Waktitoren LIBRARY TAPU INTERNET
Waktitoren
LIBRARY TAPU INTERNET
Sranantongo
  • BIJBEL
  • BUKU
  • KONMAKANDRA
  • w99 15/11 blz. 28-31
  • San Wi Kan Du te Wi Lasi-ati?

Felem no de na a pisi disi.

Sorry, wan sani no go bun di wi pruberi fu drai a felem.

  • San Wi Kan Du te Wi Lasi-ati?
  • A Waktitoren—A e taki fu Yehovah Kownukondre 1999
  • Edeprakseri
  • A srefi sortu tori
  • Lasi-ati na ini Wi Preikiwroko
  • Kisi Moro Bun Bakapisi
  • Tan Abi wan Bun Denki
  • A Lasi Di Wi E Lasi-ati èn a Banti Di Wi Abi Nanga Trawan
  • Persoonlijk Firi Di E Meki Sma Lasi-ati
  • Tu fu den Moro Bun Fasi fu Feti Nanga Disi
  • No Lasi-ati Moro
  • San kan yepi yu te yu lasi-ati?
    A Waktitoren—A e taki fu Yehovah Kownukondre (Studie-Waktitoren)—2020
  • Gi makandra deki-ati omoro a dei e kon krosibei
    A Waktitoren—A e taki fu Yehovah Kownukondre 1990
  • A santa yeye e gi wi krakti te wi e kisi tesi, èn te wi e firi brokosaka
    A Waktitoren—A e taki fu Yehovah Kownukondre 2011
  • Wi e kon weri, ma wi e tan go doro
    A Waktitoren—A e taki fu Yehovah Kownukondre 2004
Moro sani
A Waktitoren—A e taki fu Yehovah Kownukondre 1999
w99 15/11 blz. 28-31

San Wi Kan Du te Wi Lasi-ati?

SAN wan sma kan du fu no lasi-ati? Na disi den ben aksi difrenti opziener di e reis èn di e fisiti den gemeente fu Yehovah Kotoigi doronomo. Den piki fu den kan yepi wi fu ondrosuku san e meki wan sma e lasi-ati èn san na den fasi fa den kan feti nanga a situwâsi disi pe ibri Kresten kan de na ini.

Moro leki wan ondrosuku nomo de fanowdu fu du wan sani te wan sma lasi-ati, ma den sani di e sori taki disi de so kan de taki wan sma no abi belangstelling moro fu begi noso fu du persoonlijk studie, taki a no e fisiti den konmakandra doronomo moro, a no abi someni faya moro, èn srefi taki a no abi switi fasi moro gi tra Kresten. Ma wan fu den moro krin buweisi, na taki a no abi someni faya moro gi a preikiwroko. Meki wi go ondrosuku den buweisi èn luku san na wan tu fasi fa wi kan feti nanga a sani disi.

Lasi-ati na ini Wi Preikiwroko

Yesus Krestes ben sabi den problema di abi fu du nanga a komando di wi kisi fu meki disipel (Mateus 28:19, 20). A ben seni den bakaman fu en leki „skapu na mindri wolfu”, ala di a ben sabi taki a preikiwroko fu den ben o tyari frufolgu kon na den tapu (Mateus 10:16-23). Toku disi no ben musu meki den lasi-ati. Fu taki en leti, den futuboi fu Gado di sori na ini begi taki den e frutrow na Yehovah tapu, nofotron ben kon tranga fu frufolgu ede.—Tori fu den Apostel 4:29-31; 5:41, 42.

Srefi te den disipel fu Krestes no ben ondrofeni hebi frufolgu, toku a no ala ten sma ben ontfanga den bun (Mateus 10:11-15). Na a srefi fasi a preikiwroko fu Yehovah Kotoigi no de wan makriki sani ala ten na ini a ten disi.a Furu sma feni taki a bribi di den e bribi na ini Gado na wan persoonlijk sani di den no wani taki fu en nanga tra sma. Tra sma no wani abi noti fu du nanga wan relisi organisâsi di den abi wan takru denki fu den. Seiker, a mi-no-kefasi fu sma, a waka di sani no e waka bun, noso difrenti tra problema kan de kefalek bigi sani di e meki sma e lasi-ati. Fa wi kan wini den problema disi?

