fu Moffat fu Openbaring 19:6. Fu wan bigi pisi fu wi gewoon teri, te yu luku en leti, dan sma puru na nen fu Gado na ini beibri vertaling. Ma so leki fa wi sa si, dan gi na pipri fu Gado a nen dati ben de wan bigi deki-ati, fositen èn na ini na ten disi.
5, 6. (a) Fu san-ede a ben de fanowdu gi Moses fu sabi na nen fu na Gado di a ben teki presi gi? (b) Fa a ben musu wroko tapu den Israèl sma di Moses ben poti krakti tapu na nen fu Gado?
5 Wi e memre taki di na Moro Hei Gado ben seni Moses go na a pipri fu Israèl di ben de ini katibo na ini a kondre Egypte, na aksi ben du kon na ini a prakseri fu den sma di den ben seni Moses go taki suma ben seni en kon. Moses ben si a fesi taki na dyu pipri di ben e pina ben sa wani sabi na nen fu na Gado di a ben teki presi gi. Fu dati-ede wi e leisi na ini Exodus 3:15: „Gado ben taigi Moses ete wan leisi: ’Disi na san yu musu taigi den manpikin fu Israèl: „Yehovah na Gado fu den fositen tata fu unu, na gado fu Abraham, na Gado fu Isaak, na Gado fu Yakob seni mi kon na unu.” Disi na mi nen te ten di no skotu, èn disi na a memre fu mi fu geslakti te geslakti.’”
6 Di den Israèl sma ben yere fa krakti ben poti tapu den bodoi disi, dan den ben musu firi tranga skin srefisrefi. Na wán enkri tru Gado, Yehovah, ben dyaranti a fri fu den. Èn fa a ben musu gi deki-ati fu abi na den fesi na howpu fu kon sabi Gado te a ben sa demo san en eigi nen wani taki — a no e hori en srefi aparti na wan heimemre fasi! — Exodus 3:13; 4:29-31.
7. (a) Fa wi du sabi taki den disipri fu Yeises ben de bekenti nanga na nen fu Gado? (b) Fa Gado nen ben pusu poti na baka?
7 Den disipri fu Masra Yeises Krestes ben kon kisi so srefi bigi deki-ati nanga yepi fu na nen fu Gado, Yehovah, èn nanga yepi fu na sani di a nen e teki presi gi (Yohanes 17:6, 26). Na a ten fu na grontapu diniwroko fu Yeises seiker a no ben pusu na nen fu Gado poti na baka, èn a no ben de en prakseri fu meki en eigi nen, Yeises, ben sa kon na a fosi presi. Soso baka na bigin fu na fadon komoto fu na tru kresten bribi, di den ben taki na fesi fu en, dan na nen fu Gado ben kon pusu poti na baka, iya, pikinso moro a ben figi puru krinkrin fu na takimakandra fu den kresten (Tori fu den Apostru 20:29, 30). Ne so esi leki na nen fu na Manpikin fu Gado ben bigin kisi moro bigi prensparifasi, èn ben bigin fu tapu di fu na Tata, dan sma di ben taki taki den de kresten ben bigin si taki na anbegi fu den fu na Tata ben kon moro nanga moro onpersoonlijk, moro nanga moro e misi na krosibei famirifasi a mindri pikin nanga wan Tata, èn sobun no ben de wan sani di ben gi deki-ati moro.
8. San ben de na krakti di a ben abi doronomo na tapu a pipri fu Gado fu di den ben teki na nen Jehovah Kotoigi?
8 Fu dati-ede, a ben de wan reide fu prisiri di no de fu taki, di den International Bible Student di ben moksi den srefi nanga na Waktitorengenootschap, ben teki na nen Yehovah Kotoigi ini 1931. No wawan a ben gi prisiri, ma a ben gi deki-ati srefisrefi. Fu dati-ede den beibri-studenti ben kan gi makandra deki-ati nanga na nyun nen fu den. — Teki gersi Yesaya 43:12.
9. Fa tru kresten sma e firi gi na Sma di den de kotoigi foe en?
9 Fu dati-ede meki tru kresten ini a ten disi e feni en yoisti fu kon sabi na Sma di den de en Kotoigi, di den ben taki na fesi fu den, neleki fa Yeises Krestes na Tyariman fu den, ben du di a ben de dyaso na grontapu (Openbaring 1:1, 2). Iya, en wawan den ben kon sabi leki na Sma di en nen na Yehovah. — Psalm 83:18.
Furu nanga prisiri èn santa yeye
10-12. (a) Sortu krakti na wroko krakti ben sa wroko tapu den bakaman fu Yeises? (b) Fa den Kotoigi fu Yehovah di kon furu nanga prisiri wani fu handri nanga makandra?
