Weri safri-ati!
„Leki sma di Gado ben froekisi, di de santa èn di a lobi, weri gi oensrefi den safoe lobifasi foe sari-ati, boen-atifasi, sakafasi foe jeje, safri-ati nanga langa-pasensi.” — KOLOSESMA 3:12.
1-3. San na apostel Paulus ben taki foe safri-ati nanga tra eigifasi foe Gado na ini Kolosesma 3:12-14?
JEHOVAH e gi na pipel foe en na moro boen krosi na jeje fasi. Foe taki en leti, dan ala den wan di e winsi foe a feni den boen moesoe weri wan krosi di abi tranga titei foe safri-ati. Na eigifasi disi de wan prisiri sani foe di a e meki na span ini wan span-ede situwâsi kon moro mendri. A e kibri sma toe, foe di a e tapoe kesekese.
2 Na apostel Paulus ben gi salfoe kompe kresten deki-ati: „Leki sma di Gado ben froekisi, di de santa èn di a lobi, weri gi oensrefi den safoe lobifasi foe sari-ati, boen-atifasi, sakafasi foe jeje, safri-ati nanga langa-pasensi” (Kolosesma 3:12). Na werkwortoevorm foe na Griki wortoe di den poti abra nanga „weri gi oensrefi” e sori tapoe a handri di sma moesoe handri nanga a sabi taki a de tranga fanowdoe. Salfoewan, di Gado ben froekisi, di de santa, èn di a lobi, no ben moesoe draidrai foe weri gi densrefi den sortoe eigifasi leki safri-ati.
3 Paulus ben taki moro fara: „Tan froedrage makandra èn gi makandra pardon na wan fri fasi te na wan abi wan reide foe go kragi na trawan. So leki Jehovah ben gi oenoe pardon na wan fri fasi, doe so toe. Ma boiti ala den sani disi, weri gi oensrefi lobi, foe di a de wan volmaakti banti foe wánfasi” (Kolosesma 3:13, 14). Lobi, safri-ati nanga tra eigifasi foe Gado e meki taki Kotoigi foe Jehovah man foe „libi nanga makandra ini wánfasi.” — Psalm 133:1-3.
Safri-ati herder de fanowdoe
4. Foe sortoe eigifasi na stof foe na agersi krosi de di troe kresten e weri?
4 Troe kresten e feti a baka foe ’kiri den pisi foe den skin ini a tori foe hoeroedoe, fisti libi, seks lostoe, takroe lostoe nanga gridifasi’, èn den e doe moeiti foe poeroe iniwan owroe krosi di abi wan pisi stof foe hebi atibron, faja-ati, takroedoe, kosikosi nanga dotitaki (Kolosesma 3:5-11). Den e poeroe „na owroe sma di den de” (letterlijk „na owroe sma”) èn e weri „na njoen sma di den de” (noso „na njoen sma”) di de wan krosi di fiti (Efeisesma 4:22-24, Kingdom Interlinear). Na njoen krosi foe den, di brei nanga sari-ati, boen-atifasi, sakafasi foe jeje, safri-ati nanga langa-pasensi, e jepi den foe loesoe problema èn foe libi wan gadofasi libi. — Mateus 5:9; 18:33; Lukas 6:36; Filipisma 4:2, 3.
5. Sortoe sani foe na fasi fa na kresten gemeente e wroko, e meki a de so wan prisiri foe de wan pisi foe na gemeente?
5 Sma di den e si leki sma di sani e waka boen gi den ini a grontapoe disi, foeroe tron abi tranga-ati, srefi ogri-ati (Odo 29:22). Fa a de tra fasi a mindri na pipel foe Jehovah san e gi kowroe-ati! Na kresten gemeente no e wroko leki fa son sma e drai wan bisnis — na wan fasi di e wroko boen ma di de sondro firi èn di kan meki sma de ongolokoe. Na presi foe dati a de wan prisiri sani foe de wan pisi foe na gemeente. Wán reide de taki safrifasi foe ati na wan pisi foe na koni di kresten ini algemeen èn spesroetoe den man di de bekwaam foe leri kompe bribiman e sori. Ija, prisiri e kon foe na leri èn na rai di owroeman, di den poti, e gi, di e gi leri „nanga wan safri-ati di de foe koni”. — Jakobus 3:13.
