Hori foetoe nanga Jehovah hemel wagi
„Joe moesoe taki den wortoe foe mi gi den, awasi efoe den e jere ofoe den e libi [en].” — ESEKIÈL 2:7.
1, 2. Sortoe kownoe sani foe rèi Esekièl ben si, èn san a ben kisi foe jere?
NA HEMEL wagi foe Jehovah e tanapoe now na fesi en foetoeboi. Nanga ai foe bribi, den e si na kownoe sani dati foe rèi, foe na Soeverein Masra foe den. A de wan glori sani, a e foeroe joe nanga respeki, a de wan grani sani.
2 A srefi kownoe wagi ben rèi kon na fesi Gado profeiti Esekièl, ini wan fisjoen so wan 2600 jari pasa kaba. Komoto foe na wagi disi di e tjari wan kownoestoeroe — na wagi dati na Gado en hemel organisâsi foe jeje mekisani — Jehovah ben gi na komando disi, di e naki sma ati, na Esekièl: „Den manpikin nanga fesi di no abi sjen èn nanga ati di tranga — mi e seni joe go na den, èn joe moesoe taki gi den: ’Disi na san a Soeverein Masra Jehovah ben taki.’ Èn ini a tori foe den, awasi efoe den sa jere ofoe sa libi [en] — bika den na wan tranga-ede oso — den sa kon sabi seiker toe taki wan profeiti ben de na den mindri.” — Esekièl 2:4, 5.
3. Sortoe njoenmodo-ten agersipisi Esekièl abi?
3 Esekièl ben doe na ordroe dati sondro degedege, èn ben dini leki na wan enkri wrokosani na ini Gado anoe. Na a srefi fasi Gado abi now wan enkri organisâsi wrokosani ini en makti. Na Esekièl-groepoe, na salfoe fikapisi, e teki fesi na ini a wroko foe gi wan lasti kotoigi, nanga „wan bigi ipi” foe „tra skapoe” di kon makandra lontoe den, foe jepi den (Openbaring 7:9, 10; Johanes 10:16). Makandra den de „wán ipi”, nanga na Toemoesi Boen Herder, Jesus Krestes, di e tjari den na ondro a soevereiniteit foe na gran Tjariman foe na Wagi, Jehovah Gado.
4, 5. Fa na organisâsi foe Gado di de foe si doe kon, èn san a ben ondrofeni akroederi Jesaja 60:22?
4 Ondro na tiri foe Jehovah, na organisâsi disi di de na a heri grontapoe, ben gro foe wan pikin bigin kon wan krakti wrokosani foe meki na komando bekenti foe „frede Gado èn gi en glori, bika na joeroe foe na kroetoe di en e tjari kon doro kaba” (Openbaring 14:7). Leki fa Esekièl no ben opo ensrefi ofoe ben poti ensrefi leki wan profeiti, na so Gado en organisâsi di de foe si no ben meki ofoe poti ensrefi. A no ben komoto foe libisma wani ofoe moeiti. Na Gado di de a Tjariman foe na Wagi ben meki na organisâsi disi kon de. Nanga na krakti foe Gado jeje èn nanga na horibaka foe santa engel, na pipel foe Jehovah ben ondrofeni so wan kefarlek gro, taki ’na mendriwan ben tron wan makti nâsi’. — Jesaja 60:22.
5 Moro leki 4.000.000 Kotoigi foe Jehovah e meki na Kownoekondre boskopoe bekenti na ini 212 kondre. Den de na ini groepoe, na ini moro leki 63.000 gemeente, di orga na ini kring èn distrikt. Boen bigi seti foe bijkantoro èn foe druk lektuur, e wroko na ondro a tiri foe na Tiri Skin di de leki na ati foe na edekantoro organisâsi. Ne leki den de wán sma, alamala e boeweigi go na fesi, e preiki na boen njoensoe, e leri den wan di e doe wan sani na tapoe dati èn e bow konmakandra presi. Ija, na organisâsi foe Jehovah di de foe si e hori foetoe nanga na hemel wagi èn nanga na Tjariman foe en.
