„Den ben bai oenoe nanga wan prijs”
„Den ben bai oenoe nanga wan prijs. Gi foe dati-ede spesroetoe Gado glori na ini oenoe skin.” — 1 KORENTE SMA 6:20.
1, 2. (a) San ben opo „den pasi . . . di e tjari sma komoto foe dede”? (b) San ben moesoe pasa foe meki na srakti-ofrandi foe Krestes de warti na wet, èn fa disi ben prenki na fesi?
„NA TROE Gado de gi wi wan Gado foe wroko foe froeloesoe”, na psalm singiman ben taki „èn na foe Jehovah na Soeverein Masra, den pasi de di e tjari sma komoto foe dede” (Psalm 68:20). Na srakti-ofrandi foe Jesus Krestes ben opo na pasi dati. Ma efoe na srakti-ofrandi ben moesoe abi krakti na wet, dan Krestes ensrefi ben moesoe kon na fesi foe Gado srefi.
2 Disi ben prenki a fesi te na tapoe na verzoen dei na heipriester ben go na ini a moro santa presi (Levitikus 16:12-15). „Ma di Krestes ben kon leki heipriester. . . ,” na apostel Paulus ben skrifi, „dan a, nôno, no ben go nanga na broedoe foe bokoboko èn foe jongoe mankaw, ma nanga en eigi broedoe, wantron foe alaten na ini a santapresi èn ben kisi wan têgo froeloesoe gi wi. Bika Krestes no ben go ini wan santapresi di meki nanga anoe, wan kopie foe na troe wan, ma na ini hemel srefi, foe kon now foe na boen foe wi na fesi foe na sma di Gado de. — Hebrew sma 9:11, 12, 24.
Na krakti foe broedoe
3. (a) Fa den anbegiman foe Jehovah e si broedoe, èn foe san-ede? (b) San e sori taki broedoe abi na krakti foe na wet foe verzoen sondoe?
3 Sortoe ròl Krestes broedoe e prei ini na froeloesoe foe wi? Sensi den dei foe Noa dan troe anbegiman si broedoe leki santa (Genesis 9:4-6). Broedoe e prei wan prenspari ròl ini na libi proces, bika bijbel e taki taki ’na sili [ofoe na libi] foe na skin foe meti de ini na broedoe’ (Levitikus 17:11). Na wet foe Moses ben aksi toe taki te wan sma ben òfer wan meti, a broedoe foe en ben moesoe kanti trowe gi Jehovah. Sontron broedoe ben poti toe na tapoe den toetoe foe na altar. A de krin taki na krakti foe verzoen foe wan srakti-ofrandi ben de ini na broedoe foe en (Levitikus 8:15; 9:9). „Pikinso moro ala sani, leki fa a wet e taki, e kon krin nanga jepi foe broedoe, èn efoe broedoe no e lon sma no e kisi pardon”. — Hebrew sma 9:22.
4. (a) Sortoe prakseri na skotoe di Gado ben poti gi na gebroiki foe broedoe ben dini? (b) San ben de foe foeroe betekenis foe na fasi fa den kiri Jesus?
4 Soboen a no de foe froewondroe toe taki na ondro a wet ibri fowtoe gebroiki foe broedoe den ben strafoe nanga dede! (Levitikus 17:10) Wi alamala sabi taki, te den e meki wan sani de pikinso nomo foe feni, ofoe taki den e skotoe a gebroiki foe en na wan serjoesoe fasi, taki a waarde foe en e kon moro bigi. Foedi Jehovah tapoe a gebroiki foe broedoe dan dati ben sorgoe taki den no ben sa si broedoe leki wan sani foe gewoon waarde, ma leki wan diri sani, leki wan warti sani (Tori foe den Apostel 15:29; Hebrew sma 10:29). Disi ben de ini akroederi nanga a hei marki di na broedoe foe Krestes ben sa dini. A ben fiti taki, a ben dede na wan fasi di ben meki a broedoe foe en ben kanti trowe. Na so fasi a ben de krin taki Krestes no ben tjari soso en libisma skin leki ofrandi ma taki a ben kanti trowe na sili foe en, èn taki na ofrandi foe en ben de na libi foe en leki wan volmaakti libisma! (Jesaja 53:12) A no ben de so taki Krestes ben pori na reti di a ben abi na wet tapoe na libi dati foe onvolmaaktifasi ede, èn foe dati-ede na broedoe foe en di ben trowe ben abi bigi waarde èn dati ben kan pristeri na Gado fesi foe na verzoen foe den sondoe foe na libisma famiri.
