Kolokoe den safri-atisma!
„Kolokoe den safri-atisma de, bikasi den o erf grontapoe.” — MATEUS 5:5.
1. San na a safrifasi foe ati di Jesus ben taki foe en ini en Bergipreiki?
INI en Bergipreiki Jesus Krestes ben taki: „Kolokoe den safri-atisma de, bikasi den o erf grontapoe” (Mateus 5:5). Na safrifasi foe ati disi noso safoe-atifasi no de wan frafra sori foe hoigri safrifasi, so srefi a no de eenvoudig wan natuurlijk eigifasi foe wan sma. Na presi foe dati, a de troetroe wan inisei safri-ati nanga fasi foe lobi vrede di sma e sori ini na fosi presi leki wan piki tapoe na wani èn tiri foe Jehovah Gado. Troetroe safri-atisma abi wan dipi firi taki den abi Gado fanowdoe, san de foe si ini na safri-ati fasi fa den e tjari densrefi nanga kompe libisma. — Romesma 12:17-19; Titus 3:1, 2.
2. Foe san-ede Jesus ben froeklari den safri-atisma kolokoe?
2 Jesus ben froeklari den safri-atisma kolokoe foe di den o erf grontapoe. Leki na volmaakti safri-ati Manpikin foe Gado, dan Jesus na a Moro Prenspari Erfgenaam foe grontapoe (Psalm 2:8; Mateus 11:29; Hebrewsma 1:1, 2; 2:5-9). Ma leki na Messias èn „libisma pikin” a ben sa abi kompe tiriman ini en hemel Kownoekondre (Danièl 7:13, 14, 22, 27). Leki den „kompe-erfgenaam” foe Krestes den salfoe safri-atisma disi o kisi wan pisi foe en erfenis foe a grontapoe (Romesma 8:17). Tra safri-atisma, di gersi skapoe, sa njanboen foe têgo libi ini na Paradijs na ini a grontapoe kontren foe na Kownoekondre (Mateus 25:33, 34, 46; Lukas 23:43). Na froewakti dati e meki den kolokoe foe troe.
3. Sortoe eksempel Gado nanga Krestes e gi ini a tori foe sari-atifasi?
3 Na safri-ati Moro Prenspari Erfgenaam e kisi grontapoe foe en Tata, Jehovah, di de na moro boen eksempel foe safrifasi foe ati. Omeni leisi den Boekoe e taki dati Gado na wan sma di e teki „langa foe kisi atibron èn di abi lobi boen-atifasi . . . pasa marki”! (Exodus 34:6; Nehemia 9:17; Psalm 86:15) A abi bigi krakti ma a e sori so wan safri-ati, taki den anbegiman foe en kan go na en sondro foe frede (Hebrewsma 4:16; 10:19-22). Na Manpikin foe Gado, di ben abi „safri-ati èn sakafasi foe ati”, ben leri en disipel foe abi safri-ati (Mateus 11:29; Lukas 6:27-29). Foe den sei baka den safri-ati srafoe disi foe Gado nanga en Manpikin ben waka baka „na safri-ati èn boen-atifasi foe na Krestes” èn den ben skrifi foe dati. — 2 Korentesma 10:1; Romesma 1:1; Jakobus 1:1, 2; 2 Petrus 1:1.
4. (a) Akroederi Kolosesma 3:12 dan san den wan ben doe di de troetroe safri-atisma? (b) Sortoe aksi e froedini foe wi loekoe den?
4 Ini a ten disi den salfoe Krestensma so boen leki den kompe foe den na grontapoe moesoe abi safri-ati. Baka di den poeroe ala takroefasi, bidrigifasi, hoigrifasi, djaroesoe èn gongosa, dan Gado santa jeje jepi den foe kon njoen ini ’na krakti di e meki den froestan wroko’ (Efeisesma 4:22-24; 1 Petrus 2:1, 2). Den e kisi na deki-ati foe weri gi densrefi „den safoe lobi foe sari-ati, boen-atifasi, sakafasi foe jeje, safri-ati nanga langa-pasensi” (Kolosesma 3:12). Ma san safri-ati wani taki troetroe? Foe san-ede a e tjari winimarki foe abi safri-ati? Èn fa na eigifasi disi kan jepi foe wi kon kolokoe?