6. San de na ini foe hori foetoe nanga Jehovah organisâsi di de foe si?
6 Efoe joe de wan foe Jehovah Kotoigi, joe e hori foetoe nanga Gado organisâsi di de foe si? Foe doe dati no de soso wan afersi foe go na Kresten konmakandra èn foe gebroiki ten gi na diniwroko. Na a fosi presi, hori foetoe, abi foe doe nanga go na fesi èn jeje gro. A abi na ini, foe abi wan positief fasi foe loekoe, foe poti den joisti sani na fesi trawan èn foe sabi den lasti tori. Efoe wi e hori foetoe nanga Jehovah hemel wagi, dan wi libi e kroederi nanga na boskopoe di wi e meki bekenti.
7. Foe san-ede wi sa wani loekoe na a fasi fa Esekièl ben tjari ensrefi leki profeiti foe Gado?
7 Ini a tori foe hori foetoe, den njoenmodo-ten foetoeboi foe Jehovah kan leri foeroe foe na eksempel foe Esekièl. Ala di Jehovah ben poti en spesroetoe leki wan profeiti, dan tokoe ete Esekièl ben abi firi, sorgoe nanga fanowdoe. Foe eksempel, leki wan jongoe trowman, te joe e teki en gersi nanga trawan, a ben njan pina foe na sari foe lasi en wefi na ini dede. Tokoe noiti a ben lasi na ordroe na ai di a ben kisi leki profeiti foe Jehovah. Wi kan tranga wi srefi foe hori foetoe nanga Gado organisâsi di de foe si, foe di wi e loekoe fa Esekièl ben tjari ensrefi so srefi na ini tra afersi. Disi sa meki wi man foe hori foetoe nanga en organisâsi di no de foe si.
A ben teki na ordroe èn ben doe en
8. Sortoe eksempel Esekièl ben gi ini a tori foe na ordroe di a ben kisi?
8 Esekièl ben gi wan toemoesi boen eksempel foe di a ben teki na ordroe di a ben kisi èn ben doe en. Ma gi jesi èn deki-ati ben de fanowdoe foe doe en, bika wi e leisi: „O manpikin foe libisma, no frede den; èn no frede den wortoe foe den, bika den de tranga-ede sma èn sani di e djoekoe joe, èn a mindri kroektoetere joe e libi. No frede den wortoe foe den, èn no meki frede naki joe foe na fesi foe den ede, bika den na wan tranga-ede oso. Èn joe moesoe taki den wortoe foe mi gi den, awasi efoe den e jere ofoe e libi [en], bika den tranga-ede srefisrefi. Èn joe, o manpikin foe libisma, jere san mi e taigi joe. No kon tranga-ede leki na tranga-ede oso.” — Esekièl 2:6-8.
9. Soso efoe a ben doe san, Esekièl ben sa de fri foe broedoe paiman?
9 Esekièl no ben sa moesoe abi mi-no-kefasi ofoe frede, so taki a ben sa abi doronomo wan poesoe fanowdoe foe doe na ordroe di a ben kisi. A ben sa de fri foe broedoe paiman, soso efoe a ben de klariklari èn ben taki den wortoe foe Jehovah fri èn sondro frede. Esekièl ben kisi foe jere: „Efoe joe ben warskow wan takroe sma èn a no e drai baka troetroe gi na takroedoe foe en èn gi na takroe pasi foe en, dan ensrefi sa dede foe den fowtoe di a abi; ma joe, joe ben sa froeloesoe joe eigi sili.” — Esekièl 3:19.