5. (a) San Jesus ben teki go na hemel? (b) Fa a ben de krin taki Gado ben teki na srakti-ofrandi foe Krestes?
5 Krestes no ben kan teki na troetroe broedoe foe en go na ini hemel (1 Korente sma 15:50). Na presi foe dati a ben teki na sani foe san na broedoe dati ben de wan simbôl: na waarde na wet foe na volmaakti libisma libi foe en di ben òfer. Na fesi na sma di Gado de a ben kan pristeri na libi dati na a fasi di fiti leki wan loesoe-prijs na ini a presi foe na sondoe libisma famiri. Taki Jehovah ben teki na srakti-ofrandi dati, ben kon na krin nanga Pinkster 33 G.T. di na santa jeje ben kon na tapoe 120 disipel na ini Jerusalem (Tori foe den Apostel 2:1-4). Krestes, kon meki oenoe taki en so, ben de now na eiginari foe na libisma ras foedi a bai den (Galasia sma 3:13; 4:5; 2 Petrus 2:1). Foe dati-ede na libisma famiri ben kan njan boen now foe den winimarki foe na loesoe-prijs.
Den Fosiwan di ben kan njan boen foe na loesoe-prijs
6. Sortoe seti Gado ben meki foe gebroiki den wini foe na loesoe-prijs foe Krestes?
6 Ma disi no ben wani taki taki den ben sa gi na libisma famiri now wantewante volmaaktifasi na skinfasi, bika efoe den no ben wini na sondoe natuur foe na libisma, dan volmaaktifasi na skinfasi ben sa de wan sani di no ben kan (Rome sma 7:18-24). Fa èn oten den ben sa wini sondoe fasi? Fosi Gado ben seti sani so, taki 144.000 hemel ’priester foe wi Gado, ben sa tiri na grontapoe leki kownoe’ makandra nanga Krestes Jesus (Openbaring 5:9, 10; 7:4; 14:1-3). Nanga jepi foe den, den winimarki foe na loesoe-prijs sa gebroiki safrisafri gi na libisma famiri ini wan pisiten foe doesoen jari. — 1 Korente sma 15:24-26; Openbaring 21:3, 4.
7. (a) San na a njoen froebontoe, soema na den partij di de na ini a tori, èn sortoe prakseri a e dini? (b) Foe san-ede wan dede ben moesoe feni presi foe meki na njoen froebontoe ben kan de, èn sortoe ròl na broedoe foe Krestes e prei?
7 Den 144.000 kownoe-priester „den e bai na mindri foe na libisma famiri” nanga na marki dati (Openbaring 14:4). Disi e doe nanga jepi foe „wan njoen froebontoe”. Na froebontoe disi na wan akroederi a mindri Jehovah Gado èn na jeje Israèl foe Gado, foe meki den memre foe na froebontoe dini leki kownoe nanga priester (Jeremia 31:31-34; Galasia sma 6:16; Hebrew sma 8:6-13; 1 Petrus 2:9). Ma fa wan froebontoe a mindri Gado èn na onvolmaakti libisma kan? Paulus e poeroe kon a krin: „Pe wan froebontoe [a mindri Gado èn na onvolmaakti libisma] de, den moesoe kan sori na dede foe na libisma di sroto na froebontoe. Bika wan froebontoe e teri abra dede srakti-ofrandi, foedi noiti a abi krakti solanga na libisma di sroto na froebontoe e libi ete”. — Hebrew sma 9:16, 17.
8, 9. Fa na loesoe-prijs abi foe doe nanga na njoen froebontoe?
8 Foe dati-ede, na froeloesoe paiman di Jesus de na Mindriman foe en, de fanowdoe gi na njoen froebontoe, pe Jesus de na Mindriman. Paulus ben skrifi: „Wan Gado de èn wan Mindriman a mindri Gado nanga libisma, na sma, Krestes Jesus, di gi ensrefi leki wan srefi loesoe-prijs gi ala sma — foe disi kotoigi moesoe gi tapoe den spesroetoe ten foe dati” (1 Timoteus 2:5, 6). Den wortoe dati fiti spesroetoe gi den 144.000, nanga soema na njoen froebontoe e sroto.