6. Foe san-ede kresten owroeman moesoe abi safri-ati?
6 Na jeje, noso jejefasi di de moro foeroe foe si, na a pipel foe Gado, e aksi taki man di kisi na frantiwortoe foe de opziener ini na gemeente abi safri-ati, de reidelek èn man foe froestan sma (1 Timoteus 3:1-3). Den dienstknekti foe Jehovah de neleki safri skapoe, no tranga-ede bokoboko, tranga-jesi stonboeriki noso krasi tigri (Psalm 32:9; Lukas 10:3). Foe di den de leki skapoe, meki den moesoe handri nanga den nanga safri-ati èn safoefasi (Tori foe den Apostel 20:28, 29). Ija, Gado e froewakti foe den owroeman taki den abi safri-ati, boen-atifasi, lobifasi èn pasensi gi den skapoe foe en. — Esekièl 34:17-24.
7. Fa owroeman moesoe gi trawan leri noso jepi den wan di siki na jejefasi?
7 Leki „wan srafoe foe Masra” wan owroeman „moesoe de nanga switifasi gi ala sma, de bekwaam foe leri trawan, dwengi ensrefi ondro ogridoe, gi leri nanga safri-ati na den sma di no e sori wan boen fasi, foe di Gado kan gi den kande berow di e tjari den go na wan soifri sabi foe na waarheid” (2 Timoteus 2:24, 25). Kresten herder moesoe hori sma na prakseri na wan safoe fasi, te den e proeberi foe jepi den wan di siki na jeje fasi, bikasi den skapoe na foe Gado. Owroeman no moesoe behandel den leki fa wan sma di den joeroe ben sa doe, ma moesoe abi safri-ati neleki na Toemoesi Boen Herder, Jesus Krestes. — Johanes 10:11-13.
8. San ben pasa nanga a safri-ati Moses, èn foe san-ede?
8 Son leisi wan owroeman kan feni en moeilek foe tan hori wan safri-ati jeje. „Moses ben de na moro safoe-atisma foe ala sma di ben de na tapoe a gron foe grontapoe” (Numeri 12:3). Ma, di den Israèlsma ben de na fesi wan problema na ini Kades taki den ben mankeri watra, den ben meki trobi nanga Moses èn ben feni fowtoe na en taki a ben tjari den komoto foe Egipti go na ini wan drei sabana. Nanga ala di Moses ben froedrage ala den sani na wan safoe-ati fasi, tokoe a ben taki sondro foe denki èn na wan krasi fasi. En nanga Aron ben tanapoe na fesi na pipel èn ben hari sma prakseri poti na densrefi tapoe, ala di Moses ben e taki: „Jere now oenoe oproeroeman! Wi sa meki watra komoto kon gi oenoe foe na leti-opo stonbergi disi?” Dan Moses ben naki na leti-opo stonbergi nanga en tiki toe leisi, èn Gado ben meki „foeroe watra” komoto kon gi na pipel nanga den meti foe den. A no ben plisi Jehovah foe di Moses nanga Aron no ben santa En, dati meki Moses no ben kisi na grani foe tjari den Israèlsma go na ini a Pramisi Kondre. — Numeri 20:1-13; Deuteronomium 32:50-52; Psalm 106:32, 33.
9. Fa na safri-ati foe wan owroeman kan miti tesi?
9 Na safri-ati foe wan kresten owroeman kan miti tesi so srefi na difrenti fasi. Foe eksempel, Paulus ben warskow Timoteus taki a ben kan kon kisi foe doe nanga wan sma di ben „abi bigi-memre” èn „di siki na jejefasi ini a tori foe aksi èn taki-go-taki-kon foe wortoe”. Paulus ben taki moro fara: „Foe den sani disi e kon: djaroesoe, kesekese, kosikosi, ogri prakseri, hebi kroetoe foe pikin sani foe a sei foe sma di na froestan foe den pori èn di no sabi waarheid moro.” Na opziener Timoteus no ben moesoe handri nanga tranga-ati fasi ma ben moesoe ’kibri ensrefi foe den sani disi’, èn a ben moesoe ’soekoe foe kisi na regtfardikifasi, a gi di a ben gi ensrefi ini a dini foe Gado, bribi, lobi, horidoro, safrifasi foe ati’. — 1 Timoteus 6:4, 5, 11.
