Jesus libi nanga diniwroko

Den gi en abra èn tjari en gowe

TE PILATUS e doe moeiti agen foe loesoe Jesus, foe di na tiri wartifasi nanga a pina foe Jesus e boeweigi en ati, dan den ede-priester ati e kon bron moro srefi. Den abi na fasti bosroiti foe no meki no wan sani kon a mindri na ogri prakseri foe den. Foe dati-ede den e bigin bari agen: „Spikri en na wan postoe! Spikri en na wan postoe!”

„Teki en oensrefi èn spikri en na wan postoe”, Pilatus e piki nanga tegoe. Tra fasi leki san den ben taki a fesi, dan den djoe kan abi na makti foe kiri sma efoe a pasa di wan sma pasa wet foe kerki de serjoesoe nofo. Dan kande foe na di foe feifi tron Pilatus e froeklari taki Jesus no doe noti èn a e taki: „Mi no e feni no wan fowtoe na en.”

Den djoe, di e si taki den politiek kragi foe den no ben tjari den bakapisi kon di den ben wani, e fadon kon baka tapoe na kragi foe den na kerki sei di ben go foe a taki foe ogri foe Gado. A kragi disi den ben gebroiki wan toe joeroe a fesi kaba di Jesus ben de fesi kroetoe na a Sanhedrin. „Wi abi wan wet”, den e taki, „èn akroederi na wet dati a moesoe dede, bika a ben meki ensrefi na manpikin foe Gado.”

Na kragi disi de njoen gi Pilatus, èn disi e meki a kon frede moro. Now a e froestan taki Jesus a no wan gewoon man, neleki fa na dren foe en wefi èn na aparti krakti foe a sma di Jesus de e sori. Ma „Gado manpikin”? Pilatus sabi taki Jesus komoto foe Galilea. Ma a ben sa kan, taki a ben libi a fesi kaba? Te Pilatus e tjari en go baka na ini a palèisi dan a e aksi: „Pe joe komoto”?

Jesus e tan pî. A fesi a ben froeteri Pilatus taki a de wan kownoe, ma taki na kownoekondre foe en no de wan pisi foe a grontapoe disi. Foe tjari sani kon a krin moro fara now no ben sa meki na situwâsi kon moro betre. Ma te Jesus e weigri foe gi piki, dan disi e hati na bigi memre foe Pilatus, èn a e bari Jesus nanga den wortoe: „Joe no e taki nanga mi? Joe no sabi taki mi abi na makti foe loesoe joe èn taki mi abi na makti foe meki den spikri joe na wan postoe?”

„Joe no ben sa abi makti srefisrefi a mi tapoe efoe joe no ben kisi disi foe tapoesei”, Jesus e piki nanga respeki. A e sori tapoe na makti di Gado gi libisma tiriman foe tiri grontapoe afersi. Jesus e taki moro fara: „Dati meki na sma di ben gi mi abra na joe abi moro bigi sondoe.” A no de foe taki, dati na heipriester Kajafas nanga den kompe foe en èn Judas Iskariot e tjari alamala moro bigi frantiwortoe leki Pilatus foe na onregtfardiki fasi fa den e handri nanga Jesus.

Foe di Pilatus e kisi moro respeki gi Jesus èn foe di a e frede taki a kan, taki Jesus komoto foe Gado, meki a e proeberi agen foe loesoe Jesus. Ma den djoe e weigri foe arki Pilatus. Den e taki na politiek kragi foe den wan tron moro èn na wan triki fasi den e tapoe skreki gi Pilatus: „Efoe joe loesoe na man disi, dan joe a no wan mati foe keisri. Ibri sma di e meki ensrefi kownoe e taki kontrari keisri.”

Ala di disi kan abi serjoesoe bakapisi, Pilatus e tjari Jesus go wan tron moro na doro. „Loekoe! Oen kownoe!” a e taigi den agen.

„Poeroe en na pasi! Poeroe en na pasi! Spikri en na wan postoe!” den e piki.

„Mi moesoe spikri na kownoe foe oenoe na wan postoe?” Pilatus e aksi foe di a no sabi moro san foe doe.

Den djoe e mandi nanga na tiri foe den Rome sma. Ija, den e foega foe na hori di Rome e hori den na ondro dwengi! Ma tokoe den ede-priester e taki na wan hoigri fasi: „Wi no abi no wan tra kownoe leki keisri.”

Foe di Pilatus frede foe lasi na politiek posisi nanga boen nen foe en, meki a e broko kindi gi den aksi foe den djoe, di e tan go doro, foe tapoe skreki gi en. A e gi Jesus abra na den. Den sroedati e poeroe na purper djakti na Jesus skin èn den e weri en tapoesei krosi gi en. Te den e tjari Jesus gowe foe spikri en na wan postoe, dan den e meki a tjari en eigi pina-oedoe.

A de now afoe-pasi freida mamanten 14 Nisan; kande a e doro twarfoe joeroe kaba. Jesus ben de na ai sensi fodewroko mamanten froekoe èn a ben njan pina foe toemoesi takroe sani di a ondrofeni, a wan baka na trawan. Wi kan froestan, taki Jesus e kon lasi en krakti heri-esi na ondro na hebi foe na postoe di a moesoe tjari. Foe dati-ede den e dwengi wan sma di e pasa, wan seiker Simon foe Cyrene na ini Afrika, foe tjari na postoe gi en. Wan bigi ipi sma e waka na den baka, te den e go moro fara, so srefi foeroe oema di e naki densrefi foe sari ede èn di e bari krei foe Jesus.

Jesus e drai loekoe den oema èn a e taki: „Oemapikin foe Jerusalem, tapoe foe krei foe mi ede. Na presi foe dati, krei foe oensrefi èn foe oen pikin; bikasi loekoe! dei e kon pe sma sa taki: ’Kolokoe den oema de di no man foe kisi pikin èn den bere di no kisi pikin èn den bobi di no gi pikin merki!’ Dan den sa bigin taigi den bergi, ’Fadon a wi tapoe!’ èn na den pikin bergi, ’Tapoe oenoe!’ Bikasi efoe den e doe den sani disi te na bon lala, san sa pasa dan te a drei?”

Jesus e taki foe na bon foe na djoe nâsi, di abi te now ete wan pikinso watra na ini en foe libi, foe di Jesus de drape èn foe di wan fikapisi de di e bribi ini en. Ma te den e teki den disi poeroe foe na nâsi, dan soso wan bon di dede na jeje fasi sa tan abra, ija, wan nationaal organisâsi di kon drei. O, fa den sa abi wan reide foe krei te den legre foe Rome, di e dini leki sma di moesoe tjari a dedestrafoe foe Gado kon, e pori na djoe nâsi! Johanes 19:6-17; 18:31; Lukas 23:24-31; Mateus 27:31, 32; Markus 15:20, 21.

◆ Sortoe kragi den kerki tiriman e tjari kon kontrari Jesus, te den politiek kragi foe den no e tjari den bakapisi kon di den ben wani?

◆ Foe san-ede Pilatus e kon frede moro kande?

◆ Soema e tjari na moro bigi sondoe foe san e pasa nanga Jesus?

◆ Fa den priester e sorgoe taki Pilatus e gi Jesus abra meki den kiri en?

◆ San Jesus e taigi den oema di e krei foe en ede, èn san Jesus wani taki te a e taki foe na bon di „lala” èn di e „kon drei” baka dati?