Wan moro finifini loekoe foe safri-ati
5. Fa sma kan froeklari safri-ati?
5 Wan safri-atisma de safri ini atifasi èn ini a fasi fa a e tjari ensrefi. Na ini bepaalde vertaling foe na bijbel, a de na bijvoeglijk naamwortoe praʹus di den poti abra nanga „safoe-ati”, „safri-ati” èn „safri”. Ini na klassiek Grikitongo na bijvoeglijk naamwortoe praʹus kan gebroiki gi wan switi winti noso wan safri sten. A kan bodoi wan sma toe di abi switi maniri. Na sabiman W. E. Vine e taki: „A sori di sma e sori na [zelfstandig naamwortoe praʹu·tes] de ini na fosi presi èn moro prenspari gi Gado. A de na jejefasi pe wi e teki a fasi fa En e handri nanga wi leki boen, èn foe dati-ede sondro foe kroetoe noso foe kakafoetoe; a abi foeroe foe doe nanga na wortoe tapeinofrosunē [sakafasi].”
6. Foe san-ede sma kan taki dati safri-ati a no swakifasi?
6 Safri-ati a no swakifasi. „Praus abi safrifasi ini en” na sabiman William Barclay ben skrifi, „ma a baka na safrifasi wan krakti foe staal de.” Krakti de fanowdoe foe abi safri-ati. Foe eksempel, krakti de fanowdoe foe abi safri-ati te sma e tergi noso e froefolgoe wi. Na safri-ati Manpikin foe Gado, Jesus Krestes, ben gi wan toemoesi boen eksempel ini a tori disi. „Te sma ben kosi en, a no ben go kosi baka. Te a ben pina, a no ben go tapoe skreki gi sma, ma ben tan froetrow ensrefi na a sma [Jehovah Gado] di e kroetoe regtfardiki” (1 Petrus 2:23). Leki na safri-ati Jesus, wi kan de seiker taki Gado sa sori den sma di e kosi wi èn e froefolgoe wi (1 Korentesma 4:12, 13). Wi kan de korostoe, neleki fa Stefanus ben de, di den ben froefolgoe, nanga a froestan taki efoe wi de getrow, Jehovah sa horibaka gi wi èn no sa meki noti doe wi ogri foe ala ten. — Psalm 145:14; Tori foe den Apostel 6:15; Filipisma 4:6, 7, 13.
7. San Odo 25:28 e sori foe wan sma di e mankeri safri-ati?
7 Jesus ben abi safri-ati, tokoe a ben sori krakti ini a tanapoe di a ben tanapoe stanfaste gi san de reti (Mateus 21:5; 23:13-39). Iniwan sma di abi „na denki foe Krestes” sa de leki en ini na tori disi (1 Korentesma 2:16). Efoe wan sma no abi safri-ati, a no de leki Krestes. Na presi foe dati, den wortoe disi e fiti en: „Neleki wan foto di den broko go na ini, sondro wan skotoe, na so na man de di no man dwengi en jeje” (Odo 25:28). So wan sma di no abi safri-ati de opo-opo gi na kon na inisei foe fowtoe prakseri di ben kan meki a handri na wan fasi di no fiti. Ala di wan safri-ati kresten no de wan swakisma, tokoe a sabi taki ’wan safri piki e kowroe atibron, ma wan wortoe di e gi sari e meki atibron opo kon’. — Odo 15:1.
8. Foe san-ede a no de makriki foe abi safri-ati?
8 A no de makriki foe abi safri-ati, foe di wi ben erf onvolmaaktifasi èn sondoe (Romesma 5:12). Efoe wi de dienstknekti foe Jehovah, dan wi abi wan feti toe nanga den ogri jeje krakti di kan tesi wi safri-ati nanga jepi foe froefolgoe (Efeisesma 6:12). Èn moro foeroe foe wi e wroko a mindri den wan di abi na grofoe jeje foe grontapoe di de ini na makti foe Didibri (1 Johanes 5:19). So boen fa wi kan kweki safri-ati?
Fa foe kweki safri-ati
9. Sortoe fasi foe si sani sa jepi wi foe kweki safri-ati?
9 Na overtoigi, di abi en fondamenti tapoe bijbel, taki den e aksi foe wi foe sori safri-ati, sa jepi wi foe kweki na eigifasi disi. Dei foe dei wi moesoe wroko foe kweki safri-ati. Noso, wi sa de leki sma di e si safri-ati leki swakifasi èn e prakseri taki boen bakapisi e kon foe a de di joe de asranti, tòf, srefi nanga ogri-ati. Ma Gado Wortoe no e feni bigi-memre boen, èn wan koni odo e taki: „Wan man foe lobi boen-atifasi e handri nanga en eigi sili na wan fasi di e pai, ma na ogri-ati sma e tjari floekoe (a poti di sma e poti en na wan sei) kon na en eigi skin tapoe” (Odo 11:17; 16:18). Sma e tan farawe foe wan grofoe sma di no abi switifasi, awinsi moro foeroe den e doe so foe meki a ogri-atifasi foe en èn a misi di a e misi safri-ati no ati den firi.