10. Fa na Esekièl-groepoe ben boeweisi foe de leki na profeiti?
10 Leki ini na kefal foe Esekièl, dan na salfoe Esekièl-groepoe ben teki na ordroe di Gado ben gi den èn den e doe dati. Efoe wi de Kotoigi foe Jehovah wi moesoe memre taki na libi foe wi nanga den libi foe trawan e anga foe na gi jesi di wi e gi jesi (1 Timoteus 4:15, 16). Ibri Kotoigi moesoe hori foetoe nanga Jehovah organisâsi. Gado no sa tai wi baka en wagi èn srepi wi. Mi-no-kefasi nanga wan ati di prati e afrontoe na Tjariman foe na Wagi. Foe dati-ede na organisâsi foe Jehovah di de foe si e gi wi tranga foe gi den afersi foe Gado na moro prenspari presi ini wi libi. Te wi e doe boen ala ten baka tapoe den sortoe tranga disi di den e gi wi, dan a e meki wi hori foetoe nanga Gado organisâsi èn e meki wi santa diniwroko kon moro hei leki wan routine, ofoe san e go foe ensrefi. Jehovah pipel leki wan man e sori na gi di den e gi densrefi, di e gi froewondroe. Foe wi sei leki aparti sma wi moesoe hori foetoe nanga dati.
A ben teki den wortoe foe Gado na ini en ati
11. Sortoe eksempel Esekièl ben gi ini a tori foe den wortoe foe Gado?
11 Esekièl ben gi so srefi wan toemoesi boen eksempel foe di a ben teki den wortoe foe Gado na ini en ati. Di a ben kisi na komando, a ben njan wan lolo, ofoe wan boekoe lolo, di Gado ben gi en. „Na ini mi mofo a ben kon switi leki oni”, Esekièl ben taki. Ala di na lolo ben foeroe nanga „kragisingi èn soktoe èn barikrei”, a ben switi gi Esekièl bika a ben warderi na grani foe teki presi gi Jehovah. A ben de wan switi ondrofeni gi na profeiti foe doe na wroko di Gado ben gi en foe doe. Gado ben taigi en: „Manpikin foe libisma, ala den wortoe foe mi di mi sa taki gi joe, teki [den] na ini joe ati èn jere nanga joe eigi jesi” (Esekièl 2:9–3:3, 10). Den fisjoen dati ben meki Esekièl froestan heri boen na san Gado ben gi en pasi foe teki prati èn den ben tranga en matifasi nanga Jehovah.
12. San Esekièl ben doe na ini moro leki twenti jari foe profeiti diniwroko?
12 Esekièl ben kisi fisjoen èn boskopoe gi difrenti marki èn arkiman. A ben moesoe arki heri boen èn baka dati a ben moesoe taki èn doe so leki fa a ben kisi ordroe foe doe. Njoen bodoi nanga fasi foe doe sani ben tjari moro nanga moro kon a krin gi en, na ini wan ten foe 22 jari foe profeiti dienst. Son tron Esekièl ben taki wan boskopoe di ben abi spesroetoe wortoe. Na tra okasi a ben meki gebroiki foe en anoe, foetoe nanga en heri skin, foe bodoi sani, so leki foe didon na fesi wan ston di ben agersi Jerusalem (Esekièl 4:1-8). Na eksempel foe en na ini persoonlijk afersi, so leki fa a ben doe na tapoe a dede foe en wefi, so srefi ben tjari wan boskopoe (Esekièl 24:15-19). A ben moesoe sabi den lasti bodoi, ben moesoe pristeri ala ten na joisti boskopoe èn doe den joisti sani na a joisti ten. Esekièl ben tai nanga Jehovah na ini wan boen krosibei matifasi foe wroko di ben kon betre moro nanga moro.
13. Fa wi kan bow wan krosibei matifasi nanga Jehovah?
13 Na a srefi fasi wi moesoe teki na Wortoe foe Gado na ini wi ati foe bow èn hori wan krosibei matifasi nanga Jehovah leki en kompe wrokoman (1 Korente sma 3:9). Foe wi hori foetoe nanga Gado en organisâsi di de foe si na ini na afersi disi, e aksi foe wi hori foetoe nanga na lonwatra foe jeje njanjan so leki dati e gi na a joisti ten (Mateus 24:45-47). Na „soifri tongo” ala ten baka e gro (Sefanja 3:9). Soso nomo efoe wi sabi den moro njoen bodoi, wi sa man troetroe foe gi jesi èn doe wan sani na tapoe a tiri foe na Tjariman foe na Wagi.