9 Di Gado ben sroto wan froebontoe nanga na Israèl na skinfasi, dan a no ben kisi reti na wet te leki di fosi na broedoe foe meti srakti-ofrandi ben trowe (Hebrew sma 9:18-21). Na a srefi fasi Krestes ben moesoe meki „a broedoe foe na froebontoe” lon so taki na njoen froebontoe ben kan bigin wroko (Mateus 26:28; Lukas 22:20). Ala di Krestes e handri leki Hei-priester èn so srefi leki „mindriman foe wan njoen froebontoe” Gado e gebroiki na waarde foe na broedoe foe Jesus foe na boen foe den sma di den e tjari kon na ini a njoen froebontoe èn e teri den leki sma di abi regtfardiki fasi na wet (Hebrew sma 9:15; Rome sma 3:24; 8:1, 2). Dan Gado kan teki den na ini a njoen froebontoe foe de hemel Kownoe-Priester! Leki na Mindriman èn Heipriester foe den Jesus e jepi den foe kibri wan krin posisi na fesi Gado. — Hebrew sma 2:16; 1 Johanes 2:1, 2.
Tjari den sani konmakandra na grontapoe
10, 11. (a) Fa na loesoe-prijs abi krakti tapoe trawan boiti den salfoe-kresten wawan? (b) Soema na den bigi ipi, èn sortoe posisi den e teki na Gado?
10 Na soso den salfoe kresten sa ondrofeni wan froeloesoe nanga jepi foe loesoe-prijs, na pardon di den e kisi pardon foe na sondoe foe den? Nôno, Gado de bezig foe verzoen ala tra sani nanga en srefi foedi a e meki vrede nanga jepi foe na broedoe di lon na a pina-oedoe, soleki fa Kolose sma 1:14, 20 e meki kon a krin. Disi abi foe doe nanga den sani na ini hemel (den 144.000) so srefi den sani na grontapoe. Den kriboi wan na den di fiti foe kisi libi na grontapoe, sma di sa njan boen foe volmaakti libi na ini a paradijs na grontapoe. Spesroetoe sensi 1935 dan na wan fasi di orga den e wroko na en foe tjari den sma disi konmakandra. Openbaring 7:9-17 e froeteri foe den leki „wan bigi ipi” di e kisi froeloesoe foe Gado èn na Lam. Te now ete den moesoe pasa „na bigi benawtoe” libilibi èn ’sma moesoe e tjari den go na fonten foe watra foe libi’, bika Openbaring 20:5 e sori taki den disi sa kon a libi dorodoro, èn sa abi volmaakti libisma libi, na a kaba foe na doesoen jari tiri foe Krestes. Den wan di e pasa wan lasti tesi na ini a volmaakti libisma fasi foe den, den sa froeklari regtfardiki foe têgo libi na grontapoe. — Openbaring 20:7, 8.
11 Tokoe den memre foe na bigi ipi leki wan seti foe wan pisiten, ben wasi den langa krosi foe den kaba. . . èn meki a kon weti ini na broedoe foe na Lam” (Openbaring 7:14). Krestes no e wroko gi den leki Mindriman foe na njoen froebontoe, ma tokoe den e njan boen foe na froebontoe disi nanga jepi foe na wroko foe Gado kownoekondre. Ma te now ete Krestes e wroko gi den leki heipriester, nanga jepi foe soema Gado kan gebroiki na loesoe-prijs — èn e gebroiki dati troetroe foe sofara den e froeklari den regtfardiki now leki mati foe Gado. (Teki gersi Jakobus 2:23.) Na ini a Millennium (na doesoen jari tiri), dan safrisafri ’den sa meki den e kon fri foe na katibo foe pori [te leki te foe kaba den] abi na glori fri foe den pikin foe Gado’. — Rome sma 8:21.
