Jesus libi nanga diniwroko

„Loekoe! Na libisma!”

FOE di na fasi fa Jesus e doe, e gi Pilatus respeki èn foe di a e si taki Jesus no doe noti fowtoe, meki a e proeberi wan tra fasi foe loesoe Jesus. „Oenoe abi wan gwenti”, a e taigi na ipi sma, „taki mi moesoe loesoe wan man gi oenoe tapoe na paskafesa.”

Barabas, wan kiriman di abi takroe-nen, de na strafoe toe, foe dati-ede Pilatus e aksi: „Sortoe wan foe den oenoe wani mi loesoe gi oenoe, Barabas noso Jesus, di den e kari Krestes?”

Foe di den ede-priester di ben soetoe faja gi den ben overtoigi na pipel, meki a pipel e aksi foe den loesoe Barabas ma foe den kiri Jesus. Pilatus no e gi abra èn a e aksi agen: „Sortoe wan foe den toe oenoe wani foe mi loesoe gi oenoe?”

„Barabas”, den e bari.

„San mi sa doe dan nanga Jesus, di den e kari Krestes?” Pilatus e aksi nanga skreki-ati.

Nanga wan babari di e dofoe sma jesi, den e piki: „Meki den spikri en na wan postoe!” „Spikri en na wan postoe! Meki den spikri en na wan postoe!”

Foe di Pilatus sabi taki den e aksi na dede foe wan man di no doe noti fowtoe, meki a e aksi nanga tranga: „Sortoe takroe sani a man disi doe? Mi no ben feni noti na en san e meki a froedini dede; foe dati-ede mi sa wipi en èn loesoe en.”

Nanga ala di a e proeberi foe doe wan sani, tokoe na ipi di ati e bron srefisrefi, foe di den kerki fesiman foe den e soetoe faja gi den, e tan bari: „Meki den spikri en na wan postoe!” Foe di den priester e meki na ipi e rigeri leki lawman, meki den e wani foe si broedoe. Èn foe prakseri, taki soso feifi dei a fesi, sonwan foe den ben de kande a mindri den wan di ben winsi Jesus wan switikon na ini Jerusalem leki kownoe! Ala na ten dati, den disipel foe Jesus, efoe den de drape, e tan pî, sondro foe sma si den.

Pilatus, di e si taki san a e proeberi no e waka boen, ma na presi foe dati taki wan oproeroe e opo ede kon, e teki watra èn e wasi en anoe a fesi na ipi, èn e taki: „Mi no abi noti foe doe nanga a broedoe foe na man disi. Oensrefi moesoe si san oenoe e doe.” Tapoe dati na pipel e piki: „Meki na broedoe foe en kon na oenoe tapoe èn na tapoe den pikin foe wi.”

So boen, ini akroederi nanga san den e aksi — èn foe di Pilatus winsi foe satisferi na ipi moro leki foe doe san de boen — meki a e loesoe Barabas gi den. A e teki Jesus, e meki den poeroe en krosi na en skin èn dan a e meki den krawasi en. Disi no ben de wan gewoon wipi di den e wipi wan sma. The Journal of the American Medical Association e skrifi foe na Romeini fasi foe krawasi wan sma:

„Na wrokosani di den ben gwenti foe gebroiki, ben de wan sjatoe wipi (flagrum noso flagellum) nanga difrenti leri boeba foe difrenti langa, di ben de aparti ofoe ben brei, èn pe pikin koegroe foe isri ofoe srapoe pisi skapoebonjo ben tai a srefi fara foe makandra . . . Ibri leisi te den sroedati foe Rome ben naki nanga ala krakti na tapoe a baka foe na sma, dan den isri koegroe ben meki a kisi wan bigi mankeri èn den leri boeba nanga skapoebonjo ben sa priti na boeba èn na skin ondro na boeba opo. Te a fonfon ben go doro, dan so srefi den titei foe den bonjo di didon na ondrosei ben priti opo èn na so wan fasi priti pisipisi meti di e seki èn di e broedoe ben doe kon.”

Baka na fonfon disi, di e gi hebi skin-ati, dan den e teki Jesus go na a palèisi foe na granman, èn den e kari na heri legre foe sroedati kon makandra. Drape den sroedati e go doro foe spotoe en foe di den e brei wan kownoe-ati foe maka èn e poesoe disi go na tapoe en ede. Den e poti wan tiki na ini en leti-anoe, èn den e weri wan purper krosi gi en, na sortoe di sma foe kownoe-oso e weri. Dan nanga spotoe den e taigi en: „Odi, joe kownoe foe den djoe! ” Den e spiti toe na en tapoe èn den e naki en na ini en fesi. Den e poeroe na tranga tiki na ini en anoe èn e gebroiki dati foe naki en na tapoe en ede, so taki den srapoe maka foe na „kownoe-ati” foe broko en saka, e poesoe go moro dipi na ini en ede.

Na aparti wartifasi nanga krakti foe Jesus, ala di na meshandri disi e miti en, e gi Pilatus so wan bigi respeki taki disi e boeweigi en foe proeberi doe ete wan moeiti foe loesoe en. „Loekoe! Mi e tjari en go na dorosei gi oenoe foe meki oenoe sabi taki mi no feni no wan fowtoe na en”, a e taigi na ipi. Kande a e prakseri taki na si foe a skin-ati di Jesus e njan, sa safoe na ati foe den. Te Jesus e tanapoe na fesi na oproeroe ipi di no abi firi gi sma, ala di a weri na kownoe-ati foe maka na en ede èn na purper krosi na en skin nanga wan fesi di e broedoe èn pe skin-ati de foe si na tapoe, dan Pilatus e bari taki: „Loekoe! Na libisma! ”

Ala di den fon èn naki en pasa marki tokoe a moro aparti sma foe na heri historia e tanapoe djaso, troetroe a moro prenspari sma di ben libi wan ten! Ija, Jesus e sori wan tiri wartifasi nanga bedarifasi di e sori wan granifasi di srefi Pilatus moesoe erken, bikasi den wortoe foe en leki fa a sori, de, taki respeki moksi nanga sari-ati. Johanes 18:39–19:5; Mateus 27:15-17, 20-30; Markus 15:6-19; Lukas 23:18-25.

◆ Na sortoe fasi Pilatus e proeberi foe loesoe Jesus?

◆ Fa Pilatus e proeberi foe poeroe na frantiwortoe na ensrefi tapoe?

◆ San de ini a tori te den e krawasi wan sma?

◆ Fa den e spotoe Jesus baka di den krawasi en?

◆ Fa Pilatus e proeberi moro fara foe loesoe Jesus?