10 Yeises Krestes ben taigi den disipri na ini den adyosi wortu fu en: „Go fu dati-ede èn meki disipri fu sma fu ala nâsi, dopu den na ini a nen fu na Tata èn fu na Manpikin èn fu na santa yeye, èn leri den fu hori ala den sani di mi komanderi unu. Èn, luku! mi de nanga unu ala den dei te na a kba fu na seti fu sani.” — Mateyus 28:19, 20.
11 Luku taki den kresten di a no so langa ben kisi na leri ben musu kisi dopu ini na nen fu na santa yeye. Na santa yeye disi a no wan sma ma na wroko krakti fu Yehovah Gado, di En e kobroiki nanga yepi fu Yeises Krestes. Na Penkstri, Yehovah ben kanti nanga yepi fu Yeises na wroko krakti disi na tapu bakaman fu Yeises di gi den srefi abra (Tori fu den Apostru 2:33). Den ben kon furu nanga na santa yeye disi, èn wan fu den fasi, ofu froktu, fu na santa yeye na prisiri (Galasia sma 5:22, 23; Efesia sma 5:18-20). Prisiri na wan eigifasi di e gi tranga. Den disipri musu kon furu nanga prisiri fu na santa yeye. Na begi di na apostru Paulus ben skrifi den wortu fu en fiti srefisrefi: „Meki na Gado di e gi howpu, furu unu nanga ala prisiri èn vrede, fu di yu e bribi, so taki yu kan de psa marki ini howpu nanga krakti fu santa yeye.” — Rome sma 15:13.
12 Kotoigi fu Yehovah na ini a ten disi, di furu nanga na yeye disi di e gi prisiri, makandra nanga na „bigi ipi”, sa wani, iya, sa kon ini buweigi, fu gi makandra deki-ati na mindri fu na seti fu sani disi di no e sori switifasi. Na ini akruderi nanga disi, na apostru Paulus ben taki tu fu „wan gi fu deki-ati na makandra.” — Openbaring 7:9, 10; Rome sma 1:12; 14:17.
Ala reide fu de nanga deki-ati
13. Sortu reide wi abi fu kisi deki-ati èn gi makandra deki-ati?
13 Fu di den de na mindri fu na seti fu sani disi, di na gensman fu ala sani di de regtfardiki, de na tiriman èn srefi na gado fu en, meki kresten sa wani fu gi makandra deki-ati na ini a kresten gemeente na a heri grontapu, di na santa yeye fu Yehovah Gado furu en (Hebrew sma 10:24, 25; Tori fu den Apostru 20:28). Wi abi ala reide fu de nanga deki-ati. Iya, fa wi de grantangi taki wi abi soifri sabi fu Yehovah nanga fu En Manpikin èn fu na wroko krakti di den e kobroiki, dati wani taki na santa yeye! Fa wi de grantangi fu na howpu di den e gi! Na anbegi fu wi furu sobun nanga prisiri. Na apostru Paulus ben taigi den kresten di a ben skrifi en brifi gi taki den musu gi makandra deki-ati èn bow makandra ini na moro santa bribi fu den. Den ben musu du disi ’omoro den e si taki a gersi na dei e kon krosibei.’ Boiti fu dati, te den politiek makti fu na grontapu disi figi na ini nen krestendom puru, makandra nanga ala tra falsi relisi, dan na situwâsi sa aksi taki wi gi makandra moro deki-ati ete.
14. Suma musu gi makandra deki-ati èn fa?
14 Aladi den owruman e teki fesi fu gi na ipi deki-ati na ini den aparti gemeente fu den, toku ala kresten musu gi makandra deki-ati, so leki Hebrew sma 10:25 e frumane. Te yu luku en bun, dan disi na wan sani di den e aksi fu wan kresten. Efu yu na wan memre fu wan gemeente, yu e gi na deki-ati disi dan? Kande yu sa aksi yu srefi: ’Fa mi kan du dati? San mi kan du?’ Na a fosi presi, a no de so taki ala den tra brada nanga sisa e kisi deki-ati soso fu di yu de na den konmakandra èn fu di yu e hori baka gi na kresten seti, neleki fa yu srefi leki fa a sori e kisi deki-ati te yu e si trawan e fisiti den gemeente konmakandra kotrow? So srefi den kan kisi deki-ati nanga yepi fu yu eksenpre fu kotrow horidoro. Fu di yu e go doro ini na kresten libipasi awasi problema nanga muilekheid fu na libi de èn noiti e gi abra, dan yu kan gi wan eksenpre di e gi tranga.