10. Ondro sortoe sani wi moesoe saka wisrefi efoe wi wani abi safri-ati?
10 Foe abi safri-ati, wi moesoe saka wisrefi ondro a krakti foe Gado santa jeje, noso wroko krakti. Neleki fa Jehovah ben meki taki a kan dati grontapoe e gi froktoe, na so a e meki den dienstknekti foe en man foe gi den froktoe foe en jeje, pe joe abi safri-ati na ini toe. Paulus ben skrifi: „Na froktoe foe na jeje na lobi, prisiri, vrede, langa-pasensi, switifasi, boen-ati, bribi, safri-ati, dwengi joesrefi. No wan wet e tapoe den sortoe sani disi” (Galasiasma 5:22, 23). Ija, safri-ati na wan foe den froktoe foe Gado jeje di den wan di e plisi en e sori (Psalm 51:9, 10). Èn fa safri-ati e tjari kenki kon! Foe eksempel: Joe ben abi wan ogriman, Tony, di ben e feti, foefoeroe sma, smokkel drugs, de fesiman foe wan montoroe groepoe foe hebiman èn ben de wan pisiten na ini doengroe-oso. Tokoe nanga jepi foe a kisi di a kisi sabi foe bijbel èn nanga na jepi foe Gado jeje, a ben kenki kon tron wan dienstknekti foe Jehovah di abi safri-ati maniri. Na tori foe Tony no de wan aparti sani. So boen san wan sma kan doe efoe wan mankeri foe safri-ati ben de wan pisi foe a sma di a de di ben de moro foeroe foe si?
11. Sortoe ròl begi e prei ini a kweki foe safri-ati?
11 Begi, di komoto foe wi ati, foe kisi Gado jeje èn a froktoe foe en foe safri-ati, sa jepi wi foe kweki na eigifasi disi. Kande wi moesoe ’tan aksi’, so leki fa Jesus ben taki, èn Jehovah Gado sa gi wi san wi ben aksi. Baka di Jesus ben sori taki libisma papa e gi den pikin foe den boen sani, a ben taki: „Efoe oenoe, ala di oenoe de [nanga sondoefasi èn na so fasi te joe teki en gersi] ogri, sabi fa foe gi boen presenti na oen pikin, o moro foeroe na Tata na ini hemel sa gi santa jeje na den wan di e aksi en foe dati!” (Lukas 11:9-13) Begi kan jepi foe meki safri-ati tron wan pisi, di e tan, foe wi atifasi — wan eigifasi di e jepi foe wi nanga den kompe foe wi kon kolokoe.
12. Foe san-ede efoe wi e hori na prakseri taki libisma de onvolmaakti, dan dati kan jepi wi foe abi safri-ati?
12 Foe hori na prakseri taki libisma de onvolmaakti, kan jepi wi foe abi safri-ati (Psalm 51:5). Wi no man denki noso handri na wan volmaakti fasi, neleki fa tra sma no man doe dati, foe dati-ede meki seiker wi moesoe abi empathie (a poti foe wisrefi ini na presi foe trawan) èn handri nanga den leki fa wi ben sa wani foe den handri nanga wi (Mateus 7:12). Na sabi taki wi alamala e meki fowtoe moesoe meki wi gi sma pardon èn abi safri-ati te wi e handri nanga trawan (Mateus 6:12-15; 18:21, 22). Te foe kaba, a no de so, taki wi de grantangi taki Gado e sori lobi èn safri-ati gi wi? — Psalm 103:10-14.
13. Fa a kan jepi wi foe kweki safri-ati efoe wi e erken taki Gado ben gi libisma wan fri wani?
13 Foe erken taki Gado ben gi libisma wan fri wani, kan jepi wi so srefi foe kweki safri-ati. Disi no e gi pasi foe wan sma no gi jesi na den wet foe Jehovah sondro foe a kisi strafoe, ma a e gi pasi foe difrenti de ini tesi a mindri na pipel foe en, san den lobi èn san den no lobi. So boen, meki wi erken taki no wan sma de froeplekti foe fiti na spesroetoe model di wi kande e feni taki, dati na a moro boen wan. Na jejefasi disi sa jepi wi foe abi safri-ati.