Kisi Moro Bun Bakapisi

A prisiri di a diniwroko fu wi e gi wi, fu wan pisi e kon fu den bakapisi di wi e kisi. So bun, fa wi kan abi moro bun bakapisi na ini a diniwroko? We, wi na „fisiman fu libisma” (Markus 1:16-18). Den fisiman na ini na owruten Israèl ben go fisi te neti te den ben kan kisi moro furu fisi. Wi tu musu ondrosuku wi kontren so taki wi kan go „fisi” te moro furu sma de na oso èn te den sa arki a boskopu fu wi moro esi. Disi kan de te neti, na a kaba fu a wiki, noso na wan tra ten. Soleki fa wan kringopziener e taki, dan disi e wroko bun na ini kontren pe sma e wroko heri dei. A e taki dati te kotoigi e gi te neti dan nofotron disi e tyari kefalek bun bakapisi kon. Fu preiki nanga telefon noso fu gi okasi kotoigi e yepi wi tu fu miti moro sma.

Te wi e horidoro na ini a diniwroko dan dati e tyari bun bakapisi kon. Na ini Owstu Europa èn na ini wan tu Afrikan kondre, a Kownukondre preikiwroko e go bun na fesi, èn disi ben meki taki wan bigi gro ben de. Na so a de tu taki furu gemeente opo na ini kontren di langa ten wi ben si leki kontren di no abi bun bakapisi, noso srefi na ini kontren di wi ben wroko furutron kaba. Ma fa a de te yu no abi bun bakapisi na ini a kontren fu yu?

Tan Abi wan Bun Denki

Te wi e tan prakseri den marki di Yesus ben poti, dan dati sa yepi wi fu no lasi-ati te sma abi wan mi-no-kefasi na ini a diniwroko. Krestes ben wani meki den disipel fu en go suku sma di e frudini dati, a no ben wani meki den drai a libi fu ipi-ipi sma. Na difrenti okasi a ben sori taki moro furu sma no ben o wani arki a bun nyunsu, neleki fa moro furu Israèlsma no ben arki den profeiti fu owruten.—Esekièl 9:4; Mateus 10:11-15; Markus 4:14-20.

Na den sma di „sabi den yeye nowtu” e teki a „bun nyunsu fu a kownukondre” nanga warderi (Mateus 5:3; 24:14). Den wani dini Gado soleki fa en wani. So bun, den bakapisi fu a wroko fu wi abi moro furu fu du nanga na a ati fu den sma, moro leki a abi fu du nanga a fasi fa wi man pristeri a boskopu. A no de fu taki dati wi musu du san wi man fu meki a bun nyunsu de wan sani di den sma lobi. Toku den bakapisi e anga na Gado, bika Yesus ben taki: „No wan sma kan kon na mi, boiti efu a Tata, di ben seni mi kon, e hari en kon.”—Yohanes 6:44.

A preikiwroko fu wi e meki a nen fu Yehovah bekènti. Awansi sma e arki noso no e arki, toku a preikiwroko fu wi e yepi fu santa Yehovah en santa nen. Boiti dati, nanga a preikiwroko fu wi, wi e buweisi taki wi na disipel fu Krestes, èn taki wi abi a grani fu du a moro prenspari wroko di wan sma kan du na ini a ten fu wi.—Mateus 6:9; Yohanes 15:8.

A Lasi Di Wi E Lasi-ati èn a Banti Di Wi Abi Nanga Trawan

Son leisi a banti di wi abi nanga tra libisma, efu a de na ini na osofamiri noso na ini a gemeente, kan meki wi lasi-ati. Fu eksempre, wan sma kan abi a firi taki trawan no e frustan en. Den onvolmaaktifasi fu tra bribiman kan meki wi lasi-ati tu. Ma agen den Buku fu Bijbel kan yepi wi furu.

„A heri libimakandra fu brada” na heri grontapu na wan bigi famiri na yeye fasi (1 Petrus 2:17). Ma a firi di wan sma abi taki a de wan memre fu wan pipel di abi wánfasi, kan dede gowe te problema e opo kon fu di sma no man feni en nanga makandra. Soleki fa a sori, dan den fosi yarihondro Kresten ben abi den sortu problema disi tu, fu di na apostel Paulus ben musu frumane den ibritron baka fu libi nanga makandra na ini wánfasi. Fu eksempre, a ben frumane tu Kresten uma — Efowdia nanga Sentike — fu lusu a trobi di den ben abi nanga makandra.—1 Korentesma 1:10; Efeisesma 4:1-3; Filipisma 4:2, 3.