Kakafutu gi na wani di Didibri wani meki yu lasi ati
15. Fu san-ede Didibri abi „bigi atibron”, èn teige suma?
15 Wi a no den wan enkriwan di sabi taki na dei fu Yehovah de krosibei. Satan Didibri sabi disi tu. Openbaring 12:12 e fruteri wi taki helu de now gi grontapu „bikasi Didibri saka kon na ondro na unu, èn a abi bigi atibron, fu di a sabi taki a abi wan syatu pisiten.” So leki fa Openbaring 12:17 e taki, dan a bigi atibron fu en de tapu den wan di „e hori den gebod fu Gado èn di abi na wroko fu a gi kotoigi fu Yeises.” Degedege no de fu dati — Didibri wani fu meki wi lasi ati! Èn a sabi soifri fa fu pruberi fu du disi. A sabi wi swakifasi èn problema, èn a e wroko tapu dati.
16. Fu san-ede Satan e kobroiki a lasi di sma kan lasi ati leki wan fetisani?
16 Fu san-ede Didibri e kobroiki lasi ati leki wan fetisani? Fu di furutron a e wroko. Srefi wan sma di ben hori doro na ondro gens nanga frufolgu kan tron wan stimofo fu na lasi ati. Satan wani fu tyalensi Gado èn pruberi fu buweisi taki a kan puru ala sma fu na dini fu En (Odo 27:11; teki gersi Yob 2:4, 5; Openbaring 12:10). Efu a kan meki yu lasi ati, dan a kan meki a psa kande taki yu o du en moro safrisafri na ini yu dienst gi Gado; a kan meki yu stòp kande srefi, fu yu kon de inactief na ini a preiki fu na bun nyunsu fu na Kownukondre. — 2 Korente sma 2:10, 11; Efesia sma 6:11; 1 Petrus 5:8.
17. Fa den takru krakti di lasi ati ben abi ben de fu si na ini a ten fu Moses?
17 Den takru krakti di kan kon te yu lasi ati, yu kan si ini na tori fu den Israèl sma na ini na owru Egypte. Na baka di Moses ben taki nanga Farao, dan na bigi ogri-atiman dati ben meki den lai fu den èn na druk di a ben druk den kon moro hebi. Gado ben taigi Moses fu dyaranti den Israèl sma taki A ben sa fri den trutru, ben sa meki den tron En pipri, ben sa sorgu taki den kon fri, èn ben sa tyari den go na ini a Pramisi Kondre. Moses ben taki fu disi nanga den manpikin fu Israèl. Ma Exodus 6:9 e taki: „Den no ben arki Moses fu di den ben lasi ati èn fu na tranga katibo ede.” Te leki Yehovah ben overtoigi Moses èn ben gi en deki-ati, dan na sani disi ben meki Moses srefi lasi ati fu wani go taki nanga Farao so leki a ben kisi na komando. — Exodus 6:10-13.
18. Fu san-ede a de fanowdu srefisrefi gi na pipri fu Gado fu kakafutu gi lasi ati di Didibri e tyari kon?
18 Satan Didibri sabi heri bun den takru krakti di a lasi fu ati kan abi na den dienstknekti fu Gado tapu. So leki Odo 24:10 e taki: „Yu sori taki yu lasi ati na a dei fu banawtu? Na krakti fu yu sa de pikinso.” Fu di wi e libi so fara ini na ten fu na kba, meki wi musu de nanga krakti èn de tranga na yeye fasi. A ogri nofo kba taki wi abi fu feti nanga wi onvolmaakti fasi, swakifasi èn fowtu di kan hori bòk gi wi; ma te Satan e pruberi fu wroko psa marki tapu den fowtu disi, dan wi abi yepi fanowdu.
Frutrow tranga tapu na srakti-ofrandi fu Krestes
19. San sa yepi wi fu kakafutu gi lasi ati, èn fu san-ede?
19 Wan bigi yepi na ini a tori disi na a seti fu a lusu-paiman di Yehovah ben meki a kan de nanga yepi fu Yeises Krestes. Wi kan de sma di e wini fu di wi e frutrow tranga na tapu na lusu-paiman. A de wan kefarlek sani fu si na seti disi leki wan pikin sani. Iya, wi sa kan du fowtu te now ete, ofu du sondu, so langa wi de onvolmaakti. Ma, wi no abi fu lasi ati èn stòp, nanga na prakseri taki howpu no de, èn waka go na so wan fasi na ini a trapu fu Satan. Wi sabi taki wi abi wan heri srakti-ofrandi gi sondu. Na lusu-paiman man fu puru sondu. Efu wi de fu na „bigi ipi”, dan wi musu abi bribi nanga frutrow dorodoro taki wi kan wasi den krosi fu unu èn kan meki den weti na ini na brudu fu na Lam. — Openbaring 7:9, 14.