12. Na tapoe na fondamenti foe san Gado ben handri nanga den getrow man na ini den ten bifosi den kresten?
12 Na ini na tori foe na posisi di den abi na fesi foe Gado, dan a ben sa kan gersi taki den wan di de foe na bigi ipi, e kenki pikinso nomo foe den anbegiman di ben de fosi den kresten. Ma ini na tori foe den lastiwan, Gado e handri nanga na loesoe-prijs seti di e kon na prakseri (Rome sma 3:25, 26). Den ben abi pardon foe den sondoe foe den soso foe wan pisiten (Psalm 32:1, 2). Na presi foe krinkrin froeloesoe foe na „sabi di den sabi taki den abi sondoe”, dan den meti-ofrandi ben sorgoe „foe den memre den sondoe”. — Hebrew sma 10:1-3.
13. Sortoe wini wi abi moro leki den foetoeboi foe Gado bifosi den ten foe den kresten?
13 A de tra fasi nanga troe kresten ini na ten disi. Den e anbegi tapoe na gron foe wan loesoe-prijs di pai! Nanga jepi foe na Hei-Priester foe den, den ’e kon nanga fri foe taki èn sondro frede na a kownoe-stoeroe foe no-froedini boenfasi’ (Hebrew sma 4:14-16). Kon verzoen nanga Gado no de wan ofoe tra gro di sma e howpoe na tapoe, ma wan troe sani di de noja! (2 Korente sma 5:20). Te den e doe fowtoe, den kan kisi troetroe pardon (Efeise sma 1:7). Den abi wan konsensi di meki kon krin troetroe (Hebrew sma 9:9; 10:22; 1 Petrus 3:21). Den blesi disi de wan pikin tesi a fesi foe na glori fri foe den pikin foe Gado di den foetoeboi foe Jehovah sa njan boen foe en ini na ten di e kon!
Na dipi foe na koni èn lobi foe Gado
14, 15. Fa na loesoe-prijs e meki na koni foe Gado di sma no man froestan, èn so srefi na regtfardiki fasi èn lobi foe en kon a krin?
14 Fa na loesoe-prijs de wan toemoesi moi presenti foe Jehovah! Na seti disi sma kan froestan esi-esi èn tokoe a de so dipi taki a e wiki wan dipi respeki na a moro bigi koniman. Na loekoe di wi ben loekoe a fasi fa na loesoe-prijs e wroko, no ben go dipi kwetikweti ete. Tokoe wi e bari taki nanga na apostel Paulus: „O den dipi foe na goedoe èn koni èn sabi foe Gado! Fa sma no man foe froestan den kroetoe foe en èn fa sma no man foe feni den pasi foe en!” (Rome sma 11:33) Na koni foe Jehovah sma e si foedi a ben man foe froeloesoe na libisma famiri èn ben man foe regtfardiki na soevereiniteit foe en. Nanga jepi foe na loesoe-prijs „na regtfardiki fasi foe Gado meki kon a krin . . . Gado poti [Krestes] leki zoen-ofrandi nanga jepi foe bribi ini na broedoe foe en”. — Rome sma 3:21-26.
15 Sma no kan sori tapoe fowtoe foe Gado taki a ben gi den anbegiman, di ben de bifosi den kresten, pardon foe den sondoe di den ben doe na ini a ten di pasa. Boiti foe dati, sma no kan sori tapoe fowtoe foe Jehovah taki a froeklari den salfoewan regtfardiki leki manpikin foe en, ofoe na bigi ipi leki den mati foe en (Rome sma 8:33). Nanga bigi kostoe gi ensrefi Gado ben handri volmaakti ini akroederi nanga en wet, èn dorodoro regtfardiki èn nanga dati a ben e gi wan dorodoro boeweisi gi na lei foe Satan taki Jehovah de wan onregtfardiki tiriman! Na lobi di no e soekoe wini gi en srefi nomo èn di Gado abi gi den meki sani foe en, ben kon a krin so srefi sondro degedege. — Rome sma 5:8-11.
16. (a) Na sortoe fasi na loesoe-prijs sorgoe taki na strei-aksi ini na tori foe na soifri-retifasi foe den foetoeboi foe Gado loesoe? (b) Fa na loesoe-prijs e gi wan fondamenti gi bribi ini na njoen grontapoe foe regtfardiki fasi di de foe kon?