Efu disi na a problema, dan fa wi kan kon lobi wi brada nanga sisa baka na wan opregti fasi? Dati wi kan du te wi e memre wisrefi taki Krestes dede gi den èn taki den, neleki wi, sori bribi na ini a lusu-paiman fu en. Wi kan prakseri tu taki furu brada fu wi de klariklari fu waka baka na eksempre fu Yesus Krestes, èn fu poti den libi na ini kefar gi wi.

Wan tu yari pasa, na ini Parijs, Fransikondre, wan yongu Kotoigi no ben draidrai fu grabu wan kofru di ben abi wan bom na ini èn di wan sma ben poti dorosei fu a Kownukondre zaal. A ben lon difrenti trapu go na gron bifo a ben trowe a kofru go na ini wan watrafonten, pe a bom ben sutu. Di den ben aksi en fu san ede a ben poti en libi na ini kefar na a fasi disi, a ben piki: „Mi ben frustan taki a libi fu wi ben de ini kefar. Fu dati ede mi ben prakseri taki a ben moro bun taki mi wawan dede, na presi taki wi alamala dede.”b ¡A de trutru wan blesi fu sabi den kompe disi di de klariklari fu waka so finifini na baka na eksempre fu Yesus!

Boiti dati, wi kan prakseri dipi tu fu a fasi fa Yehovah Kotoigi di ben de na ini den strafuman kampu ben wroko makandra na a ten fu a di fu Tu Grontapu Feti.c No so langa pasa, den brada nanga sisa fu wi na ini Malawi ben hori den soifri retifasi leki tru Kresten na a srefi loyaal fasi. ¿A no de so, taki a prakseri taki den brada fu wi gemeente ben o du a srefi sani na ini situwâsi di no bun kwetikweti, e gi wi deki-ati fu frigiti den trobi nanga problema di de ibri dei noso pruberi fu si den leki pikin sani? Efu wi e leri fu abi a denki fu Krestes, dan a banti di wi abi nanga tra bribiman ala dei sa de wan sani di e gi wi kowru-ati, a no sa meki wi lasi-ati.

Persoonlijk Firi Di E Meki Sma Lasi-ati

„Fruwakti di musu skoifi poti na wan tra ten, e meki na ati kon siki, ma a sani gi san sma e angri, de wan bon fu libi te a e kon trutru” (Odo 13:12). Soleki fa wan tu futuboi fu Yehovah e si en, dan a kaba fu a seti fu sani disi no e kon esi nofo. Kresten feni taki a pisi ten disi pe wi e libi na ini ’muilek èn a tranga fu pasa’, neleki fa a de gi sma di no de na bribi.—2 Timoteus 3:1-5.

Ma tra fasi leki den sma di no de na bribi, Kresten musu prisiri fu si taki den muilek situwâsi disi na a „marki” fu Yesus en denoya, di e sori taki heri esi Gado Kownukondre sa tyari wan kaba kon heri esi na a godelowsu seti fu sani disi (Mateus 24:3-14). Srefi efu a situwâsi e kon moro takru — èn a sa de trutru so na ini a „bigi banawtu” — toku den sani disi di e feni presi e gi wi prisiri bika den e bariwroko gi Gado en nyun grontapu di e kon.—Mateus 24:21; 2 Petrus 3:13.

Te wan Kresten e tan denki taki a ten te a Kownukondre sa bumui ensrefi nanga den afersi fu a ten disi de fara ete, dan dati ben kan meki taki a e gebroiki moro nanga moro ten fu suku materia sani. Efu a ben sa meki den sortu sani disi soleki grontapu wroko nanga prisiriten teki ala en ten nanga en krakti, dan a ben sa muilek gi en fu du den Bijbel frantwortu fu en na wan yoisti fasi (Mateus 6:24, 33, 34). So wan denki e bruya wan sma èn na so fasi a e lasi-ati. Wan kringopziener ben taki: „A no de wan yoisti sani fu pruberi fu libi leki wi de na ini a nyun sistema, ala di wi de na ini a seti fu sani disi.”