14. San moesoe de wi fasti bosroiti ini a tori foe safri-ati?
14 Na fasti bosroiti foe no libi safri-ati, sa jepi wi foe tan kweki na eigifasi disi. Foe saka wisrefi na ondro na krakti foe Jehovah jeje ben tjari wan kenki kon ini wi denki (Rome sma 12:2). Wan safri-ati jeje di gersi di foe Krestes e jepi now foe hori wi foe no teki prati ini „den wroko foe loesoe fasi foe tjari wisrefi, ogri lostoe, a dringi foe win pasa marki, njan èn dringi pasa marki, dringi fesa èn afkodreiwroko di de kontrari na wet”. Wi noiti moesoe libi a safri-ati foe wi, foe moni, sociaal noso tra reide ede noso foe di sma e taki skempi sani foe a lobi di wi lobi dini Gado (1 Petrus 4:3-5). Wi no moesoe meki noti meki wi teki prati ini „den wroko foe na skin”, so taki wi lasi safri-ati èn no sa erf na Kownoekondre foe Gado, noso njanboen foe den blesi foe dati (Galasiasma 5:19-21). Meki ala ten wi boboi na grani foe de den safri-atisma foe Gado, efoe wi kisi salfoe foe kisi hemel libi noso abi wan grontapoe howpoe. Foe doe dati, meki wi loekoe na wan toe foe den winimarki foe safri-ati.
Winimarki foe safri-ati
15. Foe san-ede a de wan koni sani, akroederi Odo 14:30, foe abi safri-ati?
15 Wan safri-ati sma abi korostoefasi foe ati, jeje èn skin. Disi de foe di a no e teki prati ini kesekese, e kon broeja foe den sani di trawan e doe, noso e pina ensrefi nanga broko-ede di e tan go doro. Safri-ati e jepi en foe basi en firi, èn disi e tjari winimarki gi a gesontoe foe en na froestansei èn skinfasi. Wan odo e taki: „Wan korostoe ati na a libi foe na skin” (Odo 14:30). A mankeri foe safri-ati kan meki sma kisi atibron di kan meki a sma kisi heibroedoe noso kan meki problema kon te a skin e broko a njan ini finifini pisi foe a broedoe kan teki en, astma, aisiki nanga tra problema. Wan safri-ati kresten e njanboen foe difrenti winimarki, so srefi „na vrede foe Gado” di e kibri en ati nanga jeje koni (Filipisma 4:6, 7). Fa a de wan koni sani foe abi safri-ati!
16-18. Sortoe krakti safri-ati abi tapoe wi matifasi nanga trawan?
16 Na eigifasi foe safri-ati e meki wi matifasi nanga trawan kon moro boen. Kande wi ben abi fositen na gwenti foe poesoe afersi go a fesi te leki wi ben kisi san wi ben wani. Sma kande ben kisi atibron nanga wi foe di wi ben mankeri sakafasi èn safri-ati. Na ini den sortoe situwâsi disi a no moesoe ben froewondroe wi efoe wi ben fadon go ini a wan kesekese baka a trawan. Ma wan odo e taki: „Pe oedoe no de, na faja e dede, èn pe gongosa no de, kesekese e kowroe. Neleki krofaja gi den krofaja di leti èn oedoe gi na faja, na so wan man di e soekoe trobi e meki wan kesekese kon moro faja” (Odo 26:20, 21). Efoe wi abi safri-ati, dan na presi foe wi ’poti oedoe tapoe na faja’ èn tjalensi trawan, wi sa abi wan boen matifasi nanga den.
17 Wan safri-atisma moro foeroe sa abi boen mati. Sma lobi foe abi demakandra nanga en foe di a abi wan positief fasi, èn den wortoe foe en e gi kowroe-ati èn den switi leki oni (Odo 16:24). Dati ben de so nanga Jesus, di ben kan taki: „Teki mi tjatjari na oen tapoe èn leri foe mi, bika mi abi safri-ati èn sakafasi foe ati, èn oenoe sa feni kowroe-ati gi oen sili. Bika mi tjatjari safoe èn mi lai lekti” (Mateus 11:29, 30). Jesus no ben grofoe, èn na tjatjari foe en no e dwengi joe. Den wan di ben kon na en, a ben handri den boen èn den ben kisi kowroe-ati na jeje fasi. Na situwâsi de netso te wi abi demakandra nanga wan safri-ati kresten mati.