16 Na fasi fa na loesoe-prijs ben gi, ben loesoe so srefi na strei aksi ini na tori foe soifri-retifasi foe den foetoeboi foe Gado. Na gi jesi foe Jesus wawan ben doe dati (Odo 27:11; Rome sma 5:18, 19). Ma poti na tapoe foe dati dan ete na libi nanga waka foe den 144.000 kresten di tan getrow te na dede ala di den e miti gens foe Satan! (Openbaring 2:10) Na loesoe-prijs e meki taki a tan taki den e kisi leki paiman libi sondro foe dede moro — libi di no kan pori! (1 Korente sma 15:53; Hebrew sma 7:16) Na boeweri foe Satan taki sma no kan froetrow na tapoe den foetoeboi foe Gado, e tron na so wan fasi wan don sani! Na loesoe-prijs gi wi so srefi wan steifi fondamenti foe froetrow ini den pramisi foe Gado. Wi kan si wan seti gi froeloesoe di „meki steifi na wet” nanga jepi foe na loesoe-ofrandi (Hebrew sma 8:6). Na a fasi disi wan njoen grontapoe foe regtfardiki fasi e djaranti! — Hebrew sma 6:16-19.
No misi a prakseri foe dati
17. (a) Fa son sma e sori taki den e misi na prakseri foe na loesoe-prijs? (b) San kan boeweigi wi foe tan krin na moreel fasi?
17 Foe njan boen foe na loesoe-prijs dan a de fanowdoe taki sma e teki sabi na ini den, e sori bribi èn e libi akroederi bijbel markitiki (Johanes 3:16; 17:3). Ma no foeroe sma de klariklari foe doe disi (Mateus 7:13, 14). Srefi ondro troe kresten, sonwan kan ’teki na no-froedini boenfasi foe Gado èn misi na prakseri foe dati’ (2 Korente sma 6:1). Na ini den jari di pasa foe eksempel, doesoendoesoen sma sluit uit foe seksueel fowtoe fasi foe tjari den srefi. Fa a de wan sjen sani, te joe loekoe ala sani di Jehovah nanga Krestes doe gi wi! Na warderi gi na loesoe-prijs no moesoe boeweigi sma foe wani sorgoe taki ’den no e frigiti taki den kon krin foe den sondoe di den doe langa ten pasa kaba’? (2 Petrus 1:9) Nanga reti Paulus e memre kresten so srefi taki: „Den ben bai oenoe nanga wan prijs. Gi foe dati-ede spesroetoe Gado glori na ini oenoe skin” (1 Korente sma 6:20). Te wi tan memre disi, dan dati e gi wi wan krakti boeweigi foe ati foe tan krin na moreel fasi! — 1 Petrus 1:14-19.
18. Fa wan kresten di e fadon na ini serjoesoe sondoe, kan meki te now ete boen gebroiki foe na loesoe-prijs gi ensrefi?
18 Èn efoe wan sma fadon now kaba na ini serjoesoe sondoe? A ben sa moesoe njan boen foe na pardon di na loesoe-prijs e meki a kan kisi, èn meki lobi opziener gi en jepi (Jakobus 5:14, 15). Srefi efoe krakti tranga leri de fanowdoe, dan wan kresten di abi berow no moesoe lasi ati na ondro den sortoe tranga leri dati (Hebrew sma 12:5). Wi abi na toemoesi moi bijbel djaranti disi: „Efoe wi e bekenti den sondoe foe wi, dan a de getrow èn regtfardiki, so taki a e gi wi pardon foe wi sondoe èn e krin wi foe ala onregtfardiki fasi”. — 1 Johanes 1:9.
19. Fa wan kresten kan si fowtoe fasi fa a ben tjari ensrefi èn di ben feni presi bifo a ben leri sabi na waarheid?
19 Sontron kresten e lasi ati pasa marki foe na fasi ede fa den tjari den srefi ini den ten di pasa. „Bifosi wi ben kon na ini a waarheid,” wan brada di ben lasi ati ben skrifi, „mi wefi nanga mi ben kisi genitale Herpes. Sontron wi e abi na firi taki wi no krin, neleki wi no e ’fiti’ na ini na krin organisâsi foe Jehovah”. A troe taki srefi baka di den tron wan kresten, son sma kan koti pen, na ini wan bepaalde marki, foe fowtoe di ben pasa kaba (Galasia sma 6:7). Ma tokoe reide no de foe abi na firi taki joe no-krin na ini den ai foe Jehovah efoe joe ben abi berow. „Na broedoe foe Krestes” man foe „krin wi konsensi foe dede wroko”. — Hebrew sma 9:14.