10. Foe san Titus ben moesoe memre den gemeente?
10 Ala di owroeman moesoe abi safri-ati, tokoe den moesoe de stanfaste gi san de joisti. Titus ben de so, foe di a ben e memre den sma di ben de ini a gemeente na ini Kreta „foe no taki takroe foe no wan sma, foe no lobi foe strei, foe de reidelek, foe sori ala safri-ati gi ala sma” (Titus 3:1, 2). Foe sori foe san-ede kresten moesoe abi safri-ati gi ala sma, dan Titus ben moesoe sori a tapoe fa Jehovah ben abi switifasi nanga lobi. Gado no ben froeloesoe bribiman foe den regtfardiki wroko ede di den ben doe, ma akroederi en sari-ati nanga jepi foe Jesus Krestes. Na safri-ati èn pasensi foe Jehovah wani taki froeloesoe gi wi toe. Foe dati-ede neleki Titus, den owroeman na ini a ten disi moesoe memre den gemeente foe saka densrefi na ondro Gado, waka baka En foe di den e handri nanga trawan na wan safri-ati fasi. — Titus 3:3-7; 2 Petrus 3:9, 15.
Safri-ati e tjari na koni raiman
11. Fa rai moesoe gi akroederi Galasiasma 6:1, 2?
11 Fa a de te wan agersi skapoe ben meki wan fowtoe? Paulus ben taki: „Brada, srefi efoe wan sma doe wan fowtoe bifo a kisi ensrefi, dan joe di abi jejefasi, e proeberi foe meki so wan sma kon boen baka ini wan jeje foe safri-ati, ala di ibriwan foe oenoe e poti ai na ensrefi tapoe, foe tesi no moesoe miti joe toe. Tan tjari den hebi foe makandra, èn meki na so fasi na wet foe na Krestes kontroe” (Galasiasma 6:1, 2). Rai e wroko moro boen te a e gi ini wan jeje foe safri-ati. Srefi efoe owroeman e proeberi foe gi rai na wan sma di abi atibron, dan den moesoe dwengi densrefi, èn froestan taki „wan safri-ati tongo kan broko wan bonjo” (Odo 25:15). Wan sma di tranga leki wan bonjo kan kon safoe nanga jepi foe wan sani di taki na wan safri-ati fasi èn na trangafasi foe en kan smeltri gowe.
12. Fa wan safri-ati jeje e jepi wan raiman?
12 Jehovah na wan safri-ati Leriman, èn na safri-ati fasi foe en foe gi leri e wroko boen ini na gemeente. Disi de spesroetoe so te owroeman e feni en fanowdoe foe gi rai na den wan di abi jepi fanowdoe na jeje fasi. Na disipel Jakobus ben skrifi: „Soema abi koni nanga froestan na oenoe mindri? Meki a sori, nanga en toemoesi boen fasi foe tjari ensrefi, den wroko foe en nanga wan safri-ati di de foe koni.” Safri-ati e kon foe respeki nanga grantangi gi „na koni foe tapoesei”, makandra nanga na erken di wan sma e erken na wan bescheiden fasi en eigi skotoemarki. Wan jeje foe safri-ati èn sakafasi e kibri na raiman foe taki sani èn foe meki fowtoe di e doe sma ogri, èn e meki a de moro makriki foe sma teki na rai foe en. — Jakobus 3:13, 17.
13. Fa wan „safri-ati di de foe koni” abi krakti tapoe na fasi fa wan sma e gi rai?
13 „Wan safri-ati di de foe koni” e kibri wan raiman foe no de grofoe sondro foe prakseri a fesi noso abi tranga-ati. Na a tra sei, broko-ede gi wan matifasi noso foe wan sma feni en boen, no moesoe boeweigi wan owroeman foe taki sani nanga na prakseri foe plisi wan sma na presi foe gi rai di de krin na wan safri-ati fasi èn di abi en fondamenti tapoe Gado Wortoe (Odo 24:24-26; 28:23). Na rai di Amnon ben kisi foe na manpikin foe en papa brada ben gi den winsi foe en satisfaksi, ma a ben kostoe en a libi foe en (2 Samuèl 13:1-19, 28, 29). Dati meki owroeman ini a ten disi no moesoe meki bijbel gronprakseri lasi krakti foe dodoi na konsensi foe wan sma, bika foe doe dati ben kan tjari en libi kon ini kefar. Neleki Paulus, owroeman no moesoe hori na baka foe froeteri trawan „ala na rai foe Gado” (Tori foe den Apostel 20:26, 27; 2 Timoteus 4:1-4). Wan lepi kresten raiman e sori gadofasi frede èn e gi regtfardiki rai nanga wan safri-ati di de foe koni.