18 Safri-ati e meki kompe bribiman lobi wi. Sondro tweifri, moro foeroe foe den kresten na ini Korente ben hari kon na Paulus foe di a ben begi den „tapoe na gron foe na safri-ati nanga boen-atifasi foe na Krestes” (2 Korentesma 10:1). Den Tesalonikasma seiker ben moesoe doe wan sani leki wan piki tapoe a fasi foe na apostel, foe di a ben de wan safri-ati èn safri leriman (1 Tesalonikasma 2:5-8). A no de foe taki dati den owroeman foe Efeise ben leri foeroe foe Paulus èn ben lobi en sote (Tori foe den Apostel 20:20, 21, 37, 38). Joe e sori safri-ati san e meki trawan lobi joe?
19. Fa safri-ati e jepi na pipel foe Jehovah foe hori na presi foe den ini en organisâsi?
19 Wan safri-ati jejefasi e jepi na pipel foe Jehovah foe saka densrefi èn foe hori na presi foe den ini en organisâsi (Filipisma 2:5-8, 12-14; Hebrewsma 13:17). Safri-ati e tapoe wi foe soekoe foe kisi glori, san abi en fondamenti tapoe bigi-memre èn san de wan têgoe sani gi Gado (Odo 16:5). Wan safri-atisma no e firi ensrefi moro hei leki kompe bribiman, èn a no e proeberi foe sma si en moro boen ala di den trawan e ondrofeni lasi foe dati (Mateus 23:11, 12). Na presi foe dati, a e erken a sondoe fasi foe en èn a abi di a abi Gado seti foe na froeloesoe-ofrandi fanowdoe.
Safri-ati e jepi sma foe kon kolokoe
20. Sortoe krakti safri-ati abi tapoe na osofamiri-libi?
20 Ala dienstknekti foe Gado moesoe memre taki safri-ati na wan froktoe foe en jeje di e jepi sma foe kon kolokoe. Foe eksempel, foe di na pipel foe Jehovah e sori den sortoe eigifasi leki lobi nanga safri-ati, meki so foeroe kolokoe osofamiri de a mindri den. Te man nanga wefi e handri nanga makandra na wan safri-ati fasi, dan den pikin foe den e kweki ini wan korostoe kontren, no ini wan famiri pe grofoe wortoe e taki èn den e handri so. Efoe wan papa e gi den pikin foe en rai na wan safri-ati fasi, dan disi abi wan boen krakti tapoe a jongoe jeje foe den, èn wan safri-ati jejefasi sa tron seiker kande wan pisi foe na sma di den de (Efeisesma 6:1-4). Safri-ati e jepi man foe tan lobi den wefi. A e jepi wefi foe saka densrefi ondro den masra èn e boeweigi pikin foe gi jesi na den papa nanga mama. Safri-ati so srefi e meki den sma foe na osofamiri abi wan jeje foe gi sma pardon san e meki kolokoe kon. — Kolosesma 3:13, 18-21.
21. Foe taki en leti, dan sortoe rai na apostel Paulus ben gi na ini Efeisesma 4:1-3?
21 Safri-ati osofamiri nanga aparti sma e jepi foe kolokoe kon ini den gemeente pe den de. Dati meki na pipel foe Jehovah moesoe doe opregti moeiti foe abi safri-ati. Joe e doe dati? Na apostel Paulus ben begi salfoe kompe kresten foe waka na wan fasi di fiti na hemel kari foe den, e doe disi „nanga ala sakafasi foe jeje èn safri-ati, nanga langa-pasensi, e froedrage makandra ini lobi, e proeberi opregti foe hori na wánfasi foe jeje ini na banti foe vrede di e tjari wánfasi kon” (Efeise sma 4:1-3). Kresten di abi wan grontapoe howpoe so srefi moesoe sori safri-ati nanga tra eigifasi foe gado. Disi na a pasi di e tjari troe kolokoe kon. Kolokoe den safri-atisma de troetroe!
Fa joe ben sa piki?
◻ Foe san-ede safri-atisma de kolokoe?
◻ San a wani taki foe abi safri-ati?
◻ Fa sma kan kweki safri-ati?
◻ San na wan toe winimarki foe safri-ati?