20. Fa bribi ini na loesoe-prijs kan froeloesoe wan kresten foe firi taki a abi fowtoe èn di no de fanowdoe?
20 Ija bribi ini na loesoe-prijs kan jepi foe fri wi foe den hebi foe fowtoe di no de fanowdoe. Wan jongoe sisa ben bekenti: „Moro leki erfoe jari now kaba mi haswa nanga na doti gwenti foe masturbatie [na gwenti foe prei nanga den sjen presi]. Na wan bepaalde momenti pikinso moro mi ben libi na gemeente, nanga na meine taki Jehovah noiti ben sa wani foe so wan tegoe sma ben sa doti en gemeente.” Ma wi moesoe hori na prakseri taki Jehovah „[de] boen èn klari foe gi pardon” solanga wi e feti nanga boen konsensi teige onregtfardiki fasi èn no e gi wi srefi abra na dati! — Psalm 86:5.
21. Fa na loesoe-prijs moesoe abi krakti tapoe na fasi fa wi e loekoe den wan di e doe ati sani nanga wi?
21 Na loesoe-prijs moesoe wroko toe tapoe a fasi fa wi moesoe handri nanga trawan. Fa joe e handri foe eksempel, te wan kompe-kresten e doe joe wan ati sani? Joe e sori na kresten fasi foe gi pardon fri? (Lukas 17:3, 4) Joe de „safoe ini firi, èn e gi [trawan] pardon na wan fri fasi, so leki Gado e gi joe pardon toe na wan fri fasi nanga jepi foe Krestes” (Efeise sma 4:32). Ofoe sani e poesoe joe foe hori en na bere? Dati ben sa wani taki seiker taki joe e misi na prakseri foe na loesoe-prijs. — Mateus 6:15.
22, 23. (a) Sortoe krakti na loesoe-prijs moesoe abi tapoe den marki èn fasi foe libi foe wi? (b) Sortoe fasti bosroiti ala kresten moesoe teki ini na tori foe na loesoe-prijs?
22 Te foe kaba dan warderi gi na loesoe-prijs moesoe abi wan tranga krakti tapoe den marki èn den fasi foe libi foe wi. Paulus ben taki foe disi: „Den ben bai joe nanga wan prijs; no tron moro langa srafoe foe libi sma” (1 Korente sma 7:23). Den fanowdoe sani na skinfasi — oso, wroko, njanjan, krosi — de te now ete na sani di na libi foe joe e drai lontoe en? Ofoe joe e soekoe fosi na Kownoekondre, èn e poti froetrow na ini na pramisi foe Gado taki a e sorgoe gi joe? (Mateus 6:25-33) Joe e wroko tranga gi joe basi sondro foe meki nofo presi gi theokrasia wroko? Prakseri taki Krestes „ben gi en srefi gi wi foe . . . krin wan pipel gi en srefi di ben sa de wan sani gi en wawan, fajafaja gi toemoesi boen wroko. — Titus 2:14; 2 Korente sma 5:15.
23 „Tangi foe Gado nanga jepi foe Jesus Krestes” gi na presenti disi di e pasa ala sani — na loesoe-prijs! (Rome sma 7:25) Meki a de so taki noiti wi misi na prakseri foe dati, ma taki na presi foe dati wi meki na loesoe-prijs de wan troetroe krakti ini wi libi. Meki a de so taki wi e gi Gado ala ten glori, na ini wi denki,wi wortoe nanga wi doe èn prakseri nanga tangi taki den ben bai wi nanga wan prijs.
Aksi foe loekoe sani ete wantron
◻ Foe san-ede wi e si broedoe leki wan santa sani, èn fa na broedoe foe Krestes ben pristeri na fesi a sma di Jehovah de?
◻ Sortoe ròl Krestes broedoe ben prei na ini a kon kisi krakti foe na njoen froebontoe?
◻ Fa na loesoe-prijs abi wini gi den salfoe-wan èn na bigi ipi?
◻ Fa wi kan meki sma si taki wi no misi na prakseri foe na loesoe-prijs?
[Prenki na tapoe bladzijde 28]
Na krakti foe wan srakti-ofrandi foe verzoen sani e sidon na ini na libibroedoe foe en
[Prenki na tapoe bladzijde 29]
Na sma di e warderi na pardon di Gado e gi, de klariklari foe gi trawan pardon