Tu fu den Moro Bun Fasi fu Feti Nanga Disi

Te wan sma kon sabi kaba san e meki en lasi-ati, dan fa a kan feni wan bun fasi fu feti nanga disi? Persoonlijk studie na wan fu den moro bun fasi di de. Fu san ede? „A e memre wi fu san ede wi musu du san wi musu du”, na so wan kringopziener ben taki. Wan trawan ben fruklari tu: „Fu preiki soso fu di a de wi plekti, e tron wan hebi baka wan pisi ten.” Ma bun persoonlijk studie e yepi wi fu kon si krin baka san na a rol fu wi, ala di wi e kon moro krosibei na a kaba. Nanga a srefi prakseri disi, den Buku fu Bijbel e memre wi ibritron baka taki a de fanowdu fu nyan bun na yeye fasi, so taki wi kan de trutru koloku te wi e du a wani fu Gado.—Psalm 1:1-3; 19:7-10; 119:1, 2.

Den owruman kan yepi trawan fu no lasi-ati moro, te den e tyari herder fisiti na den na wan fasi di e gi den deki-ati. Na den persoonlijk fisiti disi, den owruman kan sori taki den e warderi ibriwan fu wi trutru èn taki wi abi wan prenspari presi na mindri a pipel fu Yehovah (1 Korentesma 12:20-26). Wan owruman ben taki fu tra Kresten: „Fu sori den taki den prenspari, mi e memre den na den sani di den du na ini a ten di pasa. Mi e sori taki den warti na ini Yehovah ai èn taki a ben gi a brudu fu en Manpikin gi a bun fu den. Den prakseri disi e du den bun ala ten. Te wi buweisi disi kaba nanga krakti bijbeltekst, dan den wan di lasi-ati man poti nyun marki now, soleki fu begi nanga den osofamiri èn fu studeri èn leisi Bijbel.”—Hebrewsma 6:10.

Na den herder fisiti den owruman musu luku bun taki den no meki a gersi taki sma no man plisi Gado kwetikweti. Na presi fu dati, den owruman kan yepi kompe-anbegiman di lasi-ati, fu si taki a lai di poti na tapu den bakaman fu Yesus de wan lekti sani. Fu dati ede a Kresten diniwroko fu wi na wan sani di e gi prisiri.—Mateus 11:28-30.

No Lasi-ati Moro

Awansi sortu sani e meki wan sma e lasi-ati, a de wan krawasi di wi musu feti nanga en. Ma prakseri taki wi no de wi wawan na ini a feti disi. Efu wi lasi-ati, dan meki wi teki a yepi fu wi Kresten kompe, spesrutu fu den owruman. Te wi e du dati, dan wi no sa lasi-ati someni moro.

Boiti dati, wi musu go suku yepi na Gado fu no lasi-ati moro. Efu wi e sori ini begi taki wi e frutrow tapu Yehovah, dan a kan yepi wi fu no lasi-ati kwetikweti moro (Psalm 55:22; Filipisma 4:6, 7). Ma awansi fa, leki en pipel, wi kan abi den srefi firi leki a psalm singiman di ben singi: „Koloku fu a pipel di sabi a prisiri babari. O Yehovah, ini a leti fu yu fesi den e tan waka. Na ini yu nen den e prisiri heri dei èn na ini yu regtfardikifasi den e meki kon hei. Bika yu na a moi fu a krakti fu den; èn fu a bun fu yu a tutu fu wi e meki kon hei.”—Psalm 89:15-17.

[Futuwortu]

a Luku na artikel „De prediking van huis tot huis — een uitdaging” na ini De Wachttoren fu 15 augustus 1981.

b Luku bladzijde 12 nanga 13 na ini Ontwaakt! fu 22 februari 1985, di a Watchtower Bible and Tract Society of New York, Inc., tyari kon na doro.

c Luku den artikel „Ik overleefde de ’dodenmars’” na ini De Wachttoren fu 15 november 1980, èn „Rechtschapenheid bewaren in nazi-Duitsland” na ini na Ontwaakt! fu 22 yuni 1985.

[Prenki na tapu bladzijde 31]

Den herder fisiti di owruman di lobi wi e tyari, èn di e gi wi deki-ati, kan yepi Kresten fu no lasi-ati moro

    Sranantongo buku (1978-2025)
    Log Out
    Log In
    • Sranantongo
    • Seni en gi wan sma
    • Settings
    • Copyright © 2025 Watch Tower Bible and Tract Society of Pennsylvania
    • Gebruiksvoorwaarden
    • Privacybeleid
    • Privacyinstellingen
    • JW.ORG
    • Log In
    Seni en gi wan sma