14, 15. Sortoe routine de fanowdoe foe hori foetoe nanga na esi-esi fasi foe waka di Gado organisâsi e poti?
14 Foe dati-ede wi abi wan boen routine fanowdoe foe wi srefi begi, foe studeri nanga wi srefi èn foe teki prati na ini a santa diniwroko foe na boen njoensoe (Rome sma 15:16). Memre na eksempel foe Esekièl foe njan na lolo di ben abi den boskopoe foe Gado na ini. Esekièl ben njan na heri lolo, a no ben njan wan pisi foe en. A no ben poeroe den pisi na den trawan di ensrefi kande ben lobi moro. Na a srefi fasi na studie nanga wi srefi foe na Bijbel èn den Kresten publikâsi moesoe seti so, foe wi kan hori foetoe nanga na lonwatra foe jeje njanjan èn wi sa moesoe teki ala san poti na tapoe na jeje tafra, dati abi na ini toe den moro dipi waarheid.
15 Wi e meki moeiti, nanga jepi foe begi, foe kon froestan na fasti njanjan? Hori foetoe, e aksi foe na sabi nanga froestan foe wi gro pasa den fosi gronprakseri, bika wi e leisi: „Ibri sma di e gebroiki merki, no sabi na wortoe foe regtfardikifasi, bika a de wan pikin-nengre. Ma fasti njanjan de gi lepi sma, gi den di nanga a gebroiki foe en, oefen a koni foe si sani, foe si boen nanga ogri” (Hebrew sma 5:13, 14). Ija, go na fesi na jeje fasi de wan prenspari pisi foe hori foetoe nanga na esi-esi fasi foe waka di Gado en organisâsi e poti.
Mi-no-kefasi no ben meki a lasi-ati
16, 17. Fa Esekièl ben kakafoetoe gi mi-no-kefasi, spotoe èn a doe di sma no ben doe wan sani na tapoe a boskopoe?
16 Esekièl so srefi ben gi wan toemoesi boen eksempel foe di a ben gi jesi èn no ben gi pasi foe mi-no-kefasi ofoe spotoe meki a lasi-ati. Foe di wi e hori foetoe nanga na gro foe na soifri tongo, dan na a srefi fasi wi e loekoe go na a sei pe na Tjariman foe na kownoe Wagi e go. Na so wi de klariklari foe doe wan sani na tapoe den komando foe en, èn wi kisi tranga foe no lasi-ati foe na mi-no-ke-fasi ofoe spotoe foe den wan nanga soema wi e taki foe den kroetoe boskopoe foe Jehovah. Leki fa a ben de nanga Esekièl, dan Gado ben warskow wi na fesi taki son sma ben sa de fajafaja gensman, èn di de tranga foe ede èn tranga foe ati. Trawan no ben sa jere foe di den no wani foe arki na Jehovah (Esekièl 3:7-9). Ete trawan ben sa de toefesi-sma, leki fa Esekièl 33:31, 32 e froeklari: „Den sa kon na inisei na joe, leki fa sma e kon na inisei, èn den sa sidon na joe fesi leki mi pipel; èn seiker den sa jere den wortoe foe joe, ma dati den no sa doe, bika nanga den mofo den e taki foe takroe lostoe èn na baka den onregtfardiki wini den ati e go. Èn loekoe! joe de gi den leki wan singi foe lobi di e prisiri sma firi, leki wan moi sten di e prei heri boen wan pokoe-sani di abi titei. Èn den seiker sa jere den wortoe foe joe, ma no wan foe den e doe den.”