14. Foe san-ede wan owroeman moesoe loekoe boen foe a no teki bosroiti di trawan moesoe teki densrefi?
14 Safri-ati makandra nanga hemel koni sa kibri wan owroeman foe aksi sani di tranga foe doe. A moesoe froestan so srefi taki a no de wan koni sani èn a no de joisti foe a teki bosroiti di wan tra sma moesoe teki ensrefi. Wan owroeman ben sa de frantiwortoe gi den bakapisi efoe a ben teki bosroiti gi trawan, èn a ben sa abi wan pisi ini fowtoe te wan sani no waka boen. Wan owroeman kan poti sma prakseri tapoe san bijbel e taki, ma efoe no wan bijbel wet de ini a tori, dan wan sma en eigi prakseri nanga konsensi moesoe bepaal san a sa doe noso no sa doe. Neleki fa Paulus ben taki: „Ibri sma sa tjari en eigi lai” (Galasiasma 6:5; Romesma 14:12). Ma wan sma di e aksi foe kon sabi sani, kan kisi jepi foe teki wan boen bosroiti, foe di wan owroeman e aksi sani di e jepi na sma foe taki-go-taki-kon nanga jepi foe den tekst di abi foe doe nanga den difrenti sei di a ben kan wani foe teki.
15. San moesoe doe efoe wan owroeman no sabi na piki tapoe wan aksi?
15 Efoe wan owroeman no sabi na piki tapoe wan aksi, a no moesoe gi piki soso foe en fesi no fadon. Safri-ati di de foe koni, moesoe tapoe en foe rai san na a piki èn kande foe gi wan fowtoe piki di bakaten ben sa kan meki problema doe kon. „Wan ten de foe tan tiri èn wan ten foe taki” (Preikiman 3:7; teki gersi Odo 21:23). Wan owroeman moesoe „taki” soso te a sabi na piki tapoe wan aksi noso ben doe nofo ondrosoekoe foe gi wan soifri piki. A de wan koni sani foe no piki aksi di e go foe sani di no de seiker. — Odo 12:8; 17:27; 1 Timoteus 1:3-7; 2 Timoteus 2:14.
Na waarde te foeroe raiman de
16, 17. Foe san-ede a fiti foe owroeman aksi rai na makandra?
16 Begi nanga studie sa jepi owroeman foe piki aksi èn foe handri moeilek problema, ma sma no moesoe frigiti taki „ini a de di raiman de foeroe wan sani e kon klari” (Odo 15:22). Foe aksi tra owroeman rai abi leki bakapisi wan tjari kon makandra foe koni, di abi waarde (Odo 13:20). No ala owroeman abi na srefi ondrofeni noso sabi foe na bijbel. Foe dati-ede, safri-ati di de foe koni moesoe boeweigi wan owroeman di no abi so foeroe ondrofeni foe aksi rai na wan owroeman di abi moro sabi èn moro ondrofeni, spesroetoe te wan serjoesoe afersi moesoe behandel.
17 Te den e teki owroeman foe behandel wan serjoesoe afersi, dan tokoe den kan soekoe jepi na wan froetrow fasi. Foe jepi en foe kroetoe den Israèlsma, Moses ben teki „bewaam-man di e frede Gado, man di de foe froetrow, di no wani si onregtfardiki wini na ai”. Ala di den ben de owroeman, den no ben abi so foeroe sabi nanga ondrofeni leki Moses ben abi. Foe dati-ede, „wan moeilek afersi den ben sa tjari go na Moses, ma ala pikin afersi densrefi ben o handri leki kroetoeman” (Exodus 18:13-27). Efoe a de fanowdoe, dan a fiti taki owroeman di e behandel wan moeilek afersi na ini a ten disi kan soekoe foe kisi a jepi foe opziener nanga ondrofeni, ala di densrefi e teki na bosroiti te foe kaba.
18. San na den sani di abi moro foeroe krakti èn di e sorgoe taki joisti bosroiti teki te kroetoe afersi e behandel?
18 Na djoe misjna e taki dati ini Israèl na serjoesoefasi foe na afersi ben bepaal omeni memre wan kroetoebangi ben abi na ini wan pikin foto. Troetroe waarde de ini a de di raiman de foeroe, ala di nomroe wawan no de wan djaranti gi regtfardikifasi, bika a moro bigi pisi sma kan si wan tori fowtoe (Exodus 23:2). Den sani di abi moro foeroe krakti èn di e sorgoe taki sma sa teki joisti bosroiti na den Boekoe èn Gado jeje. Koni nanga safri-ati sa boeweigi kresten foe saka densrefi na ondro den sani disi.
