Jesus libi nanga diniwroko

Den beri en freida, wan leigi grebikamra sonde

A DE now latilati freida bakadina, èn a sabat foe 15 Nisan sa bigin te sondongo. A dede skin foe Jesus e anga slap na a postoe, ma den toe rover di e anga na en sei, e libi ete. Den sma e kari freida bakadina a Sreka foe sani, foe di na a ten disi sma e sreka njanjan èn e klari ala tra wroko di de fanowdoe, èn di no kan wakti te baka a sabat.

A sabat di sa bigin heri esi, no de soso wan gewoon sabat (a di foe seibi dei foe a wiki), ma a de so srefi wan dobroe, ofoe „bigi” sabat. Den e kari en so foe di 15 Nisan, a fosi dei foe a fesa foe seibi-dei foe brede sondro sroedeki (di ala ten de wan sabat, awasi sortoe dei foe a wiki a de), e fadon tapoe a srefi dei leki a gewoon sabat.

Akroederi a wet foe Gado, dan dede skin no kan tan anga na wan postoe a heri neti. Foe dati-ede den djoe e aksi Pilatus foe meki a dede foe den wan di ben kisi strafoe kon moro esi, foe di den moesoe broko den foetoe foe den. Den sroedati, e broko foe dati-ede den foetoe foe den toe rover. Ma foe di a sori taki Jesus dede kaba, meki den no e broko den foetoe foe en. Disi e meki den wortoe foe bijbel kon troe: „Den no sa broko no wan bonjo foe en.”

Ma foe poeroe ibri degedege taki Jesus dede troetroe, meki wan foe den sroedati e soetoe wan lansri na ini en sei. Na lansri e boro a kontren foe na ati èn wantewante broedoe nanga watra e kon a doro. Na apostel Johanes, di de wan ai-kotoigi, e skrifi taki disi e meki wan tra tekst kon troe: „Den sa loekoe go na a Sma di den ben boro.”

Josef foe na foto Arimatea, wan lespeki memre foe a Sanhedrin de drape toe, te den e kiri Jesus. A ben weigri foe agri nanga a hei kroetoe ini a onregtfardiki fasi fa den ben doe nanga Jesus. Josef de, foe taki en leti, wan disipel foe Jesus, ala di a ben frede foe meki sma kon sabi disi. Ma now a e sori deki-ati èn a e go na Pilatus foe aksi en a skin foe Jesus. Pilatus e seni kari a legre ofsiri di den ben poti, èn baka di a ofsiri taki, dati Jesus dede troetroe, dan Pilatus e meki den gi Josef a dede skin.

Josef e teki a skin èn e domroe en na ini fini linnen, so taki den kan sreka en foe a beri. A e kisi jepi foe Nikodeimus, wan tra memre foe a Sanhedrin. Nikodeimus toe no ben froeteri a fesi sma, taki a e bribi na ini Jesus, foe di a ben frede foe lasi en posisi. Ma now a e tjari wan lolo nanga mirre nanga diri aloè foe so wan hondro Romeini pontoe (33 kilo). Den e domroe a skin foe Jesus ini doekoe di abi den spesrei disi na ini, so leki fa den djoe abi a gwenti foe sreka dede skin gi wan beri.

Baka dati den e poti a skin na ini a njoen memre-grebikamra foe Josef, di den koti ini wan klipston na ini a djari di de krosibei. Te foe kaba, den e lolo wan bigi ston poti a fesi a grebikamra. Foe di den wani kaba nanga a beri bifo a sabat bigin, meki den e sreka a skin esi-esi. Foe dati-ede meki Maria Magdalena èn Maria, a mama foe Jakobus a Mendriwan, di ben jepi kande nanga a sreka foe a skin, e hasti densrefi go na oso foe meki moro spesrei èn switismeri oli. Baka na sabat den wani foe sreka a skin foe Jesus moro fara nanga oli, so taki a skin kan tan boen foe wan moro langa pisiten.

Na tra dei foe en, dati na satra (a sabat), den ede-priester èn den Fariseiman e go na Pilatus èn den e taki: „Masra, wi kon memre taki di na bidrigiman ben de a libi ete, a ben taki: ’Baka dri dei mi sa opobaka.’ Gi foe dati-ede a komando foe verzegel a grebikamra boen te na a di foe dri dei, so taki den disipel foe en no kan kon èn foefoeroe en, èn e taigi a pipel: ’A ben opobaka foe dede!’ èn na lasti lei disi sa de moro ogri leki a fosiwan.”

„Oenoe e kisi wan waktiman”, Pilatus e piki. „Go verzegel na grebi so boen leki fa oenoe denki.” Foe dati-ede den e gowe èn den e verzegel a grebi boen, foe di den e marki a ston nanga lak èn den e poti Romeini sroedati leki waktiman.

Froekoe-froekoe sonde mamanten Maria Magdalena, Maria na mama foe Jakobus, makandra nanga Salome, Johana nanga tra oema, e tjari den spesrei go na a grebikamra foe sreka a skin foe Jesus. Te den de a pasi e go, den e taigi makandra: „Soema sa lolo na ston poeroe gi wi foe na doro foe a memre-grebikamra?” Ma te den e doro drape, den e si taki wan gronseki ben feni presi èn na engel foe Jehovah ben lolo a ston poeroe. Den waktiman lon gowe èn a grebikamra leigi! Mateus 27:57–28:2; Markus 15:42–16:4; Lukas 23:50–24:3, 10; Johanes 19:31–20:1; 19:14; 12:42; Levitikus 23:5-7; Deuteronomium 21:22, 23; Psalm 34:20; Sakaria 12:10.

◆ Foe san-ede den e kari freida a Sreka foe sani, èn san na wan „bigi” sabat?

◆ Sortoe tekst e kon troe ini a tori foe a skin foe Jesus?

◆ San Josef nanga Nikodeimus abi foe doe nanga a beri foe Jesus, èn san na a matifasi di den abi nanga Jesus?

◆ San den priester e aksi Pilatus, èn san a e piki?

◆ San e pasa froekoe-froekoe sonde mamanten?