17 San ben sa de na bakapisi? Vers 33 e taki moro fara: „Èn te a e kon troe — loekoe! a moesoe kon troe — den toe sa moesoe sabi taki wan profeiti ben de na den mindri”. Den wortoe dati e meki kon a krin taki Esekièl no ben gi abra foe di den sma no ben doe wan sani. Na mi-no-kefasi foe trawan no ben meki en no ke. Awasi sma ben arki ofoe no, a ben gi jesi na Gado èn ben doe na ordroe di a ben kisi.
18. Sortoe aksi joe ben kan aksi joe srefi?
18 Na organisâsi foe Jehovah di de foe si, nownow e gi moro tranga na a meki bekenti taki ala sma moesoe frede Gado èn gi en glori. Joe e horidoro te sma e taki takroe foe joe, foe di joe e tanapoe fri èn sondro frede ini a gi foe kotoigi foe a Kownoekondre, foe di joe de krin na ini joe libifasi? Joe e tanapoe kankan te joe de na marki foe druk, foe di joe no e teki broedoe, no e anbegi nationaal agersi sani, no e njan grontapoe feisti dei? — Mateus 5:11, 12; 1 Petrus 4:4, 5.
19. Ini a tori foe na sei foe go, san wi sa doe efoe wi e hori foetoe nanga Jehovah hemel wagi?
19 Na fasi foe waka disi no de wan makriki wan, ma den wan di e horidoro te na a kaba sa kisi froeloesoe (Mateus 24:13). Nanga na jepi foe Jehovah wi no sa meki sma foe na grontapoe meki wi kon leki den, èn taki na so fasi wi no e hori foetoe moro nanga Jehovah hemel wagi (Esekièl 2:8; Rome sma 12:21). Efoe wi e hori foetoe nanga na organisâsi foe engel di gersi wan wagi, dan esi-esi wi sa gi jesi na a tiri èn rai di wi e kisi nanga jepi foe Gado en organisâsi di de foe si. Jehovah e sorgoe gi san wi abi fanowdoe foe kakafoetoe gi den ròs tapoe wi bribi, foe tan hori na Wortoe foe libi steifi èn foe tan poti wi ai tapoe den jeje troetroe sani di na Kownoe Tjariman foe na hemel wagi de na moro prenspari pisi foe den.
Sani boeweigi wi foe hori foetoe
20. San na wan toe sani di Esekièl ben skrifi, di ben sa moesoe boeweigi wi foe hori foetoe?
20 Den fisjoen foe Esekièl moesoe boeweigi wi foe hori foetoe. No wawan a ben meki den kroetoe foe Gado na tapoe Israèl bekenti ma ben skrifi so srefi profeititori foe wan kon boen baka. Esekièl ben sori go na a Sma di ben sa abi na reti na a wet, foe tiri na tapoe a kownoestoeroe foe Jehovah na a fasti ten (Esekièl 21:27). Na Kownoe Foetoeboi dati, „David”, ben sa tjari Gado pipel kon makandra agen èn ben sa tjari den leki herder (Esekièl 34:23, 24). Ala di Gog foe Magog ben sa opo go feti nanga den, Gado ben sa froeloesoe den, èn den ben sa dwengi den feanti foe En foe ’sabi Jehovah’ ala di den ben go na ini pori (Esekièl 38:8-12; 39:4, 7). Dan den foetoeboi foe Gado ben sa njanboen foe libi sondro kaba na ini wan seti foe soifri anbegi pe wan jeje tempel de ini a tori. Watra foe libi di e lon komoto foe na santa presi ben sa de wan fonten foe njanjan nanga a dresi foe sma, èn gron leki wan famiri goedoe den ben sa gi den foe na blesi foe den. — Esekièl 40:2; 47:9, 12, 21.