Gi kotoigi nanga safri-ati
19. Fa safri-ati e jepi na pipel foe Jehovah foe gi kotoigi na tra sma?
19 Safri-ati e jepi den dienstknekti foe Jehovah so srefi foe gi kotoigi na sma foe difrenti atifasi (1 Korentesma 9:22, 23). Foe di Jesus ben gi leri nanga safri-ati, meki sakafasisma no ben frede en, leki fa den ben frede den tranga-ati kerki fesiman (Mateus 9:36). A no de foe taki dati den safri-ati fasi foe en ben hari „skapoe” kon na en, no takroe „bokoboko” (Mateus 25:31-46; Johanes 3:16-21). Ala di Jesus ben gebroiki hebi wortoe di a ben handri nanga hoigrisma di gersi bokoboko, tokoe Jehovah Kotoigi moesoe abi safri-ati te den e meki den kroetoe boskopoe foe Gado bekènti ini a ten disi, foe di den no abi na srefi inzicht èn makti di Jesus ben abi (Mateus 23:13-36). Te den e jere na preiki foe na Kownoekondre boskopoe nanga safri-ati, dan ’den wan di abi na joisti jejefasi gi na tégo libi e tron bribiman’, neleki fa sma di gersi skapoe ben doe di ben jere Jesus. — Tori foe den Apostel 13:48.
20. Fa wan studenti foe na bijbel abi winimarki te a e kisi leri nanga safri-ati?
20 Boen bakapisi e kon te nanga safri-ati kotoigi èn leri e gi na trawan èn foe taki nanga den ati tapoe na fondamenti foe joisti taki-go-taki-kon, bijbel gronprakseri èn waarheid. „Santa na Krestes leki Masra ini joe ati”, Petrus ben skrifi, „ala ten de klari foe opo taki gi joesrefi na fesi ibri sma di e aksi joe wan reide foe na howpoe di de ini joe, ma doe disi nanga safri-ati èn nanga dipi respeki” (1 Petrus 3:15). Wan studenti di e kisi leri na wan safri-ati fasi kan hori en prakseri tapoe san a e leri, na presi foe wan krasi fasi foe taki-go-taki-kon di pikinmoro gersi wan trobi e hari en prakseri poeroe noso kande srefi meki a naki foetoe. Neleki Paulus, na so bedinari di e gi leri nanga safri-ati kan taki: „Na no wan fasi wi e gi wan okasi foe sma naki foetoe, so taki fowtoe no kan feni na wi diniwroko” (2 Korentesma 6:3). Srefi gensman e piki son tron na wan boen fasi tapoe den wan di e gi leri nanga safri-ati.
Safri-ati na wan sani di den e aksi foe ala sma
21, 22. Fa safri-ati e tjari winimarki gi ala memre foe na pipel foe Jehovah?
21 Wi no moesoe weri Kresten safri-ati soso foe naki na ati foe den sma di de dorosei foe Jehovah organisâsi. Na eigifasi disi de so srefi toemoesi prenspari ini den matifasi a mindri na pipel foe Gado (Kolosesma 3:12-14; 1 Petrus 4:8). A e bow gemeente na jejefasi te safri-ati owroeman nanga dinari ini na diniwroko e wroko makandra ini wánfasi. Foe sori safri-ati nanga tra eigifasi foe Gado de prenspari gi ibriwan foe na pipel foe Jehovah foe di „wán wet” de gi alamala. — Exodus 12:49; Levitikus 24:22.
22 Safri-ati e jepi foe na vrede èn kolokoe foe na pipel foe Gado kon moro. Foe dati-ede a moesoe de wan pisi foe na stof foe eigifasi di e meki na krosi di ala kresten e weri na oso, ini na gemeente èn na tra presi. Ija, ala dienstknekti foe Jehovah moesoe weri safri-ati.
Fa joe ben sa piki?
◻ Foe san-ede kresten owroeman moesoe abi safri-ati?
◻ Fa safri-ati e tjari na koni raiman?
◻ Sortoe waarde a abi te foeroe raiman de?
◻ Foe san-ede a e tjari winimarki foe gi kotoigi nanga safri-ati?
[Prenki na tapoe bladzijde 29]
Na pipel foe Jehovah de leki skapoe èn sma moesoe handri nanga den nanga safri-ati
[Sma di abi a reti foe a prenki]
Garo Nalbandian
[Prenki na tapoe bladzijde 31]
Safri-ati e meki na pipel foe Jehovah man foe gi kotoigi na sma foe difrenti atifasi