20. Fa Openbaring 12:11 e sori taki, sma kan wini na bigiwan, Didibri, di e meki sma e lasi ati?
20 Na ini Openbaring 12:10 den e taki fu Satan leki „na sma di e kragi den brada fu wi . . . di e kragi den dei nanga neti na fesi fu wi Gado.” Fa wi kan wini so wan ogri kragiman èn wan bubu fu wan sma di e meki trawan lasi ati? Vers 11 fu na kapitri dati e gi na piki: „Den ben wini en nanga na brudu fu na Pikinskapu èn nanga na wortu fu na preiki fu den, èn den no ben lobi den sili fu den srefi te den ben de na fesi dede.” Sobun a de fanowdu taki na pipri fu Yehovah tan hori frutrow dorodoro ini na frulusu ofrandi, na brudu fu na Pikinskapu. Tan teki krakti so furu leki a kan fu na deki-ati di e kon fu na preiki, fu di doronomo yu e prati na a bun nyunsu fu na kownukondre fu Gado nanga ibriwan sma pe yu kan.
21. Fa sondro fu wi sabi wi kan abi prati ini na wroko fu Didibri fu meki wi brada lasi ati?
21 Sontron, srefi sondro fu sabi, wi kan abi prati ini na wroko fu Didibri fu meki wi brada lasi ati. Fa? Fu di wi e tron sma di e suku fowtu na trawan, e aksi tumusi furu, ofu e de tumusi regtfardiki (Preikiman 7:16). Wi alamala abi sani di wi e misi èn swakifasi. No meki wi wroko na den tapu so leki Didibri e du. Na presi fu dati, meki wi taki fu den brada fu wi nanga na pipri fu Yehovah leki wan grupu di orga na wan fasi di e gi deki-ati. Wi wani go doro fu gi makandra deki-ati èn kibri wi srefi sobun fu meki makandra lasi ati.
Gi deki-ati aladi na dei e kon krosibei
22, 23. (a) Fu san-ede wi no musu libi en na den owruman wawan fu de fonten fu deki-ati? (b) Fa wan sma kan gi opziener na ini a kresten gemeente deki-ati?
22 Wi musu meki a de wi faste bosroiti fu gi makandra alaten deki-ati aladi na dei e kon moro krosibei. Gi makandra deki-ati nanga yepi fu yu kotrow eksenpre fu bribi èn wortu fu trowstu. Waka baka na eksenpre fu Yehovah nanga Masra Yeises Krestes ini na tori disi. No libi en abra gi den owruman fu na gemeente wawan fu de na fonten fu deki-ati. We, den owruman srefi abi deki-ati fanowdu. Den abi swakifasi èn e misi fu du sani neleki na tra pisi fu na ipi, èn den abi fu feti nanga den srefi problema fu sorgu gi den famiri fu den na ini wan grontapu di e go na baka. Boiti fu dati, den abi san Paulus ben taki fu en leki na sorgu gi den gemeente (2 Korente sma 11:28, 29). Den abi wan tranga wroko — den abi deki-ati fanowdu.
23 Yu kan gi den wan di de na ini wan posisi fu opziener ini na kresten gemeente tumusi furu deki-ati fu di yu e wroko makandra nanga den. Dan yu e gi yesi na a rai fu Hebrew sma 13:17: „Gi yesi na den wan di e teki fesi na unu mindri èn saka unu srefi, bikasi den e luku unu sili leki sma di musu gi frantiwortu: so taki den du disi nanga prisiri èn no nanga soktu, bikasi disi ben sa du yu ogri.”
24. San wi musu du ini na ten disi fu lasi-ati èn fu san-ede?
24 Wi e libi ini wan ten pe sma e lasi ati. Na ati fu libisma kon weri fu tru fu frede èn fruwakti fu den sani di e kon abra na grontapu pe libisma e libi, so leki Yeises ben taki na fesi (Lukas 21:25, 26). Nanga so furu problema di broko sma saka èn di e meki sma lasi ati, gi „makandra deki-ati, èn dati musu de moro so te yu e si na dei e kon krosibei.” Gi yesi na a bun rai fu na apostru Paulus na ini 1 Tesalonika sma 5:11: „Tan trowstu makandra èn bow makandra, neleki fa unu, fu taki leti, e du kba.”
San yu ben sa piki?
◻ Fu san-ede kresten musu e gi makandra deki-ati, srefi moro leki fosi?
◻ Fa sabi fu na nen fu Gado ben de wan deki-ati gi na pipri fu Yehovah?
◻ Na sortu fasi wi kan gi makandra leki aparti sma deki-ati?
◻ Fu san-ede wi musu kibri wi srefi fu abi prati ini a wroko fu Didibri fu meki den brada fu wi lasi ati?
[Prenki na tapoe bladzijde 28]
Owruman e teki fesi ini a gi fu deki-ati na a ipi na ini den gemeente fu den