21. Foe san-ede na ròl foe den njoenmodo-ten Kotoigi foe Jehovah de moro bigi leki di foe Esekièl?
21 Fa Esekièl ben moesoe feni en wan span sani foe skrifi den profeititori dati! Tokoe na ròl foe den njoenmodo-ten Kotoigi foe Jehovah de moro bigi. Wi e libi ini wan ten pe son wan foe den profeititori dati e kon troe. Foe taki en leti, wi e teki prati fajafaja na ini a kon troe foe son wan foe den. Ibri wan foe wi e sori nanga na fasi fa wi e libi, taki wi abi na overtoigi taki Jesus e tiri now leki na Sma di abi na reti na wet? Wi srefi abi na overtoigi taki Jehovah heri-esi sa santa ensrefi èn sa froeloesoe den wan di e hori foetoe nanga en organisâsi, tjari den go na ini en njoen grontapoe? (2 Petrus 3:13) Na overtoigi dati, makandra nanga wroko foe bribi, e sori taki wi troetroe e hori foetoe nanga Jehovah hemel wagi.
Go doro foe hori foetoe
22. San wi kan doe foe tan farawe foe sani di e meki wi prakseri go na wan tra sei, so taki wi kan tan abi wan krin jeje loekoe?
22 Efoe wi ’poti wi foetoe na pasi kaba’, wi no moesoe loekoe na baka èn angri foe iniwan sani di na grontapoe abi foe gi (Lukas 9:62; 17:32; Titus 2:11-13) So boen meki wi dwengi ibri lostoe foe tjari goedoe kon makandra na grontapoe, èn meki wi hori wi ai soifri, hori den srapoe tapoe a Kownoekondre (Mateus 6:19-22, 33). Foe meki wi libi kon moro eenvoudig, èn poeroe grontapoe hebi poti a wan sei awasi pe a kan, sa jepi wi foe hori foetoe nanga Jehovah organisâsi (Hebrew sma 12:1-3). Sani di e meki wi prakseri go na wan tra sei kan meki taki, wi si na fisjoen foe na hemel wagi nanga na Tjariman foe en, frafra. Ma nanga en jepi wi kan tan abi wan krin jeje loekoe, so leki Esekièl ben abi.
23. San kotrow Kotoigi moesoe doe foe na boen foe njoenwan?
23 Wan pisi foe wi frantiwortoe leki Jehovah Kotoigi abi na ini, foe jepi den foeroe njoenwan foe hori foetoe nanga Gado hemel wagi. Na ini 1990 pikinmoro 10.000.000 ben de na a Memrefesa foe Jesus Krestes dede. Ala di foeroe foe den sma disi kande e go na wan toe Kresten konmakandra, den moesoe si o prenspari a de foe go na fesi nanga Jehovah organisâsi di de foe si. Leki kotrow Kotoigi wi kan jepi den nanga a jeje di wi e sori èn na deki-ati di wi e gi.
24. San wi moesoe doe na ini den ten disi foe heimarki?
24 Disi na ten foe heimarki. Nanga ai foe bribi, wi ben si na hemel wagi rèi kon na fesi wi. Na kownoe Tjariman foe na Wagi ben gi en organisâsi di de foe si, wan ordroe foe preiki gi den nâsi so taki, na ini a kaba pisi, den sa sabi soema na Jehovah (Esekièl 39:7). Gebroiki na gran okasi disi dorodoro foe abi wan prati na ini a leti di Gado o kisi leti leki a Soeverein èn na santa di en nen o kon santa, foe di joe e hori foetoe nanga Jehovah hemel wagi.
Fa joe ben sa piki?
◻ Sortoe eksempel Esekièl ben gi ini a tori foe na ordroe di a ben kisi?
◻ San a wani taki foe hori foetoe nanga Gado organisâsi?
◻ Fa Esekièl ben si den wortoe foe Jehovah?
◻ Fa wi kan waka na baka na eksempel foe Esekièl foe kakafoetoe gi mi-no-kefasi?
◻ San moesoe boeweigi den foetoeboi foe Jehovah foe hori foetoe nanga en hemel wagi?
[Prenki na tapoe bladzijde 29]
San de fanowdoe foe hori foetoe nanga Jehovah hemel wagi?
[Prenki na tapoe bladzijde 30]
Esekièl ben abi warderi gi den grani di Gado ben gi en. Joe e warderi den toe?